| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੫. ਮਹਾਯਞ੍ਞવਗ੍ਗੋ
5. Mahāyaññavaggo
੧-੨. ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤਾਦਿવਣ੍ਣਨਾ
1-2. Sattaviññāṇaṭṭhitisuttādivaṇṇanā
੪੪-੪੫. ਪਞ੍ਚਮਸ੍ਸ ਪਠਮੇ વਿਞ੍ਞਾਣਟ੍ਠਿਤਿਯੋਤਿ ਪਟਿਸਨ੍ਧਿવਿਞ੍ਞਾਣਸ੍ਸ ਠਾਨਾਨਿ। ਸੇਯ੍ਯਥਾਪੀਤਿ ਨਿਦਸ੍ਸਨਤ੍ਥੇ ਨਿਪਾਤੋ, ਯਥਾ ਮਨੁਸ੍ਸਾਤਿ ਅਤ੍ਥੋ। ਅਪਰਿਮਾਣੇਸੁ ਹਿ ਚਕ੍ਕવਾਲ਼ੇਸੁ ਅਪਰਿਮਾਣਾਨਂ ਮਨੁਸ੍ਸਾਨਂ વਣ੍ਣਸਣ੍ਠਾਨਾਦਿવਸੇਨ ਦ੍વੇਪਿ ਏਕਸਦਿਸਾ ਨਤ੍ਥਿ। ਯੇਪਿ ਹਿ ਕਤ੍ਥਚਿ ਯਮਕਭਾਤਰੋ વਣ੍ਣੇਨ વਾ ਸਣ੍ਠਾਨੇਨ વਾ ਸਦਿਸਾ ਹੋਨ੍ਤਿ, ਤੇਸਮ੍ਪਿ ਆਲੋਕਿਤવਿਲੋਕਿਤਕਥਿਤਹਸਿਤਗਮਨਟ੍ਠਾਨਾਦੀਹਿ વਿਸੇਸੋ ਹੋਤਿਯੇવ। ਤਸ੍ਮਾ ਨਾਨਤ੍ਤਕਾਯਾਤਿ વੁਤ੍ਤਾ। ਪਟਿਸਨ੍ਧਿਸਞ੍ਞਾ ਪਨ ਨੇਸਂ ਤਿਹੇਤੁਕਾਪਿ ਦ੍વਿਹੇਤੁਕਾਪਿ ਅਹੇਤੁਕਾਪਿ ਹੋਤਿ। ਤਸ੍ਮਾ ਨਾਨਤ੍ਤਸਞ੍ਞਿਨੋਤਿ વੁਤ੍ਤਾ। ਏਕਚ੍ਚੇ ਚ ਦੇવਾਤਿ ਛ ਕਾਮਾવਚਰਦੇવਾ। ਤੇਸੁ ਹਿ ਕੇਸਞ੍ਚਿ ਕਾਯੋ ਨੀਲੋ ਹੋਤਿ, ਕੇਸਞ੍ਚਿ ਪੀਤਕਾਦਿવਣ੍ਣੋ। ਸਞ੍ਞਾ ਪਨ ਤੇਸਂ ਦ੍વਿਹੇਤੁਕਾਪਿ ਤਿਹੇਤੁਕਾਪਿ ਹੋਤਿ, ਅਹੇਤੁਕਾ ਨਤ੍ਥਿ। ਏਕਚ੍ਚੇ ਚ વਿਨਿਪਾਤਿਕਾਤਿ ਚਤੁਅਪਾਯવਿਨਿਮੁਤ੍ਤਾ ਉਤ੍ਤਰਮਾਤਾ ਯਕ੍ਖਿਨੀ, ਪਿਯਙ੍ਕਰਮਾਤਾ, ਫੁਸ੍ਸਮਿਤ੍ਤਾ, ਧਮ੍ਮਗੁਤ੍ਤਾਤਿ ਏવਮਾਦਿਕਾ ਅਞ੍ਞੇ ਚ વੇਮਾਨਿਕਾ ਪੇਤਾ। ਏਤੇਸਞ੍ਹਿ ਪੀਤਓਦਾਤਕਾਲ਼ਮਙ੍ਗੁਰਚ੍ਛવਿਸਾਮવਣ੍ਣਾਦਿવਸੇਨ ਚੇવ ਕਿਸ ਥੂਲਰਸ੍ਸਦੀਘવਸੇਨ ਚ ਕਾਯੋ ਨਾਨਾ ਹੋਤਿ, ਮਨੁਸ੍ਸਾਨਂ વਿਯ ਦ੍વਿਹੇਤੁਕਤਿਹੇਤੁਕਅਹੇਤੁਕવਸੇਨ ਸਞ੍ਞਾਪਿ। ਤੇ ਪਨ ਦੇવਾ વਿਯ ਨ ਮਹੇਸਕ੍ਖਾ, ਕਪਣਮਨੁਸ੍ਸਾ વਿਯ ਅਪ੍ਪੇਸਕ੍ਖਾ ਦੁਲ੍ਲਭਘਾਸਚ੍ਛਾਦਨਾ ਦੁਕ੍ਖਪੀਲ਼ਿਤਾ વਿਹਰਨ੍ਤਿ। ਏਕਚ੍ਚੇ ਕਾਲ਼ਪਕ੍ਖੇ ਦੁਕ੍ਖਿਤਾ ਜੁਣ੍ਹਪਕ੍ਖੇ ਸੁਖਿਤਾ ਹੋਨ੍ਤਿ। ਤਸ੍ਮਾ ਸੁਖਸਮੁਸ੍ਸਯਤੋ વਿਨਿਪਤਿਤਤ੍ਤਾ વਿਨਿਪਾਤਿਕਾਤਿ વੁਤ੍ਤਾ। ਯੇ ਪਨੇਤ੍ਥ ਤਿਹੇਤੁਕਾ, ਤੇਸਂ ਧਮ੍ਮਾਭਿਸਮਯੋਪਿ ਹੋਤਿ ਪਿਯਙ੍ਕਰਮਾਤਾਦੀਨਂ વਿਯ।
