| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಸೇಖಿಯಕಥಾವಣ್ಣನಾ
Sekhiyakathāvaṇṇanā
೧೮೭೦. ಏವಂ ಪಾಟಿದೇಸನೀಯವಿನಿಚ್ಛಯಂ ದಸ್ಸೇತ್ವಾ ತದನನ್ತರಂ ಉದ್ದಿಟ್ಠಾನಂ ಸೇಖಿಯಾನಂ ವಿನಿಚ್ಛಯಂ ದಸ್ಸೇತುಮಾಹ ‘‘ಯೋ ಅನಾದರಿಯೇನೇವಾ’’ತಿಆದಿ। ಯೋತಿ ಥೇರೋ ವಾ ನವೋ ವಾ ಮಜ್ಝಿಮೋ ವಾ। ಏತ್ಥ ಅನಾದರಿಯಂ ನಾಮ ಸಞ್ಚಿಚ್ಚ ಆಪತ್ತಿಆಪಜ್ಜನಂ, ನಿವಾಸನಾದಿವತ್ಥಸ್ಸ ಉಗ್ಗಹಣೇ ನಿರುಸ್ಸಾಹಞ್ಚ। ಪಚ್ಛತೋಪಿ ವಾತಿ ಏತ್ಥ ವಾ-ಸದ್ದೇನ ‘‘ಪಸ್ಸತೋಪಿ ವಾ’’ತಿ ಇದಂ ಸಙ್ಗಣ್ಹಾತಿ। ತಸ್ಸ ಚಾತಿ ಏತ್ಥ ಚ-ಸದ್ದೋ ವಕ್ಖಮಾನಸಮುಚ್ಚಯೋ।
1870. Evaṃ pāṭidesanīyavinicchayaṃ dassetvā tadanantaraṃ uddiṭṭhānaṃ sekhiyānaṃ vinicchayaṃ dassetumāha ‘‘yo anādariyenevā’’tiādi. Yoti thero vā navo vā majjhimo vā. Ettha anādariyaṃ nāma sañcicca āpattiāpajjanaṃ, nivāsanādivatthassa uggahaṇe nirussāhañca. Pacchatopi vāti ettha vā-saddena ‘‘passatopi vā’’ti idaṃ saṅgaṇhāti. Tassa cāti ettha ca-saddo vakkhamānasamuccayo.
೧೮೭೧. ನ ಕೇವಲಂ ವುತ್ತನಯೇನ ನಿವಾಸೇನ್ತಸ್ಸೇವ ಹೋತಿ, ಖನ್ಧಕಾಗತಹತ್ಥಿಸೋಣ್ಡಾದಿಆಕಾರೇನಾಪಿ ನಿವಾಸೇನ್ತಸ್ಸ ದುಕ್ಕಟಂ ಹೋತೀತಿ ಆಹ ‘‘ಹತ್ಥಿಸೋಣ್ಡಾದೀ’’ತಿಆದಿ। ಹತ್ಥಿಸೋಣ್ಡಾದಿನಿವಾಸನಂ ಪರತೋ ಖುದ್ದಕವತ್ಥುಕ್ಖನ್ಧಕೇ (ಚೂಳವ॰ ೨೮೦) ಆವಿ ಭವಿಸ್ಸತಿ। ಪರಿಮಣ್ಡಲನ್ತಿ ಸಮನ್ತತೋ ಮಣ್ಡಲಂ ಕತ್ವಾ। ವತ್ಥಬ್ಬನ್ತಿ ನಿವತ್ಥಬ್ಬಂ ನಿವಾಸೇತಬ್ಬನ್ತಿ ಅತ್ಥೋ।
1871. Na kevalaṃ vuttanayena nivāsentasseva hoti, khandhakāgatahatthisoṇḍādiākārenāpi nivāsentassa dukkaṭaṃ hotīti āha ‘‘hatthisoṇḍādī’’tiādi. Hatthisoṇḍādinivāsanaṃ parato khuddakavatthukkhandhake (cūḷava. 280) āvi bhavissati. Parimaṇḍalanti samantato maṇḍalaṃ katvā. Vatthabbanti nivatthabbaṃ nivāsetabbanti attho.
೧೮೭೨. ಜಾಣುಮಣ್ಡಲತೋ ಹೇಟ್ಠಾತಿ ಏತ್ಥ ‘‘ಜಙ್ಘಟ್ಠಿಸೀಸತೋ ಪಟ್ಠಾಯಾ’’ತಿ ಸೇಸೋ। ಅಟ್ಠಙ್ಗುಲಪ್ಪಮಾಣಕನ್ತಿ ವಡ್ಢಕಿಅಙ್ಗುಲೇನ ಅಟ್ಠಙ್ಗುಲಮತ್ತನ್ತಿ ಆಚರಿಯಾ। ‘‘ಯೋ ಪನ ಸುಕ್ಖಜಙ್ಘೋ ವಾ ಮಹಾಪಿಣ್ಡಿಕಮಂಸೋ ವಾ ಹೋತಿ, ತಸ್ಸ ಸಾರುಪ್ಪತ್ಥಾಯ ಜಾಣುಮಣ್ಡಲತೋ ಅಟ್ಠಙ್ಗುಲಾಧಿಕಮ್ಪಿ ಓತಾರೇತ್ವಾ ನಿವಾಸೇತುಂ ವಟ್ಟತೀ’’ತಿ (ಪಾಚಿ॰ ಅಟ್ಠ॰ ೫೭೬) ಅಟ್ಠಕಥಂ ಸಙ್ಗಣ್ಹಿತುಮಾಹ ‘‘ತತೋ ಊನಂ ನ ವಟ್ಟತೀ’’ತಿ।
1872.Jāṇumaṇḍalatoheṭṭhāti ettha ‘‘jaṅghaṭṭhisīsato paṭṭhāyā’’ti seso. Aṭṭhaṅgulappamāṇakanti vaḍḍhakiaṅgulena aṭṭhaṅgulamattanti ācariyā. ‘‘Yo pana sukkhajaṅgho vā mahāpiṇḍikamaṃso vā hoti, tassa sāruppatthāya jāṇumaṇḍalato aṭṭhaṅgulādhikampi otāretvā nivāsetuṃ vaṭṭatī’’ti (pāci. aṭṭha. 576) aṭṭhakathaṃ saṅgaṇhitumāha ‘‘tato ūnaṃ na vaṭṭatī’’ti.
೧೮೭೩. ಅಸಞ್ಚಿಚ್ಚ ಅಪರಿಮಣ್ಡಲಂ ನಿವಾಸೇನ್ತಸ್ಸ ಅನಾಪತ್ತೀತಿ ಯೋಜನಾ। ಏವಮುಪರಿಪಿ। ಅಸಞ್ಚಿಚ್ಚಾತಿ ‘‘ಅಪರಿಮಣ್ಡಲಂ ನಿವಾಸೇಸ್ಸಾಮೀ’’ತಿ ಏವಂ ಅಸಞ್ಚಿಚ್ಚ, ಅಥ ಖೋ ‘‘ಪರಿಮಣ್ಡಲಂಯೇವ ನಿವಾಸೇಸ್ಸಾಮೀ’’ತಿ ವಿರಜ್ಝಿತ್ವಾ ಅಪರಿಮಣ್ಡಲಂ ನಿವಾಸೇನ್ತಸ್ಸ ಅನಾಪತ್ತಿ। ಅಸತಿಸ್ಸಾಪೀತಿ ಅಞ್ಞವಿಹಿತಸ್ಸಾಪಿ ತಥಾ ನಿವಾಸೇನ್ತಸ್ಸ ಅನಾಪತ್ತಿ। ಅಜಾನನ್ತಸ್ಸಾತಿ ಕೇವಲಂ ಪರಿಮಣ್ಡಲಂ ನಿವಾಸೇತುಂ ಅಜಾನನ್ತಸ್ಸ ಅನಾಪತ್ತಿ। ಅಪಿಚ ನಿವಾಸನವತ್ತಂ ಉಗ್ಗಹೇತಬ್ಬಂ। ಉಗ್ಗಹಿತವತ್ತೋಪಿ ಸಚೇ ‘‘ಆರುಳ್ಹ’’ನ್ತಿ ವಾ ‘‘ಓರುಳ್ಹ’’ನ್ತಿ ವಾ ನ ಜಾನಾತಿ, ತಸ್ಸಾಪಿ ಅನಾಪತ್ತಿಯೇವ। ಗಿಲಾನಸ್ಸಾತಿ ಯಸ್ಸ ಜಙ್ಘಾಯ ವಾ ಪಾದೇ ವಾ ವಣೋ ಹೋತಿ, ತಸ್ಸ ಉಕ್ಖಿಪಿತ್ವಾ ವಾ ಓತಾರೇತ್ವಾ ವಾ ನಿವಾಸೇನ್ತಸ್ಸ ಅನಾಪತ್ತಿ। ಪಾದೋತಿ ಚೇತ್ಥ ಪಾದಸಮೀಪಂ ಅಧಿಪ್ಪೇತಂ। ಆಪದಾಸೂತಿ ವಾಳಾ ವಾ ಚೋರಾ ವಾ ಅನುಬನ್ಧನ್ತಿ, ಏವರೂಪಾಸು ಆಪದಾಸು ಅನಾಪತ್ತಿ।
1873. Asañcicca aparimaṇḍalaṃ nivāsentassa anāpattīti yojanā. Evamuparipi. Asañciccāti ‘‘aparimaṇḍalaṃ nivāsessāmī’’ti evaṃ asañcicca, atha kho ‘‘parimaṇḍalaṃyeva nivāsessāmī’’ti virajjhitvā aparimaṇḍalaṃ nivāsentassa anāpatti. Asatissāpīti aññavihitassāpi tathā nivāsentassa anāpatti. Ajānantassāti kevalaṃ parimaṇḍalaṃ nivāsetuṃ ajānantassa anāpatti. Apica nivāsanavattaṃ uggahetabbaṃ. Uggahitavattopi sace ‘‘āruḷha’’nti vā ‘‘oruḷha’’nti vā na jānāti, tassāpi anāpattiyeva. Gilānassāti yassa jaṅghāya vā pāde vā vaṇo hoti, tassa ukkhipitvā vā otāretvā vā nivāsentassa anāpatti. Pādoti cettha pādasamīpaṃ adhippetaṃ. Āpadāsūti vāḷā vā corā vā anubandhanti, evarūpāsu āpadāsu anāpatti.
ಪರಿಮಣ್ಡಲಕಥಾವಣ್ಣನಾ।
Parimaṇḍalakathāvaṇṇanā.
೧೮೭೪. ಉಭೋ ಕೋಣೇ ಸಮಂ ಕತ್ವಾತಿ ಪಾರುಪನಸ್ಸ ಏಕಂಸೇ ಕತಸ್ಸ ಪಿಟ್ಠಿಪಸ್ಸೇ, ಉದರಪಸ್ಸೇ ಚ ಓಲಮ್ಬಮಾನೇ ಉಭೋ ಕಣ್ಣೇ ಹತ್ಥಿಪಿಟ್ಠೇ ಗಣ್ಡಾ ವಿಯ ಸಮಂ ಕತ್ವಾ। ಪರಿಮಣ್ಡಲಂ ಕತ್ವಾತಿ ಏತಸ್ಸೇವ ಅತ್ಥಪದಂ। ಸಾದರನ್ತಿ ಭಾವನಪುಂಸಕನಿದ್ದೇಸೋ। ಸಾದರಂ ವಾ ಪಾರುಪಿತಬ್ಬನ್ತಿ ಯೋಜನಾ, ಸಾದರಂ ಪಾರುಪನಂ ಕತ್ತಬ್ಬನ್ತಿ ಅತ್ಥೋ। ಏವಂ ಅಕರೋನ್ತಸ್ಸಾತಿ ಪಾರುಪನವತ್ತೇ ಆದರಂ ಜನೇತ್ವಾ ಏವಂ ಅಪಾರುಪನ್ತಸ್ಸ।
1874.Ubho koṇe samaṃ katvāti pārupanassa ekaṃse katassa piṭṭhipasse, udarapasse ca olambamāne ubho kaṇṇe hatthipiṭṭhe gaṇḍā viya samaṃ katvā. Parimaṇḍalaṃ katvāti etasseva atthapadaṃ. Sādaranti bhāvanapuṃsakaniddeso. Sādaraṃ vā pārupitabbanti yojanā, sādaraṃ pārupanaṃ kattabbanti attho. Evaṃ akarontassāti pārupanavatte ādaraṃ janetvā evaṃ apārupantassa.
೧೮೭೫. ‘‘ಪರಿಮಣ್ಡಲಂ ನಿವಾಸೇಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ (ಪಾಚಿ॰ ೫೭೬) ವಾ ‘‘ಪರಿಮಣ್ಡಲಂ ಪಾರುಪಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ (ಪಾಚಿ॰ ೫೭೭) ವಾ ‘‘ಅನ್ತರಘರೇ’’ತಿ ಅವಿಸೇಸೇತ್ವಾ ವುತ್ತತ್ತಾ ಆಹ ‘‘ಅವಿಸೇಸೇನ ವುತ್ತ’’ನ್ತಿ। ಇದಂ ಸಿಕ್ಖಾಪದದ್ವಯಂ ಯಸ್ಮಾ ಅವಿಸೇಸೇನ ವುತ್ತಂ, ತಸ್ಮಾ ಘರೇ, ವಿಹಾರೇ ವಾ ಕಾತಬ್ಬಂ ಪರಿಮಣ್ಡಲನ್ತಿ ಯೋಜನಾ। ಘರೇತಿ ಅನ್ತರಘರೇ। ವಿಹಾರೇ ವಾತಿ ಬುದ್ಧುಪಟ್ಠಾನಾದಿಕಾಲಂ ಸನ್ಧಾಯ ವುತ್ತಂ। ಪರಿಮಣ್ಡಲಂ ಕತ್ತಬ್ಬನ್ತಿ ಪರಿಮಣ್ಡಲಮೇವ ನಿವಾಸೇತಬ್ಬಂ ಪಾರುಪಿತಬ್ಬನ್ತಿ ಅತ್ಥೋ।
1875. ‘‘Parimaṇḍalaṃ nivāsessāmīti sikkhā karaṇīyā’’ti (pāci. 576) vā ‘‘parimaṇḍalaṃ pārupissāmīti sikkhā karaṇīyā’’ti (pāci. 577) vā ‘‘antaraghare’’ti avisesetvā vuttattā āha ‘‘avisesena vutta’’nti. Idaṃ sikkhāpadadvayaṃ yasmā avisesena vuttaṃ, tasmā ghare, vihāre vā kātabbaṃ parimaṇḍalanti yojanā. Ghareti antaraghare. Vihāre vāti buddhupaṭṭhānādikālaṃ sandhāya vuttaṃ. Parimaṇḍalaṃ kattabbanti parimaṇḍalameva nivāsetabbaṃ pārupitabbanti attho.
ದುತಿಯಂ।
Dutiyaṃ.
೧೮೭೬. ಉಭೋ ಕೋಣೇ ಸಮಂ ಕತ್ವಾತಿ ಸಮ್ಬನ್ಧೋ। ಗೀವಮೇವ ಚ ಅನುವಾತೇನ ಛಾದೇತ್ವಾತಿ ಯೋಜನಾ।
1876. Ubho koṇe samaṃ katvāti sambandho. Gīvameva ca anuvātena chādetvāti yojanā.
೧೮೭೭. ತಥಾ ಅಕತ್ವಾತಿ ಯಥಾವುತ್ತವಿಧಾನಂ ಅಕತ್ವಾ। ಜತ್ತೂನಿಪೀತಿ ಉಭೋ ಅಂಸಕೂಟಾನಿಪಿ। ಉರಮ್ಪಿ ಚಾತಿ ಹದಯಮ್ಪಿ। ವಿವರಿತ್ವಾತಿ ಅಪ್ಪಟಿಚ್ಛಾದೇತ್ವಾ। ಯಥಾಕಾಮನ್ತಿ ಇಚ್ಛಾನುರೂಪಂ। ಗಚ್ಛತೋತಿ ಏತ್ಥ ‘‘ಅನ್ತರಘರೇ’’ತಿ ಸೇಸೋ। ಅನ್ತರಘರಂ ನಾಮ ಗಾಮೇ ವಾ ಹೋತು ವಿಹಾರೇ ವಾ, ಪಚಿತ್ವಾ ಭುಞ್ಜಿತ್ವಾ ಗಿಹೀನಂ ವಸನಟ್ಠಾನಂ।
1877.Tathā akatvāti yathāvuttavidhānaṃ akatvā. Jattūnipīti ubho aṃsakūṭānipi. Urampi cāti hadayampi. Vivaritvāti appaṭicchādetvā. Yathākāmanti icchānurūpaṃ. Gacchatoti ettha ‘‘antaraghare’’ti seso. Antaragharaṃ nāma gāme vā hotu vihāre vā, pacitvā bhuñjitvā gihīnaṃ vasanaṭṭhānaṃ.
ತತಿಯಂ।
Tatiyaṃ.
೧೮೭೮-೯. ‘‘ಮಣಿಬನ್ಧತೋ’’ತಿ ಇಮಿನಾಪಿ ‘‘ಹೇಟ್ಠಾ’’ತಿ ಯೋಜೇತಬ್ಬಂ। ವಾಸೂಪಗಸ್ಸಾತಿ ಏತ್ಥ ‘‘ಕಾಯಂ ವಿವರಿತ್ವಾ ನಿಸೀದತೋ’’ತಿ ಸೇಸೋ। ವಾಸೂಪಗೋ ನಾಮ ರತ್ತಿವಾಸತ್ಥಾಯ ಉಪಗತೋ, ಏತೇನ ವಾಸತ್ಥಾಯ ಅನ್ತರಘರಂ ಉಪಗಚ್ಛನ್ತೇನ ಸುಪ್ಪಟಿಚ್ಛನ್ನೇನೇವ ಉಪಗನ್ತಬ್ಬನ್ತಿ ದೀಪಿತಂ ಹೋತಿ, ಏತೇನೇವ ವಾಸೂಪಗತಸ್ಸ ಸನ್ತಿಕಂ ಉಪಗತಸ್ಸ ಯಥಾಕಾಮಂ ಗಮನೇ ನ ದೋಸೋತಿ ಚ ವುತ್ತಮೇವ ಹೋತಿ। ತೇನಾಹ ಗಣ್ಠಿಪದೇ ‘‘ಏಕದಿವಸಮ್ಪಿ ವಾಸೂಪಗತಸ್ಸ ಸನ್ತಿಕಂ ಯಥಾಸುಖಂ ಗನ್ತುಂ ವಟ್ಟತಿ, ಕೋ ಪನ ವಾದೋ ಚತುಪಞ್ಚಾಹಂ ವಾಸಮಧಿಟ್ಠಾಯ ವಸಿತಭಿಕ್ಖೂನಂ ಸನ್ತಿಕ’’ನ್ತಿ।
1878-9.‘‘Maṇibandhato’’ti imināpi ‘‘heṭṭhā’’ti yojetabbaṃ. Vāsūpagassāti ettha ‘‘kāyaṃ vivaritvā nisīdato’’ti seso. Vāsūpago nāma rattivāsatthāya upagato, etena vāsatthāya antaragharaṃ upagacchantena suppaṭicchanneneva upagantabbanti dīpitaṃ hoti, eteneva vāsūpagatassa santikaṃ upagatassa yathākāmaṃ gamane na dosoti ca vuttameva hoti. Tenāha gaṇṭhipade ‘‘ekadivasampi vāsūpagatassa santikaṃ yathāsukhaṃ gantuṃ vaṭṭati, ko pana vādo catupañcāhaṃ vāsamadhiṭṭhāya vasitabhikkhūnaṃ santika’’nti.
