| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
ஸேகி²யகண்ட³ங்
Sekhiyakaṇḍaṃ
ஸேகி²யேஸு ஸதிபி வீதிக்கமே அனாத³ரியாபெக்க²ஸ்ஸேவ ஆபத்தீதி த³ஸ்ஸனத்த²ங் காரகோ ந வுத்தோ. அயஞ்ஹி வினயத⁴ம்மதா, யதி³த³ங் ஸாபெக்கே² காரகனித்³தே³ஸோ, ஸோ வுத்தனியமே விதி⁴, பு⁴ம்மகரணஞ்ச. அட்ட²ங்கு³லாதி⁴கம்பி ஓதாரெத்வா நிவாஸேதுங் வட்டதி. ததோ பரங் ஓதாரெந்தஸ்ஸ து³க்கடந்தி மஹாஅட்ட²கதா²யங் வுத்தங். ஆராமே வாதி பு³த்³து⁴பட்டா²னாதி³காலே. பாருபிதப்³ப³ந்தி உத்தராஸங்க³கிச்சவஸேன வுத்தங்.
Sekhiyesu satipi vītikkame anādariyāpekkhasseva āpattīti dassanatthaṃ kārako na vutto. Ayañhi vinayadhammatā, yadidaṃ sāpekkhe kārakaniddeso, so vuttaniyame vidhi, bhummakaraṇañca. Aṭṭhaṅgulādhikampi otāretvā nivāsetuṃ vaṭṭati. Tato paraṃ otārentassa dukkaṭanti mahāaṭṭhakathāyaṃ vuttaṃ. Ārāme vāti buddhupaṭṭhānādikāle. Pārupitabbanti uttarāsaṅgakiccavasena vuttaṃ.
ட²த்வாதி எத்த² க³ச்ச²ந்தோபி பரிஸ்ஸயாபா⁴வங் ஓலோகேதுங் லப⁴தியேவாதி (வஜிர॰ டீ॰ பாசித்திய 582) லிகி²தங். யதா² வாஸூபக³தஸ்ஸ அந்தரக⁴ரே காயங் விவரித்வா நிஸீதி³துங் வட்டதி, ததா² தஸ்ஸ ஸந்திகே க³ந்துகாமஸ்ஸபி காயப³ந்த⁴னங் அப³ந்தி⁴த்வா ஸங்கா⁴டிங் அபாருபித்வா கா³மப்பவேஸனமனாரோசெத்வா யதா²காமங் க³ந்துங் வட்டதி. தஸ்மா அத்³தா⁴னமக்³க³க³மனகாலே ஏகோ பி⁴க்கு² கா³மப்பவேஸனவத்தங் பூரெத்வா கா³மங் பவிஸித்வா ஏகங் ஆவஸத²ங் புரதோவ டி²தங் பத்வா பரிக்கா²ரங் ட²பெத்வா வாஸூபக³தோ சே ஹோதி, இதரேஹி தஸ்ஸ ஸந்திகங் யதா²ஸுக²ங் க³ந்துங் வட்டதி. கோ பன வாதோ³ சதூஹபஞ்சாஹங் வாஸமதி⁴ட்டா²ய வஸிதபி⁴க்கூ²னங் ஸந்திகங் க³ந்துஞ்ச வாஸூபக³தானங் ஸந்திகங் க³ந்துஞ்ச வட்டதீதி. பு³த்³த⁴பூஜம்பி யதா²ஸுக²ங் க³ந்துங் வட்டதி. வுத்தம்பி சேதங் அட்ட²கதா²யங் ‘‘அனாபத்தி காரணங் படிச்ச தஹங் தஹங் ஓலோகேதீ’’தி. தத்த² காரணங் நாம ஆமிஸபூஜாதி வேதி³தப்³பா³தி லிகி²தங்.
