| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಸೇದಮೋಚನಕಥಾವಣ್ಣನಾ
Sedamocanakathāvaṇṇanā
೬೭೯. ಸುಣತಂ ಸುಣನ್ತಾನಂ ಭಿಕ್ಖೂನಂ ಪಟುಭಾವಕರಾ ವಿನಯವಿನಿಚ್ಛಯೇ ಪಞ್ಞಾಕೋಸಲ್ಲಸಾಧಿಕಾ ತತೋಯೇವ ವರಾ ಉತ್ತಮಾ। ಸೇದಮೋಚನಗಾಥಾಯೋತಿ ಅತ್ಥಪಚ್ಚತ್ಥಿಕಾನಂ, ಸಾಸನಪಚ್ಚತ್ಥಿಕಾನಞ್ಚ ವಿಸ್ಸಜ್ಜೇತುಮಸಕ್ಕುಣೇಯ್ಯಭಾವೇನ ಚಿನ್ತಯನ್ತಸ್ಸ ಖಿನ್ನಸರೀರಾ ಸೇದೇ ಮೋಚೇನ್ತೀತಿ ಸೇದಮೋಚನಾ। ಅತ್ಥಾನುಗತಪಞ್ಹಾ ಉಪಾಲಿತ್ಥೇರೇನ ಠಪಿತಾ ಪಞ್ಹಗಾಥಾಯೋ, ತಪ್ಪಟಿಬದ್ಧಾ ವಿಸ್ಸಜ್ಜನಗಾಥಾಯೋ ಚ ಇತೋ ಪರಂ ವಕ್ಖಾಮೀತಿ ಯೋಜನಾ।
679.Suṇataṃ suṇantānaṃ bhikkhūnaṃ paṭubhāvakarā vinayavinicchaye paññākosallasādhikā tatoyeva varā uttamā. Sedamocanagāthāyoti atthapaccatthikānaṃ, sāsanapaccatthikānañca vissajjetumasakkuṇeyyabhāvena cintayantassa khinnasarīrā sede mocentīti sedamocanā. Atthānugatapañhā upālittherena ṭhapitā pañhagāthāyo, tappaṭibaddhā vissajjanagāthāyo ca ito paraṃ vakkhāmīti yojanā.
೬೮೧. ಕಬನ್ಧಂ ನಾಮ ಅಸೀಸಂ ಉರಸಿ ಜಾತಅಕ್ಖಿಮುಖಸರೀರಂ। ಯಥಾಹ – ‘‘ಅಸೀಸಕಂ ಕಬನ್ಧಂ, ಯಸ್ಸ ಉರೇ ಅಕ್ಖೀನಿ ಚೇವ ಮುಖಞ್ಚ ಹೋತೀ’’ತಿ (ಪರಿ॰ ಅಟ್ಠ॰ ೪೭೯)। ಮುಖೇನ ಕರಣಭೂತೇನ। ಕತ್ವಾತಿ ಸೇವಿತ್ವಾ।
681.Kabandhaṃ nāma asīsaṃ urasi jātaakkhimukhasarīraṃ. Yathāha – ‘‘asīsakaṃ kabandhaṃ, yassa ure akkhīni ceva mukhañca hotī’’ti (pari. aṭṭha. 479). Mukhena karaṇabhūtena. Katvāti sevitvā.
೬೮೨. ತಸ್ಸ ಭಿಕ್ಖುನೋ ಕಥಂ ಪಾರಾಜಿಕೋ ಸಿಯಾ ಪಾರಾಜಿಕಧಮ್ಮೋ ಕಥಂ ಸಿಯಾ।
682.Tassa bhikkhuno kathaṃ pārājiko siyā pārājikadhammo kathaṃ siyā.
೬೮೪. ಕಿಞ್ಚೀತಿ ಪಾದಂ ವಾ ಪಾದಾರಹಂ ವಾ ಪರಸನ್ತಕಂ। ಪರಞ್ಚ ನ ಸಮಾದಪೇತಿ ‘‘ಅಮುಕಸ್ಸ ಇತ್ಥನ್ನಾಮಂ ಭಣ್ಡಂ ಅವಹರಾಹೀ’’ತಿ ಪರಂ ನ ಆಣಾಪೇಯ್ಯ।
684.Kiñcīti pādaṃ vā pādārahaṃ vā parasantakaṃ. Parañca na samādapeti ‘‘amukassa itthannāmaṃ bhaṇḍaṃ avaharāhī’’ti paraṃ na āṇāpeyya.
೬೮೫. ಪರಸ್ಸ ಕಿಞ್ಚಿ ನಾದಿಯನ್ತೋತಿ ಸಮ್ಬನ್ಧೋ। ಆಣತ್ತಿಞ್ಚಾತಿ ಚ-ಸದ್ದೇನ ಸಂವಿಧಾನಂ, ಸಙ್ಕೇತಞ್ಚ ಸಙ್ಗಣ್ಹಾತಿ।
685. Parassa kiñci nādiyantoti sambandho. Āṇattiñcāti ca-saddena saṃvidhānaṃ, saṅketañca saṅgaṇhāti.
೬೮೬. ಗರುಕಂ ಭಣ್ಡನ್ತಿ ಪಾದಗ್ಘನಕಭಾವೇನ ಗರುಭಣ್ಡಂ। ‘‘ಪರಿಕ್ಖಾರ’’ನ್ತಿ ಏತಸ್ಸ ವಿಸೇಸನಂ। ಪರಸ್ಸ ಪರಿಕ್ಖಾರನ್ತಿ ಪರಸನ್ತಕಂ ಯಂ ಕಿಞ್ಚಿ ಪರಿಕ್ಖಾರಂ।
686.Garukaṃ bhaṇḍanti pādagghanakabhāvena garubhaṇḍaṃ. ‘‘Parikkhāra’’nti etassa visesanaṃ. Parassa parikkhāranti parasantakaṃ yaṃ kiñci parikkhāraṃ.
