| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৯. সত্থারৰন্দনাসুত্তৰণ্ণনা
9. Satthāravandanāsuttavaṇṇanā
২৬৫. ব্রহ্মজাণুকোতি দক্খিণজাণুমণ্ডলং পথৰিযং ঠপেত্ৰা ৰন্দমানো ব্রহ্মজাণুকো নাম তথাভূতো হুত্ৰা। যজিতব্বতো যক্খো, পূজনীযো। এৰং পূজাৰিসেসযোগতো সক্কোতি আহ ‘‘সো যক্খোতি সো সক্কো’’তি। সক্কস্স নমক্কারভাজনভূতঞ্হি পুচ্ছন্তো মাতলি ‘‘কো নাম সো যক্খো’’তি আহ। গুণনেমিত্তকেহীতি গুণহেতুকেহি অনন্তানি হি বুদ্ধানং নামানি, তানি চ খো সব্বানিপি গুণনেমিত্তকানেৰ। অনন্তগুণত্তা। ৰুত্তঞ্হেতং –
265.Brahmajāṇukoti dakkhiṇajāṇumaṇḍalaṃ pathaviyaṃ ṭhapetvā vandamāno brahmajāṇuko nāma tathābhūto hutvā. Yajitabbato yakkho, pūjanīyo. Evaṃ pūjāvisesayogato sakkoti āha ‘‘so yakkhoti so sakko’’ti. Sakkassa namakkārabhājanabhūtañhi pucchanto mātali ‘‘ko nāma so yakkho’’ti āha. Guṇanemittakehīti guṇahetukehi anantāni hi buddhānaṃ nāmāni, tāni ca kho sabbānipi guṇanemittakāneva. Anantaguṇattā. Vuttañhetaṃ –
‘‘অসঙ্খ্যেয্যানি নামানি, সগুণেন মহেসিনো।
‘‘Asaṅkhyeyyāni nāmāni, saguṇena mahesino;
গুণেন নামমুদ্ধেয্যং, অপি নামসহস্সতো’’তি॥ –
Guṇena nāmamuddheyyaṃ, api nāmasahassato’’ti. –
তস্মা অনোমনামন্তি পরিপুণ্ণগুণনামন্তি অত্থো। সমতিক্কমেনাতি সম্মা সমুচ্ছিন্দনৰসেন অতিক্কমনেন। কিলেসারীনং অপেতচযোতি অপচযো, সো আরমিতব্বট্ঠেন আরামো এতেসন্তি অপচযারামা। তেনাহ ‘‘ৰট্টৰিদ্ধংসনে রতা’’তি।
Tasmā anomanāmanti paripuṇṇaguṇanāmanti attho. Samatikkamenāti sammā samucchindanavasena atikkamanena. Kilesārīnaṃ apetacayoti apacayo, so āramitabbaṭṭhena ārāmo etesanti apacayārāmā. Tenāha ‘‘vaṭṭaviddhaṃsane ratā’’ti.
সত্থারৰন্দনাসুত্তৰণ্ণনা নিট্ঠিতা।
Satthāravandanāsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৯. সত্থারৰন্দনাসুত্তং • 9. Satthāravandanāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. সত্থারৰন্দনাসুত্তৰণ্ণনা • 9. Satthāravandanāsuttavaṇṇanā
