| Library / Tipiṭaka / д̇ибидага • Tipiṭaka / жуул̣аваг̇г̇а-адтагат̇аа • Cūḷavagga-aṭṭhakathā |
сзнаасанаг̇г̇аахагат̇аа
Senāsanaggāhakathā
318. сзяяаад̇и ман̃жадтаанаани вужжанд̇и. сзяяаг̇г̇знаад̇и сзяяаабарижчзд̣̇зна, вассуубанааяигад̣̇ивасз гаалам̣ гхосзд̇ваа згаман̃жадтаанам̣ згасса бхигкуно г̇аахзд̇ум̣ ануж̇аанаамийд̇и ад̇т̇о. сзяяаг̇г̇зна г̇аахзнд̇аад̇и сзяяаабарижчзд̣̇зна г̇аахияамаанаа. сзяяаа уссаараяим̣сууд̇и ман̃жадтаанаани ад̇ирзгаани ахзсум̣. вихаараг̇г̇аад̣̇ийсуби зсзва наяо. анубхааг̇анд̇и буна абарамби бхааг̇ам̣ д̣̇аад̇ум̣. ад̇иманд̣̇зсу хи бхигкуусу згзгасса бхигкуно д̣̇вз д̇ийн̣и баривзн̣аани д̣̇аад̇аб̣б̣аани. на агаамаа д̣̇аад̇аб̣б̣од̇и анижчааяа на д̣̇аад̇аб̣б̣о. д̇ад̇т̇а вассуубанааяигад̣̇ивасз г̇ахид̇з анубхааг̇з бажчаа ааг̇ад̇аанам̣ на ад̇д̇ано аружияаа со анубхааг̇о д̣̇аад̇аб̣б̣о. сажз бана язна г̇ахид̇о, со жа ад̇д̇ано ружияаа д̇ам̣ анубхааг̇ам̣ ваа батамабхааг̇ам̣ ваа д̣̇зд̇и, ваддад̇и.
318.Seyyāti mañcaṭṭhānāni vuccanti. Seyyaggenāti seyyāparicchedena, vassūpanāyikadivase kālaṃ ghosetvā ekamañcaṭṭhānaṃ ekassa bhikkhuno gāhetuṃ anujānāmīti attho. Seyyaggena gāhentāti seyyāparicchedena gāhiyamānā. Seyyā ussārayiṃsūti mañcaṭṭhānāni atirekāni ahesuṃ. Vihāraggādīsupi eseva nayo. Anubhāganti puna aparampi bhāgaṃ dātuṃ. Atimandesu hi bhikkhūsu ekekassa bhikkhuno dve tīṇi pariveṇāni dātabbāni. Na akāmā dātabboti anicchāya na dātabbo. Tattha vassūpanāyikadivase gahite anubhāge pacchā āgatānaṃ na attano aruciyā so anubhāgo dātabbo. Sace pana yena gahito, so ca attano ruciyā taṃ anubhāgaṃ vā paṭhamabhāgaṃ vā deti, vaṭṭati.
ниссиймз тид̇ассаад̇и убажаарасиймад̇о б̣ахи тид̇асса. анд̇о убажаарасиймааяа бана д̣̇уурз тид̇ассааби лаб̣бхад̇иязва. сзнаасанам̣ г̇ахзд̇ваад̇и вассуубанааяигад̣̇ивасз г̇ахзд̇ваа. саб̣б̣агаалам̣ бадиб̣ааханд̇ийд̇и жад̇умаасажжаязна уд̇угаалзби бадиб̣ааханд̇и. д̇ийсу сзнаасанаг̇г̇аахзсу буримаго жа бажчимаго жаад̇и имз д̣̇вз г̇аахаа т̇аавараа.
Nissīme ṭhitassāti upacārasīmato bahi ṭhitassa. Anto upacārasīmāya pana dūre ṭhitassāpi labbhatiyeva. Senāsanaṃ gahetvāti vassūpanāyikadivase gahetvā. Sabbakālaṃ paṭibāhantīti catumāsaccayena utukālepi paṭibāhanti. Tīsu senāsanaggāhesu purimako ca pacchimako cāti ime dve gāhā thāvarā.
анд̇араамуд̇д̇агз аяам̣ винижчаяо – згасмим̣ вихаарз махаалаабхасзнаасанам̣ ход̇и. сзнаасанасаамигаа вассуубаг̇ад̇ам̣ бхигкум̣ саб̣б̣абажжаязхи саггажжам̣ убадтахид̇ваа баваарзд̇ваа г̇аманагаалз б̣ахум̣ саман̣абаригкаарам̣ д̣̇знд̇и. махаат̇зраа д̣̇уурад̇оби ааг̇анд̇ваа вассуубанааяигад̣̇ивасз д̇ам̣ г̇ахзд̇ваа паасум̣ васид̇ваа вуд̇т̇авассаа лаабхам̣ г̇ан̣хид̇ваа баггаманд̇и. ааваасигаа ‘‘маяам̣ зд̇т̇уббаннам̣ лаабхам̣ на лабхаама, нижжам̣ ааг̇анд̇угамахаат̇зраава лабханд̇и, д̇зязва нам̣ ааг̇анд̇ваа бадиж̇аг̇г̇иссанд̇ий’’д̇и балуж̇ж̇анд̇амби на ологзнд̇и. бхаг̇аваа д̇асса бадиж̇аг̇г̇анад̇т̇ам̣ ‘‘абараж̇ж̇уг̇ад̇ааяа бавааран̣ааяа ааяад̇им̣ вассааваасад̇т̇ааяа анд̇араамуд̇д̇аго г̇аахзд̇аб̣б̣о’’д̇и ааха.
Antarāmuttake ayaṃ vinicchayo – ekasmiṃ vihāre mahālābhasenāsanaṃ hoti. Senāsanasāmikā vassūpagataṃ bhikkhuṃ sabbapaccayehi sakkaccaṃ upaṭṭhahitvā pavāretvā gamanakāle bahuṃ samaṇaparikkhāraṃ denti. Mahātherā dūratopi āgantvā vassūpanāyikadivase taṃ gahetvā phāsuṃ vasitvā vutthavassā lābhaṃ gaṇhitvā pakkamanti. Āvāsikā ‘‘mayaṃ etthuppannaṃ lābhaṃ na labhāma, niccaṃ āgantukamahātherāva labhanti, teyeva naṃ āgantvā paṭijaggissantī’’ti palujjantampi na olokenti. Bhagavā tassa paṭijagganatthaṃ ‘‘aparajjugatāya pavāraṇāya āyatiṃ vassāvāsatthāya antarāmuttako gāhetabbo’’ti āha.
д̇ам̣ г̇аахзнд̇зна сан̇гхад̇т̇зро вад̇д̇аб̣б̣о – ‘‘бханд̇з анд̇араамуд̇д̇агасзнаасанам̣ г̇ан̣хат̇аа’’д̇и. сажз г̇ан̣хаад̇и, д̣̇аад̇аб̣б̣ам̣; но жз зд̇знзва убааязна анут̇зрам̣ аад̣̇им̣ гад̇ваа яо г̇ан̣хаад̇и, д̇асса анд̇амасо сааман̣зрассааби д̣̇аад̇аб̣б̣ам̣. д̇зна д̇ам̣ сзнаасанам̣ адтамаасз бадиж̇аг̇г̇ид̇аб̣б̣ам̣. чад̣̇анабхид̇д̇ибхуумийсу яам̣ гин̃жи кан̣д̣ам̣ ваа пуллам̣ ваа ход̇и, д̇ам̣ саб̣б̣ам̣ бадисан̇карид̇аб̣б̣ам̣. уд̣̇д̣̇зсабарибужчаад̣̇ийхи д̣̇ивасам̣ кзбзд̇ваа рад̇д̇им̣ д̇ад̇т̇а васид̇умби ваддад̇и. рад̇д̇им̣ баривзн̣з васид̇ваа д̇ад̇т̇а д̣̇ивасам̣ кзбзд̇умби ваддад̇и. рад̇д̇инд̣̇ивам̣ д̇ад̇т̇зва васид̇умби ваддад̇и. уд̇угаалз ааг̇ад̇аанам̣ вуд̣дхаанам̣ на бадиб̣аахид̇аб̣б̣ам̣. вассуубанааяигад̣̇ивасз бана самбад̇д̇з сажз сан̇гхад̇т̇зро ‘‘маяхам̣ ид̣̇ам̣ сзнаасанам̣ д̣̇зт̇аа’’д̇и вад̣̇ад̇и, на лабхад̇и. ‘‘бханд̇з, ид̣̇ам̣ анд̇араамуд̇д̇агам̣ г̇ахзд̇ваа адтамаасз згзна бхигкунаа бадиж̇аг̇г̇ид̇а’’нд̇и вад̇ваа на д̣̇аад̇аб̣б̣ам̣. адтамаасз бадиж̇аг̇г̇агабхигкуссзва г̇ахид̇ам̣ ход̇и.
