| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
३. सयनदायकत्थेरअपदानवण्णना
3. Sayanadāyakattheraapadānavaṇṇanā
पदुमुत्तरबुद्धस्सातिआदिकं आयस्मतो सयनदायकत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो पदुमुत्तरस्स भगवतो काले एकस्मिं कुलगेहे निब्बत्तो विञ्ञुतं पत्तो घरावासं सण्ठपेत्वा सुखमनुभवन्तो सत्थु धम्मदेसनं सुत्वा सत्थरि पसन्नो दन्तसुवण्णरजतमुत्तमणिमयं महारहं मञ्चं कारापेत्वा चीनपट्टकम्बलादीनि अत्थरित्वा सयनत्थाय भगवतो अदासि। भगवा तस्स अनुग्गहं करोन्तो तत्थ सयि । सो तेन पुञ्ञकम्मेन देवमनुस्सेसु संसरन्तो तदनुरूपं आकासगमनसुखसेय्यादिसुखं अनुभवित्वा इमस्मिं बुद्धुप्पादे विभवसम्पन्ने एकस्मिं कुले निब्बत्तित्वा विञ्ञुतं पापुणित्वा सत्थु धम्मदेसनं सुत्वा पसन्नमानसो पब्बजित्वा विपस्सन्तो नचिरस्सेव अरहा अहोसि।
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
२०. सो अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो पदुमुत्तरबुद्धस्सातिआदिमाह। तं हेट्ठा वुत्तत्थमेव।
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
२१. सुखेत्ते बीजसम्पदाति यथा तिणकचवररहिते कद्दमादिसम्पन्ने सुखेत्ते वुत्तबीजानि सादुफलानि निप्फादेन्ति, एवमेव रागदोसादिदियड्ढसहस्सकिलेससङ्खाततिणकचवररहिते सुद्धसन्ताने पुञ्ञक्खेत्ते वुत्तदानानि अप्पानिपि समानानि महप्फलानि होन्तीति अत्थो। सेसं सुविञ्ञेय्यमेवाति।
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
सयनदायकत्थेरअपदानवण्णना समत्ता।
Sayanadāyakattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ३. सयनदायकत्थेरअपदानं • 3. Sayanadāyakattheraapadānaṃ