೬೯೨. ಮನುಸ್ಸುತ್ತರಿಕೇ ಧಮ್ಮೇತಿ ಉತ್ತರಿಮನುಸ್ಸಧಮ್ಮವಿಸಯೇ। ಕತಿಕಂ ಕತ್ವಾನಾತಿ ‘‘ಏವಂ ನಿಸಿನ್ನೇ ಏವಂ ಠಿತೇ ಏವಂ ಗಮನೇ ಅತ್ಥಂ ಆವಿಕರೋತೀ’’ತಿಆದಿಂ ಕತ್ವಾ। ಸಮ್ಭಾವನಾಧಿಪ್ಪಾಯೋತಿ ‘‘ಅರಹಾ’’ತಿ ಗಹೇತ್ವಾ ಮಹಾಸಮ್ಭಾವನಂ ಕರೋತೀತಿ ಅಧಿಪ್ಪಾಯೋ ಹುತ್ವಾ। ಅತಿಕ್ಕಮತಿ ಚೇತಿ ತಥಾ ಕತಂ ಕತಿಕಂ ಅತಿಕ್ಕಮತಿ ಚೇ, ತಥಾರೂಪಂ ನಿಸಜ್ಜಂ ವಾ ಠಾನಂ ವಾ ಗಮನಂ ವಾ ಕರೋತೀತಿ ಅತ್ಥೋ। ಚುತೋತಿ ತಥಾರೂಪಂ ನಿಸಜ್ಜಾದಿಂ ದಿಸ್ವಾ ಕೇನಚಿ ಮನುಸ್ಸಜಾತಿಕೇನ ‘‘ಅರಹಾ’’ತಿ ತಙ್ಖಣೇ ಞಾತೇ ಸೋ ಪುಗ್ಗಲೋ ಪಾರಾಜಿಕಂ ಆಪಜ್ಜತಿ।
692.Manussuttarike dhammeti uttarimanussadhammavisaye. Katikaṃ katvānāti ‘‘evaṃ nisinne evaṃ ṭhite evaṃ gamane atthaṃ āvikarotī’’tiādiṃ katvā. Sambhāvanādhippāyoti ‘‘arahā’’ti gahetvā mahāsambhāvanaṃ karotīti adhippāyo hutvā. Atikkamati ceti tathā kataṃ katikaṃ atikkamati ce, tathārūpaṃ nisajjaṃ vā ṭhānaṃ vā gamanaṃ vā karotīti attho. Cutoti tathārūpaṃ nisajjādiṃ disvā kenaci manussajātikena ‘‘arahā’’ti taṅkhaṇe ñāte so puggalo pārājikaṃ āpajjati.
೬೯೩. ಏಕವತ್ಥುಕಾ ಕಥಂ ಭವೇಯ್ಯುನ್ತಿ ಯೋಜನಾ।
693. Ekavatthukā kathaṃ bhaveyyunti yojanā.
೬೯೪. ಇತ್ಥಿಯಾತಿ ಏಕಿಸ್ಸಾ ಇತ್ಥಿಯಾ। ಪಟಿಪಜ್ಜನ್ತೋತಿ ಏಕಕ್ಖಣೇ ಅಞ್ಞೇನ ಪುರಿಸೇನ ವುತ್ತಸಾಸನಂ ವತ್ವಾ, ಇಮಿನಾ ಚ ‘‘ಪಟಿಗ್ಗಣ್ಹಾತಿ, ವೀಮಂಸತೀ’’ತಿ ಅಙ್ಗದ್ವಯಸ್ಸ ಪುರಿಮಸಿದ್ಧತಂ ದೀಪೇತಿ ಇಮಸ್ಸ ಪಚ್ಚಾಹರಣಕತಞ್ಚ। ಕಾಯಸಂಸಗ್ಗಂ ಸಮಾಪಜ್ಜಿತ್ವಾ ದುಟ್ಠುಲ್ಲಂ ವತ್ವಾ ಅತ್ತಕಾಮಪಾರಿಚರಿಯಾಯ ವಣ್ಣಂ ಭಣನ್ತೋ।
694.Itthiyāti ekissā itthiyā. Paṭipajjantoti ekakkhaṇe aññena purisena vuttasāsanaṃ vatvā, iminā ca ‘‘paṭiggaṇhāti, vīmaṃsatī’’ti aṅgadvayassa purimasiddhataṃ dīpeti imassa paccāharaṇakatañca. Kāyasaṃsaggaṃ samāpajjitvā duṭṭhullaṃ vatvā attakāmapāricariyāya vaṇṇaṃ bhaṇanto.
