| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៥-៨. សាវជ្ជសុត្តាទិវណ្ណនា
5-8. Sāvajjasuttādivaṇṇanā
១៣៥-៨. បញ្ចមេ សាវជ្ជោតិ សទោសោ។ សាវជ្ជេន កាយកម្មេនាតិ សទោសេន បាណាតិបាតាទិនា កាយកម្មេន។ ឥតរេសុបិ ឯសេវ នយោ។ អយំ វុច្ចតីតិ អយំ បុគ្គលោ តីហិ ទ្វារេហិ អាយូហនកម្មស្ស សទោសត្តា គូថកុណបាទិភរិតោ បទេសោ វិយ ‘‘សាវជ្ជោ’’តិ វុច្ចតិ។ សាវជ្ជេន ពហុលន្តិ យស្ស សាវជ្ជមេវ កាយកម្មំ ពហុលំ ហោតិ, អប្បំ អនវជ្ជំ។ សោ ‘‘សាវជ្ជេន ពហុលំ កាយកម្មេន សមន្នាគតោ អប្បំ អនវជ្ជេនា’’តិ វុច្ចតិ។ ឥតរេសុបិ ឯសេវ នយោ។ កោ បន ឯវរូបោ ហោតីតិ? យោ គាមធម្មតាយ វា និគមធម្មតាយ វា កទាចិ ករហចិ ឧបោសថំ សមាទិយតិ, សីលានិ បូរេតិ។ អយំ វុច្ចតីតិ អយំ បុគ្គលោ តីហិ ទ្វារេហិ អាយូហនកម្មេសុ សាវជ្ជស្សេវ ពហុលតាយ អនវជ្ជស្ស អប្បតាយ ‘‘វជ្ជពហុលោ’’តិ វុច្ចតិ។ យថា ហិ ឯកស្មិំ បទេសេ ទុព្ពណ្ណានិ ទុគ្គន្ធានិ បុប្ផានិ រាសិកតានស្សុ, តេសំ ឧបរិ តហំ តហំ អធិមុត្តកវស្សិកបាដលានិ បតិតានិ ភវេយ្យុំ, ឯវរូបោ អយំ បុគ្គលោ វេទិតព្ពោ។ យថា បន ឯកស្មិំ បទេសេ អធិមុត្តកវស្សិកបាដលានិ រាសិកតានស្សុ, តេសំ ឧបរិ តហំ តហំ ទុគ្គន្ធានិ ពទរបុប្ផាទីនិ បតិតានិ ភវេយ្យុំ។ ឯវរូបោ តតិយោ បុគ្គលោ វេទិតព្ពោ។ ចតុត្ថោ បន តីហិ ទ្វារេហិ អាយូហនកម្មស្ស និទ្ទោសត្តា ច ចតុមធុរភរិតសុវណ្ណវាតិ វិយ ទដ្ឋព្ពោ។ ឆដ្ឋាទីនិ ឧត្តានត្ថានេវ។
135-8. Pañcame sāvajjoti sadoso. Sāvajjena kāyakammenāti sadosena pāṇātipātādinā kāyakammena. Itaresupi eseva nayo. Ayaṃ vuccatīti ayaṃ puggalo tīhi dvārehi āyūhanakammassa sadosattā gūthakuṇapādibharito padeso viya ‘‘sāvajjo’’ti vuccati. Sāvajjena bahulanti yassa sāvajjameva kāyakammaṃ bahulaṃ hoti, appaṃ anavajjaṃ. So ‘‘sāvajjena bahulaṃ kāyakammena samannāgato appaṃ anavajjenā’’ti vuccati. Itaresupi eseva nayo. Ko pana evarūpo hotīti? Yo gāmadhammatāya vā nigamadhammatāya vā kadāci karahaci uposathaṃ samādiyati, sīlāni pūreti. Ayaṃ vuccatīti ayaṃ puggalo tīhi dvārehi āyūhanakammesu sāvajjasseva bahulatāya anavajjassa appatāya ‘‘vajjabahulo’’ti vuccati. Yathā hi ekasmiṃ padese dubbaṇṇāni duggandhāni pupphāni rāsikatānassu, tesaṃ upari tahaṃ tahaṃ adhimuttakavassikapāṭalāni patitāni bhaveyyuṃ, evarūpo ayaṃ puggalo veditabbo. Yathā pana ekasmiṃ padese adhimuttakavassikapāṭalāni rāsikatānassu, tesaṃ upari tahaṃ tahaṃ duggandhāni badarapupphādīni patitāni bhaveyyuṃ. Evarūpo tatiyo puggalo veditabbo. Catuttho pana tīhi dvārehi āyūhanakammassa niddosattā ca catumadhurabharitasuvaṇṇavāti viya daṭṭhabbo. Chaṭṭhādīni uttānatthāneva.
សាវជ្ជសុត្តាទិវណ្ណនា និដ្ឋិតា។
Sāvajjasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya
៥. សាវជ្ជសុត្តំ • 5. Sāvajjasuttaṃ
៦. បឋមសីលសុត្តំ • 6. Paṭhamasīlasuttaṃ
៧. ទុតិយសីលសុត្តំ • 7. Dutiyasīlasuttaṃ
៨. និកដ្ឋសុត្តំ • 8. Nikaṭṭhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā)
៥. សាវជ្ជសុត្តវណ្ណនា • 5. Sāvajjasuttavaṇṇanā
៦-៧. សីលសុត្តាទិវណ្ណនា • 6-7. Sīlasuttādivaṇṇanā
៨. និកដ្ឋសុត្តវណ្ណនា • 8. Nikaṭṭhasuttavaṇṇanā
