| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. ஸேத³கஸுத்தவண்ணனா
9. Sedakasuttavaṇṇanā
385. நவமே ஸும்பே⁴ஸூதி ஏவங்னாமகே ஜனபதே³. மேத³கதா²லிகாதி ஏவங் இத்தி²லிங்க³வஸேன லத்³த⁴னாமங். மமங் ரக்க², அஹங் தங் ரக்கி²ஸ்ஸாமீதி எத்த² அயங் தஸ்ஸ லத்³தி⁴ – ஆசரியோ உக்கி²த்தவங்ஸங் ஸுக்³க³ஹிதங் அக³ண்ஹந்தோ, அந்தேவாஸிகேன பக்க²ந்தபக்க²ந்ததி³ஸங் அக³ச்ச²ந்தோ, ஸப்³ப³காலஞ்ச வங்ஸக்³க³ங் அனுல்லோகெந்தோ அந்தேவாஸிகங் ந ரக்க²தி நாம, ஏவங் அரக்கி²தோ அந்தேவாஸிகோ பதித்வா சுண்ணவிசுண்ணங் ஹோதி. வங்ஸங் பன ஸுக்³க³ஹிதங் க³ண்ஹந்தோ, தேன பக்க²ந்தபக்க²ந்ததி³ஸங் க³ச்ச²ந்தோ, ஸப்³ப³காலஞ்ச வங்ஸக்³க³ங் உல்லோகெந்தோ தங் ரக்க²தி நாம. அந்தேவாஸிகோபி இதோ சிதோ ச பக்க²ந்தி³த்வா மிகோ³ விய கீளந்தோ ஆசரியங் ந ரக்க²தி நாம. ஏவஞ்ஹி ஸதி திகி²ணவங்ஸகோடி ஆசரியஸ்ஸ க³லவாடகே வா நலாடே வா ட²பிதா டி²தட்டா²னங் பி⁴ந்தி³த்வா க³ச்செ²ய்ய. ஆசாரஸம்பன்னதாய பன யதோ வங்ஸோ நமதி, ததோ அனாமெந்தோ தங் ஆகட்³டெ⁴ந்தோ விய ஏகதோபா⁴கி³யங் கத்வா வாதூபத²ம்ப⁴ங் கா³ஹாபெத்வா ஸதிங் ஸூபட்டி²தங் கத்வா நிச்சலோவ நிஸீத³ந்தோ ஆசரியங் ரக்க²தி நாமாதி.
385. Navame sumbhesūti evaṃnāmake janapade. Medakathālikāti evaṃ itthiliṅgavasena laddhanāmaṃ. Mamaṃ rakkha, ahaṃ taṃ rakkhissāmīti ettha ayaṃ tassa laddhi – ācariyo ukkhittavaṃsaṃ suggahitaṃ agaṇhanto, antevāsikena pakkhantapakkhantadisaṃ agacchanto, sabbakālañca vaṃsaggaṃ anullokento antevāsikaṃ na rakkhati nāma, evaṃ arakkhito antevāsiko patitvā cuṇṇavicuṇṇaṃ hoti. Vaṃsaṃ pana suggahitaṃ gaṇhanto, tena pakkhantapakkhantadisaṃ gacchanto, sabbakālañca vaṃsaggaṃ ullokento taṃ rakkhati nāma. Antevāsikopi ito cito ca pakkhanditvā migo viya kīḷanto ācariyaṃ na rakkhati nāma. Evañhi sati tikhiṇavaṃsakoṭi ācariyassa galavāṭake vā nalāṭe vā ṭhapitā ṭhitaṭṭhānaṃ bhinditvā gaccheyya. Ācārasampannatāya pana yato vaṃso namati, tato anāmento taṃ ākaḍḍhento viya ekatobhāgiyaṃ katvā vātūpathambhaṃ gāhāpetvā satiṃ sūpaṭṭhitaṃ katvā niccalova nisīdanto ācariyaṃ rakkhati nāmāti.
த்வங் ஆசரிய அத்தானங் ரக்க², அஹங் அத்தானங் ரக்கி²ஸ்ஸாமீதி எத்த² அயமதி⁴ப்பாயோ – ஆசரியோ வங்ஸங் ஸுக்³க³ஹிதங் க³ண்ஹந்தோ, அந்தேவாஸிகேன பக்க²ந்தபக்க²ந்ததி³ஸங்க³ச்ச²ந்தோ , ஸப்³ப³காலஞ்ச வங்ஸக்³க³ங் உல்லோகெந்தோ, அத்தானமேவ ரக்க²தி, ந அந்தேவாஸிகங். அந்தேவாஸிகோபி காயம்பி ஏகதோபா⁴கி³யங் கத்வா வாதூபத²ம்ப⁴ங் கா³ஹாபெத்வா ஸதிங் ஸூபட்டி²தங் கத்வா நிச்சலோவ நிஸீத³மானோ அத்தானங்யேவ ரக்க²தி நாம, ந ஆசரியங்.