೬೯೫. ಯಥಾವುತ್ತಂ ವತ್ತಂ ಅಚರಿತ್ವಾತಿ ಭಗವತಾ ವುತ್ತಂ ಪರಿವಾಸಾದಿವತ್ತಂ ಅಚರಿತ್ವಾ।
695.Yathāvuttaṃ vattaṃ acaritvāti bhagavatā vuttaṃ parivāsādivattaṃ acaritvā.
೬೯೬. ಭಿಕ್ಖುನೀಹಿ ಅಸಾಧಾರಣಸಿಕ್ಖಾಪದತ್ತಾ ಆಹ ‘‘ನತ್ಥಿ ಸಙ್ಘಾದಿಸೇಸತಾ’’ತಿ।
696. Bhikkhunīhi asādhāraṇasikkhāpadattā āha ‘‘natthi saṅghādisesatā’’ti.
೬೯೭. ಯೇನ ಕುದ್ಧೋ ಪಸಂಸಿತೋತಿ ಏತ್ಥ ‘‘ನಿನ್ದಿತೋ ಚಾ’’ತಿ ಸೇಸೋ।
697.Yena kuddho pasaṃsitoti ettha ‘‘nindito cā’’ti seso.
೬೯೮. ತಿತ್ಥಿಯಾನಂ ವಣ್ಣಮ್ಹಿ ಭಞ್ಞಮಾನೇ ಯೋ ಕುಜ್ಝತಿ, ಸೋ ಆರಾಧಕೋತಿ ಯೋಜನಾ, ಪರಿತೋಸಿತೋ ಪಸಂಸಿತೋತಿ ಅಧಿಪ್ಪಾಯೋ। ತಿತ್ಥಿಯಪುಬ್ಬೋ ಇಮಸ್ಮಿಂ ಸಾಸನೇ ಪಬ್ಬಜ್ಜಂ ಲಭಿತ್ವಾ ತಿತ್ಥಿಯಾನಂ ವಣ್ಣಸ್ಮಿಂ ಭಞ್ಞಮಾನೇ ಸುತ್ವಾ ಸಚೇ ಕುಪ್ಪತಿ ಅನತ್ತಮನಂ ಕರೋತಿ, ಆರಾಧಕೋ ಸಙ್ಘಾರಾಧಕೋ ಸಙ್ಘಂ ಪರಿತೋಸೇನ್ತೋ ಹೋತಿ, ಸಮ್ಬುದ್ಧಸ್ಸ ವಣ್ಣಸ್ಮಿಂ ಭಞ್ಞಮಾನೇ ಯದಿ ಕುಜ್ಝತಿ, ನಿನ್ದಿತೋತಿ ಯೋಜನಾ। ಏತ್ಥ ಸಮ್ಬುದ್ಧಸ್ಸಾತಿ ಉಪಲಕ್ಖಣಂ।
698. Titthiyānaṃ vaṇṇamhi bhaññamāne yo kujjhati, so ārādhakoti yojanā, paritosito pasaṃsitoti adhippāyo. Titthiyapubbo imasmiṃ sāsane pabbajjaṃ labhitvā titthiyānaṃ vaṇṇasmiṃ bhaññamāne sutvā sace kuppati anattamanaṃ karoti, ārādhako saṅghārādhako saṅghaṃ paritosento hoti, sambuddhassa vaṇṇasmiṃ bhaññamāne yadi kujjhati, ninditoti yojanā. Ettha sambuddhassāti upalakkhaṇaṃ.
೭೦೧. ಗಹೇತ್ವಾತಿ ಪಟಿಗ್ಗಹೇತ್ವಾ।
701.Gahetvāti paṭiggahetvā.
೭೫೧. ‘‘ನ ರತ್ತಚಿತ್ತೋ’’ತಿಆದಿನಾ ಪುರಿಮಾನಂ ತಿಣ್ಣಂ ಪಾರಾಜಿಕಾನಂ ವೀತಿಕ್ಕಮಚಿತ್ತುಪ್ಪಾದಮತ್ತಸ್ಸಾಪಿ ಅಭಾವಂ ದೀಪೇತಿ। ಮರಣಾಯಾತಿ ಏತ್ಥ ‘‘ಮನುಸ್ಸಜಾತಿಕಸ್ಸಾ’’ತಿ ಇದಂ ಪಾರಾಜಿಕಪಕರಣತೋವ ಲಬ್ಭತಿ। ತಸ್ಸಾತಿ ಕಿಞ್ಚಿ ದೇನ್ತಸ್ಸ। ತನ್ತಿ ತಥಾ ದೀಯಮಾನಂ।
751.‘‘Na rattacitto’’tiādinā purimānaṃ tiṇṇaṃ pārājikānaṃ vītikkamacittuppādamattassāpi abhāvaṃ dīpeti. Maraṇāyāti ettha ‘‘manussajātikassā’’ti idaṃ pārājikapakaraṇatova labbhati. Tassāti kiñci dentassa. Tanti tathā dīyamānaṃ.
