Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༥. སཏྟིསཏསུཏྟཾ

    5. Sattisatasuttaṃ

    ༡༡༠༥. ‘‘སེཡྻཐཱཔི, བྷིཀྑཝེ, པུརིསོ ཝསྶསཏཱཡུཀོ ཝསྶསཏཛཱིཝཱི། ཏམེནཾ ཨེཝཾ ཝདེཡྻ – ‘ཨེཧམྦྷོ པུརིས, པུབྦཎྷསམཡཾ ཏཾ སཏྟིསཏེན ཧནིསྶནྟི, མཛ྄ཛྷནྷིཀསམཡཾ སཏྟིསཏེན ཧནིསྶནྟི, སཱཡནྷསམཡཾ སཏྟིསཏེན ཧནིསྶནྟི། སོ ཁོ ཏྭཾ, ཨམྦྷོ པུརིས, དིཝསེ དིཝསེ ཏཱིཧི ཏཱིཧི སཏྟིསཏེཧི ཧཉྙམཱནོ ཝསྶསཏཱཡུཀོ ཝསྶསཏཛཱིཝཱི ཝསྶསཏསྶ ཨཙྩཡེན ཨནབྷིསམེཏཱནི ཙཏྟཱརི ཨརིཡསཙྩཱནི ཨབྷིསམེསྶསཱི’’’ཏི།

    1105. ‘‘Seyyathāpi, bhikkhave, puriso vassasatāyuko vassasatajīvī. Tamenaṃ evaṃ vadeyya – ‘ehambho purisa, pubbaṇhasamayaṃ taṃ sattisatena hanissanti, majjhanhikasamayaṃ sattisatena hanissanti, sāyanhasamayaṃ sattisatena hanissanti. So kho tvaṃ, ambho purisa, divase divase tīhi tīhi sattisatehi haññamāno vassasatāyuko vassasatajīvī vassasatassa accayena anabhisametāni cattāri ariyasaccāni abhisamessasī’’’ti.

    ‘‘ཨཏྠཝསིཀེན, བྷིཀྑཝེ, ཀུལཔུཏྟེན ཨལཾ ཨུཔགནྟུཾ། ཏཾ ཀིསྶ ཧེཏུ? ཨནམཏགྒོཡཾ, བྷིཀྑཝེ, སཾསཱརོ; པུབྦཱ ཀོཊི ནཔྤཉྙཱཡཏི སཏྟིཔྤཧཱརཱནཾ ཨསིཔྤཧཱརཱནཾ ཨུསུཔྤཧཱརཱནཾ ཕརསུཔྤཧཱརཱནཾ 1། ཨེཝཉྩེཏཾ, བྷིཀྑཝེ, ཨསྶ། ན ཁོ པནཱཧཾ, བྷིཀྑཝེ, སཧ དུཀྑེན, སཧ དོམནསྶེན ཙཏུནྣཾ ཨརིཡསཙྩཱནཾ ཨབྷིསམཡཾ ཝདཱམི; ཨཔི ཙཱཧཾ, བྷིཀྑཝེ, སཧཱཝ སུཁེན, སཧཱཝ སོམནསྶེན ཙཏུནྣཾ ཨརིཡསཙྩཱནཾ ཨབྷིསམཡཾ ཝདཱམི། ཀཏམེསཾ ཙཏུནྣཾ? དུཀྑསྶ ཨརིཡསཙྩསྶ…པེ॰… དུཀྑནིརོདྷགཱམིནིཡཱ པཊིཔདཱཡ ཨརིཡསཙྩསྶ།

    ‘‘Atthavasikena, bhikkhave, kulaputtena alaṃ upagantuṃ. Taṃ kissa hetu? Anamataggoyaṃ, bhikkhave, saṃsāro; pubbā koṭi nappaññāyati sattippahārānaṃ asippahārānaṃ usuppahārānaṃ pharasuppahārānaṃ 2. Evañcetaṃ, bhikkhave, assa. Na kho panāhaṃ, bhikkhave, saha dukkhena, saha domanassena catunnaṃ ariyasaccānaṃ abhisamayaṃ vadāmi; api cāhaṃ, bhikkhave, sahāva sukhena, sahāva somanassena catunnaṃ ariyasaccānaṃ abhisamayaṃ vadāmi. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.

    ‘‘ཏསྨཱཏིཧ , བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། པཉྩམཾ།

    ‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.




    Next: ༦. པཱཎསུཏྟཾ • 6. Pāṇasuttaṃ




    Footnotes:
    1. ཨསིཔྤཧཱརཱནཾ ཕརསུཔྤཧཱརཱནཾ (ཀ॰)
    2. asippahārānaṃ pharasuppahārānaṃ (ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. སཏྟིསཏསུཏྟཝཎྞནཱ • 5. Sattisatasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥. སཏྟིསཏསུཏྟཝཎྞནཱ • 5. Sattisatasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact