| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
সেদমোচনকথাৰণ্ণনা
Sedamocanakathāvaṇṇanā
৬৭৯. সুণতং সুণন্তানং ভিক্খূনং পটুভাৰকরা ৰিনযৰিনিচ্ছযে পঞ্ঞাকোসল্লসাধিকা ততোযেৰ ৰরা উত্তমা। সেদমোচনগাথাযোতি অত্থপচ্চত্থিকানং, সাসনপচ্চত্থিকানঞ্চ ৰিস্সজ্জেতুমসক্কুণেয্যভাৰেন চিন্তযন্তস্স খিন্নসরীরা সেদে মোচেন্তীতি সেদমোচনা। অত্থানুগতপঞ্হা উপালিত্থেরেন ঠপিতা পঞ্হগাথাযো, তপ্পটিবদ্ধা ৰিস্সজ্জনগাথাযো চ ইতো পরং ৰক্খামীতি যোজনা।
679.Suṇataṃ suṇantānaṃ bhikkhūnaṃ paṭubhāvakarā vinayavinicchaye paññākosallasādhikā tatoyeva varā uttamā. Sedamocanagāthāyoti atthapaccatthikānaṃ, sāsanapaccatthikānañca vissajjetumasakkuṇeyyabhāvena cintayantassa khinnasarīrā sede mocentīti sedamocanā. Atthānugatapañhā upālittherena ṭhapitā pañhagāthāyo, tappaṭibaddhā vissajjanagāthāyo ca ito paraṃ vakkhāmīti yojanā.
৬৮১. কবন্ধং নাম অসীসং উরসি জাতঅক্খিমুখসরীরং। যথাহ – ‘‘অসীসকং কবন্ধং, যস্স উরে অক্খীনি চেৰ মুখঞ্চ হোতী’’তি (পরি॰ অট্ঠ॰ ৪৭৯)। মুখেন করণভূতেন। কত্ৰাতি সেৰিত্ৰা।
681.Kabandhaṃ nāma asīsaṃ urasi jātaakkhimukhasarīraṃ. Yathāha – ‘‘asīsakaṃ kabandhaṃ, yassa ure akkhīni ceva mukhañca hotī’’ti (pari. aṭṭha. 479). Mukhena karaṇabhūtena. Katvāti sevitvā.
৬৮২. তস্স ভিক্খুনো কথং পারাজিকো সিযা পারাজিকধম্মো কথং সিযা।
682.Tassa bhikkhuno kathaṃ pārājiko siyā pārājikadhammo kathaṃ siyā.
৬৮৪. কিঞ্চীতি পাদং ৰা পাদারহং ৰা পরসন্তকং। পরঞ্চ ন সমাদপেতি ‘‘অমুকস্স ইত্থন্নামং ভণ্ডং অৰহরাহী’’তি পরং ন আণাপেয্য।
684.Kiñcīti pādaṃ vā pādārahaṃ vā parasantakaṃ. Parañca na samādapeti ‘‘amukassa itthannāmaṃ bhaṇḍaṃ avaharāhī’’ti paraṃ na āṇāpeyya.
৬৮৫. পরস্স কিঞ্চি নাদিযন্তোতি সম্বন্ধো। আণত্তিঞ্চাতি চ-সদ্দেন সংৰিধানং, সঙ্কেতঞ্চ সঙ্গণ্হাতি।
685. Parassa kiñci nādiyantoti sambandho. Āṇattiñcāti ca-saddena saṃvidhānaṃ, saṅketañca saṅgaṇhāti.
৬৮৬. গরুকং ভণ্ডন্তি পাদগ্ঘনকভাৰেন গরুভণ্ডং। ‘‘পরিক্খার’’ন্তি এতস্স ৰিসেসনং। পরস্স পরিক্খারন্তি পরসন্তকং যং কিঞ্চি পরিক্খারং।
686.Garukaṃ bhaṇḍanti pādagghanakabhāvena garubhaṇḍaṃ. ‘‘Parikkhāra’’nti etassa visesanaṃ. Parassa parikkhāranti parasantakaṃ yaṃ kiñci parikkhāraṃ.