೭೫೨. ‘‘ಪರಾಜಯೋ’’ತಿ ಇದಂ ಅಭಬ್ಬಪುಗ್ಗಲೇಸು ಸಙ್ಘಭೇದಕಸ್ಸ ಅನ್ತೋಗಧತ್ತಾ ವುತ್ತಂ। ಸಲಾಕಗ್ಗಾಹೇನಾಪಿ ಸಙ್ಘಂ ಭಿನ್ದನ್ತೋ ಸಙ್ಘಭೇದಕೋವ ಹೋತಿ।
752.‘‘Parājayo’’ti idaṃ abhabbapuggalesu saṅghabhedakassa antogadhattā vuttaṃ. Salākaggāhenāpi saṅghaṃ bhindanto saṅghabhedakova hoti.
೭೫೩. ಅದ್ಧಯೋಜನೇ ಯಂ ತಿಣ್ಣಂ ಚೀವರಾನಂ ಅಞ್ಞತರಂ ಏಕಂ ಚೀವರಂ ನಿಕ್ಖಿಪಿತ್ವಾನಾತಿ ಯೋಜನಾ।
753. Addhayojane yaṃ tiṇṇaṃ cīvarānaṃ aññataraṃ ekaṃ cīvaraṃ nikkhipitvānāti yojanā.
೭೫೪. ಸುಪ್ಪತಿಟ್ಠಿತನಿಗ್ರೋಧಸದಿಸೇ ರುಕ್ಖಮೂಲಕೇ ತಿಚೀವರಂ ನಿಕ್ಖಿಪಿತ್ವಾ ಅದ್ಧಯೋಜನೇ ಅರುಣಂ ಉಟ್ಠಾಪೇನ್ತಸ್ಸಾತಿ ಯೋಜನಾ।
754. Suppatiṭṭhitanigrodhasadise rukkhamūlake ticīvaraṃ nikkhipitvā addhayojane aruṇaṃ uṭṭhāpentassāti yojanā.
೭೫೫. ಕಾಯಿಕಾ ನಾನಾವತ್ಥುಕಾಯೋ ಸಮ್ಬಹುಲಾ ಆಪತ್ತಿಯೋ ಅಪುಬ್ಬಂ ಅಚರಿಮಂ ಏಕಕ್ಖಣೇ ಕಥಂ ಫುಸೇತಿ ಯೋಜನಾ।
755. Kāyikā nānāvatthukāyo sambahulā āpattiyo apubbaṃ acarimaṃ ekakkhaṇe kathaṃ phuseti yojanā.
೭೫೭. ವಾಚಸಿಕಾ ನ ಕಾಯಿಕಾ ನಾನಾವತ್ಥುಕಾಯೋ ಸಮ್ಬಹುಲಾ ಆಪತ್ತಿಯೋ ಅಪುಬ್ಬಂ ಅಚರಿಮಂ ಏಕಕ್ಖಣೇ ಕಥಂ ಫುಸೇತಿ ಯೋಜನಾ।
757. Vācasikā na kāyikā nānāvatthukāyo sambahulā āpattiyo apubbaṃ acarimaṃ ekakkhaṇe kathaṃ phuseti yojanā.
೭೫೮. ವಿನಯನಸತ್ಥೇತಿ ವಿನಯಪಿಟಕೇ। ತಸ್ಸ ಭಿಕ್ಖುಸ್ಸ।
758.Vinayanasattheti vinayapiṭake. Tassa bhikkhussa.
೭೫೯. ‘‘ಇತ್ಥಿಯಾ’’ತಿಆದೀಸು ಸಹತ್ಥೇ ಕರಣವಚನಂ। ಇತ್ಥಿಯಾ ವಾ ಪುರಿಸೇನ ವಾ ಪಣ್ಡಕೇನ ವಾ ನಿಮಿತ್ತಕೇ ಮೇಥುನಂ ನ ಸೇವನ್ತೋ ನ ಪಟಿಸೇವನ್ತೋ ಮೇಥುನಪಚ್ಚಯಾ ಚುತೋತಿ ಯೋಜನಾ।
759.‘‘Itthiyā’’tiādīsu sahatthe karaṇavacanaṃ. Itthiyā vā purisena vā paṇḍakena vā nimittake methunaṃ na sevanto na paṭisevanto methunapaccayā cutoti yojanā.
೭೬೦. ಕಾಯಸಂಸಗ್ಗೋಯೇವ ಕಾಯಸಂಸಗ್ಗತಾ, ತಂ ಆಪನ್ನಾ। ಅಟ್ಠವತ್ಥುಕಂ ಛೇಜ್ಜನ್ತಿ ಏವಂನಾಮಕಂ ಪಾರಾಜಿಕಂ।
760. Kāyasaṃsaggoyeva kāyasaṃsaggatā, taṃ āpannā. Aṭṭhavatthukaṃ chejjanti evaṃnāmakaṃ pārājikaṃ.
೭೬೨. ಸಮಯೇ ಪಿಟ್ಠಿಸಞ್ಞಿತೇತಿ ಗಿಮ್ಹಾನಂ ಪಚ್ಛಿಮಮಾಸಸ್ಸ ಪಠಮದಿವಸತೋ ಯಾವ ಹೇಮನ್ತಸ್ಸ ಪಠಮದಿವಸೋ, ಏತ್ಥನ್ತರೇ ಸತ್ತಮಾಸಮತ್ತೇ ಪಿಟ್ಠಿಸಞ್ಞಿತೇ ಸಮಯೇ। ‘‘ಮಾತುಯಾಪಿ ಚಾ’’ತಿ ವತ್ತಬ್ಬೇ ‘‘ಮಾತರಮ್ಪಿ ಚಾ’’ತಿ ವುತ್ತಂ। ಸೋಯೇವ ವಾ ಪಾಠೋ।
762.Samaye piṭṭhisaññiteti gimhānaṃ pacchimamāsassa paṭhamadivasato yāva hemantassa paṭhamadivaso, etthantare sattamāsamatte piṭṭhisaññite samaye. ‘‘Mātuyāpi cā’’ti vattabbe ‘‘mātarampi cā’’ti vuttaṃ. Soyeva vā pāṭho.
