| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
९. अन्तरपेय्यालं
9. Antarapeyyālaṃ
१. सत्थुसुत्तादिवण्णना
1. Satthusuttādivaṇṇanā
७३. इतो परं ‘‘सत्था परियेसितब्बो’’तिआदिनयप्पवत्ता द्वादस अन्तरपेय्यालवग्गा नाम होन्ति। ते सब्बेपि तथा तथा बुज्झनकानं वेनेय्यपुग्गलानं अज्झासयवसेन वुत्ता। तत्थ सत्थाति बुद्धो वा होतु सावको वा, यं निस्साय मग्गञाणं लभति, अयं सत्था नाम, सो परियेसितब्बो। सिक्खा करणीयाति तिविधापि सिक्खा कातब्बा। योगादीसु योगोति पयोगो। छन्दोति कत्तुकम्यताकुसलच्छन्दो। उस्सोळ्हीति सब्बसहं अधिमत्तवीरियं। अप्पटिवानीति अनिवत्तना। आतप्पन्ति किलेसतापनवीरियमेव। सातच्चन्ति सततकिरियं। सतीति जरामरणादिवसेन चतुसच्चपरिग्गाहिका सति। सम्पजञ्ञन्ति तादिसमेव ञाणं। अप्पमादोति सच्चभावनाय अप्पमादो। सेसं सब्बत्थ उत्तानमेवाति।
73. Ito paraṃ ‘‘satthā pariyesitabbo’’tiādinayappavattā dvādasa antarapeyyālavaggā nāma honti. Te sabbepi tathā tathā bujjhanakānaṃ veneyyapuggalānaṃ ajjhāsayavasena vuttā. Tattha satthāti buddho vā hotu sāvako vā, yaṃ nissāya maggañāṇaṃ labhati, ayaṃ satthā nāma, so pariyesitabbo. Sikkhā karaṇīyāti tividhāpi sikkhā kātabbā. Yogādīsu yogoti payogo. Chandoti kattukamyatākusalacchando. Ussoḷhīti sabbasahaṃ adhimattavīriyaṃ. Appaṭivānīti anivattanā. Ātappanti kilesatāpanavīriyameva. Sātaccanti satatakiriyaṃ. Satīti jarāmaraṇādivasena catusaccapariggāhikā sati. Sampajaññanti tādisameva ñāṇaṃ. Appamādoti saccabhāvanāya appamādo. Sesaṃ sabbattha uttānamevāti.
अन्तरपेय्यालो नवमो।
Antarapeyyālo navamo.
निदानसंयुत्तवण्णना निट्ठिता।
Nidānasaṃyuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. सत्थुसुत्तं • 1. Satthusuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. सत्थुसुत्तादिवण्णना • 1. Satthusuttādivaṇṇanā
