| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
সেখিযকথাৰণ্ণনা
Sekhiyakathāvaṇṇanā
১৮৭০. এৰং পাটিদেসনীযৰিনিচ্ছযং দস্সেত্ৰা তদনন্তরং উদ্দিট্ঠানং সেখিযানং ৰিনিচ্ছযং দস্সেতুমাহ ‘‘যো অনাদরিযেনেৰা’’তিআদি। যোতি থেরো ৰা নৰো ৰা মজ্ঝিমো ৰা। এত্থ অনাদরিযং নাম সঞ্চিচ্চ আপত্তিআপজ্জনং, নিৰাসনাদিৰত্থস্স উগ্গহণে নিরুস্সাহঞ্চ। পচ্ছতোপি ৰাতি এত্থ ৰা-সদ্দেন ‘‘পস্সতোপি ৰা’’তি ইদং সঙ্গণ্হাতি। তস্স চাতি এত্থ চ-সদ্দো ৰক্খমানসমুচ্চযো।
1870. Evaṃ pāṭidesanīyavinicchayaṃ dassetvā tadanantaraṃ uddiṭṭhānaṃ sekhiyānaṃ vinicchayaṃ dassetumāha ‘‘yo anādariyenevā’’tiādi. Yoti thero vā navo vā majjhimo vā. Ettha anādariyaṃ nāma sañcicca āpattiāpajjanaṃ, nivāsanādivatthassa uggahaṇe nirussāhañca. Pacchatopi vāti ettha vā-saddena ‘‘passatopi vā’’ti idaṃ saṅgaṇhāti. Tassa cāti ettha ca-saddo vakkhamānasamuccayo.
১৮৭১. ন কেৰলং ৰুত্তনযেন নিৰাসেন্তস্সেৰ হোতি, খন্ধকাগতহত্থিসোণ্ডাদিআকারেনাপি নিৰাসেন্তস্স দুক্কটং হোতীতি আহ ‘‘হত্থিসোণ্ডাদী’’তিআদি। হত্থিসোণ্ডাদিনিৰাসনং পরতো খুদ্দকৰত্থুক্খন্ধকে (চূল়ৰ॰ ২৮০) আৰি ভৰিস্সতি। পরিমণ্ডলন্তি সমন্ততো মণ্ডলং কত্ৰা। ৰত্থব্বন্তি নিৰত্থব্বং নিৰাসেতব্বন্তি অত্থো।
1871. Na kevalaṃ vuttanayena nivāsentasseva hoti, khandhakāgatahatthisoṇḍādiākārenāpi nivāsentassa dukkaṭaṃ hotīti āha ‘‘hatthisoṇḍādī’’tiādi. Hatthisoṇḍādinivāsanaṃ parato khuddakavatthukkhandhake (cūḷava. 280) āvi bhavissati. Parimaṇḍalanti samantato maṇḍalaṃ katvā. Vatthabbanti nivatthabbaṃ nivāsetabbanti attho.
১৮৭২. জাণুমণ্ডলতো হেট্ঠাতি এত্থ ‘‘জঙ্ঘট্ঠিসীসতো পট্ঠাযা’’তি সেসো। অট্ঠঙ্গুলপ্পমাণকন্তি ৰড্ঢকিঅঙ্গুলেন অট্ঠঙ্গুলমত্তন্তি আচরিযা। ‘‘যো পন সুক্খজঙ্ঘো ৰা মহাপিণ্ডিকমংসো ৰা হোতি, তস্স সারুপ্পত্থায জাণুমণ্ডলতো অট্ঠঙ্গুলাধিকম্পি ওতারেত্ৰা নিৰাসেতুং ৰট্টতী’’তি (পাচি॰ অট্ঠ॰ ৫৭৬) অট্ঠকথং সঙ্গণ্হিতুমাহ ‘‘ততো ঊনং ন ৰট্টতী’’তি।
1872.Jāṇumaṇḍalatoheṭṭhāti ettha ‘‘jaṅghaṭṭhisīsato paṭṭhāyā’’ti seso. Aṭṭhaṅgulappamāṇakanti vaḍḍhakiaṅgulena aṭṭhaṅgulamattanti ācariyā. ‘‘Yo pana sukkhajaṅgho vā mahāpiṇḍikamaṃso vā hoti, tassa sāruppatthāya jāṇumaṇḍalato aṭṭhaṅgulādhikampi otāretvā nivāsetuṃ vaṭṭatī’’ti (pāci. aṭṭha. 576) aṭṭhakathaṃ saṅgaṇhitumāha ‘‘tato ūnaṃ na vaṭṭatī’’ti.
১৮৭৩. অসঞ্চিচ্চ অপরিমণ্ডলং নিৰাসেন্তস্স অনাপত্তীতি যোজনা। এৰমুপরিপি। অসঞ্চিচ্চাতি ‘‘অপরিমণ্ডলং নিৰাসেস্সামী’’তি এৰং অসঞ্চিচ্চ, অথ খো ‘‘পরিমণ্ডলংযেৰ নিৰাসেস্সামী’’তি ৰিরজ্ঝিত্ৰা অপরিমণ্ডলং নিৰাসেন্তস্স অনাপত্তি। অসতিস্সাপীতি অঞ্ঞৰিহিতস্সাপি তথা নিৰাসেন্তস্স অনাপত্তি। অজানন্তস্সাতি কেৰলং পরিমণ্ডলং নিৰাসেতুং অজানন্তস্স অনাপত্তি। অপিচ নিৰাসনৰত্তং উগ্গহেতব্বং। উগ্গহিতৰত্তোপি সচে ‘‘আরুল়্হ’’ন্তি ৰা ‘‘ওরুল়্হ’’ন্তি ৰা ন জানাতি, তস্সাপি অনাপত্তিযেৰ। গিলানস্সাতি যস্স জঙ্ঘায ৰা পাদে ৰা ৰণো হোতি, তস্স উক্খিপিত্ৰা ৰা ওতারেত্ৰা ৰা নিৰাসেন্তস্স অনাপত্তি। পাদোতি চেত্থ পাদসমীপং অধিপ্পেতং। আপদাসূতি ৰাল়া ৰা চোরা ৰা অনুবন্ধন্তি, এৰরূপাসু আপদাসু অনাপত্তি।
1873. Asañcicca aparimaṇḍalaṃ nivāsentassa anāpattīti yojanā. Evamuparipi. Asañciccāti ‘‘aparimaṇḍalaṃ nivāsessāmī’’ti evaṃ asañcicca, atha kho ‘‘parimaṇḍalaṃyeva nivāsessāmī’’ti virajjhitvā aparimaṇḍalaṃ nivāsentassa anāpatti. Asatissāpīti aññavihitassāpi tathā nivāsentassa anāpatti. Ajānantassāti kevalaṃ parimaṇḍalaṃ nivāsetuṃ ajānantassa anāpatti. Apica nivāsanavattaṃ uggahetabbaṃ. Uggahitavattopi sace ‘‘āruḷha’’nti vā ‘‘oruḷha’’nti vā na jānāti, tassāpi anāpattiyeva. Gilānassāti yassa jaṅghāya vā pāde vā vaṇo hoti, tassa ukkhipitvā vā otāretvā vā nivāsentassa anāpatti. Pādoti cettha pādasamīpaṃ adhippetaṃ. Āpadāsūti vāḷā vā corā vā anubandhanti, evarūpāsu āpadāsu anāpatti.
পরিমণ্ডলকথাৰণ্ণনা।
Parimaṇḍalakathāvaṇṇanā.
১৮৭৪. উভো কোণে সমং কত্ৰাতি পারুপনস্স একংসে কতস্স পিট্ঠিপস্সে, উদরপস্সে চ ওলম্বমানে উভো কণ্ণে হত্থিপিট্ঠে গণ্ডা ৰিয সমং কত্ৰা। পরিমণ্ডলং কত্ৰাতি এতস্সেৰ অত্থপদং। সাদরন্তি ভাৰনপুংসকনিদ্দেসো। সাদরং ৰা পারুপিতব্বন্তি যোজনা, সাদরং পারুপনং কত্তব্বন্তি অত্থো। এৰং অকরোন্তস্সাতি পারুপনৰত্তে আদরং জনেত্ৰা এৰং অপারুপন্তস্স।
1874.Ubho koṇe samaṃ katvāti pārupanassa ekaṃse katassa piṭṭhipasse, udarapasse ca olambamāne ubho kaṇṇe hatthipiṭṭhe gaṇḍā viya samaṃ katvā. Parimaṇḍalaṃ katvāti etasseva atthapadaṃ. Sādaranti bhāvanapuṃsakaniddeso. Sādaraṃ vā pārupitabbanti yojanā, sādaraṃ pārupanaṃ kattabbanti attho. Evaṃ akarontassāti pārupanavatte ādaraṃ janetvā evaṃ apārupantassa.
১৮৭৫. ‘‘পরিমণ্ডলং নিৰাসেস্সামীতি সিক্খা করণীযা’’তি (পাচি॰ ৫৭৬) ৰা ‘‘পরিমণ্ডলং পারুপিস্সামীতি সিক্খা করণীযা’’তি (পাচি॰ ৫৭৭) ৰা ‘‘অন্তরঘরে’’তি অৰিসেসেত্ৰা ৰুত্তত্তা আহ ‘‘অৰিসেসেন ৰুত্ত’’ন্তি। ইদং সিক্খাপদদ্ৰযং যস্মা অৰিসেসেন ৰুত্তং, তস্মা ঘরে, ৰিহারে ৰা কাতব্বং পরিমণ্ডলন্তি যোজনা। ঘরেতি অন্তরঘরে। ৰিহারে ৰাতি বুদ্ধুপট্ঠানাদিকালং সন্ধায ৰুত্তং। পরিমণ্ডলং কত্তব্বন্তি পরিমণ্ডলমেৰ নিৰাসেতব্বং পারুপিতব্বন্তি অত্থো।
1875. ‘‘Parimaṇḍalaṃ nivāsessāmīti sikkhā karaṇīyā’’ti (pāci. 576) vā ‘‘parimaṇḍalaṃ pārupissāmīti sikkhā karaṇīyā’’ti (pāci. 577) vā ‘‘antaraghare’’ti avisesetvā vuttattā āha ‘‘avisesena vutta’’nti. Idaṃ sikkhāpadadvayaṃ yasmā avisesena vuttaṃ, tasmā ghare, vihāre vā kātabbaṃ parimaṇḍalanti yojanā. Ghareti antaraghare. Vihāre vāti buddhupaṭṭhānādikālaṃ sandhāya vuttaṃ. Parimaṇḍalaṃ kattabbanti parimaṇḍalameva nivāsetabbaṃ pārupitabbanti attho.
দুতিযং।
Dutiyaṃ.
১৮৭৬. উভো কোণে সমং কত্ৰাতি সম্বন্ধো। গীৰমেৰ চ অনুৰাতেন ছাদেত্ৰাতি যোজনা।
1876. Ubho koṇe samaṃ katvāti sambandho. Gīvameva ca anuvātena chādetvāti yojanā.
১৮৭৭. তথা অকত্ৰাতি যথাৰুত্তৰিধানং অকত্ৰা। জত্তূনিপীতি উভো অংসকূটানিপি। উরম্পি চাতি হদযম্পি। ৰিৰরিত্ৰাতি অপ্পটিচ্ছাদেত্ৰা। যথাকামন্তি ইচ্ছানুরূপং। গচ্ছতোতি এত্থ ‘‘অন্তরঘরে’’তি সেসো। অন্তরঘরং নাম গামে ৰা হোতু ৰিহারে ৰা, পচিত্ৰা ভুঞ্জিত্ৰা গিহীনং ৰসনট্ঠানং।
1877.Tathā akatvāti yathāvuttavidhānaṃ akatvā. Jattūnipīti ubho aṃsakūṭānipi. Urampi cāti hadayampi. Vivaritvāti appaṭicchādetvā. Yathākāmanti icchānurūpaṃ. Gacchatoti ettha ‘‘antaraghare’’ti seso. Antaragharaṃ nāma gāme vā hotu vihāre vā, pacitvā bhuñjitvā gihīnaṃ vasanaṭṭhānaṃ.
ততিযং।
Tatiyaṃ.