44-45. Pañcamassa paṭhame viññāṇaṭṭhitiyoti paṭisandhiviññāṇassa ṭhānāni. Seyyathāpīti nidassanatthe nipāto, yathā manussāti attho. Aparimāṇesu hi cakkavāḷesu aparimāṇānaṃ manussānaṃ vaṇṇasaṇṭhānādivasena dvepi ekasadisā natthi. Yepi hi katthaci yamakabhātaro vaṇṇena vā saṇṭhānena vā sadisā honti, tesampi ālokitavilokitakathitahasitagamanaṭṭhānādīhi viseso hotiyeva. Tasmā nānattakāyāti vuttā. Paṭisandhisaññā pana nesaṃ tihetukāpi dvihetukāpi ahetukāpi hoti. Tasmā nānattasaññinoti vuttā. Ekacce ca devāti cha kāmāvacaradevā. Tesu hi kesañci kāyo nīlo hoti, kesañci pītakādivaṇṇo. Saññā pana tesaṃ dvihetukāpi tihetukāpi hoti, ahetukā natthi. Ekacceca vinipātikāti catuapāyavinimuttā uttaramātā yakkhinī, piyaṅkaramātā, phussamittā, dhammaguttāti evamādikā aññe ca vemānikā petā. Etesañhi pītaodātakāḷamaṅguracchavisāmavaṇṇādivasena ceva kisa thūlarassadīghavasena ca kāyo nānā hoti, manussānaṃ viya dvihetukatihetukaahetukavasena saññāpi. Te pana devā viya na mahesakkhā, kapaṇamanussā viya appesakkhā dullabhaghāsacchādanā dukkhapīḷitā viharanti. Ekacce kāḷapakkhe dukkhitā juṇhapakkhe sukhitā honti. Tasmā sukhasamussayato vinipatitattā vinipātikāti vuttā. Ye panettha tihetukā, tesaṃ dhammābhisamayopi hoti piyaṅkaramātādīnaṃ viya.