Taṃ gāhentena saṅghatthero vattabbo – ‘‘bhante antarāmuttakasenāsanaṃ gaṇhathā’’ti. Sace gaṇhāti, dātabbaṃ; no ce eteneva upāyena anutheraṃ ādiṃ katvā yo gaṇhāti, tassa antamaso sāmaṇerassāpi dātabbaṃ. Tena taṃ senāsanaṃ aṭṭhamāse paṭijaggitabbaṃ. Chadanabhittibhūmīsu yaṃ kiñci khaṇḍaṃ vā phullaṃ vā hoti, taṃ sabbaṃ paṭisaṅkharitabbaṃ. Uddesaparipucchādīhi divasaṃ khepetvā rattiṃ tattha vasitumpi vaṭṭati. Rattiṃ pariveṇe vasitvā tattha divasaṃ khepetumpi vaṭṭati. Rattindivaṃ tattheva vasitumpi vaṭṭati. Utukāle āgatānaṃ vuḍḍhānaṃ na paṭibāhitabbaṃ. Vassūpanāyikadivase pana sampatte sace saṅghatthero ‘‘mayhaṃ idaṃ senāsanaṃ dethā’’ti vadati, na labhati. ‘‘Bhante, idaṃ antarāmuttakaṃ gahetvā aṭṭhamāse ekena bhikkhunā paṭijaggita’’nti vatvā na dātabbaṃ. Aṭṭhamāse paṭijaggakabhikkhusseva gahitaṃ hoti.
яасмим̣ бана сзнаасанз згасам̣важчарз д̣̇вигкад̇д̇ум̣ бажжаяз д̣̇знд̇и чамаасажжаязна чамаасажжаязна, д̇ам̣ анд̇араамуд̇д̇агам̣ на г̇аахзд̇аб̣б̣ам̣. яасмим̣ ваа д̇игкад̇д̇ум̣ д̣̇знд̇и жад̇умаасажжаязна жад̇умаасажжаязна, яасмим̣ ваа жад̇угкад̇д̇ум̣ д̣̇знд̇и д̇змаасажжаязна д̇змаасажжаязна, д̇ам̣ анд̇араамуд̇д̇агам̣ на г̇аахзд̇аб̣б̣ам̣. бажжаязнзва хи д̇ам̣ бадиж̇аг̇г̇анам̣ лабхиссад̇и. яасмим̣ бана згасам̣важчарз сагид̣̇зва б̣ахубажжаяз д̣̇знд̇и, зд̇ам̣ анд̇араамуд̇д̇агам̣ г̇аахзд̇аб̣б̣анд̇и. аяам̣ д̇аава анд̇овассз вассуубанааяигад̣̇ивасзна баал̣ияам̣ ааг̇ад̇асзнаасанаг̇г̇аахагат̇аа.
Yasmiṃ pana senāsane ekasaṃvacchare dvikkhattuṃ paccaye denti chamāsaccayena chamāsaccayena, taṃ antarāmuttakaṃ na gāhetabbaṃ. Yasmiṃ vā tikkhattuṃ denti catumāsaccayena catumāsaccayena, yasmiṃ vā catukkhattuṃ denti temāsaccayena temāsaccayena, taṃ antarāmuttakaṃ na gāhetabbaṃ. Paccayeneva hi taṃ paṭijagganaṃ labhissati. Yasmiṃ pana ekasaṃvacchare sakideva bahupaccaye denti, etaṃ antarāmuttakaṃ gāhetabbanti. Ayaṃ tāva antovasse vassūpanāyikadivasena pāḷiyaṃ āgatasenāsanaggāhakathā.
аяам̣ бана сзнаасанаг̇г̇аахо наама д̣̇увид̇хо ход̇и – уд̇угаалз жа вассааваасз жа. д̇ад̇т̇а уд̇угаалз д̇аава гзжи ааг̇анд̇угаа бхигкуу бурзбхад̇д̇ам̣ ааг̇ажчанд̇и, гзжи бажчаабхад̇д̇ам̣ батамаяаамам̣ ваа маж̇жхимаяаамам̣ ваа бажчимаяаамам̣ ваа яз яад̣̇аа ааг̇ажчанд̇и, д̇зсам̣ д̇ад̣̇аава бхигкуу удтаабзд̇ваа сзнаасанам̣ д̣̇аад̇аб̣б̣ам̣. агаало наама над̇т̇и. сзнаасанабан̃н̃аабагзна бана бан̣д̣ид̇зна бхавид̇аб̣б̣ам̣, згам̣ ваа д̣̇вз ваа ман̃жадтаанаани табзд̇аб̣б̣аани. сажз вигаалз зго ваа д̣̇вз ваа т̇зраа ааг̇ажчанд̇и, д̇з вад̇д̇аб̣б̣аа – ‘‘бханд̇з, аад̣̇ид̇о бадтааяа вудтаабияамаанз саб̣б̣зби бхигкуу уб̣бхан̣д̣игаа бхависсанд̇и, д̇умхз амхаагам̣ васанадтаанзязва васат̇аа’’д̇и.
Ayaṃ pana senāsanaggāho nāma duvidho hoti – utukāle ca vassāvāse ca. Tattha utukāle tāva keci āgantukā bhikkhū purebhattaṃ āgacchanti, keci pacchābhattaṃ paṭhamayāmaṃ vā majjhimayāmaṃ vā pacchimayāmaṃ vā ye yadā āgacchanti, tesaṃ tadāva bhikkhū uṭṭhāpetvā senāsanaṃ dātabbaṃ. Akālo nāma natthi. Senāsanapaññāpakena pana paṇḍitena bhavitabbaṃ, ekaṃ vā dve vā mañcaṭṭhānāni ṭhapetabbāni. Sace vikāle eko vā dve vā therā āgacchanti, te vattabbā – ‘‘bhante, ādito paṭṭhāya vuṭṭhāpiyamāne sabbepi bhikkhū ubbhaṇḍikā bhavissanti, tumhe amhākaṃ vasanaṭṭhāneyeva vasathā’’ti.
