| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೯. ಸೇದಕಸುತ್ತವಣ್ಣನಾ
9. Sedakasuttavaṇṇanā
೩೮೫. ನವಮೇ ಸುಮ್ಭೇಸೂತಿ ಏವಂನಾಮಕೇ ಜನಪದೇ। ಮೇದಕಥಾಲಿಕಾತಿ ಏವಂ ಇತ್ಥಿಲಿಙ್ಗವಸೇನ ಲದ್ಧನಾಮಂ। ಮಮಂ ರಕ್ಖ, ಅಹಂ ತಂ ರಕ್ಖಿಸ್ಸಾಮೀತಿ ಏತ್ಥ ಅಯಂ ತಸ್ಸ ಲದ್ಧಿ – ಆಚರಿಯೋ ಉಕ್ಖಿತ್ತವಂಸಂ ಸುಗ್ಗಹಿತಂ ಅಗಣ್ಹನ್ತೋ, ಅನ್ತೇವಾಸಿಕೇನ ಪಕ್ಖನ್ತಪಕ್ಖನ್ತದಿಸಂ ಅಗಚ್ಛನ್ತೋ, ಸಬ್ಬಕಾಲಞ್ಚ ವಂಸಗ್ಗಂ ಅನುಲ್ಲೋಕೇನ್ತೋ ಅನ್ತೇವಾಸಿಕಂ ನ ರಕ್ಖತಿ ನಾಮ, ಏವಂ ಅರಕ್ಖಿತೋ ಅನ್ತೇವಾಸಿಕೋ ಪತಿತ್ವಾ ಚುಣ್ಣವಿಚುಣ್ಣಂ ಹೋತಿ। ವಂಸಂ ಪನ ಸುಗ್ಗಹಿತಂ ಗಣ್ಹನ್ತೋ, ತೇನ ಪಕ್ಖನ್ತಪಕ್ಖನ್ತದಿಸಂ ಗಚ್ಛನ್ತೋ, ಸಬ್ಬಕಾಲಞ್ಚ ವಂಸಗ್ಗಂ ಉಲ್ಲೋಕೇನ್ತೋ ತಂ ರಕ್ಖತಿ ನಾಮ। ಅನ್ತೇವಾಸಿಕೋಪಿ ಇತೋ ಚಿತೋ ಚ ಪಕ್ಖನ್ದಿತ್ವಾ ಮಿಗೋ ವಿಯ ಕೀಳನ್ತೋ ಆಚರಿಯಂ ನ ರಕ್ಖತಿ ನಾಮ। ಏವಞ್ಹಿ ಸತಿ ತಿಖಿಣವಂಸಕೋಟಿ ಆಚರಿಯಸ್ಸ ಗಲವಾಟಕೇ ವಾ ನಲಾಟೇ ವಾ ಠಪಿತಾ ಠಿತಟ್ಠಾನಂ ಭಿನ್ದಿತ್ವಾ ಗಚ್ಛೇಯ್ಯ। ಆಚಾರಸಮ್ಪನ್ನತಾಯ ಪನ ಯತೋ ವಂಸೋ ನಮತಿ, ತತೋ ಅನಾಮೇನ್ತೋ ತಂ ಆಕಡ್ಢೇನ್ತೋ ವಿಯ ಏಕತೋಭಾಗಿಯಂ ಕತ್ವಾ ವಾತೂಪಥಮ್ಭಂ ಗಾಹಾಪೇತ್ವಾ ಸತಿಂ ಸೂಪಟ್ಠಿತಂ ಕತ್ವಾ ನಿಚ್ಚಲೋವ ನಿಸೀದನ್ತೋ ಆಚರಿಯಂ ರಕ್ಖತಿ ನಾಮಾತಿ।
385. Navame sumbhesūti evaṃnāmake janapade. Medakathālikāti evaṃ itthiliṅgavasena laddhanāmaṃ. Mamaṃ rakkha, ahaṃ taṃ rakkhissāmīti ettha ayaṃ tassa laddhi – ācariyo ukkhittavaṃsaṃ suggahitaṃ agaṇhanto, antevāsikena pakkhantapakkhantadisaṃ agacchanto, sabbakālañca vaṃsaggaṃ anullokento antevāsikaṃ na rakkhati nāma, evaṃ arakkhito antevāsiko patitvā cuṇṇavicuṇṇaṃ hoti. Vaṃsaṃ pana suggahitaṃ gaṇhanto, tena pakkhantapakkhantadisaṃ gacchanto, sabbakālañca vaṃsaggaṃ ullokento taṃ rakkhati nāma. Antevāsikopi ito cito ca pakkhanditvā migo viya kīḷanto ācariyaṃ na rakkhati nāma. Evañhi sati tikhiṇavaṃsakoṭi ācariyassa galavāṭake vā nalāṭe vā ṭhapitā ṭhitaṭṭhānaṃ bhinditvā gaccheyya. Ācārasampannatāya pana yato vaṃso namati, tato anāmento taṃ ākaḍḍhento viya ekatobhāgiyaṃ katvā vātūpathambhaṃ gāhāpetvā satiṃ sūpaṭṭhitaṃ katvā niccalova nisīdanto ācariyaṃ rakkhati nāmāti.