১৮৭৮-৯. ‘‘মণিবন্ধতো’’তি ইমিনাপি ‘‘হেট্ঠা’’তি যোজেতব্বং। ৰাসূপগস্সাতি এত্থ ‘‘কাযং ৰিৰরিত্ৰা নিসীদতো’’তি সেসো। ৰাসূপগো নাম রত্তিৰাসত্থায উপগতো, এতেন ৰাসত্থায অন্তরঘরং উপগচ্ছন্তেন সুপ্পটিচ্ছন্নেনেৰ উপগন্তব্বন্তি দীপিতং হোতি, এতেনেৰ ৰাসূপগতস্স সন্তিকং উপগতস্স যথাকামং গমনে ন দোসোতি চ ৰুত্তমেৰ হোতি। তেনাহ গণ্ঠিপদে ‘‘একদিৰসম্পি ৰাসূপগতস্স সন্তিকং যথাসুখং গন্তুং ৰট্টতি, কো পন ৰাদো চতুপঞ্চাহং ৰাসমধিট্ঠায ৰসিতভিক্খূনং সন্তিক’’ন্তি।
1878-9.‘‘Maṇibandhato’’ti imināpi ‘‘heṭṭhā’’ti yojetabbaṃ. Vāsūpagassāti ettha ‘‘kāyaṃ vivaritvā nisīdato’’ti seso. Vāsūpago nāma rattivāsatthāya upagato, etena vāsatthāya antaragharaṃ upagacchantena suppaṭicchanneneva upagantabbanti dīpitaṃ hoti, eteneva vāsūpagatassa santikaṃ upagatassa yathākāmaṃ gamane na dosoti ca vuttameva hoti. Tenāha gaṇṭhipade ‘‘ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catupañcāhaṃ vāsamadhiṭṭhāya vasitabhikkhūnaṃ santika’’nti.
চতুত্থং।
Catutthaṃ.
১৮৮০. সুৰিনীতেনাতি হত্থপাদানং অকীল়াপনেনেৰ সুট্ঠু ৰিনীতেন।
1880.Suvinītenāti hatthapādānaṃ akīḷāpaneneva suṭṭhu vinītena.
পঞ্চমং।
Pañcamaṃ.
১৮৮১. গাথাবন্ধৰসেন ‘‘সতীমতা’’তি দীঘো কতো। অৰিকারেনাতি তংতদৰলোকাসহিতেন । যুগং মত্তা পমাণং এতস্সাতি যুগমত্তং, রথযুগং চতুহত্থপ্পমাণং, তত্তকং পদেসং। পেক্খিনাতি ওলোকেন্তেন। ‘‘ভিক্খুনা ওক্খিত্তচক্খুনা’’তি পদচ্ছেদো।
1881. Gāthābandhavasena ‘‘satīmatā’’ti dīgho kato. Avikārenāti taṃtadavalokāsahitena . Yugaṃ mattā pamāṇaṃ etassāti yugamattaṃ, rathayugaṃ catuhatthappamāṇaṃ, tattakaṃ padesaṃ. Pekkhināti olokentena. ‘‘Bhikkhunā okkhittacakkhunā’’ti padacchedo.
১৮৮২. অন্তরঘরে যত্থ কত্থচিপি একস্মিম্পি ঠানে ঠত্ৰাতি যোজনা। এৰং ৰুত্তেপি তথারূপে অন্তরাযে সতি গচ্ছতোপি ওলোকেতুং লব্ভতি। একস্মিং পন ঠানে ঠত্ৰাতি এত্থ গচ্ছন্তোপি পরিস্সযাভাৰং ওলোকেতুং লব্ভতিযেৰ। ‘‘তথা গামে পূজ’’ন্তি গণ্ঠিপদেসু ৰুত্তং। পি-সদ্দো পন-সদ্দত্থো, ওলোকেতুং পন ৰট্টতীতি ৰুত্তং হোতি।
1882. Antaraghare yattha katthacipi ekasmimpi ṭhāne ṭhatvāti yojanā. Evaṃ vuttepi tathārūpe antarāye sati gacchatopi oloketuṃ labbhati. Ekasmiṃ pana ṭhāne ṭhatvāti ettha gacchantopi parissayābhāvaṃ oloketuṃ labbhatiyeva. ‘‘Tathā gāme pūja’’nti gaṇṭhipadesu vuttaṃ. Pi-saddo pana-saddattho, oloketuṃ pana vaṭṭatīti vuttaṃ hoti.
১৮৮৩. ওলোকেন্তো তহং তহন্তি যো অনাদরিযং পটিচ্চ তং তং দিসাভাগং পাসাদং কূটাগারং ৰীথিং ওলোকেন্তো।
1883.Olokento tahaṃ tahanti yo anādariyaṃ paṭicca taṃ taṃ disābhāgaṃ pāsādaṃ kūṭāgāraṃ vīthiṃ olokento.
সত্তমং।
Sattamaṃ.
১৮৮৪. একতো ৰাপীতি একঅংসকূটতো ৰা। উভতো ৰাপীতি উভযংসকূটতো ৰা। ইন্দখীলকতো অন্তোতি গামদ্ৰারিন্দখীলতো অন্তো, ঘরেতি ৰুত্তং হোতি।
1884.Ekatovāpīti ekaaṃsakūṭato vā. Ubhato vāpīti ubhayaṃsakūṭato vā. Indakhīlakato antoti gāmadvārindakhīlato anto, ghareti vuttaṃ hoti.
নৰমং।
Navamaṃ.
১৮৮৫. তথা নিসিন্নকালেপীতি ইন্দখীলস্স অন্তো নিসিন্নকালেপি। কুণ্ডিকং নীহরন্তেন চ চীৰরং অনুক্খিপিত্ৰা দাতব্বা কুণ্ডিকাতি যোজনা। কুণ্ডিকন্তি চ উপলক্খণমত্তং। ধম্মকরণাদীসুপি এসেৰ নযো।
1885.Tathā nisinnakālepīti indakhīlassa anto nisinnakālepi. Kuṇḍikaṃ nīharantena ca cīvaraṃ anukkhipitvā dātabbā kuṇḍikāti yojanā. Kuṇḍikanti ca upalakkhaṇamattaṃ. Dhammakaraṇādīsupi eseva nayo.
দসমং।
Dasamaṃ.
পঠমো ৰগ্গো।
Paṭhamo vaggo.
১৮৮৬. গন্তুঞ্চেৰ নিসীদিতুঞ্চ ন ৰট্টতীতি যোজনা। চ-সদ্দো কিরিযাসমুচ্চযো। হসনীযস্মিং ৰত্থুস্মিন্তি হাসজনকে কারণে। সিতমত্তন্তি মন্দহাসং।
1886. Gantuñceva nisīdituñca na vaṭṭatīti yojanā. Ca-saddo kiriyāsamuccayo. Hasanīyasmiṃ vatthusminti hāsajanake kāraṇe. Sitamattanti mandahāsaṃ.
পঠমদুতিযানি।
Paṭhamadutiyāni.
১৮৮৭. অপ্পসদ্দেনাতি ‘‘কিত্তাৰতা অপ্পসদ্দো হোতি? দ্ৰাদসহত্থে গেহে আদিম্হি সঙ্ঘত্থেরো, মজ্ঝে দুতিযত্থেরো, অন্তে ততিযত্থেরোতি এৰং নিসিন্নেসুযং সঙ্ঘত্থেরো দুতিযত্থেরেন সদ্ধিং মন্তেতি, দুতিযত্থেরো তস্স সদ্দঞ্চেৰ সুণাতি, কথঞ্চ ৰৰত্থপেতি। ততিযত্থেরো পন সদ্দমেৰ সুণাতি, কথং ন ৰৰত্থপেতি। এত্তাৰতা অপ্পসদ্দো হোতী’’তি (পাচি॰ ৫৮৮) ৰুত্তঅপ্পসদ্দযুত্তেন। সচে পন ততিযত্থেরো কথঞ্চ ৰৰত্থপেতি, মহাসদ্দো নাম হোতীতি।
1887.Appasaddenāti ‘‘kittāvatā appasaddo hoti? Dvādasahatthe gehe ādimhi saṅghatthero, majjhe dutiyatthero, ante tatiyattheroti evaṃ nisinnesuyaṃ saṅghatthero dutiyattherena saddhiṃ manteti, dutiyatthero tassa saddañceva suṇāti, kathañca vavatthapeti. Tatiyatthero pana saddameva suṇāti, kathaṃ na vavatthapeti. Ettāvatā appasaddo hotī’’ti (pāci. 588) vuttaappasaddayuttena. Sace pana tatiyatthero kathañca vavatthapeti, mahāsaddo nāma hotīti.
ততিযং।
Tatiyaṃ.
১৮৮৮. কাযপ্পচালকং কত্ৰাতি কাযং চালেত্ৰা চালেত্ৰা। উপরিপি এসেৰ নযো। হত্থস্স ৰুত্তলক্খণত্তা ‘‘বাহূ’’তি মণিবন্ধতো যাৰ অংসকূটা গহেতব্বা।
1888.Kāyappacālakaṃ katvāti kāyaṃ cāletvā cāletvā. Uparipi eseva nayo. Hatthassa vuttalakkhaṇattā ‘‘bāhū’’ti maṇibandhato yāva aṃsakūṭā gahetabbā.
১৮৮৯. উজুং পগ্গহেত্ৰাতি উজুং ঠপেত্ৰা। আসিতব্বন্তি নিসীদিতব্বং। ‘‘সমেন ইরিযাপথেন তূ’’তি পদচ্ছেদো।
1889.Ujuṃ paggahetvāti ujuṃ ṭhapetvā. Āsitabbanti nisīditabbaṃ. ‘‘Samena iriyāpathena tū’’ti padacchedo.
১৮৯০. ইত্থম্ভূতে করণৰচনং। গমনপটিসংযুত্তেসু সিক্খাপদেসু গমনস্স অসম্ভৰোতি আহ ‘‘নিসীদনেন যুত্তেসূ’’তি।
1890. Itthambhūte karaṇavacanaṃ. Gamanapaṭisaṃyuttesu sikkhāpadesu gamanassa asambhavoti āha ‘‘nisīdanena yuttesū’’ti.
পঞ্চমছট্ঠসত্তমট্ঠমনৰমানি।
Pañcamachaṭṭhasattamaṭṭhamanavamāni.
দুতিযো ৰগ্গো।
Dutiyo vaggo.
১৮৯১. খম্ভং কত্ৰাতি কটিযা একপস্সে ৰা দ্ৰীসু ৰা পস্সেসু কপ্পরসন্ধিতো আভুজিত্ৰা হত্থং ঠপেত্ৰা। যথাহ – ‘‘খম্ভকতো নাম কটিযং হত্থং ঠপেত্ৰা কতখম্ভো’’তি (পাচি॰ অট্ঠ॰ ৫৯৬)। উক্কুটিকায ৰা গচ্ছতোতি যোজনা। উক্কুটিকা ৰুচ্চতি পণ্হিযো উক্খিপিত্ৰা অগ্গপাদেহি ৰা অগ্গপাদে উক্খিপিত্ৰা পণ্হীহি এৰ ৰা ভূমিং ফুসন্তস্স গমনং।
1891.Khambhaṃ katvāti kaṭiyā ekapasse vā dvīsu vā passesu kapparasandhito ābhujitvā hatthaṃ ṭhapetvā. Yathāha – ‘‘khambhakato nāma kaṭiyaṃ hatthaṃ ṭhapetvā katakhambho’’ti (pāci. aṭṭha. 596). Ukkuṭikāya vā gacchatoti yojanā. Ukkuṭikā vuccati paṇhiyo ukkhipitvā aggapādehi vā aggapāde ukkhipitvā paṇhīhi eva vā bhūmiṃ phusantassa gamanaṃ.
১৮৯২. দুস্সপল্লত্থিকাযাতি আযোগপল্লত্থিকায। অন্তরঘরে নিসীদন্তস্স তস্স দুক্কটং হোতীতি যোজনা।
1892.Dussapallatthikāyāti āyogapallatthikāya. Antaraghare nisīdantassa tassa dukkaṭaṃ hotīti yojanā.
১৮৯৩. দুতিযে চাতি ‘‘ন খম্ভকতো অন্তরঘরে নিসীদিস্সামী’’তি (পাচি॰ ৫৯৭) সিক্খাপদে চ। চতুত্থে চাতি ‘‘ন ওগুণ্ঠিতো অন্তরঘরে নিসীদিস্সামী’’তি (পাচি॰ ৫৯৯) সিক্খাপদে চ। ছট্ঠেতি ‘‘ন পল্লত্থিকায অন্তরঘরে’’ইচ্চাদি (পাচি॰ ৬০১) সিক্খাপদে চ। ইতি এৰং সারুপ্পা সমণাচারানুচ্ছৰিকা ছব্বীসতি সিক্খাপদানি পকাসিতানি।
1893.Dutiyecāti ‘‘na khambhakato antaraghare nisīdissāmī’’ti (pāci. 597) sikkhāpade ca. Catutthe cāti ‘‘na oguṇṭhito antaraghare nisīdissāmī’’ti (pāci. 599) sikkhāpade ca. Chaṭṭheti ‘‘na pallatthikāya antaraghare’’iccādi (pāci. 601) sikkhāpade ca. Iti evaṃ sāruppā samaṇācārānucchavikā chabbīsati sikkhāpadāni pakāsitāni.
পঠমদুতিযততিযচতুত্থপঞ্চমছট্ঠানি।
Paṭhamadutiyatatiyacatutthapañcamachaṭṭhāni.
