| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. সেখসুত্তং
3. Sekhasuttaṃ
৫২৩. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে। তত্র খো ভগৰা ভিক্খূ আমন্তেসি – ‘‘অত্থি নু খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানেয্য, অসেখো ভিক্খু অসেখভূমিযং ঠিতো ‘অসেখোস্মী’তি পজানেয্যা’’তি?
523. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tatra kho bhagavā bhikkhū āmantesi – ‘‘atthi nu kho, bhikkhave, pariyāyo yaṃ pariyāyaṃ āgamma sekho bhikkhu sekhabhūmiyaṃ ṭhito ‘sekhosmī’ti pajāneyya, asekho bhikkhu asekhabhūmiyaṃ ṭhito ‘asekhosmī’ti pajāneyyā’’ti?
ভগৰংমূলকা নো, ভন্তে, ধম্মা…পে॰… ‘‘অত্থি, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানেয্য, অসেখো ভিক্খু অসেখভূমিযং ঠিতো ‘অসেখোস্মী’তি পজানেয্য’’।
Bhagavaṃmūlakā no, bhante, dhammā…pe… ‘‘atthi, bhikkhave, pariyāyo yaṃ pariyāyaṃ āgamma sekho bhikkhu sekhabhūmiyaṃ ṭhito ‘sekhosmī’ti pajāneyya, asekho bhikkhu asekhabhūmiyaṃ ṭhito ‘asekhosmī’ti pajāneyya’’.
‘‘কতমো চ, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি? ইধ, ভিক্খৰে, সেখো ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি – অযম্পি খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি’’।
‘‘Katamo ca, bhikkhave, pariyāyo yaṃ pariyāyaṃ āgamma sekho bhikkhu sekhabhūmiyaṃ ṭhito ‘sekhosmī’ti pajānāti? Idha, bhikkhave, sekho bhikkhu ‘idaṃ dukkha’nti yathābhūtaṃ pajānāti, ‘ayaṃ dukkhasamudayo’ti yathābhūtaṃ pajānāti, ‘ayaṃ dukkhanirodho’ti yathābhūtaṃ pajānāti, ‘ayaṃ dukkhanirodhagāminī paṭipadā’ti yathābhūtaṃ pajānāti – ayampi kho, bhikkhave, pariyāyo yaṃ pariyāyaṃ āgamma sekho bhikkhu sekhabhūmiyaṃ ṭhito ‘sekhosmī’ti pajānāti’’.
‘‘পুন চপরং, ভিক্খৰে, সেখো ভিক্খু ইতি পটিসঞ্চিক্খতি – ‘অত্থি নু খো ইতো বহিদ্ধা অঞ্ঞো সমণো ৰা ব্রাহ্মণো ৰা যো এৰং ভূতং তচ্ছং তথং ধম্মং দেসেতি যথা ভগৰা’তি? সো এৰং পজানাতি – ‘নত্থি খো ইতো বহিদ্ধা অঞ্ঞো সমণো ৰা ব্রাহ্মণো ৰা যো এৰং ভূতং তচ্ছং তথং ধম্মং দেসেতি যথা ভগৰা’তি। অযম্পি খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি’’।
‘‘Puna caparaṃ, bhikkhave, sekho bhikkhu iti paṭisañcikkhati – ‘atthi nu kho ito bahiddhā añño samaṇo vā brāhmaṇo vā yo evaṃ bhūtaṃ tacchaṃ tathaṃ dhammaṃ deseti yathā bhagavā’ti? So evaṃ pajānāti – ‘natthi kho ito bahiddhā añño samaṇo vā brāhmaṇo vā yo evaṃ bhūtaṃ tacchaṃ tathaṃ dhammaṃ deseti yathā bhagavā’ti. Ayampi kho, bhikkhave, pariyāyo yaṃ pariyāyaṃ āgamma sekho bhikkhu sekhabhūmiyaṃ ṭhito ‘sekhosmī’ti pajānāti’’.