б̣ахуусу бана ааг̇ад̇зсу вудтаабзд̇ваа бадибаадияаа д̣̇аад̇аб̣б̣ам̣. сажз згзгам̣ баривзн̣ам̣ баход̇и, згзгам̣ баривзн̣ам̣ д̣̇аад̇аб̣б̣ам̣. д̇ад̇т̇а аг̇г̇исаалад̣̇ийгхасааламан̣д̣аламаалаад̣̇аяо саб̣б̣зби д̇ассзва баабун̣анд̇и . звам̣ аббахонд̇з баасаад̣̇аг̇г̇зна д̣̇аад̇аб̣б̣ам̣. баасаад̣̇зсу аббахонд̇зсу оварагаг̇г̇зна д̣̇аад̇аб̣б̣ам̣. оварагзсу аббахонд̇зсу сзяяаг̇г̇зна д̣̇аад̇аб̣б̣ам̣. сзяяаг̇г̇зсу аббахонд̇зсу ман̃жадтаанзна д̣̇аад̇аб̣б̣ам̣. ман̃жадтаанз аббахонд̇з згабийтагадтаанавасзна д̣̇аад̇аб̣б̣ам̣. бхигкуно бана тид̇огаасамад̇д̇ам̣ на г̇аахзд̇аб̣б̣ам̣. зд̇ан̃хи сзнаасанам̣ наама на ход̇и. бийтагадтаанз бана аббахонд̇з згам̣ ман̃жадтаанам̣ ваа бийтагадтаанам̣ ваа ваарзна ваарзна г̇ахзд̇ваа ‘‘бханд̇з, виссамат̇аа’’д̇и д̇ин̣н̣ам̣ ж̇анаанам̣ д̣̇аад̇аб̣б̣ам̣, на хи саггаа сийд̇асамаяз саб̣б̣арад̇д̇им̣ аж̇жхогаасз васид̇ум̣. махаат̇зрзна батамаяаамам̣ виссамид̇ваа нигкамид̇ваа д̣̇уд̇ияад̇т̇зрасса вад̇д̇аб̣б̣ам̣ – ‘‘аавусо, ид̇ха бависаахий’’д̇и. сажз махаат̇зро нид̣̇д̣̇ааг̇аруго ход̇и, гаалам̣ на ж̇аанаад̇и, уггаасид̇ваа д̣̇ваарам̣ аагодзд̇ваа ‘‘бханд̇з, гаало ж̇аад̇о, сийд̇ам̣ ануд̣̇ахад̇ий’’д̇и вад̇д̇аб̣б̣ам̣. д̇зна нигкамид̇ваа огаасо д̣̇аад̇аб̣б̣о, ад̣̇аад̇ум̣ на лабхад̇и. д̣̇уд̇ияад̇т̇зрзнаби маж̇жхимаяаамам̣ виссамид̇ваа буриманаязнзва ид̇арасса д̣̇аад̇аб̣б̣ам̣. нид̣̇д̣̇ааг̇аруго вуд̇д̇анаязнзва вудтаабзд̇аб̣б̣о. звам̣ згарад̇д̇им̣ згаман̃жадтаанам̣ д̇ин̣н̣ам̣ д̣̇аад̇аб̣б̣ам̣. ж̇амб̣уд̣̇ийбз бана згажжз бхигкуу ‘‘сзнаасанам̣ наама ман̃жадтаанам̣ ваа бийтадтаанам̣ ваа гин̃жид̣̇зва гассажи саббааяам̣ ход̇и, гассажи асаббааяа’’нд̇и ааг̇анд̇угаа хонд̇у ваа маа ваа, д̣̇звасигам̣ сзнаасанам̣ г̇аахзнд̇и. аяам̣ уд̇угаалз сзнаасанаг̇г̇аахо наама.
Bahūsu pana āgatesu vuṭṭhāpetvā paṭipāṭiyā dātabbaṃ. Sace ekekaṃ pariveṇaṃ pahoti, ekekaṃ pariveṇaṃ dātabbaṃ. Tattha aggisāladīghasālamaṇḍalamālādayo sabbepi tasseva pāpuṇanti . Evaṃ appahonte pāsādaggena dātabbaṃ. Pāsādesu appahontesu ovarakaggena dātabbaṃ. Ovarakesu appahontesu seyyaggena dātabbaṃ. Seyyaggesu appahontesu mañcaṭṭhānena dātabbaṃ. Mañcaṭṭhāne appahonte ekapīṭhakaṭṭhānavasena dātabbaṃ. Bhikkhuno pana ṭhitokāsamattaṃ na gāhetabbaṃ. Etañhi senāsanaṃ nāma na hoti. Pīṭhakaṭṭhāne pana appahonte ekaṃ mañcaṭṭhānaṃ vā pīṭhakaṭṭhānaṃ vā vārena vārena gahetvā ‘‘bhante, vissamathā’’ti tiṇṇaṃ janānaṃ dātabbaṃ, na hi sakkā sītasamaye sabbarattiṃ ajjhokāse vasituṃ. Mahātherena paṭhamayāmaṃ vissamitvā nikkhamitvā dutiyattherassa vattabbaṃ – ‘‘āvuso, idha pavisāhī’’ti. Sace mahāthero niddāgaruko hoti, kālaṃ na jānāti, ukkāsitvā dvāraṃ ākoṭetvā ‘‘bhante, kālo jāto, sītaṃ anudahatī’’ti vattabbaṃ. Tena nikkhamitvā okāso dātabbo, adātuṃ na labhati. Dutiyattherenapi majjhimayāmaṃ vissamitvā purimanayeneva itarassa dātabbaṃ. Niddāgaruko vuttanayeneva vuṭṭhāpetabbo. Evaṃ ekarattiṃ ekamañcaṭṭhānaṃ tiṇṇaṃ dātabbaṃ. Jambudīpe pana ekacce bhikkhū ‘‘senāsanaṃ nāma mañcaṭṭhānaṃ vā pīṭhaṭṭhānaṃ vā kiñcideva kassaci sappāyaṃ hoti, kassaci asappāya’’nti āgantukā hontu vā mā vā, devasikaṃ senāsanaṃ gāhenti. Ayaṃ utukāle senāsanaggāho nāma.
вассааваасз бана ад̇т̇и ааг̇анд̇угавад̇д̇ам̣, ад̇т̇и ааваасигавад̇д̇ам̣, ааг̇анд̇угзна д̇аава сагадтаанам̣ мун̃жид̇ваа ан̃н̃ад̇т̇а г̇анд̇ваа васид̇угаамзна вассуубанааяигад̣̇ивасамзва д̇ад̇т̇а на г̇анд̇аб̣б̣ам̣. васанадтаанам̣ ваа хи д̇ад̇ра самб̣аад̇хам̣ бхавзяяа, бхигкаажааро ваа на самбаж̇ж̇зяяа, д̇зна на паасум̣ вихарзяяа. д̇асмаа ‘‘ид̣̇аани маасамад̇д̇зна вассуубанааяигаа бхависсад̇ий’’д̇и д̇ам̣ вихаарам̣ бависид̇аб̣б̣ам̣. д̇ад̇т̇а маасамад̇д̇ам̣ васанд̇о сажз уд̣̇д̣̇зсад̇т̇иго уд̣̇д̣̇зсасамбад̇д̇им̣ саллагкзд̇ваа, сажз гаммадтааниго гаммадтаанасаббааяад̇ам̣ саллагкзд̇ваа, сажз бажжаяад̇т̇иго бажжаяалаабхам̣ саллагкзд̇ваа анд̇овассз сукам̣ васиссад̇и.
Vassāvāse pana atthi āgantukavattaṃ, atthi āvāsikavattaṃ, āgantukena tāva sakaṭṭhānaṃ muñcitvā aññattha gantvā vasitukāmena vassūpanāyikadivasameva tattha na gantabbaṃ. Vasanaṭṭhānaṃ vā hi tatra sambādhaṃ bhaveyya, bhikkhācāro vā na sampajjeyya, tena na phāsuṃ vihareyya. Tasmā ‘‘idāni māsamattena vassūpanāyikā bhavissatī’’ti taṃ vihāraṃ pavisitabbaṃ. Tattha māsamattaṃ vasanto sace uddesatthiko uddesasampattiṃ sallakkhetvā, sace kammaṭṭhāniko kammaṭṭhānasappāyataṃ sallakkhetvā, sace paccayatthiko paccayalābhaṃ sallakkhetvā antovasse sukhaṃ vasissati.
