| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
2. ஸேலஸுத்தவண்ணனா
2. Selasuttavaṇṇanā
396. கேணியோதி தஸ்ஸ நாமங், புப்³பே³ கேணியா ஜீவிகாகப்பனதோதி வத³ந்தி. ஜடிலோதி ஜடாத⁴ரோ. ப்³ராஹ்மணஜாதிகத்தா கோடிஸாரதாய ச ப்³ராஹ்மணமஹாஸாலோ. பயோஜெத்வா நிஸ்ஸயோ ஹுத்வா வஸதி, ரத்திங் காமஸம்பத்திங் அனுப⁴வதீதி வா யோஜனா. ஸுஸங்க²தந்தி ஸப்பிமது⁴ஸக்கராதீ³ஹி சேவ மரிசஸிங்கீ³வேராதீ³ஹி ச ஸுட்டு² அபி⁴ஸங்க²தங்.
396.Keṇiyotitassa nāmaṃ, pubbe keṇiyā jīvikākappanatoti vadanti. Jaṭiloti jaṭādharo. Brāhmaṇajātikattā koṭisāratāya ca brāhmaṇamahāsālo. Payojetvā nissayo hutvā vasati, rattiṃ kāmasampattiṃ anubhavatīti vā yojanā. Susaṅkhatanti sappimadhusakkarādīhi ceva maricasiṅgīverādīhi ca suṭṭhu abhisaṅkhataṃ.
படிக்கே²பபஸன்னதாயாதி அஹோவதாயங் அப்பிச்சோ², யோ நிமந்தியமானோபி ந ஸாதி³யதீதி உபனிமந்தியமானஸ்ஸ படிக்கே²பே தித்தி²யானங் பஸன்னபா⁴வதோதி. தங் கத²ங்? விருத்³த⁴மேதந்தி ‘‘அகாரணமேத’’ந்தி படிக்கி²பதி.
Paṭikkhepapasannatāyāti ahovatāyaṃ appiccho, yo nimantiyamānopi na sādiyatīti upanimantiyamānassa paṭikkhepe titthiyānaṃ pasannabhāvatoti. Taṃ kathaṃ? Viruddhametanti ‘‘akāraṇameta’’nti paṭikkhipati.
398. கப்பஸஹஸ்ஸேஹிபி…பே॰… அஹோஸீதி இத³ங் நானுஸ்ஸவஸித்³த⁴ங் அனுமானக்³க³ஹணங் ஸந்தா⁴யாஹ. பதே³தி உத்தரபத³லோபேன நித்³தே³ஸோதி ஆஹ ‘‘பத³ப்பமாணே’’தி. பஜ்ஜதி நிக்கி²பதி எத்தா²தி வா பத³ங் பகதியா பாத³னிக்கி²பட்டா²னங், தஸ்மிங் பதே³. கீளாபஸுததாதி³னா பமாத³ங் ஆபஜ்ஜதி. போ³தி⁴ஸத்தசாரிகந்தி து³க்கரசரியங் ஸந்தா⁴ய வத³தி.
398.Kappasahassehipi…pe… ahosīti idaṃ nānussavasiddhaṃ anumānaggahaṇaṃ sandhāyāha. Padeti uttarapadalopena niddesoti āha ‘‘padappamāṇe’’ti. Pajjati nikkhipati etthāti vā padaṃ pakatiyā pādanikkhipaṭṭhānaṃ, tasmiṃ pade. Kīḷāpasutatādinā pamādaṃ āpajjati. Bodhisattacārikanti dukkaracariyaṃ sandhāya vadati.