ಚತುತ್ಥಂ।
Catutthaṃ.
೧೮೮೦. ಸುವಿನೀತೇನಾತಿ ಹತ್ಥಪಾದಾನಂ ಅಕೀಳಾಪನೇನೇವ ಸುಟ್ಠು ವಿನೀತೇನ।
1880.Suvinītenāti hatthapādānaṃ akīḷāpaneneva suṭṭhu vinītena.
ಪಞ್ಚಮಂ।
Pañcamaṃ.
೧೮೮೧. ಗಾಥಾಬನ್ಧವಸೇನ ‘‘ಸತೀಮತಾ’’ತಿ ದೀಘೋ ಕತೋ। ಅವಿಕಾರೇನಾತಿ ತಂತದವಲೋಕಾಸಹಿತೇನ । ಯುಗಂ ಮತ್ತಾ ಪಮಾಣಂ ಏತಸ್ಸಾತಿ ಯುಗಮತ್ತಂ, ರಥಯುಗಂ ಚತುಹತ್ಥಪ್ಪಮಾಣಂ, ತತ್ತಕಂ ಪದೇಸಂ। ಪೇಕ್ಖಿನಾತಿ ಓಲೋಕೇನ್ತೇನ। ‘‘ಭಿಕ್ಖುನಾ ಓಕ್ಖಿತ್ತಚಕ್ಖುನಾ’’ತಿ ಪದಚ್ಛೇದೋ।
1881. Gāthābandhavasena ‘‘satīmatā’’ti dīgho kato. Avikārenāti taṃtadavalokāsahitena . Yugaṃ mattā pamāṇaṃ etassāti yugamattaṃ, rathayugaṃ catuhatthappamāṇaṃ, tattakaṃ padesaṃ. Pekkhināti olokentena. ‘‘Bhikkhunā okkhittacakkhunā’’ti padacchedo.
೧೮೮೨. ಅನ್ತರಘರೇ ಯತ್ಥ ಕತ್ಥಚಿಪಿ ಏಕಸ್ಮಿಮ್ಪಿ ಠಾನೇ ಠತ್ವಾತಿ ಯೋಜನಾ। ಏವಂ ವುತ್ತೇಪಿ ತಥಾರೂಪೇ ಅನ್ತರಾಯೇ ಸತಿ ಗಚ್ಛತೋಪಿ ಓಲೋಕೇತುಂ ಲಬ್ಭತಿ। ಏಕಸ್ಮಿಂ ಪನ ಠಾನೇ ಠತ್ವಾತಿ ಏತ್ಥ ಗಚ್ಛನ್ತೋಪಿ ಪರಿಸ್ಸಯಾಭಾವಂ ಓಲೋಕೇತುಂ ಲಬ್ಭತಿಯೇವ। ‘‘ತಥಾ ಗಾಮೇ ಪೂಜ’’ನ್ತಿ ಗಣ್ಠಿಪದೇಸು ವುತ್ತಂ। ಪಿ-ಸದ್ದೋ ಪನ-ಸದ್ದತ್ಥೋ, ಓಲೋಕೇತುಂ ಪನ ವಟ್ಟತೀತಿ ವುತ್ತಂ ಹೋತಿ।
1882. Antaraghare yattha katthacipi ekasmimpi ṭhāne ṭhatvāti yojanā. Evaṃ vuttepi tathārūpe antarāye sati gacchatopi oloketuṃ labbhati. Ekasmiṃ pana ṭhāne ṭhatvāti ettha gacchantopi parissayābhāvaṃ oloketuṃ labbhatiyeva. ‘‘Tathā gāme pūja’’nti gaṇṭhipadesu vuttaṃ. Pi-saddo pana-saddattho, oloketuṃ pana vaṭṭatīti vuttaṃ hoti.
೧೮೮೩. ಓಲೋಕೇನ್ತೋ ತಹಂ ತಹನ್ತಿ ಯೋ ಅನಾದರಿಯಂ ಪಟಿಚ್ಚ ತಂ ತಂ ದಿಸಾಭಾಗಂ ಪಾಸಾದಂ ಕೂಟಾಗಾರಂ ವೀಥಿಂ ಓಲೋಕೇನ್ತೋ।
1883.Olokento tahaṃ tahanti yo anādariyaṃ paṭicca taṃ taṃ disābhāgaṃ pāsādaṃ kūṭāgāraṃ vīthiṃ olokento.
ಸತ್ತಮಂ।
Sattamaṃ.
೧೮೮೪. ಏಕತೋ ವಾಪೀತಿ ಏಕಅಂಸಕೂಟತೋ ವಾ। ಉಭತೋ ವಾಪೀತಿ ಉಭಯಂಸಕೂಟತೋ ವಾ। ಇನ್ದಖೀಲಕತೋ ಅನ್ತೋತಿ ಗಾಮದ್ವಾರಿನ್ದಖೀಲತೋ ಅನ್ತೋ, ಘರೇತಿ ವುತ್ತಂ ಹೋತಿ।
1884.Ekatovāpīti ekaaṃsakūṭato vā. Ubhato vāpīti ubhayaṃsakūṭato vā. Indakhīlakato antoti gāmadvārindakhīlato anto, ghareti vuttaṃ hoti.
ನವಮಂ।
Navamaṃ.
೧೮೮೫. ತಥಾ ನಿಸಿನ್ನಕಾಲೇಪೀತಿ ಇನ್ದಖೀಲಸ್ಸ ಅನ್ತೋ ನಿಸಿನ್ನಕಾಲೇಪಿ। ಕುಣ್ಡಿಕಂ ನೀಹರನ್ತೇನ ಚ ಚೀವರಂ ಅನುಕ್ಖಿಪಿತ್ವಾ ದಾತಬ್ಬಾ ಕುಣ್ಡಿಕಾತಿ ಯೋಜನಾ। ಕುಣ್ಡಿಕನ್ತಿ ಚ ಉಪಲಕ್ಖಣಮತ್ತಂ। ಧಮ್ಮಕರಣಾದೀಸುಪಿ ಏಸೇವ ನಯೋ।
1885.Tathā nisinnakālepīti indakhīlassa anto nisinnakālepi. Kuṇḍikaṃ nīharantena ca cīvaraṃ anukkhipitvā dātabbā kuṇḍikāti yojanā. Kuṇḍikanti ca upalakkhaṇamattaṃ. Dhammakaraṇādīsupi eseva nayo.
ದಸಮಂ।
Dasamaṃ.
ಪಠಮೋ ವಗ್ಗೋ।
Paṭhamo vaggo.
೧೮೮೬. ಗನ್ತುಞ್ಚೇವ ನಿಸೀದಿತುಞ್ಚ ನ ವಟ್ಟತೀತಿ ಯೋಜನಾ। ಚ-ಸದ್ದೋ ಕಿರಿಯಾಸಮುಚ್ಚಯೋ। ಹಸನೀಯಸ್ಮಿಂ ವತ್ಥುಸ್ಮಿನ್ತಿ ಹಾಸಜನಕೇ ಕಾರಣೇ। ಸಿತಮತ್ತನ್ತಿ ಮನ್ದಹಾಸಂ।
1886. Gantuñceva nisīdituñca na vaṭṭatīti yojanā. Ca-saddo kiriyāsamuccayo. Hasanīyasmiṃ vatthusminti hāsajanake kāraṇe. Sitamattanti mandahāsaṃ.
ಪಠಮದುತಿಯಾನಿ।
Paṭhamadutiyāni.
೧೮೮೭. ಅಪ್ಪಸದ್ದೇನಾತಿ ‘‘ಕಿತ್ತಾವತಾ ಅಪ್ಪಸದ್ದೋ ಹೋತಿ? ದ್ವಾದಸಹತ್ಥೇ ಗೇಹೇ ಆದಿಮ್ಹಿ ಸಙ್ಘತ್ಥೇರೋ, ಮಜ್ಝೇ ದುತಿಯತ್ಥೇರೋ, ಅನ್ತೇ ತತಿಯತ್ಥೇರೋತಿ ಏವಂ ನಿಸಿನ್ನೇಸುಯಂ ಸಙ್ಘತ್ಥೇರೋ ದುತಿಯತ್ಥೇರೇನ ಸದ್ಧಿಂ ಮನ್ತೇತಿ, ದುತಿಯತ್ಥೇರೋ ತಸ್ಸ ಸದ್ದಞ್ಚೇವ ಸುಣಾತಿ, ಕಥಞ್ಚ ವವತ್ಥಪೇತಿ। ತತಿಯತ್ಥೇರೋ ಪನ ಸದ್ದಮೇವ ಸುಣಾತಿ, ಕಥಂ ನ ವವತ್ಥಪೇತಿ। ಏತ್ತಾವತಾ ಅಪ್ಪಸದ್ದೋ ಹೋತೀ’’ತಿ (ಪಾಚಿ॰ ೫೮೮) ವುತ್ತಅಪ್ಪಸದ್ದಯುತ್ತೇನ। ಸಚೇ ಪನ ತತಿಯತ್ಥೇರೋ ಕಥಞ್ಚ ವವತ್ಥಪೇತಿ, ಮಹಾಸದ್ದೋ ನಾಮ ಹೋತೀತಿ।
1887.Appasaddenāti ‘‘kittāvatā appasaddo hoti? Dvādasahatthe gehe ādimhi saṅghatthero, majjhe dutiyatthero, ante tatiyattheroti evaṃ nisinnesuyaṃ saṅghatthero dutiyattherena saddhiṃ manteti, dutiyatthero tassa saddañceva suṇāti, kathañca vavatthapeti. Tatiyatthero pana saddameva suṇāti, kathaṃ na vavatthapeti. Ettāvatā appasaddo hotī’’ti (pāci. 588) vuttaappasaddayuttena. Sace pana tatiyatthero kathañca vavatthapeti, mahāsaddo nāma hotīti.
ತತಿಯಂ।
Tatiyaṃ.
೧೮೮೮. ಕಾಯಪ್ಪಚಾಲಕಂ ಕತ್ವಾತಿ ಕಾಯಂ ಚಾಲೇತ್ವಾ ಚಾಲೇತ್ವಾ। ಉಪರಿಪಿ ಏಸೇವ ನಯೋ। ಹತ್ಥಸ್ಸ ವುತ್ತಲಕ್ಖಣತ್ತಾ ‘‘ಬಾಹೂ’’ತಿ ಮಣಿಬನ್ಧತೋ ಯಾವ ಅಂಸಕೂಟಾ ಗಹೇತಬ್ಬಾ।
1888.Kāyappacālakaṃ katvāti kāyaṃ cāletvā cāletvā. Uparipi eseva nayo. Hatthassa vuttalakkhaṇattā ‘‘bāhū’’ti maṇibandhato yāva aṃsakūṭā gahetabbā.
೧೮೮೯. ಉಜುಂ ಪಗ್ಗಹೇತ್ವಾತಿ ಉಜುಂ ಠಪೇತ್ವಾ। ಆಸಿತಬ್ಬನ್ತಿ ನಿಸೀದಿತಬ್ಬಂ। ‘‘ಸಮೇನ ಇರಿಯಾಪಥೇನ ತೂ’’ತಿ ಪದಚ್ಛೇದೋ।
1889.Ujuṃ paggahetvāti ujuṃ ṭhapetvā. Āsitabbanti nisīditabbaṃ. ‘‘Samena iriyāpathena tū’’ti padacchedo.
೧೮೯೦. ಇತ್ಥಮ್ಭೂತೇ ಕರಣವಚನಂ। ಗಮನಪಟಿಸಂಯುತ್ತೇಸು ಸಿಕ್ಖಾಪದೇಸು ಗಮನಸ್ಸ ಅಸಮ್ಭವೋತಿ ಆಹ ‘‘ನಿಸೀದನೇನ ಯುತ್ತೇಸೂ’’ತಿ।
1890. Itthambhūte karaṇavacanaṃ. Gamanapaṭisaṃyuttesu sikkhāpadesu gamanassa asambhavoti āha ‘‘nisīdanena yuttesū’’ti.
ಪಞ್ಚಮಛಟ್ಠಸತ್ತಮಟ್ಠಮನವಮಾನಿ।
Pañcamachaṭṭhasattamaṭṭhamanavamāni.
ದುತಿಯೋ ವಗ್ಗೋ।
Dutiyo vaggo.
೧೮೯೧. ಖಮ್ಭಂ ಕತ್ವಾತಿ ಕಟಿಯಾ ಏಕಪಸ್ಸೇ ವಾ ದ್ವೀಸು ವಾ ಪಸ್ಸೇಸು ಕಪ್ಪರಸನ್ಧಿತೋ ಆಭುಜಿತ್ವಾ ಹತ್ಥಂ ಠಪೇತ್ವಾ। ಯಥಾಹ – ‘‘ಖಮ್ಭಕತೋ ನಾಮ ಕಟಿಯಂ ಹತ್ಥಂ ಠಪೇತ್ವಾ ಕತಖಮ್ಭೋ’’ತಿ (ಪಾಚಿ॰ ಅಟ್ಠ॰ ೫೯೬)। ಉಕ್ಕುಟಿಕಾಯ ವಾ ಗಚ್ಛತೋತಿ ಯೋಜನಾ। ಉಕ್ಕುಟಿಕಾ ವುಚ್ಚತಿ ಪಣ್ಹಿಯೋ ಉಕ್ಖಿಪಿತ್ವಾ ಅಗ್ಗಪಾದೇಹಿ ವಾ ಅಗ್ಗಪಾದೇ ಉಕ್ಖಿಪಿತ್ವಾ ಪಣ್ಹೀಹಿ ಏವ ವಾ ಭೂಮಿಂ ಫುಸನ್ತಸ್ಸ ಗಮನಂ।
1891.Khambhaṃ katvāti kaṭiyā ekapasse vā dvīsu vā passesu kapparasandhito ābhujitvā hatthaṃ ṭhapetvā. Yathāha – ‘‘khambhakato nāma kaṭiyaṃ hatthaṃ ṭhapetvā katakhambho’’ti (pāci. aṭṭha. 596). Ukkuṭikāya vā gacchatoti yojanā. Ukkuṭikā vuccati paṇhiyo ukkhipitvā aggapādehi vā aggapāde ukkhipitvā paṇhīhi eva vā bhūmiṃ phusantassa gamanaṃ.
೧೮೯೨. ದುಸ್ಸಪಲ್ಲತ್ಥಿಕಾಯಾತಿ ಆಯೋಗಪಲ್ಲತ್ಥಿಕಾಯ। ಅನ್ತರಘರೇ ನಿಸೀದನ್ತಸ್ಸ ತಸ್ಸ ದುಕ್ಕಟಂ ಹೋತೀತಿ ಯೋಜನಾ।
1892.Dussapallatthikāyāti āyogapallatthikāya. Antaraghare nisīdantassa tassa dukkaṭaṃ hotīti yojanā.
೧೮೯೩. ದುತಿಯೇ ಚಾತಿ ‘‘ನ ಖಮ್ಭಕತೋ ಅನ್ತರಘರೇ ನಿಸೀದಿಸ್ಸಾಮೀ’’ತಿ (ಪಾಚಿ॰ ೫೯೭) ಸಿಕ್ಖಾಪದೇ ಚ। ಚತುತ್ಥೇ ಚಾತಿ ‘‘ನ ಓಗುಣ್ಠಿತೋ ಅನ್ತರಘರೇ ನಿಸೀದಿಸ್ಸಾಮೀ’’ತಿ (ಪಾಚಿ॰ ೫೯೯) ಸಿಕ್ಖಾಪದೇ ಚ। ಛಟ್ಠೇತಿ ‘‘ನ ಪಲ್ಲತ್ಥಿಕಾಯ ಅನ್ತರಘರೇ’’ಇಚ್ಚಾದಿ (ಪಾಚಿ॰ ೬೦೧) ಸಿಕ್ಖಾಪದೇ ಚ। ಇತಿ ಏವಂ ಸಾರುಪ್ಪಾ ಸಮಣಾಚಾರಾನುಚ್ಛವಿಕಾ ಛಬ್ಬೀಸತಿ ಸಿಕ್ಖಾಪದಾನಿ ಪಕಾಸಿತಾನಿ।
1893.Dutiyecāti ‘‘na khambhakato antaraghare nisīdissāmī’’ti (pāci. 597) sikkhāpade ca. Catutthe cāti ‘‘na oguṇṭhito antaraghare nisīdissāmī’’ti (pāci. 599) sikkhāpade ca. Chaṭṭheti ‘‘na pallatthikāya antaraghare’’iccādi (pāci. 601) sikkhāpade ca. Iti evaṃ sāruppā samaṇācārānucchavikā chabbīsati sikkhāpadāni pakāsitāni.
ಪಠಮದುತಿಯತತಿಯಚತುತ್ಥಪಞ್ಚಮಛಟ್ಠಾನಿ।
Paṭhamadutiyatatiyacatutthapañcamachaṭṭhāni.
