| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩. សត្ថារវន្ទនាសុត្តវណ្ណនា
9. Satthāravandanāsuttavaṇṇanā
២៦៥. ព្រហ្មជាណុកោតិ ទក្ខិណជាណុមណ្ឌលំ បថវិយំ ឋបេត្វា វន្ទមានោ ព្រហ្មជាណុកោ នាម តថាភូតោ ហុត្វា។ យជិតព្ពតោ យក្ខោ, បូជនីយោ។ ឯវំ បូជាវិសេសយោគតោ សក្កោតិ អាហ ‘‘សោ យក្ខោតិ សោ សក្កោ’’តិ។ សក្កស្ស នមក្ការភាជនភូតញ្ហិ បុច្ឆន្តោ មាតលិ ‘‘កោ នាម សោ យក្ខោ’’តិ អាហ។ គុណនេមិត្តកេហីតិ គុណហេតុកេហិ អនន្តានិ ហិ ពុទ្ធានំ នាមានិ, តានិ ច ខោ សព្ពានិបិ គុណនេមិត្តកានេវ។ អនន្តគុណត្តា។ វុត្តញ្ហេតំ –
265.Brahmajāṇukoti dakkhiṇajāṇumaṇḍalaṃ pathaviyaṃ ṭhapetvā vandamāno brahmajāṇuko nāma tathābhūto hutvā. Yajitabbato yakkho, pūjanīyo. Evaṃ pūjāvisesayogato sakkoti āha ‘‘so yakkhoti so sakko’’ti. Sakkassa namakkārabhājanabhūtañhi pucchanto mātali ‘‘ko nāma so yakkho’’ti āha. Guṇanemittakehīti guṇahetukehi anantāni hi buddhānaṃ nāmāni, tāni ca kho sabbānipi guṇanemittakāneva. Anantaguṇattā. Vuttañhetaṃ –
‘‘អសង្ខ្យេយ្យានិ នាមានិ, សគុណេន មហេសិនោ;
‘‘Asaṅkhyeyyāni nāmāni, saguṇena mahesino;
គុណេន នាមមុទ្ធេយ្យំ, អបិ នាមសហស្សតោ’’តិ។ –
Guṇena nāmamuddheyyaṃ, api nāmasahassato’’ti. –
តស្មា អនោមនាមន្តិ បរិបុណ្ណគុណនាមន្តិ អត្ថោ។ សមតិក្កមេនាតិ សម្មា សមុច្ឆិន្ទនវសេន អតិក្កមនេន។ កិលេសារីនំ អបេតចយោតិ អបចយោ, សោ អារមិតព្ពដ្ឋេន អារាមោ ឯតេសន្តិ អបចយារាមា។ តេនាហ ‘‘វដ្ដវិទ្ធំសនេ រតា’’តិ។
Tasmā anomanāmanti paripuṇṇaguṇanāmanti attho. Samatikkamenāti sammā samucchindanavasena atikkamanena. Kilesārīnaṃ apetacayoti apacayo, so āramitabbaṭṭhena ārāmo etesanti apacayārāmā. Tenāha ‘‘vaṭṭaviddhaṃsane ratā’’ti.
សត្ថារវន្ទនាសុត្តវណ្ណនា និដ្ឋិតា។
Satthāravandanāsuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៩. សត្ថារវន្ទនាសុត្តំ • 9. Satthāravandanāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩. សត្ថារវន្ទនាសុត្តវណ្ណនា • 9. Satthāravandanāsuttavaṇṇanā
