| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
ஸேனாஸனக்³கா³ஹகதா²
Senāsanaggāhakathā
318. ஸெய்யாதி காயபஸாரணஸங்கா²தங் ஸயனகிரியங் படிக்கி²பித்வா ஸேனாஸனஸங்கா²தங் ஸெய்யங் த³ஸ்ஸெந்தோ ஆஹ ‘‘மஞ்சட்டா²னானீ’’தி. ‘‘ஸெய்யாபரிச்சே²தே³னா’’தி இமினா ஸெய்யக்³கே⁴னாதி எத்த² அக்³க⁴ஸத்³த³ஸ்ஸ பூஜனத்த²ங் படிக்கி²பித்வா பரிச்சே²த³னத்த²ங் தீ³பேதி. எத்த² ச அக்³க⁴ஸத்³த³ஸ்ஸ சதுத்த²க்க²ரேன யுத்தபா⁴வோ ஹெட்டா² ஸமுச்சயக்க²ந்த⁴கவண்ணனா (சூளவ॰ அட்ட²॰ 102) யோஜனாய வுத்தோயேவ. காலந்தி ஸெய்யாபடிக்³க³ஹணஸ்ஸ காலங். கா³ஹியமானாதி கா³ஹாபியமானா. ‘‘அதிரேகானி அஹேஸு’’ந்தி இமினா உஸ்ஸாரயிங்ஸூதி எத்த² உத்³த⁴ங் ஸாரயிங்ஸு க³ச்சி²ங்ஸு பவத்திங்ஸூதி அத்த²ங் த³ஸ்ஸேதி. அதிரேகானீதி ச பி⁴க்கு²பரிச்சே²த³தோ ஸெய்யாபரிச்சே²தா³னி அதிரேகானி. அனுபா⁴க³ந்தி எத்த² அனு பச்சா² தா³தப்³போ³ பா⁴கோ³ அனுபா⁴கோ³தி த³ஸ்ஸெந்தோ ஆஹ ‘‘புன அபரம்பி பா⁴க³ங் தா³து’’ந்தி. அதிமந்தே³ஸூதிஆதி³வசனேன கிஞ்சிமந்தே³ஸு பி⁴க்கூ²ஸு ஏகேகஸ்ஸ பி⁴க்கு²னோ த்³வே திஸ்ஸோ ஸெய்யா தா³தப்³பா³. யதோ கிஞ்சிமந்தே³ஸு பி⁴க்கூ²ஸு த்³வே தயோ விஹாரா தா³தப்³பா³தி அத்தோ²பி க³ஹேதப்³போ³. தத்தா²தி ‘‘ந அகாமா தா³தப்³போ³’’தி வசனே. அனுபா⁴கே³ க³ஹிதேதி யோஜனா. யேன அனுபா⁴கோ³ ச பட²மபா⁴கோ³ ச க³ஹிதோ, ஸோ பி⁴க்கூ²தி யோஜனா.
318.Seyyāti kāyapasāraṇasaṅkhātaṃ sayanakiriyaṃ paṭikkhipitvā senāsanasaṅkhātaṃ seyyaṃ dassento āha ‘‘mañcaṭṭhānānī’’ti. ‘‘Seyyāparicchedenā’’ti iminā seyyagghenāti ettha agghasaddassa pūjanatthaṃ paṭikkhipitvā paricchedanatthaṃ dīpeti. Ettha ca agghasaddassa catutthakkharena yuttabhāvo heṭṭhā samuccayakkhandhakavaṇṇanā (cūḷava. aṭṭha. 102) yojanāya vuttoyeva. Kālanti seyyāpaṭiggahaṇassa kālaṃ. Gāhiyamānāti gāhāpiyamānā. ‘‘Atirekāni ahesu’’nti iminā ussārayiṃsūti ettha uddhaṃ sārayiṃsu gacchiṃsu pavattiṃsūti atthaṃ dasseti. Atirekānīti ca bhikkhuparicchedato seyyāparicchedāni atirekāni. Anubhāganti ettha anu pacchā dātabbo bhāgo anubhāgoti dassento āha ‘‘puna aparampi bhāgaṃ dātu’’nti. Atimandesūtiādivacanena kiñcimandesu bhikkhūsu ekekassa bhikkhuno dve tisso seyyā dātabbā. Yato kiñcimandesu bhikkhūsu dve tayo vihārā dātabbāti atthopi gahetabbo. Tatthāti ‘‘na akāmā dātabbo’’ti vacane. Anubhāge gahiteti yojanā. Yena anubhāgo ca paṭhamabhāgo ca gahito, so bhikkhūti yojanā.
‘‘உபசாரஸீமதோ ப³ஹீ’’தி இமினா நிஸ்ஸீமேதி எத்த² ஸீமதோ ப³ஹி நிக்க²ந்தங், நிஸின்னங் வா நிஸ்ஸீமந்தி அத்த²ங் த³ஸ்ஸேதி. உபசாரஸீமாய ஆவாஸவட்³ட⁴னவஸேன அதிவித்தா²ரத்தா வுத்தங் ‘‘தூ³ரே டி²தஸ்ஸாபீ’’தி. உதுகாலேபீதி ஹேமந்தகி³ம்ஹகாலேபி. தஸ்மிஞ்ஹி காலே ஸீதஉண்ஹஉது திகி²ணோ ஹோதி, தஸ்மா தஸ்ஸேவ விஸேஸேன உதுகாலோதி நாமங் பாகடங் ஹோதி. தேன வுத்தங் ‘‘ஹேமந்தகி³ம்ஹகாலேபீ’’தி. பிஸத்³தே³ன வஸ்ஸகாலங் அபெக்க²தி. புரிமவஸ்ஸூபனாயிகதி³வஸே கா³ஹோ புரிமகோ, பச்சி²மவஸ்ஸூபனாயிகதி³வஸே கா³ஹோ பச்சி²மகோ.
‘‘Upacārasīmato bahī’’ti iminā nissīmeti ettha sīmato bahi nikkhantaṃ, nisinnaṃ vā nissīmanti atthaṃ dasseti. Upacārasīmāya āvāsavaḍḍhanavasena ativitthārattā vuttaṃ ‘‘dūre ṭhitassāpī’’ti. Utukālepīti hemantagimhakālepi. Tasmiñhi kāle sītauṇhautu tikhiṇo hoti, tasmā tasseva visesena utukāloti nāmaṃ pākaṭaṃ hoti. Tena vuttaṃ ‘‘hemantagimhakālepī’’ti. Pisaddena vassakālaṃ apekkhati. Purimavassūpanāyikadivase gāho purimako, pacchimavassūpanāyikadivase gāho pacchimako.
அந்தரா த்³வீஹி வஸ்ஸூபனாயிகதி³வஸேஹி முத்தே காலே கா³ஹோ அந்தராமுத்தகோ. ஏகஸ்மிங் விஹாரேதி ஏகிஸ்ஸங் விஹாரஸீமாயங். ஸேனாஸனஸாமிகாதி ஸேனாஸனதா³யகா, தெ³ந்தீதி ஸம்ப³ந்தோ⁴. தந்தி ஸேனாஸனங். ஆவாஸிகா ந ஓலோகெந்தீதி ஸம்ப³ந்தோ⁴. எத்தா²தி ஸேனாஸனே. பலுஜ்ஜந்தம்பீதி வினஸ்ஸந்தம்பி. ப⁴க³வா ஆஹாதி ஸம்ப³ந்தோ⁴. தஸ்ஸாதி ஸேனாஸனஸ்ஸ. அபரஜ்ஜூதி அபரஸ்மிங் அஹனி அபரஜ்ஜு. க³தாயாதி அதிக்கமிதாய. பவாரணாய க³தாய பவாரணதி³வஸே அதிக்கமிதே ஸதி அபரஜ்ஜு அந்தராமுத்தகோ கா³ஹேதப்³போ³தி யோஜனா.
Antarā dvīhi vassūpanāyikadivasehi mutte kāle gāho antarāmuttako. Ekasmiṃ vihāreti ekissaṃ vihārasīmāyaṃ. Senāsanasāmikāti senāsanadāyakā, dentīti sambandho. Tanti senāsanaṃ. Āvāsikā na olokentīti sambandho. Etthāti senāsane. Palujjantampīti vinassantampi. Bhagavā āhāti sambandho. Tassāti senāsanassa. Aparajjūti aparasmiṃ ahani aparajju. Gatāyāti atikkamitāya. Pavāraṇāya gatāya pavāraṇadivase atikkamite sati aparajju antarāmuttako gāhetabboti yojanā.
தந்தி அந்தராமுத்தகங். கா³ஹெந்தேனாதி கா³ஹாபெந்தேன. தேனாதி க³ண்ஹந்தேன. அட்ட²மாஸேதி சத்தாரோ ஹேமந்தமாஸே, சத்தாரோ ச கி³ம்ஹமாஸேதி அட்ட²மாஸே. கதா³சி பஞ்ச கி³ம்ஹமாஸேதி நவமாஸே வா. க²ண்ட³ங் வாதி சி²ன்னட்டா²னங் வா. பு²ல்லங் வாதி ப²லிதட்டா²னங் வா. படிஸங்க²ரிதப்³ப³ந்தி பாகதிகங் காதப்³ப³ங். தி³வஸங் கே²பெத்வாதி பரிவேணே தி³வஸங் கே²பெத்வா. தத்தா²தி க³ஹிதஸேனாஸனே. ரத்திந்தி³வந்தி ரத்தி ச தி³வோ ச ரத்திந்தி³வங், ஸமாஹாரத்³வந்தோ³, அச்சந்தஸங்யோகே³ சேதங் உபயோக³வசனங். ந லப்³ப⁴தீதி ஸங்க⁴த்தே²ரேன ந லப்³ப⁴தி. இத³ந்தி ஸேனாஸனங்.
Tanti antarāmuttakaṃ. Gāhentenāti gāhāpentena. Tenāti gaṇhantena. Aṭṭhamāseti cattāro hemantamāse, cattāro ca gimhamāseti aṭṭhamāse. Kadāci pañca gimhamāseti navamāse vā. Khaṇḍaṃ vāti chinnaṭṭhānaṃ vā. Phullaṃ vāti phalitaṭṭhānaṃ vā. Paṭisaṅkharitabbanti pākatikaṃ kātabbaṃ. Divasaṃ khepetvāti pariveṇe divasaṃ khepetvā. Tatthāti gahitasenāsane. Rattindivanti ratti ca divo ca rattindivaṃ, samāhāradvando, accantasaṃyoge cetaṃ upayogavacanaṃ. Na labbhatīti saṅghattherena na labbhati. Idanti senāsanaṃ.