ਬ੍ਰਹ੍ਮਕਾਯਿਕਾਤਿ ਬ੍ਰਹ੍ਮਪਾਰਿਸਜ੍ਜਬ੍ਰਹ੍ਮਪੁਰੋਹਿਤਮਹਾਬ੍ਰਹ੍ਮਾਨੋ। ਪਠਮਾਭਿਨਿਬ੍ਬਤ੍ਤਾਤਿ ਤੇ ਸਬ੍ਬੇਪਿ ਪਠਮਜ੍ਝਾਨੇਨ ਅਭਿਨਿਬ੍ਬਤ੍ਤਾ। ਬ੍ਰਹ੍ਮਪਾਰਿਸਜ੍ਜਾ ਪਨ ਪਰਿਤ੍ਤੇਨ ਅਭਿਨਿਬ੍ਬਤ੍ਤਾ, ਤੇਸਂ ਕਪ੍ਪਸ੍ਸ ਤਤਿਯੋ ਭਾਗੋ ਆਯੁਪ੍ਪਮਾਣਂ। ਬ੍ਰਹ੍ਮਪੁਰੋਹਿਤਾ ਮਜ੍ਝਿਮੇਨ, ਤੇਸਂ ਉਪਡ੍ਢਕਪ੍ਪੋ ਆਯੁਪ੍ਪਮਾਣਂ, ਕਾਯੋ ਚ ਤੇਸਂ વਿਪ੍ਫਾਰਿਕਤਰੋ ਹੋਤਿ। ਮਹਾਬ੍ਰਹ੍ਮਾਨੋ ਪਣੀਤੇਨ, ਤੇਸਂ ਕਪ੍ਪੋ ਆਯੁਪ੍ਪਮਾਣਂ, ਕਾਯੋ ਚ ਪਨ ਤੇਸਂ ਅਤਿવਿਪ੍ਫਾਰਿਕੋવ ਹੋਤਿ। ਇਤਿ ਤੇ ਕਾਯਸ੍ਸ ਨਾਨਤ੍ਤਾ ਪਠਮਜ੍ਝਾਨવਸੇਨ ਸਞ੍ਞਾਯ ਏਕਤ੍ਤਾ ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋਤਿ વੇਦਿਤਬ੍ਬਾ।
Brahmakāyikāti brahmapārisajjabrahmapurohitamahābrahmāno. Paṭhamābhinibbattāti te sabbepi paṭhamajjhānena abhinibbattā. Brahmapārisajjā pana parittena abhinibbattā, tesaṃ kappassa tatiyo bhāgo āyuppamāṇaṃ. Brahmapurohitā majjhimena, tesaṃ upaḍḍhakappo āyuppamāṇaṃ, kāyo ca tesaṃ vipphārikataro hoti. Mahābrahmāno paṇītena, tesaṃ kappo āyuppamāṇaṃ, kāyo ca pana tesaṃ ativipphārikova hoti. Iti te kāyassa nānattā paṭhamajjhānavasena saññāya ekattā nānattakāyā ekattasaññinoti veditabbā.
ਯਥਾ ਚ ਤੇ, ਏવਂ ਚਤੂਸੁ ਅਪਾਯੇਸੁ ਸਤ੍ਤਾ। ਨਿਰਯੇਸੁ ਹਿ ਕੇਸਞ੍ਚਿ ਗਾવੁਤਂ, ਕੇਸਞ੍ਚਿ ਅਡ੍ਢਯੋਜਨਂ, ਕੇਸਞ੍ਚਿ ਯੋਜਨਂ ਅਤ੍ਤਭਾવੋ ਹੋਤਿ, ਦੇવਦਤ੍ਤਸ੍ਸ ਪਨ ਯੋਜਨਸਤਿਕੋ ਜਾਤੋ। ਤਿਰਚ੍ਛਾਨੇਸੁਪਿ ਕੇਚਿ ਖੁਦ੍ਦਕਾ, ਕੇਚਿ ਮਹਨ੍ਤਾ। ਪੇਤ੍ਤਿવਿਸਯੇਸੁਪਿ ਕੇਚਿ ਸਟ੍ਠਿਹਤ੍ਥਾ, ਕੇਚਿ ਅਸੀਤਿਹਤ੍ਥਾ ਹੋਨ੍ਤਿ, ਕੇਚਿ ਸੁવਣ੍ਣਾ, ਕੇਚਿ ਦੁਬ੍ਬਣ੍ਣਾ। ਤਥਾ ਕਾਲਕਞ੍ਚਿਕਾ ਅਸੁਰਾ। ਅਪਿਚੇਤ੍ਥ ਦੀਘਪਿਟ੍ਠਿਕਪੇਤਾ ਨਾਮ ਸਟ੍ਠਿਯੋਜਨਿਕਾਪਿ ਹੋਨ੍ਤਿ। ਸਞ੍ਞਾ ਪਨ ਸਬ੍ਬੇਸਮ੍ਪਿ ਅਕੁਸਲવਿਪਾਕਾਹੇਤੁਕਾવ ਹੋਤਿ। ਇਤਿ ਆਪਾਯਿਕਾਪਿ ਨਾਨਤ੍ਤਕਾਯਾ ਏਕਤ੍ਤਸਞ੍ਞਿਨੋਤ੍વੇવ ਸਙ੍ਖ੍ਯਂ ਗਚ੍ਛਨ੍ਤਿ।
Yathā ca te, evaṃ catūsu apāyesu sattā. Nirayesu hi kesañci gāvutaṃ, kesañci aḍḍhayojanaṃ, kesañci yojanaṃ attabhāvo hoti, devadattassa pana yojanasatiko jāto. Tiracchānesupi keci khuddakā, keci mahantā. Pettivisayesupi keci saṭṭhihatthā, keci asītihatthā honti, keci suvaṇṇā, keci dubbaṇṇā. Tathā kālakañcikā asurā. Apicettha dīghapiṭṭhikapetā nāma saṭṭhiyojanikāpi honti. Saññā pana sabbesampi akusalavipākāhetukāva hoti. Iti āpāyikāpi nānattakāyā ekattasaññinotveva saṅkhyaṃ gacchanti.