೧೮೯೪. ವಿಞ್ಞುನಾ ಭಿಕ್ಖುನಾ ಸಕ್ಕಚ್ಚಂ ಸತಿಯುತ್ತೇನ, ಪತ್ತಸಞ್ಞಿನಾ ಚ ಹುತ್ವಾ ಸಮಸೂಪೋವ ಪಿಣ್ಡಪಾತೋ ಗಹೇತಬ್ಬೋತಿ ಯೋಜನಾ। ಏವಂ ಏತಾಯ ಗಾಥಾಯ ಸಿಕ್ಖಾಪದತ್ತಯಂ ಸಙ್ಗಹಿತಂ। ಸಕ್ಕಚ್ಚನ್ತಿ ಸತಿಂ ಉಪಟ್ಠಪೇತ್ವಾ। ‘‘ಸತಿಯುತ್ತೇನಾ’’ತಿ ಇದಂ ‘‘ಸಕ್ಕಚ್ಚ’’ನ್ತಿ ಏತಸ್ಸ ಅತ್ಥಪದಂ। ‘‘ಸತಿಂ ಉಪಟ್ಠಪೇತ್ವಾ’’ತಿ (ಪಾಚಿ॰ ಅಟ್ಠ॰ ೬೦೨) ಹಿ ಅಟ್ಠಕಥಾಯಂ ವುತ್ತಂ। ಪತ್ತೇ ಸಞ್ಞಾ ಪತ್ತಸಞ್ಞಾ, ಸಾ ಅಸ್ಸ ಅತ್ಥೀತಿ ಪತ್ತಸಞ್ಞೀ, ಅನಞ್ಞವಿಹಿತೇನ ಅತ್ತನೋ ಭಾಜನೇಯೇವ ಉಪನಿಬದ್ಧಸಞ್ಞಿನಾತಿ ಅತ್ಥೋ।
1894. Viññunā bhikkhunā sakkaccaṃ satiyuttena, pattasaññinā ca hutvā samasūpova piṇḍapāto gahetabboti yojanā. Evaṃ etāya gāthāya sikkhāpadattayaṃ saṅgahitaṃ. Sakkaccanti satiṃ upaṭṭhapetvā. ‘‘Satiyuttenā’’ti idaṃ ‘‘sakkacca’’nti etassa atthapadaṃ. ‘‘Satiṃ upaṭṭhapetvā’’ti (pāci. aṭṭha. 602) hi aṭṭhakathāyaṃ vuttaṃ. Patte saññā pattasaññā, sā assa atthīti pattasaññī, anaññavihitena attano bhājaneyeva upanibaddhasaññināti attho.
೧೮೯೫. ಭತ್ತಚತುಬ್ಭಾಗೋತಿ ಭತ್ತಸ್ಸ ಚತುಬ್ಭಾಗಪ್ಪಮಾಣೋ। ತತೋ ಅಧಿಕಂ ಗಣ್ಹತೋ ದುಕ್ಕಟಂ।
1895.Bhattacatubbhāgoti bhattassa catubbhāgappamāṇo. Tato adhikaṃ gaṇhato dukkaṭaṃ.
೧೮೯೬. ‘‘ರಸರಸೇ’’ತಿ ವತ್ತಬ್ಬೇ ‘‘ರಸೇರಸೇ’’ತಿ ಗಾಥಾಬನ್ಧವಸೇನ ವುತ್ತಂ। ದ್ವೇ ಸೂಪೇ ಠಪೇತ್ವಾ ಅವಸೇಸಾನಿ ಓಲೋಣಿಸಾಕಸೂಪೇಯ್ಯಮಚ್ಛರಸಮಂಸರಸಾದೀನಿ ರಸರಸಾತಿ ವೇದಿತಬ್ಬಾನಿ। ಏತ್ಥ ಚ ‘‘ಓಲೋಣೀತಿ ದಧಿಕತಂ ಗೋರಸ’’ನ್ತಿ ಕೇಚಿ। ‘‘ಏಕಾ ಬ್ಯಞ್ಜನವಿಕತೀ’’ತಿ ಅಪರೇ। ‘‘ಯೋ ಕೋಚಿ ಸುದ್ಧೋ ಕಞ್ಜಿಕತಕ್ಕಾದಿರಸೋ’’ತಿ ಅಞ್ಞೇ। ಸಾಕಸೂಪೇಯ್ಯಗ್ಗಹಣೇನ ಯಾ ಕಾಚಿ ಸೂಪೇಯ್ಯಸಾಕೇಹಿ ಕತಾ ಬ್ಯಞ್ಜನವಿಕತಿ ವುತ್ತಾ। ಮಂಸರಸಾದೀನೀತಿ ಆದಿ-ಸದ್ದೇನ ಅವಸೇಸಾ ಸಬ್ಬಾಪಿ ಬ್ಯಞ್ಜನವಿಕತಿ ಸಙ್ಗಹಿತಾತಿ ದಟ್ಠಬ್ಬಂ। ಞಾತಕಾದೀನನ್ತಿ ಏತ್ಥ ‘‘ಸನ್ತಕಂ ಗಣ್ಹನ್ತಸ್ಸಾ’’ತಿ ಸೇಸೋ। ಅಞ್ಞತ್ಥಾಯಾತಿ ಏತ್ಥ ‘‘ಕತಂ ಗಣ್ಹನ್ತಸ್ಸಾ’’ತಿ ಸೇಸೋ। ಧನೇನಾತಿ ಏತ್ಥ ‘‘ಅತ್ತನೋ’’ತಿ ಚ ‘‘ಕೀತ’’ನ್ತಿ ಚ ‘‘ಗಣ್ಹನ್ತಸ್ಸಾ’’ತಿ ಚ ಸೇಸೋ। ಞಾತಕಾದೀನಂ ಸನ್ತಕಂ ಗಣ್ಹನ್ತಸ್ಸ, ಅಞ್ಞತ್ಥಾಯ ಕತಂ ಗಣ್ಹನ್ತಸ್ಸ, ಅತ್ತನೋ ಧನೇನ ಕೀತಂ ಗಣ್ಹನ್ತಸ್ಸ ಅನಾಪತ್ತೀತಿ ಅತ್ಥೋ।
1896. ‘‘Rasarase’’ti vattabbe ‘‘raserase’’ti gāthābandhavasena vuttaṃ. Dve sūpe ṭhapetvā avasesāni oloṇisākasūpeyyamaccharasamaṃsarasādīni rasarasāti veditabbāni. Ettha ca ‘‘oloṇīti dadhikataṃ gorasa’’nti keci. ‘‘Ekā byañjanavikatī’’ti apare. ‘‘Yo koci suddho kañjikatakkādiraso’’ti aññe. Sākasūpeyyaggahaṇena yā kāci sūpeyyasākehi katā byañjanavikati vuttā. Maṃsarasādīnīti ādi-saddena avasesā sabbāpi byañjanavikati saṅgahitāti daṭṭhabbaṃ. Ñātakādīnanti ettha ‘‘santakaṃ gaṇhantassā’’ti seso. Aññatthāyāti ettha ‘‘kataṃ gaṇhantassā’’ti seso. Dhanenāti ettha ‘‘attano’’ti ca ‘‘kīta’’nti ca ‘‘gaṇhantassā’’ti ca seso. Ñātakādīnaṃ santakaṃ gaṇhantassa, aññatthāya kataṃ gaṇhantassa, attano dhanena kītaṃ gaṇhantassa anāpattīti attho.
ಸತ್ತಮಟ್ಠಮನವಮಾನಿ।
Sattamaṭṭhamanavamāni.
೧೮೯೭. ಅಧಿಟ್ಠಾನೂಪಗಸ್ಸ ಪತ್ತಸ್ಸ ಮುಖವಟ್ಟಿಯಾ ಅನ್ತೋಲೇಖಾಪಮಾಣೇನ ಪೂರಿತೋವ ಗಹೇತಬ್ಬೋತಿ ಯೋಜನಾ।
1897. Adhiṭṭhānūpagassa pattassa mukhavaṭṭiyā antolekhāpamāṇena pūritova gahetabboti yojanā.
೧೮೯೮. ಅನಾಪತ್ತಿವಿಸಯಂ ದಸ್ಸೇತ್ವಾ ಆಪತ್ತಿವಿಸಯಂ ದಸ್ಸೇತುಮಾಹ ‘‘ತತ್ಥಾ’’ತಿಆದಿ। ತತ್ಥಾತಿ ಅಧಿಟ್ಠಾನೂಪಗೇ ಪತ್ತೇ। ಥೂಪೀಕತಂ ಕತ್ವಾತಿ ಏತ್ಥ ‘‘ದಿಯ್ಯಮಾನ’’ನ್ತಿ ಸೇಸೋ। ಯಥಾವುತ್ತಲೇಖಾತಿಕ್ಕಮೋ ಯಥಾ ಹೋತಿ, ಏವಂ ಥೂಪೀಕತಂ ದಿಯ್ಯಮಾನಂ ಗಣ್ಹತೋ ಆಪತ್ತಿ ದುಕ್ಕಟನ್ತಿ ಸಮ್ಬನ್ಧೋ। ಇಮಿನಾ ಪಠಮಂ ಥೂಪೀಕತಸ್ಸ ಅಧಿಟ್ಠಾನೂಪಗಪತ್ತಸ್ಸ ಪಚ್ಛಾ ಪಟಿಗ್ಗಹಣಞ್ಚ ಪಠಮಪಟಿಗ್ಗಹಿತಪತ್ತೇ ಪಚ್ಛಾ ಭೋಜನಸ್ಸ ಥೂಪೀಕತಸ್ಸ ಪಟಿಗ್ಗಹಣಞ್ಚ ನಿವಾರಿತನ್ತಿ ವೇದಿತಬ್ಬಂ।
1898. Anāpattivisayaṃ dassetvā āpattivisayaṃ dassetumāha ‘‘tatthā’’tiādi. Tatthāti adhiṭṭhānūpage patte. Thūpīkataṃ katvāti ettha ‘‘diyyamāna’’nti seso. Yathāvuttalekhātikkamo yathā hoti, evaṃ thūpīkataṃ diyyamānaṃ gaṇhato āpatti dukkaṭanti sambandho. Iminā paṭhamaṃ thūpīkatassa adhiṭṭhānūpagapattassa pacchā paṭiggahaṇañca paṭhamapaṭiggahitapatte pacchā bhojanassa thūpīkatassa paṭiggahaṇañca nivāritanti veditabbaṃ.
೧೮೯೯. ಕಾಲಿಕತ್ತಯಮೇವ ಚ ಥೂಪೀಕತಂ ವಟ್ಟತೇವಾತಿ ಯೋಜನಾ। ಸೇಸೇತಿ ಅನಧಿಟ್ಠಾನೂಪಗೇ ಪತ್ತೇ। ಸಬ್ಬನ್ತಿ ಚತುಬ್ಬಿಧಂ ಕಾಲಿಕಂ ಥೂಪೀಕತಂ ವಟ್ಟತೀತಿ ಯೋಜನಾ।
1899. Kālikattayameva ca thūpīkataṃ vaṭṭatevāti yojanā. Seseti anadhiṭṭhānūpage patte. Sabbanti catubbidhaṃ kālikaṃ thūpīkataṃ vaṭṭatīti yojanā.
೧೯೦೦. ಪೇಸೇತೀತಿ ಏತ್ಥ ‘‘ಭಿಕ್ಖೂ’’ತಿ ಸೇಸೋ। ಭಿಕ್ಖು ಭಿಕ್ಖೂನಂ ಯದಿ ಪೇಸೇತೀತಿ ಯೋಜನಾ। ‘‘ವಿಹಾರಂ ಪೇಸೇತುಂ ವಟ್ಟತೀ’’ತಿ (ಪಾಚಿ॰ ಅಟ್ಠ॰ ೬೦೫) ಅಟ್ಠಕಥಾಯ ಅಧಿಪ್ಪಾಯಂ ದಸ್ಸೇತುಂ ‘‘ಭಿಕ್ಖೂನ’’ನ್ತಿ ವಚನೇನ ಪಟಿಗ್ಗಹಣಂ ಅವಿಜಹಿತ್ವಾ ಭಿಕ್ಖುನಾ ಏವ ಪೇಸಿತಂ ಗಣ್ಹನ್ತಾನಂ ಭಿಕ್ಖೂನಂ ಅನಾಪತ್ತೀತಿ ದೀಪಿತಂ ಹೋತಿ। ಅಞ್ಞಥಾ ‘‘ಪೂರೇತುಂ ವಟ್ಟತೀ’’ತಿ ಏತ್ತಕಮೇವ ವತ್ತಬ್ಬನ್ತಿ ವಿಞ್ಞಾಯತಿ।
1900.Pesetīti ettha ‘‘bhikkhū’’ti seso. Bhikkhu bhikkhūnaṃ yadi pesetīti yojanā. ‘‘Vihāraṃ pesetuṃ vaṭṭatī’’ti (pāci. aṭṭha. 605) aṭṭhakathāya adhippāyaṃ dassetuṃ ‘‘bhikkhūna’’nti vacanena paṭiggahaṇaṃ avijahitvā bhikkhunā eva pesitaṃ gaṇhantānaṃ bhikkhūnaṃ anāpattīti dīpitaṃ hoti. Aññathā ‘‘pūretuṃ vaṭṭatī’’ti ettakameva vattabbanti viññāyati.
೧೯೦೧. ಪಕ್ಖಿಪ್ಪಮಾನನ್ತಿ ಮುಖವಟ್ಟಿತೋ ಉಚ್ಚಂ ಕತ್ವಾ ಮಜ್ಝೇ ಪಕ್ಖಿಪಿಯಮಾನಂ। ಫಲಾದಿಕನ್ತಿ ಆದಿ-ಸದ್ದೇನ ಓದನಾದಿಮ್ಪಿ ಸಙ್ಗಣ್ಹಾತಿ। ಹೇಟ್ಠಾ ಓರೋಹತೀತಿ ಸಮನ್ತಾ ಓಕಾಸಸಮ್ಭವತೋ ಚಾಲಿಯಮಾನಂ ಮುಖವಟ್ಟಿಪ್ಪಮಾಣತೋ ಹೇಟ್ಠಾ ಭಸ್ಸತಿ।
1901.Pakkhippamānanti mukhavaṭṭito uccaṃ katvā majjhe pakkhipiyamānaṃ. Phalādikanti ādi-saddena odanādimpi saṅgaṇhāti. Heṭṭhāorohatīti samantā okāsasambhavato cāliyamānaṃ mukhavaṭṭippamāṇato heṭṭhā bhassati.
೧೯೦೨. ತಕ್ಕೋಲಕಾದೀನನ್ತಿ ಏತ್ಥ ಆದಿ-ಸದ್ದೇನ ಪೂಗಫಲಾದೀನಂ ಸಙ್ಗಹೋ। ಠಪೇತ್ವಾತಿ ಭತ್ತಮತ್ಥಕೇ ನಿಕ್ಖಿಪಿತ್ವಾ। ವಟಂಸಕನ್ತಿ ಅವಟಂಸಕಂ।
1902.Takkolakādīnanti ettha ādi-saddena pūgaphalādīnaṃ saṅgaho. Ṭhapetvāti bhattamatthake nikkhipitvā. Vaṭaṃsakanti avaṭaṃsakaṃ.
೧೯೦೩. ಪೂವಸ್ಸಾತಿ ವಿಕಾರಸಮ್ಬನ್ಧೇ ಸಾಮಿವಚನಂ, ಪೂವವಟಂಸಕನ್ತಿ ವುತ್ತಂ ಹೋತಿ। ಪೂವಸ್ಸ ಯಾವಕಾಲಿಕತ್ತಾ ಆಹ ‘‘ಇದಂ ಥೂಪೀಕತಂ ಸಿಯಾ’’ತಿ।
1903.Pūvassāti vikārasambandhe sāmivacanaṃ, pūvavaṭaṃsakanti vuttaṃ hoti. Pūvassa yāvakālikattā āha ‘‘idaṃ thūpīkataṃ siyā’’ti.
೧೯೦೪. ಪಣ್ಣಾನಂ ವಿಸುಂ ಭಾಜನತ್ತಾ ಆಹ ‘‘ವಟ್ಟತೀ’’ತಿ।
1904. Paṇṇānaṃ visuṃ bhājanattā āha ‘‘vaṭṭatī’’ti.
೧೯೦೫. ಅಸ್ಸಾತಿ ಭಿಕ್ಖುಸ್ಸ। ತಂ ತು ಸಬ್ಬನ್ತಿ ‘‘ಥೂಪೀಕತತ್ತಾ ನ ವಟ್ಟತೀ’’ತಿ ವುತ್ತಂ ತಂ ಪನ ಸಬ್ಬಂ। ಗಹಿತಂ ಸುಗಹಿತನ್ತಿ ವಿರಾಧೇತ್ವಾ ಪಟಿಗ್ಗಹಿತಂ ಚೇ, ಸುಪ್ಪಟಿಗ್ಗಹಿತಂ।
1905.Assāti bhikkhussa. Taṃ tu sabbanti ‘‘thūpīkatattā na vaṭṭatī’’ti vuttaṃ taṃ pana sabbaṃ. Gahitaṃ sugahitanti virādhetvā paṭiggahitaṃ ce, suppaṭiggahitaṃ.
ದಸಮಂ।
Dasamaṃ.
ತತಿಯೋ ವಗ್ಗೋ।
Tatiyo vaggo.
೧೯೦೬. ‘‘ಉಪರಿ ಓಧಿ’’ನ್ತಿ ಪದಚ್ಛೇದೋ। ಉಪರೀತಿ ಭತ್ತಸ್ಸ ಉಪರಿ। ಓಧಿನ್ತಿ ಪರಿಚ್ಛೇದಂ। ಪಟಿಪಾಟಿಯಾತಿ ಅತ್ತನೋ ದಿಸಾಯ ಪರಿಯನ್ತತೋ ಪಟ್ಠಾಯ ಅನುಕ್ಕಮೇನ।
1906. ‘‘Upari odhi’’nti padacchedo. Uparīti bhattassa upari. Odhinti paricchedaṃ. Paṭipāṭiyāti attano disāya pariyantato paṭṭhāya anukkamena.
೧೯೦೭. ಅಞ್ಞೇಸನ್ತಿ ಏತ್ಥ ‘‘ದೇನ್ತೋ’’ತಿ ಸೇಸೋ। ಅತ್ತನೋ ಭತ್ತಂ ಅಞ್ಞೇಸಂ ದೇನ್ತೋ ಅಞ್ಞಸ್ಸ ಭಾಜನೇ ಆಕಿರಂ ಆಕಿರನ್ತೋ ಪನ ಪಟಿಪಾಟಿಂ ವಿನಾಪಿ ತಹಿಂ ತಹಿಂ ಓಮಸತಿ ಚೇ, ನತ್ಥಿ ದೋಸೋತಿ ಯೋಜನಾ। ಉತ್ತರಿಭಙ್ಗಕಂ ತಥಾ ಆಕಿರನ್ತೋ ತತ್ಥ ತತ್ಥ ಓಮಸತಿ, ನತ್ಥಿ ದೋಸೋತಿ ಯೋಜನಾ । ಭುಞ್ಜನತ್ಥಾಯ ಗಣ್ಹನ್ತೋಪಿ ಚೇತ್ಥ ವತ್ತಬ್ಬೋ। ಉತ್ತರಿಭಙ್ಗಂ ನಾಮ ಬ್ಯಞ್ಜನಂ।
1907.Aññesanti ettha ‘‘dento’’ti seso. Attano bhattaṃ aññesaṃ dento aññassa bhājane ākiraṃ ākiranto pana paṭipāṭiṃ vināpi tahiṃ tahiṃ omasati ce, natthi dosoti yojanā. Uttaribhaṅgakaṃ tathā ākiranto tattha tattha omasati, natthi dosoti yojanā . Bhuñjanatthāya gaṇhantopi cettha vattabbo. Uttaribhaṅgaṃ nāma byañjanaṃ.