அந்தராமுத்தககா³ஹேன அக³ஹேதப்³ப³ஸேனாஸனங் த³ஸ்ஸெந்தோ ஆஹ ‘‘யஸ்மிங் பனா’’திஆதி³. தேமாஸச்சயேன தேமாஸச்சயேனாதி திண்ணங் மாஸானங் அதிக்கமேன திண்ணங் மாஸானங் அதிக்கமேன. ஹீதி ஸச்சங், யஸ்மா வா. யஸ்மிங் பனாதி ஸேனாஸனே பன. ஸகிதே³வாதி ஏகவாரமேவ. அயந்தி ஏஸா கதா².
Antarāmuttakagāhena agahetabbasenāsanaṃ dassento āha ‘‘yasmiṃ panā’’tiādi. Temāsaccayena temāsaccayenāti tiṇṇaṃ māsānaṃ atikkamena tiṇṇaṃ māsānaṃ atikkamena. Hīti saccaṃ, yasmā vā. Yasmiṃ panāti senāsane pana. Sakidevāti ekavārameva. Ayanti esā kathā.
தத்தா²தி து³விதே⁴ஸு ஸேனாஸனக்³கா³ஹேஸு. உதுகாலந்தி உதுகாலே ஆக³ச்ச²ந்தீதி ஸம்ப³ந்தோ⁴. தேஸங் ததா³வ தா³தப்³ப³ந்தி ஸம்ப³ந்தோ⁴. அகாலோ நாமாதி உட்டா²பனஸ்ஸ அகாலோ நாம நத்தி². ஏகங் வா மஞ்சட்டா²னங் வா ட²பேதப்³ப³ந்தி யோஜனா. ஏகோ வா தே²ரோ ஆக³ச்ச²தீதி யோஜனா. உப்³ப⁴ண்டி³காதி உக்கி²த்தப⁴ண்டி³கா.
Tatthāti duvidhesu senāsanaggāhesu. Utukālanti utukāle āgacchantīti sambandho. Tesaṃ tadāva dātabbanti sambandho. Akālo nāmāti uṭṭhāpanassa akālo nāma natthi. Ekaṃ vā mañcaṭṭhānaṃ vā ṭhapetabbanti yojanā. Eko vā thero āgacchatīti yojanā. Ubbhaṇḍikāti ukkhittabhaṇḍikā.
ப³ஹூஸூதி தயோ ஆதி³ங் கத்வா ப³ஹூஸு பி⁴க்கூ²ஸு. பஹோதீதி ஏகேகஸ்ஸ பி⁴க்கு²ஸ்ஸ பஹோதி. தத்தா²தி பரிவேணே. தஸ்ஸேவாதி பரிவேணஸாமிகஸ்ஸேவ. ஏவங் அபஹொந்தேஸூதி ஏவங் பரிவேணக்³கே⁴ன அபஹொந்தேஸு. பாஸாத³க்³கே⁴னாதி விஹாரஸங்கா²தஸ்ஸ பாஸாத³ஸ்ஸ பரிச்சே²தே³ன. ஓவரகக்³கே⁴னாதி க³ப்³ப⁴ஸ்ஸ பரிச்சே²தே³ன. ஸெய்யக்³கே⁴னாதி சதுபஞ்சஹத்த²ப்பமாணாய ஸெய்யாய பரிச்சே²தே³ன. மஞ்சட்டா²னேனாதி த்³விஹத்த²வித்தா²ரஸ்ஸ சதுஹத்த²ஆயாமஸ்ஸ மஞ்சஸ்ஸ டா²னேன. ஏகமஞ்சட்டா²னஸ்ஸ த்³வின்னங் பீட²கானங் டா²னத்தா வுத்தங் ‘‘ஏகபீட²கட்டா²னவஸேனா’’தி. இத³ங் நிஸீதி³துங் ஸக்குணெய்யவஸேன வுத்தங். ஸசே ந ஸக்கா நிஸீதி³துங், ந தா³தப்³ப³ங். தேன வுத்தங் ‘‘பி⁴க்கு²னோ பன டி²தோகாஸமத்தங் ந கா³ஹேதப்³ப³’’ந்தி. ஏதந்தி டி²தோகாஸமத்தங். ஹீதி ஸச்சங், யஸ்மா வா. ஏகமஞ்சட்டா²னஸ்ஸ திண்ணங் ஜனானங் ஏகபீட²கட்டா²னபா⁴வேன அபஹொந்தத்தா வுத்தங் ‘‘ஏகங் மஞ்சட்டா²னங் வா திண்ணங் ஜனானங் தா³தப்³ப³’’ந்தி. ஹீதி ஸச்சங். ‘‘ஸீதஸமயே’’தி இமினா உண்ஹஸமயேபி ஸப்³ப³தி³வஸங் அஜ்ஜோ²காஸே வஸிதுங் ந ஸக்காதி தீ³பேதி. பரிளாஹஸமயே பன ஸக்கா ஸப்³ப³ரத்திங் அஜ்ஜோ²காஸே வஸிதுங். கிஞ்சாபி ஸக்கா, ஸீதுண்ஹகாலே பன ந தா³தப்³ப³த்தா பரிளாஹஸமயேபி ந தா³தப்³ப³ந்தி வேதி³தப்³ப³ங். ஏகமஞ்சட்டா²னே வா ஏகபீட²கட்டா²னே வா திண்ணங் ஜனானங் நிஸீத³னாகாரங் த³ஸ்ஸெந்தோ ஆஹ ‘‘மஹாதே²ரேனா’’திஆதி³. தத்த² மஹாதே²ரேன வத்தப்³ப³ந்தி ஸம்ப³ந்தோ⁴. நித்³தா³க³ருகோதி நித்³தா³ய க³ருகாரகோ. ஸீதங் அனுத³ஹதீதி ஸீதங் மங் பீளேதி. தேனாதி மஹாதே²ரேன. து³தியத்தே²ரேனாபீதி பிஸத்³தோ³ மஹாதே²ரங் அபெக்க²தி. வுத்தனயேனேவாதி ‘‘உக்காஸித்வா’’திஆதி³னா வுத்தனயேனேவ. ஏவந்திஆதி³ நிக³மனங். ஜம்பு³தீ³பே பன ஏகச்சே பி⁴க்கூ² கா³ஹெந்தீதி ஸம்ப³ந்தோ⁴. கிஞ்சிதே³வ மஞ்சட்டா²னங் வா பீட²ட்டா²னங் வாதி யோஜனா. அயந்திஆதி³ புரிமவசனஸ்ஸ நிக³மனவஸேன பச்சி²மவசனஸ்ஸ கத²னத்தா²ய வுத்தவசனங்.
Bahūsūti tayo ādiṃ katvā bahūsu bhikkhūsu. Pahotīti ekekassa bhikkhussa pahoti. Tatthāti pariveṇe. Tassevāti pariveṇasāmikasseva. Evaṃ apahontesūti evaṃ pariveṇagghena apahontesu. Pāsādagghenāti vihārasaṅkhātassa pāsādassa paricchedena. Ovarakagghenāti gabbhassa paricchedena. Seyyagghenāti catupañcahatthappamāṇāya seyyāya paricchedena. Mañcaṭṭhānenāti dvihatthavitthārassa catuhatthaāyāmassa mañcassa ṭhānena. Ekamañcaṭṭhānassa dvinnaṃ pīṭhakānaṃ ṭhānattā vuttaṃ ‘‘ekapīṭhakaṭṭhānavasenā’’ti. Idaṃ nisīdituṃ sakkuṇeyyavasena vuttaṃ. Sace na sakkā nisīdituṃ, na dātabbaṃ. Tena vuttaṃ ‘‘bhikkhuno pana ṭhitokāsamattaṃ na gāhetabba’’nti. Etanti ṭhitokāsamattaṃ. Hīti saccaṃ, yasmā vā. Ekamañcaṭṭhānassa tiṇṇaṃ janānaṃ ekapīṭhakaṭṭhānabhāvena apahontattā vuttaṃ ‘‘ekaṃ mañcaṭṭhānaṃ vā tiṇṇaṃ janānaṃ dātabba’’nti. Hīti saccaṃ. ‘‘Sītasamaye’’ti iminā uṇhasamayepi sabbadivasaṃ ajjhokāse vasituṃ na sakkāti dīpeti. Pariḷāhasamaye pana sakkā sabbarattiṃ ajjhokāse vasituṃ. Kiñcāpi sakkā, sītuṇhakāle pana na dātabbattā pariḷāhasamayepi na dātabbanti veditabbaṃ. Ekamañcaṭṭhāne vā ekapīṭhakaṭṭhāne vā tiṇṇaṃ janānaṃ nisīdanākāraṃ dassento āha ‘‘mahātherenā’’tiādi. Tattha mahātherena vattabbanti sambandho. Niddāgarukoti niddāya garukārako. Sītaṃ anudahatīti sītaṃ maṃ pīḷeti. Tenāti mahātherena. Dutiyattherenāpīti pisaddo mahātheraṃ apekkhati. Vuttanayenevāti ‘‘ukkāsitvā’’tiādinā vuttanayeneva. Evantiādi nigamanaṃ. Jambudīpe pana ekacce bhikkhū gāhentīti sambandho. Kiñcideva mañcaṭṭhānaṃ vā pīṭhaṭṭhānaṃ vāti yojanā. Ayantiādi purimavacanassa nigamanavasena pacchimavacanassa kathanatthāya vuttavacanaṃ.
வஸ்ஸாவாஸே ஸேனாஸனக்³கா³ஹோ ஏவங் வேதி³தப்³போ³தி யோஜனா. ஆக³ந்துகவத்தந்தி ஆக³ந்துகஸ்ஸ வத்தங். அஞ்ஞத்தா²தி அஞ்ஞஸ்மிங் டா²னே. க³ந்த்வா வஸிதுகாமேன ஆக³ந்துகேனாதி யோஜனா. வஸ்ஸூபனாயிகதி³வஸமேவாதி வஸ்ஸங் உபக³மனதி³வஸேயேவ. தத்தா²தி அஞ்ஞங் டா²னங். நக³ந்தப்³ப³காரணங் த³ஸ்ஸெந்தோ ஆஹ ‘‘வஸனட்டா²னங் வா ஹீ’’திஆதி³. ஹீதி யஸ்மா. தத்ராதி அஞ்ஞஸ்மிங் டா²னே. தேனாதி ஸம்பா³த⁴அஸம்பஜ்ஜனகாரணா. தஸ்மாதி யஸ்மா ந பா²ஸுங் விஹரெய்ய, தஸ்மா. தங் விஹாரந்தி யஸ்மிங் வஸிதுகாமோ, தங் விஹாரங். தத்தா²தி விஹாரே, வஸந்தோ ஸுக²ங் வஸிஸ்ஸதீதி ஸம்ப³ந்தோ⁴. உத்³தே³ஸத்தி²கோதி உத்³தே³ஸங் அத்தி²கோ, உத்³தே³ஸேன வா. கம்மட்டா²னஸப்பாயதந்தி கம்மட்டா²னேன, கம்மட்டா²னஸ்ஸ வா ஸப்பாயபா⁴வங்.
