| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៩. សេទកសុត្តវណ្ណនា
9. Sedakasuttavaṇṇanā
៣៨៥. នវមេ សុម្ភេសូតិ ឯវំនាមកេ ជនបទេ។ មេទកថាលិកាតិ ឯវំ ឥត្ថិលិង្គវសេន លទ្ធនាមំ។ មមំ រក្ខ, អហំ តំ រក្ខិស្សាមីតិ ឯត្ថ អយំ តស្ស លទ្ធិ – អាចរិយោ ឧក្ខិត្តវំសំ សុគ្គហិតំ អគណ្ហន្តោ, អន្តេវាសិកេន បក្ខន្តបក្ខន្តទិសំ អគច្ឆន្តោ, សព្ពកាលញ្ច វំសគ្គំ អនុល្លោកេន្តោ អន្តេវាសិកំ ន រក្ខតិ នាម, ឯវំ អរក្ខិតោ អន្តេវាសិកោ បតិត្វា ចុណ្ណវិចុណ្ណំ ហោតិ។ វំសំ បន សុគ្គហិតំ គណ្ហន្តោ, តេន បក្ខន្តបក្ខន្តទិសំ គច្ឆន្តោ, សព្ពកាលញ្ច វំសគ្គំ ឧល្លោកេន្តោ តំ រក្ខតិ នាម។ អន្តេវាសិកោបិ ឥតោ ចិតោ ច បក្ខន្ទិត្វា មិគោ វិយ កីឡន្តោ អាចរិយំ ន រក្ខតិ នាម។ ឯវញ្ហិ សតិ តិខិណវំសកោដិ អាចរិយស្ស គលវាដកេ វា នលាដេ វា ឋបិតា ឋិតដ្ឋានំ ភិន្ទិត្វា គច្ឆេយ្យ។ អាចារសម្បន្នតាយ បន យតោ វំសោ នមតិ, តតោ អនាមេន្តោ តំ អាកឌ្ឍេន្តោ វិយ ឯកតោភាគិយំ កត្វា វាតូបថម្ភំ គាហាបេត្វា សតិំ សូបដ្ឋិតំ កត្វា និច្ចលោវ និសីទន្តោ អាចរិយំ រក្ខតិ នាមាតិ។
385. Navame sumbhesūti evaṃnāmake janapade. Medakathālikāti evaṃ itthiliṅgavasena laddhanāmaṃ. Mamaṃ rakkha, ahaṃ taṃ rakkhissāmīti ettha ayaṃ tassa laddhi – ācariyo ukkhittavaṃsaṃ suggahitaṃ agaṇhanto, antevāsikena pakkhantapakkhantadisaṃ agacchanto, sabbakālañca vaṃsaggaṃ anullokento antevāsikaṃ na rakkhati nāma, evaṃ arakkhito antevāsiko patitvā cuṇṇavicuṇṇaṃ hoti. Vaṃsaṃ pana suggahitaṃ gaṇhanto, tena pakkhantapakkhantadisaṃ gacchanto, sabbakālañca vaṃsaggaṃ ullokento taṃ rakkhati nāma. Antevāsikopi ito cito ca pakkhanditvā migo viya kīḷanto ācariyaṃ na rakkhati nāma. Evañhi sati tikhiṇavaṃsakoṭi ācariyassa galavāṭake vā nalāṭe vā ṭhapitā ṭhitaṭṭhānaṃ bhinditvā gaccheyya. Ācārasampannatāya pana yato vaṃso namati, tato anāmento taṃ ākaḍḍhento viya ekatobhāgiyaṃ katvā vātūpathambhaṃ gāhāpetvā satiṃ sūpaṭṭhitaṃ katvā niccalova nisīdanto ācariyaṃ rakkhati nāmāti.
ត្វំ អាចរិយ អត្តានំ រក្ខ, អហំ អត្តានំ រក្ខិស្សាមីតិ ឯត្ថ អយមធិប្បាយោ – អាចរិយោ វំសំ សុគ្គហិតំ គណ្ហន្តោ, អន្តេវាសិកេន បក្ខន្តបក្ខន្តទិសំគច្ឆន្តោ , សព្ពកាលញ្ច វំសគ្គំ ឧល្លោកេន្តោ, អត្តានមេវ រក្ខតិ, ន អន្តេវាសិកំ។ អន្តេវាសិកោបិ កាយម្បិ ឯកតោភាគិយំ កត្វា វាតូបថម្ភំ គាហាបេត្វា សតិំ សូបដ្ឋិតំ កត្វា និច្ចលោវ និសីទមានោ អត្តានំយេវ រក្ខតិ នាម, ន អាចរិយំ។
Tvaṃ ācariya attānaṃ rakkha, ahaṃ attānaṃ rakkhissāmīti ettha ayamadhippāyo – ācariyo vaṃsaṃ suggahitaṃ gaṇhanto, antevāsikena pakkhantapakkhantadisaṃgacchanto , sabbakālañca vaṃsaggaṃ ullokento, attānameva rakkhati, na antevāsikaṃ. Antevāsikopi kāyampi ekatobhāgiyaṃ katvā vātūpathambhaṃ gāhāpetvā satiṃ sūpaṭṭhitaṃ katvā niccalova nisīdamāno attānaṃyeva rakkhati nāma, na ācariyaṃ.
