| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
2. සඋපාදිසෙසසුත්‌තවණ්‌ණනා
2. Saupādisesasuttavaṇṇanā
12. දුතියෙ සඋපාදිසෙසන්‌ති සඋපාදානසෙසං. අනුපාදිසෙසන්‌ති උපාදානසෙසරහිතං නිග්‌ගහණං. මත්‌තසො කාරීති පමාණකාරී න පරිපූරකාරී. න තාවායං, සාරිපුත්‌ත, ධම්‌මපරියායො පටිභාසීති අප්‌පටිභානං නාම භගවතො නත්‌ථි, න තාවාහං ඉමං ධම්‌මපරියායං කථෙසින්‌ති අයං පනෙත්‌ථ අත්‌ථො. මායිමං ධම්‌මපරියායං සුත්‌වා පමාදං ආහරිංසූති ‘‘මයං කිර චතූහි අපායෙහි මුත්‌තා’’ති උපරි අරහත්‌තත්‌ථාය වීරියං අකරොන්‌තා මා පමාදං ආපජ්‌ජිංසු. පඤ්‌හාධිප්‌පායෙන භාසිතොති තයා පුච්‌ඡිතපඤ්‌හස්‌ස සභාවෙන කථිතොති දස්‌සෙති. ඉමෙසං පන නවන්‌නං පුග්‌ගලානං භවෙසු ඡන්‌දරාගවිනොදනත්‌ථං එතමෙව අත්‌ථුප්‌පත්‌තිං කත්‌වා – ‘‘සෙය්‍යථාපි, භික්‌ඛවෙ, අප්‌පමත්‌තකොපි ගූථො දුග්‌ගන්‌ධො හොති, එවමෙව ඛො ඛ්‌වාහං, භික්‌ඛවෙ, අප්‌පමත්‌තකම්‌පි භවං න වණ්‌ණෙමි අන්‌තමසො අච්‌ඡරාසඞ්‌ඝාතමත්‌තම්‌පී’’ති ඉමං සුත්‌තං (අ. නි. 1.321) අභාසි. න කෙවලඤ්‌ච එතෙසංයෙව නවන්‌නං පුග්‌ගලානං ගති නිබද්‌ධා, යෙසං පන කුලානං තීණි සරණානි පඤ්‌ච සීලානි එකං සලාකභත්‌තං එකං පක්‌ඛියභත්‌තං එකං වස්‌සාවාසිකං එකා පොක්‌ඛරණී එකො ආවාසො, එවරූපානි නිබද්‌ධපුඤ්‌ඤානි අත්‌ථි. තෙසම්‌පි ගති නිබද්‌ධා, සොතාපන්‌නසදිසානෙව තානි කුලානි.
12. Dutiye saupādisesanti saupādānasesaṃ. Anupādisesanti upādānasesarahitaṃ niggahaṇaṃ. Mattaso kārīti pamāṇakārī na paripūrakārī. Na tāvāyaṃ, sāriputta, dhammapariyāyo paṭibhāsīti appaṭibhānaṃ nāma bhagavato natthi, na tāvāhaṃ imaṃ dhammapariyāyaṃ kathesinti ayaṃ panettha attho. Māyimaṃ dhammapariyāyaṃ sutvā pamādaṃ āhariṃsūti ‘‘mayaṃ kira catūhi apāyehi muttā’’ti upari arahattatthāya vīriyaṃ akarontā mā pamādaṃ āpajjiṃsu. Pañhādhippāyena bhāsitoti tayā pucchitapañhassa sabhāvena kathitoti dasseti. Imesaṃ pana navannaṃ puggalānaṃ bhavesu chandarāgavinodanatthaṃ etameva atthuppattiṃ katvā – ‘‘seyyathāpi, bhikkhave, appamattakopi gūtho duggandho hoti, evameva kho khvāhaṃ, bhikkhave, appamattakampi bhavaṃ na vaṇṇemi antamaso accharāsaṅghātamattampī’’ti imaṃ suttaṃ (a. ni. 1.321) abhāsi. Na kevalañca etesaṃyeva navannaṃ puggalānaṃ gati nibaddhā, yesaṃ pana kulānaṃ tīṇi saraṇāni pañca sīlāni ekaṃ salākabhattaṃ ekaṃ pakkhiyabhattaṃ ekaṃ vassāvāsikaṃ ekā pokkharaṇī eko āvāso, evarūpāni nibaddhapuññāni atthi. Tesampi gati nibaddhā, sotāpannasadisāneva tāni kulāni.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 2. සඋපාදිසෙසසුත්‌තං • 2. Saupādisesasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2. සඋපාදිසෙසසුත්‌තවණ්‌ණනා • 2. Saupādisesasuttavaṇṇanā