399. பரிபுண்ணதாயாதி அனூனதாய. அஹீனங்க³தாயாதி அவேகல்லபா⁴வதோ. ரோசதீதி ருசி, தே³ஹப்பபா⁴, ஸோப⁴ணா ருசி ஏதஸ்ஸாதி ஸுருசி. ஆரோஹஸம்பத்தி காயஸ்ஸ பமாணயுத்தஉச்சதா. பரிணாஹஸம்பத்தி கிஸதூ²லபா⁴வவஜ்ஜிதபரிணாஹதா. ஸண்டா²னஸம்பத்தி அவயவானங் ஸுஸண்டி²ததா. சாருத³ஸ்ஸனோதி பியத³ஸ்ஸனோ தேனாஹ ‘‘ஸுசிரம்பீ’’திஆதி³. ஸுவண்ணஸதி³ஸவண்ணோதி ஜாதிஹிங்கு³லகேன மத்³தி³த்வா ஸிலானிக⁴ங்ஸேனேவ பரிகம்மங் கத்வா ட²பிதக⁴னஸுவண்ணரூபவண்ணோ. மஹாபுரிஸபா⁴வங் ப்³யஞ்ஜெந்தி பகாஸெந்தீதி ப்³யஞ்ஜனானி, மஹாபுரிஸலக்க²ணானீதி ஆஹ ‘‘பட²மங் வுத்தப்³யஞ்ஜனானேவா’’தி.
399.Paripuṇṇatāyāti anūnatāya. Ahīnaṅgatāyāti avekallabhāvato. Rocatīti ruci, dehappabhā, sobhaṇā ruci etassāti suruci. Ārohasampatti kāyassa pamāṇayuttauccatā. Pariṇāhasampatti kisathūlabhāvavajjitapariṇāhatā. Saṇṭhānasampatti avayavānaṃ susaṇṭhitatā. Cārudassanoti piyadassano tenāha ‘‘sucirampī’’tiādi. Suvaṇṇasadisavaṇṇoti jātihiṅgulakena madditvā silānighaṃseneva parikammaṃ katvā ṭhapitaghanasuvaṇṇarūpavaṇṇo. Mahāpurisabhāvaṃ byañjenti pakāsentīti byañjanāni, mahāpurisalakkhaṇānīti āha ‘‘paṭhamaṃ vuttabyañjanānevā’’ti.
புப்³பே³ வுத்தந்தி ‘‘ஸுருசீ’’தி புப்³பே³ வுத்தங், ‘‘ஆதி³ச்சோவ விரோசஸீ’’தி புன வுத்தங். ‘‘சாருத³ஸ்ஸனோ ஸுவண்ணவண்ணோஸீ’’தி புப்³பே³ வுத்தங், ‘‘கல்யாணத³ஸ்ஸனோ பி⁴க்கு² கஞ்சனாப⁴த்தசோ’’தி புன வுத்தந்தி இமமத்த²ங் ஸந்தா⁴யாஹ ‘‘உத்தரகா³தா²யபி ஏஸேவ நயோ’’தி. ஸாதிஸயங் உத்தமவண்ணே வண்ணெத்வா உத்தமவண்ணினோதி பதே³ன ஸந்தங் பகாஸேதீதி ஆஹ ‘‘உத்தமவண்ணஸம்பன்னஸ்ஸா’’தி. உத்தமஸாரதீ²தி ஸெட்ட²புரிஸஸாரதி². தத்த² தத்த² ஜம்பு³வனஸண்ட³மண்டி³ததாய ஜம்பு³தீ³போ ‘‘ஜம்பு³ஸண்டோ³’’தி வுச்சதி. இஸ்ஸரியந்தி சக்கவத்திஸ்ஸரியங்.
Pubbe vuttanti ‘‘surucī’’ti pubbe vuttaṃ, ‘‘ādiccova virocasī’’ti puna vuttaṃ. ‘‘Cārudassano suvaṇṇavaṇṇosī’’ti pubbe vuttaṃ, ‘‘kalyāṇadassano bhikkhu kañcanābhattaco’’ti puna vuttanti imamatthaṃ sandhāyāha ‘‘uttaragāthāyapi eseva nayo’’ti. Sātisayaṃ uttamavaṇṇe vaṇṇetvā uttamavaṇṇinoti padena santaṃ pakāsetīti āha ‘‘uttamavaṇṇasampannassā’’ti. Uttamasārathīti seṭṭhapurisasārathi. Tattha tattha jambuvanasaṇḍamaṇḍitatāya jambudīpo ‘‘jambusaṇḍo’’ti vuccati. Issariyanti cakkavattissariyaṃ.
ஜாதிக²த்தியாதி ஜாதிமந்தோ க²த்தியா. ராஜாபி⁴ராஜாதி எத்த² அபி⁴-ஸத்³தோ³ பூஜத்தோ²தி ஆஹ ‘‘ராஜூனங் பூஜனீயோ’’தி.