сагадтаанад̇о жа д̇ад̇т̇а г̇ажчанд̇зна на г̇ожараг̇аамо гхаддзд̇аб̣б̣о, на д̇ад̇т̇а мануссаа вад̇д̇аб̣б̣аа – ‘‘д̇умхз ниссааяа салаагабхад̇д̇аад̣̇ийни ваа яааг̇укаж̇ж̇агаад̣̇ийни ваа вассааваасигам̣ ваа над̇т̇и, аяам̣ жзд̇ияасса баригкааро, аяам̣ убосат̇ааг̇аарасса, ид̣̇ам̣ д̇аал̣ан̃жзва суужи жа самбадижчат̇а д̇умхаагам̣ вихаара’’нд̇и. сзнаасанам̣ бана ж̇аг̇г̇ид̇ваа д̣̇аарубхан̣д̣амад̇д̇игаабхан̣д̣аани бадисаамзд̇ваа г̇амияавад̇д̇ам̣ буурзд̇ваа г̇анд̇аб̣б̣ам̣. звам̣ г̇ажчанд̇знааби д̣̇ахарзхи бад̇д̇ажийварабхан̣д̣игааяо угкибаабзд̇ваа д̇зланаал̣игад̇д̇арад̣̇ан̣д̣аад̣̇ийни г̇аахаабзд̇ваа чад̇д̇ам̣ баг̇г̇аяха ад̇д̇аанам̣ д̣̇ассзнд̇зна г̇аамад̣̇ваарзнзва на г̇анд̇аб̣б̣ам̣, бадижчаннзна адавимаг̇г̇зна г̇анд̇аб̣б̣ам̣. адавимаг̇г̇з асад̇и г̇умб̣аад̣̇ийни мад̣̇д̣̇анд̇зна на г̇анд̇аб̣б̣ам̣, г̇амияавад̇д̇ам̣ бана буурзд̇ваа вид̇аггам̣ чинд̣̇ид̇ваа суд̣̇д̇хажид̇д̇зна г̇аманавад̇д̇знзва г̇анд̇аб̣б̣ам̣. сажз бана г̇аамад̣̇ваарзна маг̇г̇о ход̇и, г̇ажчанд̇ан̃жа нам̣ сабариваарам̣ д̣̇исваа мануссаа ‘‘амхаагам̣ т̇зро вияаа’’д̇и убад̇хаавид̇ваа ‘‘гухим̣, бханд̇з, саб̣б̣абаригкаарз г̇ахзд̇ваа г̇ажчат̇аа’’д̇и вад̣̇анд̇и, д̇зсу жз зго звам̣ вад̣̇ад̇и – ‘‘вассуубанааяигагаало наамааяам̣, яад̇т̇а анд̇овассз ниб̣ад̣̇д̇хабхигкаажааро бхан̣д̣абадижчаад̣̇анан̃жа лаб̣бхад̇и, д̇ад̇т̇а бхигкуу г̇ажчанд̇ий’’д̇и. д̇асса жз суд̇ваа д̇з мануссаа ‘‘бханд̇з, имасмимби г̇аамз ж̇ано бхун̃ж̇ад̇и жзва ниваасзд̇и жа, маа ан̃н̃ад̇т̇а г̇ажчат̇аа’’д̇и вад̇ваа мид̇д̇аамажжз баггосаабзд̇ваа саб̣б̣з самманд̇аяид̇ваа вихаарз ниб̣ад̣̇д̇хавад̇д̇ан̃жа салаагабхад̇д̇аад̣̇ийни жа вассааваасиган̃жа бадтабзд̇ваа ‘‘ид̇хзва бханд̇з васат̇аа’’д̇и яаажанд̇и, саб̣б̣ам̣ саад̣̇ид̇ум̣ ваддад̇и. саб̣б̣ан̃хзд̇ам̣ габбияан̃жзва анаваж̇ж̇ан̃жа. гурунд̣̇ияам̣ бана ‘‘‘гухим̣ г̇ажчат̇аа’д̇и вуд̇д̇з ‘асугадтаана’нд̇и вад̇ваа, ‘гасмаа д̇ад̇т̇а г̇ажчат̇аа’д̇и вуд̇д̇з ‘гааран̣ам̣ аажигкид̇аб̣б̣а’’’нд̇и вуд̇д̇ам̣. убхаяамби банзд̇т̇а суд̣̇д̇хажид̇д̇ад̇д̇аава анаваж̇ж̇ам̣. ид̣̇ам̣ ааг̇анд̇угавад̇д̇ам̣ наама.
Sakaṭṭhānato ca tattha gacchantena na gocaragāmo ghaṭṭetabbo, na tattha manussā vattabbā – ‘‘tumhe nissāya salākabhattādīni vā yāgukhajjakādīni vā vassāvāsikaṃ vā natthi, ayaṃ cetiyassa parikkhāro, ayaṃ uposathāgārassa, idaṃ tāḷañceva sūci ca sampaṭicchatha tumhākaṃ vihāra’’nti. Senāsanaṃ pana jaggitvā dārubhaṇḍamattikābhaṇḍāni paṭisāmetvā gamiyavattaṃ pūretvā gantabbaṃ. Evaṃ gacchantenāpi daharehi pattacīvarabhaṇḍikāyo ukkhipāpetvā telanāḷikattaradaṇḍādīni gāhāpetvā chattaṃ paggayha attānaṃ dassentena gāmadvāreneva na gantabbaṃ, paṭicchannena aṭavimaggena gantabbaṃ. Aṭavimagge asati gumbādīni maddantena na gantabbaṃ, gamiyavattaṃ pana pūretvā vitakkaṃ chinditvā suddhacittena gamanavatteneva gantabbaṃ. Sace pana gāmadvārena maggo hoti, gacchantañca naṃ saparivāraṃ disvā manussā ‘‘amhākaṃ thero viyā’’ti upadhāvitvā ‘‘kuhiṃ, bhante, sabbaparikkhāre gahetvā gacchathā’’ti vadanti, tesu ce eko evaṃ vadati – ‘‘vassūpanāyikakālo nāmāyaṃ, yattha antovasse nibaddhabhikkhācāro bhaṇḍapaṭicchādanañca labbhati, tattha bhikkhū gacchantī’’ti. Tassa ce sutvā te manussā ‘‘bhante, imasmimpi gāme jano bhuñjati ceva nivāseti ca, mā aññattha gacchathā’’ti vatvā mittāmacce pakkosāpetvā sabbe sammantayitvā vihāre nibaddhavattañca salākabhattādīni ca vassāvāsikañca paṭṭhapetvā ‘‘idheva bhante vasathā’’ti yācanti, sabbaṃ sādituṃ vaṭṭati. Sabbañhetaṃ kappiyañceva anavajjañca. Kurundiyaṃ pana ‘‘‘kuhiṃ gacchathā’ti vutte ‘asukaṭṭhāna’nti vatvā, ‘kasmā tattha gacchathā’ti vutte ‘kāraṇaṃ ācikkhitabba’’’nti vuttaṃ. Ubhayampi panettha suddhacittattāva anavajjaṃ. Idaṃ āgantukavattaṃ nāma.
ид̣̇ам̣ бана ааваасигавад̇д̇ам̣ – бадигажжзва хи ааваасигзхи вихааро ж̇аг̇г̇ид̇аб̣б̣о. кан̣д̣апуллабадисан̇каран̣абарибхан̣д̣аани гаад̇аб̣б̣аани. рад̇д̇идтаанад̣̇иваадтаанаважжагудибассаавадтаанаани бад̇хаанагхаравихаарамаг̇г̇од̇и имаани саб̣б̣аани бадиж̇аг̇г̇ид̇аб̣б̣аани, жзд̇ияз суд̇хаагаммам̣ муд̣̇д̣̇авзд̣̇игааяа д̇зламагканам̣ ман̃жабийтабадиж̇аг̇г̇ананд̇и ид̣̇амби саб̣б̣ам̣ гаад̇аб̣б̣ам̣ – ‘‘вассам̣ васид̇угаамаа ааг̇анд̇ваа уд̣̇д̣̇зсабарибужчаагаммадтаанаануяог̇аад̣̇ийни гаронд̇аа сукам̣ васиссанд̇ий’’д̇и. гад̇абаригаммзхи аасаал̣хийж̇ун̣хабан̃жамид̇о бадтааяа вассааваасигам̣ бужчид̇аб̣б̣ам̣. гад̇т̇а бужчид̇аб̣б̣ам̣? яад̇о багад̇ияаа лаб̣бхад̇и. язхи бана на д̣̇иннабуб̣б̣ам̣, д̇з бужчид̇ум̣ на ваддад̇и. гасмаа бужчид̇аб̣б̣ам̣? гад̣̇аажи хи мануссаа д̣̇знд̇и, гад̣̇аажи д̣̇уб̣бхигкаад̣̇ийхи убад̣̇д̣̇уд̇аа на д̣̇знд̇и. д̇ад̇т̇а яз на д̣̇ассанд̇и, д̇з абужчид̇ваа вассааваасигз г̇аахид̇з г̇аахид̇абхигкуунам̣ лаабханд̇арааяо ход̇и, д̇асмаа бужчид̇ваава г̇аахзд̇аб̣б̣ам̣, бужчанд̇зна ‘‘д̇умхаагам̣ вассааваасигаг̇г̇аахагагаало убагадто’’д̇и вад̇д̇аб̣б̣ам̣. сажз вад̣̇анд̇и ‘‘бханд̇з, имам̣ сам̣важчарам̣ чаад̇агаад̣̇ийхи убад̣̇д̣̇уд̇амха, на саггома д̣̇аад̇у’’нд̇и ваа ‘‘яам̣ маяам̣ буб̣б̣з д̣̇зма, д̇ад̇о уунад̇арам̣ д̣̇ассаамаа’’д̇и ваа ‘‘ид̣̇аани габбаасо сулабхо, яам̣ буб̣б̣з д̣̇зма, д̇ад̇о б̣ахуд̇арам̣ д̣̇ассаамаа’’д̇и ваа вад̣̇анд̇и, д̇ам̣ саллагкзд̇ваа д̇ад̣̇ануруубзна наязна д̇зсам̣ д̇зсам̣ сзнаасанз бхигкуунам̣ вассааваасигам̣ г̇аахзд̇аб̣б̣ам̣.
