| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๕-๘. สาวชฺชสุตฺตาทิวณฺณนา
5-8. Sāvajjasuttādivaṇṇanā
๑๓๕-๘. ปญฺจเม สาวโชฺชติ สโทโสฯ สาวเชฺชน กายกเมฺมนาติ สโทเสน ปาณาติปาตาทินา กายกเมฺมนฯ อิตเรสุปิ เอเสว นโยฯ อยํ วุจฺจตีติ อยํ ปุคฺคโล ตีหิ ทฺวาเรหิ อายูหนกมฺมสฺส สโทสตฺตา คูถกุณปาทิภริโต ปเทโส วิย ‘‘สาวโชฺช’’ติ วุจฺจติฯ สาวเชฺชน พหุลนฺติ ยสฺส สาวชฺชเมว กายกมฺมํ พหุลํ โหติ, อปฺปํ อนวชฺชํฯ โส ‘‘สาวเชฺชน พหุลํ กายกเมฺมน สมนฺนาคโต อปฺปํ อนวเชฺชนา’’ติ วุจฺจติฯ อิตเรสุปิ เอเสว นโยฯ โก ปน เอวรูโป โหตีติ? โย คามธมฺมตาย วา นิคมธมฺมตาย วา กทาจิ กรหจิ อุโปสถํ สมาทิยติ, สีลานิ ปูเรติฯ อยํ วุจฺจตีติ อยํ ปุคฺคโล ตีหิ ทฺวาเรหิ อายูหนกเมฺมสุ สาวชฺชเสฺสว พหุลตาย อนวชฺชสฺส อปฺปตาย ‘‘วชฺชพหุโล’’ติ วุจฺจติฯ ยถา หิ เอกสฺมิํ ปเทเส ทุพฺพณฺณานิ ทุคฺคนฺธานิ ปุปฺผานิ ราสิกตานสฺสุ, เตสํ อุปริ ตหํ ตหํ อธิมุตฺตกวสฺสิกปาฎลานิ ปติตานิ ภเวยฺยุํ, เอวรูโป อยํ ปุคฺคโล เวทิตโพฺพฯ ยถา ปน เอกสฺมิํ ปเทเส อธิมุตฺตกวสฺสิกปาฎลานิ ราสิกตานสฺสุ, เตสํ อุปริ ตหํ ตหํ ทุคฺคนฺธานิ พทรปุปฺผาทีนิ ปติตานิ ภเวยฺยุํฯ เอวรูโป ตติโย ปุคฺคโล เวทิตโพฺพฯ จตุโตฺถ ปน ตีหิ ทฺวาเรหิ อายูหนกมฺมสฺส นิโทฺทสตฺตา จ จตุมธุรภริตสุวณฺณวาติ วิย ทฎฺฐโพฺพฯ ฉฎฺฐาทีนิ อุตฺตานตฺถาเนวฯ
135-8. Pañcame sāvajjoti sadoso. Sāvajjena kāyakammenāti sadosena pāṇātipātādinā kāyakammena. Itaresupi eseva nayo. Ayaṃ vuccatīti ayaṃ puggalo tīhi dvārehi āyūhanakammassa sadosattā gūthakuṇapādibharito padeso viya ‘‘sāvajjo’’ti vuccati. Sāvajjena bahulanti yassa sāvajjameva kāyakammaṃ bahulaṃ hoti, appaṃ anavajjaṃ. So ‘‘sāvajjena bahulaṃ kāyakammena samannāgato appaṃ anavajjenā’’ti vuccati. Itaresupi eseva nayo. Ko pana evarūpo hotīti? Yo gāmadhammatāya vā nigamadhammatāya vā kadāci karahaci uposathaṃ samādiyati, sīlāni pūreti. Ayaṃ vuccatīti ayaṃ puggalo tīhi dvārehi āyūhanakammesu sāvajjasseva bahulatāya anavajjassa appatāya ‘‘vajjabahulo’’ti vuccati. Yathā hi ekasmiṃ padese dubbaṇṇāni duggandhāni pupphāni rāsikatānassu, tesaṃ upari tahaṃ tahaṃ adhimuttakavassikapāṭalāni patitāni bhaveyyuṃ, evarūpo ayaṃ puggalo veditabbo. Yathā pana ekasmiṃ padese adhimuttakavassikapāṭalāni rāsikatānassu, tesaṃ upari tahaṃ tahaṃ duggandhāni badarapupphādīni patitāni bhaveyyuṃ. Evarūpo tatiyo puggalo veditabbo. Catuttho pana tīhi dvārehi āyūhanakammassa niddosattā ca catumadhurabharitasuvaṇṇavāti viya daṭṭhabbo. Chaṭṭhādīni uttānatthāneva.
สาวชฺชสุตฺตาทิวณฺณนา นิฎฺฐิตาฯ
Sāvajjasuttādivaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya
๕. สาวชฺชสุตฺตํ • 5. Sāvajjasuttaṃ
๖. ปฐมสีลสุตฺตํ • 6. Paṭhamasīlasuttaṃ
๗. ทุติยสีลสุตฺตํ • 7. Dutiyasīlasuttaṃ
๘. นิกฎฺฐสุตฺตํ • 8. Nikaṭṭhasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā)
๕. สาวชฺชสุตฺตวณฺณนา • 5. Sāvajjasuttavaṇṇanā
๖-๗. สีลสุตฺตาทิวณฺณนา • 6-7. Sīlasuttādivaṇṇanā
๘. นิกฎฺฐสุตฺตวณฺณนา • 8. Nikaṭṭhasuttavaṇṇanā