Jātikhattiyāti jātimanto khattiyā. Rājābhirājāti ettha abhi-saddo pūjatthoti āha ‘‘rājūnaṃ pūjanīyo’’ti.
அப்பமாணாதி அபரிமாணா லோகதா⁴துயோ. ‘‘யாவதா பன ஆகங்கெ²ய்யா’’தி (அ॰ நி॰ 3.81) ஹி வுத்தங். த⁴ம்மராஜா அனுத்தரோதி எத்த² வுத்தஅனுத்தரபா⁴வங் ‘‘யாவதா ஹீ’’திஆதி³னா பாகடதரங் கத்வா த⁴ம்மராஜபா⁴வங் விபா⁴வேதுங் ‘‘ஸ்வாஹ’’ந்திஆதி³ வுத்தங். த⁴ம்மேனாதி படிவேத⁴த⁴ம்மேன. தேனாஹ ‘‘அனுத்தரேனேவா’’தி. அனுத்தரேனாதி விஸிட்டே²ன உத்தமேன. இமஸ்மிங் பக்கே² த⁴ம்மேனாதி படிபத்தித⁴ம்மேனாதிபி ஸங்க³ய்ஹதி. பரியத்தித⁴ம்மேனாதி தே³ஸனாத⁴ம்மேன ஆணாசக்கங் பவத்தேமீதி யோஜனா. தே³ஸனாஞாணபடிவேத⁴ஞாணவிபா⁴க³ங் த⁴ம்மசக்கமேவ வா. அப்படிவத்தியந்தி படிவத்திதுங் அஸக்குணெய்யங்.
Appamāṇāti aparimāṇā lokadhātuyo. ‘‘Yāvatā pana ākaṅkheyyā’’ti (a. ni. 3.81) hi vuttaṃ. Dhammarājā anuttaroti ettha vuttaanuttarabhāvaṃ ‘‘yāvatā hī’’tiādinā pākaṭataraṃ katvā dhammarājabhāvaṃ vibhāvetuṃ ‘‘svāha’’ntiādi vuttaṃ. Dhammenāti paṭivedhadhammena. Tenāha ‘‘anuttarenevā’’ti. Anuttarenāti visiṭṭhena uttamena. Imasmiṃ pakkhe dhammenāti paṭipattidhammenātipi saṅgayhati. Pariyattidhammenāti desanādhammena āṇācakkaṃ pavattemīti yojanā. Desanāñāṇapaṭivedhañāṇavibhāgaṃ dhammacakkameva vā. Appaṭivattiyanti paṭivattituṃ asakkuṇeyyaṃ.
ததா²க³தேன ஜாதோதி ததா²க³தேன ஹேதுனா அரியாய ஜாதியா ஜாதோ. ஹேதுஅத்தே² கரணவசனங். அனுஜாதோதி ச வுத்தே அனு-ஸத்³த³ஸ்ஸ வஸேன ததா²க³தந்தி ச உபயோக³வசனமேவ ஹோதி, ஸோ ச அனு-ஸத்³தோ³ ஹேதுஅத்த²ஜோதகோதி ஆஹ ‘‘ததா²க³தங் ஹேதுங் அனுஜாதோ’’தி. அவஞ்ஞாதப்³ப³பா⁴வேன ஜாதோதி அவஜாதோ து³ப்படிபன்னத்தா. தேனாஹ ‘‘து³ஸ்ஸீலோ’’தி. ததா² ஹி வுத்தங் கோகாலிகங் ஆரப்³ப⁴ ‘‘புரிஸந்தகலி அவஜாதோ’’தி. புத்தோ நாம ந ஹோதி தஸ்ஸ ஓவாதா³னுஸாஸனியங் அட்டி²தத்தா. ஏவமாஹாதி ‘‘அனுஜாதோ ததா²க³த’’ந்தி ஏவமாஹ.