Idaṃ pana āvāsikavattaṃ – paṭikacceva hi āvāsikehi vihāro jaggitabbo. Khaṇḍaphullapaṭisaṅkharaṇaparibhaṇḍāni kātabbāni. Rattiṭṭhānadivāṭṭhānavaccakuṭipassāvaṭṭhānāni padhānagharavihāramaggoti imāni sabbāni paṭijaggitabbāni, cetiye sudhākammaṃ muddavedikāya telamakkhanaṃ mañcapīṭhapaṭijaggananti idampi sabbaṃ kātabbaṃ – ‘‘vassaṃ vasitukāmā āgantvā uddesaparipucchākammaṭṭhānānuyogādīni karontā sukhaṃ vasissantī’’ti. Kataparikammehi āsāḷhījuṇhapañcamito paṭṭhāya vassāvāsikaṃ pucchitabbaṃ. Kattha pucchitabbaṃ? Yato pakatiyā labbhati. Yehi pana na dinnapubbaṃ, te pucchituṃ na vaṭṭati. Kasmā pucchitabbaṃ? Kadāci hi manussā denti, kadāci dubbhikkhādīhi upaddutā na denti. Tattha ye na dassanti, te apucchitvā vassāvāsike gāhite gāhitabhikkhūnaṃ lābhantarāyo hoti, tasmā pucchitvāva gāhetabbaṃ, pucchantena ‘‘tumhākaṃ vassāvāsikaggāhakakālo upakaṭṭho’’ti vattabbaṃ. Sace vadanti ‘‘bhante, imaṃ saṃvaccharaṃ chātakādīhi upaddutamha, na sakkoma dātu’’nti vā ‘‘yaṃ mayaṃ pubbe dema, tato ūnataraṃ dassāmā’’ti vā ‘‘idāni kappāso sulabho, yaṃ pubbe dema, tato bahutaraṃ dassāmā’’ti vā vadanti, taṃ sallakkhetvā tadanurūpena nayena tesaṃ tesaṃ senāsane bhikkhūnaṃ vassāvāsikaṃ gāhetabbaṃ.
сажз мануссаа вад̣̇анд̇и – ‘‘яасса амхаагам̣ вассааваасигам̣ баабун̣аад̇и, со д̇змаасам̣ баанийяам̣ убадтаабзд̇у, вихаарамаг̇г̇ам̣ ж̇аг̇г̇ад̇у, жзд̇ияан̇г̇ан̣аб̣од̇хияан̇г̇ан̣аани ж̇аг̇г̇ад̇у, б̣од̇хиругкз уд̣̇агам̣ аасин̃жад̇уу’’д̇и, яасса д̇ам̣ баабун̣аад̇и, д̇асса аажигкид̇аб̣б̣ам̣. яо бана г̇аамо бадиггамма яож̇анад̣̇вияож̇ананд̇арз ход̇и, д̇ад̇ра жз гулаани убанигкзбам̣ табзд̇ваа вихаарз вассааваасигам̣ д̣̇знд̇иязва, д̇аани гулаани абужчид̇вааби д̇зсам̣ сзнаасанз вад̇д̇ам̣ гад̇ваа васанд̇асса вассааваасигам̣ г̇аахзд̇аб̣б̣ам̣. сажз бана д̇зсам̣ сзнаасанз бам̣сугуулиго васад̇и, ааг̇ад̇ан̃жа д̇ам̣ д̣̇исваа ‘‘д̇умхаагам̣ вассааваасигам̣ д̣̇змаа’’д̇и вад̣̇анд̇и, д̇зна сан̇гхасса аажигкид̇аб̣б̣ам̣. сажз д̇аани гулаани сан̇гхасса д̣̇аад̇ум̣ на ижчанд̇и, ‘‘д̇умхаагам̣язва д̣̇змаа’’д̇и вад̣̇анд̇и, сабхааг̇о бхигку ‘‘вад̇д̇ам̣ гад̇ваа г̇ан̣хаахий’’д̇и вад̇д̇аб̣б̣о. бам̣сугуулигасса банзд̇ам̣ на ваддад̇и, ид̇и сад̣̇д̇хаад̣̇зяяз д̣̇ааяагамануссаа бужчид̇аб̣б̣аа.
Sace manussā vadanti – ‘‘yassa amhākaṃ vassāvāsikaṃ pāpuṇāti, so temāsaṃ pānīyaṃ upaṭṭhāpetu, vihāramaggaṃ jaggatu, cetiyaṅgaṇabodhiyaṅgaṇāni jaggatu, bodhirukkhe udakaṃ āsiñcatū’’ti, yassa taṃ pāpuṇāti, tassa ācikkhitabbaṃ. Yo pana gāmo paṭikkamma yojanadviyojanantare hoti, tatra ce kulāni upanikkhepaṃ ṭhapetvā vihāre vassāvāsikaṃ dentiyeva, tāni kulāni apucchitvāpi tesaṃ senāsane vattaṃ katvā vasantassa vassāvāsikaṃ gāhetabbaṃ. Sace pana tesaṃ senāsane paṃsukūliko vasati, āgatañca taṃ disvā ‘‘tumhākaṃ vassāvāsikaṃ demā’’ti vadanti, tena saṅghassa ācikkhitabbaṃ. Sace tāni kulāni saṅghassa dātuṃ na icchanti, ‘‘tumhākaṃyeva demā’’ti vadanti, sabhāgo bhikkhu ‘‘vattaṃ katvā gaṇhāhī’’ti vattabbo. Paṃsukūlikassa panetaṃ na vaṭṭati, iti saddhādeyye dāyakamanussā pucchitabbā.
д̇ад̇руббаад̣̇з бана габбияагаарагаа бужчид̇аб̣б̣аа. гат̇ам̣ бужчид̇аб̣б̣аа? ‘‘гим̣, аавусо, сан̇гхасса бхан̣д̣абадижчаад̣̇анам̣ бхависсад̇ий’’д̇и. сажз вад̣̇анд̇и – ‘‘бхависсад̇и, бханд̇з, згзгасса навахад̇т̇ам̣ саадагам̣ д̣̇ассаама, вассааваасигам̣ г̇аахзт̇аа’’д̇и, г̇аахзд̇аб̣б̣ам̣. сажзби вад̣̇анд̇и – ‘‘саадагам̣ над̇т̇и; вад̇т̇у бана ад̇т̇и, г̇аахзт̇а, бханд̇з’’д̇и, вад̇т̇умхи санд̇зби г̇аахзд̇ум̣ ваддад̇иязва. габбияагаарагаанан̃хи хад̇т̇з ‘‘габбияабхан̣д̣ам̣ барибхун̃ж̇ат̇аа’’д̇и д̣̇иннавад̇т̇уд̇о яам̣ яам̣ габбам̣, д̇ам̣ д̇ам̣ саб̣б̣ам̣ барибхун̃ж̇ид̇ум̣ анун̃н̃аад̇ам̣.
Tatruppāde pana kappiyakārakā pucchitabbā. Kathaṃ pucchitabbā? ‘‘Kiṃ, āvuso, saṅghassa bhaṇḍapaṭicchādanaṃ bhavissatī’’ti. Sace vadanti – ‘‘bhavissati, bhante, ekekassa navahatthaṃ sāṭakaṃ dassāma, vassāvāsikaṃ gāhethā’’ti, gāhetabbaṃ. Sacepi vadanti – ‘‘sāṭakaṃ natthi; vatthu pana atthi, gāhetha, bhante’’ti, vatthumhi santepi gāhetuṃ vaṭṭatiyeva. Kappiyakārakānañhi hatthe ‘‘kappiyabhaṇḍaṃ paribhuñjathā’’ti dinnavatthuto yaṃ yaṃ kappaṃ, taṃ taṃ sabbaṃ paribhuñjituṃ anuññātaṃ.