೭೬೪. ‘‘ಅವಸ್ಸುತಹತ್ಥತೋ ಹಿ ಪಿಣ್ಡಂ ಗಹೇತ್ವಾ’’ತಿ ಇಮಿನಾ ಸಙ್ಘಾದಿಸೇಸಸ್ಸ ವತ್ಥುಮಾಹ, ಲಸುಣನ್ತಿ ಪಾಚಿತ್ತಿಯಸ್ಸ ವತ್ಥುಂ, ಮನುಸ್ಸಮಂಸನ್ತಿ ಥುಲ್ಲಚ್ಚಯವತ್ಥುಂ, ಅಕಪ್ಪಮಞ್ಞನ್ತಿ ದುಕ್ಕಟವತ್ಥುಂ। ಅಕಪ್ಪಮಞ್ಞನ್ತಿ ಏತ್ಥ ‘‘ಮಂಸ’’ನ್ತಿ ಸೇಸೋ। ‘‘ಸಬ್ಬೇ ಏಕತೋ’’ತಿ ಪದಚ್ಛೇದೋ। ಏಕತೋತಿ ಏತ್ಥ ‘‘ಮದ್ದಿತ್ವಾ’’ತಿ ಸೇಸೋ, ಅಕಪ್ಪಿಯಮಂಸೇಹಿ ಸದ್ಧಿಂ ಏಕತೋ ಮದ್ದಿತ್ವಾ ಖಾದತೀತಿ ಅತ್ಥೋ। ಸಬ್ಬಮೇತಂ ‘‘ಗಹೇತ್ವಾ, ಮದ್ದಿತ್ವಾ, ಖಾದತೀ’’ತಿ ಕಿರಿಯಾನಂ ಕಮ್ಮವಚನಂ। ಮನುಸ್ಸಮಂಸಞ್ಚಾತಿ ಏತ್ಥ ಚ-ಸದ್ದೋ ಪಚ್ಚೇಕಂ ಯೋಜೇತಬ್ಬೋ ಹೋತಿ। ತಸ್ಸಾತಿ ಭಿಕ್ಖುನಿಯಾ। ಸಙ್ಘಾದಿಸೇಸಪಾಚಿತ್ತಿಯದುಕ್ಕಟಪಾಟಿದೇಸನೀಯಥುಲ್ಲಚ್ಚಯಾನಿ ಏಕಕ್ಖಣೇ ಹೋನ್ತಿ।
764.‘‘Avassutahatthato hi piṇḍaṃ gahetvā’’ti iminā saṅghādisesassa vatthumāha, lasuṇanti pācittiyassa vatthuṃ, manussamaṃsanti thullaccayavatthuṃ, akappamaññanti dukkaṭavatthuṃ. Akappamaññanti ettha ‘‘maṃsa’’nti seso. ‘‘Sabbe ekato’’ti padacchedo. Ekatoti ettha ‘‘madditvā’’ti seso, akappiyamaṃsehi saddhiṃ ekato madditvā khādatīti attho. Sabbametaṃ ‘‘gahetvā, madditvā, khādatī’’ti kiriyānaṃ kammavacanaṃ. Manussamaṃsañcāti ettha ca-saddo paccekaṃ yojetabbo hoti. Tassāti bhikkhuniyā. Saṅghādisesapācittiyadukkaṭapāṭidesanīyathullaccayāni ekakkhaṇe honti.
೭೬೫. ‘‘ಪುಗ್ಗಲೋ ಏಕೋ’’ತಿ ಪದಚ್ಛೇದೋ। ದ್ವೇಪಿ ಚ ಪುಣ್ಣವಸ್ಸಾತಿ ಪರಿಪುಣ್ಣವೀಸತಿವಸ್ಸಾ ಚ ದ್ವೇ ಸಾಮಣೇರಾ। ಏಕಾವ ತೇಸಂ ಪನ ಕಮ್ಮವಾಚಾತಿ ತೇಸಂ ಉಭಿನ್ನಂ ಸಾಮಣೇರಾನಂ ಏಕೇನ ಆಚರಿಯೇನ ಏಕಾವ ಉಪಸಮ್ಪದಕಮ್ಮವಾಚಾ ಕತಾ। ಏಕಸ್ಸಾತಿ ಏಕಸ್ಸಾಪಿ ಸಾಮಣೇರಸ್ಸ। ಕಮ್ಮನ್ತಿ ಉಪಸಮ್ಪದಕಮ್ಮಂ। ನ ರೂಹತೇತಿ ನ ಸಮ್ಪಜ್ಜತಿ, ಕಿಮೇತ್ಥ ಕಾರಣಂ, ವದ ಭದ್ದಮುಖಾತಿ ಅಧಿಪ್ಪಾಯೋ।
765. ‘‘Puggalo eko’’ti padacchedo. Dvepi ca puṇṇavassāti paripuṇṇavīsativassā ca dve sāmaṇerā. Ekāva tesaṃ pana kammavācāti tesaṃ ubhinnaṃ sāmaṇerānaṃ ekena ācariyena ekāva upasampadakammavācā katā. Ekassāti ekassāpi sāmaṇerassa. Kammanti upasampadakammaṃ. Na rūhateti na sampajjati, kimettha kāraṇaṃ, vada bhaddamukhāti adhippāyo.