ਆਭਸ੍ਸਰਾਤਿ ਦਣ੍ਡਉਕ੍ਕਾਯ ਅਚ੍ਚਿ વਿਯ ਏਤੇਸਂ ਸਰੀਰਤੋ ਆਭਾ ਛਿਜ੍ਜਿਤ੍વਾ ਛਿਜ੍ਜਿਤ੍વਾ ਪਤਨ੍ਤੀ વਿਯ ਸਰਤਿ વਿਸ੍ਸਰਤੀਤਿ ਆਭਸ੍ਸਰਾ। ਤੇਸੁ ਪਞ੍ਚਕਨਯੇ ਦੁਤਿਯਤਤਿਯਜ੍ਝਾਨਦ੍વਯਂ ਪਰਿਤ੍ਤਂ ਭਾવੇਤ੍વਾ ਉਪਪਨ੍ਨਾ ਪਰਿਤ੍ਤਾਭਾ ਨਾਮ ਹੋਨ੍ਤਿ, ਤੇਸਂ ਦ੍વੇ ਕਪ੍ਪਾ ਆਯੁਪ੍ਪਮਾਣਂ। ਮਜ੍ਝਿਮਂ ਭਾવੇਤ੍વਾ ਉਪਪਨ੍ਨਾ ਅਪ੍ਪਮਾਣਾਭਾ ਨਾਮ ਹੋਨ੍ਤਿ, ਤੇਸਂ ਚਤ੍ਤਾਰੋ ਕਪ੍ਪਾ ਆਯੁਪ੍ਪਮਾਣਂ। ਪਣੀਤਂ ਭਾવੇਤ੍વਾ ਉਪਪਨ੍ਨਾ ਆਭਸ੍ਸਰਾ ਨਾਮ ਹੋਨ੍ਤਿ, ਤੇਸਂ ਅਟ੍ਠ ਕਪ੍ਪਾ ਆਯੁਪ੍ਪਮਾਣਂ। ਇਧ ਪਨ ਉਕ੍ਕਟ੍ਠਪਰਿਚ੍ਛੇਦવਸੇਨ ਸਬ੍ਬੇવ ਤੇ ਗਹਿਤਾ। ਸਬ੍ਬੇਸਞ੍ਹਿ ਤੇਸਂ ਕਾਯੋ ਏਕવਿਪ੍ਫਾਰੋવ ਹੋਤਿ, ਸਞ੍ਞਾ ਪਨ ਅવਿਤਕ੍ਕવਿਚਾਰਮਤ੍ਤਾ વਾ ਅવਿਤਕ੍ਕਅવਿਚਾਰਾ વਾਤਿ ਨਾਨਾ।
Ābhassarāti daṇḍaukkāya acci viya etesaṃ sarīrato ābhā chijjitvā chijjitvā patantī viya sarati vissaratīti ābhassarā. Tesu pañcakanaye dutiyatatiyajjhānadvayaṃ parittaṃ bhāvetvā upapannā parittābhā nāma honti, tesaṃ dve kappā āyuppamāṇaṃ. Majjhimaṃ bhāvetvā upapannā appamāṇābhā nāma honti, tesaṃ cattāro kappā āyuppamāṇaṃ. Paṇītaṃ bhāvetvā upapannā ābhassarā nāma honti, tesaṃ aṭṭha kappā āyuppamāṇaṃ. Idha pana ukkaṭṭhaparicchedavasena sabbeva te gahitā. Sabbesañhi tesaṃ kāyo ekavipphārova hoti, saññā pana avitakkavicāramattā vā avitakkaavicārā vāti nānā.
