| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၉. အန္တရပေယ္ယာလံ
9. Antarapeyyālaṃ
၁. သတ္ထုသုတ္တာဒိဝဏ္ဏနာ
1. Satthusuttādivaṇṇanā
၇၃. ဣတော ပရံ ‘‘သတ္ထာ ပရိယေသိတဗ္ဗော’’တိအာဒိနယပ္ပဝတ္တာ ဒ္ဝာဒသ အန္တရပေယ္ယာလဝဂ္ဂာ နာမ ဟောန္တိ။ တေ သဗ္ဗေပိ တထာ တထာ ဗုဇ္ဈနကာနံ ဝေနေယ္ယပုဂ္ဂလာနံ အဇ္ဈာသယဝသေန ဝုတ္တာ။ တတ္ထ သတ္ထာတိ ဗုဒ္ဓော ဝာ ဟောတု သာဝကော ဝာ, ယံ နိသ္သာယ မဂ္ဂဉာဏံ လဘတိ, အယံ သတ္ထာ နာမ, သော ပရိယေသိတဗ္ဗော။ သိက္ခာ ကရဏီယာတိ တိဝိဓာပိ သိက္ခာ ကာတဗ္ဗာ။ ယောဂာဒီသု ယောဂောတိ ပယောဂော။ ဆန္ဒောတိ ကတ္တုကမ္ယတာကုသလစ္ဆန္ဒော။ ဥသ္သောဠ္ဟီတိ သဗ္ဗသဟံ အဓိမတ္တဝီရိယံ။ အပ္ပဋိဝာနီတိ အနိဝတ္တနာ။ အာတပ္ပန္တိ ကိလေသတာပနဝီရိယမေဝ။ သာတစ္စန္တိ သတတကိရိယံ။ သတီတိ ဇရာမရဏာဒိဝသေန စတုသစ္စပရိဂ္ဂာဟိကာ သတိ။ သမ္ပဇညန္တိ တာဒိသမေဝ ဉာဏံ။ အပ္ပမာဒောတိ သစ္စဘာဝနာယ အပ္ပမာဒော။ သေသံ သဗ္ဗတ္ထ ဥတ္တာနမေဝာတိ။
73. Ito paraṃ ‘‘satthā pariyesitabbo’’tiādinayappavattā dvādasa antarapeyyālavaggā nāma honti. Te sabbepi tathā tathā bujjhanakānaṃ veneyyapuggalānaṃ ajjhāsayavasena vuttā. Tattha satthāti buddho vā hotu sāvako vā, yaṃ nissāya maggañāṇaṃ labhati, ayaṃ satthā nāma, so pariyesitabbo. Sikkhā karaṇīyāti tividhāpi sikkhā kātabbā. Yogādīsu yogoti payogo. Chandoti kattukamyatākusalacchando. Ussoḷhīti sabbasahaṃ adhimattavīriyaṃ. Appaṭivānīti anivattanā. Ātappanti kilesatāpanavīriyameva. Sātaccanti satatakiriyaṃ. Satīti jarāmaraṇādivasena catusaccapariggāhikā sati. Sampajaññanti tādisameva ñāṇaṃ. Appamādoti saccabhāvanāya appamādo. Sesaṃ sabbattha uttānamevāti.
အန္တရပေယ္ယာလော နဝမော။
Antarapeyyālo navamo.
နိဒာနသံယုတ္တဝဏ္ဏနာ နိဋ္ဌိတာ။
Nidānasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သတ္ထုသုတ္တံ • 1. Satthusuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. သတ္ထုသုတ္တာဒိဝဏ္ဏနာ • 1. Satthusuttādivaṇṇanā
