| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. সযনদাযকত্থেরঅপদানৰণ্ণনা
3. Sayanadāyakattheraapadānavaṇṇanā
পদুমুত্তরবুদ্ধস্সাতিআদিকং আযস্মতো সযনদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা সুখমনুভৰন্তো সত্থু ধম্মদেসনং সুত্ৰা সত্থরি পসন্নো দন্তসুৰণ্ণরজতমুত্তমণিমযং মহারহং মঞ্চং কারাপেত্ৰা চীনপট্টকম্বলাদীনি অত্থরিত্ৰা সযনত্থায ভগৰতো অদাসি। ভগৰা তস্স অনুগ্গহং করোন্তো তত্থ সযি । সো তেন পুঞ্ঞকম্মেন দেৰমনুস্সেসু সংসরন্তো তদনুরূপং আকাসগমনসুখসেয্যাদিসুখং অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলে নিব্বত্তিত্ৰা ৰিঞ্ঞুতং পাপুণিত্ৰা সত্থু ধম্মদেসনং সুত্ৰা পসন্নমানসো পব্বজিত্ৰা ৰিপস্সন্তো নচিরস্সেৰ অরহা অহোসি।
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
২০. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরবুদ্ধস্সাতিআদিমাহ। তং হেট্ঠা ৰুত্তত্থমেৰ।
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
২১. সুখেত্তে বীজসম্পদাতি যথা তিণকচৰররহিতে কদ্দমাদিসম্পন্নে সুখেত্তে ৰুত্তবীজানি সাদুফলানি নিপ্ফাদেন্তি, এৰমেৰ রাগদোসাদিদিযড্ঢসহস্সকিলেসসঙ্খাততিণকচৰররহিতে সুদ্ধসন্তানে পুঞ্ঞক্খেত্তে ৰুত্তদানানি অপ্পানিপি সমানানি মহপ্ফলানি হোন্তীতি অত্থো। সেসং সুৰিঞ্ঞেয্যমেৰাতি।
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
সযনদাযকত্থেরঅপদানৰণ্ণনা সমত্তা।
Sayanadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. সযনদাযকত্থেরঅপদানং • 3. Sayanadāyakattheraapadānaṃ