សោ តត្ថ ញាយោតិ យំ មេទកថាលិកា អាហ។ សោ តត្ថ ញាយោ, សោ ឧបាយោ, តំ ការណន្តិ អត្ថោ។ សតិបដ្ឋានំ សេវិតព្ពន្តិ ចតុព្ពិធំ សតិបដ្ឋានំ សេវិតព្ពំ។ អាសេវនាយាតិ កម្មដ្ឋានាសេវនាយ។ ឯវំ ខោ, ភិក្ខវេ, អត្តានំ រក្ខន្តោ បរំ រក្ខតីតិ យោ ភិក្ខុ កម្មារាមតាទីនិ បហាយ រត្តិដ្ឋានទិវាដ្ឋានេសុ មូលកម្មដ្ឋានំ អាសេវន្តោ ភាវេន្តោ អរហត្តំ បាបុណាតិ, អថ នំ បរោ ទិស្វា – ‘‘ភទ្ទកោ វតាយំ, ភិក្ខុ, សម្មាបដិបន្នោ’’តិ តស្មិំ ចិត្តំ បសាទេត្វា សគ្គបរាយណោ ហោតិ។ អយំ អត្តានំ រក្ខន្តោ បរំ រក្ខតិ នាម។
So tattha ñāyoti yaṃ medakathālikā āha. So tattha ñāyo, so upāyo, taṃ kāraṇanti attho. Satipaṭṭhānaṃsevitabbanti catubbidhaṃ satipaṭṭhānaṃ sevitabbaṃ. Āsevanāyāti kammaṭṭhānāsevanāya. Evaṃ kho, bhikkhave, attānaṃ rakkhanto paraṃ rakkhatīti yo bhikkhu kammārāmatādīni pahāya rattiṭṭhānadivāṭṭhānesu mūlakammaṭṭhānaṃ āsevanto bhāvento arahattaṃ pāpuṇāti, atha naṃ paro disvā – ‘‘bhaddako vatāyaṃ, bhikkhu, sammāpaṭipanno’’ti tasmiṃ cittaṃ pasādetvā saggaparāyaṇo hoti. Ayaṃ attānaṃ rakkhanto paraṃ rakkhati nāma.
ខន្តិយាតិ អធិវាសនខន្តិយា។ អវិហិំសាយាតិ សបុព្ពភាគាយ ករុណាយ។ មេត្តចិត្តតាយាតិ សបុព្ពភាគាយ មេត្តាយ។ អនុទយតាយាតិ អនុវឌ្ឍិយា, សបុព្ពភាគាយ មុទិតាយាតិ អត្ថោ។ បរំ រក្ខន្តោ អត្តានំ រក្ខតីតិ ឯត្ថ យោ ភិក្ខុ រត្តិដ្ឋានទិវាដ្ឋានំ គតោ តីសុ ព្រហ្មវិហារេសុ តិកចតុក្កជ្ឈានានិ និព្ពត្តេត្វា ឈានំ បាទកំ កត្វា សង្ខារេ សម្មសន្តោ វិបស្សនំ វឌ្ឍេត្វា អរហត្តំ បាបុណាតិ។ អយំ បរំ រក្ខន្តោ អត្តានំ រក្ខតិ នាមាតិ វេទិតព្ពោ។
Khantiyāti adhivāsanakhantiyā. Avihiṃsāyāti sapubbabhāgāya karuṇāya. Mettacittatāyāti sapubbabhāgāya mettāya. Anudayatāyāti anuvaḍḍhiyā, sapubbabhāgāya muditāyāti attho. Paraṃ rakkhanto attānaṃ rakkhatīti ettha yo bhikkhu rattiṭṭhānadivāṭṭhānaṃ gato tīsu brahmavihāresu tikacatukkajjhānāni nibbattetvā jhānaṃ pādakaṃ katvā saṅkhāre sammasanto vipassanaṃ vaḍḍhetvā arahattaṃ pāpuṇāti. Ayaṃ paraṃ rakkhanto attānaṃ rakkhati nāmāti veditabbo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៩. សេទកសុត្តំ • 9. Sedakasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៩. សេទកសុត្តវណ្ណនា • 9. Sedakasuttavaṇṇanā
