| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೯. ಸತ್ಥಾರವನ್ದನಾಸುತ್ತವಣ್ಣನಾ
9. Satthāravandanāsuttavaṇṇanā
೨೬೫. ಬ್ರಹ್ಮಜಾಣುಕೋತಿ ದಕ್ಖಿಣಜಾಣುಮಣ್ಡಲಂ ಪಥವಿಯಂ ಠಪೇತ್ವಾ ವನ್ದಮಾನೋ ಬ್ರಹ್ಮಜಾಣುಕೋ ನಾಮ ತಥಾಭೂತೋ ಹುತ್ವಾ। ಯಜಿತಬ್ಬತೋ ಯಕ್ಖೋ, ಪೂಜನೀಯೋ। ಏವಂ ಪೂಜಾವಿಸೇಸಯೋಗತೋ ಸಕ್ಕೋತಿ ಆಹ ‘‘ಸೋ ಯಕ್ಖೋತಿ ಸೋ ಸಕ್ಕೋ’’ತಿ। ಸಕ್ಕಸ್ಸ ನಮಕ್ಕಾರಭಾಜನಭೂತಞ್ಹಿ ಪುಚ್ಛನ್ತೋ ಮಾತಲಿ ‘‘ಕೋ ನಾಮ ಸೋ ಯಕ್ಖೋ’’ತಿ ಆಹ। ಗುಣನೇಮಿತ್ತಕೇಹೀತಿ ಗುಣಹೇತುಕೇಹಿ ಅನನ್ತಾನಿ ಹಿ ಬುದ್ಧಾನಂ ನಾಮಾನಿ, ತಾನಿ ಚ ಖೋ ಸಬ್ಬಾನಿಪಿ ಗುಣನೇಮಿತ್ತಕಾನೇವ। ಅನನ್ತಗುಣತ್ತಾ। ವುತ್ತಞ್ಹೇತಂ –
265.Brahmajāṇukoti dakkhiṇajāṇumaṇḍalaṃ pathaviyaṃ ṭhapetvā vandamāno brahmajāṇuko nāma tathābhūto hutvā. Yajitabbato yakkho, pūjanīyo. Evaṃ pūjāvisesayogato sakkoti āha ‘‘so yakkhoti so sakko’’ti. Sakkassa namakkārabhājanabhūtañhi pucchanto mātali ‘‘ko nāma so yakkho’’ti āha. Guṇanemittakehīti guṇahetukehi anantāni hi buddhānaṃ nāmāni, tāni ca kho sabbānipi guṇanemittakāneva. Anantaguṇattā. Vuttañhetaṃ –
‘‘ಅಸಙ್ಖ್ಯೇಯ್ಯಾನಿ ನಾಮಾನಿ, ಸಗುಣೇನ ಮಹೇಸಿನೋ।
‘‘Asaṅkhyeyyāni nāmāni, saguṇena mahesino;
ಗುಣೇನ ನಾಮಮುದ್ಧೇಯ್ಯಂ, ಅಪಿ ನಾಮಸಹಸ್ಸತೋ’’ತಿ॥ –
Guṇena nāmamuddheyyaṃ, api nāmasahassato’’ti. –
ತಸ್ಮಾ ಅನೋಮನಾಮನ್ತಿ ಪರಿಪುಣ್ಣಗುಣನಾಮನ್ತಿ ಅತ್ಥೋ। ಸಮತಿಕ್ಕಮೇನಾತಿ ಸಮ್ಮಾ ಸಮುಚ್ಛಿನ್ದನವಸೇನ ಅತಿಕ್ಕಮನೇನ। ಕಿಲೇಸಾರೀನಂ ಅಪೇತಚಯೋತಿ ಅಪಚಯೋ, ಸೋ ಆರಮಿತಬ್ಬಟ್ಠೇನ ಆರಾಮೋ ಏತೇಸನ್ತಿ ಅಪಚಯಾರಾಮಾ। ತೇನಾಹ ‘‘ವಟ್ಟವಿದ್ಧಂಸನೇ ರತಾ’’ತಿ।
Tasmā anomanāmanti paripuṇṇaguṇanāmanti attho. Samatikkamenāti sammā samucchindanavasena atikkamanena. Kilesārīnaṃ apetacayoti apacayo, so āramitabbaṭṭhena ārāmo etesanti apacayārāmā. Tenāha ‘‘vaṭṭaviddhaṃsane ratā’’ti.
ಸತ್ಥಾರವನ್ದನಾಸುತ್ತವಣ್ಣನಾ ನಿಟ್ಠಿತಾ।
Satthāravandanāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೯. ಸತ್ಥಾರವನ್ದನಾಸುತ್ತಂ • 9. Satthāravandanāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯. ಸತ್ಥಾರವನ್ದನಾಸುತ್ತವಣ್ಣನಾ • 9. Satthāravandanāsuttavaṇṇanā