೭೬೬. ಮಹಿದ್ಧಿಕೇಸೂತಿ ದ್ವೀಸು ಸಾಮಣೇರೇಸು। ಸಚೇ ಪನ ಏಕೋ ಕೇಸಗ್ಗಮತ್ತಮ್ಪಿ ಆಕಾಸಗೋ ಆಕಾಸಟ್ಠೋ ಹೋತಿ , ಆಕಾಸಗತಸ್ಸೇವ ಕತಂ ತಂ ಉಪಸಮ್ಪದಕಮ್ಮಂ ನೇವ ರೂಹತಿ ನೇವ ಸಮ್ಪಜ್ಜತಿ, ಭೂಮಿಗತಸ್ಸ ರೂಹತೀತಿ ಯೋಜನಾ।
766.Mahiddhikesūti dvīsu sāmaṇeresu. Sace pana eko kesaggamattampi ākāsago ākāsaṭṭho hoti , ākāsagatasseva kataṃ taṃ upasampadakammaṃ neva rūhati neva sampajjati, bhūmigatassa rūhatīti yojanā.
೭೬೭. ಇದ್ಧಿಯಾ ಆಕಾಸೇ ಠಿತೇನ ಸಙ್ಘೇನ ಭೂಮಿಗತಸ್ಸ ಸಾಮಣೇರಸ್ಸ ಉಪಸಮ್ಪದಕಮ್ಮಂ ನ ಕಾತಬ್ಬಂ। ಯದಿ ಕರೋತಿ, ಕುಪ್ಪತೀತಿ ಯೋಜನಾ। ಇದಞ್ಚ ಸಬ್ಬಕಮ್ಮಾನಂ ಸಾಧಾರಣಲಕ್ಖಣಂ। ಯಥಾಹ – ‘‘ಸಙ್ಘೇನಾಪಿ ಆಕಾಸೇ ನಿಸೀದಿತ್ವಾ ಭೂಮಿಗತಸ್ಸ ಕಮ್ಮಂ ನ ಕಾತಬ್ಬಂ। ಸಚೇ ಕರೋತಿ, ಕುಪ್ಪತೀ’’ತಿ (ಪರಿ॰ ಅಟ್ಠ॰ ೪೮೧)।
767. Iddhiyā ākāse ṭhitena saṅghena bhūmigatassa sāmaṇerassa upasampadakammaṃ na kātabbaṃ. Yadi karoti, kuppatīti yojanā. Idañca sabbakammānaṃ sādhāraṇalakkhaṇaṃ. Yathāha – ‘‘saṅghenāpi ākāse nisīditvā bhūmigatassa kammaṃ na kātabbaṃ. Sace karoti, kuppatī’’ti (pari. aṭṭha. 481).
೭೬೮. ವತ್ಥಂ ಕಪ್ಪಕತಞ್ಚ ನ ಹೋತಿ, ರತ್ತಞ್ಚ ನ ಹೋತಿ, ಕೇಸಕಮ್ಬಲಾದಿ ಅಕಪ್ಪಿಯಞ್ಚ ಹೋತಿ, ನಿವತ್ಥಸ್ಸ ಪನಾಪತ್ತಿ ತಂ ಪನ ನಿವತ್ಥಸ್ಸ ಭಿಕ್ಖುನೋ ಆಪತ್ತಿ ಹೋತಿ। ಅನಾಪತ್ತಿ ಕಥಂ ಸಿಯಾ, ವದ ಭದ್ದಮುಖಾತಿ ಯೋಜನಾ।
768. Vatthaṃ kappakatañca na hoti, rattañca na hoti, kesakambalādi akappiyañca hoti, nivatthassa panāpatti taṃ pana nivatthassa bhikkhuno āpatti hoti. Anāpatti kathaṃ siyā, vada bhaddamukhāti yojanā.
೭೬೯. ಏತ್ಥ ಏತಸ್ಮಿಂ ಅಕಪ್ಪಿಯವತ್ಥುಧಾರಣೇ ತನ್ನಿಮಿತ್ತಂ। ಅಚ್ಛಿನ್ನಚೀವರಸ್ಸ ಭಿಕ್ಖುನೋ ಅನಾಪತ್ತಿ ಸಿಯಾತಿ ಯೋಜನಾ। ‘‘ಕಿಞ್ಚಿಪೀ’’ತಿಆದಿನಾ ವುತ್ತಮೇವತ್ಥಂ ಸಮತ್ಥೇತಿ। ಅಸ್ಸ ಅಚ್ಛಿನ್ನಚೀವರಸ್ಸ ಭಿಕ್ಖುಸ್ಸ ಅಕಪ್ಪಿಯಂ ನಾಮ ಕಿಞ್ಚಿಪಿ ಚೀವರಂ ನ ವಿಜ್ಜತಿ, ತಸ್ಮಾ ಅನಾಪತ್ತೀತಿ ಅಧಿಪ್ಪಾಯೋ।
769.Ettha etasmiṃ akappiyavatthudhāraṇe tannimittaṃ. Acchinnacīvarassa bhikkhuno anāpatti siyāti yojanā. ‘‘Kiñcipī’’tiādinā vuttamevatthaṃ samattheti. Assa acchinnacīvarassa bhikkhussa akappiyaṃ nāma kiñcipi cīvaraṃ na vijjati, tasmā anāpattīti adhippāyo.