Vassāvāse senāsanaggāho evaṃ veditabboti yojanā. Āgantukavattanti āgantukassa vattaṃ. Aññatthāti aññasmiṃ ṭhāne. Gantvā vasitukāmena āgantukenāti yojanā. Vassūpanāyikadivasamevāti vassaṃ upagamanadivaseyeva. Tatthāti aññaṃ ṭhānaṃ. Nagantabbakāraṇaṃ dassento āha ‘‘vasanaṭṭhānaṃ vā hī’’tiādi. Hīti yasmā. Tatrāti aññasmiṃ ṭhāne. Tenāti sambādhaasampajjanakāraṇā. Tasmāti yasmā na phāsuṃ vihareyya, tasmā. Taṃ vihāranti yasmiṃ vasitukāmo, taṃ vihāraṃ. Tatthāti vihāre, vasanto sukhaṃ vasissatīti sambandho. Uddesatthikoti uddesaṃ atthiko, uddesena vā. Kammaṭṭhānasappāyatanti kammaṭṭhānena, kammaṭṭhānassa vā sappāyabhāvaṃ.
தத்தா²தி அஞ்ஞவிஹாரங். க³ச்ச²ந்தேன க⁴ட்டேதப்³போ³தி ஸம்ப³ந்தோ⁴. க⁴ட்டேதப்³பா³காரங் த³ஸ்ஸெந்தோ ஆஹ ‘‘ந தத்தா²’’திஆதி³. தத்த² தத்தா²தி ஸகட்டா²னே. கிங் ந வத்தப்³பா³தி ஆஹ ‘‘தும்ஹே’’திஆதி³. ஸலாகப⁴த்தாதீ³னி வா யாகு³க²ஜ்ஜகாதீ³னி வா நத்தி² ந விஜ்ஜந்தீதி யோஜனா. உபோஸதா²கா³ரஸ்ஸ பரிக்கா²ரோதி ஸம்ப³ந்தோ⁴. தும்ஹாகங் விஹாரஸ்ஸ இத³ங் தாளஞ்சேவ இமங் ஸூசிஞ்ச ஸம்படிச்ச²தா²தி யோஜனா. க³மியவத்தந்தி க³மிகானங் பி⁴க்கூ²னங் வத்தங். ‘‘த³ஹரேஹீ’’தி பத³ங் ‘‘உக்கி²பாபெத்வா’’தி ச ‘‘கா³ஹாபெத்வா’’தி ச பத³த்³வயே காரிதகம்மங், ‘‘பத்தசீவரப⁴ண்டி³காயோ’’தி பத³ங் ‘‘உக்கி²பாபெத்வா’’தி பதே³ தா⁴துகம்மங், ‘‘தேலனாளிகத்தரத³ண்டா³தீ³னீ’’தி பத³ங் ‘‘கா³ஹாபெத்வா’’தி பதே³ தா⁴துகம்மமேவ. அத்தானங் த³ஸ்ஸெந்தேனாதி அத்தானங் மனுஸ்ஸானங் பகாஸெந்தேன. விதக்கந்தி பச்சயபா³ஹுல்லிகவிதக்கங். ‘‘ஸபரிவார’’ந்தி பத³ங் ‘‘க³ச்ச²ந்தஞ்சா’’தி பதே³ கிரியாவிஸேஸனங். ஏவஞ்ஹி ஸதி ஸபரிவாரங் க³ச்ச²ந்தஞ்சாதி ஸம்ப³ந்தோ⁴. ‘‘ந’’ந்தி பதே³ பன காரகவிஸேஸனங். ஏவஞ்ஹி ஸதி ஸபரிவாரங் நங் பி⁴க்கு²ந்தி ஸம்ப³ந்தோ⁴. ‘‘தி³ஸ்வா’’தி பதே³ ச கிரியாவிஸேஸனமேவ. ஏவஞ்ஹி ஸதி க³ச்ச²ந்தஞ்ச நங் பி⁴க்கு²ங் ஸபரிவாரங் தி³ஸ்வாதி ஸம்ப³ந்தோ⁴. மனுஸ்ஸா வத³ந்தீதி ஸம்ப³ந்தோ⁴. தேஸூதி மனுஸ்ஸேஸு. ஏகோ பண்டி³தமனுஸ்ஸோதி ஸம்ப³ந்தோ⁴. அயங் காலோ வஸ்ஸூபனாயிககாலோ நாமாதி யோஜனா. யத்தா²தி டா²னே. தஸ்ஸாதி ஏகஸ்ஸ பண்டி³தமனுஸ்ஸஸ்ஸ, வசனந்தி ஸம்ப³ந்தோ⁴. தே மனுஸ்ஸா யாசந்தீதி ஸம்ப³ந்தோ⁴ . அஞ்ஞத்தா²தி அஞ்ஞங் டா²னங். மேஜ்ஜந்தி அஞ்ஞமஞ்ஞங் ஸினேஹந்தீதி மித்தா. ஸுக²து³க்கே²ஸு அமா ஸஹ வத்தந்தீதி அமச்சா. மித்தாயேவ அமச்சாதி மித்தாமச்சா, தே. ஸம்மந்தயித்வாதி ஸமங், ஸம்மா வா மந்தயித்வா. இதே⁴வாதி கா³மே ஏவ, விஹாரே ஏவ வா. கஸ்மா ஸாதி³துங் வட்டதி, நனு ஸப்³ப³மேதங் அகப்பியஞ்ச ஸாவஜ்ஜஞ்சாதி ஆஹ ‘‘ஸப்³ப³ஞ்ஹேதங் கப்பியஞ்சேவ அனவஜ்ஜஞ்சா’’தி. ஹி யஸ்மா ஏதங் ஸப்³ப³ங் கப்பியஞ்ச அனவஜ்ஜஞ்ச, தஸ்மா ஸப்³ப³ங் ஸாதி³துங் வட்டதீதி யோஜனா. குருந்தி³யங் பன வுத்தந்தி ஸம்ப³ந்தோ⁴. உப⁴யம்பீதி மஹாஅட்ட²கதா²குருந்தீ³ஸு வுத்தவசனவஸேன உப⁴யம்பி ஏதங் வசனந்தி ஸம்ப³ந்தோ⁴.
Tatthāti aññavihāraṃ. Gacchantena ghaṭṭetabboti sambandho. Ghaṭṭetabbākāraṃ dassento āha ‘‘na tatthā’’tiādi. Tattha tatthāti sakaṭṭhāne. Kiṃ na vattabbāti āha ‘‘tumhe’’tiādi. Salākabhattādīni vā yāgukhajjakādīni vā natthi na vijjantīti yojanā. Uposathāgārassa parikkhāroti sambandho. Tumhākaṃ vihārassa idaṃ tāḷañceva imaṃ sūciñca sampaṭicchathāti yojanā. Gamiyavattanti gamikānaṃ bhikkhūnaṃ vattaṃ. ‘‘Daharehī’’ti padaṃ ‘‘ukkhipāpetvā’’ti ca ‘‘gāhāpetvā’’ti ca padadvaye kāritakammaṃ, ‘‘pattacīvarabhaṇḍikāyo’’ti padaṃ ‘‘ukkhipāpetvā’’ti pade dhātukammaṃ, ‘‘telanāḷikattaradaṇḍādīnī’’ti padaṃ ‘‘gāhāpetvā’’ti pade dhātukammameva. Attānaṃ dassentenāti attānaṃ manussānaṃ pakāsentena. Vitakkanti paccayabāhullikavitakkaṃ. ‘‘Saparivāra’’nti padaṃ ‘‘gacchantañcā’’ti pade kiriyāvisesanaṃ. Evañhi sati saparivāraṃ gacchantañcāti sambandho. ‘‘Na’’nti pade pana kārakavisesanaṃ. Evañhi sati saparivāraṃ naṃ bhikkhunti sambandho. ‘‘Disvā’’ti pade ca kiriyāvisesanameva. Evañhi sati gacchantañca naṃ bhikkhuṃ saparivāraṃ disvāti sambandho. Manussā vadantīti sambandho. Tesūti manussesu. Eko paṇḍitamanussoti sambandho. Ayaṃ kālo vassūpanāyikakālo nāmāti yojanā. Yatthāti ṭhāne. Tassāti ekassa paṇḍitamanussassa, vacananti sambandho. Te manussā yācantīti sambandho . Aññatthāti aññaṃ ṭhānaṃ. Mejjanti aññamaññaṃ sinehantīti mittā. Sukhadukkhesu amā saha vattantīti amaccā. Mittāyeva amaccāti mittāmaccā, te. Sammantayitvāti samaṃ, sammā vā mantayitvā. Idhevāti gāme eva, vihāre eva vā. Kasmā sādituṃ vaṭṭati, nanu sabbametaṃ akappiyañca sāvajjañcāti āha ‘‘sabbañhetaṃ kappiyañceva anavajjañcā’’ti. Hi yasmā etaṃ sabbaṃ kappiyañca anavajjañca, tasmā sabbaṃ sādituṃ vaṭṭatīti yojanā. Kurundiyaṃ pana vuttanti sambandho. Ubhayampīti mahāaṭṭhakathākurundīsu vuttavacanavasena ubhayampi etaṃ vacananti sambandho.