яам̣ банзд̇т̇а бин̣д̣абаад̇ад̇т̇ааяа г̇илаанабажжаяад̇т̇ааяа ваа уд̣̇д̣̇исса д̣̇иннам̣, д̇ам̣ жийварз убанаамзнд̇зхи сан̇гхасудтуд̇ааяа абалогзд̇ваа убанаамзд̇аб̣б̣ам̣. сзнаасанад̇т̇ааяа уд̣̇д̣̇исса д̣̇иннам̣ г̇арубхан̣д̣ам̣ ход̇и, жийваравасзнзва жад̇убажжаяавасзна ваа д̣̇иннам̣ жийварз убанаамзнд̇аанам̣ абалоганагаммагижжам̣ над̇т̇и, абалоганагаммам̣ гаронд̇зхи жа буг̇г̇алавасзнзва гаад̇аб̣б̣ам̣, сан̇гхавасзна на гаад̇аб̣б̣ам̣. ж̇аад̇аруубараж̇ад̇авасзнааби аамагад̇хан̃н̃авасзна ваа абалоганагаммам̣ на ваддад̇и. габбияабхан̣д̣авасзна жийварад̇ан̣д̣улаад̣̇ивасзнзва жа ваддад̇и. д̇ам̣ бана звам̣ гад̇д̇аб̣б̣ам̣ – ‘‘ид̣̇аани субхигкам̣ сулабхабин̣д̣ам̣, бхигкуу жийварзна гиламанд̇и, зд̇д̇агам̣ наама д̇ан̣д̣улабхааг̇ам̣ бхигкуунам̣ жийварам̣ гаад̇ум̣ ружжад̇ий’’д̇и. ‘‘г̇илаанабажжаяо сулабхо г̇илаано ваа над̇т̇и, зд̇д̇агам̣ наама д̇ан̣д̣улабхааг̇ам̣ бхигкуунам̣ жийварам̣ гаад̇ум̣ ружжад̇ий’’д̇и.
Yaṃ panettha piṇḍapātatthāya gilānapaccayatthāya vā uddissa dinnaṃ, taṃ cīvare upanāmentehi saṅghasuṭṭhutāya apaloketvā upanāmetabbaṃ. Senāsanatthāya uddissa dinnaṃ garubhaṇḍaṃ hoti, cīvaravaseneva catupaccayavasena vā dinnaṃ cīvare upanāmentānaṃ apalokanakammakiccaṃ natthi, apalokanakammaṃ karontehi ca puggalavaseneva kātabbaṃ, saṅghavasena na kātabbaṃ. Jātarūparajatavasenāpi āmakadhaññavasena vā apalokanakammaṃ na vaṭṭati. Kappiyabhaṇḍavasena cīvarataṇḍulādivaseneva ca vaṭṭati. Taṃ pana evaṃ kattabbaṃ – ‘‘idāni subhikkhaṃ sulabhapiṇḍaṃ, bhikkhū cīvarena kilamanti, ettakaṃ nāma taṇḍulabhāgaṃ bhikkhūnaṃ cīvaraṃ kātuṃ ruccatī’’ti. ‘‘Gilānapaccayo sulabho gilāno vā natthi, ettakaṃ nāma taṇḍulabhāgaṃ bhikkhūnaṃ cīvaraṃ kātuṃ ruccatī’’ti.
звам̣ жийварабажжаяам̣ саллагкзд̇ваа сзнаасанасса гаалз гхосид̇з саннибад̇ид̇з сан̇гхз сзнаасанаг̇г̇аахаго самманнид̇аб̣б̣о. самманнанд̇зна жа д̣̇вз самманнид̇аб̣б̣аад̇и вуд̇д̇ам̣. зван̃хи наваго вуд̣дхад̇арасса, вуд̣дхо жа навагасса г̇аахзссад̇и. маханд̇з бана махаавихаарасад̣̇исз вихаарз д̇аяо жад̇д̇ааро ж̇анаа самманнид̇аб̣б̣аа. гурунд̣̇ияам̣ бана ‘‘адтаби сол̣асаби ж̇анз самманнид̇ум̣ ваддад̇ий’’д̇и вуд̇д̇ам̣. д̇зсам̣ саммуд̇и гаммаваажааяаби абалоганзнаби ваддад̇иязва.
Evaṃ cīvarapaccayaṃ sallakkhetvā senāsanassa kāle ghosite sannipatite saṅghe senāsanaggāhako sammannitabbo. Sammannantena ca dve sammannitabbāti vuttaṃ. Evañhi navako vuḍḍhatarassa, vuḍḍho ca navakassa gāhessati. Mahante pana mahāvihārasadise vihāre tayo cattāro janā sammannitabbā. Kurundiyaṃ pana ‘‘aṭṭhapi soḷasapi jane sammannituṃ vaṭṭatī’’ti vuttaṃ. Tesaṃ sammuti kammavācāyapi apalokanenapi vaṭṭatiyeva.
д̇зхи саммад̇зхи бхигкуухи сзнаасанам̣ саллагкзд̇аб̣б̣ам̣, жзд̇ияагхарам̣ б̣од̇хигхарам̣ аасанагхарам̣ саммун̃ж̇аниаддо д̣̇ааруаддо важжагуди идтагасаалаа вад̣дхагисаалаа д̣̇ваарагодтаго баанийяамаал̣о маг̇г̇о богкаран̣ийд̇и зд̇аани хи асзнаасанаани, вихааро ад̣дхаяог̇о баасаад̣̇о хаммияам̣ г̇ухаа ман̣д̣або ругкамуулам̣ взл̣уг̇умб̣од̇и имаани сзнаасанаани, д̇аани г̇аахзд̇аб̣б̣аани. г̇аахзнд̇зна жа ‘‘батамам̣ бхигкуу г̇ан̣зд̇ум̣, бхигкуу г̇ан̣зд̇ваа сзяяаа г̇ан̣зд̇у’’нд̇и зд̇т̇а вуд̇д̇анаязна г̇аахзд̇аб̣б̣аани. сажз сан̇гхиго жа сад̣̇д̇хаад̣̇зяяо жаад̇и д̣̇вз жийварабажжаяаа хонд̇и, д̇зсу яам̣ бхигкуу батамам̣ г̇ан̣хид̇ум̣ ижчанд̇и, д̇ам̣ г̇аахзд̇ваа д̇асса тид̇игад̇о бадтааяа ид̇аро г̇аахзд̇аб̣б̣о.
Tehi sammatehi bhikkhūhi senāsanaṃ sallakkhetabbaṃ, cetiyagharaṃ bodhigharaṃ āsanagharaṃ sammuñjaniaṭṭo dāruaṭṭo vaccakuṭi iṭṭhakasālā vaḍḍhakisālā dvārakoṭṭhako pānīyamāḷo maggo pokkharaṇīti etāni hi asenāsanāni, vihāro aḍḍhayogo pāsādo hammiyaṃ guhā maṇḍapo rukkhamūlaṃ veḷugumboti imāni senāsanāni, tāni gāhetabbāni. Gāhentena ca ‘‘paṭhamaṃ bhikkhū gaṇetuṃ, bhikkhū gaṇetvā seyyā gaṇetu’’nti ettha vuttanayena gāhetabbāni. Sace saṅghiko ca saddhādeyyo cāti dve cīvarapaccayā honti, tesu yaṃ bhikkhū paṭhamaṃ gaṇhituṃ icchanti, taṃ gāhetvā tassa ṭhitikato paṭṭhāya itaro gāhetabbo.
сажз бана бхигкуунам̣ аббад̇ааяа баривзн̣аг̇г̇зна сзнаасанз г̇аахияамаанз згам̣ баривзн̣ам̣ махаалаабхам̣ ход̇и, д̣̇аса ваа д̣̇ваад̣̇аса ваа жийвараани лабханд̇и, д̇ам̣ виж̇адзд̇ваа ан̃н̃зсу алаабхагзсу ааваасзсу багкибид̇ваа ан̃н̃зсамби бхигкуунам̣ г̇аахзд̇аб̣б̣анд̇и махаасумад̇т̇зро ааха. махаабад̣̇умад̇т̇зро банааха – ‘‘на звам̣ гаад̇аб̣б̣ам̣, мануссаа хи ад̇д̇ано ааваасаж̇аг̇г̇анад̇т̇ааяа бажжаяам̣ д̣̇знд̇и, д̇асмаа ан̃н̃зхи бхигкуухи д̇ад̇т̇а бависид̇аб̣б̣а’’нд̇и. сажз банзд̇т̇а махаат̇зро бадиггосад̇и – ‘‘маавусо, звам̣ г̇аахзт̇а, бхаг̇авад̇о анусидтим̣ гарот̇а, вуд̇д̇ан̃хзд̇ам̣ бхаг̇авад̇аа – ‘ануж̇аанаами, бхигкавз, баривзн̣аг̇г̇зна г̇аахзд̇у’’’нд̇и д̇асса бадиггосанааяа адтад̇ваа ‘‘бханд̇з бхигкуу б̣ахуу, бажжаяо манд̣̇о, сан̇г̇ахам̣ гаад̇ум̣ ваддад̇ий’’д̇и д̇ам̣ сан̃н̃аабзд̇ваа г̇аахзд̇аб̣б̣амзва.