Ṭhatvāti ettha gacchantopi parissayābhāvaṃ oloketuṃ labhatiyevāti (vajira. ṭī. pācittiya 582) likhitaṃ. Yathā vāsūpagatassa antaraghare kāyaṃ vivaritvā nisīdituṃ vaṭṭati, tathā tassa santike gantukāmassapi kāyabandhanaṃ abandhitvā saṅghāṭiṃ apārupitvā gāmappavesanamanārocetvā yathākāmaṃ gantuṃ vaṭṭati. Tasmā addhānamaggagamanakāle eko bhikkhu gāmappavesanavattaṃ pūretvā gāmaṃ pavisitvā ekaṃ āvasathaṃ puratova ṭhitaṃ patvā parikkhāraṃ ṭhapetvā vāsūpagato ce hoti, itarehi tassa santikaṃ yathāsukhaṃ gantuṃ vaṭṭati. Ko pana vādo catūhapañcāhaṃ vāsamadhiṭṭhāya vasitabhikkhūnaṃ santikaṃ gantuñca vāsūpagatānaṃ santikaṃ gantuñca vaṭṭatīti. Buddhapūjampi yathāsukhaṃ gantuṃ vaṭṭati. Vuttampi cetaṃ aṭṭhakathāyaṃ ‘‘anāpatti kāraṇaṃ paṭicca tahaṃ tahaṃ oloketī’’ti. Tattha kāraṇaṃ nāma āmisapūjāti veditabbāti likhitaṃ.
ச²ப்³பீ³ஸதிஸாருப்பவண்ணனா நிட்டி²தா.
Chabbīsatisāruppavaṇṇanā niṭṭhitā.
யஸ்மா ‘‘ஸமதித்திகோ பிண்ட³பாதோ படிக்³க³ஹேதப்³போ³’’தி (பாசி॰ 602-603) வசனங் பிண்ட³பாதோ ஸமபுண்ணோ படிக்³க³ஹேதப்³போ³தி தீ³பேதி, தஸ்மா அத்தனோ ஹத்த²க³தே பத்தே பிண்ட³பாதோ தி³ய்யமானோ தூ²பீகதோபி சே ஹோதி, வட்டதீதி தீ³பிதோ ஹோதி. ஸூபோத³னவிஞ்ஞத்தியங் முகே² பக்கி²பித்வா விப்படிஸாரே உப்பன்னே புன உக்³கி³ரிதுகாமஸ்ஸாபி ஸஹஸா சே பவிஸதி, எத்த² அஸஞ்சிச்ச பு⁴ஞ்ஜதி நாம. விஞ்ஞத்திகதஞ்ச அகதஞ்ச ஏகஸ்மிங் டா²னே டி²தங் ஸஹஸா அனுபதா⁴ரெத்வா க³ஹெத்வா பு⁴ஞ்ஜதி, அஸ்ஸதியா பு⁴ஞ்ஜதி நாம.
Yasmā ‘‘samatittiko piṇḍapāto paṭiggahetabbo’’ti (pāci. 602-603) vacanaṃ piṇḍapāto samapuṇṇo paṭiggahetabboti dīpeti, tasmā attano hatthagate patte piṇḍapāto diyyamāno thūpīkatopi ce hoti, vaṭṭatīti dīpito hoti. Sūpodanaviññattiyaṃ mukhe pakkhipitvā vippaṭisāre uppanne puna uggiritukāmassāpi sahasā ce pavisati, ettha asañciccabhuñjati nāma. Viññattikatañca akatañca ekasmiṃ ṭhāne ṭhitaṃ sahasā anupadhāretvā gahetvā bhuñjati, assatiyā bhuñjati nāma.
ஸயங் யானக³தோ ஹுத்வா, யதா² யானக³தஸ்ஸ சே;
Sayaṃ yānagato hutvā, yathā yānagatassa ce;
அலங் வத்து²ங் ததா² நாலங், ஸச²த்தோ ச²த்தபாணினோ.
Alaṃ vatthuṃ tathā nālaṃ, sachatto chattapāṇino.
‘‘ஸூபோத³னவிஞ்ஞத்திஸிக்கா²பத³ங் தெ²ய்யஸத்த²ஸமுட்டா²னங், கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³ன’’ந்தி பாடோ².
‘‘Sūpodanaviññattisikkhāpadaṃ theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedana’’nti pāṭho.
ஸேகி²யவண்ணனா நிட்டி²தா.
Sekhiyavaṇṇanā niṭṭhitā.
பி⁴க்கு²பாதிமொக்க²வண்ணனா நிட்டி²தா.
Bhikkhupātimokkhavaṇṇanā niṭṭhitā.