ஆவாஸிகவத்தங் வித்தா²ரெந்தோ ஆஹ ‘‘படிகச்சேவ ஹீ’’திஆதி³. தத்த² படிகச்சேவாதி ஆக³ந்துகானங் ஆக³ததோ பட²மமேவ. பதா⁴னக⁴ரவிஹாரமக்³கோ³தி பதா⁴னக⁴ரமக்³கோ³ ச விஹாரமக்³கோ³ ச. முத்³த³வேதி³காயாதி சேதியஸ்ஸ ஹம்மியவேதி³காய. கஸ்மா இத³ம்பி ஸப்³ப³ங் காதப்³ப³ந்தி ஆஹ ‘‘வஸ்ஸங் வஸிதுகாமா ஹீ’’திஆதி³. ஹீதி ஸச்சங், யஸ்மா வா. வஸ்ஸங் வஸிதுகாமா ஸுக²ங் வஸிஸ்ஸந்தீதி ஸம்ப³ந்தோ⁴. கதபரிகம்மேஹி ஆவாஸிகேஹீதி ஸம்ப³ந்தோ⁴. யதோ குலதோ பகதியா லப்³ப⁴தி, தஸ்மிங் குலே வஸ்ஸாவாஸிகங் புச்சி²தப்³ப³ந்தி யோஜனா. ந தி³ன்னபுப்³ப³ந்தி புப்³பே³ ந தி³ன்னங். ஹீதி யஸ்மா. உபத்³து³தாதி உபக³ந்த்வா, பு⁴ஸங் வா பீளிதா. தத்தா²தி மனுஸ்ஸேஸு. யேதி மனுஸ்ஸா. வஸ்ஸாவாஸிகே கா³ஹிதேதி வஸ்ஸாவாஸிகே ஸேனாஸனே கா³ஹாபியமானே. கா³ஹிதபி⁴க்கூ²னந்தி கா³ஹாபிதபி⁴க்கூ²னங். வஸ்ஸாவாஸிகந்தி வஸ்ஸங் ஆவஸந்தானங் தா³தப்³ப³ங் சீவரங். கா³ஹணகாலோதி கா³ஹாபனகாலோ. உபகட்டோ²தி ஆஸன்னோ. சா²தகாதீ³ஹீதி ஆதி³ஸத்³தே³ன ரோகா³த³யோ ஸங்க³ண்ஹாதி. யந்தி சீவரங். ததோதி சீவரதோ. தந்தி வசனங். தத³னுரூபேனாதி தேஸங் மனுஸ்ஸானங் வசனஸ்ஸானுரூபேன. தேஸங் தேஸந்தி மனுஸ்ஸானங், வஸ்ஸாவாஸிகங் சீவரந்தி ஸம்ப³ந்தோ⁴.
Āvāsikavattaṃ vitthārento āha ‘‘paṭikacceva hī’’tiādi. Tattha paṭikaccevāti āgantukānaṃ āgatato paṭhamameva. Padhānagharavihāramaggoti padhānagharamaggo ca vihāramaggo ca. Muddavedikāyāti cetiyassa hammiyavedikāya. Kasmā idampi sabbaṃ kātabbanti āha ‘‘vassaṃ vasitukāmā hī’’tiādi. Hīti saccaṃ, yasmā vā. Vassaṃ vasitukāmā sukhaṃ vasissantīti sambandho. Kataparikammehi āvāsikehīti sambandho. Yato kulato pakatiyā labbhati, tasmiṃ kule vassāvāsikaṃ pucchitabbanti yojanā. Na dinnapubbanti pubbe na dinnaṃ. Hīti yasmā. Upaddutāti upagantvā, bhusaṃ vā pīḷitā. Tatthāti manussesu. Yeti manussā. Vassāvāsike gāhiteti vassāvāsike senāsane gāhāpiyamāne. Gāhitabhikkhūnanti gāhāpitabhikkhūnaṃ. Vassāvāsikanti vassaṃ āvasantānaṃ dātabbaṃ cīvaraṃ. Gāhaṇakāloti gāhāpanakālo. Upakaṭṭhoti āsanno. Chātakādīhīti ādisaddena rogādayo saṅgaṇhāti. Yanti cīvaraṃ. Tatoti cīvarato. Tanti vacanaṃ. Tadanurūpenāti tesaṃ manussānaṃ vacanassānurūpena. Tesaṃ tesanti manussānaṃ, vassāvāsikaṃ cīvaranti sambandho.
யஸ்ஸாதி பி⁴க்கு²னோ. ஸோதி பி⁴க்கு². இதி வத³ந்தீதி யோஜனா. தந்தி சீவரங். படிக்கம்மாதி படிக்கமித்வா. விஹாரதோ அபஸக்கித்வாதி அத்தோ². தத்ராதி கா³மே. உபனிக்கே²பங் ட²பெத்வாதி கப்பியவத்து²ங் வா அகப்பியவத்து²ங் வா ஆராமிகாதீ³னங் ஹத்தே² உபனிக்கே²பங் ட²பெத்வா. விஹாரேதி விஹாரஸ்ஸ, விஹாரே வஸ்ஸங் வஸந்தஸ்ஸ வா. அபுச்சி²த்வாபீதி பிஸத்³தே³ன ‘‘புச்சி²த்வாபீ’’தி அத்த²ங் த³ஸ்ஸேதி. தேஸந்திகுலானங். வத்தந்தி ஜக்³க³னாதி³வத்தங். தேஸந்தி குலானங். ஆக³தஞ்ச தந்தி தங் பங்ஸுகூலிகங் ஆக³தஞ்ச வத³ந்தீதி ஸம்ப³ந்தோ⁴. தேனாதி பங்ஸுகூலிகேன. தா³துங் ந இச்ச²ந்தீதி ஸங்க⁴ஸ்ஸ ஆசிக்க²ந்தேபி ஸங்க⁴ஸ்ஸ தா³துங் ந இச்ச²ந்தி. ஸபா⁴கோ³ பி⁴க்கூ²தி அத்தனா ஸபா⁴கோ³ பி⁴க்கு². ஏதந்தி வஸ்ஸாவாஸிகங். பங்ஸுகூலிகஸ்ஸ ந வட்டதி, கஸ்மா? க³ஹபதிசீவரத்தா. இதீதிஆதி³ நிக³மனங். ஸத்³தா⁴தெ³ய்யேதி ஸத்³தா⁴ய தா³தப்³பே³ வஸ்ஸாவாஸிகலாப⁴விஸயே.
Yassāti bhikkhuno. Soti bhikkhu. Iti vadantīti yojanā. Tanti cīvaraṃ. Paṭikkammāti paṭikkamitvā. Vihārato apasakkitvāti attho. Tatrāti gāme. Upanikkhepaṃ ṭhapetvāti kappiyavatthuṃ vā akappiyavatthuṃ vā ārāmikādīnaṃ hatthe upanikkhepaṃ ṭhapetvā. Vihāreti vihārassa, vihāre vassaṃ vasantassa vā. Apucchitvāpīti pisaddena ‘‘pucchitvāpī’’ti atthaṃ dasseti. Tesantikulānaṃ. Vattanti jagganādivattaṃ. Tesanti kulānaṃ. Āgatañca tanti taṃ paṃsukūlikaṃ āgatañca vadantīti sambandho. Tenāti paṃsukūlikena. Dātuṃ na icchantīti saṅghassa ācikkhantepi saṅghassa dātuṃ na icchanti. Sabhāgo bhikkhūti attanā sabhāgo bhikkhu. Etanti vassāvāsikaṃ. Paṃsukūlikassa na vaṭṭati, kasmā? Gahapaticīvarattā. Itītiādi nigamanaṃ. Saddhādeyyeti saddhāya dātabbe vassāvāsikalābhavisaye.
தத்ருப்பாதே³தி தஸ்மிங் விஹாரே உப்பஜ்ஜனகலாப⁴விஸயே. ப⁴ண்ட³படிச்சா²த³னந்தி படிச்சா²த³னசீவரப⁴ண்ட³ங். சீவரப⁴ண்ட³மேவ ஹி யஸ்மா அனேன ஸரீரங் படிச்சா²தி³யதி, தஸ்மா ப⁴ண்ட³படிச்சா²த³னந்தி வுச்சதி. கா³ஹேதா²தி பி⁴க்கூ²ஹி கா³ஹாபேத². கா³ஹேதப்³ப³ந்தி பி⁴க்கூ²ஹி கா³ஹாபேதப்³ப³ங். வத்து² பனாதி ஸாடகதோ அஞ்ஞங் கப்பியங் வா அகப்பியங் வா வத்து² பன. கஸ்மா வட்டதியேவ, நனு அகப்பியவத்து² ந வட்டதீதி ஆஹ ‘‘கப்பியகாரகானஞ்ஹி’’திஆதி³. தத்த² ஹி யஸ்மா அனுஞ்ஞாதங், தஸ்மா வட்டதியேவாதி யோஜனா. தி³ன்னவத்து²தோ உப்பன்னந்தி ஸம்ப³ந்தோ⁴.
Tatruppādeti tasmiṃ vihāre uppajjanakalābhavisaye. Bhaṇḍapaṭicchādananti paṭicchādanacīvarabhaṇḍaṃ. Cīvarabhaṇḍameva hi yasmā anena sarīraṃ paṭicchādiyati, tasmā bhaṇḍapaṭicchādananti vuccati. Gāhethāti bhikkhūhi gāhāpetha. Gāhetabbanti bhikkhūhi gāhāpetabbaṃ. Vatthu panāti sāṭakato aññaṃ kappiyaṃ vā akappiyaṃ vā vatthu pana. Kasmā vaṭṭatiyeva, nanu akappiyavatthu na vaṭṭatīti āha ‘‘kappiyakārakānañhi’’tiādi. Tattha hi yasmā anuññātaṃ, tasmā vaṭṭatiyevāti yojanā. Dinnavatthuto uppannanti sambandho.
யந்தி வத்து² தி³ன்னந்தி ஸம்ப³ந்தோ⁴. எத்தா²தி கப்பியகாரகானங் ஹத்தே² தி³ன்னவத்தூ²ஸு. தந்தி வத்து² உபனாமெந்தேஹீதி ஸம்ப³ந்தோ⁴. க³ருப⁴ண்ட³ங் ஹோதி, க³ருப⁴ண்ட³த்தா அஞ்ஞேஸு பச்சயேஸு ந உபனாமேதப்³ப³ந்தி அதி⁴ப்பாயோ. புக்³க³லவஸேனேவாதி ‘‘பி⁴க்கூ² சீவரேன கிலமந்தி, எத்தகங் நாம தண்டு³லபா⁴க³ங் பி⁴க்கூ²னங் சீவரங் காதுங் ருச்சதி ஸங்க⁴ஸ்ஸா’’திஆதி³னா புக்³க³லங் பராமஸித்வா புக்³க³லவஸேனேவ. ஸங்க⁴வஸேனாதி ‘‘ஸங்கோ⁴ சீவரேன கிலமதீ’’திஆதி³னா ஸங்க⁴வஸேன ந காதப்³ப³ந்தி ஸம்ப³ந்தோ⁴. ஏவங் புக்³க³லவஸேன அபலோகனகம்மஸ்ஸ அகத்தப்³ப³தங் த³ஸ்ஸெத்வா இதா³னி வத்து²வஸேன தஸ்ஸேவ அகத்தப்³ப³தங் த³ஸ்ஸெந்தோ ஆஹ ‘‘ஜாதரூபரஜதவஸேனாபீ’’திஆதி³. கப்பியப⁴ண்ட³வஸேனாதி சீவரதண்டு³லேஹி அவஸேஸஸ்ஸ கப்பியப⁴ண்ட³ஸ்ஸ வஸேன. சீவரதண்டு³லானஞ்ஹி விஸுங் க³ஹிதத்தா ‘‘கப்பியப⁴ண்ட³வஸேனா’’தி எத்த² தேஹி அவஸேஸோ கப்பியப⁴ண்டோ³வ க³ஹேதப்³போ³. தங் பனாதி அபலோகனகம்மங் பன. கத்தப்³பா³காரங் த³ஸ்ஸெந்தோ ஆஹ ‘‘இதா³னீ’’திஆதி³. ஸுபி⁴க்க²ந்தி ஸமித்³த⁴பி⁴க்க²ங். ஸுலப⁴பிண்ட³ந்தி ஸுகே²ன லப⁴பிண்ட³ங். த்³வீஹி பதே³ஹி அஞ்ஞமஞ்ஞஸ்ஸ காரணங் த³ஸ்ஸேதி, ஸுபி⁴க்க²த்தா ஸுலப⁴பிண்ட³ங், ஸுலப⁴பிண்ட³த்தா ஸுபி⁴க்க²ந்தி வுத்தங் ஹோதி.