৬৯২. মনুস্সুত্তরিকে ধম্মেতি উত্তরিমনুস্সধম্মৰিসযে। কতিকং কত্ৰানাতি ‘‘এৰং নিসিন্নে এৰং ঠিতে এৰং গমনে অত্থং আৰিকরোতী’’তিআদিং কত্ৰা। সম্ভাৰনাধিপ্পাযোতি ‘‘অরহা’’তি গহেত্ৰা মহাসম্ভাৰনং করোতীতি অধিপ্পাযো হুত্ৰা। অতিক্কমতি চেতি তথা কতং কতিকং অতিক্কমতি চে, তথারূপং নিসজ্জং ৰা ঠানং ৰা গমনং ৰা করোতীতি অত্থো। চুতোতি তথারূপং নিসজ্জাদিং দিস্ৰা কেনচি মনুস্সজাতিকেন ‘‘অরহা’’তি তঙ্খণে ঞাতে সো পুগ্গলো পারাজিকং আপজ্জতি।
692.Manussuttarike dhammeti uttarimanussadhammavisaye. Katikaṃ katvānāti ‘‘evaṃ nisinne evaṃ ṭhite evaṃ gamane atthaṃ āvikarotī’’tiādiṃ katvā. Sambhāvanādhippāyoti ‘‘arahā’’ti gahetvā mahāsambhāvanaṃ karotīti adhippāyo hutvā. Atikkamati ceti tathā kataṃ katikaṃ atikkamati ce, tathārūpaṃ nisajjaṃ vā ṭhānaṃ vā gamanaṃ vā karotīti attho. Cutoti tathārūpaṃ nisajjādiṃ disvā kenaci manussajātikena ‘‘arahā’’ti taṅkhaṇe ñāte so puggalo pārājikaṃ āpajjati.
৬৯৩. একৰত্থুকা কথং ভৰেয্যুন্তি যোজনা।
693. Ekavatthukā kathaṃ bhaveyyunti yojanā.
৬৯৪. ইত্থিযাতি একিস্সা ইত্থিযা। পটিপজ্জন্তোতি একক্খণে অঞ্ঞেন পুরিসেন ৰুত্তসাসনং ৰত্ৰা, ইমিনা চ ‘‘পটিগ্গণ্হাতি, ৰীমংসতী’’তি অঙ্গদ্ৰযস্স পুরিমসিদ্ধতং দীপেতি ইমস্স পচ্চাহরণকতঞ্চ। কাযসংসগ্গং সমাপজ্জিত্ৰা দুট্ঠুল্লং ৰত্ৰা অত্তকামপারিচরিযায ৰণ্ণং ভণন্তো।
694.Itthiyāti ekissā itthiyā. Paṭipajjantoti ekakkhaṇe aññena purisena vuttasāsanaṃ vatvā, iminā ca ‘‘paṭiggaṇhāti, vīmaṃsatī’’ti aṅgadvayassa purimasiddhataṃ dīpeti imassa paccāharaṇakatañca. Kāyasaṃsaggaṃ samāpajjitvā duṭṭhullaṃ vatvā attakāmapāricariyāya vaṇṇaṃ bhaṇanto.
৬৯৫. যথাৰুত্তং ৰত্তং অচরিত্ৰাতি ভগৰতা ৰুত্তং পরিৰাসাদিৰত্তং অচরিত্ৰা।
695.Yathāvuttaṃ vattaṃ acaritvāti bhagavatā vuttaṃ parivāsādivattaṃ acaritvā.
৬৯৬. ভিক্খুনীহি অসাধারণসিক্খাপদত্তা আহ ‘‘নত্থি সঙ্ঘাদিসেসতা’’তি।
696. Bhikkhunīhi asādhāraṇasikkhāpadattā āha ‘‘natthi saṅghādisesatā’’ti.
৬৯৭. যেন কুদ্ধো পসংসিতোতি এত্থ ‘‘নিন্দিতো চা’’তি সেসো।
697.Yena kuddho pasaṃsitoti ettha ‘‘nindito cā’’ti seso.
