| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. সযনদাযকত্থেরঅপদানৰণ্ণনা
7. Sayanadāyakattheraapadānavaṇṇanā
সিদ্ধত্থস্স ভগৰতোতিআদিকং আযস্মতো সযনদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে অঞ্ঞতরস্মিং কুলে নিব্বত্তো ৰিঞ্ঞুতং পত্তো সত্থরি পসীদিত্ৰা হত্থিদণ্ডসুৰণ্ণাদীহি সযনত্থায মঞ্চং কারেত্ৰা অনগ্ঘেহি ৰিচিত্তত্থরণেহি অত্থরিত্ৰা ভগৰন্তং পূজেসি। সো ভগৰা তস্সানুকম্পায পটিগ্গহেত্ৰা অনুভৰি। সো তেন পুঞ্ঞকম্মেন দিব্বমনুস্সসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সত্থু সাসনে পসন্নো পব্বজিত্ৰা ৰিপস্সনং আরভিত্ৰা নচিরস্সেৰ অরহা অহোসি। পুব্বে কতপুঞ্ঞনামেন সযনদাযকত্থেরোতি পাকটো।
Siddhatthassa bhagavatotiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle aññatarasmiṃ kule nibbatto viññutaṃ patto satthari pasīditvā hatthidaṇḍasuvaṇṇādīhi sayanatthāya mañcaṃ kāretvā anagghehi vicittattharaṇehi attharitvā bhagavantaṃ pūjesi. So bhagavā tassānukampāya paṭiggahetvā anubhavi. So tena puññakammena dibbamanussasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā satthu sāsane pasanno pabbajitvā vipassanaṃ ārabhitvā nacirasseva arahā ahosi. Pubbe katapuññanāmena sayanadāyakattheroti pākaṭo.
৮৮. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্স ভগৰতোতিআদিমাহ। তং সব্বং পাল়িনযানুসারেন সুৰিঞ্ঞেয্যমেৰাতি।
88. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento siddhatthassa bhagavatotiādimāha. Taṃ sabbaṃ pāḷinayānusārena suviññeyyamevāti.
সযনদাযকত্থেরঅপদানৰণ্ণনা সমত্তা।
Sayanadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. সযনদাযকত্থেরঅপদানং • 7. Sayanadāyakattheraapadānaṃ