Tathāgatena jātoti tathāgatena hetunā ariyāya jātiyā jāto. Hetuatthe karaṇavacanaṃ. Anujātoti ca vutte anu-saddassa vasena tathāgatanti ca upayogavacanameva hoti, so ca anu-saddo hetuatthajotakoti āha ‘‘tathāgataṃ hetuṃ anujāto’’ti. Avaññātabbabhāvena jātoti avajāto duppaṭipannattā. Tenāha ‘‘dussīlo’’ti. Tathā hi vuttaṃ kokālikaṃ ārabbha ‘‘purisantakali avajāto’’ti. Putto nāma na hoti tassa ovādānusāsaniyaṃ aṭṭhitattā. Evamāhāti ‘‘anujāto tathāgata’’nti evamāha.
விஜ்ஜாதி மக்³க³விஜ்ஜா. உக்கட்ட²னித்³தே³ஸேன விமுத்தீதி ப²லவிமுத்தி. நனு ச மக்³கோ³ பா⁴வேதப்³பே³ன க³ஹிதோதி? ஸச்சங் க³ஹிதோ, ஸப்³பே³ ச பன ஸத்த த⁴ம்மா அபி⁴ஞ்ஞெய்யாதி விஜ்ஜாய அபி⁴ஞ்ஞெய்யபா⁴வோ வுத்தோ. இமினா வா நயேன ஸப்³பே³ஸம்பி அபி⁴ஞ்ஞெய்யபா⁴வோ வுத்தோ ஏவாதி வேதி³தப்³போ³. ப²லேன வினா ஹேதுபா⁴வஸ்ஸேவ அபா⁴வதோ ஹேதுவசனேன ப²லஸித்³தி⁴, நிரோத⁴ஸ்ஸ ச ஸம்பாபனேன மக்³க³ஸ்ஸ ஹேதுபா⁴வோ. து³க்க²ஸ்ஸ நிப்³ப³த்தனேன தண்ஹாய ஸமுத³யபா⁴வோதி இமமத்த²ங் ஸங்க³ஹிதமேவ அத்த²தோ ஆபன்னத்தா. யுத்தஹேதுனாதி யுத்தியுத்தேன ஹேதுனா பு³த்³த⁴பா⁴வங் ஸாதே⁴தி ஸச்சவினிமுத்தஸ்ஸ பு³ஜ்ஜி²தப்³ப³ஸ்ஸ அபா⁴வதோ ஸச்சஸம்போ³த⁴னேனேவ ச தஸ்ஸ அனவஸேஸதோ பு³த்³த⁴த்தா. அத்த²வசனஞ்சேதங், பயோக³வசனானி பன – ப்³ராஹ்மண, அஹங் ஸம்மாஸம்பு³த்³தோ⁴ ஸப்³ப³தா² அவிபரீதத⁴ம்மதே³ஸனோ, ஸம்மாஸம்பு³த்³த⁴த்தா ஸப்³ப³த்த² அவிபரீதமாசிக்க²தி யதா²ஹங் ஸப்³ப³மக்³க³தே³ஸகோதி . கிங் பன ப⁴க³வா ஸயமேவ அத்தனோ ஸம்மாஸம்பு³த்³த⁴பா⁴வங் ஆரோசேதீதி? மஹாகருணாய அஞ்ஞேஸங் மஹாவிஸயதோ. தத்த² ‘‘ஏகொம்ஹி ஸம்மாஸம்பு³த்³தோ⁴, ஸப்³பா³பி⁴பூ⁴ ஸப்³ப³விதூ³ஹமஸ்மீ’’திஆதீ³னி (மஹாவ॰ 11; ம॰ நி॰ 1.285; 2.341; கதா²॰ 405) ஸுத்தபதா³னி இத³மேவ ச ஸுத்தபத³ங் ஏதஸ்ஸ அத்த²ஸ்ஸ ஸாத⁴கங்.