Yanti vatthu dinnanti sambandho. Etthāti kappiyakārakānaṃ hatthe dinnavatthūsu. Tanti vatthu upanāmentehīti sambandho. Garubhaṇḍaṃ hoti, garubhaṇḍattā aññesu paccayesu na upanāmetabbanti adhippāyo. Puggalavasenevāti ‘‘bhikkhū cīvarena kilamanti, ettakaṃ nāma taṇḍulabhāgaṃ bhikkhūnaṃ cīvaraṃ kātuṃ ruccati saṅghassā’’tiādinā puggalaṃ parāmasitvā puggalavaseneva. Saṅghavasenāti ‘‘saṅgho cīvarena kilamatī’’tiādinā saṅghavasena na kātabbanti sambandho. Evaṃ puggalavasena apalokanakammassa akattabbataṃ dassetvā idāni vatthuvasena tasseva akattabbataṃ dassento āha ‘‘jātarūparajatavasenāpī’’tiādi. Kappiyabhaṇḍavasenāti cīvarataṇḍulehi avasesassa kappiyabhaṇḍassa vasena. Cīvarataṇḍulānañhi visuṃ gahitattā ‘‘kappiyabhaṇḍavasenā’’ti ettha tehi avaseso kappiyabhaṇḍova gahetabbo. Taṃ panāti apalokanakammaṃ pana. Kattabbākāraṃ dassento āha ‘‘idānī’’tiādi. Subhikkhanti samiddhabhikkhaṃ. Sulabhapiṇḍanti sukhena labhapiṇḍaṃ. Dvīhi padehi aññamaññassa kāraṇaṃ dasseti, subhikkhattā sulabhapiṇḍaṃ, sulabhapiṇḍattā subhikkhanti vuttaṃ hoti.
ஏவங் சீவரபச்சயங் ஸல்லக்கெ²த்வா ஸேனாஸனங் ஸல்லக்கே²தப்³ப³ந்தி ஸம்ப³ந்தோ⁴. காலேதி கா³ஹாபனஸ்ஸ காலே. வுத்தந்தி மஹாஅட்ட²கதா²ய வுத்தங். கஸ்மா த்³வே ஸம்மன்னிதப்³பா³, நனு ஏகம்பி ஸம்மன்னிதுங் வட்டதீதி ஆஹ ‘‘ஏவஞ்ஹீ’’திஆதி³. தத்த² ஹி யஸ்மா கா³ஹெஸ்ஸதி, தஸ்மா த்³வே ஸம்மன்னிதப்³பா³தி யோஜனா. ஏகேன ஹி ஸம்முதிலத்³தே⁴ன ஸக்கா பரங் கா³ஹாபேதுங், அத்தனா பன அத்தனோ பாபேதுங் ந ஸக்கா, தஸ்மா த்³வீஸு ஸம்மதேஸு நவகோ வுட்³ட⁴ஸ்ஸ, வுட்³டோ⁴ ச நவகஸ்ஸாதி உபோ⁴ அஞ்ஞமஞ்ஞங் கா³ஹெஸ்ஸந்தீதி அதி⁴ப்பாயோ. ஸம்மன்னிதப்³பா³தி ஏகதோ ஸம்மன்னிதப்³பா³. அட்ட²பி ஸோளஸபீதி எத்த² பிஸத்³தே³ன ததோ அதி⁴கம்பி ஏகதோ ஸம்மன்னிதுங் வட்டதீதி தீ³பேதி. ஸத்தஸதிகக்க²ந்த⁴கே உப்³பா³ஹிகஸம்முதியங் (சூளவ॰ 456) அட்ட²பி ஜனா ஏகதோவ ஸம்மதாதி வசனஞ்செத்த² ஸாத⁴கங். நிக்³க³ஹகம்மமேவ ஹி ஸங்கோ⁴ ஸங்க⁴ஸ்ஸ ந கரோதீதி த³ட்ட²ப்³ப³ங். தேஸந்தி அட்ட²ஸோளஸஜனானங், ஸம்முதி வட்டதியேவாதி ஸம்ப³ந்தோ⁴. கிந்தி ஸல்லக்கே²தப்³ப³ந்தி ஆஹ ‘‘சேதியக⁴ர’’ந்திஆதி³.
Evaṃ cīvarapaccayaṃ sallakkhetvā senāsanaṃ sallakkhetabbanti sambandho. Kāleti gāhāpanassa kāle. Vuttanti mahāaṭṭhakathāya vuttaṃ. Kasmā dve sammannitabbā, nanu ekampi sammannituṃ vaṭṭatīti āha ‘‘evañhī’’tiādi. Tattha hi yasmā gāhessati, tasmā dve sammannitabbāti yojanā. Ekena hi sammutiladdhena sakkā paraṃ gāhāpetuṃ, attanā pana attano pāpetuṃ na sakkā, tasmā dvīsu sammatesu navako vuḍḍhassa, vuḍḍho ca navakassāti ubho aññamaññaṃ gāhessantīti adhippāyo. Sammannitabbāti ekato sammannitabbā. Aṭṭhapi soḷasapīti ettha pisaddena tato adhikampi ekato sammannituṃ vaṭṭatīti dīpeti. Sattasatikakkhandhake ubbāhikasammutiyaṃ (cūḷava. 456) aṭṭhapi janā ekatova sammatāti vacanañcettha sādhakaṃ. Niggahakammameva hi saṅgho saṅghassa na karotīti daṭṭhabbaṃ. Tesanti aṭṭhasoḷasajanānaṃ, sammuti vaṭṭatiyevāti sambandho. Kinti sallakkhetabbanti āha ‘‘cetiyaghara’’ntiādi.
ஆஸனக⁴ரந்தி படிமாக⁴ரங். மக்³க³பொக்க²ரணீனங் ஸமீபே கதா ஸாலாயோ உபசாரவஸேன வுச்சந்தி ‘‘மக்³கோ³’’தி ச ‘‘பொக்க²ரணீ’’தி ச. தா ஹி ஸாலாயோ உபசாரஸீமப்³ப⁴ந்தரக³தே கா³மாபி⁴முக²மக்³கே³ ச அந்தோஉபசாரஸீமாயங் க²ணிதா யத்த² கத்த²சி பொக்க²ரணியோ ச கரீயந்தி, இதி ஸல்லக்கே²தப்³ப³ந்தி யோஜனா. அஸேனாஸனங் த³ஸ்ஸெத்வா ஸேனாஸனங் த³ஸ்ஸெந்தோ ஆஹ ‘‘விஹாரோ’’திஆதி³. ருக்க²மூலந்தி ச²ன்னகவாடப³த்³த⁴ருக்க²மூலங். ஏஸேவ நயோ வேளுகு³ம்பே³பி. கா³ஹெந்தேன ச கா³ஹேதப்³பா³னீதி ஸம்ப³ந்தோ⁴. ஸங்கி⁴கோதி தத்ருப்பாதோ³. தேஸூதி த்³வீஸு சீவரபச்சயேஸு. யந்தி சீவரபச்சயங். தஸ்ஸாதி சீவரபச்சயஸ்ஸ. டி²திகதோதி பப³ந்த⁴வஸேன டி²தட்டா²னதோ. இதரோதி பட²மங் க³ஹிதசீவரபச்சயதோ இதரோ.
Āsanagharanti paṭimāgharaṃ. Maggapokkharaṇīnaṃ samīpe katā sālāyo upacāravasena vuccanti ‘‘maggo’’ti ca ‘‘pokkharaṇī’’ti ca. Tā hi sālāyo upacārasīmabbhantaragate gāmābhimukhamagge ca antoupacārasīmāyaṃ khaṇitā yattha katthaci pokkharaṇiyo ca karīyanti, iti sallakkhetabbanti yojanā. Asenāsanaṃ dassetvā senāsanaṃ dassento āha ‘‘vihāro’’tiādi. Rukkhamūlanti channakavāṭabaddharukkhamūlaṃ. Eseva nayo veḷugumbepi. Gāhentena ca gāhetabbānīti sambandho. Saṅghikoti tatruppādo. Tesūti dvīsu cīvarapaccayesu. Yanti cīvarapaccayaṃ. Tassāti cīvarapaccayassa. Ṭhitikatoti pabandhavasena ṭhitaṭṭhānato. Itaroti paṭhamaṃ gahitacīvarapaccayato itaro.
அப்பதாயாதி அப்பபா⁴வதோ, கா³ஹியமானேதி ஸம்ப³ந்தோ⁴. பரிவேணக்³கே⁴னாதி பரிவேணபரிச்சே²தே³ன. லப⁴ந்தீதி பரிவேணஸாமிகா பி⁴க்கூ² லப⁴ந்தி. தந்தி பரிவேணங். விஜடெத்வாதி விஜடங் கத்வா, த்³வே வா தயோ வா கொட்டா²ஸே கத்வாதி அத்தோ². பக்கி²பித்வாதி பா⁴க³கொட்டா²ஸங் பக்கி²பித்வா. ந ஏவங் காதப்³ப³ந்தி யதா² மஹாஸுமத்தே²ரோ ஆஹ, ததா² ந காதப்³ப³ந்தி அத்தோ². அகாதப்³ப³காரணங் த³ஸ்ஸெந்தோ ஆஹ ‘‘மனுஸ்ஸா ஹீ’’திஆதி³. தத்தா²தி பரிவேணே, பவிஸிதப்³ப³ங் இதி ஆஹாதி யோஜனா. எத்தா²தி ஏதஸ்மிங் கா³ஹணட்டா²னே. படிக்கோஸதீதி படிஸேதே⁴தி. படிக்கோஸனாகாரங் த³ஸ்ஸெந்தோ ஆஹ ‘‘மா ஆவுஸோ’’திஆதி³. இதி வுத்தங், இதி படிக்கோஸதீதி யோஜனா. ஏகோ ஹி இதிஸத்³தோ³ லுத்தனித்³தி³ட்டோ². தஸ்ஸாதி மஹாதே²ரஸ்ஸ. ஸங்க³ஹந்தி பி⁴க்கூ²னங் ஸங்க³ஹங். தந்தி மஹாதே²ரங்.