Sace pana bhikkhūnaṃ appatāya pariveṇaggena senāsane gāhiyamāne ekaṃ pariveṇaṃ mahālābhaṃ hoti, dasa vā dvādasa vā cīvarāni labhanti, taṃ vijaṭetvā aññesu alābhakesu āvāsesu pakkhipitvā aññesampi bhikkhūnaṃ gāhetabbanti mahāsumatthero āha. Mahāpadumatthero panāha – ‘‘na evaṃ kātabbaṃ, manussā hi attano āvāsajagganatthāya paccayaṃ denti, tasmā aññehi bhikkhūhi tattha pavisitabba’’nti. Sace panettha mahāthero paṭikkosati – ‘‘māvuso, evaṃ gāhetha, bhagavato anusiṭṭhiṃ karotha, vuttañhetaṃ bhagavatā – ‘anujānāmi, bhikkhave, pariveṇaggena gāhetu’’’nti tassa paṭikkosanāya aṭṭhatvā ‘‘bhante bhikkhū bahū, paccayo mando, saṅgahaṃ kātuṃ vaṭṭatī’’ti taṃ saññāpetvā gāhetabbameva.
г̇аахзнд̇зна жа саммад̇зна бхигкунаа махаат̇зрасса санд̇игам̣ г̇анд̇ваа звам̣ вад̇д̇аб̣б̣ам̣ – ‘‘бханд̇з, д̇умхаагам̣ сзнаасанам̣ баабун̣аад̇и, г̇ан̣хат̇а бажжаяам̣ д̇хаарзт̇аа’’д̇и. ‘‘асугагуласса бажжаяо асугасзнаасанан̃жа маяхам̣ баабун̣аад̇и, аавусо’’д̇и, ‘‘баабун̣аад̇и, бханд̇з, г̇ан̣хат̇а на’’нд̇и, ‘‘г̇ан̣хаами, аавусо’’д̇и, г̇ахид̇ам̣ ход̇и. сажз бана ‘‘г̇ахид̇ам̣ во, бханд̇з’’д̇и вуд̇д̇з ‘‘г̇ахид̇ам̣ мз’’д̇и ваа ‘‘г̇ан̣хиссат̇а, бханд̇з’’д̇и вуд̇д̇з ‘‘г̇ан̣хиссаамий’’д̇и ваа вад̣̇ад̇и, ‘‘аг̇ахид̇ам̣ ход̇ий’’д̇и махаасумад̇т̇зро ааха. махаабад̣̇умад̇т̇зро банааха – ‘‘ад̇ийд̇аанааг̇ад̇аважанам̣ ваа ход̇у, вад̇д̇амаанаважанам̣ ваа, сад̇уббаад̣̇амад̇д̇ааалаяагаран̣амад̇д̇амзва жзд̇т̇а бамаан̣ам̣, д̇асмаа г̇ахид̇амзва ход̇ий’’д̇и.
Gāhentena ca sammatena bhikkhunā mahātherassa santikaṃ gantvā evaṃ vattabbaṃ – ‘‘bhante, tumhākaṃ senāsanaṃ pāpuṇāti, gaṇhatha paccayaṃ dhārethā’’ti. ‘‘Asukakulassa paccayo asukasenāsanañca mayhaṃ pāpuṇāti, āvuso’’ti, ‘‘pāpuṇāti, bhante, gaṇhatha na’’nti, ‘‘gaṇhāmi, āvuso’’ti, gahitaṃ hoti. Sace pana ‘‘gahitaṃ vo, bhante’’ti vutte ‘‘gahitaṃ me’’ti vā ‘‘gaṇhissatha, bhante’’ti vutte ‘‘gaṇhissāmī’’ti vā vadati, ‘‘agahitaṃ hotī’’ti mahāsumatthero āha. Mahāpadumatthero panāha – ‘‘atītānāgatavacanaṃ vā hotu, vattamānavacanaṃ vā, satuppādamattaālayakaraṇamattameva cettha pamāṇaṃ, tasmā gahitameva hotī’’ti.
яоби бам̣сугуулиго бхигку сзнаасанам̣ г̇ахзд̇ваа бажжаяам̣ виссаж̇ж̇зд̇и, аяамби на ан̃н̃асмим̣ ааваасз багкибид̇аб̣б̣о. д̇асмим̣язва баривзн̣з аг̇г̇исаалааяа ваа д̣̇ийгхасаалааяа ваа ругкамуулз ваа ан̃н̃асса г̇аахзд̇ум̣ ваддад̇и. бам̣сугуулиго ‘‘васаамий’’д̇и сзнаасанам̣ ж̇аг̇г̇иссад̇и, ид̇аро ‘‘бажжаяам̣ г̇ан̣хаамий’’д̇и, звам̣ д̣̇вийхи гааран̣зхи сзнаасанам̣ суж̇аг̇г̇ид̇ад̇арам̣ бхависсад̇и. махаабажжарияам̣ бана вуд̇д̇ам̣ – ‘‘бам̣сугуулигз ваасад̇т̇ааяа сзнаасанам̣ г̇ан̣ханд̇з сзнаасанаг̇г̇аахаабагзна вад̇д̇аб̣б̣ам̣ – ‘бханд̇з, ид̇ха бажжаяо ад̇т̇и, со гим̣ гаад̇аб̣б̣о’д̇и. д̇зна ‘хздтаа ан̃н̃ам̣ г̇аахаабзхий’д̇и вад̇д̇аб̣б̣о. сажз бана гин̃жи авад̇ваава васад̇и, вуд̇т̇авассасса жа баад̣̇амуулз табзд̇ваа саадагам̣ д̣̇знд̇и, ваддад̇и. ат̇а вассааваасигам̣ д̣̇змаад̇и вад̣̇анд̇и, д̇асмим̣ сзнаасанз вассам̣вуд̇т̇абхигкуунам̣ баабун̣аад̇ий’’д̇и. язсам̣ бана сзнаасанам̣ над̇т̇и; гзвалам̣ бажжаяамзва д̣̇знд̇и, д̇зсам̣ бажжаяам̣ авассааваасигз сзнаасанз г̇аахзд̇ум̣ ваддад̇и.
Yopi paṃsukūliko bhikkhu senāsanaṃ gahetvā paccayaṃ vissajjeti, ayampi na aññasmiṃ āvāse pakkhipitabbo. Tasmiṃyeva pariveṇe aggisālāya vā dīghasālāya vā rukkhamūle vā aññassa gāhetuṃ vaṭṭati. Paṃsukūliko ‘‘vasāmī’’ti senāsanaṃ jaggissati, itaro ‘‘paccayaṃ gaṇhāmī’’ti, evaṃ dvīhi kāraṇehi senāsanaṃ sujaggitataraṃ bhavissati. Mahāpaccariyaṃ pana vuttaṃ – ‘‘paṃsukūlike vāsatthāya senāsanaṃ gaṇhante senāsanaggāhāpakena vattabbaṃ – ‘bhante, idha paccayo atthi, so kiṃ kātabbo’ti. Tena ‘heṭṭhā aññaṃ gāhāpehī’ti vattabbo. Sace pana kiñci avatvāva vasati, vutthavassassa ca pādamūle ṭhapetvā sāṭakaṃ denti, vaṭṭati. Atha vassāvāsikaṃ demāti vadanti, tasmiṃ senāsane vassaṃvutthabhikkhūnaṃ pāpuṇātī’’ti. Yesaṃ pana senāsanaṃ natthi; kevalaṃ paccayameva denti, tesaṃ paccayaṃ avassāvāsike senāsane gāhetuṃ vaṭṭati.
