| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൫. സാവജ്ജസുത്തം
5. Sāvajjasuttaṃ
൧൩൫. ‘‘ചത്താരോമേ, ഭിക്ഖവേ, പുഗ്ഗലാ 1 സന്തോ സംവിജ്ജമാനാ ലോകസ്മിം. കതമേ ചത്താരോ? സാവജ്ജോ, വജ്ജബഹുലോ, അപ്പവജ്ജോ, അനവജ്ജോ.
135. ‘‘Cattārome, bhikkhave, puggalā 2 santo saṃvijjamānā lokasmiṃ. Katame cattāro? Sāvajjo, vajjabahulo, appavajjo, anavajjo.
‘‘കഥഞ്ച, ഭിക്ഖവേ, പുഗ്ഗലോ സാവജ്ജോ ഹോതി? ഇധ, ഭിക്ഖവേ, ഏകച്ചോ പുഗ്ഗലോ സാവജ്ജേന കായകമ്മേന സമന്നാഗതോ ഹോതി, സാവജ്ജേന വചീകമ്മേന സമന്നാഗതോ ഹോതി, സാവജ്ജേന മനോകമ്മേന സമന്നാഗതോ ഹോതി. ഏവം ഖോ, ഭിക്ഖവേ, പുഗ്ഗലോ സാവജ്ജോ ഹോതി.
‘‘Kathañca, bhikkhave, puggalo sāvajjo hoti? Idha, bhikkhave, ekacco puggalo sāvajjena kāyakammena samannāgato hoti, sāvajjena vacīkammena samannāgato hoti, sāvajjena manokammena samannāgato hoti. Evaṃ kho, bhikkhave, puggalo sāvajjo hoti.
‘‘കഥഞ്ച , ഭിക്ഖവേ, പുഗ്ഗലോ വജ്ജബഹുലോ ഹോതി? ഇധ, ഭിക്ഖവേ, ഏകച്ചോ പുഗ്ഗലോ സാവജ്ജേന ബഹുലം കായകമ്മേന സമന്നാഗതോ ഹോതി, അപ്പം അനവജ്ജേന; സാവജ്ജേന ബഹുലം വചീകമ്മേന സമന്നാഗതോ ഹോതി, അപ്പം അനവജ്ജേന; സാവജ്ജേന ബഹുലം മനോകമ്മേന സമന്നാഗതോ ഹോതി, അപ്പം അനവജ്ജേന. ഏവം ഖോ, ഭിക്ഖവേ, പുഗ്ഗലോ വജ്ജബഹുലോ ഹോതി.
‘‘Kathañca , bhikkhave, puggalo vajjabahulo hoti? Idha, bhikkhave, ekacco puggalo sāvajjena bahulaṃ kāyakammena samannāgato hoti, appaṃ anavajjena; sāvajjena bahulaṃ vacīkammena samannāgato hoti, appaṃ anavajjena; sāvajjena bahulaṃ manokammena samannāgato hoti, appaṃ anavajjena. Evaṃ kho, bhikkhave, puggalo vajjabahulo hoti.
‘‘കഥഞ്ച , ഭിക്ഖവേ, പുഗ്ഗലോ അപ്പവജ്ജോ ഹോതി? ഇധ, ഭിക്ഖവേ, ഏകച്ചോ പുഗ്ഗലോ അനവജ്ജേന ബഹുലം കായകമ്മേന സമന്നാഗതോ ഹോതി, അപ്പം സാവജ്ജേന; അനവജ്ജേന ബഹുലം വചീകമ്മേന സമന്നാഗതോ ഹോതി, അപ്പം സാവജ്ജേന; അനവജ്ജേന ബഹുലം മനോകമ്മേന സമന്നാഗതോ ഹോതി, അപ്പം സാവജ്ജേന. ഏവം ഖോ, ഭിക്ഖവേ, പുഗ്ഗലോ അപ്പവജ്ജോ ഹോതി.
‘‘Kathañca , bhikkhave, puggalo appavajjo hoti? Idha, bhikkhave, ekacco puggalo anavajjena bahulaṃ kāyakammena samannāgato hoti, appaṃ sāvajjena; anavajjena bahulaṃ vacīkammena samannāgato hoti, appaṃ sāvajjena; anavajjena bahulaṃ manokammena samannāgato hoti, appaṃ sāvajjena. Evaṃ kho, bhikkhave, puggalo appavajjo hoti.
‘‘കഥഞ്ച , ഭിക്ഖവേ, പുഗ്ഗലോ അനവജ്ജോ ഹോതി? ഇധ, ഭിക്ഖവേ, ഏകച്ചോ പുഗ്ഗലോ അനവജ്ജേന കായകമ്മേന സമന്നാഗതോ ഹോതി, അനവജ്ജേന വചീകമ്മേന സമന്നാഗതോ ഹോതി, അനവജ്ജേന മനോകമ്മേന സമന്നാഗതോ ഹോതി. ഏവം ഖോ, ഭിക്ഖവേ, പുഗ്ഗലോ അനവജ്ജോ ഹോതി. ഇമേ ഖോ, ഭിക്ഖവേ, ചത്താരോ പുഗ്ഗലാ സന്തോ സംവിജ്ജമാനാ ലോകസ്മി’’ന്തി. പഞ്ചമം.
‘‘Kathañca , bhikkhave, puggalo anavajjo hoti? Idha, bhikkhave, ekacco puggalo anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti. Evaṃ kho, bhikkhave, puggalo anavajjo hoti. Ime kho, bhikkhave, cattāro puggalā santo saṃvijjamānā lokasmi’’nti. Pañcamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൫. സാവജ്ജസുത്തവണ്ണനാ • 5. Sāvajjasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൫-൮. സാവജ്ജസുത്താദിവണ്ണനാ • 5-8. Sāvajjasuttādivaṇṇanā