ਸੁਭਕਿਣ੍ਹਾਤਿ ਸੁਭੇਨ વੋਕਿਣ੍ਣਾ વਿਕਿਣ੍ਣਾ, ਸੁਭੇਨ ਸਰੀਰਪ੍ਪਭਾવਣ੍ਣੇਨ ਏਕਗ੍ਘਨਾਤਿ ਅਤ੍ਥੋ। ਏਤੇਸਞ੍ਹਿ ਨ ਆਭਸ੍ਸਰਾਨਂ વਿਯ ਛਿਜ੍ਜਿਤ੍વਾ ਛਿਜ੍ਜਿਤ੍વਾ ਪਭਾ ਗਚ੍ਛਤਿ। ਪਞ੍ਚਕਨਯੇ ਪਨ ਪਰਿਤ੍ਤਮਜ੍ਝਿਮਪਣੀਤਸ੍ਸ ਚਤੁਤ੍ਥਜ੍ਝਾਨਸ੍ਸ વਸੇਨ ਸੋਲ਼ਸਬਾਤ੍ਤਿਂਸਚਤੁਸ੍ਸਟ੍ਠਿਕਪ੍ਪਾਯੁਕਾ ਪਰਿਤ੍ਤਅਪ੍ਪਮਾਣਸੁਭਕਿਣ੍ਹਾ ਨਾਮ ਹੁਤ੍વਾ ਨਿਬ੍ਬਤ੍ਤਨ੍ਤਿ। ਇਤਿ ਸਬ੍ਬੇਪਿ ਤੇ ਏਕਤ੍ਤਕਾਯਾ ਚੇવ ਚਤੁਤ੍ਥਜ੍ਝਾਨਸਞ੍ਞਾਯ ਏਕਤ੍ਤਸਞ੍ਞਿਨੋ ਚਾਤਿ વੇਦਿਤਬ੍ਬਾ। વੇਹਪ੍ਫਲਾਪਿ ਚਤੁਤ੍ਥવਿਞ੍ਞਾਣਟ੍ਠਿਤਿਮੇવ ਭਜਨ੍ਤਿ। ਅਸਞ੍ਞਸਤ੍ਤਾ વਿਞ੍ਞਾਣਾਭਾવਾ ਏਤ੍ਥ ਸਙ੍ਗਹਂ ਨ ਗਚ੍ਛਨ੍ਤਿ, ਸਤ੍ਤਾવਾਸੇਸੁ ਗਚ੍ਛਨ੍ਤਿ।
Subhakiṇhāti subhena vokiṇṇā vikiṇṇā, subhena sarīrappabhāvaṇṇena ekagghanāti attho. Etesañhi na ābhassarānaṃ viya chijjitvā chijjitvā pabhā gacchati. Pañcakanaye pana parittamajjhimapaṇītassa catutthajjhānassa vasena soḷasabāttiṃsacatussaṭṭhikappāyukā parittaappamāṇasubhakiṇhā nāma hutvā nibbattanti. Iti sabbepi te ekattakāyā ceva catutthajjhānasaññāya ekattasaññino cāti veditabbā. Vehapphalāpi catutthaviññāṇaṭṭhitimeva bhajanti. Asaññasattā viññāṇābhāvā ettha saṅgahaṃ na gacchanti, sattāvāsesu gacchanti.