ತ್ವಂ ಆಚರಿಯ ಅತ್ತಾನಂ ರಕ್ಖ, ಅಹಂ ಅತ್ತಾನಂ ರಕ್ಖಿಸ್ಸಾಮೀತಿ ಏತ್ಥ ಅಯಮಧಿಪ್ಪಾಯೋ – ಆಚರಿಯೋ ವಂಸಂ ಸುಗ್ಗಹಿತಂ ಗಣ್ಹನ್ತೋ, ಅನ್ತೇವಾಸಿಕೇನ ಪಕ್ಖನ್ತಪಕ್ಖನ್ತದಿಸಂಗಚ್ಛನ್ತೋ , ಸಬ್ಬಕಾಲಞ್ಚ ವಂಸಗ್ಗಂ ಉಲ್ಲೋಕೇನ್ತೋ, ಅತ್ತಾನಮೇವ ರಕ್ಖತಿ, ನ ಅನ್ತೇವಾಸಿಕಂ। ಅನ್ತೇವಾಸಿಕೋಪಿ ಕಾಯಮ್ಪಿ ಏಕತೋಭಾಗಿಯಂ ಕತ್ವಾ ವಾತೂಪಥಮ್ಭಂ ಗಾಹಾಪೇತ್ವಾ ಸತಿಂ ಸೂಪಟ್ಠಿತಂ ಕತ್ವಾ ನಿಚ್ಚಲೋವ ನಿಸೀದಮಾನೋ ಅತ್ತಾನಂಯೇವ ರಕ್ಖತಿ ನಾಮ, ನ ಆಚರಿಯಂ।
Tvaṃ ācariya attānaṃ rakkha, ahaṃ attānaṃ rakkhissāmīti ettha ayamadhippāyo – ācariyo vaṃsaṃ suggahitaṃ gaṇhanto, antevāsikena pakkhantapakkhantadisaṃgacchanto , sabbakālañca vaṃsaggaṃ ullokento, attānameva rakkhati, na antevāsikaṃ. Antevāsikopi kāyampi ekatobhāgiyaṃ katvā vātūpathambhaṃ gāhāpetvā satiṃ sūpaṭṭhitaṃ katvā niccalova nisīdamāno attānaṃyeva rakkhati nāma, na ācariyaṃ.
ಸೋ ತತ್ಥ ಞಾಯೋತಿ ಯಂ ಮೇದಕಥಾಲಿಕಾ ಆಹ। ಸೋ ತತ್ಥ ಞಾಯೋ, ಸೋ ಉಪಾಯೋ, ತಂ ಕಾರಣನ್ತಿ ಅತ್ಥೋ। ಸತಿಪಟ್ಠಾನಂ ಸೇವಿತಬ್ಬನ್ತಿ ಚತುಬ್ಬಿಧಂ ಸತಿಪಟ್ಠಾನಂ ಸೇವಿತಬ್ಬಂ। ಆಸೇವನಾಯಾತಿ ಕಮ್ಮಟ್ಠಾನಾಸೇವನಾಯ। ಏವಂ ಖೋ, ಭಿಕ್ಖವೇ, ಅತ್ತಾನಂ ರಕ್ಖನ್ತೋ ಪರಂ ರಕ್ಖತೀತಿ ಯೋ ಭಿಕ್ಖು ಕಮ್ಮಾರಾಮತಾದೀನಿ ಪಹಾಯ ರತ್ತಿಟ್ಠಾನದಿವಾಟ್ಠಾನೇಸು ಮೂಲಕಮ್ಮಟ್ಠಾನಂ ಆಸೇವನ್ತೋ ಭಾವೇನ್ತೋ ಅರಹತ್ತಂ ಪಾಪುಣಾತಿ, ಅಥ ನಂ ಪರೋ ದಿಸ್ವಾ – ‘‘ಭದ್ದಕೋ ವತಾಯಂ, ಭಿಕ್ಖು, ಸಮ್ಮಾಪಟಿಪನ್ನೋ’’ತಿ ತಸ್ಮಿಂ ಚಿತ್ತಂ ಪಸಾದೇತ್ವಾ ಸಗ್ಗಪರಾಯಣೋ ಹೋತಿ। ಅಯಂ ಅತ್ತಾನಂ ರಕ್ಖನ್ತೋ ಪರಂ ರಕ್ಖತಿ ನಾಮ।
