| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
५-८. सावज्जसुत्तादिवण्णना
5-8. Sāvajjasuttādivaṇṇanā
१३५-८. पञ्चमे सावज्जोति सदोसो। सावज्जेन कायकम्मेनाति सदोसेन पाणातिपातादिना कायकम्मेन। इतरेसुपि एसेव नयो। अयं वुच्चतीति अयं पुग्गलो तीहि द्वारेहि आयूहनकम्मस्स सदोसत्ता गूथकुणपादिभरितो पदेसो विय ‘‘सावज्जो’’ति वुच्चति। सावज्जेन बहुलन्ति यस्स सावज्जमेव कायकम्मं बहुलं होति, अप्पं अनवज्जं। सो ‘‘सावज्जेन बहुलं कायकम्मेन समन्नागतो अप्पं अनवज्जेना’’ति वुच्चति। इतरेसुपि एसेव नयो। को पन एवरूपो होतीति? यो गामधम्मताय वा निगमधम्मताय वा कदाचि करहचि उपोसथं समादियति, सीलानि पूरेति। अयं वुच्चतीति अयं पुग्गलो तीहि द्वारेहि आयूहनकम्मेसु सावज्जस्सेव बहुलताय अनवज्जस्स अप्पताय ‘‘वज्जबहुलो’’ति वुच्चति। यथा हि एकस्मिं पदेसे दुब्बण्णानि दुग्गन्धानि पुप्फानि रासिकतानस्सु, तेसं उपरि तहं तहं अधिमुत्तकवस्सिकपाटलानि पतितानि भवेय्युं, एवरूपो अयं पुग्गलो वेदितब्बो। यथा पन एकस्मिं पदेसे अधिमुत्तकवस्सिकपाटलानि रासिकतानस्सु, तेसं उपरि तहं तहं दुग्गन्धानि बदरपुप्फादीनि पतितानि भवेय्युं। एवरूपो ततियो पुग्गलो वेदितब्बो। चतुत्थो पन तीहि द्वारेहि आयूहनकम्मस्स निद्दोसत्ता च चतुमधुरभरितसुवण्णवाति विय दट्ठब्बो। छट्ठादीनि उत्तानत्थानेव।
135-8. Pañcame sāvajjoti sadoso. Sāvajjena kāyakammenāti sadosena pāṇātipātādinā kāyakammena. Itaresupi eseva nayo. Ayaṃ vuccatīti ayaṃ puggalo tīhi dvārehi āyūhanakammassa sadosattā gūthakuṇapādibharito padeso viya ‘‘sāvajjo’’ti vuccati. Sāvajjena bahulanti yassa sāvajjameva kāyakammaṃ bahulaṃ hoti, appaṃ anavajjaṃ. So ‘‘sāvajjena bahulaṃ kāyakammena samannāgato appaṃ anavajjenā’’ti vuccati. Itaresupi eseva nayo. Ko pana evarūpo hotīti? Yo gāmadhammatāya vā nigamadhammatāya vā kadāci karahaci uposathaṃ samādiyati, sīlāni pūreti. Ayaṃ vuccatīti ayaṃ puggalo tīhi dvārehi āyūhanakammesu sāvajjasseva bahulatāya anavajjassa appatāya ‘‘vajjabahulo’’ti vuccati. Yathā hi ekasmiṃ padese dubbaṇṇāni duggandhāni pupphāni rāsikatānassu, tesaṃ upari tahaṃ tahaṃ adhimuttakavassikapāṭalāni patitāni bhaveyyuṃ, evarūpo ayaṃ puggalo veditabbo. Yathā pana ekasmiṃ padese adhimuttakavassikapāṭalāni rāsikatānassu, tesaṃ upari tahaṃ tahaṃ duggandhāni badarapupphādīni patitāni bhaveyyuṃ. Evarūpo tatiyo puggalo veditabbo. Catuttho pana tīhi dvārehi āyūhanakammassa niddosattā ca catumadhurabharitasuvaṇṇavāti viya daṭṭhabbo. Chaṭṭhādīni uttānatthāneva.
सावज्जसुत्तादिवण्णना निट्ठिता।
Sāvajjasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
५. सावज्जसुत्तं • 5. Sāvajjasuttaṃ
६. पठमसीलसुत्तं • 6. Paṭhamasīlasuttaṃ
७. दुतियसीलसुत्तं • 7. Dutiyasīlasuttaṃ
८. निकट्ठसुत्तं • 8. Nikaṭṭhasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
५. सावज्जसुत्तवण्णना • 5. Sāvajjasuttavaṇṇanā
६-७. सीलसुत्तादिवण्णना • 6-7. Sīlasuttādivaṇṇanā
८. निकट्ठसुत्तवण्णना • 8. Nikaṭṭhasuttavaṇṇanā
