| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. সাৰজ্জসুত্তং
5. Sāvajjasuttaṃ
১৩৫. ‘‘চত্তারোমে, ভিক্খৰে, পুগ্গলা 1 সন্তো সংৰিজ্জমানা লোকস্মিং। কতমে চত্তারো? সাৰজ্জো, ৰজ্জবহুলো, অপ্পৰজ্জো, অনৰজ্জো।
135. ‘‘Cattārome, bhikkhave, puggalā 2 santo saṃvijjamānā lokasmiṃ. Katame cattāro? Sāvajjo, vajjabahulo, appavajjo, anavajjo.
‘‘কথঞ্চ, ভিক্খৰে, পুগ্গলো সাৰজ্জো হোতি? ইধ, ভিক্খৰে, একচ্চো পুগ্গলো সাৰজ্জেন কাযকম্মেন সমন্নাগতো হোতি, সাৰজ্জেন ৰচীকম্মেন সমন্নাগতো হোতি, সাৰজ্জেন মনোকম্মেন সমন্নাগতো হোতি। এৰং খো, ভিক্খৰে, পুগ্গলো সাৰজ্জো হোতি।
‘‘Kathañca, bhikkhave, puggalo sāvajjo hoti? Idha, bhikkhave, ekacco puggalo sāvajjena kāyakammena samannāgato hoti, sāvajjena vacīkammena samannāgato hoti, sāvajjena manokammena samannāgato hoti. Evaṃ kho, bhikkhave, puggalo sāvajjo hoti.
‘‘কথঞ্চ , ভিক্খৰে, পুগ্গলো ৰজ্জবহুলো হোতি? ইধ, ভিক্খৰে, একচ্চো পুগ্গলো সাৰজ্জেন বহুলং কাযকম্মেন সমন্নাগতো হোতি, অপ্পং অনৰজ্জেন; সাৰজ্জেন বহুলং ৰচীকম্মেন সমন্নাগতো হোতি, অপ্পং অনৰজ্জেন; সাৰজ্জেন বহুলং মনোকম্মেন সমন্নাগতো হোতি, অপ্পং অনৰজ্জেন। এৰং খো, ভিক্খৰে, পুগ্গলো ৰজ্জবহুলো হোতি।
‘‘Kathañca , bhikkhave, puggalo vajjabahulo hoti? Idha, bhikkhave, ekacco puggalo sāvajjena bahulaṃ kāyakammena samannāgato hoti, appaṃ anavajjena; sāvajjena bahulaṃ vacīkammena samannāgato hoti, appaṃ anavajjena; sāvajjena bahulaṃ manokammena samannāgato hoti, appaṃ anavajjena. Evaṃ kho, bhikkhave, puggalo vajjabahulo hoti.
‘‘কথঞ্চ , ভিক্খৰে, পুগ্গলো অপ্পৰজ্জো হোতি? ইধ, ভিক্খৰে, একচ্চো পুগ্গলো অনৰজ্জেন বহুলং কাযকম্মেন সমন্নাগতো হোতি, অপ্পং সাৰজ্জেন; অনৰজ্জেন বহুলং ৰচীকম্মেন সমন্নাগতো হোতি, অপ্পং সাৰজ্জেন; অনৰজ্জেন বহুলং মনোকম্মেন সমন্নাগতো হোতি, অপ্পং সাৰজ্জেন। এৰং খো, ভিক্খৰে, পুগ্গলো অপ্পৰজ্জো হোতি।
‘‘Kathañca , bhikkhave, puggalo appavajjo hoti? Idha, bhikkhave, ekacco puggalo anavajjena bahulaṃ kāyakammena samannāgato hoti, appaṃ sāvajjena; anavajjena bahulaṃ vacīkammena samannāgato hoti, appaṃ sāvajjena; anavajjena bahulaṃ manokammena samannāgato hoti, appaṃ sāvajjena. Evaṃ kho, bhikkhave, puggalo appavajjo hoti.
‘‘কথঞ্চ , ভিক্খৰে, পুগ্গলো অনৰজ্জো হোতি? ইধ, ভিক্খৰে, একচ্চো পুগ্গলো অনৰজ্জেন কাযকম্মেন সমন্নাগতো হোতি, অনৰজ্জেন ৰচীকম্মেন সমন্নাগতো হোতি, অনৰজ্জেন মনোকম্মেন সমন্নাগতো হোতি। এৰং খো, ভিক্খৰে, পুগ্গলো অনৰজ্জো হোতি। ইমে খো, ভিক্খৰে, চত্তারো পুগ্গলা সন্তো সংৰিজ্জমানা লোকস্মি’’ন্তি। পঞ্চমং।
‘‘Kathañca , bhikkhave, puggalo anavajjo hoti? Idha, bhikkhave, ekacco puggalo anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti. Evaṃ kho, bhikkhave, puggalo anavajjo hoti. Ime kho, bhikkhave, cattāro puggalā santo saṃvijjamānā lokasmi’’nti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. সাৰজ্জসুত্তৰণ্ণনা • 5. Sāvajjasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫-৮. সাৰজ্জসুত্তাদিৰণ্ণনা • 5-8. Sāvajjasuttādivaṇṇanā