Vijjāti maggavijjā. Ukkaṭṭhaniddesena vimuttīti phalavimutti. Nanu ca maggo bhāvetabbena gahitoti? Saccaṃ gahito, sabbe ca pana satta dhammā abhiññeyyāti vijjāya abhiññeyyabhāvo vutto. Iminā vā nayena sabbesampi abhiññeyyabhāvo vutto evāti veditabbo. Phalena vinā hetubhāvasseva abhāvato hetuvacanena phalasiddhi, nirodhassa ca sampāpanena maggassa hetubhāvo. Dukkhassa nibbattanena taṇhāya samudayabhāvoti imamatthaṃ saṅgahitameva atthato āpannattā. Yuttahetunāti yuttiyuttena hetunā buddhabhāvaṃ sādheti saccavinimuttassa bujjhitabbassa abhāvato saccasambodhaneneva ca tassa anavasesato buddhattā. Atthavacanañcetaṃ, payogavacanāni pana – brāhmaṇa, ahaṃ sammāsambuddho sabbathā aviparītadhammadesano, sammāsambuddhattā sabbattha aviparītamācikkhati yathāhaṃ sabbamaggadesakoti . Kiṃ pana bhagavā sayameva attano sammāsambuddhabhāvaṃ ārocetīti? Mahākaruṇāya aññesaṃ mahāvisayato. Tattha ‘‘ekomhi sammāsambuddho, sabbābhibhū sabbavidūhamasmī’’tiādīni (mahāva. 11; ma. ni. 1.285; 2.341; kathā. 405) suttapadāni idameva ca suttapadaṃ etassa atthassa sādhakaṃ.
ஸல்லகந்தனோதி ஸல்லானங் ஸமுச்சி²ன்னத்தா. ரோக³ஸ்ஸாதி கிலேஸரோக³ஸ்ஸ. தஸ்மாதி அபுனபவத்திபாத³னேன திகிச்ச²னதோ. ப்³ரஹ்மங் வா ஸெட்ட²ங் ஸம்மாஸம்போ³தி⁴ங் பத்தோதி ப்³ரஹ்மபூ⁴தோ. ஏவங் ஆக³தாயாதி இமினா –
Sallakantanoti sallānaṃ samucchinnattā. Rogassāti kilesarogassa. Tasmāti apunapavattipādanena tikicchanato. Brahmaṃ vā seṭṭhaṃ sammāsambodhiṃ pattoti brahmabhūto. Evaṃ āgatāyāti iminā –
‘‘காமா தே பட²மா ஸேனா, து³தியா அரதி வுச்சதி;
‘‘Kāmā te paṭhamā senā, dutiyā arati vuccati;
ததியா கு²ப்பிபாஸா தே, சதுத்தீ² தண்ஹா பவுச்சதி.
Tatiyā khuppipāsā te, catutthī taṇhā pavuccati.
தி²னமித்³த⁴ங் தேபஞ்சமங் தி²னமித்³த⁴ங் தே, ச²ட்டா² பீ⁴ரூ பவுச்சதி;
Thinamiddhaṃ tepañcamaṃ thinamiddhaṃ te, chaṭṭhā bhīrū pavuccati;
ஸத்தமீ விசிகிச்சா² தே, மக்கோ² த²ம்போ⁴ தே அட்ட²மோ.
Sattamī vicikicchā te, makkho thambho te aṭṭhamo.
லாபோ⁴ ஸிலோகோ ஸக்காரோ, மிச்சா²லத்³தோ⁴ ச யோ யஸோ;
Lābho siloko sakkāro, micchāladdho ca yo yaso;
யோ சத்தானங் ஸமுக்கங்ஸே, பரே ச அவஜானதி;
Yo cattānaṃ samukkaṃse, pare ca avajānati;
ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ’’தி. (ஸு॰ நி॰ 438-441);
Esā namuci te senā, kaṇhassābhippahārinī’’ti. (su. ni. 438-441);
ஏவங் வுத்தங் நவவித⁴ங் ஸேனங் ஸங்க³ய்ஹதி. வஸே வத்தெத்வாதி ஸமுச்சி²ந்த³னேன அனுப்பாத³தாபாத³னேன வஸே வத்தெத்வா. குதோசி அப⁴யோ நிப்³ப⁴யோ.
Evaṃ vuttaṃ navavidhaṃ senaṃ saṅgayhati. Vase vattetvāti samucchindanena anuppādatāpādanena vase vattetvā. Kutoci abhayo nibbhayo.