১৮৯৪. ৰিঞ্ঞুনা ভিক্খুনা সক্কচ্চং সতিযুত্তেন, পত্তসঞ্ঞিনা চ হুত্ৰা সমসূপোৰ পিণ্ডপাতো গহেতব্বোতি যোজনা। এৰং এতায গাথায সিক্খাপদত্তযং সঙ্গহিতং। সক্কচ্চন্তি সতিং উপট্ঠপেত্ৰা। ‘‘সতিযুত্তেনা’’তি ইদং ‘‘সক্কচ্চ’’ন্তি এতস্স অত্থপদং। ‘‘সতিং উপট্ঠপেত্ৰা’’তি (পাচি॰ অট্ঠ॰ ৬০২) হি অট্ঠকথাযং ৰুত্তং। পত্তে সঞ্ঞা পত্তসঞ্ঞা, সা অস্স অত্থীতি পত্তসঞ্ঞী, অনঞ্ঞৰিহিতেন অত্তনো ভাজনেযেৰ উপনিবদ্ধসঞ্ঞিনাতি অত্থো।
1894. Viññunā bhikkhunā sakkaccaṃ satiyuttena, pattasaññinā ca hutvā samasūpova piṇḍapāto gahetabboti yojanā. Evaṃ etāya gāthāya sikkhāpadattayaṃ saṅgahitaṃ. Sakkaccanti satiṃ upaṭṭhapetvā. ‘‘Satiyuttenā’’ti idaṃ ‘‘sakkacca’’nti etassa atthapadaṃ. ‘‘Satiṃ upaṭṭhapetvā’’ti (pāci. aṭṭha. 602) hi aṭṭhakathāyaṃ vuttaṃ. Patte saññā pattasaññā, sā assa atthīti pattasaññī, anaññavihitena attano bhājaneyeva upanibaddhasaññināti attho.
১৮৯৫. ভত্তচতুব্ভাগোতি ভত্তস্স চতুব্ভাগপ্পমাণো। ততো অধিকং গণ্হতো দুক্কটং।
1895.Bhattacatubbhāgoti bhattassa catubbhāgappamāṇo. Tato adhikaṃ gaṇhato dukkaṭaṃ.
১৮৯৬. ‘‘রসরসে’’তি ৰত্তব্বে ‘‘রসেরসে’’তি গাথাবন্ধৰসেন ৰুত্তং। দ্ৰে সূপে ঠপেত্ৰা অৰসেসানি ওলোণিসাকসূপেয্যমচ্ছরসমংসরসাদীনি রসরসাতি ৰেদিতব্বানি। এত্থ চ ‘‘ওলোণীতি দধিকতং গোরস’’ন্তি কেচি। ‘‘একা ব্যঞ্জনৰিকতী’’তি অপরে। ‘‘যো কোচি সুদ্ধো কঞ্জিকতক্কাদিরসো’’তি অঞ্ঞে। সাকসূপেয্যগ্গহণেন যা কাচি সূপেয্যসাকেহি কতা ব্যঞ্জনৰিকতি ৰুত্তা। মংসরসাদীনীতি আদি-সদ্দেন অৰসেসা সব্বাপি ব্যঞ্জনৰিকতি সঙ্গহিতাতি দট্ঠব্বং। ঞাতকাদীনন্তি এত্থ ‘‘সন্তকং গণ্হন্তস্সা’’তি সেসো। অঞ্ঞত্থাযাতি এত্থ ‘‘কতং গণ্হন্তস্সা’’তি সেসো। ধনেনাতি এত্থ ‘‘অত্তনো’’তি চ ‘‘কীত’’ন্তি চ ‘‘গণ্হন্তস্সা’’তি চ সেসো। ঞাতকাদীনং সন্তকং গণ্হন্তস্স, অঞ্ঞত্থায কতং গণ্হন্তস্স, অত্তনো ধনেন কীতং গণ্হন্তস্স অনাপত্তীতি অত্থো।
1896. ‘‘Rasarase’’ti vattabbe ‘‘raserase’’ti gāthābandhavasena vuttaṃ. Dve sūpe ṭhapetvā avasesāni oloṇisākasūpeyyamaccharasamaṃsarasādīni rasarasāti veditabbāni. Ettha ca ‘‘oloṇīti dadhikataṃ gorasa’’nti keci. ‘‘Ekā byañjanavikatī’’ti apare. ‘‘Yo koci suddho kañjikatakkādiraso’’ti aññe. Sākasūpeyyaggahaṇena yā kāci sūpeyyasākehi katā byañjanavikati vuttā. Maṃsarasādīnīti ādi-saddena avasesā sabbāpi byañjanavikati saṅgahitāti daṭṭhabbaṃ. Ñātakādīnanti ettha ‘‘santakaṃ gaṇhantassā’’ti seso. Aññatthāyāti ettha ‘‘kataṃ gaṇhantassā’’ti seso. Dhanenāti ettha ‘‘attano’’ti ca ‘‘kīta’’nti ca ‘‘gaṇhantassā’’ti ca seso. Ñātakādīnaṃ santakaṃ gaṇhantassa, aññatthāya kataṃ gaṇhantassa, attano dhanena kītaṃ gaṇhantassa anāpattīti attho.
সত্তমট্ঠমনৰমানি।
Sattamaṭṭhamanavamāni.
১৮৯৭. অধিট্ঠানূপগস্স পত্তস্স মুখৰট্টিযা অন্তোলেখাপমাণেন পূরিতোৰ গহেতব্বোতি যোজনা।
1897. Adhiṭṭhānūpagassa pattassa mukhavaṭṭiyā antolekhāpamāṇena pūritova gahetabboti yojanā.
১৮৯৮. অনাপত্তিৰিসযং দস্সেত্ৰা আপত্তিৰিসযং দস্সেতুমাহ ‘‘তত্থা’’তিআদি। তত্থাতি অধিট্ঠানূপগে পত্তে। থূপীকতং কত্ৰাতি এত্থ ‘‘দিয্যমান’’ন্তি সেসো। যথাৰুত্তলেখাতিক্কমো যথা হোতি, এৰং থূপীকতং দিয্যমানং গণ্হতো আপত্তি দুক্কটন্তি সম্বন্ধো। ইমিনা পঠমং থূপীকতস্স অধিট্ঠানূপগপত্তস্স পচ্ছা পটিগ্গহণঞ্চ পঠমপটিগ্গহিতপত্তে পচ্ছা ভোজনস্স থূপীকতস্স পটিগ্গহণঞ্চ নিৰারিতন্তি ৰেদিতব্বং।
1898. Anāpattivisayaṃ dassetvā āpattivisayaṃ dassetumāha ‘‘tatthā’’tiādi. Tatthāti adhiṭṭhānūpage patte. Thūpīkataṃ katvāti ettha ‘‘diyyamāna’’nti seso. Yathāvuttalekhātikkamo yathā hoti, evaṃ thūpīkataṃ diyyamānaṃ gaṇhato āpatti dukkaṭanti sambandho. Iminā paṭhamaṃ thūpīkatassa adhiṭṭhānūpagapattassa pacchā paṭiggahaṇañca paṭhamapaṭiggahitapatte pacchā bhojanassa thūpīkatassa paṭiggahaṇañca nivāritanti veditabbaṃ.
১৮৯৯. কালিকত্তযমেৰ চ থূপীকতং ৰট্টতেৰাতি যোজনা। সেসেতি অনধিট্ঠানূপগে পত্তে। সব্বন্তি চতুব্বিধং কালিকং থূপীকতং ৰট্টতীতি যোজনা।
1899. Kālikattayameva ca thūpīkataṃ vaṭṭatevāti yojanā. Seseti anadhiṭṭhānūpage patte. Sabbanti catubbidhaṃ kālikaṃ thūpīkataṃ vaṭṭatīti yojanā.
১৯০০. পেসেতীতি এত্থ ‘‘ভিক্খূ’’তি সেসো। ভিক্খু ভিক্খূনং যদি পেসেতীতি যোজনা। ‘‘ৰিহারং পেসেতুং ৰট্টতী’’তি (পাচি॰ অট্ঠ॰ ৬০৫) অট্ঠকথায অধিপ্পাযং দস্সেতুং ‘‘ভিক্খূন’’ন্তি ৰচনেন পটিগ্গহণং অৰিজহিত্ৰা ভিক্খুনা এৰ পেসিতং গণ্হন্তানং ভিক্খূনং অনাপত্তীতি দীপিতং হোতি। অঞ্ঞথা ‘‘পূরেতুং ৰট্টতী’’তি এত্তকমেৰ ৰত্তব্বন্তি ৰিঞ্ঞাযতি।
1900.Pesetīti ettha ‘‘bhikkhū’’ti seso. Bhikkhu bhikkhūnaṃ yadi pesetīti yojanā. ‘‘Vihāraṃ pesetuṃ vaṭṭatī’’ti (pāci. aṭṭha. 605) aṭṭhakathāya adhippāyaṃ dassetuṃ ‘‘bhikkhūna’’nti vacanena paṭiggahaṇaṃ avijahitvā bhikkhunā eva pesitaṃ gaṇhantānaṃ bhikkhūnaṃ anāpattīti dīpitaṃ hoti. Aññathā ‘‘pūretuṃ vaṭṭatī’’ti ettakameva vattabbanti viññāyati.
১৯০১. পক্খিপ্পমানন্তি মুখৰট্টিতো উচ্চং কত্ৰা মজ্ঝে পক্খিপিযমানং। ফলাদিকন্তি আদি-সদ্দেন ওদনাদিম্পি সঙ্গণ্হাতি। হেট্ঠা ওরোহতীতি সমন্তা ওকাসসম্ভৰতো চালিযমানং মুখৰট্টিপ্পমাণতো হেট্ঠা ভস্সতি।
1901.Pakkhippamānanti mukhavaṭṭito uccaṃ katvā majjhe pakkhipiyamānaṃ. Phalādikanti ādi-saddena odanādimpi saṅgaṇhāti. Heṭṭhāorohatīti samantā okāsasambhavato cāliyamānaṃ mukhavaṭṭippamāṇato heṭṭhā bhassati.
১৯০২. তক্কোলকাদীনন্তি এত্থ আদি-সদ্দেন পূগফলাদীনং সঙ্গহো। ঠপেত্ৰাতি ভত্তমত্থকে নিক্খিপিত্ৰা। ৰটংসকন্তি অৰটংসকং।
1902.Takkolakādīnanti ettha ādi-saddena pūgaphalādīnaṃ saṅgaho. Ṭhapetvāti bhattamatthake nikkhipitvā. Vaṭaṃsakanti avaṭaṃsakaṃ.
১৯০৩. পূৰস্সাতি ৰিকারসম্বন্ধে সামিৰচনং, পূৰৰটংসকন্তি ৰুত্তং হোতি। পূৰস্স যাৰকালিকত্তা আহ ‘‘ইদং থূপীকতং সিযা’’তি।
1903.Pūvassāti vikārasambandhe sāmivacanaṃ, pūvavaṭaṃsakanti vuttaṃ hoti. Pūvassa yāvakālikattā āha ‘‘idaṃ thūpīkataṃ siyā’’ti.
১৯০৪. পণ্ণানং ৰিসুং ভাজনত্তা আহ ‘‘ৰট্টতী’’তি।
1904. Paṇṇānaṃ visuṃ bhājanattā āha ‘‘vaṭṭatī’’ti.
১৯০৫. অস্সাতি ভিক্খুস্স। তং তু সব্বন্তি ‘‘থূপীকতত্তা ন ৰট্টতী’’তি ৰুত্তং তং পন সব্বং। গহিতং সুগহিতন্তি ৰিরাধেত্ৰা পটিগ্গহিতং চে, সুপ্পটিগ্গহিতং।
1905.Assāti bhikkhussa. Taṃ tu sabbanti ‘‘thūpīkatattā na vaṭṭatī’’ti vuttaṃ taṃ pana sabbaṃ. Gahitaṃ sugahitanti virādhetvā paṭiggahitaṃ ce, suppaṭiggahitaṃ.
দসমং।
Dasamaṃ.
ততিযো ৰগ্গো।
Tatiyo vaggo.
১৯০৬. ‘‘উপরি ওধি’’ন্তি পদচ্ছেদো। উপরীতি ভত্তস্স উপরি। ওধিন্তি পরিচ্ছেদং। পটিপাটিযাতি অত্তনো দিসায পরিযন্ততো পট্ঠায অনুক্কমেন।
1906. ‘‘Upari odhi’’nti padacchedo. Uparīti bhattassa upari. Odhinti paricchedaṃ. Paṭipāṭiyāti attano disāya pariyantato paṭṭhāya anukkamena.
