| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. সত্তিৰগ্গো
3. Sattivaggo
১. সত্তিসুত্তৰণ্ণনা
1. Sattisuttavaṇṇanā
২১. সত্তিৰগ্গস্স পঠমে সত্তিযাতি দেসনাসীসমেতং। একতোখারাদিনা সত্থেনাতি অত্থো। ওমট্ঠোতি পহতো। চত্তারো হি পহারা ওমট্ঠো উম্মট্ঠো মট্ঠো ৰিমট্ঠোতি। তত্থ উপরি ঠত্ৰা অধোমুখং দিন্নপহারো ওমট্ঠো নাম; হেট্ঠা ঠত্ৰা উদ্ধংমুখং দিন্নো উম্মট্ঠো নাম; অগ্গল়সূচি ৰিয ৰিনিৰিজ্ঝিত্ৰা গতো মট্ঠো নাম; সেসো সব্বোপি ৰিমট্ঠো নাম। ইমস্মিং পন ঠানে ওমট্ঠো গহিতো। সো হি সব্বদারুণো দুরুদ্ধরসল্লো দুত্তিকিচ্ছো অন্তোদোসো অন্তোপুব্বলোহিতোৰ হোতি , পুব্বলোহিতং অনিক্খমিত্ৰা ৰণমুখং পরিযোনন্ধিত্ৰা তিট্ঠতি। পুব্বলোহিতং নিহরিতুকামেহি মঞ্চেন সদ্ধিং বন্ধিত্ৰা অধোসিরো কাতব্বো হোতি, মরণং ৰা মরণমত্তং ৰা দুক্খং পাপুণাতি। পরিব্বজেতি ৰিহরেয্য।
21. Sattivaggassa paṭhame sattiyāti desanāsīsametaṃ. Ekatokhārādinā satthenāti attho. Omaṭṭhoti pahato. Cattāro hi pahārā omaṭṭho ummaṭṭho maṭṭho vimaṭṭhoti. Tattha upari ṭhatvā adhomukhaṃ dinnapahāro omaṭṭho nāma; heṭṭhā ṭhatvā uddhaṃmukhaṃ dinno ummaṭṭho nāma; aggaḷasūci viya vinivijjhitvā gato maṭṭho nāma; seso sabbopi vimaṭṭho nāma. Imasmiṃ pana ṭhāne omaṭṭho gahito. So hi sabbadāruṇo duruddharasallo duttikiccho antodoso antopubbalohitova hoti , pubbalohitaṃ anikkhamitvā vaṇamukhaṃ pariyonandhitvā tiṭṭhati. Pubbalohitaṃ niharitukāmehi mañcena saddhiṃ bandhitvā adhosiro kātabbo hoti, maraṇaṃ vā maraṇamattaṃ vā dukkhaṃ pāpuṇāti. Paribbajeti vihareyya.
ইমায গাথায কিং কথেতি? যথা সত্তিযা ওমট্ঠো পুরিসো সল্লুব্বহন-ৰণতিকিচ্ছনানং অত্থায ৰীরিযং আরভতি, পযোগং করোতি পরক্কমতি। যথা চ ডয্হমানো মত্থকে আদিত্তসীসো তস্স নিব্বাপনত্থায ৰীরিযং আরভতি, পযোগং করোতি পরক্কমতি, এৰমেৰ ভিক্খু কামরাগং পহানায সতো অপ্পমত্তো হুত্ৰা ৰিহরেয্য ভগৰাতি কথেসি।
Imāya gāthāya kiṃ katheti? Yathā sattiyā omaṭṭho puriso sallubbahana-vaṇatikicchanānaṃ atthāya vīriyaṃ ārabhati, payogaṃ karoti parakkamati. Yathā ca ḍayhamāno matthake ādittasīso tassa nibbāpanatthāya vīriyaṃ ārabhati, payogaṃ karoti parakkamati, evameva bhikkhu kāmarāgaṃ pahānāya sato appamatto hutvā vihareyya bhagavāti kathesi.
অথ ভগৰা চিন্তেসি – ইমায দেৰতায উপমা তাৰ দল়্হং কত্ৰা আনীতা, অত্থং পন পরিত্তকং গহেত্ৰা ঠিতা, পুনপ্পুনং কথেন্তীপি হেসা কামরাগস্স ৰিক্খম্ভনপহানমেৰ কথেয্য। যাৰ চ কামরাগো মগ্গেন ন সমুগ্ঘাটিযতি, তাৰ অনুবদ্ধোৰ হোতি। ইতি তমেৰ ওপম্মং গহেত্ৰা পঠমমগ্গৰসেন দেসনং ৰিনিৰট্টেত্ৰা দেসেন্তো দুতিযং গাথমাহ। তস্সত্থো পুরিমানুসারেনেৰ ৰেদিতব্বোতি। পঠমং।
Atha bhagavā cintesi – imāya devatāya upamā tāva daḷhaṃ katvā ānītā, atthaṃ pana parittakaṃ gahetvā ṭhitā, punappunaṃ kathentīpi hesā kāmarāgassa vikkhambhanapahānameva katheyya. Yāva ca kāmarāgo maggena na samugghāṭiyati, tāva anubaddhova hoti. Iti tameva opammaṃ gahetvā paṭhamamaggavasena desanaṃ vinivaṭṭetvā desento dutiyaṃ gāthamāha. Tassattho purimānusāreneva veditabboti. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সত্তিসুত্তং • 1. Sattisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১.সত্তিসুত্তৰণ্ণনা • 1.Sattisuttavaṇṇanā
