| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸவிப⁴ங்க³ஸிக்கா²பத³வண்ணனா
Savibhaṅgasikkhāpadavaṇṇanā
197. பகதிமனுஸ்ஸேஹி உத்தரிதரானங் பு³த்³தா⁴தி³உத்தமபுரிஸானங் அதி⁴க³மத⁴ம்மோ உத்தரிமனுஸ்ஸத⁴ம்மோதி ஆஹ உத்தரிமனுஸ்ஸானந்திஆதி³. பாளியங் (பாரா॰ 198) ‘‘அத்தி² ச மே ஏதே த⁴ம்மா மயீ’’தி எத்த² மேதி இத³ங் பத³பூரணமத்தங். அதி⁴க³ந்தப்³ப³தோ அதி⁴க³மஸங்கா²தஸ்ஸ ஜா²னாதி³னோ புச்சா² அதி⁴க³மபுச்சா², ஸா ச ஜா²னாதீ³ஸு ஸாமஞ்ஞதோ பவத்தாதி இதா³னி தத்த² பட²மஜ்ஜா²னங் வா து³தியாதீ³ஸு அஞ்ஞதரங் வா தத்தா²பி கஸிணாதி³ஆரம்மணேஸு கதரமாரம்மணங் ஜா²னங் வா லோகுத்தரேஸு ச ஸோதாபத்திமக்³க³ங் வா ஸகதா³கா³மிமக்³கா³தீ³ஸு அஞ்ஞதரங் வா தத்தா²பி ஸுஞ்ஞதவிமொக்க²ங் வா அப்பணிஹிதவிமொக்கா²தீ³ஸு அஞ்ஞதரங் வாதி ஏவங் பச்சேகங் பே⁴த³னித்³தா⁴ரணவஸேன புச்ச²னாகாரங் த³ஸ்ஸேதுங் பாளியங் (பாரா॰ 198) ‘‘புன கதமேஸங் த்வங் த⁴ம்மானங் லாபீ⁴’’தி அயங் புச்சா² த³ஸ்ஸிதாதி த³ட்ட²ப்³பா³, தேனாஹ பட²மமக்³கா³தீ³ஸூதிஆதி³. யாய அனுக்கமபடிபத்தியா லோகுத்தரோ அதி⁴க³மோ ஆக³ச்ச²தி, ஸா புப்³ப³பா⁴க³படிபத்தி ஆக³மனபடிபதா³. ந ஸுஜ்ஜ²தீதி புச்சி²யமானோ படிபத்திக்கமங் உல்லங்கி⁴த்வா கதே²தி. அபனேதப்³போ³தி தயா வுத்தக்கமேனாயங் ந ஸக்கா அதி⁴க³ந்துந்தி அதி⁴க³தமானதோ அபனேதப்³போ³. ஸன்னிஹிதேஸு கப்பியேஸுபி சதூஸு பச்சயேஸு அலக்³க³த்தா ‘‘ஆகாஸே பாணிஸமேன சேதஸா’’தி வுத்தங். வுத்தஸதி³ஸங் ப்³யாகரணங் ஹோதீதி யோஜனா. கீ²ணாஸவபடிபத்திஸதி³ஸா படிபதா³ ஹோதி ஸுவிக்க²ம்பி⁴தகிலேஸத்தா. இத³ஞ்ச அரஹத்தங் படிஜானந்தஸ்ஸ வஸேன வுத்தங், தேனாஹ கீ²ணாஸவஸ்ஸ நாமாதிஆதி³. ஏவங் ஸுவிக்க²ம்பி⁴தகிலேஸஸ்ஸ வத்தனஸெக்க²த⁴ம்மபடிஜானநங் இமினா ப⁴யுப்பாத³னேன, அம்பி³லாதி³த³ஸ்ஸனே கே²ளுப்பாதா³தி³னா ச ந ஸக்கா வீமங்ஸிதுங், தஸ்மா தஸ்ஸ வசனேனேவ தங் ஸத்³தா⁴தப்³ப³ங். அயங் பி⁴க்கு² ஸம்பன்னப்³யாகரணோதி இத³ங் ந கேவலங் அபா⁴யனகமேவ ஸந்தா⁴ய வுத்தங் ஏகச்சஸ்ஸ ஸூரஜாதிகஸ்ஸ புது²ஜ்ஜனஸ்ஸாபி அபா⁴யனதோ, ரஜ்ஜனீயாரம்மணானங் ப³த³ரஸாளவாதி³அம்பி³லமத்³த³னாதீ³னங் உபனயனேபி கே²ளுப்பாதா³தி³தண்ஹாபவத்தரஹிதங் ஸப்³ப³தா² ஸுஸோதி⁴தமேவ ஸந்தா⁴ய வுத்தந்தி க³ஹேதப்³ப³ங்.