ஸயமேவ த³ட்ட²ப்³ப³ந்தி யேன யேன அதி⁴க³தோ, தேன தேன பரஸத்³தா⁴ய க³ந்தப்³ப³ங் ஹித்வா அஸம்மோஹதோ பச்சவெக்க²ணாஞாணேனேவ ஸாமங் த³ட்ட²ப்³ப³ங். தேனாஹ ‘‘பச்சக்க²’’ந்தி. பஸட்டா² தி³ட்டி² ஸந்தி³ட்டி². யதா² ரதே²ன ஜயதீதி ரதி²கோ, ஏவங் இத³ங் மக்³க³ப்³ரஹ்மசரியங் ஸந்தி³ட்டி²யா ஜயதீதி ஸந்தி³ட்டி²கங். அத² வா தி³ட்ட²ந்தி த³ஸ்ஸனங் வுச்சதி, தி³ட்ட²மேவ ஸந்தி³ட்ட²ங், ஸந்த³ஸ்ஸனந்தி அத்தோ². ஸந்தி³ட்ட²ங் அரஹதீதி ஸந்தி³ட்டி²கோ யதா² வத்த²யுக³ங் அரஹதீதி வத்த²யுகி³கோ. ஸந்தி³ட்டி²கங் ப²லதா³னங் ஸந்தா⁴ய நாஸ்ஸ காலோதி அகாலங், அகாலமேவ அகாலிகங், ந காலந்தரங் கே²பெத்வா ப²லங் தே³தி, அத்தனோ பன பவத்திஸமனந்தரமேவ ப²லங் தே³தீதி அத்தோ². அத² வா அத்தனோ ப²லப்பதா³னே பகட்டோ² காலோ பத்தோ அஸ்ஸாதி காலிகோ, லோகியோ குஸலத⁴ம்மோ, இத³ங் பன ஸமனந்தரப²லத்தா ந காலிகங்.
Sayameva daṭṭhabbanti yena yena adhigato, tena tena parasaddhāya gantabbaṃ hitvā asammohato paccavekkhaṇāñāṇeneva sāmaṃ daṭṭhabbaṃ. Tenāha ‘‘paccakkha’’nti. Pasaṭṭhā diṭṭhi sandiṭṭhi. Yathā rathena jayatīti rathiko, evaṃ idaṃ maggabrahmacariyaṃ sandiṭṭhiyā jayatīti sandiṭṭhikaṃ. Atha vā diṭṭhanti dassanaṃ vuccati, diṭṭhameva sandiṭṭhaṃ, sandassananti attho. Sandiṭṭhaṃ arahatīti sandiṭṭhiko yathā vatthayugaṃ arahatīti vatthayugiko. Sandiṭṭhikaṃ phaladānaṃ sandhāya nāssa kāloti akālaṃ, akālameva akālikaṃ, na kālantaraṃ khepetvā phalaṃ deti, attano pana pavattisamanantarameva phalaṃ detīti attho. Atha vā attano phalappadāne pakaṭṭho kālo patto assāti kāliko, lokiyo kusaladhammo, idaṃ pana samanantaraphalattā na kālikaṃ.
400. ‘‘மஹாயஞ்ஞங் பவத்தயீ’’திஆதீ³ஸு கேவலங் தா³னத⁴ம்மாதீ³ஸு யஞ்ஞபரியாயஸம்ப⁴வதோ ‘‘ப்³ராஹ்மணானங் யஞ்ஞாபா⁴வதோ’’தி வுத்தங். ப்³ராஹ்மணா ஹி ‘‘அக்³கி³முகா² தே³வா’’தி அக்³கி³ஜுஹனபுப்³ப³கங் யஞ்ஞங் வித³ஹந்தி. தேனாஹ ‘‘அக்³கி³ஜுஹனப்பதா⁴னாதி அத்தோ²’’தி ‘‘பூ⁴ர்பு⁴வ? ஸ்வ?’’ இதி ஸாவித்தீ புப்³ப³கத்தா முக²ங் புப்³ப³ங்க³மங் . ‘‘முக²மிவ முக²’’ந்திஆதீ³ஸு விய இதா⁴பி பதா⁴னபரியாயோ முக²ஸத்³தோ³தி த³ஸ்ஸெந்தோ ‘‘மனுஸ்ஸானங் ஸெட்ட²தோ ராஜா ‘முக²’ந்தி வுத்தோ’’தி ஆஹ. ஆதா⁴ரதோதி ஓகா³ஹந்தீனங் நதீ³னங் ஆதா⁴ரபா⁴வதோ படிஸரணதோ க³ந்தப்³ப³ட்டா²னபா⁴வதோ. ஸஞ்ஞாணதோதி சந்த³யோக³வஸேன அஜ்ஜ அஸுகனக்க²த்தந்தி பஞ்ஞாயனதோ. ஆலோககரணதோதி நக்க²த்தானி அபி⁴ப⁴வித்வா ஆலோககரணதோ. ஸொம்மபா⁴வதோதி ஸீதஹிமவாஸீதவாதூபக்க²ரபா⁴வதோ. தபந்தானந்தி தீ³பஸிகா² அக்³கி³ஜாலா அஸனிவிசக்கந்தி ஏவமாதீ³னங் விஜ்ஜலந்தானங். ஆயமுக²ங் அக்³க³த³க்கி²ணெய்யபா⁴வேன.
