| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ஸத்திஸதஸுத்தங்
5. Sattisatasuttaṃ
1105. ‘‘ஸெய்யதா²பி, பி⁴க்க²வே, புரிஸோ வஸ்ஸஸதாயுகோ வஸ்ஸஸதஜீவீ. தமேனங் ஏவங் வதெ³ய்ய – ‘ஏஹம்போ⁴ புரிஸ, புப்³ப³ண்ஹஸமயங் தங் ஸத்திஸதேன ஹனிஸ்ஸந்தி, மஜ்ஜ²ன்ஹிகஸமயங் ஸத்திஸதேன ஹனிஸ்ஸந்தி, ஸாயன்ஹஸமயங் ஸத்திஸதேன ஹனிஸ்ஸந்தி. ஸோ கோ² த்வங், அம்போ⁴ புரிஸ, தி³வஸே தி³வஸே தீஹி தீஹி ஸத்திஸதேஹி ஹஞ்ஞமானோ வஸ்ஸஸதாயுகோ வஸ்ஸஸதஜீவீ வஸ்ஸஸதஸ்ஸ அச்சயேன அனபி⁴ஸமேதானி சத்தாரி அரியஸச்சானி அபி⁴ஸமெஸ்ஸஸீ’’’தி.
1105. ‘‘Seyyathāpi, bhikkhave, puriso vassasatāyuko vassasatajīvī. Tamenaṃ evaṃ vadeyya – ‘ehambho purisa, pubbaṇhasamayaṃ taṃ sattisatena hanissanti, majjhanhikasamayaṃ sattisatena hanissanti, sāyanhasamayaṃ sattisatena hanissanti. So kho tvaṃ, ambho purisa, divase divase tīhi tīhi sattisatehi haññamāno vassasatāyuko vassasatajīvī vassasatassa accayena anabhisametāni cattāri ariyasaccāni abhisamessasī’’’ti.
‘‘அத்த²வஸிகேன, பி⁴க்க²வே, குலபுத்தேன அலங் உபக³ந்துங். தங் கிஸ்ஸ ஹேது? அனமதக்³கோ³யங், பி⁴க்க²வே, ஸங்ஸாரோ; புப்³பா³ கோடி நப்பஞ்ஞாயதி ஸத்திப்பஹாரானங் அஸிப்பஹாரானங் உஸுப்பஹாரானங் ப²ரஸுப்பஹாரானங் 1. ஏவஞ்சேதங், பி⁴க்க²வே, அஸ்ஸ. ந கோ² பனாஹங், பி⁴க்க²வே, ஸஹ து³க்கே²ன, ஸஹ தோ³மனஸ்ஸேன சதுன்னங் அரியஸச்சானங் அபி⁴ஸமயங் வதா³மி; அபி சாஹங், பி⁴க்க²வே, ஸஹாவ ஸுகே²ன, ஸஹாவ ஸோமனஸ்ஸேன சதுன்னங் அரியஸச்சானங் அபி⁴ஸமயங் வதா³மி. கதமேஸங் சதுன்னங்? து³க்க²ஸ்ஸ அரியஸச்சஸ்ஸ…பே॰… து³க்க²னிரோத⁴கா³மினியா படிபதா³ய அரியஸச்சஸ்ஸ.
‘‘Atthavasikena, bhikkhave, kulaputtena alaṃ upagantuṃ. Taṃ kissa hetu? Anamataggoyaṃ, bhikkhave, saṃsāro; pubbā koṭi nappaññāyati sattippahārānaṃ asippahārānaṃ usuppahārānaṃ pharasuppahārānaṃ 2. Evañcetaṃ, bhikkhave, assa. Na kho panāhaṃ, bhikkhave, saha dukkhena, saha domanassena catunnaṃ ariyasaccānaṃ abhisamayaṃ vadāmi; api cāhaṃ, bhikkhave, sahāva sukhena, sahāva somanassena catunnaṃ ariyasaccānaṃ abhisamayaṃ vadāmi. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘தஸ்மாதிஹ , பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. பஞ்சமங்.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஸத்திஸதஸுத்தவண்ணனா • 5. Sattisatasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஸத்திஸதஸுத்தவண்ணனா • 5. Sattisatasuttavaṇṇanā
