| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஸத்திவக்³கோ³
3. Sattivaggo
1. ஸத்திஸுத்தவண்ணனா
1. Sattisuttavaṇṇanā
21. ஸத்திவக்³க³ஸ்ஸ பட²மே ஸத்தியாதி தே³ஸனாஸீஸமேதங். ஏகதோகா²ராதி³னா ஸத்தே²னாதி அத்தோ². ஓமட்டோ²தி பஹதோ. சத்தாரோ ஹி பஹாரா ஓமட்டோ² உம்மட்டோ² மட்டோ² விமட்டோ²தி. தத்த² உபரி ட²த்வா அதோ⁴முக²ங் தி³ன்னபஹாரோ ஓமட்டோ² நாம; ஹெட்டா² ட²த்வா உத்³த⁴ங்முக²ங் தி³ன்னோ உம்மட்டோ² நாம; அக்³க³ளஸூசி விய வினிவிஜ்ஜி²த்வா க³தோ மட்டோ² நாம; ஸேஸோ ஸப்³போ³பி விமட்டோ² நாம. இமஸ்மிங் பன டா²னே ஓமட்டோ² க³ஹிதோ. ஸோ ஹி ஸப்³ப³தா³ருணோ து³ருத்³த⁴ரஸல்லோ து³த்திகிச்சோ² அந்தோதோ³ஸோ அந்தோபுப்³ப³லோஹிதோவ ஹோதி , புப்³ப³லோஹிதங் அனிக்க²மித்வா வணமுக²ங் பரியோனந்தி⁴த்வா திட்ட²தி. புப்³ப³லோஹிதங் நிஹரிதுகாமேஹி மஞ்சேன ஸத்³தி⁴ங் ப³ந்தி⁴த்வா அதோ⁴ஸிரோ காதப்³போ³ ஹோதி, மரணங் வா மரணமத்தங் வா து³க்க²ங் பாபுணாதி. பரிப்³ப³ஜேதி விஹரெய்ய.
21. Sattivaggassa paṭhame sattiyāti desanāsīsametaṃ. Ekatokhārādinā satthenāti attho. Omaṭṭhoti pahato. Cattāro hi pahārā omaṭṭho ummaṭṭho maṭṭho vimaṭṭhoti. Tattha upari ṭhatvā adhomukhaṃ dinnapahāro omaṭṭho nāma; heṭṭhā ṭhatvā uddhaṃmukhaṃ dinno ummaṭṭho nāma; aggaḷasūci viya vinivijjhitvā gato maṭṭho nāma; seso sabbopi vimaṭṭho nāma. Imasmiṃ pana ṭhāne omaṭṭho gahito. So hi sabbadāruṇo duruddharasallo duttikiccho antodoso antopubbalohitova hoti , pubbalohitaṃ anikkhamitvā vaṇamukhaṃ pariyonandhitvā tiṭṭhati. Pubbalohitaṃ niharitukāmehi mañcena saddhiṃ bandhitvā adhosiro kātabbo hoti, maraṇaṃ vā maraṇamattaṃ vā dukkhaṃ pāpuṇāti. Paribbajeti vihareyya.
இமாய கா³தா²ய கிங் கதே²தி? யதா² ஸத்தியா ஓமட்டோ² புரிஸோ ஸல்லுப்³ப³ஹன-வணதிகிச்ச²னானங் அத்தா²ய வீரியங் ஆரப⁴தி, பயோக³ங் கரோதி பரக்கமதி. யதா² ச ட³ய்ஹமானோ மத்த²கே ஆதி³த்தஸீஸோ தஸ்ஸ நிப்³பா³பனத்தா²ய வீரியங் ஆரப⁴தி, பயோக³ங் கரோதி பரக்கமதி, ஏவமேவ பி⁴க்கு² காமராக³ங் பஹானாய ஸதோ அப்பமத்தோ ஹுத்வா விஹரெய்ய ப⁴க³வாதி கதே²ஸி.
Imāya gāthāya kiṃ katheti? Yathā sattiyā omaṭṭho puriso sallubbahana-vaṇatikicchanānaṃ atthāya vīriyaṃ ārabhati, payogaṃ karoti parakkamati. Yathā ca ḍayhamāno matthake ādittasīso tassa nibbāpanatthāya vīriyaṃ ārabhati, payogaṃ karoti parakkamati, evameva bhikkhu kāmarāgaṃ pahānāya sato appamatto hutvā vihareyya bhagavāti kathesi.
அத² ப⁴க³வா சிந்தேஸி – இமாய தே³வதாய உபமா தாவ த³ள்ஹங் கத்வா ஆனீதா, அத்த²ங் பன பரித்தகங் க³ஹெத்வா டி²தா, புனப்புனங் கதெ²ந்தீபி ஹேஸா காமராக³ஸ்ஸ விக்க²ம்ப⁴னபஹானமேவ கதெ²ய்ய. யாவ ச காமராகோ³ மக்³கே³ன ந ஸமுக்³கா⁴டியதி, தாவ அனுப³த்³தோ⁴வ ஹோதி. இதி தமேவ ஓபம்மங் க³ஹெத்வா பட²மமக்³க³வஸேன தே³ஸனங் வினிவட்டெத்வா தே³ஸெந்தோ து³தியங் கா³த²மாஹ. தஸ்ஸத்தோ² புரிமானுஸாரேனேவ வேதி³தப்³போ³தி. பட²மங்.
Atha bhagavā cintesi – imāya devatāya upamā tāva daḷhaṃ katvā ānītā, atthaṃ pana parittakaṃ gahetvā ṭhitā, punappunaṃ kathentīpi hesā kāmarāgassa vikkhambhanapahānameva katheyya. Yāva ca kāmarāgo maggena na samugghāṭiyati, tāva anubaddhova hoti. Iti tameva opammaṃ gahetvā paṭhamamaggavasena desanaṃ vinivaṭṭetvā desento dutiyaṃ gāthamāha. Tassattho purimānusāreneva veditabboti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸத்திஸுத்தங் • 1. Sattisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1.ஸத்திஸுத்தவண்ணனா • 1.Sattisuttavaṇṇanā
