| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. সত্তিসতসুত্তং
5. Sattisatasuttaṃ
১১০৫. ‘‘সেয্যথাপি, ভিক্খৰে, পুরিসো ৰস্সসতাযুকো ৰস্সসতজীৰী। তমেনং এৰং ৰদেয্য – ‘এহম্ভো পুরিস, পুব্বণ্হসমযং তং সত্তিসতেন হনিস্সন্তি, মজ্ঝন্হিকসমযং সত্তিসতেন হনিস্সন্তি, সাযন্হসমযং সত্তিসতেন হনিস্সন্তি। সো খো ত্ৰং, অম্ভো পুরিস, দিৰসে দিৰসে তীহি তীহি সত্তিসতেহি হঞ্ঞমানো ৰস্সসতাযুকো ৰস্সসতজীৰী ৰস্সসতস্স অচ্চযেন অনভিসমেতানি চত্তারি অরিযসচ্চানি অভিসমেস্সসী’’’তি।
1105. ‘‘Seyyathāpi, bhikkhave, puriso vassasatāyuko vassasatajīvī. Tamenaṃ evaṃ vadeyya – ‘ehambho purisa, pubbaṇhasamayaṃ taṃ sattisatena hanissanti, majjhanhikasamayaṃ sattisatena hanissanti, sāyanhasamayaṃ sattisatena hanissanti. So kho tvaṃ, ambho purisa, divase divase tīhi tīhi sattisatehi haññamāno vassasatāyuko vassasatajīvī vassasatassa accayena anabhisametāni cattāri ariyasaccāni abhisamessasī’’’ti.
‘‘অত্থৰসিকেন, ভিক্খৰে, কুলপুত্তেন অলং উপগন্তুং। তং কিস্স হেতু? অনমতগ্গোযং, ভিক্খৰে, সংসারো; পুব্বা কোটি নপ্পঞ্ঞাযতি সত্তিপ্পহারানং অসিপ্পহারানং উসুপ্পহারানং ফরসুপ্পহারানং 1। এৰঞ্চেতং, ভিক্খৰে, অস্স। ন খো পনাহং, ভিক্খৰে, সহ দুক্খেন, সহ দোমনস্সেন চতুন্নং অরিযসচ্চানং অভিসমযং ৰদামি; অপি চাহং, ভিক্খৰে, সহাৰ সুখেন, সহাৰ সোমনস্সেন চতুন্নং অরিযসচ্চানং অভিসমযং ৰদামি। কতমেসং চতুন্নং? দুক্খস্স অরিযসচ্চস্স…পে॰… দুক্খনিরোধগামিনিযা পটিপদায অরিযসচ্চস্স।
‘‘Atthavasikena, bhikkhave, kulaputtena alaṃ upagantuṃ. Taṃ kissa hetu? Anamataggoyaṃ, bhikkhave, saṃsāro; pubbā koṭi nappaññāyati sattippahārānaṃ asippahārānaṃ usuppahārānaṃ pharasuppahārānaṃ 2. Evañcetaṃ, bhikkhave, assa. Na kho panāhaṃ, bhikkhave, saha dukkhena, saha domanassena catunnaṃ ariyasaccānaṃ abhisamayaṃ vadāmi; api cāhaṃ, bhikkhave, sahāva sukhena, sahāva somanassena catunnaṃ ariyasaccānaṃ abhisamayaṃ vadāmi. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘তস্মাতিহ , ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। পঞ্চমং।
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. সত্তিসতসুত্তৰণ্ণনা • 5. Sattisatasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. সত্তিসতসুত্তৰণ্ণনা • 5. Sattisatasuttavaṇṇanā