৬৯৮. তিত্থিযানং ৰণ্ণম্হি ভঞ্ঞমানে যো কুজ্ঝতি, সো আরাধকোতি যোজনা, পরিতোসিতো পসংসিতোতি অধিপ্পাযো। তিত্থিযপুব্বো ইমস্মিং সাসনে পব্বজ্জং লভিত্ৰা তিত্থিযানং ৰণ্ণস্মিং ভঞ্ঞমানে সুত্ৰা সচে কুপ্পতি অনত্তমনং করোতি, আরাধকো সঙ্ঘারাধকো সঙ্ঘং পরিতোসেন্তো হোতি, সম্বুদ্ধস্স ৰণ্ণস্মিং ভঞ্ঞমানে যদি কুজ্ঝতি, নিন্দিতোতি যোজনা। এত্থ সম্বুদ্ধস্সাতি উপলক্খণং।
698. Titthiyānaṃ vaṇṇamhi bhaññamāne yo kujjhati, so ārādhakoti yojanā, paritosito pasaṃsitoti adhippāyo. Titthiyapubbo imasmiṃ sāsane pabbajjaṃ labhitvā titthiyānaṃ vaṇṇasmiṃ bhaññamāne sutvā sace kuppati anattamanaṃ karoti, ārādhako saṅghārādhako saṅghaṃ paritosento hoti, sambuddhassa vaṇṇasmiṃ bhaññamāne yadi kujjhati, ninditoti yojanā. Ettha sambuddhassāti upalakkhaṇaṃ.
৭০১. গহেত্ৰাতি পটিগ্গহেত্ৰা।
701.Gahetvāti paṭiggahetvā.
৭৫১. ‘‘ন রত্তচিত্তো’’তিআদিনা পুরিমানং তিণ্ণং পারাজিকানং ৰীতিক্কমচিত্তুপ্পাদমত্তস্সাপি অভাৰং দীপেতি। মরণাযাতি এত্থ ‘‘মনুস্সজাতিকস্সা’’তি ইদং পারাজিকপকরণতোৰ লব্ভতি। তস্সাতি কিঞ্চি দেন্তস্স। তন্তি তথা দীযমানং।
751.‘‘Na rattacitto’’tiādinā purimānaṃ tiṇṇaṃ pārājikānaṃ vītikkamacittuppādamattassāpi abhāvaṃ dīpeti. Maraṇāyāti ettha ‘‘manussajātikassā’’ti idaṃ pārājikapakaraṇatova labbhati. Tassāti kiñci dentassa. Tanti tathā dīyamānaṃ.
৭৫২. ‘‘পরাজযো’’তি ইদং অভব্বপুগ্গলেসু সঙ্ঘভেদকস্স অন্তোগধত্তা ৰুত্তং। সলাকগ্গাহেনাপি সঙ্ঘং ভিন্দন্তো সঙ্ঘভেদকোৰ হোতি।
752.‘‘Parājayo’’ti idaṃ abhabbapuggalesu saṅghabhedakassa antogadhattā vuttaṃ. Salākaggāhenāpi saṅghaṃ bhindanto saṅghabhedakova hoti.
৭৫৩. অদ্ধযোজনে যং তিণ্ণং চীৰরানং অঞ্ঞতরং একং চীৰরং নিক্খিপিত্ৰানাতি যোজনা।
753. Addhayojane yaṃ tiṇṇaṃ cīvarānaṃ aññataraṃ ekaṃ cīvaraṃ nikkhipitvānāti yojanā.
৭৫৪. সুপ্পতিট্ঠিতনিগ্রোধসদিসে রুক্খমূলকে তিচীৰরং নিক্খিপিত্ৰা অদ্ধযোজনে অরুণং উট্ঠাপেন্তস্সাতি যোজনা।