So tattha ñāyoti yaṃ medakathālikā āha. So tattha ñāyo, so upāyo, taṃ kāraṇanti attho. Satipaṭṭhānaṃsevitabbanti catubbidhaṃ satipaṭṭhānaṃ sevitabbaṃ. Āsevanāyāti kammaṭṭhānāsevanāya. Evaṃ kho, bhikkhave, attānaṃ rakkhanto paraṃ rakkhatīti yo bhikkhu kammārāmatādīni pahāya rattiṭṭhānadivāṭṭhānesu mūlakammaṭṭhānaṃ āsevanto bhāvento arahattaṃ pāpuṇāti, atha naṃ paro disvā – ‘‘bhaddako vatāyaṃ, bhikkhu, sammāpaṭipanno’’ti tasmiṃ cittaṃ pasādetvā saggaparāyaṇo hoti. Ayaṃ attānaṃ rakkhanto paraṃ rakkhati nāma.
ಖನ್ತಿಯಾತಿ ಅಧಿವಾಸನಖನ್ತಿಯಾ। ಅವಿಹಿಂಸಾಯಾತಿ ಸಪುಬ್ಬಭಾಗಾಯ ಕರುಣಾಯ। ಮೇತ್ತಚಿತ್ತತಾಯಾತಿ ಸಪುಬ್ಬಭಾಗಾಯ ಮೇತ್ತಾಯ। ಅನುದಯತಾಯಾತಿ ಅನುವಡ್ಢಿಯಾ, ಸಪುಬ್ಬಭಾಗಾಯ ಮುದಿತಾಯಾತಿ ಅತ್ಥೋ। ಪರಂ ರಕ್ಖನ್ತೋ ಅತ್ತಾನಂ ರಕ್ಖತೀತಿ ಏತ್ಥ ಯೋ ಭಿಕ್ಖು ರತ್ತಿಟ್ಠಾನದಿವಾಟ್ಠಾನಂ ಗತೋ ತೀಸು ಬ್ರಹ್ಮವಿಹಾರೇಸು ತಿಕಚತುಕ್ಕಜ್ಝಾನಾನಿ ನಿಬ್ಬತ್ತೇತ್ವಾ ಝಾನಂ ಪಾದಕಂ ಕತ್ವಾ ಸಙ್ಖಾರೇ ಸಮ್ಮಸನ್ತೋ ವಿಪಸ್ಸನಂ ವಡ್ಢೇತ್ವಾ ಅರಹತ್ತಂ ಪಾಪುಣಾತಿ। ಅಯಂ ಪರಂ ರಕ್ಖನ್ತೋ ಅತ್ತಾನಂ ರಕ್ಖತಿ ನಾಮಾತಿ ವೇದಿತಬ್ಬೋ।
Khantiyāti adhivāsanakhantiyā. Avihiṃsāyāti sapubbabhāgāya karuṇāya. Mettacittatāyāti sapubbabhāgāya mettāya. Anudayatāyāti anuvaḍḍhiyā, sapubbabhāgāya muditāyāti attho. Paraṃ rakkhanto attānaṃ rakkhatīti ettha yo bhikkhu rattiṭṭhānadivāṭṭhānaṃ gato tīsu brahmavihāresu tikacatukkajjhānāni nibbattetvā jhānaṃ pādakaṃ katvā saṅkhāre sammasanto vipassanaṃ vaḍḍhetvā arahattaṃ pāpuṇāti. Ayaṃ paraṃ rakkhanto attānaṃ rakkhati nāmāti veditabbo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೯. ಸೇದಕಸುತ್ತಂ • 9. Sedakasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೯. ಸೇದಕಸುತ್ತವಣ್ಣನಾ • 9. Sedakasuttavaṇṇanā