১৯০৭. অঞ্ঞেসন্তি এত্থ ‘‘দেন্তো’’তি সেসো। অত্তনো ভত্তং অঞ্ঞেসং দেন্তো অঞ্ঞস্স ভাজনে আকিরং আকিরন্তো পন পটিপাটিং ৰিনাপি তহিং তহিং ওমসতি চে, নত্থি দোসোতি যোজনা। উত্তরিভঙ্গকং তথা আকিরন্তো তত্থ তত্থ ওমসতি, নত্থি দোসোতি যোজনা । ভুঞ্জনত্থায গণ্হন্তোপি চেত্থ ৰত্তব্বো। উত্তরিভঙ্গং নাম ব্যঞ্জনং।
1907.Aññesanti ettha ‘‘dento’’ti seso. Attano bhattaṃ aññesaṃ dento aññassa bhājane ākiraṃ ākiranto pana paṭipāṭiṃ vināpi tahiṃ tahiṃ omasati ce, natthi dosoti yojanā. Uttaribhaṅgakaṃ tathā ākiranto tattha tattha omasati, natthi dosoti yojanā . Bhuñjanatthāya gaṇhantopi cettha vattabbo. Uttaribhaṅgaṃ nāma byañjanaṃ.
ততিযং।
Tatiyaṃ.
১৯০৮. মত্থকং ওমদ্দিত্ৰা পরিভুঞ্জতো দোসোতি যোজনা। ‘‘থূপকতোতি মত্থকতো, ৰেমজ্ঝতো’’তি (পাচি॰ অট্ঠ॰ ৬১০) অট্ঠকথাৰচনতো মত্থকন্তি এত্থ ভত্তমত্থকমাহ। ওমদ্দিত্ৰাতি হত্থেন ভত্তং অৰমদ্দিত্ৰা।
1908. Matthakaṃ omadditvā paribhuñjato dosoti yojanā. ‘‘Thūpakatoti matthakato, vemajjhato’’ti (pāci. aṭṭha. 610) aṭṭhakathāvacanato matthakanti ettha bhattamatthakamāha. Omadditvāti hatthena bhattaṃ avamadditvā.
১৯০৯. সেসকে পরিত্তেপি চাতি অৰসিট্ঠে অপ্পকেপি চ। সংকড্ঢিত্ৰানাতি তস্মিং তস্মিং ঠানে ঠিতং সংহরিত্ৰা। একতো পন মদ্দিত্ৰা ভুঞ্জতো অনাপত্তীতি যোজনা।
1909.Sesake parittepi cāti avasiṭṭhe appakepi ca. Saṃkaḍḍhitvānāti tasmiṃ tasmiṃ ṭhāne ṭhitaṃ saṃharitvā. Ekato pana madditvā bhuñjato anāpattīti yojanā.
পঞ্চমং।
Pañcamaṃ.
১৯১০. ভিয্যোকম্যতাহেতূতি পুন গণ্হিতুকামতাহেতু। সূপং ৰাতি মুগ্গাদিসূপং ৰা। ব্যঞ্জনং ৰাতি উত্তরিভঙ্গং ৰা।
1910.Bhiyyokamyatāhetūti puna gaṇhitukāmatāhetu. Sūpaṃ vāti muggādisūpaṃ vā. Byañjanaṃ vāti uttaribhaṅgaṃ vā.
ছট্ঠং।
Chaṭṭhaṃ.
১৯১১. ৰিঞ্ঞত্তিযন্তি সূপোদনৰিঞ্ঞত্তিযং। ‘‘ঞাতকানং ৰা পৰারিতানং ৰা অঞ্ঞস্স অত্থায ৰা অত্তনো ধনেন ৰা’’তি ইদং অনাপত্তিযং অধিকং। গিলানোপি হুত্ৰা পরেসং পত্তং উজ্ঝানসঞ্ঞায ওলোকেন্তস্স আপত্তি হোতীতি আহ ‘‘উজ্ঝানে গিলানোপি ন মুচ্চতী’’তি। উজ্ঝানেতি নিমিত্তত্থে ভুম্মং।
1911.Viññattiyanti sūpodanaviññattiyaṃ. ‘‘Ñātakānaṃ vā pavāritānaṃ vā aññassa atthāya vā attano dhanena vā’’ti idaṃ anāpattiyaṃ adhikaṃ. Gilānopi hutvā paresaṃ pattaṃ ujjhānasaññāya olokentassa āpatti hotīti āha ‘‘ujjhāne gilānopi na muccatī’’ti. Ujjhāneti nimittatthe bhummaṃ.
১৯১২. দস্সামীতি ইমস্স ভত্তং ওলোকেত্ৰা ‘‘যং তত্থ নত্থি, তং দস্সামী’’তি ৰা ‘‘দাপেস্সামী’’তি ৰা। অৰমঞ্ঞিত্ৰা উজ্ঝাযনচিত্তং উজ্ঝানং, উজ্ঝানে সঞ্ঞা উজ্ঝানসঞ্ঞা, সা অস্স অত্থীতি ৰিগ্গহো। নউজ্ঝানসঞ্ঞিনো চ অনাপত্তীতি ঞাতব্বন্তি যোজনা।
1912.Dassāmīti imassa bhattaṃ oloketvā ‘‘yaṃ tattha natthi, taṃ dassāmī’’ti vā ‘‘dāpessāmī’’ti vā. Avamaññitvā ujjhāyanacittaṃ ujjhānaṃ, ujjhāne saññā ujjhānasaññā, sā assa atthīti viggaho. Naujjhānasaññino ca anāpattīti ñātabbanti yojanā.
সত্তমট্ঠমানি।
Sattamaṭṭhamāni.
১৯১৩. ‘‘তেসং মজ্ঝপ্পমাণেনা’’তি ইমিনা অসারুপ্পৰসেন খুদ্দকপটিক্খেপো কতোতি ৰেদিতব্বো। ‘‘নাতিমহন্ত’’ন্তি চ অতিমহন্তস্সেৰ পটিক্খিত্তত্তা খুদ্দকে আপত্তি ন দিস্সতীতি। কবল়োতি আলোপো।
1913.‘‘Tesaṃ majjhappamāṇenā’’ti iminā asāruppavasena khuddakapaṭikkhepo katoti veditabbo. ‘‘Nātimahanta’’nti ca atimahantasseva paṭikkhittattā khuddake āpatti na dissatīti. Kabaḷoti ālopo.
১৯১৪. মূলখাদনীযাদিকে সব্বত্থ খজ্জকে পনাতি যোজনা। ফলাফলেতি খুদ্দকে, মহন্তে চ ফলে।
1914. Mūlakhādanīyādike sabbattha khajjake panāti yojanā. Phalāphaleti khuddake, mahante ca phale.
নৰমং।
Navamaṃ.
১৯১৫. দসমে নত্থি কিঞ্চি ৰত্তব্বং।
1915. Dasame natthi kiñci vattabbaṃ.
দসমং।
Dasamaṃ.
চতুত্থো ৰগ্গো।
Catuttho vaggo.
১৯১৬. ‘‘অনাহটে’’তি এতস্স অত্থপদং ‘‘মুখদ্ৰারং অপ্পত্তে’’তি। যথাহ ‘‘অনাহটেতি অনাহরিতে, মুখদ্ৰারং অসম্পাপিতেতি অত্থো’’তি (পাচি॰ অট্ঠ॰ ৬১৭)। ‘‘মুখদ্ৰারং ৰিৰরন্তস্সা’’তি এত্তকে ৰুত্তে মুখদ্ৰার-সদ্দস্স সম্বন্ধিসদ্দত্তা কস্সাতি অপেক্খায ‘‘মুখদ্ৰারং ৰিৰরিস্সামী’’তি অত্তনোপদেকৰচনেন ব্যঞ্জিতমেৰত্থং পকাসেতুং অত্তনো-গহণং কতন্তি ৰেদিতব্বং। চ-সদ্দো এৰকারত্থো, অপ্পত্তে ৰাতি যোজেতব্বো, অসম্পত্তেযেৰাতি অত্থো।
1916.‘‘Anāhaṭe’’ti etassa atthapadaṃ ‘‘mukhadvāraṃ appatte’’ti. Yathāha ‘‘anāhaṭeti anāharite, mukhadvāraṃ asampāpiteti attho’’ti (pāci. aṭṭha. 617). ‘‘Mukhadvāraṃ vivarantassā’’ti ettake vutte mukhadvāra-saddassa sambandhisaddattā kassāti apekkhāya ‘‘mukhadvāraṃ vivarissāmī’’ti attanopadekavacanena byañjitamevatthaṃ pakāsetuṃ attano-gahaṇaṃ katanti veditabbaṃ. Ca-saddo evakārattho, appatte vāti yojetabbo, asampatteyevāti attho.
পঠমং।
Paṭhamaṃ.
১৯১৭. সকলং হত্থন্তি এত্থ হত্থ-সদ্দো তদেকদেসেসু অঙ্গুলীসু দট্ঠব্বো। ‘‘হত্থমুদ্দা’’তিআদীসু ৰিয সমুদাযে পৰত্তৰোহারস্স অৰযৰেপি পৰত্তনতো একঙ্গুলিম্পি মুখে পক্খিপিতুং ন ৰট্টতি।
1917.Sakalaṃhatthanti ettha hattha-saddo tadekadesesu aṅgulīsu daṭṭhabbo. ‘‘Hatthamuddā’’tiādīsu viya samudāye pavattavohārassa avayavepi pavattanato ekaṅgulimpi mukhe pakkhipituṃ na vaṭṭati.
১৯১৮. অস্সাতি ভিক্খুনো। ব্যাহরন্তস্সাতি কথেন্তস্স।
1918.Assāti bhikkhuno. Byāharantassāti kathentassa.
দুতিযততিযানি।
Dutiyatatiyāni.
১৯২০. পিণ্ডুক্খেপকন্তি পিণ্ডং উক্খিপিত্ৰা উক্খিপিত্ৰা। ইধাপি খজ্জকফলাফলেসু অনাপত্তি। কবল়চ্ছেদকম্পি ৰাতি কবল়ং ছিন্দিত্ৰা। ইধ খজ্জকফলাফলেহি সদ্ধিং উত্তরিভঙ্গেপি অনাপত্তি। গণ্ডে কত্ৰাতি এত্থ ফলাফলমত্তেযেৰ অনাপত্তি।
1920.Piṇḍukkhepakanti piṇḍaṃ ukkhipitvā ukkhipitvā. Idhāpi khajjakaphalāphalesu anāpatti. Kabaḷacchedakampi vāti kabaḷaṃ chinditvā. Idha khajjakaphalāphalehi saddhiṃ uttaribhaṅgepi anāpatti. Gaṇḍe katvāti ettha phalāphalamatteyeva anāpatti.
চতুত্থপঞ্চমছট্ঠানি।
Catutthapañcamachaṭṭhāni.
১৯২১-২. হত্থং নিদ্ধুনিত্ৰানাতি হত্থং নিদ্ধুনিত্ৰা ভত্তং ভুঞ্জতোতি চ সম্বন্ধো। সিত্থাৰকারকন্তি সিত্থানি অৰকিরিত্ৰা অৰকিরিত্ৰা। জিৰ্হানিচ্ছারকং ৰাপীতি জিৰ্হং নিচ্ছারেত্ৰা নিচ্ছারেত্ৰা। চপু চপূতি ৰাতি ‘‘চপু চপূ’’তি এৰং সদ্দং কত্ৰা। সত্তমেতি ‘‘ন হত্থনিদ্ধুনক’’ন্তি সিক্খাপদে। অট্ঠমেতি ‘‘ন সিত্থাৰকারক’’ন্তি সিক্খাপদে। কচৰরুজ্ঝনেতি কচৰরাপনযনে।
1921-2.Hatthaṃ niddhunitvānāti hatthaṃ niddhunitvā bhattaṃ bhuñjatoti ca sambandho. Sitthāvakārakanti sitthāni avakiritvā avakiritvā. Jivhānicchārakaṃ vāpīti jivhaṃ nicchāretvā nicchāretvā. Capu capūti vāti ‘‘capu capū’’ti evaṃ saddaṃ katvā. Sattameti ‘‘na hatthaniddhunaka’’nti sikkhāpade. Aṭṭhameti ‘‘na sitthāvakāraka’’nti sikkhāpade. Kacavarujjhaneti kacavarāpanayane.
সত্তমট্ঠমনৰমদসমানি।
Sattamaṭṭhamanavamadasamāni.
পঞ্চমো ৰগ্গো।
Pañcamo vaggo.
১৯২৩. ‘‘সুরু সুরূ’’তি এৰং সদ্দং কত্ৰা ন ভোত্তব্বন্তি যোজনা। হত্থনিল্লেহকং ৰাপীতি হত্থং নিল্লেহিত্ৰা নিল্লেহিত্ৰা।
1923. ‘‘Suru surū’’ti evaṃ saddaṃ katvā na bhottabbanti yojanā. Hatthanillehakaṃ vāpīti hatthaṃ nillehitvā nillehitvā.