‘‘পুন চপরং, ভিক্খৰে, সেখো ভিক্খু পঞ্চিন্দ্রিযানি পজানাতি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – যংগতিকানি যংপরমানি যংফলানি যংপরিযোসানানি। ন হেৰ খো কাযেন ফুসিত্ৰা ৰিহরতি; পঞ্ঞায চ অতিৰিজ্ঝ পস্সতি। অযম্পি খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি’’।
‘‘Puna caparaṃ, bhikkhave, sekho bhikkhu pañcindriyāni pajānāti – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – yaṃgatikāni yaṃparamāni yaṃphalāni yaṃpariyosānāni. Na heva kho kāyena phusitvā viharati; paññāya ca ativijjha passati. Ayampi kho, bhikkhave, pariyāyo yaṃ pariyāyaṃ āgamma sekho bhikkhu sekhabhūmiyaṃ ṭhito ‘sekhosmī’ti pajānāti’’.
‘‘কতমো চ, ভিক্খৰে, পরিযাযো যং পরিযাযং আগম্ম অসেখো ভিক্খু অসেখভূমিযং ঠিতো ‘অসেখোস্মী’তি পজানাতি? ইধ, ভিক্খৰে, অসেখো ভিক্খু পঞ্চিন্দ্রিযানি পজানাতি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – যংগতিকানি যংপরমানি যংফলানি যংপরিযোসানানি। কাযেন চ ফুসিত্ৰা ৰিহরতি; পঞ্ঞায চ অতিৰিজ্ঝ পস্সতি। অযম্পি খো, ভিক্খৰে, পরিযাযো যং পরিযাযং আগম্ম অসেখো ভিক্খু অসেখভূমিযং ঠিতো ‘অসেখোস্মী’তি পজানাতি’’।
‘‘Katamo ca, bhikkhave, pariyāyo yaṃ pariyāyaṃ āgamma asekho bhikkhu asekhabhūmiyaṃ ṭhito ‘asekhosmī’ti pajānāti? Idha, bhikkhave, asekho bhikkhu pañcindriyāni pajānāti – saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – yaṃgatikāni yaṃparamāni yaṃphalāni yaṃpariyosānāni. Kāyena ca phusitvā viharati; paññāya ca ativijjha passati. Ayampi kho, bhikkhave, pariyāyo yaṃ pariyāyaṃ āgamma asekho bhikkhu asekhabhūmiyaṃ ṭhito ‘asekhosmī’ti pajānāti’’.
‘‘পুন চপরং, ভিক্খৰে, অসেখো ভিক্খু ছ ইন্দ্রিযানি পজানাতি। ‘চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং – ইমানি খো ছ ইন্দ্রিযানি সব্বেন সব্বং সব্বথা সব্বং অপরিসেসং নিরুজ্ঝিস্সন্তি, অঞ্ঞানি চ ছ ইন্দ্রিযানি ন কুহিঞ্চি কিস্মিঞ্চি উপ্পজ্জিস্সন্তী’তি পজানাতি। অযম্পি খো, ভিক্খৰে, পরিযাযো যং পরিযাযং আগম্ম অসেখো ভিক্খু অসেখভূমিযং ঠিতো ‘অসেখোস্মী’তি পজানাতী’’তি। ততিযং।
‘‘Puna caparaṃ, bhikkhave, asekho bhikkhu cha indriyāni pajānāti. ‘Cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ – imāni kho cha indriyāni sabbena sabbaṃ sabbathā sabbaṃ aparisesaṃ nirujjhissanti, aññāni ca cha indriyāni na kuhiñci kismiñci uppajjissantī’ti pajānāti. Ayampi kho, bhikkhave, pariyāyo yaṃ pariyāyaṃ āgamma asekho bhikkhu asekhabhūmiyaṃ ṭhito ‘asekhosmī’ti pajānātī’’ti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. সেখসুত্তৰণ্ণনা • 3. Sekhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. সেখসুত্তৰণ্ণনা • 3. Sekhasuttavaṇṇanā