ತತಿಯಂ।
Tatiyaṃ.
೧೯೦೮. ಮತ್ಥಕಂ ಓಮದ್ದಿತ್ವಾ ಪರಿಭುಞ್ಜತೋ ದೋಸೋತಿ ಯೋಜನಾ। ‘‘ಥೂಪಕತೋತಿ ಮತ್ಥಕತೋ, ವೇಮಜ್ಝತೋ’’ತಿ (ಪಾಚಿ॰ ಅಟ್ಠ॰ ೬೧೦) ಅಟ್ಠಕಥಾವಚನತೋ ಮತ್ಥಕನ್ತಿ ಏತ್ಥ ಭತ್ತಮತ್ಥಕಮಾಹ। ಓಮದ್ದಿತ್ವಾತಿ ಹತ್ಥೇನ ಭತ್ತಂ ಅವಮದ್ದಿತ್ವಾ।
1908. Matthakaṃ omadditvā paribhuñjato dosoti yojanā. ‘‘Thūpakatoti matthakato, vemajjhato’’ti (pāci. aṭṭha. 610) aṭṭhakathāvacanato matthakanti ettha bhattamatthakamāha. Omadditvāti hatthena bhattaṃ avamadditvā.
೧೯೦೯. ಸೇಸಕೇ ಪರಿತ್ತೇಪಿ ಚಾತಿ ಅವಸಿಟ್ಠೇ ಅಪ್ಪಕೇಪಿ ಚ। ಸಂಕಡ್ಢಿತ್ವಾನಾತಿ ತಸ್ಮಿಂ ತಸ್ಮಿಂ ಠಾನೇ ಠಿತಂ ಸಂಹರಿತ್ವಾ। ಏಕತೋ ಪನ ಮದ್ದಿತ್ವಾ ಭುಞ್ಜತೋ ಅನಾಪತ್ತೀತಿ ಯೋಜನಾ।
1909.Sesake parittepi cāti avasiṭṭhe appakepi ca. Saṃkaḍḍhitvānāti tasmiṃ tasmiṃ ṭhāne ṭhitaṃ saṃharitvā. Ekato pana madditvā bhuñjato anāpattīti yojanā.
ಪಞ್ಚಮಂ।
Pañcamaṃ.
೧೯೧೦. ಭಿಯ್ಯೋಕಮ್ಯತಾಹೇತೂತಿ ಪುನ ಗಣ್ಹಿತುಕಾಮತಾಹೇತು। ಸೂಪಂ ವಾತಿ ಮುಗ್ಗಾದಿಸೂಪಂ ವಾ। ಬ್ಯಞ್ಜನಂ ವಾತಿ ಉತ್ತರಿಭಙ್ಗಂ ವಾ।
1910.Bhiyyokamyatāhetūti puna gaṇhitukāmatāhetu. Sūpaṃ vāti muggādisūpaṃ vā. Byañjanaṃ vāti uttaribhaṅgaṃ vā.
ಛಟ್ಠಂ।
Chaṭṭhaṃ.
೧೯೧೧. ವಿಞ್ಞತ್ತಿಯನ್ತಿ ಸೂಪೋದನವಿಞ್ಞತ್ತಿಯಂ। ‘‘ಞಾತಕಾನಂ ವಾ ಪವಾರಿತಾನಂ ವಾ ಅಞ್ಞಸ್ಸ ಅತ್ಥಾಯ ವಾ ಅತ್ತನೋ ಧನೇನ ವಾ’’ತಿ ಇದಂ ಅನಾಪತ್ತಿಯಂ ಅಧಿಕಂ। ಗಿಲಾನೋಪಿ ಹುತ್ವಾ ಪರೇಸಂ ಪತ್ತಂ ಉಜ್ಝಾನಸಞ್ಞಾಯ ಓಲೋಕೇನ್ತಸ್ಸ ಆಪತ್ತಿ ಹೋತೀತಿ ಆಹ ‘‘ಉಜ್ಝಾನೇ ಗಿಲಾನೋಪಿ ನ ಮುಚ್ಚತೀ’’ತಿ। ಉಜ್ಝಾನೇತಿ ನಿಮಿತ್ತತ್ಥೇ ಭುಮ್ಮಂ।
1911.Viññattiyanti sūpodanaviññattiyaṃ. ‘‘Ñātakānaṃ vā pavāritānaṃ vā aññassa atthāya vā attano dhanena vā’’ti idaṃ anāpattiyaṃ adhikaṃ. Gilānopi hutvā paresaṃ pattaṃ ujjhānasaññāya olokentassa āpatti hotīti āha ‘‘ujjhāne gilānopi na muccatī’’ti. Ujjhāneti nimittatthe bhummaṃ.
೧೯೧೨. ದಸ್ಸಾಮೀತಿ ಇಮಸ್ಸ ಭತ್ತಂ ಓಲೋಕೇತ್ವಾ ‘‘ಯಂ ತತ್ಥ ನತ್ಥಿ, ತಂ ದಸ್ಸಾಮೀ’’ತಿ ವಾ ‘‘ದಾಪೇಸ್ಸಾಮೀ’’ತಿ ವಾ। ಅವಮಞ್ಞಿತ್ವಾ ಉಜ್ಝಾಯನಚಿತ್ತಂ ಉಜ್ಝಾನಂ, ಉಜ್ಝಾನೇ ಸಞ್ಞಾ ಉಜ್ಝಾನಸಞ್ಞಾ, ಸಾ ಅಸ್ಸ ಅತ್ಥೀತಿ ವಿಗ್ಗಹೋ। ನಉಜ್ಝಾನಸಞ್ಞಿನೋ ಚ ಅನಾಪತ್ತೀತಿ ಞಾತಬ್ಬನ್ತಿ ಯೋಜನಾ।
1912.Dassāmīti imassa bhattaṃ oloketvā ‘‘yaṃ tattha natthi, taṃ dassāmī’’ti vā ‘‘dāpessāmī’’ti vā. Avamaññitvā ujjhāyanacittaṃ ujjhānaṃ, ujjhāne saññā ujjhānasaññā, sā assa atthīti viggaho. Naujjhānasaññino ca anāpattīti ñātabbanti yojanā.
ಸತ್ತಮಟ್ಠಮಾನಿ।
Sattamaṭṭhamāni.
೧೯೧೩. ‘‘ತೇಸಂ ಮಜ್ಝಪ್ಪಮಾಣೇನಾ’’ತಿ ಇಮಿನಾ ಅಸಾರುಪ್ಪವಸೇನ ಖುದ್ದಕಪಟಿಕ್ಖೇಪೋ ಕತೋತಿ ವೇದಿತಬ್ಬೋ। ‘‘ನಾತಿಮಹನ್ತ’’ನ್ತಿ ಚ ಅತಿಮಹನ್ತಸ್ಸೇವ ಪಟಿಕ್ಖಿತ್ತತ್ತಾ ಖುದ್ದಕೇ ಆಪತ್ತಿ ನ ದಿಸ್ಸತೀತಿ। ಕಬಳೋತಿ ಆಲೋಪೋ।
1913.‘‘Tesaṃ majjhappamāṇenā’’ti iminā asāruppavasena khuddakapaṭikkhepo katoti veditabbo. ‘‘Nātimahanta’’nti ca atimahantasseva paṭikkhittattā khuddake āpatti na dissatīti. Kabaḷoti ālopo.
೧೯೧೪. ಮೂಲಖಾದನೀಯಾದಿಕೇ ಸಬ್ಬತ್ಥ ಖಜ್ಜಕೇ ಪನಾತಿ ಯೋಜನಾ। ಫಲಾಫಲೇತಿ ಖುದ್ದಕೇ, ಮಹನ್ತೇ ಚ ಫಲೇ।
1914. Mūlakhādanīyādike sabbattha khajjake panāti yojanā. Phalāphaleti khuddake, mahante ca phale.
ನವಮಂ।
Navamaṃ.
೧೯೧೫. ದಸಮೇ ನತ್ಥಿ ಕಿಞ್ಚಿ ವತ್ತಬ್ಬಂ।
1915. Dasame natthi kiñci vattabbaṃ.
ದಸಮಂ।
Dasamaṃ.
ಚತುತ್ಥೋ ವಗ್ಗೋ।
Catuttho vaggo.
೧೯೧೬. ‘‘ಅನಾಹಟೇ’’ತಿ ಏತಸ್ಸ ಅತ್ಥಪದಂ ‘‘ಮುಖದ್ವಾರಂ ಅಪ್ಪತ್ತೇ’’ತಿ। ಯಥಾಹ ‘‘ಅನಾಹಟೇತಿ ಅನಾಹರಿತೇ, ಮುಖದ್ವಾರಂ ಅಸಮ್ಪಾಪಿತೇತಿ ಅತ್ಥೋ’’ತಿ (ಪಾಚಿ॰ ಅಟ್ಠ॰ ೬೧೭)। ‘‘ಮುಖದ್ವಾರಂ ವಿವರನ್ತಸ್ಸಾ’’ತಿ ಏತ್ತಕೇ ವುತ್ತೇ ಮುಖದ್ವಾರ-ಸದ್ದಸ್ಸ ಸಮ್ಬನ್ಧಿಸದ್ದತ್ತಾ ಕಸ್ಸಾತಿ ಅಪೇಕ್ಖಾಯ ‘‘ಮುಖದ್ವಾರಂ ವಿವರಿಸ್ಸಾಮೀ’’ತಿ ಅತ್ತನೋಪದೇಕವಚನೇನ ಬ್ಯಞ್ಜಿತಮೇವತ್ಥಂ ಪಕಾಸೇತುಂ ಅತ್ತನೋ-ಗಹಣಂ ಕತನ್ತಿ ವೇದಿತಬ್ಬಂ। ಚ-ಸದ್ದೋ ಏವಕಾರತ್ಥೋ, ಅಪ್ಪತ್ತೇ ವಾತಿ ಯೋಜೇತಬ್ಬೋ, ಅಸಮ್ಪತ್ತೇಯೇವಾತಿ ಅತ್ಥೋ।
1916.‘‘Anāhaṭe’’ti etassa atthapadaṃ ‘‘mukhadvāraṃ appatte’’ti. Yathāha ‘‘anāhaṭeti anāharite, mukhadvāraṃ asampāpiteti attho’’ti (pāci. aṭṭha. 617). ‘‘Mukhadvāraṃ vivarantassā’’ti ettake vutte mukhadvāra-saddassa sambandhisaddattā kassāti apekkhāya ‘‘mukhadvāraṃ vivarissāmī’’ti attanopadekavacanena byañjitamevatthaṃ pakāsetuṃ attano-gahaṇaṃ katanti veditabbaṃ. Ca-saddo evakārattho, appatte vāti yojetabbo, asampatteyevāti attho.
ಪಠಮಂ।
Paṭhamaṃ.
೧೯೧೭. ಸಕಲಂ ಹತ್ಥನ್ತಿ ಏತ್ಥ ಹತ್ಥ-ಸದ್ದೋ ತದೇಕದೇಸೇಸು ಅಙ್ಗುಲೀಸು ದಟ್ಠಬ್ಬೋ। ‘‘ಹತ್ಥಮುದ್ದಾ’’ತಿಆದೀಸು ವಿಯ ಸಮುದಾಯೇ ಪವತ್ತವೋಹಾರಸ್ಸ ಅವಯವೇಪಿ ಪವತ್ತನತೋ ಏಕಙ್ಗುಲಿಮ್ಪಿ ಮುಖೇ ಪಕ್ಖಿಪಿತುಂ ನ ವಟ್ಟತಿ।
1917.Sakalaṃhatthanti ettha hattha-saddo tadekadesesu aṅgulīsu daṭṭhabbo. ‘‘Hatthamuddā’’tiādīsu viya samudāye pavattavohārassa avayavepi pavattanato ekaṅgulimpi mukhe pakkhipituṃ na vaṭṭati.
೧೯೧೮. ಅಸ್ಸಾತಿ ಭಿಕ್ಖುನೋ। ಬ್ಯಾಹರನ್ತಸ್ಸಾತಿ ಕಥೇನ್ತಸ್ಸ।
1918.Assāti bhikkhuno. Byāharantassāti kathentassa.
ದುತಿಯತತಿಯಾನಿ।
Dutiyatatiyāni.
೧೯೨೦. ಪಿಣ್ಡುಕ್ಖೇಪಕನ್ತಿ ಪಿಣ್ಡಂ ಉಕ್ಖಿಪಿತ್ವಾ ಉಕ್ಖಿಪಿತ್ವಾ। ಇಧಾಪಿ ಖಜ್ಜಕಫಲಾಫಲೇಸು ಅನಾಪತ್ತಿ। ಕಬಳಚ್ಛೇದಕಮ್ಪಿ ವಾತಿ ಕಬಳಂ ಛಿನ್ದಿತ್ವಾ। ಇಧ ಖಜ್ಜಕಫಲಾಫಲೇಹಿ ಸದ್ಧಿಂ ಉತ್ತರಿಭಙ್ಗೇಪಿ ಅನಾಪತ್ತಿ। ಗಣ್ಡೇ ಕತ್ವಾತಿ ಏತ್ಥ ಫಲಾಫಲಮತ್ತೇಯೇವ ಅನಾಪತ್ತಿ।
1920.Piṇḍukkhepakanti piṇḍaṃ ukkhipitvā ukkhipitvā. Idhāpi khajjakaphalāphalesu anāpatti. Kabaḷacchedakampi vāti kabaḷaṃ chinditvā. Idha khajjakaphalāphalehi saddhiṃ uttaribhaṅgepi anāpatti. Gaṇḍe katvāti ettha phalāphalamatteyeva anāpatti.
ಚತುತ್ಥಪಞ್ಚಮಛಟ್ಠಾನಿ।
Catutthapañcamachaṭṭhāni.
೧೯೨೧-೨. ಹತ್ಥಂ ನಿದ್ಧುನಿತ್ವಾನಾತಿ ಹತ್ಥಂ ನಿದ್ಧುನಿತ್ವಾ ಭತ್ತಂ ಭುಞ್ಜತೋತಿ ಚ ಸಮ್ಬನ್ಧೋ। ಸಿತ್ಥಾವಕಾರಕನ್ತಿ ಸಿತ್ಥಾನಿ ಅವಕಿರಿತ್ವಾ ಅವಕಿರಿತ್ವಾ। ಜಿವ್ಹಾನಿಚ್ಛಾರಕಂ ವಾಪೀತಿ ಜಿವ್ಹಂ ನಿಚ್ಛಾರೇತ್ವಾ ನಿಚ್ಛಾರೇತ್ವಾ। ಚಪು ಚಪೂತಿ ವಾತಿ ‘‘ಚಪು ಚಪೂ’’ತಿ ಏವಂ ಸದ್ದಂ ಕತ್ವಾ। ಸತ್ತಮೇತಿ ‘‘ನ ಹತ್ಥನಿದ್ಧುನಕ’’ನ್ತಿ ಸಿಕ್ಖಾಪದೇ। ಅಟ್ಠಮೇತಿ ‘‘ನ ಸಿತ್ಥಾವಕಾರಕ’’ನ್ತಿ ಸಿಕ್ಖಾಪದೇ। ಕಚವರುಜ್ಝನೇತಿ ಕಚವರಾಪನಯನೇ।
1921-2.Hatthaṃ niddhunitvānāti hatthaṃ niddhunitvā bhattaṃ bhuñjatoti ca sambandho. Sitthāvakārakanti sitthāni avakiritvā avakiritvā. Jivhānicchārakaṃ vāpīti jivhaṃ nicchāretvā nicchāretvā. Capu capūti vāti ‘‘capu capū’’ti evaṃ saddaṃ katvā. Sattameti ‘‘na hatthaniddhunaka’’nti sikkhāpade. Aṭṭhameti ‘‘na sitthāvakāraka’’nti sikkhāpade. Kacavarujjhaneti kacavarāpanayane.
ಸತ್ತಮಟ್ಠಮನವಮದಸಮಾನಿ।
Sattamaṭṭhamanavamadasamāni.
ಪಞ್ಚಮೋ ವಗ್ಗೋ।
Pañcamo vaggo.
೧೯೨೩. ‘‘ಸುರು ಸುರೂ’’ತಿ ಏವಂ ಸದ್ದಂ ಕತ್ವಾ ನ ಭೋತ್ತಬ್ಬನ್ತಿ ಯೋಜನಾ। ಹತ್ಥನಿಲ್ಲೇಹಕಂ ವಾಪೀತಿ ಹತ್ಥಂ ನಿಲ್ಲೇಹಿತ್ವಾ ನಿಲ್ಲೇಹಿತ್ವಾ।
1923. ‘‘Suru surū’’ti evaṃ saddaṃ katvā na bhottabbanti yojanā. Hatthanillehakaṃ vāpīti hatthaṃ nillehitvā nillehitvā.
೧೯೨೪. ಫಾಣಿತಂ , ಘನಯಾಗುಂ ವಾ ಅಙ್ಗುಲೀಹಿ ಗಹೇತ್ವಾ ಅಙ್ಗುಲಿಯೋ ಮುಖೇ ಪವೇಸೇತ್ವಾಪಿ ತಂ ಭೋತ್ತುಂ ವಟ್ಟತೀತಿ ಯೋಜನಾ।
1924. Phāṇitaṃ , ghanayāguṃ vā aṅgulīhi gahetvā aṅguliyo mukhe pavesetvāpi taṃ bhottuṃ vaṭṭatīti yojanā.
೧೯೨೫. ಏಕಾಯ ಅಙ್ಗುಲಿಕಾಯಪಿ ಪತ್ತೋ ನ ಲೇಹಿತಬ್ಬೋವ। ಜಿವ್ಹಾಯ ಏಕಓಟ್ಠೋಪಿ ನ ನಿಲ್ಲೇಹಿತಬ್ಬಕೋತಿ ಯೋಜನಾ। ಬಹಿ ಓಟ್ಠಞ್ಚ ಜಿವ್ಹಾಯ ನ ಲೇಹಿತಬ್ಬಂ। ಓಟ್ಠೇ ಲಗ್ಗಂ ಸಿತ್ಥಾದಿಂ ಯಂ ಕಿಞ್ಚಿ ಉಭೋಹಿ ಓಟ್ಠಮಂಸೇಹಿಯೇವ ಗಹೇತ್ವಾ ಅನ್ತೋ ಕಾತುಂ ವಟ್ಟತಿ।
1925. Ekāya aṅgulikāyapi patto na lehitabbova. Jivhāya ekaoṭṭhopi na nillehitabbakoti yojanā. Bahi oṭṭhañca jivhāya na lehitabbaṃ. Oṭṭhe laggaṃ sitthādiṃ yaṃ kiñci ubhohi oṭṭhamaṃsehiyeva gahetvā anto kātuṃ vaṭṭati.