ਸੁਦ੍ਧਾવਾਸਾ વਿવਟ੍ਟਪਕ੍ਖੇ ਠਿਤਾ ਨ ਸਬ੍ਬਕਾਲਿਕਾ, ਕਪ੍ਪਸਤਸਹਸ੍ਸਮ੍ਪਿ ਅਸਙ੍ਖੇਯ੍ਯਮ੍ਪਿ ਬੁਦ੍ਧਸੁਞ੍ਞੇ ਲੋਕੇ ਨ ਉਪ੍ਪਜ੍ਜਨ੍ਤਿ। ਸੋਲ਼ਸਕਪ੍ਪਸਹਸ੍ਸਅਬ੍ਭਨ੍ਤਰੇ ਬੁਦ੍ਧੇਸੁ ਉਪ੍ਪਨ੍ਨੇਸੁਯੇવ ਉਪ੍ਪਜ੍ਜਨ੍ਤਿ। ਧਮ੍ਮਚਕ੍ਕਪ੍ਪવਤ੍ਤਿਸ੍ਸ ਭਗવਤੋ ਖਨ੍ਧਾવਾਰਟ੍ਠਾਨਸਦਿਸਾ ਹੋਨ੍ਤਿ। ਤਸ੍ਮਾ ਨੇવ વਿਞ੍ਞਾਣਟ੍ਠਿਤਿਂ ਨ ਸਤ੍ਤਾવਾਸਂ ਭਜਨ੍ਤਿ। ਮਹਾਸੀવਤ੍ਥੇਰੋ ਪਨ ‘‘ਨ ਖੋ ਪਨ ਸੋ, ਸਾਰਿਪੁਤ੍ਤ, ਆવਾਸੋ ਸੁਲਭਰੂਪੋ, ਯੋ ਮਯਾ ਅਨਾવੁਤ੍ਥਪੁਬ੍ਬੋ ਇਮਿਨਾ ਦੀਘੇਨ ਅਦ੍ਧੁਨਾ ਅਞ੍ਞਤ੍ਰ ਸੁਦ੍ਧਾવਾਸੇਹਿ ਦੇવੇਹੀ’’ਤਿ (ਮ॰ ਨਿ॰ ੧.੧੬੦) ਇਮਿਨਾ ਸੁਤ੍ਤੇਨ ਸੁਦ੍ਧਾવਾਸਾਪਿ ਚਤੁਤ੍ਥવਿਞ੍ਞਾਣਟ੍ਠਿਤਿਂ ਚਤੁਤ੍ਥਸਤ੍ਤਾવਾਸਞ੍ਚ ਭਜਨ੍ਤੀਤਿ વਦਤਿ, ਤਂ ਅਪ੍ਪਤਿਬਾਹਿਯਤ੍ਤਾ ਸੁਤ੍ਤਸ੍ਸ ਅਨੁਞ੍ਞਾਤਂ।
Suddhāvāsā vivaṭṭapakkhe ṭhitā na sabbakālikā, kappasatasahassampi asaṅkheyyampi buddhasuññe loke na uppajjanti. Soḷasakappasahassaabbhantare buddhesu uppannesuyeva uppajjanti. Dhammacakkappavattissa bhagavato khandhāvāraṭṭhānasadisā honti. Tasmā neva viññāṇaṭṭhitiṃ na sattāvāsaṃ bhajanti. Mahāsīvatthero pana ‘‘na kho pana so, sāriputta, āvāso sulabharūpo, yo mayā anāvutthapubbo iminā dīghena addhunā aññatra suddhāvāsehi devehī’’ti (ma. ni. 1.160) iminā suttena suddhāvāsāpi catutthaviññāṇaṭṭhitiṃ catutthasattāvāsañca bhajantīti vadati, taṃ appatibāhiyattā suttassa anuññātaṃ.
ਨੇવਸਞ੍ਞਾਨਾਸਞ੍ਞਾਯਤਨਂ ਯਥੇવ ਸਞ੍ਞਾਯ, ਏવਂ વਿਞ੍ਞਾਣਸ੍ਸਾਪਿ ਸੁਖੁਮਤ੍ਤਾ ਨੇવ વਿਞ੍ਞਾਣਂ ਨਾવਿਞ੍ਞਾਣਂ। ਤਸ੍ਮਾ વਿਞ੍ਞਾਣਟ੍ਠਿਤੀਸੁ ਨ વੁਤ੍ਤਂ। ਦੁਤਿਯੇ ਸਮਾਧਿਪਰਿਕ੍ਖਾਰਾਤਿ ਮਗ੍ਗਸਮਾਧਿਸ੍ਸ ਸਮ੍ਭਾਰਾ।
Nevasaññānāsaññāyatanaṃ yatheva saññāya, evaṃ viññāṇassāpi sukhumattā neva viññāṇaṃ nāviññāṇaṃ. Tasmā viññāṇaṭṭhitīsu na vuttaṃ. Dutiye samādhiparikkhārāti maggasamādhissa sambhārā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya
੧. ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤਂ • 1. Sattaviññāṇaṭṭhitisuttaṃ
੨. ਸਮਾਧਿਪਰਿਕ੍ਖਾਰਸੁਤ੍ਤਂ • 2. Samādhiparikkhārasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā)
੧. ਸਤ੍ਤવਿਞ੍ਞਾਣਟ੍ਠਿਤਿਸੁਤ੍ਤવਣ੍ਣਨਾ • 1. Sattaviññāṇaṭṭhitisuttavaṇṇanā
੨. ਸਮਾਧਿਪਰਿਕ੍ਖਾਰਸੁਤ੍ਤવਣ੍ਣਨਾ • 2. Samādhiparikkhārasuttavaṇṇanā