১৯২৪. ফাণিতং , ঘনযাগুং ৰা অঙ্গুলীহি গহেত্ৰা অঙ্গুলিযো মুখে পৰেসেত্ৰাপি তং ভোত্তুং ৰট্টতীতি যোজনা।
1924. Phāṇitaṃ , ghanayāguṃ vā aṅgulīhi gahetvā aṅguliyo mukhe pavesetvāpi taṃ bhottuṃ vaṭṭatīti yojanā.
১৯২৫. একায অঙ্গুলিকাযপি পত্তো ন লেহিতব্বোৰ। জিৰ্হায একওট্ঠোপি ন নিল্লেহিতব্বকোতি যোজনা। বহি ওট্ঠঞ্চ জিৰ্হায ন লেহিতব্বং। ওট্ঠে লগ্গং সিত্থাদিং যং কিঞ্চি উভোহি ওট্ঠমংসেহিযেৰ গহেত্ৰা অন্তো কাতুং ৰট্টতি।
1925. Ekāya aṅgulikāyapi patto na lehitabbova. Jivhāya ekaoṭṭhopi na nillehitabbakoti yojanā. Bahi oṭṭhañca jivhāya na lehitabbaṃ. Oṭṭhe laggaṃ sitthādiṃ yaṃ kiñci ubhohi oṭṭhamaṃsehiyeva gahetvā anto kātuṃ vaṭṭati.
পঠমদুতিযততিযচতুত্থানি।
Paṭhamadutiyatatiyacatutthāni.
১৯২৬-৮. ন চ গহেতব্বং, পটিক্কূলৰসেন পটিক্খিত্তন্তি যোজনা। হি-ইতি ‘‘যস্মা’’তি এতস্স অত্থে, তেনেৰ ৰক্খতি ‘‘তস্মা’’তি। ‘‘পানীযথালক’’ন্তি ইদং উপলক্খণমত্তং সঙ্খাদীনম্পি তথা নগহেতব্বত্তা। সরাৰং ৰাতি তট্টকং ৰা।
1926-8.Na ca gahetabbaṃ, paṭikkūlavasena paṭikkhittanti yojanā. Hi-iti ‘‘yasmā’’ti etassa atthe, teneva vakkhati ‘‘tasmā’’ti. ‘‘Pānīyathālaka’’nti idaṃ upalakkhaṇamattaṃ saṅkhādīnampi tathā nagahetabbattā. Sarāvaṃ vāti taṭṭakaṃ vā.
অনামিসেন হত্থেনাতি আমিসরহিতেন হত্থেকদেসেন। যথাহ ‘‘সচে পন হত্থস্স
Anāmisena hatthenāti āmisarahitena hatthekadesena. Yathāha ‘‘sace pana hatthassa
একদেসো আমিসমক্খিতো ন হোতি, তেন পদেসেন গহেতুং ৰট্টতী’’তি (পাচি॰ অট্ঠ॰ ৬৩১)। আমিসমক্খিতেনেৰ হত্থেন ‘‘ধোৰিস্সামী’’তি ৰা ‘‘ধোৰাপেস্সামী’’তি ৰা গণ্হন্তস্স পন অনাপত্তি।
Ekadeso āmisamakkhito na hoti, tena padesena gahetuṃ vaṭṭatī’’ti (pāci. aṭṭha. 631). Āmisamakkhiteneva hatthena ‘‘dhovissāmī’’ti vā ‘‘dhovāpessāmī’’ti vā gaṇhantassa pana anāpatti.
পঞ্চমং।
Pañcamaṃ.
১৯২৯. উদ্ধরিত্ৰাতি সসিত্থকা পত্তধোৰনা সিত্থকানি উদ্ধরিত্ৰা তং পত্তধোৰনোদকং ঘরা বহি অন্তরঘরে ছড্ডেন্তস্স অনাপত্তি। ভিন্দিত্ৰাতি সসিত্থকে পত্তধোৰনে সিত্থকানি মদ্দিত্ৰা উদকেন সম্ভিন্দিত্ৰা উদকগতিকানেৰ কত্ৰা তং উদকং ঘরা বহি অন্তরঘরে ছড্ডেন্তস্স অনাপত্তি। গহেত্ৰাতি সসিত্থকং পত্তধোৰনোদকং গহেত্ৰা পটিগ্গহে ছড্ডেন্তস্স অনাপত্তি। সসিত্থকং পত্তধোৰনোদকং ঘরা বহি নীহরিত্ৰা অন্তরঘরে ছড্ডেন্তস্স অনাপত্তীতি অজ্ঝাহারযোজনা ৰেদিতব্বা। এত্থ পটিগ্গহো নাম খেল়মল্লাদিকো উচ্ছিট্ঠহত্থধোৰনভাজনৰিসেসো।
1929.Uddharitvāti sasitthakā pattadhovanā sitthakāni uddharitvā taṃ pattadhovanodakaṃ gharā bahi antaraghare chaḍḍentassa anāpatti. Bhinditvāti sasitthake pattadhovane sitthakāni madditvā udakena sambhinditvā udakagatikāneva katvā taṃ udakaṃ gharā bahi antaraghare chaḍḍentassa anāpatti. Gahetvāti sasitthakaṃ pattadhovanodakaṃ gahetvā paṭiggahe chaḍḍentassa anāpatti. Sasitthakaṃ pattadhovanodakaṃ gharā bahi nīharitvā antaraghare chaḍḍentassa anāpattīti ajjhāhārayojanā veditabbā. Ettha paṭiggaho nāma kheḷamallādiko ucchiṭṭhahatthadhovanabhājanaviseso.
ছট্ঠং।
Chaṭṭhaṃ.
১৯৩০. ছত্তং যং কিঞ্চীতি ‘‘ছত্তং নাম তীণি ছত্তানি সেতচ্ছত্তং কিলঞ্জচ্ছত্তং পণ্ণচ্ছত্তং মণ্ডলবদ্ধং সলাকবদ্ধ’’ন্তি (পাচি॰ ৬৩৪) ৰুত্তেসু তীসু ছত্তেসু অঞ্ঞতরং। এত্থ চ সেতচ্ছত্তন্তি ৰত্থপলিগুণ্ঠিতং পণ্ডরচ্ছত্তং। কিলঞ্জচ্ছত্তন্তি ৰিলীৰচ্ছত্তং। পণ্ণচ্ছত্তন্তি তালপণ্ণাদীহি যেহি কেহিচি কতং। ‘‘মণ্ডলবদ্ধং সলাকবদ্ধ’’ন্তি ইদং পন তিণ্ণম্পি ছত্তানং পঞ্জরদস্সনত্থং ৰুত্তং। তানি হি মণ্ডলবদ্ধানি চেৰ হোন্তি সলাকবদ্ধানি চ। ‘‘যং কিঞ্চী’’তি অনৰসেসপরিগ্গহৰচনেন ‘‘যম্পি চ তত্থজাতদণ্ডেন কতং একপণ্ণচ্ছত্তং হোতি, তম্পি ছত্তমেৰা’’তি (পাচি॰ অট্ঠ॰ ৬৩৪) অট্ঠকথায ৰুত্তং ছত্তৰিসেসং গণ্হাতি। হত্থেনাতি এত্থ ‘‘অমুঞ্চিত্ৰা’’তি সেসো। সরীরাৰযৰেনাতি এত্থ ‘‘গহেত্ৰা’’তি সেসো। ৰা-সদ্দো অপি-সদ্দত্থো। অংসকূটাদিসরীরাৰযৰেন গহেত্ৰাপি হত্থেন অমুঞ্চিত্ৰা ধারেন্তস্সাতি অত্থো।
1930.Chattaṃ yaṃ kiñcīti ‘‘chattaṃ nāma tīṇi chattāni setacchattaṃ kilañjacchattaṃ paṇṇacchattaṃ maṇḍalabaddhaṃ salākabaddha’’nti (pāci. 634) vuttesu tīsu chattesu aññataraṃ. Ettha ca setacchattanti vatthapaliguṇṭhitaṃ paṇḍaracchattaṃ. Kilañjacchattanti vilīvacchattaṃ. Paṇṇacchattanti tālapaṇṇādīhi yehi kehici kataṃ. ‘‘Maṇḍalabaddhaṃ salākabaddha’’nti idaṃ pana tiṇṇampi chattānaṃ pañjaradassanatthaṃ vuttaṃ. Tāni hi maṇḍalabaddhāni ceva honti salākabaddhāni ca. ‘‘Yaṃ kiñcī’’ti anavasesapariggahavacanena ‘‘yampi ca tatthajātadaṇḍena kataṃ ekapaṇṇacchattaṃ hoti, tampi chattamevā’’ti (pāci. aṭṭha. 634) aṭṭhakathāya vuttaṃ chattavisesaṃ gaṇhāti. Hatthenāti ettha ‘‘amuñcitvā’’ti seso. Sarīrāvayavenāti ettha ‘‘gahetvā’’ti seso. Vā-saddo api-saddattho. Aṃsakūṭādisarīrāvayavena gahetvāpi hatthena amuñcitvā dhārentassāti attho.
সচে পনস্স অঞ্ঞো ছত্তং ধারেতি, ছত্তপাদুকায ৰা ঠিতং হোতি, পস্সে ৰা ঠিতং হোতি,
Sace panassa añño chattaṃ dhāreti, chattapādukāya vā ṭhitaṃ hoti, passe vā ṭhitaṃ hoti,
হত্থতো অপগতমত্তে ছত্তপাণি নাম ন হোতি, তস্স ধম্মং দেসেতুং ৰট্টতি। ‘‘ন ছত্তপাণিস্স অগিলানস্সা’’তি ৰচনতো, ইধ ‘‘সব্বত্থ অগিলানস্সা’’তি ৰক্খমানত্তা চ এত্থ ‘‘অগিলানস্সা’’তি লব্ভতি। ধম্মপরিচ্ছেদো চেত্থ পদসোধম্মে ৰুত্তনযেনেৰ ৰেদিতব্বো। এৰমুপরিপি।
Hatthato apagatamatte chattapāṇi nāma na hoti, tassa dhammaṃ desetuṃ vaṭṭati. ‘‘Na chattapāṇissa agilānassā’’ti vacanato, idha ‘‘sabbattha agilānassā’’ti vakkhamānattā ca ettha ‘‘agilānassā’’ti labbhati. Dhammaparicchedo cettha padasodhamme vuttanayeneva veditabbo. Evamuparipi.
সত্তমং।
Sattamaṃ.
১৯৩১. দণ্ডপাণিম্হীতি এত্থ দণ্ডো পাণিম্হি অস্সাতি ৰিগ্গহো। কিত্তকপ্পমাণো দণ্ডোতি আহ ‘‘চতুহত্থপ্পমাণো’’তিআদি। মজ্ঝিমহত্থতোতি পমাণমজ্ঝিমস্স পুরিসস্স হত্থতো, যো ‘‘ৰড্ঢকিহত্থো’’তি ৰুচ্চতি।
1931.Daṇḍapāṇimhīti ettha daṇḍo pāṇimhi assāti viggaho. Kittakappamāṇo daṇḍoti āha ‘‘catuhatthappamāṇo’’tiādi. Majjhimahatthatoti pamāṇamajjhimassa purisassa hatthato, yo ‘‘vaḍḍhakihattho’’ti vuccati.
অট্ঠমং।
Aṭṭhamaṃ.
১৯৩২. সত্থপাণিস্সাতি এত্থাপি ৰিগ্গহো ৰুত্তনযোৰ। ৰক্খমানং সকলং ধনুৰিকতিং, সরৰিকতিঞ্চ ঠপেত্ৰা অৰসেসং খগ্গাদি সত্থং নাম। খগ্গং সন্নহিত্ৰা ঠিতোপি সত্থপাণি নু খোতি আসঙ্কায নিৰত্তনত্থমাহ ‘‘সত্থপাণী’’তিআদি। ‘‘ন হোতি অসি’’ন্তি পদচ্ছেদো।
1932.Satthapāṇissāti etthāpi viggaho vuttanayova. Vakkhamānaṃ sakalaṃ dhanuvikatiṃ, saravikatiñca ṭhapetvā avasesaṃ khaggādi satthaṃ nāma. Khaggaṃ sannahitvā ṭhitopi satthapāṇi nu khoti āsaṅkāya nivattanatthamāha ‘‘satthapāṇī’’tiādi. ‘‘Na hoti asi’’nti padacchedo.
নৰমং।
Navamaṃ.
১৯৩৩-৫. সরেন সদ্ধিং ধনুং ৰা সুদ্ধধনুং ৰা সুদ্ধসরং ৰা সজিযং ধনুদণ্ডং ৰা নিজিযং ধনুদণ্ডং ৰা গহেত্ৰা ঠিতস্সাপি ৰা নিসিন্নস্সাপি ৰা নিপন্নস্সাপি ৰা সচে যো তথা পদসোধম্মে ৰুত্তলক্খণং সদ্ধম্মং দেসেতি, তস্স আপত্তি দুক্কটং হোতীতি যোজনা। সচে পনস্স ধনু খন্ধে পটিমুক্কং হোতি, যাৰ ন গণ্হাতি, তাৰ ৰট্টতি। জিযায সহ ৰত্ততীতি সজিযং।
1933-5. Sarena saddhiṃ dhanuṃ vā suddhadhanuṃ vā suddhasaraṃ vā sajiyaṃ dhanudaṇḍaṃ vā nijiyaṃ dhanudaṇḍaṃ vā gahetvā ṭhitassāpi vā nisinnassāpi vā nipannassāpi vā sace yo tathā padasodhamme vuttalakkhaṇaṃ saddhammaṃ deseti, tassa āpatti dukkaṭaṃ hotīti yojanā. Sace panassa dhanu khandhe paṭimukkaṃ hoti, yāva na gaṇhāti, tāva vaṭṭati. Jiyāya saha vattatīti sajiyaṃ.
