| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
3. සයනදායකත්‌ථෙරඅපදානවණ්‌ණනා
3. Sayanadāyakattheraapadānavaṇṇanā
පදුමුත්‌තරබුද්‌ධස්‌සාතිආදිකං ආයස්‌මතො සයනදායකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො ඝරාවාසං සණ්‌ඨපෙත්‌වා සුඛමනුභවන්‌තො සත්‌ථු ධම්‌මදෙසනං සුත්‌වා සත්‌ථරි පසන්‌නො දන්‌තසුවණ්‌ණරජතමුත්‌තමණිමයං මහාරහං මඤ්‌චං කාරාපෙත්‌වා චීනපට්‌ටකම්‌බලාදීනි අත්‌ථරිත්‌වා සයනත්‌ථාය භගවතො අදාසි. භගවා තස්‌ස අනුග්‌ගහං කරොන්‌තො තත්‌ථ සයි . සො තෙන පුඤ්‌ඤකම්‌මෙන දෙවමනුස්‌සෙසු සංසරන්‌තො තදනුරූපං ආකාසගමනසුඛසෙය්‍යාදිසුඛං අනුභවිත්‌වා ඉමස්‌මිං බුද්‌ධුප්‌පාදෙ විභවසම්‌පන්‌නෙ එකස්‌මිං කුලෙ නිබ්‌බත්‌තිත්‌වා විඤ්‌ඤුතං පාපුණිත්‌වා සත්‌ථු ධම්‌මදෙසනං සුත්‌වා පසන්‌නමානසො පබ්‌බජිත්‌වා විපස්‌සන්‌තො නචිරස්‌සෙව අරහා අහොසි.
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
20. සො අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පදුමුත්‌තරබුද්‌ධස්‌සාතිආදිමාහ. තං හෙට්‌ඨා වුත්‌තත්‌ථමෙව.
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
21. සුඛෙත්‌තෙ බීජසම්‌පදාති යථා තිණකචවරරහිතෙ කද්‌දමාදිසම්‌පන්‌නෙ සුඛෙත්‌තෙ වුත්‌තබීජානි සාදුඵලානි නිප්‌ඵාදෙන්‌ති, එවමෙව රාගදොසාදිදියඩ්‌ඪසහස්‌සකිලෙසසඞ්‌ඛාතතිණකචවරරහිතෙ සුද්‌ධසන්‌තානෙ පුඤ්‌ඤක්‌ඛෙත්‌තෙ වුත්‌තදානානි අප්‌පානිපි සමානානි මහප්‌ඵලානි හොන්‌තීති අත්‌ථො. සෙසං සුවිඤ්‌ඤෙය්‍යමෙවාති.
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
සයනදායකත්‌ථෙරඅපදානවණ්‌ණනා සමත්‌තා.
Sayanadāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 3. සයනදායකත්‌ථෙරඅපදානං • 3. Sayanadāyakattheraapadānaṃ