ಪಠಮದುತಿಯತತಿಯಚತುತ್ಥಾನಿ।
Paṭhamadutiyatatiyacatutthāni.
೧೯೨೬-೮. ನ ಚ ಗಹೇತಬ್ಬಂ, ಪಟಿಕ್ಕೂಲವಸೇನ ಪಟಿಕ್ಖಿತ್ತನ್ತಿ ಯೋಜನಾ। ಹಿ-ಇತಿ ‘‘ಯಸ್ಮಾ’’ತಿ ಏತಸ್ಸ ಅತ್ಥೇ, ತೇನೇವ ವಕ್ಖತಿ ‘‘ತಸ್ಮಾ’’ತಿ। ‘‘ಪಾನೀಯಥಾಲಕ’’ನ್ತಿ ಇದಂ ಉಪಲಕ್ಖಣಮತ್ತಂ ಸಙ್ಖಾದೀನಮ್ಪಿ ತಥಾ ನಗಹೇತಬ್ಬತ್ತಾ। ಸರಾವಂ ವಾತಿ ತಟ್ಟಕಂ ವಾ।
1926-8.Na ca gahetabbaṃ, paṭikkūlavasena paṭikkhittanti yojanā. Hi-iti ‘‘yasmā’’ti etassa atthe, teneva vakkhati ‘‘tasmā’’ti. ‘‘Pānīyathālaka’’nti idaṃ upalakkhaṇamattaṃ saṅkhādīnampi tathā nagahetabbattā. Sarāvaṃ vāti taṭṭakaṃ vā.
ಅನಾಮಿಸೇನ ಹತ್ಥೇನಾತಿ ಆಮಿಸರಹಿತೇನ ಹತ್ಥೇಕದೇಸೇನ। ಯಥಾಹ ‘‘ಸಚೇ ಪನ ಹತ್ಥಸ್ಸ
Anāmisena hatthenāti āmisarahitena hatthekadesena. Yathāha ‘‘sace pana hatthassa
ಏಕದೇಸೋ ಆಮಿಸಮಕ್ಖಿತೋ ನ ಹೋತಿ, ತೇನ ಪದೇಸೇನ ಗಹೇತುಂ ವಟ್ಟತೀ’’ತಿ (ಪಾಚಿ॰ ಅಟ್ಠ॰ ೬೩೧)। ಆಮಿಸಮಕ್ಖಿತೇನೇವ ಹತ್ಥೇನ ‘‘ಧೋವಿಸ್ಸಾಮೀ’’ತಿ ವಾ ‘‘ಧೋವಾಪೇಸ್ಸಾಮೀ’’ತಿ ವಾ ಗಣ್ಹನ್ತಸ್ಸ ಪನ ಅನಾಪತ್ತಿ।
Ekadeso āmisamakkhito na hoti, tena padesena gahetuṃ vaṭṭatī’’ti (pāci. aṭṭha. 631). Āmisamakkhiteneva hatthena ‘‘dhovissāmī’’ti vā ‘‘dhovāpessāmī’’ti vā gaṇhantassa pana anāpatti.
ಪಞ್ಚಮಂ।
Pañcamaṃ.
೧೯೨೯. ಉದ್ಧರಿತ್ವಾತಿ ಸಸಿತ್ಥಕಾ ಪತ್ತಧೋವನಾ ಸಿತ್ಥಕಾನಿ ಉದ್ಧರಿತ್ವಾ ತಂ ಪತ್ತಧೋವನೋದಕಂ ಘರಾ ಬಹಿ ಅನ್ತರಘರೇ ಛಡ್ಡೇನ್ತಸ್ಸ ಅನಾಪತ್ತಿ। ಭಿನ್ದಿತ್ವಾತಿ ಸಸಿತ್ಥಕೇ ಪತ್ತಧೋವನೇ ಸಿತ್ಥಕಾನಿ ಮದ್ದಿತ್ವಾ ಉದಕೇನ ಸಮ್ಭಿನ್ದಿತ್ವಾ ಉದಕಗತಿಕಾನೇವ ಕತ್ವಾ ತಂ ಉದಕಂ ಘರಾ ಬಹಿ ಅನ್ತರಘರೇ ಛಡ್ಡೇನ್ತಸ್ಸ ಅನಾಪತ್ತಿ। ಗಹೇತ್ವಾತಿ ಸಸಿತ್ಥಕಂ ಪತ್ತಧೋವನೋದಕಂ ಗಹೇತ್ವಾ ಪಟಿಗ್ಗಹೇ ಛಡ್ಡೇನ್ತಸ್ಸ ಅನಾಪತ್ತಿ। ಸಸಿತ್ಥಕಂ ಪತ್ತಧೋವನೋದಕಂ ಘರಾ ಬಹಿ ನೀಹರಿತ್ವಾ ಅನ್ತರಘರೇ ಛಡ್ಡೇನ್ತಸ್ಸ ಅನಾಪತ್ತೀತಿ ಅಜ್ಝಾಹಾರಯೋಜನಾ ವೇದಿತಬ್ಬಾ। ಏತ್ಥ ಪಟಿಗ್ಗಹೋ ನಾಮ ಖೇಳಮಲ್ಲಾದಿಕೋ ಉಚ್ಛಿಟ್ಠಹತ್ಥಧೋವನಭಾಜನವಿಸೇಸೋ।
1929.Uddharitvāti sasitthakā pattadhovanā sitthakāni uddharitvā taṃ pattadhovanodakaṃ gharā bahi antaraghare chaḍḍentassa anāpatti. Bhinditvāti sasitthake pattadhovane sitthakāni madditvā udakena sambhinditvā udakagatikāneva katvā taṃ udakaṃ gharā bahi antaraghare chaḍḍentassa anāpatti. Gahetvāti sasitthakaṃ pattadhovanodakaṃ gahetvā paṭiggahe chaḍḍentassa anāpatti. Sasitthakaṃ pattadhovanodakaṃ gharā bahi nīharitvā antaraghare chaḍḍentassa anāpattīti ajjhāhārayojanā veditabbā. Ettha paṭiggaho nāma kheḷamallādiko ucchiṭṭhahatthadhovanabhājanaviseso.
ಛಟ್ಠಂ।
Chaṭṭhaṃ.
೧೯೩೦. ಛತ್ತಂ ಯಂ ಕಿಞ್ಚೀತಿ ‘‘ಛತ್ತಂ ನಾಮ ತೀಣಿ ಛತ್ತಾನಿ ಸೇತಚ್ಛತ್ತಂ ಕಿಲಞ್ಜಚ್ಛತ್ತಂ ಪಣ್ಣಚ್ಛತ್ತಂ ಮಣ್ಡಲಬದ್ಧಂ ಸಲಾಕಬದ್ಧ’’ನ್ತಿ (ಪಾಚಿ॰ ೬೩೪) ವುತ್ತೇಸು ತೀಸು ಛತ್ತೇಸು ಅಞ್ಞತರಂ। ಏತ್ಥ ಚ ಸೇತಚ್ಛತ್ತನ್ತಿ ವತ್ಥಪಲಿಗುಣ್ಠಿತಂ ಪಣ್ಡರಚ್ಛತ್ತಂ। ಕಿಲಞ್ಜಚ್ಛತ್ತನ್ತಿ ವಿಲೀವಚ್ಛತ್ತಂ। ಪಣ್ಣಚ್ಛತ್ತನ್ತಿ ತಾಲಪಣ್ಣಾದೀಹಿ ಯೇಹಿ ಕೇಹಿಚಿ ಕತಂ। ‘‘ಮಣ್ಡಲಬದ್ಧಂ ಸಲಾಕಬದ್ಧ’’ನ್ತಿ ಇದಂ ಪನ ತಿಣ್ಣಮ್ಪಿ ಛತ್ತಾನಂ ಪಞ್ಜರದಸ್ಸನತ್ಥಂ ವುತ್ತಂ। ತಾನಿ ಹಿ ಮಣ್ಡಲಬದ್ಧಾನಿ ಚೇವ ಹೋನ್ತಿ ಸಲಾಕಬದ್ಧಾನಿ ಚ। ‘‘ಯಂ ಕಿಞ್ಚೀ’’ತಿ ಅನವಸೇಸಪರಿಗ್ಗಹವಚನೇನ ‘‘ಯಮ್ಪಿ ಚ ತತ್ಥಜಾತದಣ್ಡೇನ ಕತಂ ಏಕಪಣ್ಣಚ್ಛತ್ತಂ ಹೋತಿ, ತಮ್ಪಿ ಛತ್ತಮೇವಾ’’ತಿ (ಪಾಚಿ॰ ಅಟ್ಠ॰ ೬೩೪) ಅಟ್ಠಕಥಾಯ ವುತ್ತಂ ಛತ್ತವಿಸೇಸಂ ಗಣ್ಹಾತಿ। ಹತ್ಥೇನಾತಿ ಏತ್ಥ ‘‘ಅಮುಞ್ಚಿತ್ವಾ’’ತಿ ಸೇಸೋ। ಸರೀರಾವಯವೇನಾತಿ ಏತ್ಥ ‘‘ಗಹೇತ್ವಾ’’ತಿ ಸೇಸೋ। ವಾ-ಸದ್ದೋ ಅಪಿ-ಸದ್ದತ್ಥೋ। ಅಂಸಕೂಟಾದಿಸರೀರಾವಯವೇನ ಗಹೇತ್ವಾಪಿ ಹತ್ಥೇನ ಅಮುಞ್ಚಿತ್ವಾ ಧಾರೇನ್ತಸ್ಸಾತಿ ಅತ್ಥೋ।
1930.Chattaṃ yaṃ kiñcīti ‘‘chattaṃ nāma tīṇi chattāni setacchattaṃ kilañjacchattaṃ paṇṇacchattaṃ maṇḍalabaddhaṃ salākabaddha’’nti (pāci. 634) vuttesu tīsu chattesu aññataraṃ. Ettha ca setacchattanti vatthapaliguṇṭhitaṃ paṇḍaracchattaṃ. Kilañjacchattanti vilīvacchattaṃ. Paṇṇacchattanti tālapaṇṇādīhi yehi kehici kataṃ. ‘‘Maṇḍalabaddhaṃ salākabaddha’’nti idaṃ pana tiṇṇampi chattānaṃ pañjaradassanatthaṃ vuttaṃ. Tāni hi maṇḍalabaddhāni ceva honti salākabaddhāni ca. ‘‘Yaṃ kiñcī’’ti anavasesapariggahavacanena ‘‘yampi ca tatthajātadaṇḍena kataṃ ekapaṇṇacchattaṃ hoti, tampi chattamevā’’ti (pāci. aṭṭha. 634) aṭṭhakathāya vuttaṃ chattavisesaṃ gaṇhāti. Hatthenāti ettha ‘‘amuñcitvā’’ti seso. Sarīrāvayavenāti ettha ‘‘gahetvā’’ti seso. Vā-saddo api-saddattho. Aṃsakūṭādisarīrāvayavena gahetvāpi hatthena amuñcitvā dhārentassāti attho.
ಸಚೇ ಪನಸ್ಸ ಅಞ್ಞೋ ಛತ್ತಂ ಧಾರೇತಿ, ಛತ್ತಪಾದುಕಾಯ ವಾ ಠಿತಂ ಹೋತಿ, ಪಸ್ಸೇ ವಾ ಠಿತಂ ಹೋತಿ,
Sace panassa añño chattaṃ dhāreti, chattapādukāya vā ṭhitaṃ hoti, passe vā ṭhitaṃ hoti,
ಹತ್ಥತೋ ಅಪಗತಮತ್ತೇ ಛತ್ತಪಾಣಿ ನಾಮ ನ ಹೋತಿ, ತಸ್ಸ ಧಮ್ಮಂ ದೇಸೇತುಂ ವಟ್ಟತಿ। ‘‘ನ ಛತ್ತಪಾಣಿಸ್ಸ ಅಗಿಲಾನಸ್ಸಾ’’ತಿ ವಚನತೋ, ಇಧ ‘‘ಸಬ್ಬತ್ಥ ಅಗಿಲಾನಸ್ಸಾ’’ತಿ ವಕ್ಖಮಾನತ್ತಾ ಚ ಏತ್ಥ ‘‘ಅಗಿಲಾನಸ್ಸಾ’’ತಿ ಲಬ್ಭತಿ। ಧಮ್ಮಪರಿಚ್ಛೇದೋ ಚೇತ್ಥ ಪದಸೋಧಮ್ಮೇ ವುತ್ತನಯೇನೇವ ವೇದಿತಬ್ಬೋ। ಏವಮುಪರಿಪಿ।
Hatthato apagatamatte chattapāṇi nāma na hoti, tassa dhammaṃ desetuṃ vaṭṭati. ‘‘Na chattapāṇissa agilānassā’’ti vacanato, idha ‘‘sabbattha agilānassā’’ti vakkhamānattā ca ettha ‘‘agilānassā’’ti labbhati. Dhammaparicchedo cettha padasodhamme vuttanayeneva veditabbo. Evamuparipi.
ಸತ್ತಮಂ।
Sattamaṃ.
೧೯೩೧. ದಣ್ಡಪಾಣಿಮ್ಹೀತಿ ಏತ್ಥ ದಣ್ಡೋ ಪಾಣಿಮ್ಹಿ ಅಸ್ಸಾತಿ ವಿಗ್ಗಹೋ। ಕಿತ್ತಕಪ್ಪಮಾಣೋ ದಣ್ಡೋತಿ ಆಹ ‘‘ಚತುಹತ್ಥಪ್ಪಮಾಣೋ’’ತಿಆದಿ। ಮಜ್ಝಿಮಹತ್ಥತೋತಿ ಪಮಾಣಮಜ್ಝಿಮಸ್ಸ ಪುರಿಸಸ್ಸ ಹತ್ಥತೋ, ಯೋ ‘‘ವಡ್ಢಕಿಹತ್ಥೋ’’ತಿ ವುಚ್ಚತಿ।
1931.Daṇḍapāṇimhīti ettha daṇḍo pāṇimhi assāti viggaho. Kittakappamāṇo daṇḍoti āha ‘‘catuhatthappamāṇo’’tiādi. Majjhimahatthatoti pamāṇamajjhimassa purisassa hatthato, yo ‘‘vaḍḍhakihattho’’ti vuccati.
ಅಟ್ಠಮಂ।
Aṭṭhamaṃ.
೧೯೩೨. ಸತ್ಥಪಾಣಿಸ್ಸಾತಿ ಏತ್ಥಾಪಿ ವಿಗ್ಗಹೋ ವುತ್ತನಯೋವ। ವಕ್ಖಮಾನಂ ಸಕಲಂ ಧನುವಿಕತಿಂ, ಸರವಿಕತಿಞ್ಚ ಠಪೇತ್ವಾ ಅವಸೇಸಂ ಖಗ್ಗಾದಿ ಸತ್ಥಂ ನಾಮ। ಖಗ್ಗಂ ಸನ್ನಹಿತ್ವಾ ಠಿತೋಪಿ ಸತ್ಥಪಾಣಿ ನು ಖೋತಿ ಆಸಙ್ಕಾಯ ನಿವತ್ತನತ್ಥಮಾಹ ‘‘ಸತ್ಥಪಾಣೀ’’ತಿಆದಿ। ‘‘ನ ಹೋತಿ ಅಸಿ’’ನ್ತಿ ಪದಚ್ಛೇದೋ।
1932.Satthapāṇissāti etthāpi viggaho vuttanayova. Vakkhamānaṃ sakalaṃ dhanuvikatiṃ, saravikatiñca ṭhapetvā avasesaṃ khaggādi satthaṃ nāma. Khaggaṃ sannahitvā ṭhitopi satthapāṇi nu khoti āsaṅkāya nivattanatthamāha ‘‘satthapāṇī’’tiādi. ‘‘Na hoti asi’’nti padacchedo.
ನವಮಂ।
Navamaṃ.
೧೯೩೩-೫. ಸರೇನ ಸದ್ಧಿಂ ಧನುಂ ವಾ ಸುದ್ಧಧನುಂ ವಾ ಸುದ್ಧಸರಂ ವಾ ಸಜಿಯಂ ಧನುದಣ್ಡಂ ವಾ ನಿಜಿಯಂ ಧನುದಣ್ಡಂ ವಾ ಗಹೇತ್ವಾ ಠಿತಸ್ಸಾಪಿ ವಾ ನಿಸಿನ್ನಸ್ಸಾಪಿ ವಾ ನಿಪನ್ನಸ್ಸಾಪಿ ವಾ ಸಚೇ ಯೋ ತಥಾ ಪದಸೋಧಮ್ಮೇ ವುತ್ತಲಕ್ಖಣಂ ಸದ್ಧಮ್ಮಂ ದೇಸೇತಿ, ತಸ್ಸ ಆಪತ್ತಿ ದುಕ್ಕಟಂ ಹೋತೀತಿ ಯೋಜನಾ। ಸಚೇ ಪನಸ್ಸ ಧನು ಖನ್ಧೇ ಪಟಿಮುಕ್ಕಂ ಹೋತಿ, ಯಾವ ನ ಗಣ್ಹಾತಿ, ತಾವ ವಟ್ಟತಿ। ಜಿಯಾಯ ಸಹ ವತ್ತತೀತಿ ಸಜಿಯಂ।
1933-5. Sarena saddhiṃ dhanuṃ vā suddhadhanuṃ vā suddhasaraṃ vā sajiyaṃ dhanudaṇḍaṃ vā nijiyaṃ dhanudaṇḍaṃ vā gahetvā ṭhitassāpi vā nisinnassāpi vā nipannassāpi vā sace yo tathā padasodhamme vuttalakkhaṇaṃ saddhammaṃ deseti, tassa āpatti dukkaṭaṃ hotīti yojanā. Sace panassa dhanu khandhe paṭimukkaṃ hoti, yāva na gaṇhāti, tāva vaṭṭati. Jiyāya saha vattatīti sajiyaṃ.
