| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
9. සත්‌ථාරවන්‌දනාසුත්‌තවණ්‌ණනා
9. Satthāravandanāsuttavaṇṇanā
265. බ්‍රහ්‌මජාණුකොති දක්‌ඛිණජාණුමණ්‌ඩලං පථවියං ඨපෙත්‌වා වන්‌දමානො බ්‍රහ්‌මජාණුකො නාම තථාභූතො හුත්‌වා. යජිතබ්‌බතො යක්‌ඛො, පූජනීයො. එවං පූජාවිසෙසයොගතො සක්‌කොති ආහ ‘‘සො යක්‌ඛොති සො සක්‌කො’’ති. සක්‌කස්‌ස නමක්‌කාරභාජනභූතඤ්‌හි පුච්‌ඡන්‌තො මාතලි ‘‘කො නාම සො යක්‌ඛො’’ති ආහ. ගුණනෙමිත්‌තකෙහීති ගුණහෙතුකෙහි අනන්‌තානි හි බුද්‌ධානං නාමානි, තානි ච ඛො සබ්‌බානිපි ගුණනෙමිත්‌තකානෙව. අනන්‌තගුණත්‌තා. වුත්‌තඤ්‌හෙතං –
265.Brahmajāṇukoti dakkhiṇajāṇumaṇḍalaṃ pathaviyaṃ ṭhapetvā vandamāno brahmajāṇuko nāma tathābhūto hutvā. Yajitabbato yakkho, pūjanīyo. Evaṃ pūjāvisesayogato sakkoti āha ‘‘so yakkhoti so sakko’’ti. Sakkassa namakkārabhājanabhūtañhi pucchanto mātali ‘‘ko nāma so yakkho’’ti āha. Guṇanemittakehīti guṇahetukehi anantāni hi buddhānaṃ nāmāni, tāni ca kho sabbānipi guṇanemittakāneva. Anantaguṇattā. Vuttañhetaṃ –
‘‘අසඞ්‌ඛ්‍යෙය්‍යානි නාමානි, සගුණෙන මහෙසිනො;
‘‘Asaṅkhyeyyāni nāmāni, saguṇena mahesino;
ගුණෙන නාමමුද්‌ධෙය්‍යං, අපි නාමසහස්‌සතො’’ති. –
Guṇena nāmamuddheyyaṃ, api nāmasahassato’’ti. –
තස්‌මා අනොමනාමන්‌ති පරිපුණ්‌ණගුණනාමන්‌ති අත්‌ථො. සමතික්‌කමෙනාති සම්‌මා සමුච්‌ඡින්‌දනවසෙන අතික්‌කමනෙන. කිලෙසාරීනං අපෙතචයොති අපචයො, සො ආරමිතබ්‌බට්‌ඨෙන ආරාමො එතෙසන්‌ති අපචයාරාමා. තෙනාහ ‘‘වට්‌ටවිද්‌ධංසනෙ රතා’’ති.
Tasmā anomanāmanti paripuṇṇaguṇanāmanti attho. Samatikkamenāti sammā samucchindanavasena atikkamanena. Kilesārīnaṃ apetacayoti apacayo, so āramitabbaṭṭhena ārāmo etesanti apacayārāmā. Tenāha ‘‘vaṭṭaviddhaṃsane ratā’’ti.
සත්‌ථාරවන්‌දනාසුත්‌තවණ්‌ණනා නිට්‌ඨිතා.
Satthāravandanāsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. සත්‌ථාරවන්‌දනාසුත්‌තං • 9. Satthāravandanāsuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. සත්‌ථාරවන්‌දනාසුත්‌තවණ්‌ණනා • 9. Satthāravandanāsuttavaṇṇanā