Appatāyāti appabhāvato, gāhiyamāneti sambandho. Pariveṇagghenāti pariveṇaparicchedena. Labhantīti pariveṇasāmikā bhikkhū labhanti. Tanti pariveṇaṃ. Vijaṭetvāti vijaṭaṃ katvā, dve vā tayo vā koṭṭhāse katvāti attho. Pakkhipitvāti bhāgakoṭṭhāsaṃ pakkhipitvā. Na evaṃ kātabbanti yathā mahāsumatthero āha, tathā na kātabbanti attho. Akātabbakāraṇaṃ dassento āha ‘‘manussā hī’’tiādi. Tatthāti pariveṇe, pavisitabbaṃ iti āhāti yojanā. Etthāti etasmiṃ gāhaṇaṭṭhāne. Paṭikkosatīti paṭisedheti. Paṭikkosanākāraṃ dassento āha ‘‘mā āvuso’’tiādi. Iti vuttaṃ, iti paṭikkosatīti yojanā. Eko hi itisaddo luttaniddiṭṭho. Tassāti mahātherassa. Saṅgahanti bhikkhūnaṃ saṅgahaṃ. Tanti mahātheraṃ.
ஏவங் வத்தப்³ப³ந்தி ஏவங் வக்க²மானநயேன வத்தப்³ப³ங். பச்சயங் தா⁴ரேத², இதி வத்தப்³ப³ந்தி யோஜனா. பாபுணாதி ஆவுஸோ இதி வுத்தேதி யோஜனா. ‘‘க³ஹிதங் ஹோதீ’’தி இமினா ‘‘க³ண்ஹத², க³ண்ஹாமீ’’தி பச்சுப்பன்னகாலவஸேன வுத்தத்தா க³ஹிதங் ஹோதீதி த³ஸ்ஸேதி. அதீதஅனாக³தகாலவஸேன அக³ஹிதபா⁴வங் த³ஸ்ஸெந்தோ ஆஹ ‘‘ஸசே பனா’’திஆதி³. ஸதுப்பாத³மத்தந்தி க³ஹணே ஸதியா உப்பாத³னமத்தங். எத்தா²தி ஸேனாஸனபச்சயக³ஹணட்டா²னே.
Evaṃ vattabbanti evaṃ vakkhamānanayena vattabbaṃ. Paccayaṃ dhāretha, iti vattabbanti yojanā. Pāpuṇāti āvuso iti vutteti yojanā. ‘‘Gahitaṃ hotī’’ti iminā ‘‘gaṇhatha, gaṇhāmī’’ti paccuppannakālavasena vuttattā gahitaṃ hotīti dasseti. Atītaanāgatakālavasena agahitabhāvaṃ dassento āha ‘‘sace panā’’tiādi. Satuppādamattanti gahaṇe satiyā uppādanamattaṃ. Etthāti senāsanapaccayagahaṇaṭṭhāne.
யோபீதி யம்பி. உபயோக³த்தே² சேதங் பச்சத்தவசனங், யம்பி பச்சயங் விஸ்ஸஜ்ஜேதீதி யோஜனா. பச்சயந்தி ச சீவரபச்சயங். அயம்பீதி அயம்பி பச்சயோ. பிஸத்³தோ³ மஹாலாப⁴பரிவேணே பச்சயங் ஸம்பிண்டே³தி. தஸ்மிங்யேவ பரிவேணேதி தஸ்மிங் பங்ஸுகூலிகேன க³ஹிதபரிவேணே ஏவ. அஞ்ஞஸ்ஸாதி பங்ஸுகூலிகதோ அஞ்ஞஸ்ஸ பி⁴க்கு²ஸ்ஸ. பங்ஸுகூலிகோ ‘‘அஹங் வஸாமீ’’தி ஸேனாஸனங் ஜக்³கி³ஸ்ஸதி. இதரோ ‘‘அஹங் பச்சயங் க³ண்ஹாமீ’’தி ஸேனாஸனங் ஜக்³கி³ஸ்ஸதீதி யோஜனா. த்³வீஹி காரணேஹீதி வஸனக³ஹணவஸேன த்³வீஹி காரணேஹி. பங்ஸுகூலிகே க³ண்ஹந்தேதி ஸம்ப³ந்தோ⁴. இதா⁴தி ஸேனாஸனே. தேனாதி பங்ஸுகூலிகேன. ஹெட்டா²தி ஸேனாஸனஸ்ஸ ஹெட்டா², டி²தங் அஞ்ஞங் பி⁴க்கு²ந்தி ஸம்ப³ந்தோ⁴. தேனாதி பங்ஸுகூலிகேன , கிஞ்சி வசனந்தி ஸம்ப³ந்தோ⁴. வுத்த²வஸ்ஸஸ்ஸ பங்ஸுகூலிகஸ்ஸாதி யோஜனா. வட்டதீதி பங்ஸுகூலிகஸ்ஸ வட்டதி. தஸ்மிங் ஸேனாஸனேதி பங்ஸுகூலிகேன க³ஹிதஸேனாஸனே. யேஸங் பனாதி மனுஸ்ஸானங் பன. தேஸந்தி மனுஸ்ஸானங்.
Yopīti yampi. Upayogatthe cetaṃ paccattavacanaṃ, yampi paccayaṃ vissajjetīti yojanā. Paccayanti ca cīvarapaccayaṃ. Ayampīti ayampi paccayo. Pisaddo mahālābhapariveṇe paccayaṃ sampiṇḍeti. Tasmiṃyeva pariveṇeti tasmiṃ paṃsukūlikena gahitapariveṇe eva. Aññassāti paṃsukūlikato aññassa bhikkhussa. Paṃsukūliko ‘‘ahaṃ vasāmī’’ti senāsanaṃ jaggissati. Itaro ‘‘ahaṃ paccayaṃ gaṇhāmī’’ti senāsanaṃ jaggissatīti yojanā. Dvīhi kāraṇehīti vasanagahaṇavasena dvīhi kāraṇehi. Paṃsukūlike gaṇhanteti sambandho. Idhāti senāsane. Tenāti paṃsukūlikena. Heṭṭhāti senāsanassa heṭṭhā, ṭhitaṃ aññaṃ bhikkhunti sambandho. Tenāti paṃsukūlikena , kiñci vacananti sambandho. Vutthavassassa paṃsukūlikassāti yojanā. Vaṭṭatīti paṃsukūlikassa vaṭṭati. Tasmiṃ senāsaneti paṃsukūlikena gahitasenāsane. Yesaṃ panāti manussānaṃ pana. Tesanti manussānaṃ.
தூ²பங் கத்வாதி சேதியங் கத்வா. தஸ்ஸாதி தூ²பஸ்ஸ. தேன பி⁴க்கு²னாதி வஸ்ஸாவாஸிகங் கா³ஹகபி⁴க்கு²னா. தந்தி போ⁴ஜனஸாலங். கா³ஹேதுங் வட்டதீதி ஸம்ப³ந்தோ⁴. ஸப்³ப³மித³ந்தி ஸப்³ப³ங் இத³ங் வசனங்.
Thūpaṃ katvāti cetiyaṃ katvā. Tassāti thūpassa. Tena bhikkhunāti vassāvāsikaṃ gāhakabhikkhunā. Tanti bhojanasālaṃ. Gāhetuṃ vaṭṭatīti sambandho. Sabbamidanti sabbaṃ idaṃ vacanaṃ.
பாடிபத³அருணதோதி வஸ்ஸூபனாயிகதி³வஸஸங்கா²தஸ்ஸ பாடிபத³ஸ்ஸ அருணுக்³க³மனதோ. விதக்கசாரிகோதி ‘‘கத்த² நு கோ² வஸிஸ்ஸாமீ’’திஆதி³னா விதக்கேன சரணே அனுயுத்தோ. ஸேனாஸனங் யாசதீதி ஸேனாஸனக்³கா³ஹாபகங் ஸேனாஸனங் யாசதி. க³ஹிதந்தி ஸங்கே⁴ன க³ஹிதங். யத்தா²தி டா²னே. வஸ்ஸூபக³தேஹி வத்தப்³பா³தி ஸம்ப³ந்தோ⁴. புனப்புனங், ஸமங் வா சேதியங்க³ணாதி³ங் முஞ்சந்தி ஸோதெ⁴ந்தி இமாஹீதி ஸம்முஞ்சனியோ. முசிதா⁴து ஸோத⁴னத்தே² யுபச்சயோ கரணத்தே² ஹோதி. தாலுஜோ பட²மக்க²ரோ. ஸுலபா⁴ சே த³ண்ட³கா, ஏகேகேன த்³வே திஸ்ஸோ யட்டி²ஸம்முஞ்சனியோ ப³ந்தி⁴தப்³பா³. ஸுலபா⁴ சே ஸலாகா, ச²பஞ்சமுட்டி²ஸம்முஞ்சனியோ ப³ந்தி⁴தப்³பா³தி அத்தோ². பஞ்ச பஞ்ச உக்காதி அரஞ்ஞவிஹாரேஸு பரிஸ்ஸயவிஜானநத்த²ங் பஞ்ச பஞ்ச அக்³கி³உக்கா கொட்டேதப்³பா³ சி²ந்தி³தப்³பா³தி அத்தோ².
Pāṭipadaaruṇatoti vassūpanāyikadivasasaṅkhātassa pāṭipadassa aruṇuggamanato. Vitakkacārikoti ‘‘kattha nu kho vasissāmī’’tiādinā vitakkena caraṇe anuyutto. Senāsanaṃ yācatīti senāsanaggāhāpakaṃ senāsanaṃ yācati. Gahitanti saṅghena gahitaṃ. Yatthāti ṭhāne. Vassūpagatehi vattabbāti sambandho. Punappunaṃ, samaṃ vā cetiyaṅgaṇādiṃ muñcanti sodhenti imāhīti sammuñcaniyo. Mucidhātu sodhanatthe yupaccayo karaṇatthe hoti. Tālujo paṭhamakkharo. Sulabhā ce daṇḍakā, ekekena dve tisso yaṭṭhisammuñcaniyo bandhitabbā. Sulabhā ce salākā, chapañcamuṭṭhisammuñcaniyo bandhitabbāti attho. Pañca pañca ukkāti araññavihāresu parissayavijānanatthaṃ pañca pañca aggiukkā koṭṭetabbā chinditabbāti attho.
