| Library / Tipiṭaka / তিপিটক • Tipiṭaka / ৰিনযৰিনিচ্ছয-উত্তরৰিনিচ্ছয • Vinayavinicchaya-uttaravinicchaya |
সেদমোচনকথা
Sedamocanakathā
ক.
Ka.
সোল়সপরিৰারস্স , পরিৰারস্স সাদরা।
Soḷasaparivārassa , parivārassa sādarā;
সুণাথ নিপুণে পঞ্হে, গূল়্হত্থে ভণতো মম॥
Suṇātha nipuṇe pañhe, gūḷhatthe bhaṇato mama.
খ.
Kha.
দিৰাপজ্জতি নো রত্তিং, রত্তিংযেৰ চ নো দিৰা।
Divāpajjati no rattiṃ, rattiṃyeva ca no divā;
কথঞ্চ পটিগ্গণ্হন্তো, ন গণ্হন্তো কথং পন॥
Kathañca paṭiggaṇhanto, na gaṇhanto kathaṃ pana.
গ.
Ga.
ছিন্দন্তস্স সিযাপত্তি, তথেৰাছিন্দতোপি চ।
Chindantassa siyāpatti, tathevāchindatopi ca;
ছাদেন্তস্স তথাপত্তি-ন ছাদেন্তস্স ভিক্খুনো॥
Chādentassa tathāpatti-na chādentassa bhikkhuno.
ঘ.
Gha.
কা চাপত্তি সমাপত্তি-লাভিনোযেৰ ভিক্খুনো।
Kā cāpatti samāpatti-lābhinoyeva bhikkhuno;
অসমাপত্তিলাভিস্স, কা চ নামস্স সা ভৰে॥
Asamāpattilābhissa, kā ca nāmassa sā bhave.
ঙ.
Ṅa.
গরুকং ভণতো সচ্চং, অলিকং ভণতো সিযুং।
Garukaṃ bhaṇato saccaṃ, alikaṃ bhaṇato siyuṃ;
লহুং সচ্চং ভণন্তস্স, মুসা চ ভণতো গরুং॥
Lahuṃ saccaṃ bhaṇantassa, musā ca bhaṇato garuṃ.
চ.
Ca.
পৰিসন্তো চ আরামং, আপজ্জতি ন নিক্খমং।
Pavisanto ca ārāmaṃ, āpajjati na nikkhamaṃ;
নিক্খমন্তোৰ আপত্তি, ন চেৰ পৰিসং পন।
Nikkhamantova āpatti, na ceva pavisaṃ pana;
ছ.
Cha.
সমাদিযন্তো অসমাদিযন্তো।
Samādiyanto asamādiyanto;
অনাদিযন্তোপি চ আদিযন্তো।
Anādiyantopi ca ādiyanto;
দেন্তো অদেন্তোপি সিযা সদোসো।
Dento adentopi siyā sadoso;
তথা করোন্তোপি চ নো করোন্তো॥
Tathā karontopi ca no karonto.
জ.
Ja.
আপজ্জতি চ ধারেন্তো, অধারেন্তো তথেৰ চ।
Āpajjati ca dhārento, adhārento tatheva ca;
দ্ৰিন্নং মাতা পিতা সাৰ, কথং হোতি? ভণাহি মে॥
Dvinnaṃ mātā pitā sāva, kathaṃ hoti? Bhaṇāhi me.
ঝ.
Jha.
উভতোব্যঞ্জনা ইত্থী, গব্ভং গণ্হাতি অত্তনা।
Ubhatobyañjanā itthī, gabbhaṃ gaṇhāti attanā;
গণ্হাপেতি পরং গব্ভং, তস্মা মাতাপিতা চ সা॥
Gaṇhāpeti paraṃ gabbhaṃ, tasmā mātāpitā ca sā.
ঞ.
Ña.
গামে ৰা যদি ৰারঞ্ঞে, যং পরেসং মমাযিতং।
Gāme vā yadi vāraññe, yaṃ paresaṃ mamāyitaṃ;
ন হরন্তোৰ তং থেয্যা, কথং পারাজিকো ভৰে।
Na harantova taṃ theyyā, kathaṃ pārājiko bhave;
ট.
Ṭa.
থেয্যসংৰাসকো এসো, লিঙ্গসংৰাসথেনকো।
Theyyasaṃvāsako eso, liṅgasaṃvāsathenako;
পরভণ্ডং অগণ্হন্তো, তেন হোতি পরাজিতো॥
Parabhaṇḍaṃ agaṇhanto, tena hoti parājito.
ঠ.
Ṭha.
নারিং রূপৰতিং ভিক্খু, রত্তচিত্তো অসঞ্ঞতো।
Nāriṃ rūpavatiṃ bhikkhu, rattacitto asaññato;
মেথুনং তায কত্ৰাপি, ন সো পারাজিকো কথং।
Methunaṃ tāya katvāpi, na so pārājiko kathaṃ;
ড.
Ḍa.
অচ্ছরাসদিসং নারিং, সুপিনন্তেন পস্সতি।
Accharāsadisaṃ nāriṃ, supinantena passati;
তায মেথুনসংযোগে, কতেপি ন ভৰিস্সতি॥
Tāya methunasaṃyoge, katepi na bhavissati.
ঢ.
Ḍha.
বহিদ্ধা গেহতো ভিক্খু, ইত্থী গব্ভন্তরং গতা।
Bahiddhā gehato bhikkhu, itthī gabbhantaraṃ gatā;
ছিদ্দং গেহস্স নেৰত্থি, কথং মেথুনতো চুতো।
Chiddaṃ gehassa nevatthi, kathaṃ methunato cuto;
ণ.
Ṇa.
অন্তোদুস্সকুটিট্ঠেন, মাতুগামেন মেথুনং।
Antodussakuṭiṭṭhena, mātugāmena methunaṃ;
সন্থতাদিৰসেনেৰ, কত্ৰা হোতি পরাজিতো॥
Santhatādivaseneva, katvā hoti parājito.
ত.
Ta.
সুত্তে চ ৰিনযেযেৰ, খন্ধকে সানুলোমিকে।
Sutte ca vinayeyeva, khandhake sānulomike;
সব্বত্থ নিপুণা ধীরা, ইমে পঞ্হে ভণন্তি তে॥
Sabbattha nipuṇā dhīrā, ime pañhe bhaṇanti te.
থ.
Tha.
খন্ধকে পরিৰারে চ, ৰিনযে সানুলোমিকে।
Khandhake parivāre ca, vinaye sānulomike;
আদরো করণীযোৰ, পটুভাৰং পনিচ্ছিতা॥
Ādaro karaṇīyova, paṭubhāvaṃ panicchitā.
সেদমোচনকথা।
Sedamocanakathā.