754. Suppatiṭṭhitanigrodhasadise rukkhamūlake ticīvaraṃ nikkhipitvā addhayojane aruṇaṃ uṭṭhāpentassāti yojanā.
৭৫৫. কাযিকা নানাৰত্থুকাযো সম্বহুলা আপত্তিযো অপুব্বং অচরিমং একক্খণে কথং ফুসেতি যোজনা।
755. Kāyikā nānāvatthukāyo sambahulā āpattiyo apubbaṃ acarimaṃ ekakkhaṇe kathaṃ phuseti yojanā.
৭৫৭. ৰাচসিকা ন কাযিকা নানাৰত্থুকাযো সম্বহুলা আপত্তিযো অপুব্বং অচরিমং একক্খণে কথং ফুসেতি যোজনা।
757. Vācasikā na kāyikā nānāvatthukāyo sambahulā āpattiyo apubbaṃ acarimaṃ ekakkhaṇe kathaṃ phuseti yojanā.
৭৫৮. ৰিনযনসত্থেতি ৰিনযপিটকে। তস্স ভিক্খুস্স।
758.Vinayanasattheti vinayapiṭake. Tassa bhikkhussa.
৭৫৯. ‘‘ইত্থিযা’’তিআদীসু সহত্থে করণৰচনং। ইত্থিযা ৰা পুরিসেন ৰা পণ্ডকেন ৰা নিমিত্তকে মেথুনং ন সেৰন্তো ন পটিসেৰন্তো মেথুনপচ্চযা চুতোতি যোজনা।
759.‘‘Itthiyā’’tiādīsu sahatthe karaṇavacanaṃ. Itthiyā vā purisena vā paṇḍakena vā nimittake methunaṃ na sevanto na paṭisevanto methunapaccayā cutoti yojanā.
৭৬০. কাযসংসগ্গোযেৰ কাযসংসগ্গতা, তং আপন্না। অট্ঠৰত্থুকং ছেজ্জন্তি এৰংনামকং পারাজিকং।
760. Kāyasaṃsaggoyeva kāyasaṃsaggatā, taṃ āpannā. Aṭṭhavatthukaṃ chejjanti evaṃnāmakaṃ pārājikaṃ.
৭৬২. সমযে পিট্ঠিসঞ্ঞিতেতি গিম্হানং পচ্ছিমমাসস্স পঠমদিৰসতো যাৰ হেমন্তস্স পঠমদিৰসো, এত্থন্তরে সত্তমাসমত্তে পিট্ঠিসঞ্ঞিতে সমযে। ‘‘মাতুযাপি চা’’তি ৰত্তব্বে ‘‘মাতরম্পি চা’’তি ৰুত্তং। সোযেৰ ৰা পাঠো।
762.Samaye piṭṭhisaññiteti gimhānaṃ pacchimamāsassa paṭhamadivasato yāva hemantassa paṭhamadivaso, etthantare sattamāsamatte piṭṭhisaññite samaye. ‘‘Mātuyāpi cā’’ti vattabbe ‘‘mātarampi cā’’ti vuttaṃ. Soyeva vā pāṭho.
৭৬৪. ‘‘অৰস্সুতহত্থতো হি পিণ্ডং গহেত্ৰা’’তি ইমিনা সঙ্ঘাদিসেসস্স ৰত্থুমাহ, লসুণন্তি পাচিত্তিযস্স ৰত্থুং, মনুস্সমংসন্তি থুল্লচ্চযৰত্থুং, অকপ্পমঞ্ঞন্তি দুক্কটৰত্থুং। অকপ্পমঞ্ঞন্তি এত্থ ‘‘মংস’’ন্তি সেসো। ‘‘সব্বে একতো’’তি পদচ্ছেদো। একতোতি এত্থ ‘‘মদ্দিত্ৰা’’তি সেসো, অকপ্পিযমংসেহি সদ্ধিং একতো মদ্দিত্ৰা খাদতীতি অত্থো। সব্বমেতং ‘‘গহেত্ৰা, মদ্দিত্ৰা, খাদতী’’তি কিরিযানং কম্মৰচনং। মনুস্সমংসঞ্চাতি এত্থ চ-সদ্দো পচ্চেকং যোজেতব্বো হোতি। তস্সাতি ভিক্খুনিযা। সঙ্ঘাদিসেসপাচিত্তিযদুক্কটপাটিদেসনীযথুল্লচ্চযানি একক্খণে হোন্তি।
764.‘‘Avassutahatthato hi piṇḍaṃ gahetvā’’ti iminā saṅghādisesassa vatthumāha, lasuṇanti pācittiyassa vatthuṃ, manussamaṃsanti thullaccayavatthuṃ, akappamaññanti dukkaṭavatthuṃ. Akappamaññanti ettha ‘‘maṃsa’’nti seso. ‘‘Sabbe ekato’’ti padacchedo. Ekatoti ettha ‘‘madditvā’’ti seso, akappiyamaṃsehi saddhiṃ ekato madditvā khādatīti attho. Sabbametaṃ ‘‘gahetvā, madditvā, khādatī’’ti kiriyānaṃ kammavacanaṃ. Manussamaṃsañcāti ettha ca-saddo paccekaṃ yojetabbo hoti. Tassāti bhikkhuniyā. Saṅghādisesapācittiyadukkaṭapāṭidesanīyathullaccayāni ekakkhaṇe honti.