দসমং।
Dasamaṃ.
ছট্ঠো ৰগ্গো।
Chaṭṭho vaggo.
১৯৩৬. পাদুকারুল়্হকস্সাতি পাদুকং আরুল়্হো পাদুকারুল়্হো, সোযেৰ পাদুকারুল়্হকো, তস্স। কথং আরুল়্হস্সাতি আহ ‘‘অক্কমিত্ৰা’’তিআদি। অক্কমিত্ৰা ঠিতস্সাতি ছত্তদণ্ডকে অঙ্গুলন্তরং অপ্পৰেসেত্ৰা কেৰলং পাদুকং অক্কমিত্ৰা ঠিতস্স। পটিমুক্কস্স ৰাতি পটিমুঞ্চিত্ৰা ঠিতস্স। এতং দ্ৰযম্পি ‘‘পাদুকারুল়্হকস্সা’’তি এতস্স অত্থপদং। যথাহ ‘‘ন পাদুকারুল়্হস্স অগিলানস্স ধম্মো দেসেতব্বো। যো অনাদরিযং পটিচ্চ অক্কন্তস্স ৰা পটিমুক্কস্স ৰা ওমুক্কস্স ৰা অগিলানস্স ধম্মং দেসেতি, আপত্তি দুক্কটস্সা’’তি (পাচি॰ ৬৩৮)।
1936.Pādukāruḷhakassāti pādukaṃ āruḷho pādukāruḷho, soyeva pādukāruḷhako, tassa. Kathaṃ āruḷhassāti āha ‘‘akkamitvā’’tiādi. Akkamitvā ṭhitassāti chattadaṇḍake aṅgulantaraṃ appavesetvā kevalaṃ pādukaṃ akkamitvā ṭhitassa. Paṭimukkassa vāti paṭimuñcitvā ṭhitassa. Etaṃ dvayampi ‘‘pādukāruḷhakassā’’ti etassa atthapadaṃ. Yathāha ‘‘na pādukāruḷhassa agilānassa dhammo desetabbo. Yo anādariyaṃ paṭicca akkantassa vā paṭimukkassa vā omukkassa vā agilānassa dhammaṃ deseti, āpatti dukkaṭassā’’ti (pāci. 638).
পঠমং।
Paṭhamaṃ.
১৯৩৭-৪০. উপাহনগতস্সাপীতি অক্কন্তাদিআকারেন উপাহনারুল়্হস্স চ। যথাহ ‘‘অক্কন্তস্স ৰা পটিমুক্কস্স ৰা’’তি। সব্বত্থাতি ছত্তপাণিআদীসু সব্বসিক্খাপদেসু। অগিলানস্সাতি ইদং যোজেতব্বন্তি সেসো। যানে ৰা গতস্স অগিলানস্স ধম্মং দেসেতি, দুক্কটন্তি যোজনা। তত্থ যানে ৰা গতস্সাতি সচে দ্ৰীহি জনেহি হত্থসঙ্ঘাতেন গহিতো, সাটকে ৰা ঠপেত্ৰা ৰংসেন ৰয্হতি, অযুত্তে ৰা ৰয্হাদিকে যানে, ৰিসঙ্খরিত্ৰা ৰা ঠপিতে চক্কমত্তেপি নিসিন্নো হোতি, যানগতোত্ৰেৰ সঙ্খ্যং গচ্ছতি।
1937-40.Upāhanagatassāpīti akkantādiākārena upāhanāruḷhassa ca. Yathāha ‘‘akkantassa vā paṭimukkassa vā’’ti. Sabbatthāti chattapāṇiādīsu sabbasikkhāpadesu. Agilānassāti idaṃ yojetabbanti seso. Yāne vā gatassa agilānassa dhammaṃ deseti, dukkaṭanti yojanā. Tattha yāne vā gatassāti sace dvīhi janehi hatthasaṅghātena gahito, sāṭake vā ṭhapetvā vaṃsena vayhati, ayutte vā vayhādike yāne, visaṅkharitvā vā ṭhapite cakkamattepi nisinno hoti, yānagatotveva saṅkhyaṃ gacchati.
সযনেপি ৰা অন্তমসো কটসারকে ৰা ছমায ৰা নিপন্নস্সাপি অগিলানস্সাতি যোজনা। যথাহ ‘‘সযনগতস্সাতি অন্তমসো কটসারকেপি পকতিভূমিযম্পি নিপন্নস্সা’’তি (পাচি॰ অট্ঠ॰ ৬৪১)। উচ্চে পীঠে ৰা উচ্চে মঞ্চেপি ৰা নিসিন্নেন, ঠিতেন ৰা নিপন্নস্স দেসেতুং ন ৰট্টতীতি যোজনা। ‘‘ঠত্ৰা’’তি ইমিনা ‘‘নিসীদিত্ৰা’’তি ইদঞ্চ সঙ্গহিতমেৰ। সযনেসু গতস্স চ দেসেন্তেন সযনেসু গতেনাপি সমানে ৰাপি উচ্চে ৰা নিপন্নেনেৰ ৰট্টতীতি যোজনা।
Sayanepi vā antamaso kaṭasārake vā chamāya vā nipannassāpi agilānassāti yojanā. Yathāha ‘‘sayanagatassāti antamaso kaṭasārakepi pakatibhūmiyampi nipannassā’’ti (pāci. aṭṭha. 641). Ucce pīṭhe vā ucce mañcepi vā nisinnena, ṭhitena vā nipannassa desetuṃ na vaṭṭatīti yojanā. ‘‘Ṭhatvā’’ti iminā ‘‘nisīditvā’’ti idañca saṅgahitameva. Sayanesu gatassa ca desentena sayanesu gatenāpi samāne vāpi ucce vā nipanneneva vaṭṭatīti yojanā.
১৯৪১. ‘‘তথেৰ চা’’তি ইমিনা ‘‘ৰট্টতী’’তি ইদং গহিতং।
1941.‘‘Tathevacā’’ti iminā ‘‘vaṭṭatī’’ti idaṃ gahitaṃ.
দুতিযততিযচতুত্থানি।
Dutiyatatiyacatutthāni.
১৯৪২. ‘‘পল্লত্থিকায নিসিন্নস্সা’’তি ৰত্তব্বে গাথাবন্ধৰসেন যকারস্স লোপং কত্ৰা ‘‘পল্লত্থিকা নিসিন্নস্সা’’তি ৰুত্তং, আযোগপল্লত্থিকায ৰা হত্থপল্লত্থিকায ৰা দুস্সপল্লত্থিকায ৰা যায কাযচি পল্লত্থিকায নিসিন্নস্সাতি অত্থো। ৰেঠিতসীসস্সাতি দুস্সৰেঠনেন ৰা মোলিআদীহি ৰা যথা কেসন্তো ন দিস্সতি, এৰং ৰেঠিতসীসস্স।
1942. ‘‘Pallatthikāya nisinnassā’’ti vattabbe gāthābandhavasena yakārassa lopaṃ katvā ‘‘pallatthikā nisinnassā’’ti vuttaṃ, āyogapallatthikāya vā hatthapallatthikāya vā dussapallatthikāya vā yāya kāyaci pallatthikāya nisinnassāti attho. Veṭhitasīsassāti dussaveṭhanena vā moliādīhi vā yathā kesanto na dissati, evaṃ veṭhitasīsassa.
১৯৪৩. যদি কেসন্তং ৰিৰরাপেত্ৰা দেসেতি, ৰট্টতীতি যোজনা। ‘‘অযমেৰ ৰিনিচ্ছযো’’তি ইমিনা ‘‘সীসং ৰিৰরাপেত্ৰা দেসেতি, ৰট্টতী’’তি অনাপত্তিৰারোপি ৰুত্তো হোতি।
1943. Yadi kesantaṃ vivarāpetvā deseti, vaṭṭatīti yojanā. ‘‘Ayameva vinicchayo’’ti iminā ‘‘sīsaṃ vivarāpetvā deseti, vaṭṭatī’’ti anāpattivāropi vutto hoti.
পঞ্চমছট্ঠসত্তমানি।
Pañcamachaṭṭhasattamāni.
১৯৪৪-৫. অট্ঠমে ‘‘আসনে নিসিন্নস্সাতি অন্তমসো ৰত্থম্পি তিণানিপি সন্থরিত্ৰা নিসিন্নস্সা’’তি (পাচি॰ অট্ঠ॰ ৬৪৫) ইদঞ্চ নৰমে ‘‘উচ্চে আসনেতি অন্তমসো ভূমিপ্পদেসেপি উন্নতে ঠানে নিসিন্নস্স দেসেতুং ন ৰট্টতী’’তি (পাচি॰ অট্ঠ॰ ৬৪৭) ইদঞ্চ দসমে ‘‘সচেপী’’তিআদিনা ৰক্খমানৰিনিচ্ছযঞ্চ ঠপেত্ৰা ৰত্তব্বৰিসেসাভাৰা আহ ‘‘অট্ঠমে নৰমে ৰাপি, দসমে নত্থি কিঞ্চিপী’’তি। এত্থ ‘‘ৰত্তব্ব’’ন্তি সেসো। থেরুপট্ঠানং গন্ত্ৰান ঠিতং দহরং আসনে নিসিন্নো থেরো চে পঞ্হং পুচ্ছতীতি অজ্ঝাহারযোজনা। কথেতব্বমুপাযং দস্সেতুমাহ ‘‘তস্স পস্সে পনঞ্ঞস্স, কথেতব্বং ৰিজানতা’’তি। এত্থ ‘‘ঠিতস্সা’’তি সেসো । তস্স সমীপৰত্তিনো কস্সচি অভাৰে সজ্ঝাযং অধিট্ঠহিত্ৰাপি ৰত্তুং ৰট্টতি।
1944-5. Aṭṭhame ‘‘āsane nisinnassāti antamaso vatthampi tiṇānipi santharitvā nisinnassā’’ti (pāci. aṭṭha. 645) idañca navame ‘‘ucce āsaneti antamaso bhūmippadesepi unnate ṭhāne nisinnassa desetuṃ na vaṭṭatī’’ti (pāci. aṭṭha. 647) idañca dasame ‘‘sacepī’’tiādinā vakkhamānavinicchayañca ṭhapetvā vattabbavisesābhāvā āha ‘‘aṭṭhame navamevāpi, dasame natthi kiñcipī’’ti. Ettha ‘‘vattabba’’nti seso. Therupaṭṭhānaṃ gantvāna ṭhitaṃ daharaṃ āsane nisinno thero ce pañhaṃ pucchatīti ajjhāhārayojanā. Kathetabbamupāyaṃ dassetumāha ‘‘tassa passe panaññassa, kathetabbaṃ vijānatā’’ti. Ettha ‘‘ṭhitassā’’ti seso . Tassa samīpavattino kassaci abhāve sajjhāyaṃ adhiṭṭhahitvāpi vattuṃ vaṭṭati.
অট্ঠমনৰমদসমানি।
Aṭṭhamanavamadasamāni.
সত্তমো ৰগ্গো।
Sattamo vaggo.
১৯৪৬. গচ্ছতো পুরতোতি এত্থ ‘‘পচ্ছতো গচ্ছন্তেনা’’তি সেসো। পচ্ছতো গচ্ছন্তেন পুরতো গচ্ছতো পঞ্হং ন ৰত্তব্বন্তি যোজনা। সচে পুরতো গচ্ছন্তো পঞ্হং পুচ্ছতি, কিং কাতব্বন্তি আহ ‘‘পচ্ছিমস্সা’’তিআদি।
1946.Gacchato puratoti ettha ‘‘pacchato gacchantenā’’ti seso. Pacchato gacchantena purato gacchato pañhaṃ na vattabbanti yojanā. Sace purato gacchanto pañhaṃ pucchati, kiṃ kātabbanti āha ‘‘pacchimassā’’tiādi.
১৯৪৭. উগ্গহিতং ধম্মং পুরতো গচ্ছন্তেন সদ্ধিং পচ্ছতো গচ্ছন্তো সজ্ঝাযতি, ৰট্টতীতি যোজনা। সমমেৰ গচ্ছতো যুগগ্গাহং কথেতুং ৰট্টতীতি যোজনা। যুগগ্গাহন্তি অঞ্ঞমঞ্ঞং। অঞ্ঞমঞ্ঞ-সদ্দপরিযাযো হি যুগগ্গাহ-সদ্দো।
1947. Uggahitaṃ dhammaṃ purato gacchantena saddhiṃ pacchato gacchanto sajjhāyati, vaṭṭatīti yojanā. Samameva gacchato yugaggāhaṃ kathetuṃ vaṭṭatīti yojanā. Yugaggāhanti aññamaññaṃ. Aññamañña-saddapariyāyo hi yugaggāha-saddo.