‘‘நிப³த்³த⁴வத்தங் ட²பெத்வா’’தி எத்த² அகத்தப்³ப³வத்தங் த³ஸ்ஸெந்தோ ஆஹ ‘‘வத்தங் கரொந்தேஹி சா’’திஆதி³. தத்த² வத்தங் கரொந்தேஹி ச ஏவரூபங் அத⁴ம்மிகவத்தங் ந காதப்³ப³ந்தி ஸம்ப³ந்தோ⁴. ஹி ஸச்சங், ஸப்³பே³வ ஏதே உத்³தே³ஸாத³யோ பபஞ்சாதி யோஜனா. பபஞ்செந்தி ஸங்ஸாரே சிரங் ட²பெந்தீதி பபஞ்சா. மூக³ப்³ப³தந்தி மூகா³னங் வதங், மூகே³ஹி கத்தப்³ப³ங் வா, மூகே³ன விய வா அமூகே³ஹி கத்தப்³ப³ங் வதங். ஏவங் அகாதப்³ப³வத்தங் த³ஸ்ஸெத்வா இதா³னி காதப்³ப³வத்தங் த³ஸ்ஸெந்தோ ஆஹ ‘‘பரியத்தித⁴ம்மோ நாமா’’திஆதி³. திவித⁴ம்பீதி பரியத்திபடிபத்திபடிவேத⁴வஸேன திப்பகாரம்பி. அவயவபரியத்தித⁴ம்மோபி அவயவிபரியத்தித⁴ம்மங், அவயவிபரியத்தித⁴ம்மோ வா அவயவபரியத்தித⁴ம்மங் பதிட்டா²பேதி, தஸ்மா பரியத்தித⁴ம்மோ அத்தனாபி அத்தானங் பதிட்டா²பேஸீதி வேதி³தப்³ப³ங். உத்³தி³ஸதா²தி பரியத்திங் உத்³தி³ஸத². ஸோதெ⁴த்வா…பே॰… உபஸம்பாதே³தா²தி எத்த² ஸோத⁴னங் நாம ஸப்³பே³ஸங் ஆசாரகுலபுத்தானங் உபபரிக்க²னங். ஸோதெ⁴த்வா நிஸ்ஸயங் தே³தா²தி எத்த² ஸோத⁴னங் நாம பி⁴க்கு²ஸபா⁴க³தங் உபபரிக்க²னங். ஹீதி ஸச்சங். குலபுத்தோதி ஆசாரகுலபுத்தோ. யத்தகானி து⁴தங்கா³னி ஸமாதி³யிதுங் ஸக்கோதா²தி யோஜனா. அந்தோவஸ்ஸங் நாமேதந்தி பு⁴ம்மத்தே² உபயோக³வசனமேதங். ஏதஸ்மிங் அந்தோவஸ்ஸேதி ஹி அத்தோ², ப⁴விதப்³ப³ந்திஆதீ³ஸு ஸம்ப³ந்தி⁴தப்³ப³ங். ஸகலதி³வஸந்தி ஸகலதி³வஸம்ஹி, அப்பமத்தேஹீதி ஸம்ப³ந்தோ⁴. ஏகசாரிகவத்தந்தி ஏககேன சரிதப்³ப³ங் வத்தங். ப⁴ஸ்ஸேதி வசனே. த³ஸவத்து²ககத²ந்தி அப்பிச்ச²தாதி³த³ஸவத்து²க கத²ங்.
‘‘Nibaddhavattaṃ ṭhapetvā’’ti ettha akattabbavattaṃ dassento āha ‘‘vattaṃ karontehi cā’’tiādi. Tattha vattaṃ karontehi ca evarūpaṃ adhammikavattaṃ na kātabbanti sambandho. Hi saccaṃ, sabbeva ete uddesādayo papañcāti yojanā. Papañcenti saṃsāre ciraṃ ṭhapentīti papañcā. Mūgabbatanti mūgānaṃ vataṃ, mūgehi kattabbaṃ vā, mūgena viya vā amūgehi kattabbaṃ vataṃ. Evaṃ akātabbavattaṃ dassetvā idāni kātabbavattaṃ dassento āha ‘‘pariyattidhammo nāmā’’tiādi. Tividhampīti pariyattipaṭipattipaṭivedhavasena tippakārampi. Avayavapariyattidhammopi avayavipariyattidhammaṃ, avayavipariyattidhammo vā avayavapariyattidhammaṃ patiṭṭhāpeti, tasmā pariyattidhammo attanāpi attānaṃ patiṭṭhāpesīti veditabbaṃ. Uddisathāti pariyattiṃ uddisatha. Sodhetvā…pe… upasampādethāti ettha sodhanaṃ nāma sabbesaṃ ācārakulaputtānaṃ upaparikkhanaṃ. Sodhetvā nissayaṃ dethāti ettha sodhanaṃ nāma bhikkhusabhāgataṃ upaparikkhanaṃ. Hīti saccaṃ. Kulaputtoti ācārakulaputto. Yattakāni dhutaṅgāni samādiyituṃ sakkothāti yojanā. Antovassaṃ nāmetanti bhummatthe upayogavacanametaṃ. Etasmiṃ antovasseti hi attho, bhavitabbantiādīsu sambandhitabbaṃ. Sakaladivasanti sakaladivasamhi, appamattehīti sambandho. Ekacārikavattanti ekakena caritabbaṃ vattaṃ. Bhasseti vacane. Dasavatthukakathanti appicchatādidasavatthuka kathaṃ.
விக்³கா³ஹிகபிஸுணப²ருஸவசனானீதி விக்³க³ஹங் கலஹங் ஜனேதீதி விக்³கா³ஹிகங், விக்³கா³ஹிகவசனஞ்ச பிஸுணவசனஞ்ச ப²ருஸவசனஞ்ச விக்³கா³ஹிகபிஸுணப²ருஸவசனானி. மனஸிகாரப³ஹுலா விஹரத² இதி ஓவதி³தப்³பா³தி யோஜனா. த³ந்தகட்ட²கா²த³னவத்தந்தி ஹெட்டா² அதி³ன்னாதா³னவண்ணனாயங் வுத்தங் த³ந்தகட்ட²கா²த³னே, த³ந்தகட்ட²கா²த³னஸ்ஸ வா வத்தங். ‘‘பத்தங் த²விகாய பக்கி²பந்தேன ந கதே²தப்³ப³’’ந்தி இமினா கதெ²ந்தே பமாதே³ன பத்தோ பி⁴ஜ்ஜெய்யாதி பத்தஸ்ஸ கு³த்தத்தா²ய கத²னங் நிவாரேதி. ஆசிக்கி²தப்³பா³தி இதிஸத்³தோ³ பரிஸமாபனத்தோ².
Viggāhikapisuṇapharusavacanānīti viggahaṃ kalahaṃ janetīti viggāhikaṃ, viggāhikavacanañca pisuṇavacanañca pharusavacanañca viggāhikapisuṇapharusavacanāni. Manasikārabahulā viharatha iti ovaditabbāti yojanā. Dantakaṭṭhakhādanavattanti heṭṭhā adinnādānavaṇṇanāyaṃ vuttaṃ dantakaṭṭhakhādane, dantakaṭṭhakhādanassa vā vattaṃ. ‘‘Pattaṃ thavikāya pakkhipantena na kathetabba’’nti iminā kathente pamādena patto bhijjeyyāti pattassa guttatthāya kathanaṃ nivāreti. Ācikkhitabbāti itisaddo parisamāpanattho.
கோசி தா³யகோதி ஸம்ப³ந்தோ⁴. ஆக³ந்துகோ பி⁴க்கூ²தி சீவரக்³கா³ஹிததோ பச்சா² ஆக³தோ ஆக³ந்துகோ பி⁴க்கு². ஸங்க⁴த்தே²ரோதி ஆவாஸிகஸங்க⁴த்தே²ரோ. பட²மபா⁴க³ந்தி புப்³பே³ கா³ஹிதங் பட²மபா⁴க³ங், பரிவத்தெத்வாதி புப்³பே³ கா³ஹிதபா⁴கே³ன பச்சா² தா³தப்³ப³ங் வஸ்ஸாவாஸிகங் பரிவத்தெத்வா. ஆக³ந்துகஸ்ஸ வஸ்ஸக்³கே³ன பத்தட்டா²னே ஆக³ந்துகஸ்ஸ தா³தப்³ப³ந்தி யோஜனா. ‘‘ஆக³ந்துகஸ்ஸா’’தி பத³ங் புப்³பா³பரங் அபெக்க²தி. தஸ்மா த்³வின்னங் பதா³னங் மஜ்ஜே² வுத்தங். பட²மவஸ்ஸூபக³தாதி பட²மவஸ்ஸூபனாயிகதி³வஸே வஸ்ஸூபக³தா. ‘‘த்³வே தீணி சத்தாரீ’’தி வசனஸ்ஸ வா ப³ஹூனங் பி⁴க்கூ²னங் வா ப்³யாபனத்தா²ய ‘‘லத்³த⁴ங் லத்³த⁴’’ந்தி விச்சா²வஸேன வுத்தங். தேன பனாதி ஆக³ந்துகேன பன. பட²மவஸ்ஸூபக³தேஹி அப்பகே லத்³தே⁴ பச்சி²மவஸ்ஸூபனாயிகதி³வஸே தா³தப்³பா³னங் வஸ்ஸாவாஸிகானங் ப³ஹுகேபி அயங் நயோ ஞாதப்³போ³தி கத்வா ந வுத்தோ.
Koci dāyakoti sambandho. Āgantuko bhikkhūti cīvaraggāhitato pacchā āgato āgantuko bhikkhu. Saṅghattheroti āvāsikasaṅghatthero. Paṭhamabhāganti pubbe gāhitaṃ paṭhamabhāgaṃ, parivattetvāti pubbe gāhitabhāgena pacchā dātabbaṃ vassāvāsikaṃ parivattetvā. Āgantukassa vassaggena pattaṭṭhāne āgantukassa dātabbanti yojanā. ‘‘Āgantukassā’’ti padaṃ pubbāparaṃ apekkhati. Tasmā dvinnaṃ padānaṃ majjhe vuttaṃ. Paṭhamavassūpagatāti paṭhamavassūpanāyikadivase vassūpagatā. ‘‘Dve tīṇi cattārī’’ti vacanassa vā bahūnaṃ bhikkhūnaṃ vā byāpanatthāya ‘‘laddhaṃ laddha’’nti vicchāvasena vuttaṃ. Tena panāti āgantukena pana. Paṭhamavassūpagatehi appake laddhe pacchimavassūpanāyikadivase dātabbānaṃ vassāvāsikānaṃ bahukepi ayaṃ nayo ñātabboti katvā na vutto.
