| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៣. សត្តិវគ្គោ
3. Sattivaggo
១. សត្តិសុត្តវណ្ណនា
1. Sattisuttavaṇṇanā
២១. សត្តិវគ្គស្ស បឋមេ សត្តិយាតិ ទេសនាសីសមេតំ។ ឯកតោខារាទិនា សត្ថេនាតិ អត្ថោ។ ឱមដ្ឋោតិ បហតោ។ ចត្តារោ ហិ បហារា ឱមដ្ឋោ ឧម្មដ្ឋោ មដ្ឋោ វិមដ្ឋោតិ។ តត្ថ ឧបរិ ឋត្វា អធោមុខំ ទិន្នបហារោ ឱមដ្ឋោ នាម; ហេដ្ឋា ឋត្វា ឧទ្ធំមុខំ ទិន្នោ ឧម្មដ្ឋោ នាម; អគ្គឡសូចិ វិយ វិនិវិជ្ឈិត្វា គតោ មដ្ឋោ នាម; សេសោ សព្ពោបិ វិមដ្ឋោ នាម។ ឥមស្មិំ បន ឋានេ ឱមដ្ឋោ គហិតោ។ សោ ហិ សព្ពទារុណោ ទុរុទ្ធរសល្លោ ទុត្តិកិច្ឆោ អន្តោទោសោ អន្តោបុព្ពលោហិតោវ ហោតិ , បុព្ពលោហិតំ អនិក្ខមិត្វា វណមុខំ បរិយោនន្ធិត្វា តិដ្ឋតិ។ បុព្ពលោហិតំ និហរិតុកាមេហិ មញ្ចេន សទ្ធិំ ពន្ធិត្វា អធោសិរោ កាតព្ពោ ហោតិ, មរណំ វា មរណមត្តំ វា ទុក្ខំ បាបុណាតិ។ បរិព្ពជេតិ វិហរេយ្យ។
21. Sattivaggassa paṭhame sattiyāti desanāsīsametaṃ. Ekatokhārādinā satthenāti attho. Omaṭṭhoti pahato. Cattāro hi pahārā omaṭṭho ummaṭṭho maṭṭho vimaṭṭhoti. Tattha upari ṭhatvā adhomukhaṃ dinnapahāro omaṭṭho nāma; heṭṭhā ṭhatvā uddhaṃmukhaṃ dinno ummaṭṭho nāma; aggaḷasūci viya vinivijjhitvā gato maṭṭho nāma; seso sabbopi vimaṭṭho nāma. Imasmiṃ pana ṭhāne omaṭṭho gahito. So hi sabbadāruṇo duruddharasallo duttikiccho antodoso antopubbalohitova hoti , pubbalohitaṃ anikkhamitvā vaṇamukhaṃ pariyonandhitvā tiṭṭhati. Pubbalohitaṃ niharitukāmehi mañcena saddhiṃ bandhitvā adhosiro kātabbo hoti, maraṇaṃ vā maraṇamattaṃ vā dukkhaṃ pāpuṇāti. Paribbajeti vihareyya.
ឥមាយ គាថាយ កិំ កថេតិ? យថា សត្តិយា ឱមដ្ឋោ បុរិសោ សល្លុព្ពហន-វណតិកិច្ឆនានំ អត្ថាយ វីរិយំ អារភតិ, បយោគំ ករោតិ បរក្កមតិ។ យថា ច ឌយ្ហមានោ មត្ថកេ អាទិត្តសីសោ តស្ស និព្ពាបនត្ថាយ វីរិយំ អារភតិ, បយោគំ ករោតិ បរក្កមតិ, ឯវមេវ ភិក្ខុ កាមរាគំ បហានាយ សតោ អប្បមត្តោ ហុត្វា វិហរេយ្យ ភគវាតិ កថេសិ។
Imāya gāthāya kiṃ katheti? Yathā sattiyā omaṭṭho puriso sallubbahana-vaṇatikicchanānaṃ atthāya vīriyaṃ ārabhati, payogaṃ karoti parakkamati. Yathā ca ḍayhamāno matthake ādittasīso tassa nibbāpanatthāya vīriyaṃ ārabhati, payogaṃ karoti parakkamati, evameva bhikkhu kāmarāgaṃ pahānāya sato appamatto hutvā vihareyya bhagavāti kathesi.
អថ ភគវា ចិន្តេសិ – ឥមាយ ទេវតាយ ឧបមា តាវ ទឡ្ហំ កត្វា អានីតា, អត្ថំ បន បរិត្តកំ គហេត្វា ឋិតា, បុនប្បុនំ កថេន្តីបិ ហេសា កាមរាគស្ស វិក្ខម្ភនបហានមេវ កថេយ្យ។ យាវ ច កាមរាគោ មគ្គេន ន សមុគ្ឃាដិយតិ, តាវ អនុពទ្ធោវ ហោតិ។ ឥតិ តមេវ ឱបម្មំ គហេត្វា បឋមមគ្គវសេន ទេសនំ វិនិវដ្ដេត្វា ទេសេន្តោ ទុតិយំ គាថមាហ។ តស្សត្ថោ បុរិមានុសារេនេវ វេទិតព្ពោតិ។ បឋមំ។
Atha bhagavā cintesi – imāya devatāya upamā tāva daḷhaṃ katvā ānītā, atthaṃ pana parittakaṃ gahetvā ṭhitā, punappunaṃ kathentīpi hesā kāmarāgassa vikkhambhanapahānameva katheyya. Yāva ca kāmarāgo maggena na samugghāṭiyati, tāva anubaddhova hoti. Iti tameva opammaṃ gahetvā paṭhamamaggavasena desanaṃ vinivaṭṭetvā desento dutiyaṃ gāthamāha. Tassattho purimānusāreneva veditabboti. Paṭhamaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. សត្តិសុត្តំ • 1. Sattisuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១.សត្តិសុត្តវណ្ណនា • 1.Sattisuttavaṇṇanā