ದಸಮಂ।
Dasamaṃ.
ಛಟ್ಠೋ ವಗ್ಗೋ।
Chaṭṭho vaggo.
೧೯೩೬. ಪಾದುಕಾರುಳ್ಹಕಸ್ಸಾತಿ ಪಾದುಕಂ ಆರುಳ್ಹೋ ಪಾದುಕಾರುಳ್ಹೋ, ಸೋಯೇವ ಪಾದುಕಾರುಳ್ಹಕೋ, ತಸ್ಸ। ಕಥಂ ಆರುಳ್ಹಸ್ಸಾತಿ ಆಹ ‘‘ಅಕ್ಕಮಿತ್ವಾ’’ತಿಆದಿ। ಅಕ್ಕಮಿತ್ವಾ ಠಿತಸ್ಸಾತಿ ಛತ್ತದಣ್ಡಕೇ ಅಙ್ಗುಲನ್ತರಂ ಅಪ್ಪವೇಸೇತ್ವಾ ಕೇವಲಂ ಪಾದುಕಂ ಅಕ್ಕಮಿತ್ವಾ ಠಿತಸ್ಸ। ಪಟಿಮುಕ್ಕಸ್ಸ ವಾತಿ ಪಟಿಮುಞ್ಚಿತ್ವಾ ಠಿತಸ್ಸ। ಏತಂ ದ್ವಯಮ್ಪಿ ‘‘ಪಾದುಕಾರುಳ್ಹಕಸ್ಸಾ’’ತಿ ಏತಸ್ಸ ಅತ್ಥಪದಂ। ಯಥಾಹ ‘‘ನ ಪಾದುಕಾರುಳ್ಹಸ್ಸ ಅಗಿಲಾನಸ್ಸ ಧಮ್ಮೋ ದೇಸೇತಬ್ಬೋ। ಯೋ ಅನಾದರಿಯಂ ಪಟಿಚ್ಚ ಅಕ್ಕನ್ತಸ್ಸ ವಾ ಪಟಿಮುಕ್ಕಸ್ಸ ವಾ ಓಮುಕ್ಕಸ್ಸ ವಾ ಅಗಿಲಾನಸ್ಸ ಧಮ್ಮಂ ದೇಸೇತಿ, ಆಪತ್ತಿ ದುಕ್ಕಟಸ್ಸಾ’’ತಿ (ಪಾಚಿ॰ ೬೩೮)।
1936.Pādukāruḷhakassāti pādukaṃ āruḷho pādukāruḷho, soyeva pādukāruḷhako, tassa. Kathaṃ āruḷhassāti āha ‘‘akkamitvā’’tiādi. Akkamitvā ṭhitassāti chattadaṇḍake aṅgulantaraṃ appavesetvā kevalaṃ pādukaṃ akkamitvā ṭhitassa. Paṭimukkassa vāti paṭimuñcitvā ṭhitassa. Etaṃ dvayampi ‘‘pādukāruḷhakassā’’ti etassa atthapadaṃ. Yathāha ‘‘na pādukāruḷhassa agilānassa dhammo desetabbo. Yo anādariyaṃ paṭicca akkantassa vā paṭimukkassa vā omukkassa vā agilānassa dhammaṃ deseti, āpatti dukkaṭassā’’ti (pāci. 638).
ಪಠಮಂ।
Paṭhamaṃ.
೧೯೩೭-೪೦. ಉಪಾಹನಗತಸ್ಸಾಪೀತಿ ಅಕ್ಕನ್ತಾದಿಆಕಾರೇನ ಉಪಾಹನಾರುಳ್ಹಸ್ಸ ಚ। ಯಥಾಹ ‘‘ಅಕ್ಕನ್ತಸ್ಸ ವಾ ಪಟಿಮುಕ್ಕಸ್ಸ ವಾ’’ತಿ। ಸಬ್ಬತ್ಥಾತಿ ಛತ್ತಪಾಣಿಆದೀಸು ಸಬ್ಬಸಿಕ್ಖಾಪದೇಸು। ಅಗಿಲಾನಸ್ಸಾತಿ ಇದಂ ಯೋಜೇತಬ್ಬನ್ತಿ ಸೇಸೋ। ಯಾನೇ ವಾ ಗತಸ್ಸ ಅಗಿಲಾನಸ್ಸ ಧಮ್ಮಂ ದೇಸೇತಿ, ದುಕ್ಕಟನ್ತಿ ಯೋಜನಾ। ತತ್ಥ ಯಾನೇ ವಾ ಗತಸ್ಸಾತಿ ಸಚೇ ದ್ವೀಹಿ ಜನೇಹಿ ಹತ್ಥಸಙ್ಘಾತೇನ ಗಹಿತೋ, ಸಾಟಕೇ ವಾ ಠಪೇತ್ವಾ ವಂಸೇನ ವಯ್ಹತಿ, ಅಯುತ್ತೇ ವಾ ವಯ್ಹಾದಿಕೇ ಯಾನೇ, ವಿಸಙ್ಖರಿತ್ವಾ ವಾ ಠಪಿತೇ ಚಕ್ಕಮತ್ತೇಪಿ ನಿಸಿನ್ನೋ ಹೋತಿ, ಯಾನಗತೋತ್ವೇವ ಸಙ್ಖ್ಯಂ ಗಚ್ಛತಿ।
1937-40.Upāhanagatassāpīti akkantādiākārena upāhanāruḷhassa ca. Yathāha ‘‘akkantassa vā paṭimukkassa vā’’ti. Sabbatthāti chattapāṇiādīsu sabbasikkhāpadesu. Agilānassāti idaṃ yojetabbanti seso. Yāne vā gatassa agilānassa dhammaṃ deseti, dukkaṭanti yojanā. Tattha yāne vā gatassāti sace dvīhi janehi hatthasaṅghātena gahito, sāṭake vā ṭhapetvā vaṃsena vayhati, ayutte vā vayhādike yāne, visaṅkharitvā vā ṭhapite cakkamattepi nisinno hoti, yānagatotveva saṅkhyaṃ gacchati.
ಸಯನೇಪಿ ವಾ ಅನ್ತಮಸೋ ಕಟಸಾರಕೇ ವಾ ಛಮಾಯ ವಾ ನಿಪನ್ನಸ್ಸಾಪಿ ಅಗಿಲಾನಸ್ಸಾತಿ ಯೋಜನಾ। ಯಥಾಹ ‘‘ಸಯನಗತಸ್ಸಾತಿ ಅನ್ತಮಸೋ ಕಟಸಾರಕೇಪಿ ಪಕತಿಭೂಮಿಯಮ್ಪಿ ನಿಪನ್ನಸ್ಸಾ’’ತಿ (ಪಾಚಿ॰ ಅಟ್ಠ॰ ೬೪೧)। ಉಚ್ಚೇ ಪೀಠೇ ವಾ ಉಚ್ಚೇ ಮಞ್ಚೇಪಿ ವಾ ನಿಸಿನ್ನೇನ, ಠಿತೇನ ವಾ ನಿಪನ್ನಸ್ಸ ದೇಸೇತುಂ ನ ವಟ್ಟತೀತಿ ಯೋಜನಾ। ‘‘ಠತ್ವಾ’’ತಿ ಇಮಿನಾ ‘‘ನಿಸೀದಿತ್ವಾ’’ತಿ ಇದಞ್ಚ ಸಙ್ಗಹಿತಮೇವ। ಸಯನೇಸು ಗತಸ್ಸ ಚ ದೇಸೇನ್ತೇನ ಸಯನೇಸು ಗತೇನಾಪಿ ಸಮಾನೇ ವಾಪಿ ಉಚ್ಚೇ ವಾ ನಿಪನ್ನೇನೇವ ವಟ್ಟತೀತಿ ಯೋಜನಾ।
Sayanepi vā antamaso kaṭasārake vā chamāya vā nipannassāpi agilānassāti yojanā. Yathāha ‘‘sayanagatassāti antamaso kaṭasārakepi pakatibhūmiyampi nipannassā’’ti (pāci. aṭṭha. 641). Ucce pīṭhe vā ucce mañcepi vā nisinnena, ṭhitena vā nipannassa desetuṃ na vaṭṭatīti yojanā. ‘‘Ṭhatvā’’ti iminā ‘‘nisīditvā’’ti idañca saṅgahitameva. Sayanesu gatassa ca desentena sayanesu gatenāpi samāne vāpi ucce vā nipanneneva vaṭṭatīti yojanā.
೧೯೪೧. ‘‘ತಥೇವ ಚಾ’’ತಿ ಇಮಿನಾ ‘‘ವಟ್ಟತೀ’’ತಿ ಇದಂ ಗಹಿತಂ।
1941.‘‘Tathevacā’’ti iminā ‘‘vaṭṭatī’’ti idaṃ gahitaṃ.
ದುತಿಯತತಿಯಚತುತ್ಥಾನಿ।
Dutiyatatiyacatutthāni.
೧೯೪೨. ‘‘ಪಲ್ಲತ್ಥಿಕಾಯ ನಿಸಿನ್ನಸ್ಸಾ’’ತಿ ವತ್ತಬ್ಬೇ ಗಾಥಾಬನ್ಧವಸೇನ ಯಕಾರಸ್ಸ ಲೋಪಂ ಕತ್ವಾ ‘‘ಪಲ್ಲತ್ಥಿಕಾ ನಿಸಿನ್ನಸ್ಸಾ’’ತಿ ವುತ್ತಂ, ಆಯೋಗಪಲ್ಲತ್ಥಿಕಾಯ ವಾ ಹತ್ಥಪಲ್ಲತ್ಥಿಕಾಯ ವಾ ದುಸ್ಸಪಲ್ಲತ್ಥಿಕಾಯ ವಾ ಯಾಯ ಕಾಯಚಿ ಪಲ್ಲತ್ಥಿಕಾಯ ನಿಸಿನ್ನಸ್ಸಾತಿ ಅತ್ಥೋ। ವೇಠಿತಸೀಸಸ್ಸಾತಿ ದುಸ್ಸವೇಠನೇನ ವಾ ಮೋಲಿಆದೀಹಿ ವಾ ಯಥಾ ಕೇಸನ್ತೋ ನ ದಿಸ್ಸತಿ, ಏವಂ ವೇಠಿತಸೀಸಸ್ಸ।
1942. ‘‘Pallatthikāya nisinnassā’’ti vattabbe gāthābandhavasena yakārassa lopaṃ katvā ‘‘pallatthikā nisinnassā’’ti vuttaṃ, āyogapallatthikāya vā hatthapallatthikāya vā dussapallatthikāya vā yāya kāyaci pallatthikāya nisinnassāti attho. Veṭhitasīsassāti dussaveṭhanena vā moliādīhi vā yathā kesanto na dissati, evaṃ veṭhitasīsassa.
೧೯೪೩. ಯದಿ ಕೇಸನ್ತಂ ವಿವರಾಪೇತ್ವಾ ದೇಸೇತಿ, ವಟ್ಟತೀತಿ ಯೋಜನಾ। ‘‘ಅಯಮೇವ ವಿನಿಚ್ಛಯೋ’’ತಿ ಇಮಿನಾ ‘‘ಸೀಸಂ ವಿವರಾಪೇತ್ವಾ ದೇಸೇತಿ, ವಟ್ಟತೀ’’ತಿ ಅನಾಪತ್ತಿವಾರೋಪಿ ವುತ್ತೋ ಹೋತಿ।
1943. Yadi kesantaṃ vivarāpetvā deseti, vaṭṭatīti yojanā. ‘‘Ayameva vinicchayo’’ti iminā ‘‘sīsaṃ vivarāpetvā deseti, vaṭṭatī’’ti anāpattivāropi vutto hoti.
ಪಞ್ಚಮಛಟ್ಠಸತ್ತಮಾನಿ।
Pañcamachaṭṭhasattamāni.
೧೯೪೪-೫. ಅಟ್ಠಮೇ ‘‘ಆಸನೇ ನಿಸಿನ್ನಸ್ಸಾತಿ ಅನ್ತಮಸೋ ವತ್ಥಮ್ಪಿ ತಿಣಾನಿಪಿ ಸನ್ಥರಿತ್ವಾ ನಿಸಿನ್ನಸ್ಸಾ’’ತಿ (ಪಾಚಿ॰ ಅಟ್ಠ॰ ೬೪೫) ಇದಞ್ಚ ನವಮೇ ‘‘ಉಚ್ಚೇ ಆಸನೇತಿ ಅನ್ತಮಸೋ ಭೂಮಿಪ್ಪದೇಸೇಪಿ ಉನ್ನತೇ ಠಾನೇ ನಿಸಿನ್ನಸ್ಸ ದೇಸೇತುಂ ನ ವಟ್ಟತೀ’’ತಿ (ಪಾಚಿ॰ ಅಟ್ಠ॰ ೬೪೭) ಇದಞ್ಚ ದಸಮೇ ‘‘ಸಚೇಪೀ’’ತಿಆದಿನಾ ವಕ್ಖಮಾನವಿನಿಚ್ಛಯಞ್ಚ ಠಪೇತ್ವಾ ವತ್ತಬ್ಬವಿಸೇಸಾಭಾವಾ ಆಹ ‘‘ಅಟ್ಠಮೇ ನವಮೇ ವಾಪಿ, ದಸಮೇ ನತ್ಥಿ ಕಿಞ್ಚಿಪೀ’’ತಿ। ಏತ್ಥ ‘‘ವತ್ತಬ್ಬ’’ನ್ತಿ ಸೇಸೋ। ಥೇರುಪಟ್ಠಾನಂ ಗನ್ತ್ವಾನ ಠಿತಂ ದಹರಂ ಆಸನೇ ನಿಸಿನ್ನೋ ಥೇರೋ ಚೇ ಪಞ್ಹಂ ಪುಚ್ಛತೀತಿ ಅಜ್ಝಾಹಾರಯೋಜನಾ। ಕಥೇತಬ್ಬಮುಪಾಯಂ ದಸ್ಸೇತುಮಾಹ ‘‘ತಸ್ಸ ಪಸ್ಸೇ ಪನಞ್ಞಸ್ಸ, ಕಥೇತಬ್ಬಂ ವಿಜಾನತಾ’’ತಿ। ಏತ್ಥ ‘‘ಠಿತಸ್ಸಾ’’ತಿ ಸೇಸೋ । ತಸ್ಸ ಸಮೀಪವತ್ತಿನೋ ಕಸ್ಸಚಿ ಅಭಾವೇ ಸಜ್ಝಾಯಂ ಅಧಿಟ್ಠಹಿತ್ವಾಪಿ ವತ್ತುಂ ವಟ್ಟತಿ।
1944-5. Aṭṭhame ‘‘āsane nisinnassāti antamaso vatthampi tiṇānipi santharitvā nisinnassā’’ti (pāci. aṭṭha. 645) idañca navame ‘‘ucce āsaneti antamaso bhūmippadesepi unnate ṭhāne nisinnassa desetuṃ na vaṭṭatī’’ti (pāci. aṭṭha. 647) idañca dasame ‘‘sacepī’’tiādinā vakkhamānavinicchayañca ṭhapetvā vattabbavisesābhāvā āha ‘‘aṭṭhame navamevāpi, dasame natthi kiñcipī’’ti. Ettha ‘‘vattabba’’nti seso. Therupaṭṭhānaṃ gantvāna ṭhitaṃ daharaṃ āsane nisinno thero ce pañhaṃ pucchatīti ajjhāhārayojanā. Kathetabbamupāyaṃ dassetumāha ‘‘tassa passe panaññassa, kathetabbaṃ vijānatā’’ti. Ettha ‘‘ṭhitassā’’ti seso . Tassa samīpavattino kassaci abhāve sajjhāyaṃ adhiṭṭhahitvāpi vattuṃ vaṭṭati.
ಅಟ್ಠಮನವಮದಸಮಾನಿ।
Aṭṭhamanavamadasamāni.
ಸತ್ತಮೋ ವಗ್ಗೋ।
Sattamo vaggo.
೧೯೪೬. ಗಚ್ಛತೋ ಪುರತೋತಿ ಏತ್ಥ ‘‘ಪಚ್ಛತೋ ಗಚ್ಛನ್ತೇನಾ’’ತಿ ಸೇಸೋ। ಪಚ್ಛತೋ ಗಚ್ಛನ್ತೇನ ಪುರತೋ ಗಚ್ಛತೋ ಪಞ್ಹಂ ನ ವತ್ತಬ್ಬನ್ತಿ ಯೋಜನಾ। ಸಚೇ ಪುರತೋ ಗಚ್ಛನ್ತೋ ಪಞ್ಹಂ ಪುಚ್ಛತಿ, ಕಿಂ ಕಾತಬ್ಬನ್ತಿ ಆಹ ‘‘ಪಚ್ಛಿಮಸ್ಸಾ’’ತಿಆದಿ।
1946.Gacchato puratoti ettha ‘‘pacchato gacchantenā’’ti seso. Pacchato gacchantena purato gacchato pañhaṃ na vattabbanti yojanā. Sace purato gacchanto pañhaṃ pucchati, kiṃ kātabbanti āha ‘‘pacchimassā’’tiādi.
೧೯೪೭. ಉಗ್ಗಹಿತಂ ಧಮ್ಮಂ ಪುರತೋ ಗಚ್ಛನ್ತೇನ ಸದ್ಧಿಂ ಪಚ್ಛತೋ ಗಚ್ಛನ್ತೋ ಸಜ್ಝಾಯತಿ, ವಟ್ಟತೀತಿ ಯೋಜನಾ। ಸಮಮೇವ ಗಚ್ಛತೋ ಯುಗಗ್ಗಾಹಂ ಕಥೇತುಂ ವಟ್ಟತೀತಿ ಯೋಜನಾ। ಯುಗಗ್ಗಾಹನ್ತಿ ಅಞ್ಞಮಞ್ಞಂ। ಅಞ್ಞಮಞ್ಞ-ಸದ್ದಪರಿಯಾಯೋ ಹಿ ಯುಗಗ್ಗಾಹ-ಸದ್ದೋ।
1947. Uggahitaṃ dhammaṃ purato gacchantena saddhiṃ pacchato gacchanto sajjhāyati, vaṭṭatīti yojanā. Samameva gacchato yugaggāhaṃ kathetuṃ vaṭṭatīti yojanā. Yugaggāhanti aññamaññaṃ. Aññamañña-saddapariyāyo hi yugaggāha-saddo.
ಪಠಮಂ।
Paṭhamaṃ.
