| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៣. សត្តិវគ្គោ
3. Sattivaggo
១.សត្តិសុត្តវណ្ណនា
1.Sattisuttavaṇṇanā
២១. ទេសនាសីសន្តិ ទេសនាបទេសលក្ខណវចនន្តិ អធិប្បាយោ។ ឱមដ្ឋោតិ អធោមុខំ កត្វា ទិន្នប្បហារោ។ ឥមិនា ឯវ បសង្គេន បហារេ វិភាគតោ ទស្សេតុំ ‘‘ចត្តារោ ហី’’តិអាទិ វុត្តំ ។ ឧបរិ ឋត្វាតិ ហត្ថិអាទីនំ ឧបរិ ឋត្វា។ អធោមុខំ ទិន្នប្បហារោតិ ខគ្គករវាលាទីនំ អធោមុខំ កត្វា បហតបហារោ។ ឧម្មដ្ឋោ វុត្តវិបរិយាយេន វេទិតព្ពោ។ វិវិធប្បហារោ វិមដ្ឋោ។ ‘‘ឱមដ្ឋោ គហិតោ’’តិ វត្វា តស្សេវ គហណេ ការណំ ទស្សេតុំ ‘‘សោ ហី’’តិអាទិ វុត្តំ។ ទុគ្គន្ធកិមិអាទីនំ វសេន អន្តោទោសោ។ មញ្ចេន សទ្ធិំ ពន្ធិត្វាតិ យស្មិំ មញ្ចេ វណិកបុគ្គលោ និបន្នោ, តត្ថ តំ សុពន្ធំ កត្វា បាទដ្ឋានំ ឧទ្ធំ ករោន្តេហិ សីសដ្ឋានំ អធោ កាតព្ពំ។ តេនាហ ‘‘អធោសិរោ កាតព្ពោ’’តិ។ បរិព្ពជេតិ បវត្តេយ្យ។ សា បន បវត្តិ ភាវនាវិហារេន យុត្តាតិ អាហ ‘‘វិហរេយ្យា’’តិ។
21.Desanāsīsanti desanāpadesalakkhaṇavacananti adhippāyo. Omaṭṭhoti adhomukhaṃ katvā dinnappahāro. Iminā eva pasaṅgena pahāre vibhāgato dassetuṃ ‘‘cattāro hī’’tiādi vuttaṃ . Upari ṭhatvāti hatthiādīnaṃ upari ṭhatvā. Adhomukhaṃ dinnappahāroti khaggakaravālādīnaṃ adhomukhaṃ katvā pahatapahāro. Ummaṭṭho vuttavipariyāyena veditabbo. Vividhappahāro vimaṭṭho. ‘‘Omaṭṭho gahito’’ti vatvā tasseva gahaṇe kāraṇaṃ dassetuṃ ‘‘so hī’’tiādi vuttaṃ. Duggandhakimiādīnaṃ vasena antodoso. Mañcena saddhiṃ bandhitvāti yasmiṃ mañce vaṇikapuggalo nipanno, tattha taṃ subandhaṃ katvā pādaṭṭhānaṃ uddhaṃ karontehi sīsaṭṭhānaṃ adho kātabbaṃ. Tenāha ‘‘adhosiro kātabbo’’ti. Paribbajeti pavatteyya. Sā pana pavatti bhāvanāvihārena yuttāti āha ‘‘vihareyyā’’ti.
សល្លស្ស ឧព្ពហនំ សល្លុព្ពហនំ។ អត្ថំ បរិត្តកំ គហេត្វា ឋិតា ឧបមាការស្ស វិក្ខម្ភនប្បហានស្ស អធិប្បេតត្តា។ តេនាហ ‘‘បុនប្បុន’’ន្តិអាទិ។ អនុពន្ធោវ ហោតិ សតិ បច្ចយេ ឧប្បជ្ជនារហតោ ទេវតាយ កាមរាគប្បហានស្ស ជោតិតត្តា។ ននុ ភគវតា អនាគាមិមគ្គេន ទេសនា និដ្ឋាបេតព្ពាតិ? ន, ឥតរិស្សា ញាណពលានុរូបទេសនាយ បវត្តេតព្ពតោ។ វេនេយ្យជ្ឈាសយានុកុលញ្ហិ ធម្មំ ធម្មស្សាមី ទេសេតីតិ។
Sallassa ubbahanaṃ sallubbahanaṃ. Atthaṃ parittakaṃ gahetvā ṭhitā upamākārassa vikkhambhanappahānassa adhippetattā. Tenāha ‘‘punappuna’’ntiādi. Anubandhova hoti sati paccaye uppajjanārahato devatāya kāmarāgappahānassa jotitattā. Nanu bhagavatā anāgāmimaggena desanā niṭṭhāpetabbāti? Na, itarissā ñāṇabalānurūpadesanāya pavattetabbato. Veneyyajjhāsayānukulañhi dhammaṃ dhammassāmī desetīti.
សត្តិសុត្តវណ្ណនា និដ្ឋិតា។
Sattisuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. សត្តិសុត្តំ • 1. Sattisuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. សត្តិសុត្តវណ្ណនា • 1. Sattisuttavaṇṇanā