পঠমং।
Paṭhamaṃ.
১৯৪৮. সকটমগ্গে একেকস্স চক্কস্স পথেন গচ্ছন্তো একেকস্স চক্কস্স পথেন সমং গচ্ছতো ধম্মং দেসেতুং ৰট্টতি। উপ্পথেনাপি গচ্ছন্তো উপ্পথেন সমং গচ্ছন্তস্স ধম্মং দেসেতুং ৰট্টতীতি অজ্ঝাহারযোজনা। উপ্পথেনাতি অমগ্গেন। এৰং অনাপত্তিৰিসযে দস্সিতে তব্বিপরিযাযতো আপত্তিৰিসযো দস্সিতোযেৰাতি ৰেদিতব্বো।
1948. Sakaṭamagge ekekassa cakkassa pathena gacchanto ekekassa cakkassa pathena samaṃ gacchato dhammaṃ desetuṃ vaṭṭati. Uppathenāpi gacchanto uppathena samaṃ gacchantassa dhammaṃ desetuṃ vaṭṭatīti ajjhāhārayojanā. Uppathenāti amaggena. Evaṃ anāpattivisaye dassite tabbipariyāyato āpattivisayo dassitoyevāti veditabbo.
দুতিযং।
Dutiyaṃ.
১৯৪৯. ততিযে নত্থি ৰত্তব্বন্তি ‘‘ন ঠিতো অগিলানো উচ্চারং ৰা পস্সাৰং ৰা করিস্সামী’’তি (পাচি॰ ৬৫১) এতস্স ৰিনিচ্ছযো যথারুতৰসেন সুৰিঞ্ঞেয্যোতি কত্ৰা ৰুত্তং। সচে পটিচ্ছন্নং ঠানং গচ্ছন্তস্স সহসা উচ্চারো ৰা পস্সাৰো ৰা নিক্খমতি, অসঞ্চিচ্চ কতো নাম, অনাপত্তি। অযমেত্থ ৰিসেসো দট্ঠব্বো। সিঙ্ঘাণিকায খেল়েনেৰ সঙ্গহিতত্তেপি বাত্তিংসকোট্ঠাসেসু ৰিসুংযেৰ দস্সিতো একো কোট্ঠাসোতি সিক্খাপদেসু অৰুত্তম্পি সঙ্গহেত্ৰা আহ ‘‘উচ্চারাদিচতুক্ক’’ন্তি।
1949.Tatiye natthi vattabbanti ‘‘na ṭhito agilāno uccāraṃ vā passāvaṃ vā karissāmī’’ti (pāci. 651) etassa vinicchayo yathārutavasena suviññeyyoti katvā vuttaṃ. Sace paṭicchannaṃ ṭhānaṃ gacchantassa sahasā uccāro vā passāvo vā nikkhamati, asañcicca kato nāma, anāpatti. Ayamettha viseso daṭṭhabbo. Siṅghāṇikāya kheḷeneva saṅgahitattepi bāttiṃsakoṭṭhāsesu visuṃyeva dassito eko koṭṭhāsoti sikkhāpadesu avuttampi saṅgahetvā āha ‘‘uccārādicatukka’’nti.
১৯৫০. এত্থ হরিতং নাম ইদন্তি দস্সেতুমাহ ‘‘জীৰরুক্খস্সা’’তিআদি। রুক্খস্সাতি উপলক্খণং জীৰমানকতিণলতাদীনম্পি হরিতেযেৰ সঙ্গহিতত্তা। ‘‘দিস্সমানং গচ্ছতী’’তি ৰচনেনেৰ অদিস্সমানগতং অহরিতন্তি ব্যতিরেকতো ৰিঞ্ঞাযতি। সাখা ৰা ভূমিলগ্গা দিস্সমানা গচ্ছতি, তং সব্বং হরিতমেৰাতি যোজনা।
1950. Ettha haritaṃ nāma idanti dassetumāha ‘‘jīvarukkhassā’’tiādi. Rukkhassāti upalakkhaṇaṃ jīvamānakatiṇalatādīnampi hariteyeva saṅgahitattā. ‘‘Dissamānaṃ gacchatī’’ti vacaneneva adissamānagataṃ aharitanti byatirekato viññāyati. Sākhā vā bhūmilaggā dissamānā gacchati, taṃ sabbaṃ haritamevāti yojanā.
১৯৫১. সহসা ৰচ্চং নিক্খমতেৰাতি সম্বন্ধো। অস্স ভিক্খুনো। ৰচ্চন্তি উপলক্খণং পস্সাৰাদীনম্পি দস্সিতত্তা। ৰট্টতীতি এত্থ ‘‘গিলানট্ঠানে ঠিতত্তা’’তি সেসো।
1951. Sahasā vaccaṃ nikkhamatevāti sambandho. Assa bhikkhuno. Vaccanti upalakkhaṇaṃ passāvādīnampi dassitattā. Vaṭṭatīti ettha ‘‘gilānaṭṭhāne ṭhitattā’’ti seso.
১৯৫২. পলালণ্ডুপকে ৰাপীতি পলালচুম্বটকেপি। এত্থ ‘‘অপ্পহরিতং অলভন্তেনা’’তি সেসো। কিস্মিঞ্চীতি সুক্খতিণাদিম্হি কিস্মিঞ্চি। তং ৰচ্চং পচ্ছা হরিতং ওত্থরতি, ৰট্টতীতি যোজনা।
1952.Palālaṇḍupake vāpīti palālacumbaṭakepi. Ettha ‘‘appaharitaṃ alabhantenā’’ti seso. Kismiñcīti sukkhatiṇādimhi kismiñci. Taṃ vaccaṃ pacchā haritaṃ ottharati, vaṭṭatīti yojanā.
১৯৫৩. এতীতি পৰিসতি। এত্থাতি ইমস্মিং সিক্খাপদে। ‘‘খেল়েন এৰ চা’’তি পদচ্ছেদো।
1953.Etīti pavisati. Etthāti imasmiṃ sikkhāpade. ‘‘Kheḷena eva cā’’ti padacchedo.
ততিযচতুত্থানি।
Tatiyacatutthāni.
১৯৫৪. ৰচ্চকুটিসমুদ্দাদিউদকেসূতি এত্থ আদি-সদ্দেন সব্বং অপরিভোগজলং সঙ্গণ্হাতি। তেনেৰ ‘‘তেসং অপরিভোগত্তা’’তি অপরিভোগত্তমেৰ কারণমাহ।
1954.Vaccakuṭisamuddādiudakesūti ettha ādi-saddena sabbaṃ aparibhogajalaṃ saṅgaṇhāti. Teneva ‘‘tesaṃ aparibhogattā’’ti aparibhogattameva kāraṇamāha.
১৯৫৫. উদকোঘেতি এত্থ ‘‘জাতে’’তি সেসো। অজলন্তি অজলট্ঠানং। জলেতি পরিভোগারহজলে। ইধাপি থলকতো উদকং ওত্থরতি, অনাপত্তি।
1955.Udakogheti ettha ‘‘jāte’’ti seso. Ajalanti ajalaṭṭhānaṃ. Jaleti paribhogārahajale. Idhāpi thalakato udakaṃ ottharati, anāpatti.
পঞ্চমং।
Pañcamaṃ.
অট্ঠমো ৰগ্গো।
Aṭṭhamo vaggo.
১৯৫৬-৭. পকিণ্ণকৰিনিচ্ছযং দস্সেতুমাহ ‘‘সমুট্ঠানাদযো’’তিআদি। ঞেয্যাতি ৰক্খমাননযেন ৰেদিতব্বা। এত্থাতি এতেসু সেখিযেসু। উজ্জগ্ঘিকা আদি যেসন্তি ৰিগ্গহো, তগ্গুণসংৰিঞ্ঞাণোযং বাহিরত্থসমাসো, উজ্জগ্ঘিকাঅপ্পসদ্দপটিসংযুত্তানি চত্তারি সিক্খাপদানীতি অত্থো। ছমা চ নীচাসনঞ্চ ঠানঞ্চ পচ্ছা চ উপ্পথো চ ছমানীচাসনট্ঠানপচ্ছাউপ্পথা, তে সদ্দা এতেসং সিক্খাপদানং অত্থীতি তপ্পটিসংযুত্তানি সিক্খাপদানি ছমা…পে॰… উপ্পথৰা, ছমাদিপদৰন্তানি পঞ্চ সিক্খাপদানীতি অত্থো। এত্থ ঠান-সদ্দেন ঠা-ধাতুস্সেৰ রূপত্তা সিক্খাপদাগতো ঠিত-সদ্দো গহিতো। ‘‘দসসূ’’তি ৰত্তব্বে ৰণ্ণলোপেন, ৰিভত্তিৰিপল্লাসেন ৰা ‘‘দসা’’তি ৰুত্তং। সমনুভাসনে সমুট্ঠানাদীহি এতেসু দসসু সিক্খাপদেসু সমুট্ঠানাদযো তুল্যা ৰুত্তাতি যোজনা।
1956-7. Pakiṇṇakavinicchayaṃ dassetumāha ‘‘samuṭṭhānādayo’’tiādi. Ñeyyāti vakkhamānanayena veditabbā. Etthāti etesu sekhiyesu. Ujjagghikā ādi yesanti viggaho, tagguṇasaṃviññāṇoyaṃ bāhiratthasamāso, ujjagghikāappasaddapaṭisaṃyuttāni cattāri sikkhāpadānīti attho. Chamā ca nīcāsanañca ṭhānañca pacchā ca uppatho ca chamānīcāsanaṭṭhānapacchāuppathā, te saddā etesaṃ sikkhāpadānaṃ atthīti tappaṭisaṃyuttāni sikkhāpadāni chamā…pe… uppathavā, chamādipadavantāni pañca sikkhāpadānīti attho. Ettha ṭhāna-saddena ṭhā-dhātusseva rūpattā sikkhāpadāgato ṭhita-saddo gahito. ‘‘Dasasū’’ti vattabbe vaṇṇalopena, vibhattivipallāsena vā ‘‘dasā’’ti vuttaṃ. Samanubhāsane samuṭṭhānādīhi etesu dasasu sikkhāpadesu samuṭṭhānādayo tulyā vuttāti yojanā.
কিং ৰুত্তং হোতি? ইমানি দস সিক্খাপদানি সমনুভাসনসমুট্ঠানানি, একেকমেত্থ কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি ৰুত্তং হোতি।
Kiṃ vuttaṃ hoti? Imāni dasa sikkhāpadāni samanubhāsanasamuṭṭhānāni, ekekamettha kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti vuttaṃ hoti.
১৯৫৮-৯. ‘‘ছত্ত’’ন্তিআদীনি সিক্খাপদানং উপলক্খণপদানি। এতানি একাদস সিক্খাপদানি সমুট্ঠানাদিনা পন ধম্মদেসনেন তুল্যাৰ সদিসা এৰাতি যোজনা। ইদং ৰুত্তং হোতি – ইমানি একাদস সিক্খাপদানি ধম্মদেসনাসমুট্ঠানানি, কিরিযাকিরিযানি, সঞ্ঞাৰিমোক্খানি, সচিত্তকানি, লোকৰজ্জানি, ৰচীকম্মানি, অকুসলচিত্তানি, দুক্খৰেদনানীতি।
1958-9.‘‘Chatta’’ntiādīni sikkhāpadānaṃ upalakkhaṇapadāni. Etāni ekādasa sikkhāpadāni samuṭṭhānādinā pana dhammadesanena tulyāva sadisā evāti yojanā. Idaṃ vuttaṃ hoti – imāni ekādasa sikkhāpadāni dhammadesanāsamuṭṭhānāni, kiriyākiriyāni, saññāvimokkhāni, sacittakāni, lokavajjāni, vacīkammāni, akusalacittāni, dukkhavedanānīti.