400. ‘‘Mahāyaññaṃ pavattayī’’tiādīsu kevalaṃ dānadhammādīsu yaññapariyāyasambhavato ‘‘brāhmaṇānaṃ yaññābhāvato’’ti vuttaṃ. Brāhmaṇā hi ‘‘aggimukhā devā’’ti aggijuhanapubbakaṃ yaññaṃ vidahanti. Tenāha ‘‘aggijuhanappadhānāti attho’’ti ‘‘bhūrbhuva? Sva?’’ Iti sāvittī pubbakattā mukhaṃ pubbaṅgamaṃ . ‘‘Mukhamiva mukha’’ntiādīsu viya idhāpi padhānapariyāyo mukhasaddoti dassento ‘‘manussānaṃ seṭṭhato rājā ‘mukha’nti vutto’’ti āha. Ādhāratoti ogāhantīnaṃ nadīnaṃ ādhārabhāvato paṭisaraṇato gantabbaṭṭhānabhāvato. Saññāṇatoti candayogavasena ajja asukanakkhattanti paññāyanato. Ālokakaraṇatoti nakkhattāni abhibhavitvā ālokakaraṇato. Sommabhāvatoti sītahimavāsītavātūpakkharabhāvato. Tapantānanti dīpasikhā aggijālā asanivicakkanti evamādīnaṃ vijjalantānaṃ. Āyamukhaṃ aggadakkhiṇeyyabhāvena.
தி³ப்³ப³சக்கு² த⁴ம்மசக்கு² பஞ்ஞாசக்கு² பு³த்³த⁴சக்கு² ஸமந்தசக்கூ²தி இமேஹி பஞ்சஹி சக்கூ²ஹி. தே ஸரணஸ்ஸாதி தே ஸரணஸ்ஸ ச, தே ஸரணபா⁴வமூலகத்தா இதரத்³வயஸ்ஸ ச, யதா²வுத்த தே-பதே³ன வுத்தத்த²தோ பரஸ்ஸ சாதி அத்தோ². இத³ங் வுத்தங் ஹோதி – ‘‘தே துய்ஹங், இதரஸ்ஸ ச ஸரணஸ்ஸ அஹோ ஆனுபா⁴வோ’’தி. ஆவுத்திவஸேன வா தே ஸரணஸ்ஸாதி எத்த² அத்தோ² விபா⁴வேதப்³போ³ – துய்ஹங் ஸரணபூ⁴தஸ்ஸ ச இதரஸரணஸ்ஸ ச ஆனுபா⁴வோதி. ஸேஸங் ஸுவிஞ்ஞெய்யமேவ.
Dibbacakkhu dhammacakkhu paññācakkhu buddhacakkhu samantacakkhūti imehi pañcahi cakkhūhi. Te saraṇassāti te saraṇassa ca, te saraṇabhāvamūlakattā itaradvayassa ca, yathāvutta te-padena vuttatthato parassa cāti attho. Idaṃ vuttaṃ hoti – ‘‘te tuyhaṃ, itarassa ca saraṇassa aho ānubhāvo’’ti. Āvuttivasena vā te saraṇassāti ettha attho vibhāvetabbo – tuyhaṃ saraṇabhūtassa ca itarasaraṇassa ca ānubhāvoti. Sesaṃ suviññeyyameva.
ஸேலஸுத்தவண்ணனாய லீனத்த²ப்பகாஸனா ஸமத்தா.
Selasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 2. ஸேலஸுத்தங் • 2. Selasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 2. ஸேலஸுத்தவண்ணனா • 2. Selasuttavaṇṇanā
