| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. සෙදකසුත්‌තං
9. Sedakasuttaṃ
385. එකං සමයං භගවා සුම්‌භෙසු විහරති සෙදකං නාම සුම්‌භානං නිගමො. තත්‍ර ඛො භගවා භික්‌ඛූ ආමන්‌තෙසි – ‘‘භූතපුබ්‌බං, භික්‌ඛවෙ, චණ්‌ඩාලවංසිකො චණ්‌ඩාලවංසං උස්‌සාපෙත්‌වා මෙදකථාලිකං අන්‌තෙවාසිං ආමන්‌තෙසි – ‘එහි ත්‌වං, සම්‌ම මෙදකථාලිකෙ, චණ්‌ඩාලවංසං අභිරුහිත්‌වා මම උපරිඛන්‌ධෙ තිට්‌ඨාහී’ති. ‘එවං, ආචරියා’ති ඛො, භික්‌ඛවෙ, මෙදකථාලිකා අන්‌තෙවාසී චණ්‌ඩාලවංසිකස්‌ස පටිස්‌සුත්‌වා චණ්‌ඩාලවංසං අභිරුහිත්‌වා ආචරියස්‌ස උපරිඛන්‌ධෙ අට්‌ඨාසි. අථ ඛො, භික්‌ඛවෙ, චණ්‌ඩාලවංසිකො මෙදකථාලිකං අන්‌තෙවාසිං එතදවොච – ‘ත්‌වං, සම්‌ම මෙදකථාලිකෙ, මමං රක්‌ඛ, අහං තං රක්‌ඛිස්‌සාමි. එවං මයං අඤ්‌ඤමඤ්‌ඤං ගුත්‌තා අඤ්‌ඤමඤ්‌ඤං රක්‌ඛිතා සිප්‌පානි චෙව දස්‌සෙස්‌සාම, ලාභඤ්‌ච 1 ලච්‌ඡාම, සොත්‌ථිනා ච චණ්‌ඩාලවංසා ඔරොහිස්‌සාමා’ති. එවං වුත්‌තෙ, භික්‌ඛවෙ, මෙදකථාලිකා අන්‌තෙවාසී චණ්‌ඩාලවංසිකං එතදවොච – ‘න ඛො පනෙතං, ආචරිය, එවං භවිස්‌සති. ත්‌වං, ආචරිය, අත්‌තානං රක්‌ඛ, අහං අත්‌තානං රක්‌ඛිස්‌සාමි. එවං මයං අත්‌තගුත්‌තා අත්‌තරක්‌ඛිතා සිප්‌පානි චෙව දස්‌සෙස්‌සාම, ලාභඤ්‌ච ලච්‌ඡාම, සොත්‌ථිනා ච චණ්‌ඩාලවංසා ඔරොහිස්‌සාමා’’’ති. ‘‘සො තත්‌ථ ඤායො’’ති භගවා එතදවොච, ‘‘යථා මෙදකථාලිකා අන්‌තෙවාසී ආචරියං අවොච. අත්‌තානං, භික්‌ඛවෙ, රක්‌ඛිස්‌සාමීති සතිපට්‌ඨානං සෙවිතබ්‌බං; පරං රක්‌ඛිස්‌සාමීති සතිපට්‌ඨානං සෙවිතබ්‌බං. අත්‌තානං, භික්‌ඛවෙ, රක්‌ඛන්‌තො පරං රක්‌ඛති, පරං රක්‌ඛන්‌තො අත්‌තානං රක්‌ඛති’’.
