| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. সেদকসুত্তং
9. Sedakasuttaṃ
৩৮৫. একং সমযং ভগৰা সুম্ভেসু ৰিহরতি সেদকং নাম সুম্ভানং নিগমো। তত্র খো ভগৰা ভিক্খূ আমন্তেসি – ‘‘ভূতপুব্বং, ভিক্খৰে, চণ্ডালৰংসিকো চণ্ডালৰংসং উস্সাপেত্ৰা মেদকথালিকং অন্তেৰাসিং আমন্তেসি – ‘এহি ত্ৰং, সম্ম মেদকথালিকে, চণ্ডালৰংসং অভিরুহিত্ৰা মম উপরিখন্ধে তিট্ঠাহী’তি। ‘এৰং, আচরিযা’তি খো, ভিক্খৰে, মেদকথালিকা অন্তেৰাসী চণ্ডালৰংসিকস্স পটিস্সুত্ৰা চণ্ডালৰংসং অভিরুহিত্ৰা আচরিযস্স উপরিখন্ধে অট্ঠাসি। অথ খো, ভিক্খৰে, চণ্ডালৰংসিকো মেদকথালিকং অন্তেৰাসিং এতদৰোচ – ‘ত্ৰং, সম্ম মেদকথালিকে, মমং রক্খ, অহং তং রক্খিস্সামি। এৰং মযং অঞ্ঞমঞ্ঞং গুত্তা অঞ্ঞমঞ্ঞং রক্খিতা সিপ্পানি চেৰ দস্সেস্সাম, লাভঞ্চ 1 লচ্ছাম, সোত্থিনা চ চণ্ডালৰংসা ওরোহিস্সামা’তি। এৰং ৰুত্তে, ভিক্খৰে, মেদকথালিকা অন্তেৰাসী চণ্ডালৰংসিকং এতদৰোচ – ‘ন খো পনেতং, আচরিয, এৰং ভৰিস্সতি। ত্ৰং, আচরিয, অত্তানং রক্খ, অহং অত্তানং রক্খিস্সামি। এৰং মযং অত্তগুত্তা অত্তরক্খিতা সিপ্পানি চেৰ দস্সেস্সাম, লাভঞ্চ লচ্ছাম, সোত্থিনা চ চণ্ডালৰংসা ওরোহিস্সামা’’’তি। ‘‘সো তত্থ ঞাযো’’তি ভগৰা এতদৰোচ, ‘‘যথা মেদকথালিকা অন্তেৰাসী আচরিযং অৰোচ। অত্তানং, ভিক্খৰে, রক্খিস্সামীতি সতিপট্ঠানং সেৰিতব্বং; পরং রক্খিস্সামীতি সতিপট্ঠানং সেৰিতব্বং। অত্তানং, ভিক্খৰে, রক্খন্তো পরং রক্খতি, পরং রক্খন্তো অত্তানং রক্খতি’’।
385. Ekaṃ samayaṃ bhagavā sumbhesu viharati sedakaṃ nāma sumbhānaṃ nigamo. Tatra kho bhagavā bhikkhū āmantesi – ‘‘bhūtapubbaṃ, bhikkhave, caṇḍālavaṃsiko caṇḍālavaṃsaṃ ussāpetvā medakathālikaṃ antevāsiṃ āmantesi – ‘ehi tvaṃ, samma medakathālike, caṇḍālavaṃsaṃ abhiruhitvā mama uparikhandhe tiṭṭhāhī’ti. ‘Evaṃ, ācariyā’ti kho, bhikkhave, medakathālikā antevāsī caṇḍālavaṃsikassa paṭissutvā caṇḍālavaṃsaṃ abhiruhitvā ācariyassa uparikhandhe aṭṭhāsi. Atha kho, bhikkhave, caṇḍālavaṃsiko medakathālikaṃ antevāsiṃ etadavoca – ‘tvaṃ, samma medakathālike, mamaṃ rakkha, ahaṃ taṃ rakkhissāmi. Evaṃ mayaṃ aññamaññaṃ guttā aññamaññaṃ rakkhitā sippāni ceva dassessāma, lābhañca 2 lacchāma, sotthinā ca caṇḍālavaṃsā orohissāmā’ti. Evaṃ vutte, bhikkhave, medakathālikā antevāsī caṇḍālavaṃsikaṃ etadavoca – ‘na kho panetaṃ, ācariya, evaṃ bhavissati. Tvaṃ, ācariya, attānaṃ rakkha, ahaṃ attānaṃ rakkhissāmi. Evaṃ mayaṃ attaguttā attarakkhitā sippāni ceva dassessāma, lābhañca lacchāma, sotthinā ca caṇḍālavaṃsā orohissāmā’’’ti. ‘‘So tattha ñāyo’’ti bhagavā etadavoca, ‘‘yathā medakathālikā antevāsī ācariyaṃ avoca. Attānaṃ, bhikkhave, rakkhissāmīti satipaṭṭhānaṃ sevitabbaṃ; paraṃ rakkhissāmīti satipaṭṭhānaṃ sevitabbaṃ. Attānaṃ, bhikkhave, rakkhanto paraṃ rakkhati, paraṃ rakkhanto attānaṃ rakkhati’’.
‘‘কথঞ্চ , ভিক্খৰে, অত্তানং রক্খন্তো পরং রক্খতি? আসেৰনায, ভাৰনায, বহুলীকম্মেন – এৰং খো, ভিক্খৰে, অত্তানং রক্খন্তো পরং রক্খতি। কথঞ্চ, ভিক্খৰে, পরং রক্খন্তো অত্তানং রক্খতি? খন্তিযা, অৰিহিংসায, মেত্তচিত্ততায, অনুদযতায – এৰং খো, ভিক্খৰে, পরং রক্খন্তো অত্তানং রক্খতি। অত্তানং, ভিক্খৰে, রক্খিস্সামীতি সতিপট্ঠানং সেৰিতব্বং; পরং রক্খিস্সামীতি সতিপট্ঠানং সেৰিতব্বং। অত্তানং, ভিক্খৰে, রক্খন্তো পরং রক্খতি, পরং রক্খন্তো অত্তানং রক্খতী’’তি। নৰমং।
‘‘Kathañca , bhikkhave, attānaṃ rakkhanto paraṃ rakkhati? Āsevanāya, bhāvanāya, bahulīkammena – evaṃ kho, bhikkhave, attānaṃ rakkhanto paraṃ rakkhati. Kathañca, bhikkhave, paraṃ rakkhanto attānaṃ rakkhati? Khantiyā, avihiṃsāya, mettacittatāya, anudayatāya – evaṃ kho, bhikkhave, paraṃ rakkhanto attānaṃ rakkhati. Attānaṃ, bhikkhave, rakkhissāmīti satipaṭṭhānaṃ sevitabbaṃ; paraṃ rakkhissāmīti satipaṭṭhānaṃ sevitabbaṃ. Attānaṃ, bhikkhave, rakkhanto paraṃ rakkhati, paraṃ rakkhanto attānaṃ rakkhatī’’ti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. সেদকসুত্তৰণ্ণনা • 9. Sedakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. সেদকসুত্তৰণ্ণনা • 9. Sedakasuttavaṇṇanā