೧೯೪೮. ಸಕಟಮಗ್ಗೇ ಏಕೇಕಸ್ಸ ಚಕ್ಕಸ್ಸ ಪಥೇನ ಗಚ್ಛನ್ತೋ ಏಕೇಕಸ್ಸ ಚಕ್ಕಸ್ಸ ಪಥೇನ ಸಮಂ ಗಚ್ಛತೋ ಧಮ್ಮಂ ದೇಸೇತುಂ ವಟ್ಟತಿ। ಉಪ್ಪಥೇನಾಪಿ ಗಚ್ಛನ್ತೋ ಉಪ್ಪಥೇನ ಸಮಂ ಗಚ್ಛನ್ತಸ್ಸ ಧಮ್ಮಂ ದೇಸೇತುಂ ವಟ್ಟತೀತಿ ಅಜ್ಝಾಹಾರಯೋಜನಾ। ಉಪ್ಪಥೇನಾತಿ ಅಮಗ್ಗೇನ। ಏವಂ ಅನಾಪತ್ತಿವಿಸಯೇ ದಸ್ಸಿತೇ ತಬ್ಬಿಪರಿಯಾಯತೋ ಆಪತ್ತಿವಿಸಯೋ ದಸ್ಸಿತೋಯೇವಾತಿ ವೇದಿತಬ್ಬೋ।
1948. Sakaṭamagge ekekassa cakkassa pathena gacchanto ekekassa cakkassa pathena samaṃ gacchato dhammaṃ desetuṃ vaṭṭati. Uppathenāpi gacchanto uppathena samaṃ gacchantassa dhammaṃ desetuṃ vaṭṭatīti ajjhāhārayojanā. Uppathenāti amaggena. Evaṃ anāpattivisaye dassite tabbipariyāyato āpattivisayo dassitoyevāti veditabbo.
ದುತಿಯಂ।
Dutiyaṃ.
೧೯೪೯. ತತಿಯೇ ನತ್ಥಿ ವತ್ತಬ್ಬನ್ತಿ ‘‘ನ ಠಿತೋ ಅಗಿಲಾನೋ ಉಚ್ಚಾರಂ ವಾ ಪಸ್ಸಾವಂ ವಾ ಕರಿಸ್ಸಾಮೀ’’ತಿ (ಪಾಚಿ॰ ೬೫೧) ಏತಸ್ಸ ವಿನಿಚ್ಛಯೋ ಯಥಾರುತವಸೇನ ಸುವಿಞ್ಞೇಯ್ಯೋತಿ ಕತ್ವಾ ವುತ್ತಂ। ಸಚೇ ಪಟಿಚ್ಛನ್ನಂ ಠಾನಂ ಗಚ್ಛನ್ತಸ್ಸ ಸಹಸಾ ಉಚ್ಚಾರೋ ವಾ ಪಸ್ಸಾವೋ ವಾ ನಿಕ್ಖಮತಿ, ಅಸಞ್ಚಿಚ್ಚ ಕತೋ ನಾಮ, ಅನಾಪತ್ತಿ। ಅಯಮೇತ್ಥ ವಿಸೇಸೋ ದಟ್ಠಬ್ಬೋ। ಸಿಙ್ಘಾಣಿಕಾಯ ಖೇಳೇನೇವ ಸಙ್ಗಹಿತತ್ತೇಪಿ ಬಾತ್ತಿಂಸಕೋಟ್ಠಾಸೇಸು ವಿಸುಂಯೇವ ದಸ್ಸಿತೋ ಏಕೋ ಕೋಟ್ಠಾಸೋತಿ ಸಿಕ್ಖಾಪದೇಸು ಅವುತ್ತಮ್ಪಿ ಸಙ್ಗಹೇತ್ವಾ ಆಹ ‘‘ಉಚ್ಚಾರಾದಿಚತುಕ್ಕ’’ನ್ತಿ।
1949.Tatiye natthi vattabbanti ‘‘na ṭhito agilāno uccāraṃ vā passāvaṃ vā karissāmī’’ti (pāci. 651) etassa vinicchayo yathārutavasena suviññeyyoti katvā vuttaṃ. Sace paṭicchannaṃ ṭhānaṃ gacchantassa sahasā uccāro vā passāvo vā nikkhamati, asañcicca kato nāma, anāpatti. Ayamettha viseso daṭṭhabbo. Siṅghāṇikāya kheḷeneva saṅgahitattepi bāttiṃsakoṭṭhāsesu visuṃyeva dassito eko koṭṭhāsoti sikkhāpadesu avuttampi saṅgahetvā āha ‘‘uccārādicatukka’’nti.
೧೯೫೦. ಏತ್ಥ ಹರಿತಂ ನಾಮ ಇದನ್ತಿ ದಸ್ಸೇತುಮಾಹ ‘‘ಜೀವರುಕ್ಖಸ್ಸಾ’’ತಿಆದಿ। ರುಕ್ಖಸ್ಸಾತಿ ಉಪಲಕ್ಖಣಂ ಜೀವಮಾನಕತಿಣಲತಾದೀನಮ್ಪಿ ಹರಿತೇಯೇವ ಸಙ್ಗಹಿತತ್ತಾ। ‘‘ದಿಸ್ಸಮಾನಂ ಗಚ್ಛತೀ’’ತಿ ವಚನೇನೇವ ಅದಿಸ್ಸಮಾನಗತಂ ಅಹರಿತನ್ತಿ ಬ್ಯತಿರೇಕತೋ ವಿಞ್ಞಾಯತಿ। ಸಾಖಾ ವಾ ಭೂಮಿಲಗ್ಗಾ ದಿಸ್ಸಮಾನಾ ಗಚ್ಛತಿ, ತಂ ಸಬ್ಬಂ ಹರಿತಮೇವಾತಿ ಯೋಜನಾ।
1950. Ettha haritaṃ nāma idanti dassetumāha ‘‘jīvarukkhassā’’tiādi. Rukkhassāti upalakkhaṇaṃ jīvamānakatiṇalatādīnampi hariteyeva saṅgahitattā. ‘‘Dissamānaṃ gacchatī’’ti vacaneneva adissamānagataṃ aharitanti byatirekato viññāyati. Sākhā vā bhūmilaggā dissamānā gacchati, taṃ sabbaṃ haritamevāti yojanā.
೧೯೫೧. ಸಹಸಾ ವಚ್ಚಂ ನಿಕ್ಖಮತೇವಾತಿ ಸಮ್ಬನ್ಧೋ। ಅಸ್ಸ ಭಿಕ್ಖುನೋ। ವಚ್ಚನ್ತಿ ಉಪಲಕ್ಖಣಂ ಪಸ್ಸಾವಾದೀನಮ್ಪಿ ದಸ್ಸಿತತ್ತಾ। ವಟ್ಟತೀತಿ ಏತ್ಥ ‘‘ಗಿಲಾನಟ್ಠಾನೇ ಠಿತತ್ತಾ’’ತಿ ಸೇಸೋ।
1951. Sahasā vaccaṃ nikkhamatevāti sambandho. Assa bhikkhuno. Vaccanti upalakkhaṇaṃ passāvādīnampi dassitattā. Vaṭṭatīti ettha ‘‘gilānaṭṭhāne ṭhitattā’’ti seso.
೧೯೫೨. ಪಲಾಲಣ್ಡುಪಕೇ ವಾಪೀತಿ ಪಲಾಲಚುಮ್ಬಟಕೇಪಿ। ಏತ್ಥ ‘‘ಅಪ್ಪಹರಿತಂ ಅಲಭನ್ತೇನಾ’’ತಿ ಸೇಸೋ। ಕಿಸ್ಮಿಞ್ಚೀತಿ ಸುಕ್ಖತಿಣಾದಿಮ್ಹಿ ಕಿಸ್ಮಿಞ್ಚಿ। ತಂ ವಚ್ಚಂ ಪಚ್ಛಾ ಹರಿತಂ ಓತ್ಥರತಿ, ವಟ್ಟತೀತಿ ಯೋಜನಾ।
1952.Palālaṇḍupake vāpīti palālacumbaṭakepi. Ettha ‘‘appaharitaṃ alabhantenā’’ti seso. Kismiñcīti sukkhatiṇādimhi kismiñci. Taṃ vaccaṃ pacchā haritaṃ ottharati, vaṭṭatīti yojanā.
೧೯೫೩. ಏತೀತಿ ಪವಿಸತಿ। ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ। ‘‘ಖೇಳೇನ ಏವ ಚಾ’’ತಿ ಪದಚ್ಛೇದೋ।
1953.Etīti pavisati. Etthāti imasmiṃ sikkhāpade. ‘‘Kheḷena eva cā’’ti padacchedo.
ತತಿಯಚತುತ್ಥಾನಿ।
Tatiyacatutthāni.
೧೯೫೪. ವಚ್ಚಕುಟಿಸಮುದ್ದಾದಿಉದಕೇಸೂತಿ ಏತ್ಥ ಆದಿ-ಸದ್ದೇನ ಸಬ್ಬಂ ಅಪರಿಭೋಗಜಲಂ ಸಙ್ಗಣ್ಹಾತಿ। ತೇನೇವ ‘‘ತೇಸಂ ಅಪರಿಭೋಗತ್ತಾ’’ತಿ ಅಪರಿಭೋಗತ್ತಮೇವ ಕಾರಣಮಾಹ।
1954.Vaccakuṭisamuddādiudakesūti ettha ādi-saddena sabbaṃ aparibhogajalaṃ saṅgaṇhāti. Teneva ‘‘tesaṃ aparibhogattā’’ti aparibhogattameva kāraṇamāha.
೧೯೫೫. ಉದಕೋಘೇತಿ ಏತ್ಥ ‘‘ಜಾತೇ’’ತಿ ಸೇಸೋ। ಅಜಲನ್ತಿ ಅಜಲಟ್ಠಾನಂ। ಜಲೇತಿ ಪರಿಭೋಗಾರಹಜಲೇ। ಇಧಾಪಿ ಥಲಕತೋ ಉದಕಂ ಓತ್ಥರತಿ, ಅನಾಪತ್ತಿ।
1955.Udakogheti ettha ‘‘jāte’’ti seso. Ajalanti ajalaṭṭhānaṃ. Jaleti paribhogārahajale. Idhāpi thalakato udakaṃ ottharati, anāpatti.
ಪಞ್ಚಮಂ।
Pañcamaṃ.
ಅಟ್ಠಮೋ ವಗ್ಗೋ।
Aṭṭhamo vaggo.
೧೯೫೬-೭. ಪಕಿಣ್ಣಕವಿನಿಚ್ಛಯಂ ದಸ್ಸೇತುಮಾಹ ‘‘ಸಮುಟ್ಠಾನಾದಯೋ’’ತಿಆದಿ। ಞೇಯ್ಯಾತಿ ವಕ್ಖಮಾನನಯೇನ ವೇದಿತಬ್ಬಾ। ಏತ್ಥಾತಿ ಏತೇಸು ಸೇಖಿಯೇಸು। ಉಜ್ಜಗ್ಘಿಕಾ ಆದಿ ಯೇಸನ್ತಿ ವಿಗ್ಗಹೋ, ತಗ್ಗುಣಸಂವಿಞ್ಞಾಣೋಯಂ ಬಾಹಿರತ್ಥಸಮಾಸೋ, ಉಜ್ಜಗ್ಘಿಕಾಅಪ್ಪಸದ್ದಪಟಿಸಂಯುತ್ತಾನಿ ಚತ್ತಾರಿ ಸಿಕ್ಖಾಪದಾನೀತಿ ಅತ್ಥೋ। ಛಮಾ ಚ ನೀಚಾಸನಞ್ಚ ಠಾನಞ್ಚ ಪಚ್ಛಾ ಚ ಉಪ್ಪಥೋ ಚ ಛಮಾನೀಚಾಸನಟ್ಠಾನಪಚ್ಛಾಉಪ್ಪಥಾ, ತೇ ಸದ್ದಾ ಏತೇಸಂ ಸಿಕ್ಖಾಪದಾನಂ ಅತ್ಥೀತಿ ತಪ್ಪಟಿಸಂಯುತ್ತಾನಿ ಸಿಕ್ಖಾಪದಾನಿ ಛಮಾ…ಪೇ॰… ಉಪ್ಪಥವಾ, ಛಮಾದಿಪದವನ್ತಾನಿ ಪಞ್ಚ ಸಿಕ್ಖಾಪದಾನೀತಿ ಅತ್ಥೋ। ಏತ್ಥ ಠಾನ-ಸದ್ದೇನ ಠಾ-ಧಾತುಸ್ಸೇವ ರೂಪತ್ತಾ ಸಿಕ್ಖಾಪದಾಗತೋ ಠಿತ-ಸದ್ದೋ ಗಹಿತೋ। ‘‘ದಸಸೂ’’ತಿ ವತ್ತಬ್ಬೇ ವಣ್ಣಲೋಪೇನ, ವಿಭತ್ತಿವಿಪಲ್ಲಾಸೇನ ವಾ ‘‘ದಸಾ’’ತಿ ವುತ್ತಂ। ಸಮನುಭಾಸನೇ ಸಮುಟ್ಠಾನಾದೀಹಿ ಏತೇಸು ದಸಸು ಸಿಕ್ಖಾಪದೇಸು ಸಮುಟ್ಠಾನಾದಯೋ ತುಲ್ಯಾ ವುತ್ತಾತಿ ಯೋಜನಾ।
1956-7. Pakiṇṇakavinicchayaṃ dassetumāha ‘‘samuṭṭhānādayo’’tiādi. Ñeyyāti vakkhamānanayena veditabbā. Etthāti etesu sekhiyesu. Ujjagghikā ādi yesanti viggaho, tagguṇasaṃviññāṇoyaṃ bāhiratthasamāso, ujjagghikāappasaddapaṭisaṃyuttāni cattāri sikkhāpadānīti attho. Chamā ca nīcāsanañca ṭhānañca pacchā ca uppatho ca chamānīcāsanaṭṭhānapacchāuppathā, te saddā etesaṃ sikkhāpadānaṃ atthīti tappaṭisaṃyuttāni sikkhāpadāni chamā…pe… uppathavā, chamādipadavantāni pañca sikkhāpadānīti attho. Ettha ṭhāna-saddena ṭhā-dhātusseva rūpattā sikkhāpadāgato ṭhita-saddo gahito. ‘‘Dasasū’’ti vattabbe vaṇṇalopena, vibhattivipallāsena vā ‘‘dasā’’ti vuttaṃ. Samanubhāsane samuṭṭhānādīhi etesu dasasu sikkhāpadesu samuṭṭhānādayo tulyā vuttāti yojanā.
ಕಿಂ ವುತ್ತಂ ಹೋತಿ? ಇಮಾನಿ ದಸ ಸಿಕ್ಖಾಪದಾನಿ ಸಮನುಭಾಸನಸಮುಟ್ಠಾನಾನಿ, ಏಕೇಕಮೇತ್ಥ ಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ಅಕುಸಲಚಿತ್ತಂ, ದುಕ್ಖವೇದನನ್ತಿ ವುತ್ತಂ ಹೋತಿ।
Kiṃ vuttaṃ hoti? Imāni dasa sikkhāpadāni samanubhāsanasamuṭṭhānāni, ekekamettha kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti vuttaṃ hoti.
೧೯೫೮-೯. ‘‘ಛತ್ತ’’ನ್ತಿಆದೀನಿ ಸಿಕ್ಖಾಪದಾನಂ ಉಪಲಕ್ಖಣಪದಾನಿ। ಏತಾನಿ ಏಕಾದಸ ಸಿಕ್ಖಾಪದಾನಿ ಸಮುಟ್ಠಾನಾದಿನಾ ಪನ ಧಮ್ಮದೇಸನೇನ ತುಲ್ಯಾವ ಸದಿಸಾ ಏವಾತಿ ಯೋಜನಾ। ಇದಂ ವುತ್ತಂ ಹೋತಿ – ಇಮಾನಿ ಏಕಾದಸ ಸಿಕ್ಖಾಪದಾನಿ ಧಮ್ಮದೇಸನಾಸಮುಟ್ಠಾನಾನಿ, ಕಿರಿಯಾಕಿರಿಯಾನಿ, ಸಞ್ಞಾವಿಮೋಕ್ಖಾನಿ, ಸಚಿತ್ತಕಾನಿ, ಲೋಕವಜ್ಜಾನಿ, ವಚೀಕಮ್ಮಾನಿ, ಅಕುಸಲಚಿತ್ತಾನಿ, ದುಕ್ಖವೇದನಾನೀತಿ।
1958-9.‘‘Chatta’’ntiādīni sikkhāpadānaṃ upalakkhaṇapadāni. Etāni ekādasa sikkhāpadāni samuṭṭhānādinā pana dhammadesanena tulyāva sadisā evāti yojanā. Idaṃ vuttaṃ hoti – imāni ekādasa sikkhāpadāni dhammadesanāsamuṭṭhānāni, kiriyākiriyāni, saññāvimokkhāni, sacittakāni, lokavajjāni, vacīkammāni, akusalacittāni, dukkhavedanānīti.