385. Ekaṃ samayaṃ bhagavā sumbhesu viharati sedakaṃ nāma sumbhānaṃ nigamo. Tatra kho bhagavā bhikkhū āmantesi – ‘‘bhūtapubbaṃ, bhikkhave, caṇḍālavaṃsiko caṇḍālavaṃsaṃ ussāpetvā medakathālikaṃ antevāsiṃ āmantesi – ‘ehi tvaṃ, samma medakathālike, caṇḍālavaṃsaṃ abhiruhitvā mama uparikhandhe tiṭṭhāhī’ti. ‘Evaṃ, ācariyā’ti kho, bhikkhave, medakathālikā antevāsī caṇḍālavaṃsikassa paṭissutvā caṇḍālavaṃsaṃ abhiruhitvā ācariyassa uparikhandhe aṭṭhāsi. Atha kho, bhikkhave, caṇḍālavaṃsiko medakathālikaṃ antevāsiṃ etadavoca – ‘tvaṃ, samma medakathālike, mamaṃ rakkha, ahaṃ taṃ rakkhissāmi. Evaṃ mayaṃ aññamaññaṃ guttā aññamaññaṃ rakkhitā sippāni ceva dassessāma, lābhañca 2 lacchāma, sotthinā ca caṇḍālavaṃsā orohissāmā’ti. Evaṃ vutte, bhikkhave, medakathālikā antevāsī caṇḍālavaṃsikaṃ etadavoca – ‘na kho panetaṃ, ācariya, evaṃ bhavissati. Tvaṃ, ācariya, attānaṃ rakkha, ahaṃ attānaṃ rakkhissāmi. Evaṃ mayaṃ attaguttā attarakkhitā sippāni ceva dassessāma, lābhañca lacchāma, sotthinā ca caṇḍālavaṃsā orohissāmā’’’ti. ‘‘So tattha ñāyo’’ti bhagavā etadavoca, ‘‘yathā medakathālikā antevāsī ācariyaṃ avoca. Attānaṃ, bhikkhave, rakkhissāmīti satipaṭṭhānaṃ sevitabbaṃ; paraṃ rakkhissāmīti satipaṭṭhānaṃ sevitabbaṃ. Attānaṃ, bhikkhave, rakkhanto paraṃ rakkhati, paraṃ rakkhanto attānaṃ rakkhati’’.
‘‘කථඤ්‌ච , භික්‌ඛවෙ, අත්‌තානං රක්‌ඛන්‌තො පරං රක්‌ඛති? ආසෙවනාය, භාවනාය, බහුලීකම්‌මෙන – එවං ඛො, භික්‌ඛවෙ, අත්‌තානං රක්‌ඛන්‌තො පරං රක්‌ඛති. කථඤ්‌ච, භික්‌ඛවෙ, පරං රක්‌ඛන්‌තො අත්‌තානං රක්‌ඛති? ඛන්‌තියා, අවිහිංසාය, මෙත්‌තචිත්‌තතාය, අනුදයතාය – එවං ඛො, භික්‌ඛවෙ, පරං රක්‌ඛන්‌තො අත්‌තානං රක්‌ඛති. අත්‌තානං, භික්‌ඛවෙ, රක්‌ඛිස්‌සාමීති සතිපට්‌ඨානං සෙවිතබ්‌බං; පරං රක්‌ඛිස්‌සාමීති සතිපට්‌ඨානං සෙවිතබ්‌බං. අත්‌තානං, භික්‌ඛවෙ, රක්‌ඛන්‌තො පරං රක්‌ඛති, පරං රක්‌ඛන්‌තො අත්‌තානං රක්‌ඛතී’’ති. නවමං.
‘‘Kathañca , bhikkhave, attānaṃ rakkhanto paraṃ rakkhati? Āsevanāya, bhāvanāya, bahulīkammena – evaṃ kho, bhikkhave, attānaṃ rakkhanto paraṃ rakkhati. Kathañca, bhikkhave, paraṃ rakkhanto attānaṃ rakkhati? Khantiyā, avihiṃsāya, mettacittatāya, anudayatāya – evaṃ kho, bhikkhave, paraṃ rakkhanto attānaṃ rakkhati. Attānaṃ, bhikkhave, rakkhissāmīti satipaṭṭhānaṃ sevitabbaṃ; paraṃ rakkhissāmīti satipaṭṭhānaṃ sevitabbaṃ. Attānaṃ, bhikkhave, rakkhanto paraṃ rakkhati, paraṃ rakkhanto attānaṃ rakkhatī’’ti. Navamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. සෙදකසුත්‌තවණ්‌ණනා • 9. Sedakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. සෙදකසුත්‌තවණ්‌ණනා • 9. Sedakasuttavaṇṇanā