৭৬৫. ‘‘পুগ্গলো একো’’তি পদচ্ছেদো। দ্ৰেপি চ পুণ্ণৰস্সাতি পরিপুণ্ণৰীসতিৰস্সা চ দ্ৰে সামণেরা। একাৰ তেসং পন কম্মৰাচাতি তেসং উভিন্নং সামণেরানং একেন আচরিযেন একাৰ উপসম্পদকম্মৰাচা কতা। একস্সাতি একস্সাপি সামণেরস্স। কম্মন্তি উপসম্পদকম্মং। ন রূহতেতি ন সম্পজ্জতি, কিমেত্থ কারণং, ৰদ ভদ্দমুখাতি অধিপ্পাযো।
765. ‘‘Puggalo eko’’ti padacchedo. Dvepi ca puṇṇavassāti paripuṇṇavīsativassā ca dve sāmaṇerā. Ekāva tesaṃ pana kammavācāti tesaṃ ubhinnaṃ sāmaṇerānaṃ ekena ācariyena ekāva upasampadakammavācā katā. Ekassāti ekassāpi sāmaṇerassa. Kammanti upasampadakammaṃ. Na rūhateti na sampajjati, kimettha kāraṇaṃ, vada bhaddamukhāti adhippāyo.
৭৬৬. মহিদ্ধিকেসূতি দ্ৰীসু সামণেরেসু। সচে পন একো কেসগ্গমত্তম্পি আকাসগো আকাসট্ঠো হোতি , আকাসগতস্সেৰ কতং তং উপসম্পদকম্মং নেৰ রূহতি নেৰ সম্পজ্জতি, ভূমিগতস্স রূহতীতি যোজনা।
766.Mahiddhikesūti dvīsu sāmaṇeresu. Sace pana eko kesaggamattampi ākāsago ākāsaṭṭho hoti , ākāsagatasseva kataṃ taṃ upasampadakammaṃ neva rūhati neva sampajjati, bhūmigatassa rūhatīti yojanā.
৭৬৭. ইদ্ধিযা আকাসে ঠিতেন সঙ্ঘেন ভূমিগতস্স সামণেরস্স উপসম্পদকম্মং ন কাতব্বং। যদি করোতি, কুপ্পতীতি যোজনা। ইদঞ্চ সব্বকম্মানং সাধারণলক্খণং। যথাহ – ‘‘সঙ্ঘেনাপি আকাসে নিসীদিত্ৰা ভূমিগতস্স কম্মং ন কাতব্বং। সচে করোতি, কুপ্পতী’’তি (পরি॰ অট্ঠ॰ ৪৮১)।
767. Iddhiyā ākāse ṭhitena saṅghena bhūmigatassa sāmaṇerassa upasampadakammaṃ na kātabbaṃ. Yadi karoti, kuppatīti yojanā. Idañca sabbakammānaṃ sādhāraṇalakkhaṇaṃ. Yathāha – ‘‘saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppatī’’ti (pari. aṭṭha. 481).