ಸೂಪೋದನೇನ ವಿಞ್ಞತ್ತೀತಿ ಸೂಪೋದನ-ಸದ್ದೇನ ಲಕ್ಖಿತಂ ವಿಞ್ಞತ್ತಿಸಿಕ್ಖಾಪದಂ। ವಿಞ್ಞತ್ತಿಸಿಕ್ಖಾಪದಾನಂ ಬಹುತ್ತಾ ಇದಮೇವ ವಿಸೇಸಿತಂ। ಥೇಯ್ಯಸತ್ಥಸಮಂ ಮತನ್ತಿ ಸಮುಟ್ಠಾನಾದೀಹಿ ಥೇಯ್ಯಸತ್ಥಸಿಕ್ಖಾಪದೇನ ಸಮಾನಂ ಮತನ್ತಿ ಅತ್ಥೋ। ಇದಂ ವುತ್ತಂ ಹೋತಿ – ಸೂಪೋದನವಿಞ್ಞತ್ತಿಸಿಕ್ಖಾಪದಂ ಥೇಯ್ಯಸತ್ಥಸಮುಟ್ಠಾನಂ, ಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ಅಕುಸಲಚಿತ್ತಂ, ದುಕ್ಖವೇದನನ್ತಿ।
Sūpodanena viññattīti sūpodana-saddena lakkhitaṃ viññattisikkhāpadaṃ. Viññattisikkhāpadānaṃ bahuttā idameva visesitaṃ. Theyyasatthasamaṃ matanti samuṭṭhānādīhi theyyasatthasikkhāpadena samānaṃ matanti attho. Idaṃ vuttaṃ hoti – sūpodanaviññattisikkhāpadaṃ theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
೧೯೬೦. ಅವಸೇಸಾ ತಿಪಞ್ಞಾಸಾತಿ ಅವಸೇಸಾನಿ ತೇಪಞ್ಞಾಸಸಿಕ್ಖಾಪದಾನಿ। ಸಮಾನಾ ಪಠಮೇನ ತೂತಿ ಪಠಮೇನ ಪಾರಾಜಿಕೇನ ಸಮುಟ್ಠಾನಾದಿತೋ ಸಮಾನಾನೀತಿ ಅತ್ಥೋ, ಪಠಮಪಾರಾಜಿಕಸದಿಸಸಮುಟ್ಠಾನಾನೀತಿ ವುತ್ತಂ ಹೋತಿ। ‘‘ಅನಾಪತ್ತಿ ಆಪದಾಸೂ’’ತಿ ಪದಚ್ಛೇದೋ। ಪರಿಮಣ್ಡಲಂ ನಿವಾಸೇತ್ವಾ, ಪಾರುಪಿತ್ವಾ ಚರನ್ತಾನಂ ಚೋರುಪದ್ದವಾದಿ ಆಪದಾ ನಾಮ। ಅಪಿ-ಸದ್ದೇನ ನದಿಸನ್ತರಣಾದಿಂ ಸಙ್ಗಣ್ಹಾತಿ। ಸೇಖಿಯೇಸು ಸಬ್ಬೇಸೂತಿ ಯೇಭುಯ್ಯವಸೇನ ವುತ್ತಂ।
1960.Avasesā tipaññāsāti avasesāni tepaññāsasikkhāpadāni. Samānā paṭhamena tūti paṭhamena pārājikena samuṭṭhānādito samānānīti attho, paṭhamapārājikasadisasamuṭṭhānānīti vuttaṃ hoti. ‘‘Anāpatti āpadāsū’’ti padacchedo. Parimaṇḍalaṃ nivāsetvā, pārupitvā carantānaṃ corupaddavādi āpadā nāma. Api-saddena nadisantaraṇādiṃ saṅgaṇhāti. Sekhiyesu sabbesūti yebhuyyavasena vuttaṃ.
೧೯೬೧. ‘‘ನ ಉಜ್ಝಾನಸಞ್ಞೀ ಪರೇಸಂ ಪತ್ತಂ ಓಲೋಕೇಸ್ಸಾಮೀ’’ತಿಆದೀನಂ (ಪಾಚಿ॰ ೬೧೪) ಇಮಸ್ಸ ಅನಾಪತ್ತಿವಾರಸ್ಸ ಅಸಮ್ಭವತೋ ನ ಪನಾಗತೋತಿ ಪಾಳಿಯಂ ನ ವುತ್ತೋ। ತಸ್ಸಾಪಿ ಯಥಾವತ್ಥುಕಾವ ಆಪತ್ತಿಯೋ ದಟ್ಠಬ್ಬಾ।
1961. ‘‘Na ujjhānasaññī paresaṃ pattaṃ olokessāmī’’tiādīnaṃ (pāci. 614) imassa anāpattivārassa asambhavato na panāgatoti pāḷiyaṃ na vutto. Tassāpi yathāvatthukāva āpattiyo daṭṭhabbā.
ಇತಿ ವಿನಯತ್ಥಸಾರಸನ್ದೀಪನಿಯಾ
Iti vinayatthasārasandīpaniyā
ವಿನಯವಿನಿಚ್ಛಯವಣ್ಣನಾಯ
Vinayavinicchayavaṇṇanāya
ಸೇಖಿಯಕಥಾವಣ್ಣನಾ ನಿಟ್ಠಿತಾ।
Sekhiyakathāvaṇṇanā niṭṭhitā.
೧೯೬೨. ಯೋ ಇಮಂ ವಿನಿಚ್ಛಯಂ ವಿದಿತ್ವಾ ಠಿತೋ, ಸೋ ಹಿ ಯಸ್ಮಾ ವಿನಯೇ ವಿಸಾರದೋ ಹೋತಿ, ವಿನೀತಮಾನಸೋ ಚ ಹೋತಿ, ಪರೇಹಿ ದುಪ್ಪಧಂಸಿಯೋ ಚ ಹೋತಿ, ತತೋ ತಸ್ಮಾ ಕಾರಣಾ ಸಮಾಹಿತೋ ಸತತಂ ಇಮಂ ವಿನಯವಿನಿಚ್ಛಯಂ ಸಿಕ್ಖೇಯ್ಯಾತಿ ಯೋಜನಾ।
1962. Yo imaṃ vinicchayaṃ viditvā ṭhito, so hi yasmā vinaye visārado hoti, vinītamānaso ca hoti, parehi duppadhaṃsiyo ca hoti, tato tasmā kāraṇā samāhito satataṃ imaṃ vinayavinicchayaṃ sikkheyyāti yojanā.
ತತ್ಥ ಇಮಂ ವಿನಿಚ್ಛಯಂ ವಿದಿತ್ವಾತಿ ಸಬ್ಬಲೋಕಿಯಲೋಕುತ್ತರಗುಣಸಮ್ಪತ್ತಿನಿದಾನಂ ಇಮಂ ವಿನಯವಿನಿಚ್ಛಯಂ ಅತ್ಥತೋ, ಗನ್ಥತೋ, ವಿನಿಚ್ಛಯತೋ ಚ ಸಕ್ಕಚ್ಚಂ ಞತ್ವಾ। ವಿಸಾರದೋತಿ ಸಾರಜ್ಜನಂ ಸಾರದೋ, ವಿಗತೋ ಸಾರದೋ ಅಸ್ಸಾತಿ ವಿಸಾರದೋ, ವಿನಯಪರಿಯತ್ತಿಯಾ, ಆಪತ್ತಾದಿವಿಭಾಗೇ ಚ ನಿಬ್ಭಯೋ ನಿರಾಸಙ್ಕೋತಿ ವುತ್ತಂ ಹೋತಿ। ನ ಕೇವಲಂ ಇಮಸ್ಸ ಜಾನನೇ ಏಸೋವ ಆನಿಸಂಸೋ, ಅಥ ಖೋ ವಿನೀತಮಾನಸೋ ಚ ಹೋತಿ, ಸಂಯತಚಿತ್ತೋ ಹೋತೀತಿ ಅತ್ಥೋ। ಸೋತಿ ಇಮಂ ವಿನಿಚ್ಛಯಂ ಸಕ್ಕಚ್ಚಂ ವಿದಿತ್ವಾ ಠಿತೋ ಭಿಕ್ಖು। ಪರೇಹೀತಿ ಇಮಂ ಅಜಾನನ್ತೇಹಿ ಅಞ್ಞೇಹಿ। ದುಪ್ಪಧಂಸಿಯೋ ಚ ಹೋತೀತಿ ಅನಭಿಭವನೀಯೋ ಚ ಹೋತಿ।
Tattha imaṃ vinicchayaṃ viditvāti sabbalokiyalokuttaraguṇasampattinidānaṃ imaṃ vinayavinicchayaṃ atthato, ganthato, vinicchayato ca sakkaccaṃ ñatvā. Visāradoti sārajjanaṃ sārado, vigato sārado assāti visārado, vinayapariyattiyā, āpattādivibhāge ca nibbhayo nirāsaṅkoti vuttaṃ hoti. Na kevalaṃ imassa jānane esova ānisaṃso, atha kho vinītamānaso ca hoti, saṃyatacitto hotīti attho. Soti imaṃ vinicchayaṃ sakkaccaṃ viditvā ṭhito bhikkhu. Parehīti imaṃ ajānantehi aññehi. Duppadhaṃsiyo ca hotīti anabhibhavanīyo ca hoti.
ತತೋತಿ ತಸ್ಮಾ ವಿನಯೇ ವಿಸಾರದತಾದಿಸಬ್ಬಗುಣಸಮ್ಪನ್ನಹೇತುತ್ತಾ। ಹೀತಿ ಯಸ್ಮಾತಿ ಅತ್ಥೋ। ಸಿಕ್ಖೇತಿ ಸಜ್ಝಾಯನಸವನಾದಿವಸೇನ ಸಿಕ್ಖೇಯ್ಯ, ಉಗ್ಗಣ್ಹೇಯ್ಯಾತಿ ಅತ್ಥೋ। ‘‘ಸತತ’’ನ್ತಿ ಇಮಿನಾ ಸಬ್ಬತ್ಥಕಕಮ್ಮಟ್ಠಾನೇ ವಿಯ ಏತ್ಥಾಪಿ ಸತತಾಭಿಯೋಗೋ ಕಾತಬ್ಬೋತಿ ದಸ್ಸೇತಿ। ವಿಕ್ಖಿತ್ತಸ್ಸ ಯಥಾಭೂತಪಟಿವೇಧಾಭಾವತೋ ತಪ್ಪಟಿಪಕ್ಖಾಯ ಏಕಗ್ಗತಾಯ ನಿಯೋಜೇನ್ತೋ ಆಹ ‘‘ಸಮಾಹಿತೋ’’ತಿ, ಸಮ್ಮಾ ವಿನಯವಿನಿಚ್ಛಯೇ ಆಹಿತೋ ಪತಿಟ್ಠಿತೋ ಏಕಗ್ಗಚಿತ್ತೋತಿ ವುತ್ತಂ ಹೋತಿ। ಯಥಾಹ ‘‘ಅವಿಕ್ಖಿತ್ತಸ್ಸಾಯಂ ಧಮ್ಮೋ, ನಾಯಂ ಧಮ್ಮೋ ವಿಕ್ಖಿತ್ತಸ್ಸಾ’’ತಿ।
Tatoti tasmā vinaye visāradatādisabbaguṇasampannahetuttā. Hīti yasmāti attho. Sikkheti sajjhāyanasavanādivasena sikkheyya, uggaṇheyyāti attho. ‘‘Satata’’nti iminā sabbatthakakammaṭṭhāne viya etthāpi satatābhiyogo kātabboti dasseti. Vikkhittassa yathābhūtapaṭivedhābhāvato tappaṭipakkhāya ekaggatāya niyojento āha ‘‘samāhito’’ti, sammā vinayavinicchaye āhito patiṭṭhito ekaggacittoti vuttaṃ hoti. Yathāha ‘‘avikkhittassāyaṃ dhammo, nāyaṃ dhammo vikkhittassā’’ti.
೧೯೬೩. ಏವಂ ಇಮಾಯ ಗಾಥಾಯ ವುತ್ತಮೇವತ್ಥಂ ಪಕಾರನ್ತರೇನಾಪಿ ದಸ್ಸೇತುಮಾಹ ‘‘ಇಮ’’ನ್ತಿಆದಿ। ತೇತಿ ಅಪೇಕ್ಖಿತ್ವಾ ‘‘ಯೇ’’ತಿ ಲಬ್ಭತಿ। ಯೇ ಥೇರಾ ವಾ ನವಾ ವಾ ಮಜ್ಝಿಮಾ ವಾ। ಪರಮನ್ತಿ ಅಮತಮಹಾನಿಬ್ಬಾನಪ್ಪತ್ತಿಯಾ ಮೂಲಕಾರಣಸ್ಸ ಸೀಲಸ್ಸ ಪಕಾಸನತೋ ಉತ್ತಮಂ। ಅಸಂಕರನ್ತಿ ನಿಕಾಯನ್ತರಲದ್ಧೀಹಿ ಅಸಮ್ಮಿಸ್ಸಂ। ಸಂಕರನ್ತಿ ವುತ್ತಪ್ಪಕಾರಗುಣೋಪೇತತ್ತಾ ಕಾಯಚಿತ್ತಸುಖಕಾರಣಂ ಸಮ್ಮುಖಂ ಕರೋತೀತಿ ಸಂಕರಂ। ಸವನಾಮತನ್ತಿ ಸದ್ದರಸಾದಿಯೋಗೇನ ಕಣ್ಣರಸಾಯನಂ। ಅಮತನ್ತಿ ತತೋಯೇವ ಅಮತಂ ಸುಮಧುರಂ। ಅಮತಮಹಾನಿಬ್ಬಾನಾವಹತ್ತಾ ವಾ ಫಲೂಪಚಾರೇನ ಅಮತಂ। ಇಮಂ ವಿನಯವಿನಿಚ್ಛಯಂ। ಅವೇಚ್ಚಾತಿ ಸಕ್ಕಚ್ಚಂ ವಿದಿತ್ವಾ। ಅಧಿಕೇತಿ ಅಧಿಸೀಲಾದಿಸಿಕ್ಖತ್ತಯಪ್ಪಕಾಸನೇನ ಉಕ್ಕಟ್ಠೇ। ಹಿತೇತಿ ಲೋಕಿಯಲೋಕುತ್ತರಸುಖಹೇತುತ್ತೇನ ಹಿತೇ। ಹಿನೋತಿ ಅತ್ತನೋ ಫಲನ್ತಿ ‘‘ಹಿತ’’ನ್ತಿ ಸುಖಹೇತು ವುಚ್ಚತಿ। ಕಲಿಸಾಸನೇತಿ ಲೋಭಾದಿಕಿಲೇಸವಿದ್ಧಂಸನೇ। ಸಾಸನೇತಿ ವಿನಯಪರಿಯತ್ತಿಸಙ್ಖಾತಸಾಸನೇಕದೇಸೇ। ಪಟುತ್ತನ್ತಿ ಬ್ಯತ್ತಭಾವಂ। ನ ಯನ್ತಿ ನ ಗಚ್ಛನ್ತಿ। ಕೇ ತೇತಿ ಕತಮೇ ತೇ। ‘‘ನ ಕೇಚಿ ಸನ್ತಿ ಚಾ’’ತಿ ನಿಸ್ಸನ್ದೇಹೇ ಇಮಿಸ್ಸಾ ಗಾಥಾಯ ಅತ್ಥೋ ಲಿಖಿತೋ।
1963. Evaṃ imāya gāthāya vuttamevatthaṃ pakārantarenāpi dassetumāha ‘‘ima’’ntiādi. Teti apekkhitvā ‘‘ye’’ti labbhati. Ye therā vā navā vā majjhimā vā. Paramanti amatamahānibbānappattiyā mūlakāraṇassa sīlassa pakāsanato uttamaṃ. Asaṃkaranti nikāyantaraladdhīhi asammissaṃ. Saṃkaranti vuttappakāraguṇopetattā kāyacittasukhakāraṇaṃ sammukhaṃ karotīti saṃkaraṃ. Savanāmatanti saddarasādiyogena kaṇṇarasāyanaṃ. Amatanti tatoyeva amataṃ sumadhuraṃ. Amatamahānibbānāvahattā vā phalūpacārena amataṃ. Imaṃ vinayavinicchayaṃ. Aveccāti sakkaccaṃ viditvā. Adhiketi adhisīlādisikkhattayappakāsanena ukkaṭṭhe. Hiteti lokiyalokuttarasukhahetuttena hite. Hinoti attano phalanti ‘‘hita’’nti sukhahetu vuccati. Kalisāsaneti lobhādikilesaviddhaṃsane. Sāsaneti vinayapariyattisaṅkhātasāsanekadese. Paṭuttanti byattabhāvaṃ. Na yanti na gacchanti. Ke teti katame te. ‘‘Na keci santi cā’’ti nissandehe imissā gāthāya attho likhito.
ಏವಂ ಏತ್ಥ ಅತ್ಥಯೋಜನಾ ವೇದಿತಬ್ಬಾ – ಪರಮಂ ಉತ್ತಮಂ ಅಸಂಕರಂ ನಿಕಾಯನ್ತರಲದ್ಧೀಹಿ ಅಸಮ್ಮಿಸ್ಸಂ ಸಂಕರಂ ಸಕಲಲೋಕಿಯಲೋಕುತ್ತರಸುಖಾಭಿನಿಪ್ಫಾದಕಂ ಸವನಾಮತಂ ಸೋತರಸಾಯನಂ ಇಮಂ ವಿನಿಚ್ಛಯಪ್ಪಕರಣಂ ಅವೇಚ್ಚ ಸಕ್ಕಚ್ಚಂ ವಿದಿತ್ವಾ ಅಧಿಕೇ ಅಧಿಸೀಲಾದಿಸಿಕ್ಖತ್ತಯಪ್ಪಕಾಸನೇನ ಉಕ್ಕಟ್ಠೇ ಹಿತೇ ಲೋಕಿಯಲೋಕುತ್ತರಸುಖಹೇತುಭೂತೇ ಕಲಿಸಾಸನೇ ಸಕಲಸಂಕಿಲೇಸವಿದ್ಧಂಸಕೇ ಸಾಸನೇ ವಿನಯಪಿಟಕಸಙ್ಖಾತೇ ಪರಿಯತ್ತಿಸಾಸನೇ ಯೇ ಪಟುತ್ತಂ ನ ಯನ್ತಿ, ತೇ ಕೇ ನಾಮಾತಿ ಯೋಜನಾ, ಯೇ ಇಮಂ ಪಕರಣಂ ಅವೇಚ್ಚ ವಿದಿತ್ವಾ ಠಿತಾ, ತೇ ಏಕಂಸತೋ ವಿನಯಪಿಟಕೇ ಪಟುತ್ತಂ ಪಾಪುಣನ್ತಿ ಯೇವಾತಿ ಅಧಿಪ್ಪಾಯೋ।
Evaṃ ettha atthayojanā veditabbā – paramaṃ uttamaṃ asaṃkaraṃ nikāyantaraladdhīhi asammissaṃ saṃkaraṃ sakalalokiyalokuttarasukhābhinipphādakaṃ savanāmataṃ sotarasāyanaṃ imaṃ vinicchayappakaraṇaṃ avecca sakkaccaṃ viditvā adhike adhisīlādisikkhattayappakāsanena ukkaṭṭhe hite lokiyalokuttarasukhahetubhūte kalisāsane sakalasaṃkilesaviddhaṃsake sāsane vinayapiṭakasaṅkhāte pariyattisāsane ye paṭuttaṃ na yanti, te ke nāmāti yojanā, ye imaṃ pakaraṇaṃ avecca viditvā ṭhitā, te ekaṃsato vinayapiṭake paṭuttaṃ pāpuṇanti yevāti adhippāyo.
ಇತಿ ವಿನಯತ್ಥಸಾರಸನ್ದೀಪನಿಯಾ
Iti vinayatthasārasandīpaniyā
ವಿನಯವಿನಿಚ್ಛಯವಣ್ಣನಾಯ
Vinayavinicchayavaṇṇanāya
ಭಿಕ್ಖುವಿಭಙ್ಗಕಥಾವಣ್ಣನಾ ನಿಟ್ಠಿತಾ।
Bhikkhuvibhaṅgakathāvaṇṇanā niṭṭhitā.