Tvaṃ ācariya attānaṃ rakkha, ahaṃ attānaṃ rakkhissāmīti ettha ayamadhippāyo – ācariyo vaṃsaṃ suggahitaṃ gaṇhanto, antevāsikena pakkhantapakkhantadisaṃgacchanto , sabbakālañca vaṃsaggaṃ ullokento, attānameva rakkhati, na antevāsikaṃ. Antevāsikopi kāyampi ekatobhāgiyaṃ katvā vātūpathambhaṃ gāhāpetvā satiṃ sūpaṭṭhitaṃ katvā niccalova nisīdamāno attānaṃyeva rakkhati nāma, na ācariyaṃ.
ஸோ தத்த² ஞாயோதி யங் மேத³கதா²லிகா ஆஹ. ஸோ தத்த² ஞாயோ, ஸோ உபாயோ, தங் காரணந்தி அத்தோ². ஸதிபட்டா²னங் ஸேவிதப்³ப³ந்தி சதுப்³பி³த⁴ங் ஸதிபட்டா²னங் ஸேவிதப்³ப³ங். ஆஸேவனாயாதி கம்மட்டா²னாஸேவனாய. ஏவங் கோ², பி⁴க்க²வே, அத்தானங் ரக்க²ந்தோ பரங் ரக்க²தீதி யோ பி⁴க்கு² கம்மாராமதாதீ³னி பஹாய ரத்திட்டா²னதி³வாட்டா²னேஸு மூலகம்மட்டா²னங் ஆஸேவந்தோ பா⁴வெந்தோ அரஹத்தங் பாபுணாதி, அத² நங் பரோ தி³ஸ்வா – ‘‘ப⁴த்³த³கோ வதாயங், பி⁴க்கு², ஸம்மாபடிபன்னோ’’தி தஸ்மிங் சித்தங் பஸாதெ³த்வா ஸக்³க³பராயணோ ஹோதி. அயங் அத்தானங் ரக்க²ந்தோ பரங் ரக்க²தி நாம.
So tattha ñāyoti yaṃ medakathālikā āha. So tattha ñāyo, so upāyo, taṃ kāraṇanti attho. Satipaṭṭhānaṃsevitabbanti catubbidhaṃ satipaṭṭhānaṃ sevitabbaṃ. Āsevanāyāti kammaṭṭhānāsevanāya. Evaṃ kho, bhikkhave, attānaṃ rakkhanto paraṃ rakkhatīti yo bhikkhu kammārāmatādīni pahāya rattiṭṭhānadivāṭṭhānesu mūlakammaṭṭhānaṃ āsevanto bhāvento arahattaṃ pāpuṇāti, atha naṃ paro disvā – ‘‘bhaddako vatāyaṃ, bhikkhu, sammāpaṭipanno’’ti tasmiṃ cittaṃ pasādetvā saggaparāyaṇo hoti. Ayaṃ attānaṃ rakkhanto paraṃ rakkhati nāma.
க²ந்தியாதி அதி⁴வாஸனக²ந்தியா. அவிஹிங்ஸாயாதி ஸபுப்³ப³பா⁴கா³ய கருணாய. மெத்தசித்ததாயாதி ஸபுப்³ப³பா⁴கா³ய மெத்தாய. அனுத³யதாயாதி அனுவட்³டி⁴யா, ஸபுப்³ப³பா⁴கா³ய முதி³தாயாதி அத்தோ². பரங் ரக்க²ந்தோ அத்தானங் ரக்க²தீதி எத்த² யோ பி⁴க்கு² ரத்திட்டா²னதி³வாட்டா²னங் க³தோ தீஸு ப்³ரஹ்மவிஹாரேஸு திகசதுக்கஜ்ஜா²னானி நிப்³ப³த்தெத்வா ஜா²னங் பாத³கங் கத்வா ஸங்கா²ரே ஸம்மஸந்தோ விபஸ்ஸனங் வட்³டெ⁴த்வா அரஹத்தங் பாபுணாதி. அயங் பரங் ரக்க²ந்தோ அத்தானங் ரக்க²தி நாமாதி வேதி³தப்³போ³.
Khantiyāti adhivāsanakhantiyā. Avihiṃsāyāti sapubbabhāgāya karuṇāya. Mettacittatāyāti sapubbabhāgāya mettāya. Anudayatāyāti anuvaḍḍhiyā, sapubbabhāgāya muditāyāti attho. Paraṃ rakkhanto attānaṃ rakkhatīti ettha yo bhikkhu rattiṭṭhānadivāṭṭhānaṃ gato tīsu brahmavihāresu tikacatukkajjhānāni nibbattetvā jhānaṃ pādakaṃ katvā saṅkhāre sammasanto vipassanaṃ vaḍḍhetvā arahattaṃ pāpuṇāti. Ayaṃ paraṃ rakkhanto attānaṃ rakkhati nāmāti veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. ஸேத³கஸுத்தங் • 9. Sedakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. ஸேத³கஸுத்தவண்ணனா • 9. Sedakasuttavaṇṇanā