೭೭೦. ಕುತೋಪಿ ಚ ಪುರಿಸಸ್ಸ ಹತ್ಥತೋ ಭೋಜನಸ್ಸ ಕಿಞ್ಚಿ ನ ಗಣ್ಹತಿ, ಭೋಜನತೋ ಕಿಞ್ಚಿಪಿ ಸಯಮ್ಪಿ ಕಸ್ಸಚಿ ಪುರಿಸಸ್ಸ ನ ದೇತಿ, ತಥಾಪಿ ಗರುಕಂ ವಜ್ಜಂ ಸಙ್ಘಾದಿಸೇಸಾಪತ್ತಿಂ ಉಪೇತಿ ಆಪಜ್ಜತಿ, ತಂ ಕಥಮಾಪಜ್ಜತಿ, ತ್ವಂ ಯದಿ ವಿನಯೇ ಕುಸಲೋ ಅಸಿ, ಮೇ ಮಯ್ಹಂ ವದ ಏತಂ ಕಾರಣಂ ಕಥೇಹೀತಿ ಯೋಜನಾ। ಹವೇತಿ ನಿಪಾತಮತ್ತಂ।
770.Kutopi ca purisassa hatthato bhojanassa kiñci na gaṇhati, bhojanato kiñcipi sayampi kassaci purisassa na deti, tathāpi garukaṃ vajjaṃ saṅghādisesāpattiṃ upeti āpajjati, taṃ kathamāpajjati, tvaṃ yadi vinaye kusalo asi, me mayhaṃ vada etaṃ kāraṇaṃ kathehīti yojanā. Haveti nipātamattaṃ.
೭೭೧. ಯಾ ಪನ ಭಿಕ್ಖುನೀ ಅಞ್ಞಾಯ ಭಿಕ್ಖುನಿಯಾ ‘‘ಇಙ್ಘ, ಅಯ್ಯೇ, ಯಂ ತೇ ಏಸೋ ಪುರಿಸಪುಗ್ಗಲೋ ದೇತಿ ಖಾದನೀಯಂ ವಾ’’ತಿಆದಿನಾ (ಪಾಚಿ॰ ೭೦೫) ಸಙ್ಘಾದಿಸೇಸಮಾತಿಕಾಯ ವುತ್ತನಯೇನ ಉಯ್ಯೋಜಿತಾ ಅವಸ್ಸುತಮ್ಹಾ ಪುರಿಸಪುಗ್ಗಲಾ ಯಂ ಕಿಞ್ಚಿ ಭೋಜನಂ ಆದಾಯ ಪಟಿಗ್ಗಹೇತ್ವಾ ಸಚೇ ಭುಞ್ಜತಿ, ಸಾ ತಥಾ ಭುಞ್ಜನ್ತೀ ಯಾಯ ಉಯ್ಯೋಜಿತಾ ಭುಞ್ಜತಿ, ತಸ್ಸಾ ಉಯ್ಯೋಜಿಕಾಯ ಧೀರಾ ವಿನಯಧರಾ ಪಣ್ಡಿತಾ ಸಙ್ಘಾದಿಸೇಸಂ ಕಥಯನ್ತಿ ತಸ್ಸಾ ಉಯ್ಯೋಜಿತಾಯ ಭೋಜನಪರಿಯೋಸಾನೇ ಉಯ್ಯೋಜಿಕಾಯ ಸಙ್ಘಾದಿಸೇಸಂ ವದನ್ತೀತಿ ಯೋಜನಾ। ಯಥಾಹ – ‘‘ತಸ್ಸಾ ಹಿ ಭೋಜನಪರಿಯೋಸಾನೇ ಉಯ್ಯೋಜಿಕಾಯ ಸಙ್ಘಾದಿಸೇಸೋ ಹೋತೀ’’ತಿ (ಪರಿ॰ ಅಟ್ಠ॰ ೪೮೧)।
771.Yā pana bhikkhunī aññāya bhikkhuniyā ‘‘iṅgha, ayye, yaṃ te eso purisapuggalo deti khādanīyaṃ vā’’tiādinā (pāci. 705) saṅghādisesamātikāya vuttanayena uyyojitā avassutamhā purisapuggalā yaṃ kiñci bhojanaṃ ādāya paṭiggahetvā sace bhuñjati, sā tathā bhuñjantī yāya uyyojitā bhuñjati, tassā uyyojikāya dhīrā vinayadharā paṇḍitā saṅghādisesaṃ kathayanti tassā uyyojitāya bhojanapariyosāne uyyojikāya saṅghādisesaṃ vadantīti yojanā. Yathāha – ‘‘tassā hi bhojanapariyosāne uyyojikāya saṅghādiseso hotī’’ti (pari. aṭṭha. 481).
