| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๔๐๒. สตฺตุภสฺตชาตกํ (๗-๑-๗)
402. Sattubhastajātakaṃ (7-1-7)
๔๖.
46.
วิพฺภนฺตจิโตฺต กุปิตินฺทฺริโยสิ, เนเตฺตหิ เต วาริคณา สวนฺติ;
Vibbhantacitto kupitindriyosi, nettehi te vārigaṇā savanti;
กิํ เต นฎฺฐํ กิํ ปน ปตฺถยาโน, อิธาคมา พฺรเหฺม ตทิงฺฆ 1 พฺรูหิฯ
Kiṃ te naṭṭhaṃ kiṃ pana patthayāno, idhāgamā brahme tadiṅgha 2 brūhi.
๔๗.
47.
มิเยฺยถ ภริยา วชโต มมชฺช, อคจฺฉโต มรณมาห ยโกฺข;
Miyyetha bhariyā vajato mamajja, agacchato maraṇamāha yakkho;
เอเตน ทุเกฺขน ปเวธิโตสฺมิ, อกฺขาหิ เม เสนก เอตมตฺถํฯ
Etena dukkhena pavedhitosmi, akkhāhi me senaka etamatthaṃ.
๔๘.
48.
พหูนิ ฐานานิ วิจินฺตยิตฺวา, ยเมตฺถ วกฺขามิ ตเทว สจฺจํ;
Bahūni ṭhānāni vicintayitvā, yamettha vakkhāmi tadeva saccaṃ;
มญฺญามิ เต พฺราหฺมณ สตฺตุภสฺตํ, อชานโต กณฺหสโปฺป ปวิโฎฺฐฯ
Maññāmi te brāhmaṇa sattubhastaṃ, ajānato kaṇhasappo paviṭṭho.
๔๙.
49.
อาทาย ทณฺฑํ ปริสุมฺภ ภสฺตํ, ปเสฺสฬมูคํ อุรคํ ทุชิวฺหํ 3;
Ādāya daṇḍaṃ parisumbha bhastaṃ, passeḷamūgaṃ uragaṃ dujivhaṃ 4;
ฉินฺทชฺช กงฺขํ วิจิกิจฺฉิตานิ, ภุชงฺคมํ ปสฺส ปมุญฺจ ภสฺตํฯ
Chindajja kaṅkhaṃ vicikicchitāni, bhujaṅgamaṃ passa pamuñca bhastaṃ.
๕๐.
50.
สํวิคฺครูโป ปริสาย มเชฺฌ, โส พฺราหฺมโณ สตฺตุภสฺตํ ปมุญฺจิ;
Saṃviggarūpo parisāya majjhe, so brāhmaṇo sattubhastaṃ pamuñci;
อถ นิกฺขมิ อุรโค อุคฺคเตโช, อาสีวิโส สโปฺป ผณํ กริตฺวาฯ
Atha nikkhami urago uggatejo, āsīviso sappo phaṇaṃ karitvā.
๕๑.
51.
สุลทฺธลาภา ชนกสฺส รโญฺญ, โย ปสฺสตี เสนกํ สาธุปญฺญํ;
Suladdhalābhā janakassa rañño, yo passatī senakaṃ sādhupaññaṃ;
วิวฎฺฎฉโทฺท 5 นุสิ สพฺพทสฺสี, ญาณํ นุ เต พฺราหฺมณ ภิํสรูปํฯ
Vivaṭṭachaddo 6 nusi sabbadassī, ñāṇaṃ nu te brāhmaṇa bhiṃsarūpaṃ.
๕๒.
52.
อิมานิ เม สตฺตสตานิ อตฺถิ, คณฺหาหิ สพฺพานิ ททามิ ตุยฺหํ;
Imāni me sattasatāni atthi, gaṇhāhi sabbāni dadāmi tuyhaṃ;
ตยา หิ เม ชีวิตมชฺช ลทฺธํ, อโถปิ ภริยาย มกาสิ โสตฺถิํฯ
Tayā hi me jīvitamajja laddhaṃ, athopi bhariyāya makāsi sotthiṃ.
๕๓.
53.
น ปณฺฑิตา เวตนมาทิยนฺติ, จิตฺราหิ คาถาหิ สุภาสิตาหิ;
Na paṇḍitā vetanamādiyanti, citrāhi gāthāhi subhāsitāhi;
อิโตปิ เต พฺรเหฺม ททนฺตุ วิตฺตํ, อาทาย ตฺวํ คจฺฉ สกํ นิเกตนฺติฯ
Itopi te brahme dadantu vittaṃ, ādāya tvaṃ gaccha sakaṃ niketanti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๐๒] ๗. สตฺตุภสฺตชาตกวณฺณนา • [402] 7. Sattubhastajātakavaṇṇanā