৭৬৮. ৰত্থং কপ্পকতঞ্চ ন হোতি, রত্তঞ্চ ন হোতি, কেসকম্বলাদি অকপ্পিযঞ্চ হোতি, নিৰত্থস্স পনাপত্তি তং পন নিৰত্থস্স ভিক্খুনো আপত্তি হোতি। অনাপত্তি কথং সিযা, ৰদ ভদ্দমুখাতি যোজনা।
768. Vatthaṃ kappakatañca na hoti, rattañca na hoti, kesakambalādi akappiyañca hoti, nivatthassa panāpatti taṃ pana nivatthassa bhikkhuno āpatti hoti. Anāpatti kathaṃ siyā, vada bhaddamukhāti yojanā.
৭৬৯. এত্থ এতস্মিং অকপ্পিযৰত্থুধারণে তন্নিমিত্তং। অচ্ছিন্নচীৰরস্স ভিক্খুনো অনাপত্তি সিযাতি যোজনা। ‘‘কিঞ্চিপী’’তিআদিনা ৰুত্তমেৰত্থং সমত্থেতি। অস্স অচ্ছিন্নচীৰরস্স ভিক্খুস্স অকপ্পিযং নাম কিঞ্চিপি চীৰরং ন ৰিজ্জতি, তস্মা অনাপত্তীতি অধিপ্পাযো।
769.Ettha etasmiṃ akappiyavatthudhāraṇe tannimittaṃ. Acchinnacīvarassa bhikkhuno anāpatti siyāti yojanā. ‘‘Kiñcipī’’tiādinā vuttamevatthaṃ samattheti. Assa acchinnacīvarassa bhikkhussa akappiyaṃ nāma kiñcipi cīvaraṃ na vijjati, tasmā anāpattīti adhippāyo.
৭৭০. কুতোপি চ পুরিসস্স হত্থতো ভোজনস্স কিঞ্চি ন গণ্হতি, ভোজনতো কিঞ্চিপি সযম্পি কস্সচি পুরিসস্স ন দেতি, তথাপি গরুকং ৰজ্জং সঙ্ঘাদিসেসাপত্তিং উপেতি আপজ্জতি, তং কথমাপজ্জতি, ত্ৰং যদি ৰিনযে কুসলো অসি, মে ময্হং ৰদ এতং কারণং কথেহীতি যোজনা। হৰেতি নিপাতমত্তং।
770.Kutopi ca purisassa hatthato bhojanassa kiñci na gaṇhati, bhojanato kiñcipi sayampi kassaci purisassa na deti, tathāpi garukaṃ vajjaṃ saṅghādisesāpattiṃ upeti āpajjati, taṃ kathamāpajjati, tvaṃ yadi vinaye kusalo asi, me mayhaṃ vada etaṃ kāraṇaṃ kathehīti yojanā. Haveti nipātamattaṃ.
৭৭১. যা পন ভিক্খুনী অঞ্ঞায ভিক্খুনিযা ‘‘ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা’’তিআদিনা (পাচি॰ ৭০৫) সঙ্ঘাদিসেসমাতিকায ৰুত্তনযেন উয্যোজিতা অৰস্সুতম্হা পুরিসপুগ্গলা যং কিঞ্চি ভোজনং আদায পটিগ্গহেত্ৰা সচে ভুঞ্জতি, সা তথা ভুঞ্জন্তী যায উয্যোজিতা ভুঞ্জতি, তস্সা উয্যোজিকায ধীরা ৰিনযধরা পণ্ডিতা সঙ্ঘাদিসেসং কথযন্তি তস্সা উয্যোজিতায ভোজনপরিযোসানে উয্যোজিকায সঙ্ঘাদিসেসং ৰদন্তীতি যোজনা। যথাহ – ‘‘তস্সা হি ভোজনপরিযোসানে উয্যোজিকায সঙ্ঘাদিসেসো হোতী’’তি (পরি॰ অট্ঠ॰ ৪৮১)।
771.Yā pana bhikkhunī aññāya bhikkhuniyā ‘‘iṅgha, ayye, yaṃ te eso purisapuggalo deti khādanīyaṃ vā’’tiādinā (pāci. 705) saṅghādisesamātikāya vuttanayena uyyojitā avassutamhā purisapuggalā yaṃ kiñci bhojanaṃ ādāya paṭiggahetvā sace bhuñjati, sā tathā bhuñjantī yāya uyyojitā bhuñjati, tassā uyyojikāya dhīrā vinayadharā paṇḍitā saṅghādisesaṃ kathayanti tassā uyyojitāya bhojanapariyosāne uyyojikāya saṅghādisesaṃ vadantīti yojanā. Yathāha – ‘‘tassā hi bhojanapariyosāne uyyojikāya saṅghādiseso hotī’’ti (pari. aṭṭha. 481).