সূপোদনেন ৰিঞ্ঞত্তীতি সূপোদন-সদ্দেন লক্খিতং ৰিঞ্ঞত্তিসিক্খাপদং। ৰিঞ্ঞত্তিসিক্খাপদানং বহুত্তা ইদমেৰ ৰিসেসিতং। থেয্যসত্থসমং মতন্তি সমুট্ঠানাদীহি থেয্যসত্থসিক্খাপদেন সমানং মতন্তি অত্থো। ইদং ৰুত্তং হোতি – সূপোদনৰিঞ্ঞত্তিসিক্খাপদং থেয্যসত্থসমুট্ঠানং, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি।
Sūpodanena viññattīti sūpodana-saddena lakkhitaṃ viññattisikkhāpadaṃ. Viññattisikkhāpadānaṃ bahuttā idameva visesitaṃ. Theyyasatthasamaṃ matanti samuṭṭhānādīhi theyyasatthasikkhāpadena samānaṃ matanti attho. Idaṃ vuttaṃ hoti – sūpodanaviññattisikkhāpadaṃ theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
১৯৬০. অৰসেসা তিপঞ্ঞাসাতি অৰসেসানি তেপঞ্ঞাসসিক্খাপদানি। সমানা পঠমেন তূতি পঠমেন পারাজিকেন সমুট্ঠানাদিতো সমানানীতি অত্থো, পঠমপারাজিকসদিসসমুট্ঠানানীতি ৰুত্তং হোতি। ‘‘অনাপত্তি আপদাসূ’’তি পদচ্ছেদো। পরিমণ্ডলং নিৰাসেত্ৰা, পারুপিত্ৰা চরন্তানং চোরুপদ্দৰাদি আপদা নাম। অপি-সদ্দেন নদিসন্তরণাদিং সঙ্গণ্হাতি। সেখিযেসু সব্বেসূতি যেভুয্যৰসেন ৰুত্তং।
1960.Avasesā tipaññāsāti avasesāni tepaññāsasikkhāpadāni. Samānā paṭhamena tūti paṭhamena pārājikena samuṭṭhānādito samānānīti attho, paṭhamapārājikasadisasamuṭṭhānānīti vuttaṃ hoti. ‘‘Anāpatti āpadāsū’’ti padacchedo. Parimaṇḍalaṃ nivāsetvā, pārupitvā carantānaṃ corupaddavādi āpadā nāma. Api-saddena nadisantaraṇādiṃ saṅgaṇhāti. Sekhiyesu sabbesūti yebhuyyavasena vuttaṃ.
১৯৬১. ‘‘ন উজ্ঝানসঞ্ঞী পরেসং পত্তং ওলোকেস্সামী’’তিআদীনং (পাচি॰ ৬১৪) ইমস্স অনাপত্তিৰারস্স অসম্ভৰতো ন পনাগতোতি পাল়িযং ন ৰুত্তো। তস্সাপি যথাৰত্থুকাৰ আপত্তিযো দট্ঠব্বা।
1961. ‘‘Na ujjhānasaññī paresaṃ pattaṃ olokessāmī’’tiādīnaṃ (pāci. 614) imassa anāpattivārassa asambhavato na panāgatoti pāḷiyaṃ na vutto. Tassāpi yathāvatthukāva āpattiyo daṭṭhabbā.
ইতি ৰিনযত্থসারসন্দীপনিযা
Iti vinayatthasārasandīpaniyā
ৰিনযৰিনিচ্ছযৰণ্ণনায
Vinayavinicchayavaṇṇanāya
সেখিযকথাৰণ্ণনা নিট্ঠিতা।
Sekhiyakathāvaṇṇanā niṭṭhitā.
১৯৬২. যো ইমং ৰিনিচ্ছযং ৰিদিত্ৰা ঠিতো, সো হি যস্মা ৰিনযে ৰিসারদো হোতি, ৰিনীতমানসো চ হোতি, পরেহি দুপ্পধংসিযো চ হোতি, ততো তস্মা কারণা সমাহিতো সততং ইমং ৰিনযৰিনিচ্ছযং সিক্খেয্যাতি যোজনা।
1962. Yo imaṃ vinicchayaṃ viditvā ṭhito, so hi yasmā vinaye visārado hoti, vinītamānaso ca hoti, parehi duppadhaṃsiyo ca hoti, tato tasmā kāraṇā samāhito satataṃ imaṃ vinayavinicchayaṃ sikkheyyāti yojanā.
তত্থ ইমং ৰিনিচ্ছযং ৰিদিত্ৰাতি সব্বলোকিযলোকুত্তরগুণসম্পত্তিনিদানং ইমং ৰিনযৰিনিচ্ছযং অত্থতো, গন্থতো, ৰিনিচ্ছযতো চ সক্কচ্চং ঞত্ৰা। ৰিসারদোতি সারজ্জনং সারদো, ৰিগতো সারদো অস্সাতি ৰিসারদো, ৰিনযপরিযত্তিযা, আপত্তাদিৰিভাগে চ নিব্ভযো নিরাসঙ্কোতি ৰুত্তং হোতি। ন কেৰলং ইমস্স জাননে এসোৰ আনিসংসো, অথ খো ৰিনীতমানসো চ হোতি, সংযতচিত্তো হোতীতি অত্থো। সোতি ইমং ৰিনিচ্ছযং সক্কচ্চং ৰিদিত্ৰা ঠিতো ভিক্খু। পরেহীতি ইমং অজানন্তেহি অঞ্ঞেহি। দুপ্পধংসিযো চ হোতীতি অনভিভৰনীযো চ হোতি।
Tattha imaṃ vinicchayaṃ viditvāti sabbalokiyalokuttaraguṇasampattinidānaṃ imaṃ vinayavinicchayaṃ atthato, ganthato, vinicchayato ca sakkaccaṃ ñatvā. Visāradoti sārajjanaṃ sārado, vigato sārado assāti visārado, vinayapariyattiyā, āpattādivibhāge ca nibbhayo nirāsaṅkoti vuttaṃ hoti. Na kevalaṃ imassa jānane esova ānisaṃso, atha kho vinītamānaso ca hoti, saṃyatacitto hotīti attho. Soti imaṃ vinicchayaṃ sakkaccaṃ viditvā ṭhito bhikkhu. Parehīti imaṃ ajānantehi aññehi. Duppadhaṃsiyo ca hotīti anabhibhavanīyo ca hoti.
ততোতি তস্মা ৰিনযে ৰিসারদতাদিসব্বগুণসম্পন্নহেতুত্তা। হীতি যস্মাতি অত্থো। সিক্খেতি সজ্ঝাযনসৰনাদিৰসেন সিক্খেয্য, উগ্গণ্হেয্যাতি অত্থো। ‘‘সতত’’ন্তি ইমিনা সব্বত্থককম্মট্ঠানে ৰিয এত্থাপি সততাভিযোগো কাতব্বোতি দস্সেতি। ৰিক্খিত্তস্স যথাভূতপটিৰেধাভাৰতো তপ্পটিপক্খায একগ্গতায নিযোজেন্তো আহ ‘‘সমাহিতো’’তি, সম্মা ৰিনযৰিনিচ্ছযে আহিতো পতিট্ঠিতো একগ্গচিত্তোতি ৰুত্তং হোতি। যথাহ ‘‘অৰিক্খিত্তস্সাযং ধম্মো, নাযং ধম্মো ৰিক্খিত্তস্সা’’তি।
Tatoti tasmā vinaye visāradatādisabbaguṇasampannahetuttā. Hīti yasmāti attho. Sikkheti sajjhāyanasavanādivasena sikkheyya, uggaṇheyyāti attho. ‘‘Satata’’nti iminā sabbatthakakammaṭṭhāne viya etthāpi satatābhiyogo kātabboti dasseti. Vikkhittassa yathābhūtapaṭivedhābhāvato tappaṭipakkhāya ekaggatāya niyojento āha ‘‘samāhito’’ti, sammā vinayavinicchaye āhito patiṭṭhito ekaggacittoti vuttaṃ hoti. Yathāha ‘‘avikkhittassāyaṃ dhammo, nāyaṃ dhammo vikkhittassā’’ti.
১৯৬৩. এৰং ইমায গাথায ৰুত্তমেৰত্থং পকারন্তরেনাপি দস্সেতুমাহ ‘‘ইম’’ন্তিআদি। তেতি অপেক্খিত্ৰা ‘‘যে’’তি লব্ভতি। যে থেরা ৰা নৰা ৰা মজ্ঝিমা ৰা। পরমন্তি অমতমহানিব্বানপ্পত্তিযা মূলকারণস্স সীলস্স পকাসনতো উত্তমং। অসংকরন্তি নিকাযন্তরলদ্ধীহি অসম্মিস্সং। সংকরন্তি ৰুত্তপ্পকারগুণোপেতত্তা কাযচিত্তসুখকারণং সম্মুখং করোতীতি সংকরং। সৰনামতন্তি সদ্দরসাদিযোগেন কণ্ণরসাযনং। অমতন্তি ততোযেৰ অমতং সুমধুরং। অমতমহানিব্বানাৰহত্তা ৰা ফলূপচারেন অমতং। ইমং ৰিনযৰিনিচ্ছযং। অৰেচ্চাতি সক্কচ্চং ৰিদিত্ৰা। অধিকেতি অধিসীলাদিসিক্খত্তযপ্পকাসনেন উক্কট্ঠে। হিতেতি লোকিযলোকুত্তরসুখহেতুত্তেন হিতে। হিনোতি অত্তনো ফলন্তি ‘‘হিত’’ন্তি সুখহেতু ৰুচ্চতি। কলিসাসনেতি লোভাদিকিলেসৰিদ্ধংসনে। সাসনেতি ৰিনযপরিযত্তিসঙ্খাতসাসনেকদেসে। পটুত্তন্তি ব্যত্তভাৰং। ন যন্তি ন গচ্ছন্তি। কে তেতি কতমে তে। ‘‘ন কেচি সন্তি চা’’তি নিস্সন্দেহে ইমিস্সা গাথায অত্থো লিখিতো।
1963. Evaṃ imāya gāthāya vuttamevatthaṃ pakārantarenāpi dassetumāha ‘‘ima’’ntiādi. Teti apekkhitvā ‘‘ye’’ti labbhati. Ye therā vā navā vā majjhimā vā. Paramanti amatamahānibbānappattiyā mūlakāraṇassa sīlassa pakāsanato uttamaṃ. Asaṃkaranti nikāyantaraladdhīhi asammissaṃ. Saṃkaranti vuttappakāraguṇopetattā kāyacittasukhakāraṇaṃ sammukhaṃ karotīti saṃkaraṃ. Savanāmatanti saddarasādiyogena kaṇṇarasāyanaṃ. Amatanti tatoyeva amataṃ sumadhuraṃ. Amatamahānibbānāvahattā vā phalūpacārena amataṃ. Imaṃ vinayavinicchayaṃ. Aveccāti sakkaccaṃ viditvā. Adhiketi adhisīlādisikkhattayappakāsanena ukkaṭṭhe. Hiteti lokiyalokuttarasukhahetuttena hite. Hinoti attano phalanti ‘‘hita’’nti sukhahetu vuccati. Kalisāsaneti lobhādikilesaviddhaṃsane. Sāsaneti vinayapariyattisaṅkhātasāsanekadese. Paṭuttanti byattabhāvaṃ. Na yanti na gacchanti. Ke teti katame te. ‘‘Na keci santi cā’’ti nissandehe imissā gāthāya attho likhito.
এৰং এত্থ অত্থযোজনা ৰেদিতব্বা – পরমং উত্তমং অসংকরং নিকাযন্তরলদ্ধীহি অসম্মিস্সং সংকরং সকললোকিযলোকুত্তরসুখাভিনিপ্ফাদকং সৰনামতং সোতরসাযনং ইমং ৰিনিচ্ছযপ্পকরণং অৰেচ্চ সক্কচ্চং ৰিদিত্ৰা অধিকে অধিসীলাদিসিক্খত্তযপ্পকাসনেন উক্কট্ঠে হিতে লোকিযলোকুত্তরসুখহেতুভূতে কলিসাসনে সকলসংকিলেসৰিদ্ধংসকে সাসনে ৰিনযপিটকসঙ্খাতে পরিযত্তিসাসনে যে পটুত্তং ন যন্তি, তে কে নামাতি যোজনা, যে ইমং পকরণং অৰেচ্চ ৰিদিত্ৰা ঠিতা, তে একংসতো ৰিনযপিটকে পটুত্তং পাপুণন্তি যেৰাতি অধিপ্পাযো।
Evaṃ ettha atthayojanā veditabbā – paramaṃ uttamaṃ asaṃkaraṃ nikāyantaraladdhīhi asammissaṃ saṃkaraṃ sakalalokiyalokuttarasukhābhinipphādakaṃ savanāmataṃ sotarasāyanaṃ imaṃ vinicchayappakaraṇaṃ avecca sakkaccaṃ viditvā adhike adhisīlādisikkhattayappakāsanena ukkaṭṭhe hite lokiyalokuttarasukhahetubhūte kalisāsane sakalasaṃkilesaviddhaṃsake sāsane vinayapiṭakasaṅkhāte pariyattisāsane ye paṭuttaṃ na yanti, te ke nāmāti yojanā, ye imaṃ pakaraṇaṃ avecca viditvā ṭhitā, te ekaṃsato vinayapiṭake paṭuttaṃ pāpuṇanti yevāti adhippāyo.
ইতি ৰিনযত্থসারসন্দীপনিযা
Iti vinayatthasārasandīpaniyā
ৰিনযৰিনিচ্ছযৰণ্ণনায
Vinayavinicchayavaṇṇanāya
ভিক্খুৰিভঙ্গকথাৰণ্ণনা নিট্ঠিতা।
Bhikkhuvibhaṅgakathāvaṇṇanā niṭṭhitā.
