| Library / Tipiṭaka / තිපිටක • Tipiṭaka / ජාතකපාළි • Jātakapāḷi |
402. සත්‌තුභස්‌තජාතකං (7-1-7)
402. Sattubhastajātakaṃ (7-1-7)
46.
46.
විබ්‌භන්‌තචිත්‌තො කුපිතින්‌ද්‍රියොසි, නෙත්‌තෙහි තෙ වාරිගණා සවන්‌ති;
Vibbhantacitto kupitindriyosi, nettehi te vārigaṇā savanti;
කිං තෙ නට්‌ඨං කිං පන පත්‌ථයානො, ඉධාගමා බ්‍රහ්‌මෙ තදිඞ්‌ඝ 1 බ්‍රූහි.
Kiṃ te naṭṭhaṃ kiṃ pana patthayāno, idhāgamā brahme tadiṅgha 2 brūhi.
47.
47.
මිය්‍යෙථ භරියා වජතො මමජ්‌ජ, අගච්‌ඡතො මරණමාහ යක්‌ඛො;
Miyyetha bhariyā vajato mamajja, agacchato maraṇamāha yakkho;
එතෙන දුක්‌ඛෙන පවෙධිතොස්‌මි, අක්‌ඛාහි මෙ සෙනක එතමත්‌ථං.
Etena dukkhena pavedhitosmi, akkhāhi me senaka etamatthaṃ.
48.
48.
බහූනි ඨානානි විචින්‌තයිත්‌වා, යමෙත්‌ථ වක්‌ඛාමි තදෙව සච්‌චං;
Bahūni ṭhānāni vicintayitvā, yamettha vakkhāmi tadeva saccaṃ;
මඤ්‌ඤාමි තෙ බ්‍රාහ්‌මණ සත්‌තුභස්‌තං, අජානතො කණ්‌හසප්‌පො පවිට්‌ඨො.
Maññāmi te brāhmaṇa sattubhastaṃ, ajānato kaṇhasappo paviṭṭho.
49.
49.
ආදාය දණ්‌ඩං පරිසුම්‌භ භස්‌තං, පස්‌සෙළමූගං උරගං දුජිව්‌හං 3;
Ādāya daṇḍaṃ parisumbha bhastaṃ, passeḷamūgaṃ uragaṃ dujivhaṃ 4;
ඡින්‌දජ්‌ජ කඞ්‌ඛං විචිකිච්‌ඡිතානි, භුජඞ්‌ගමං පස්‌ස පමුඤ්‌ච භස්‌තං.
Chindajja kaṅkhaṃ vicikicchitāni, bhujaṅgamaṃ passa pamuñca bhastaṃ.
50.
50.
සංවිග්‌ගරූපො පරිසාය මජ්‌ඣෙ, සො බ්‍රාහ්‌මණො සත්‌තුභස්‌තං පමුඤ්‌චි;
Saṃviggarūpo parisāya majjhe, so brāhmaṇo sattubhastaṃ pamuñci;
අථ නික්‌ඛමි උරගො උග්‌ගතෙජො, ආසීවිසො සප්‌පො ඵණං කරිත්‌වා.
Atha nikkhami urago uggatejo, āsīviso sappo phaṇaṃ karitvā.
51.
51.
සුලද්‌ධලාභා ජනකස්‌ස රඤ්‌ඤො, යො පස්‌සතී සෙනකං සාධුපඤ්‌ඤං;
Suladdhalābhā janakassa rañño, yo passatī senakaṃ sādhupaññaṃ;
විවට්‌ටඡද්‌දො 5 නුසි සබ්‌බදස්‌සී, ඤාණං නු තෙ බ්‍රාහ්‌මණ භිංසරූපං.
Vivaṭṭachaddo 6 nusi sabbadassī, ñāṇaṃ nu te brāhmaṇa bhiṃsarūpaṃ.
52.
52.
ඉමානි මෙ සත්‌තසතානි අත්‌ථි, ගණ්‌හාහි සබ්‌බානි දදාමි තුය්‌හං;
Imāni me sattasatāni atthi, gaṇhāhi sabbāni dadāmi tuyhaṃ;
තයා හි මෙ ජීවිතමජ්‌ජ ලද්‌ධං, අථොපි භරියාය මකාසි සොත්‌ථිං.
Tayā hi me jīvitamajja laddhaṃ, athopi bhariyāya makāsi sotthiṃ.
53.
53.
න පණ්‌ඩිතා වෙතනමාදියන්‌ති, චිත්‍රාහි ගාථාහි සුභාසිතාහි;
Na paṇḍitā vetanamādiyanti, citrāhi gāthāhi subhāsitāhi;
ඉතොපි තෙ බ්‍රහ්‌මෙ දදන්‌තු විත්‌තං, ආදාය ත්‌වං ගච්‌ඡ සකං නිකෙතන්‌ති.
Itopi te brahme dadantu vittaṃ, ādāya tvaṃ gaccha sakaṃ niketanti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ජාතක-අට්‌ඨකථා • Jātaka-aṭṭhakathā / [402] 7. සත්‌තුභස්‌තජාතකවණ්‌ණනා • [402] 7. Sattubhastajātakavaṇṇanā