৭৭২. তং কথং যদি বুজ্ঝসি জানাসি, সাধুকং ব্রূহি কথেহীতি যোজনা।
772. Taṃ kathaṃ yadi bujjhasi jānāsi, sādhukaṃ brūhi kathehīti yojanā.
৭৭৩. নিসেৰিতেতি তায উয্যোজিতায ভিক্খুনিযা তস্স পুরিসপুগ্গলস্স হত্থতো পটিগ্গহিতে তস্মিং দন্তপোনে পরিভুত্তে উয্যোজিকা লহুৰজ্জং আপজ্জতীতি অত্থো।
773.Niseviteti tāya uyyojitāya bhikkhuniyā tassa purisapuggalassa hatthato paṭiggahite tasmiṃ dantapone paribhutte uyyojikā lahuvajjaṃ āpajjatīti attho.
৭৭৫. ‘‘উক্খিত্তকো’’তি ইমিনা আপত্তিৰজ্জমাহ। যথাহ – ‘‘তেন হি সদ্ধিং ৰিনযকম্মং নত্থি, তস্মা সো সঙ্ঘাদিসেসং আপজ্জিত্ৰা ছাদেন্তো ৰজ্জং ন ফুসতী’’তি।
775.‘‘Ukkhittako’’ti iminā āpattivajjamāha. Yathāha – ‘‘tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatī’’ti.
৭৭৬. সপ্পাণপ্পাণজন্তি সপ্পাণকে চ অপ্পাণকে চ জাতং। নেৰ জঙ্গমন্তি পাদেহি ভূমিযং নেৰ চরন্তং। ন ৰিহঙ্গমন্তি আকাসে পক্খং পসারেত্ৰা ন চরন্তং। দ্ৰিজন্তি দ্ৰীহি পচ্চযেহি, দ্ৰিক্খত্তুং ৰা জাতত্তা দ্ৰিজং। কন্তন্তি মনোহরং। অকন্তন্তি অমনোহরং।
776.Sappāṇappāṇajanti sappāṇake ca appāṇake ca jātaṃ. Neva jaṅgamanti pādehi bhūmiyaṃ neva carantaṃ. Na vihaṅgamanti ākāse pakkhaṃ pasāretvā na carantaṃ. Dvijanti dvīhi paccayehi, dvikkhattuṃ vā jātattā dvijaṃ. Kantanti manoharaṃ. Akantanti amanoharaṃ.
৭৭৭. সপ্পাণজো সদ্দো চিত্তজো ৰুত্তো, অপ্পাণজো উতুজো সদ্দো ৰুত্তো, সো পন দ্ৰীহেৰ পচ্চযেহি জাতত্তা ‘‘দ্ৰিজো’’তি মতোতি যোজনা।
777. Sappāṇajo saddo cittajo vutto, appāṇajo utujo saddo vutto, so pana dvīheva paccayehi jātattā ‘‘dvijo’’ti matoti yojanā.
৭৭৮. ‘‘ৰিনযে’’তিআদিগাথা ৰণ্ণিতত্থাযেৰ।
778.‘‘Vinaye’’tiādigāthā vaṇṇitatthāyeva.
ইতি উত্তরে লীনত্থপকাসনিযা
Iti uttare līnatthapakāsaniyā
সেদমোচনকথাৰণ্ণনা নিট্ঠিতা।
Sedamocanakathāvaṇṇanā niṭṭhitā.