197. Pakatimanussehi uttaritarānaṃ buddhādiuttamapurisānaṃ adhigamadhammo uttarimanussadhammoti āha uttarimanussānantiādi. Pāḷiyaṃ (pārā. 198) ‘‘atthi ca me ete dhammā mayī’’ti ettha meti idaṃ padapūraṇamattaṃ. Adhigantabbato adhigamasaṅkhātassa jhānādino pucchā adhigamapucchā, sā ca jhānādīsu sāmaññato pavattāti idāni tattha paṭhamajjhānaṃ vā dutiyādīsu aññataraṃ vā tatthāpi kasiṇādiārammaṇesu kataramārammaṇaṃ jhānaṃ vā lokuttaresu ca sotāpattimaggaṃ vā sakadāgāmimaggādīsu aññataraṃ vā tatthāpi suññatavimokkhaṃ vā appaṇihitavimokkhādīsu aññataraṃ vāti evaṃ paccekaṃ bhedaniddhāraṇavasena pucchanākāraṃ dassetuṃ pāḷiyaṃ (pārā. 198) ‘‘puna katamesaṃ tvaṃ dhammānaṃ lābhī’’ti ayaṃ pucchā dassitāti daṭṭhabbā, tenāha paṭhamamaggādīsūtiādi. Yāya anukkamapaṭipattiyā lokuttaro adhigamo āgacchati, sā pubbabhāgapaṭipatti āgamanapaṭipadā. Na sujjhatīti pucchiyamāno paṭipattikkamaṃ ullaṅghitvā katheti. Apanetabboti tayā vuttakkamenāyaṃ na sakkā adhigantunti adhigatamānato apanetabbo. Sannihitesu kappiyesupi catūsu paccayesu alaggattā ‘‘ākāse pāṇisamena cetasā’’ti vuttaṃ. Vuttasadisaṃ byākaraṇaṃ hotīti yojanā. Khīṇāsavapaṭipattisadisā paṭipadā hoti suvikkhambhitakilesattā. Idañca arahattaṃ paṭijānantassa vasena vuttaṃ, tenāha khīṇāsavassa nāmātiādi. Evaṃ suvikkhambhitakilesassa vattanasekkhadhammapaṭijānanaṃ iminā bhayuppādanena, ambilādidassane kheḷuppādādinā ca na sakkā vīmaṃsituṃ, tasmā tassa vacaneneva taṃ saddhātabbaṃ. Ayaṃ bhikkhu sampannabyākaraṇoti idaṃ na kevalaṃ abhāyanakameva sandhāya vuttaṃ ekaccassa sūrajātikassa puthujjanassāpi abhāyanato, rajjanīyārammaṇānaṃ badarasāḷavādiambilamaddanādīnaṃ upanayanepi kheḷuppādāditaṇhāpavattarahitaṃ sabbathā susodhitameva sandhāya vuttanti gahetabbaṃ.
அஸந்தகு³ணஸம்பா⁴வனலக்க²ணா பாபிச்சா²தி ஆஹ யா ஸா இதே⁴கச்சோதிஆதி³. ஆதி³-ஸத்³தே³ன அஸ்ஸத்³தோ⁴திஆதி³பாட²ங் ஸங்க³ண்ஹாதி. ஸாமஞ்ஞங் து³ப்பராமட்ட²ந்தி ஸமணத⁴ம்மஸங்கா²தங் ஸாமஞ்ஞங் க²ண்ட³ஸீலாதி³தாய து³ப்பராமட்ட²ங் து³ட்டு² க³ஹிதங் நிரயாய நிரயது³க்கா²ய தங் புக்³க³லங் தத்த² நிரயே உபகட்³ட⁴தி நிப்³ப³த்தாபேதீதி அத்தோ². ஸிதி²லோதி ஓலீயித்வா கரணேன ஸிதி²லகா³ஹேன கதோ, ஸதே²ன வா ஸாடெ²ய்யேன ஆதி³ண்ணோ ஸிதி²லோ. பரிப்³ப³ஜோதி ஸமணபா⁴வோ. பி⁴ய்யோதி புப்³பே³ விஜ்ஜமானானங் ராக³ரஜாதீ³னங் உபரி அபரம்பி ரஜங் ஆகிரதீதி அத்தோ². பி⁴க்கு²பா⁴வோதி அத⁴ம்மிகபடிஞ்ஞாமத்தஸித்³தோ⁴ பி⁴க்கு²பா⁴வோ. அஜானமேவாதி எத்த² ஏவ-ஸத்³தோ³ அவதா⁴ரணே அஜானந்தோ ஏவாதி, ‘‘அஜானமேவ’’ந்திபி பாடோ², தத்த² பன ஏவங் ஜானாமி ஏவங் பஸ்ஸாமீதி யோஜேதப்³ப³ங்.
Asantaguṇasambhāvanalakkhaṇā pāpicchāti āha yā sā idhekaccotiādi. Ādi-saddena assaddhotiādipāṭhaṃ saṅgaṇhāti. Sāmaññaṃ dupparāmaṭṭhanti samaṇadhammasaṅkhātaṃ sāmaññaṃ khaṇḍasīlāditāya dupparāmaṭṭhaṃ duṭṭhu gahitaṃ nirayāya nirayadukkhāya taṃ puggalaṃ tattha niraye upakaḍḍhati nibbattāpetīti attho. Sithiloti olīyitvā karaṇena sithilagāhena kato, sathena vā sāṭheyyena ādiṇṇo sithilo. Paribbajoti samaṇabhāvo. Bhiyyoti pubbe vijjamānānaṃ rāgarajādīnaṃ upari aparampi rajaṃ ākiratīti attho. Bhikkhubhāvoti adhammikapaṭiññāmattasiddho bhikkhubhāvo. Ajānamevāti ettha eva-saddo avadhāraṇe ajānanto evāti, ‘‘ajānameva’’ntipi pāṭho, tattha pana evaṃ jānāmi evaṃ passāmīti yojetabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. சதுத்த²பாராஜிகங் • 4. Catutthapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. சதுத்த²பாராஜிகங் • 4. Catutthapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸவிப⁴ங்க³ஸிக்கா²பத³வண்ணனா • Savibhaṅgasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸவிப⁴ங்க³ஸிக்கா²பத³வண்ணனா • Savibhaṅgasikkhāpadavaṇṇanā
