| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৩. সত্তিৰগ্গো
3. Sattivaggo
১.সত্তিসুত্তৰণ্ণনা
1.Sattisuttavaṇṇanā
২১. দেসনাসীসন্তি দেসনাপদেসলক্খণৰচনন্তি অধিপ্পাযো। ওমট্ঠোতি অধোমুখং কত্ৰা দিন্নপ্পহারো। ইমিনা এৰ পসঙ্গেন পহারে ৰিভাগতো দস্সেতুং ‘‘চত্তারো হী’’তিআদি ৰুত্তং । উপরি ঠত্ৰাতি হত্থিআদীনং উপরি ঠত্ৰা। অধোমুখং দিন্নপ্পহারোতি খগ্গকরৰালাদীনং অধোমুখং কত্ৰা পহতপহারো। উম্মট্ঠো ৰুত্তৰিপরিযাযেন ৰেদিতব্বো। ৰিৰিধপ্পহারো ৰিমট্ঠো। ‘‘ওমট্ঠো গহিতো’’তি ৰত্ৰা তস্সেৰ গহণে কারণং দস্সেতুং ‘‘সো হী’’তিআদি ৰুত্তং। দুগ্গন্ধকিমিআদীনং ৰসেন অন্তোদোসো। মঞ্চেন সদ্ধিং বন্ধিত্ৰাতি যস্মিং মঞ্চে ৰণিকপুগ্গলো নিপন্নো, তত্থ তং সুবন্ধং কত্ৰা পাদট্ঠানং উদ্ধং করোন্তেহি সীসট্ঠানং অধো কাতব্বং। তেনাহ ‘‘অধোসিরো কাতব্বো’’তি। পরিব্বজেতি পৰত্তেয্য। সা পন পৰত্তি ভাৰনাৰিহারেন যুত্তাতি আহ ‘‘ৰিহরেয্যা’’তি।
21.Desanāsīsanti desanāpadesalakkhaṇavacananti adhippāyo. Omaṭṭhoti adhomukhaṃ katvā dinnappahāro. Iminā eva pasaṅgena pahāre vibhāgato dassetuṃ ‘‘cattāro hī’’tiādi vuttaṃ . Upari ṭhatvāti hatthiādīnaṃ upari ṭhatvā. Adhomukhaṃ dinnappahāroti khaggakaravālādīnaṃ adhomukhaṃ katvā pahatapahāro. Ummaṭṭho vuttavipariyāyena veditabbo. Vividhappahāro vimaṭṭho. ‘‘Omaṭṭho gahito’’ti vatvā tasseva gahaṇe kāraṇaṃ dassetuṃ ‘‘so hī’’tiādi vuttaṃ. Duggandhakimiādīnaṃ vasena antodoso. Mañcena saddhiṃ bandhitvāti yasmiṃ mañce vaṇikapuggalo nipanno, tattha taṃ subandhaṃ katvā pādaṭṭhānaṃ uddhaṃ karontehi sīsaṭṭhānaṃ adho kātabbaṃ. Tenāha ‘‘adhosiro kātabbo’’ti. Paribbajeti pavatteyya. Sā pana pavatti bhāvanāvihārena yuttāti āha ‘‘vihareyyā’’ti.
সল্লস্স উব্বহনং সল্লুব্বহনং। অত্থং পরিত্তকং গহেত্ৰা ঠিতা উপমাকারস্স ৰিক্খম্ভনপ্পহানস্স অধিপ্পেতত্তা। তেনাহ ‘‘পুনপ্পুন’’ন্তিআদি। অনুবন্ধোৰ হোতি সতি পচ্চযে উপ্পজ্জনারহতো দেৰতায কামরাগপ্পহানস্স জোতিতত্তা। ননু ভগৰতা অনাগামিমগ্গেন দেসনা নিট্ঠাপেতব্বাতি? ন, ইতরিস্সা ঞাণবলানুরূপদেসনায পৰত্তেতব্বতো। ৰেনেয্যজ্ঝাসযানুকুলঞ্হি ধম্মং ধম্মস্সামী দেসেতীতি।
Sallassa ubbahanaṃ sallubbahanaṃ. Atthaṃ parittakaṃ gahetvā ṭhitā upamākārassa vikkhambhanappahānassa adhippetattā. Tenāha ‘‘punappuna’’ntiādi. Anubandhova hoti sati paccaye uppajjanārahato devatāya kāmarāgappahānassa jotitattā. Nanu bhagavatā anāgāmimaggena desanā niṭṭhāpetabbāti? Na, itarissā ñāṇabalānurūpadesanāya pavattetabbato. Veneyyajjhāsayānukulañhi dhammaṃ dhammassāmī desetīti.
সত্তিসুত্তৰণ্ণনা নিট্ঠিতা।
Sattisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সত্তিসুত্তং • 1. Sattisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সত্তিসুত্তৰণ্ণনা • 1. Sattisuttavaṇṇanā
