| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൩. സയനദായകത്ഥേരഅപദാനവണ്ണനാ
3. Sayanadāyakattheraapadānavaṇṇanā
പദുമുത്തരബുദ്ധസ്സാതിആദികം ആയസ്മതോ സയനദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ വിഞ്ഞുതം പത്തോ ഘരാവാസം സണ്ഠപേത്വാ സുഖമനുഭവന്തോ സത്ഥു ധമ്മദേസനം സുത്വാ സത്ഥരി പസന്നോ ദന്തസുവണ്ണരജതമുത്തമണിമയം മഹാരഹം മഞ്ചം കാരാപേത്വാ ചീനപട്ടകമ്ബലാദീനി അത്ഥരിത്വാ സയനത്ഥായ ഭഗവതോ അദാസി. ഭഗവാ തസ്സ അനുഗ്ഗഹം കരോന്തോ തത്ഥ സയി . സോ തേന പുഞ്ഞകമ്മേന ദേവമനുസ്സേസു സംസരന്തോ തദനുരൂപം ആകാസഗമനസുഖസേയ്യാദിസുഖം അനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ ഏകസ്മിം കുലേ നിബ്ബത്തിത്വാ വിഞ്ഞുതം പാപുണിത്വാ സത്ഥു ധമ്മദേസനം സുത്വാ പസന്നമാനസോ പബ്ബജിത്വാ വിപസ്സന്തോ നചിരസ്സേവ അരഹാ അഹോസി.
Padumuttarabuddhassātiādikaṃ āyasmato sayanadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto viññutaṃ patto gharāvāsaṃ saṇṭhapetvā sukhamanubhavanto satthu dhammadesanaṃ sutvā satthari pasanno dantasuvaṇṇarajatamuttamaṇimayaṃ mahārahaṃ mañcaṃ kārāpetvā cīnapaṭṭakambalādīni attharitvā sayanatthāya bhagavato adāsi. Bhagavā tassa anuggahaṃ karonto tattha sayi . So tena puññakammena devamanussesu saṃsaranto tadanurūpaṃ ākāsagamanasukhaseyyādisukhaṃ anubhavitvā imasmiṃ buddhuppāde vibhavasampanne ekasmiṃ kule nibbattitvā viññutaṃ pāpuṇitvā satthu dhammadesanaṃ sutvā pasannamānaso pabbajitvā vipassanto nacirasseva arahā ahosi.
൨൦. സോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരബുദ്ധസ്സാതിആദിമാഹ. തം ഹേട്ഠാ വുത്തത്ഥമേവ.
20. So attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttatthameva.
൨൧. സുഖേത്തേ ബീജസമ്പദാതി യഥാ തിണകചവരരഹിതേ കദ്ദമാദിസമ്പന്നേ സുഖേത്തേ വുത്തബീജാനി സാദുഫലാനി നിപ്ഫാദേന്തി, ഏവമേവ രാഗദോസാദിദിയഡ്ഢസഹസ്സകിലേസസങ്ഖാതതിണകചവരരഹിതേ സുദ്ധസന്താനേ പുഞ്ഞക്ഖേത്തേ വുത്തദാനാനി അപ്പാനിപി സമാനാനി മഹപ്ഫലാനി ഹോന്തീതി അത്ഥോ. സേസം സുവിഞ്ഞേയ്യമേവാതി.
21.Sukhette bījasampadāti yathā tiṇakacavararahite kaddamādisampanne sukhette vuttabījāni sāduphalāni nipphādenti, evameva rāgadosādidiyaḍḍhasahassakilesasaṅkhātatiṇakacavararahite suddhasantāne puññakkhette vuttadānāni appānipi samānāni mahapphalāni hontīti attho. Sesaṃ suviññeyyamevāti.
സയനദായകത്ഥേരഅപദാനവണ്ണനാ സമത്താ.
Sayanadāyakattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൩. സയനദായകത്ഥേരഅപദാനം • 3. Sayanadāyakattheraapadānaṃ