೭೭೨. ತಂ ಕಥಂ ಯದಿ ಬುಜ್ಝಸಿ ಜಾನಾಸಿ, ಸಾಧುಕಂ ಬ್ರೂಹಿ ಕಥೇಹೀತಿ ಯೋಜನಾ।
772. Taṃ kathaṃ yadi bujjhasi jānāsi, sādhukaṃ brūhi kathehīti yojanā.
೭೭೩. ನಿಸೇವಿತೇತಿ ತಾಯ ಉಯ್ಯೋಜಿತಾಯ ಭಿಕ್ಖುನಿಯಾ ತಸ್ಸ ಪುರಿಸಪುಗ್ಗಲಸ್ಸ ಹತ್ಥತೋ ಪಟಿಗ್ಗಹಿತೇ ತಸ್ಮಿಂ ದನ್ತಪೋನೇ ಪರಿಭುತ್ತೇ ಉಯ್ಯೋಜಿಕಾ ಲಹುವಜ್ಜಂ ಆಪಜ್ಜತೀತಿ ಅತ್ಥೋ।
773.Niseviteti tāya uyyojitāya bhikkhuniyā tassa purisapuggalassa hatthato paṭiggahite tasmiṃ dantapone paribhutte uyyojikā lahuvajjaṃ āpajjatīti attho.
೭೭೫. ‘‘ಉಕ್ಖಿತ್ತಕೋ’’ತಿ ಇಮಿನಾ ಆಪತ್ತಿವಜ್ಜಮಾಹ। ಯಥಾಹ – ‘‘ತೇನ ಹಿ ಸದ್ಧಿಂ ವಿನಯಕಮ್ಮಂ ನತ್ಥಿ, ತಸ್ಮಾ ಸೋ ಸಙ್ಘಾದಿಸೇಸಂ ಆಪಜ್ಜಿತ್ವಾ ಛಾದೇನ್ತೋ ವಜ್ಜಂ ನ ಫುಸತೀ’’ತಿ।
775.‘‘Ukkhittako’’ti iminā āpattivajjamāha. Yathāha – ‘‘tena hi saddhiṃ vinayakammaṃ natthi, tasmā so saṅghādisesaṃ āpajjitvā chādento vajjaṃ na phusatī’’ti.
೭೭೬. ಸಪ್ಪಾಣಪ್ಪಾಣಜನ್ತಿ ಸಪ್ಪಾಣಕೇ ಚ ಅಪ್ಪಾಣಕೇ ಚ ಜಾತಂ। ನೇವ ಜಙ್ಗಮನ್ತಿ ಪಾದೇಹಿ ಭೂಮಿಯಂ ನೇವ ಚರನ್ತಂ। ನ ವಿಹಙ್ಗಮನ್ತಿ ಆಕಾಸೇ ಪಕ್ಖಂ ಪಸಾರೇತ್ವಾ ನ ಚರನ್ತಂ। ದ್ವಿಜನ್ತಿ ದ್ವೀಹಿ ಪಚ್ಚಯೇಹಿ, ದ್ವಿಕ್ಖತ್ತುಂ ವಾ ಜಾತತ್ತಾ ದ್ವಿಜಂ। ಕನ್ತನ್ತಿ ಮನೋಹರಂ। ಅಕನ್ತನ್ತಿ ಅಮನೋಹರಂ।
776.Sappāṇappāṇajanti sappāṇake ca appāṇake ca jātaṃ. Neva jaṅgamanti pādehi bhūmiyaṃ neva carantaṃ. Na vihaṅgamanti ākāse pakkhaṃ pasāretvā na carantaṃ. Dvijanti dvīhi paccayehi, dvikkhattuṃ vā jātattā dvijaṃ. Kantanti manoharaṃ. Akantanti amanoharaṃ.
೭೭೭. ಸಪ್ಪಾಣಜೋ ಸದ್ದೋ ಚಿತ್ತಜೋ ವುತ್ತೋ, ಅಪ್ಪಾಣಜೋ ಉತುಜೋ ಸದ್ದೋ ವುತ್ತೋ, ಸೋ ಪನ ದ್ವೀಹೇವ ಪಚ್ಚಯೇಹಿ ಜಾತತ್ತಾ ‘‘ದ್ವಿಜೋ’’ತಿ ಮತೋತಿ ಯೋಜನಾ।
777. Sappāṇajo saddo cittajo vutto, appāṇajo utujo saddo vutto, so pana dvīheva paccayehi jātattā ‘‘dvijo’’ti matoti yojanā.
೭೭೮. ‘‘ವಿನಯೇ’’ತಿಆದಿಗಾಥಾ ವಣ್ಣಿತತ್ಥಾಯೇವ।
778.‘‘Vinaye’’tiādigāthā vaṇṇitatthāyeva.
ಇತಿ ಉತ್ತರೇ ಲೀನತ್ಥಪಕಾಸನಿಯಾ
Iti uttare līnatthapakāsaniyā
ಸೇದಮೋಚನಕಥಾವಣ್ಣನಾ ನಿಟ್ಠಿತಾ।
Sedamocanakathāvaṇṇanā niṭṭhitā.
