| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. သတ္တိဝဂ္ဂော
3. Sattivaggo
၁.သတ္တိသုတ္တဝဏ္ဏနာ
1.Sattisuttavaṇṇanā
၂၁. ဒေသနာသီသန္တိ ဒေသနာပဒေသလက္ခဏဝစနန္တိ အဓိပ္ပာယော။ ဩမဋ္ဌောတိ အဓောမုခံ ကတ္ဝာ ဒိန္နပ္ပဟာရော။ ဣမိနာ ဧဝ ပသင္ဂေန ပဟာရေ ဝိဘာဂတော ဒသ္သေတုံ ‘‘စတ္တာရော ဟီ’’တိအာဒိ ဝုတ္တံ ။ ဥပရိ ဌတ္ဝာတိ ဟတ္ထိအာဒီနံ ဥပရိ ဌတ္ဝာ။ အဓောမုခံ ဒိန္နပ္ပဟာရောတိ ခဂ္ဂကရဝာလာဒီနံ အဓောမုခံ ကတ္ဝာ ပဟတပဟာရော။ ဥမ္မဋ္ဌော ဝုတ္တဝိပရိယာယေန ဝေဒိတဗ္ဗော။ ဝိဝိဓပ္ပဟာရော ဝိမဋ္ဌော။ ‘‘ဩမဋ္ဌော ဂဟိတော’’တိ ဝတ္ဝာ တသ္သေဝ ဂဟဏေ ကာရဏံ ဒသ္သေတုံ ‘‘သော ဟီ’’တိအာဒိ ဝုတ္တံ။ ဒုဂ္ဂန္ဓကိမိအာဒီနံ ဝသေန အန္တောဒောသော။ မဉ္စေန သဒ္ဓိံ ဗန္ဓိတ္ဝာတိ ယသ္မိံ မဉ္စေ ဝဏိကပုဂ္ဂလော နိပန္နော, တတ္ထ တံ သုဗန္ဓံ ကတ္ဝာ ပာဒဋ္ဌာနံ ဥဒ္ဓံ ကရောန္တေဟိ သီသဋ္ဌာနံ အဓော ကာတဗ္ဗံ။ တေနာဟ ‘‘အဓောသိရော ကာတဗ္ဗော’’တိ။ ပရိဗ္ဗဇေတိ ပဝတ္တေယ္ယ။ သာ ပန ပဝတ္တိ ဘာဝနာဝိဟာရေန ယုတ္တာတိ အာဟ ‘‘ဝိဟရေယ္ယာ’’တိ။
21.Desanāsīsanti desanāpadesalakkhaṇavacananti adhippāyo. Omaṭṭhoti adhomukhaṃ katvā dinnappahāro. Iminā eva pasaṅgena pahāre vibhāgato dassetuṃ ‘‘cattāro hī’’tiādi vuttaṃ . Upari ṭhatvāti hatthiādīnaṃ upari ṭhatvā. Adhomukhaṃ dinnappahāroti khaggakaravālādīnaṃ adhomukhaṃ katvā pahatapahāro. Ummaṭṭho vuttavipariyāyena veditabbo. Vividhappahāro vimaṭṭho. ‘‘Omaṭṭho gahito’’ti vatvā tasseva gahaṇe kāraṇaṃ dassetuṃ ‘‘so hī’’tiādi vuttaṃ. Duggandhakimiādīnaṃ vasena antodoso. Mañcena saddhiṃ bandhitvāti yasmiṃ mañce vaṇikapuggalo nipanno, tattha taṃ subandhaṃ katvā pādaṭṭhānaṃ uddhaṃ karontehi sīsaṭṭhānaṃ adho kātabbaṃ. Tenāha ‘‘adhosiro kātabbo’’ti. Paribbajeti pavatteyya. Sā pana pavatti bhāvanāvihārena yuttāti āha ‘‘vihareyyā’’ti.
သလ္လသ္သ ဥဗ္ဗဟနံ သလ္လုဗ္ဗဟနံ။ အတ္ထံ ပရိတ္တကံ ဂဟေတ္ဝာ ဌိတာ ဥပမာကာရသ္သ ဝိက္ခမ္ဘနပ္ပဟာနသ္သ အဓိပ္ပေတတ္တာ။ တေနာဟ ‘‘ပုနပ္ပုန’’န္တိအာဒိ။ အနုဗန္ဓောဝ ဟောတိ သတိ ပစ္စယေ ဥပ္ပဇ္ဇနာရဟတော ဒေဝတာယ ကာမရာဂပ္ပဟာနသ္သ ဇောတိတတ္တာ။ နနု ဘဂဝတာ အနာဂာမိမဂ္ဂေန ဒေသနာ နိဋ္ဌာပေတဗ္ဗာတိ? န, ဣတရိသ္သာ ဉာဏဗလာနုရူပဒေသနာယ ပဝတ္တေတဗ္ဗတော။ ဝေနေယ္ယဇ္ဈာသယာနုကုလဉ္ဟိ ဓမ္မံ ဓမ္မသ္သာမီ ဒေသေတီတိ။
Sallassa ubbahanaṃ sallubbahanaṃ. Atthaṃ parittakaṃ gahetvā ṭhitā upamākārassa vikkhambhanappahānassa adhippetattā. Tenāha ‘‘punappuna’’ntiādi. Anubandhova hoti sati paccaye uppajjanārahato devatāya kāmarāgappahānassa jotitattā. Nanu bhagavatā anāgāmimaggena desanā niṭṭhāpetabbāti? Na, itarissā ñāṇabalānurūpadesanāya pavattetabbato. Veneyyajjhāsayānukulañhi dhammaṃ dhammassāmī desetīti.
သတ္တိသုတ္တဝဏ္ဏနာ နိဋ္ဌိတာ။
Sattisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သတ္တိသုတ္တံ • 1. Sattisuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သတ္တိသုတ္တဝဏ္ဏနာ • 1. Sattisuttavaṇṇanā