த்³வீஸுபீதி பட²ம து³தியவஸேன த்³வீஸுபி. வஸ்ஸூபக³தா பி⁴க்கூ² பி⁴க்கா²ய கிலமந்தா வத³ந்தீதி ஸம்ப³ந்தோ⁴. இதா⁴தி டா²னே. வஸந்தாதி ஏகதோ வஸந்தா. த்³வே பா⁴கா³ ஹோம ஸாது⁴ வதாதி யோஜனா. ஸாது⁴ வதாதி ஏகங்ஸேன ஸுந்த³ரா ப⁴வெய்யுந்தி அத்தோ². யேஸந்தி பி⁴க்கூ²னங். தத்தா²தி ஞாதிபவாரிதட்டா²னேஸு. பவாரணாயாதி பவாரணாதி³வஸே. தேஸூதி பி⁴க்கூ²ஸு. யேதி பி⁴க்கூ². தத்தா²தி ஞாதிபவாரிதட்டா²னேஸு. கஸ்மா அபலோகெத்வா தா³தப்³ப³ங், நனு தே ஸாதி³யந்தீதி ஆஹ ‘‘ஸாதி³ யந்தாபி ஹீ’’திஆதி³. தத்த² ஹீதி யஸ்மா. ‘‘நேவ வஸ்ஸாவாஸிகஸ்ஸ ஸாமினோ’’தி இமினா தேஸங் வஸ்ஸச்சி²ன்னதங் தீ³பேதி. நேவ அதா³துங் லப⁴ந்தீதி பட²மமேவ கதிகவத்தஸ்ஸ கதத்தா அதா³துங் நேவ லப⁴ந்தி, ஸப்³பே³ஸங் நோ அம்ஹாகந்தி யோஜனா. இதா⁴தி டா²னே. தந்தி கதிகவத்தங். ஏகோ பி⁴க்கூ²தி ஸம்ப³ந்தோ⁴. தேஸந்தி பி⁴க்கூ²னங். தத்தா²தி ஸபா⁴க³ட்டா²னே. வஸித்வா ஆக³தானங் தேஸங் பி⁴க்கூ²னந்தி யோஜனா. ந லப்³ப⁴தி இதி வுத்தந்தி யோஜனா. இமேஸந்தி வஸ்ஸாவாஸிஅப்பத்தகானங் ஏகச்சானங். கா³ஹிதஸதி³ஸமேவாதி வஸ்ஸாவாஸிகஸ்ஸ கா³ஹிதேன ஸதி³ஸமேவ. தேஸமேவாதி ஏகச்சானமேவ.
Dvīsupīti paṭhama dutiyavasena dvīsupi. Vassūpagatā bhikkhū bhikkhāya kilamantā vadantīti sambandho. Idhāti ṭhāne. Vasantāti ekato vasantā. Dve bhāgā homa sādhu vatāti yojanā. Sādhu vatāti ekaṃsena sundarā bhaveyyunti attho. Yesanti bhikkhūnaṃ. Tatthāti ñātipavāritaṭṭhānesu. Pavāraṇāyāti pavāraṇādivase. Tesūti bhikkhūsu. Yeti bhikkhū. Tatthāti ñātipavāritaṭṭhānesu. Kasmā apaloketvā dātabbaṃ, nanu te sādiyantīti āha ‘‘sādi yantāpi hī’’tiādi. Tattha hīti yasmā. ‘‘Neva vassāvāsikassa sāmino’’ti iminā tesaṃ vassacchinnataṃ dīpeti. Neva adātuṃ labhantīti paṭhamameva katikavattassa katattā adātuṃ neva labhanti, sabbesaṃ no amhākanti yojanā. Idhāti ṭhāne. Tanti katikavattaṃ. Eko bhikkhūti sambandho. Tesanti bhikkhūnaṃ. Tatthāti sabhāgaṭṭhāne. Vasitvā āgatānaṃ tesaṃ bhikkhūnanti yojanā. Na labbhati iti vuttanti yojanā. Imesanti vassāvāsiappattakānaṃ ekaccānaṃ. Gāhitasadisamevāti vassāvāsikassa gāhitena sadisameva. Tesamevāti ekaccānameva.
பக்கந்தோபீதி அஞ்ஞங் டா²னங் பக்கமந்தோபி. ஹீதி ஸச்சங், யஸ்மா வா. தேன பி⁴க்கு²னா கதங் பானீயஉபட்ட²பனாதி³கம்மங் ப⁴தினிவிட்ட²ங் ப⁴தியா டி²தந்தி யோஜனா. அபலோகனகம்மங் கத்வா கா³ஹிதங் ஸங்கி⁴கந்தி ஸம்ப³ந்தோ⁴. ஸங்கி⁴கந்தி தத்ருப்பாத³ங் ஸந்தா⁴ய வுத்தங். விப்³ப⁴ந்தோபீதி பிஸத்³தோ³ பகே³வ சி²ன்னவஸ்ஸோதி த³ஸ்ஸேதி. பச்சயவஸேனேவாதி ஸத்³தா⁴தெ³ய்யபச்சயவஸேன. வத³ந்தீதி கேசி வத³ந்தி.
Pakkantopīti aññaṃ ṭhānaṃ pakkamantopi. Hīti saccaṃ, yasmā vā. Tena bhikkhunā kataṃ pānīyaupaṭṭhapanādikammaṃ bhatiniviṭṭhaṃ bhatiyā ṭhitanti yojanā. Apalokanakammaṃ katvā gāhitaṃ saṅghikanti sambandho. Saṅghikanti tatruppādaṃ sandhāya vuttaṃ. Vibbhantopīti pisaddo pageva chinnavassoti dasseti. Paccayavasenevāti saddhādeyyapaccayavasena. Vadantīti keci vadanti.
தி³ஸங்க³மிகோ பி⁴க்கு² விப்³ப⁴மதீதி ஸம்ப³ந்தோ⁴. மனுஸ்ஸேதி வஸ்ஸாவாஸிகதா³யகமனுஸ்ஸே. ஸம்முகா²தி ஆவாஸிகஸ்ஸ ஸம்முகா². ஸம்படிச்சா²பெத்வாதி ‘‘ஸுட்டு² த³ஸ்ஸாமா’’தி படிச்சா²பெத்வா. யஸ்ஸ கா³ஹிதந்தி யஸ்ஸ பி⁴க்கு²னோ ஸேனாஸனங் கா³ஹிதங். ஸேனாஸனஸாமிகஸ்ஸாதி ஸேனாஸனதா³யகஸ்ஸ புத்ததீ⁴தாத³யோதி ஸம்ப³ந்தோ⁴. ஸேனாஸனே தே³மாதி ஸேனாஸனஸ்ஸ தே³ம. தத்தா²தி ஸேனாஸனே. ஏகமேவ வத்த²ங் தா³தப்³ப³ங். கஸ்மா? புக்³க³லஸ்ஸ அத³த்வா ஸேனாஸனஸ்ஸேவ தா³தப்³ப³த்தா. வஸ்ஸாவாஸிகட்டி²திகாயாதி வஸ்ஸாவாஸிககா³ஹிதஸ்ஸ டி²திகாய. ஏஸேவ நயோதி ஸேனாஸனஸ்ஸேவ தி³ன்னத்தா ஏஸேவ நயோ. தஸ்ஸேவ ஹொந்தீதி புக்³க³லஸ்ஸேவ தி³ன்னத்தா தஸ்ஸேவ ஹொந்தி.
Disaṃgamiko bhikkhu vibbhamatīti sambandho. Manusseti vassāvāsikadāyakamanusse. Sammukhāti āvāsikassa sammukhā. Sampaṭicchāpetvāti ‘‘suṭṭhu dassāmā’’ti paṭicchāpetvā. Yassa gāhitanti yassa bhikkhuno senāsanaṃ gāhitaṃ. Senāsanasāmikassāti senāsanadāyakassa puttadhītādayoti sambandho. Senāsane demāti senāsanassa dema. Tatthāti senāsane. Ekameva vatthaṃ dātabbaṃ. Kasmā? Puggalassa adatvā senāsanasseva dātabbattā. Vassāvāsikaṭṭhitikāyāti vassāvāsikagāhitassa ṭhitikāya. Eseva nayoti senāsanasseva dinnattā eseva nayo. Tasseva hontīti puggalasseva dinnattā tasseva honti.
து³தியோ தே²ராஸனே கா³ஹிதோ ஹோதீதி ஸம்ப³ந்தோ⁴. பட²மபா⁴க³ஸ்ஸ ஸாமணேரஸ்ஸ கா³ஹிதத்தா வுத்தங் ‘‘வரபா⁴க³ங் ஸாமணேரஸ்ஸ த³த்வா’’தி. உபோ⁴பீதி த்³வே தே²ரஸாமணேரேபி. ஸயமேவாதி தா³யகோ ஸயமேவ. யந்தி வஸ்ஸாவாஸிகங். யஸ்ஸாதி தே²ரஸ்ஸ வா ஸாமணேரஸ்ஸ வா.
Dutiyo therāsane gāhito hotīti sambandho. Paṭhamabhāgassa sāmaṇerassa gāhitattā vuttaṃ ‘‘varabhāgaṃ sāmaṇerassa datvā’’ti. Ubhopīti dve therasāmaṇerepi. Sayamevāti dāyako sayameva. Yanti vassāvāsikaṃ. Yassāti therassa vā sāmaṇerassa vā.
இதோதி வுத்தனயதோ. த³ஹரஸாமணேரஸ்ஸாதி தருணஸ்ஸ ஸாமணேரஸ்ஸ. ஸோதி க⁴ரஸாமிகோ. நந்தி பத்தஜனங். யஸ்ஸாதி பி⁴க்கு²னோ. தேஸந்தி மனுஸ்ஸானங். யதா²பூ⁴தங் ஆசிக்கி²தப்³ப³ந்தி விப்³ப⁴மகாலங்கதகாரணங் யதா²பூ⁴தங் ஆசிக்கி²தப்³ப³ங். ஸுத்³த⁴பங்ஸுகூலிகாயேவாதி அஞ்ஞேஹி அமிஸ்ஸா ஸுத்³தா⁴ பங்ஸுகூலிகாயேவாதி. இத³ங் நேவாஸிகவத்தந்தி நிக³மனங்.
Itoti vuttanayato. Daharasāmaṇerassāti taruṇassa sāmaṇerassa. Soti gharasāmiko. Nanti pattajanaṃ. Yassāti bhikkhuno. Tesanti manussānaṃ. Yathābhūtaṃ ācikkhitabbanti vibbhamakālaṅkatakāraṇaṃ yathābhūtaṃ ācikkhitabbaṃ. Suddhapaṃsukūlikāyevāti aññehi amissā suddhā paṃsukūlikāyevāti. Idaṃ nevāsikavattanti nigamanaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / ஸேனாஸனக்³கா³ஹாபகஸம்முதி • Senāsanaggāhāpakasammuti
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஸேனாஸனக்³கா³ஹகதா² • Senāsanaggāhakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸேனாஸனக்³கா³ஹாபகஸம்முதிகதா²வண்ணனா • Senāsanaggāhāpakasammutikathāvaṇṇanā