мануссаа т̇уубам̣ гад̇ваа вассааваасигам̣ г̇аахаабзнд̇и, т̇уубо наама асзнаасанам̣, д̇асса самийбз ругкз ваа ман̣д̣абз ваа убаниб̣анд̇хид̇ваа г̇аахаабзд̇аб̣б̣ам̣. д̇зна бхигкунаа жзд̇ияам̣ бадиж̇аг̇г̇ид̇аб̣б̣ам̣. б̣од̇хиругкаб̣од̇хигхарааасанагхарасаммун̃ж̇аниаддад̣̇ааруаддаважжагудид̣̇ваарагодтагабаанийяамаал̣агад̣̇анд̇агадтамаал̣агзсуби зсзва наяо. бхож̇анасаалаа бана сзнаасанамзва, д̇асмаа д̇ам̣ згасса ваа б̣ахуунам̣ ваа барижчинд̣̇ид̇ваа г̇аахзд̇ум̣ ваддад̇ийд̇и саб̣б̣амид̣̇ам̣ вид̇т̇аарзна махаабажжарияам̣ вуд̇д̇ам̣.
Manussā thūpaṃ katvā vassāvāsikaṃ gāhāpenti, thūpo nāma asenāsanaṃ, tassa samīpe rukkhe vā maṇḍape vā upanibandhitvā gāhāpetabbaṃ. Tena bhikkhunā cetiyaṃ paṭijaggitabbaṃ. Bodhirukkhabodhigharaāsanagharasammuñjaniaṭṭadāruaṭṭavaccakuṭidvārakoṭṭhakapānīyamāḷakadantakaṭṭhamāḷakesupi eseva nayo. Bhojanasālā pana senāsanameva, tasmā taṃ ekassa vā bahūnaṃ vā paricchinditvā gāhetuṃ vaṭṭatīti sabbamidaṃ vitthārena mahāpaccariyaṃ vuttaṃ.
сзнаасанаг̇г̇аахаабагзна бана баадибад̣̇аарун̣ад̇о бадтааяа яаава буна арун̣ам̣ на бхиж̇ж̇ад̇и д̇аава г̇аахзд̇аб̣б̣ам̣, ид̣̇ан̃хи сзнаасанаг̇г̇аахасса кзд̇д̇ам̣. сажз баад̇ова г̇аахид̇з сзнаасанз ан̃н̃о вид̇аггажаариго бхигку ааг̇анд̇ваа сзнаасанам̣ яаажад̇и, ‘‘г̇ахид̇ам̣, бханд̇з, сзнаасанам̣, вассуубаг̇ад̇о сан̇гхо, раман̣ийяо вихааро, ругкамуулаад̣̇ийсу яад̇т̇а ижчат̇а д̇ад̇т̇а васат̇аа’’д̇и вад̇д̇аб̣б̣о. вассуубаг̇ад̇зхи анд̇овассз ниб̣ад̣̇д̇хавад̇д̇ам̣ табзд̇ваа вассуубаг̇ад̇аа бхигкуу ‘‘саммун̃ж̇анияо б̣анд̇хат̇аа’’д̇и вад̇д̇аб̣б̣аа. сулабхаа жз д̣̇ан̣д̣агаа жзва салаагааяо жа хонд̇и, згзгзна ча бан̃жа мудтисаммун̃ж̇анияо, д̣̇вз д̇иссо яадтисаммун̃ж̇анияо ваа б̣анд̇хид̇аб̣б̣аа. д̣̇уллабхаа жз хонд̇и, д̣̇вз д̇иссо мудтисаммун̃ж̇анияо згаа яадтисаммун̃ж̇аний б̣анд̇хид̇аб̣б̣аа. сааман̣зрзхи бан̃жа бан̃жа уггаа годдзд̇аб̣б̣аа. васанадтаанз гасаавабарибхан̣д̣ам̣ гаад̇аб̣б̣ам̣.
Senāsanaggāhāpakena pana pāṭipadaaruṇato paṭṭhāya yāva puna aruṇaṃ na bhijjati tāva gāhetabbaṃ, idañhi senāsanaggāhassa khettaṃ. Sace pātova gāhite senāsane añño vitakkacāriko bhikkhu āgantvā senāsanaṃ yācati, ‘‘gahitaṃ, bhante, senāsanaṃ, vassūpagato saṅgho, ramaṇīyo vihāro, rukkhamūlādīsu yattha icchatha tattha vasathā’’ti vattabbo. Vassūpagatehi antovasse nibaddhavattaṃ ṭhapetvā vassūpagatā bhikkhū ‘‘sammuñjaniyo bandhathā’’ti vattabbā. Sulabhā ce daṇḍakā ceva salākāyo ca honti, ekekena cha pañca muṭṭhisammuñjaniyo, dve tisso yaṭṭhisammuñjaniyo vā bandhitabbā. Dullabhā ce honti, dve tisso muṭṭhisammuñjaniyo ekā yaṭṭhisammuñjanī bandhitabbā. Sāmaṇerehi pañca pañca ukkā koṭṭetabbā. Vasanaṭṭhāne kasāvaparibhaṇḍaṃ kātabbaṃ.
вад̇д̇ам̣ гаронд̇зхи бана ‘‘на уд̣̇д̣̇исид̇аб̣б̣ам̣, на уд̣̇д̣̇исаабзд̇аб̣б̣ам̣, на саж̇жхааяо гаад̇аб̣б̣о, на баб̣б̣ааж̇зд̇аб̣б̣ам̣, на убасамбаад̣̇зд̇аб̣б̣ам̣, на ниссаяо д̣̇аад̇аб̣б̣о, на д̇хаммасаванам̣ гаад̇аб̣б̣ам̣, саб̣б̣зва хи зд̇з бабан̃жаа. ниббабан̃жаа худ̇ваа саман̣ад̇хаммамзва гариссаамаа’’д̇и ваа ‘‘саб̣б̣з д̇зраса д̇худ̇ан̇г̇аани самаад̣̇ияанд̇у, сзяяам̣ агаббзд̇ваа таанажан̇гамзхи вийд̇инаамзнд̇у, мууг̇аб̣б̣ад̇ам̣ г̇ан̣ханд̇у, сад̇д̇аахагаран̣ийязна г̇ад̇ааби бхааж̇анийяабхан̣д̣ам̣ лабханд̇уу’’д̇и ваа зваруубам̣ ад̇хаммигавад̇д̇ам̣ на гаад̇аб̣б̣ам̣. звам̣ бана гаад̇аб̣б̣ам̣ – барияад̇д̇ид̇хаммо наама д̇ивид̇хамби сад̣̇д̇хаммам̣ бад̇идтаабзд̇и; д̇асмаа саггажжам̣ уд̣̇д̣̇исат̇а, уд̣̇д̣̇исаабзт̇а, саж̇жхааяам̣ гарот̇а, бад̇хаанагхарз васанд̇аанам̣ сан̇гхадданам̣ агад̇ваа анд̇овихаарз нисийд̣̇ид̇ваа уд̣̇д̣̇исат̇а, уд̣̇д̣̇исаабзт̇а, саж̇жхааяам̣ гарот̇а, д̇хаммасаванам̣ самид̣̇д̇хам̣ гарот̇а, баб̣б̣ааж̇знд̇аа сод̇хзд̇ваа баб̣б̣ааж̇зт̇а, сод̇хзд̇ваа убасамбаад̣̇зт̇а, сод̇хзд̇ваа ниссаяам̣ д̣̇зт̇а, згоби хи гулабуд̇д̇о баб̣б̣аж̇ж̇ам̣ убасамбад̣̇ан̃жа лабхид̇ваа сагаласаасанам̣ бад̇идтаабзд̇и, ад̇д̇ано т̇аамзна яад̇д̇агаани саггот̇а д̇ад̇д̇агаани д̇худ̇ан̇г̇аани самаад̣̇ияат̇а. анд̇овассам̣ наамзд̇ам̣ сагалад̣̇ивасам̣ рад̇д̇ияаа жа батамабажчимаяаамзсу аббамад̇д̇зхи бхавид̇аб̣б̣ам̣, вийрияам̣ аарабхид̇аб̣б̣ам̣. бораан̣агамахаат̇зрааби саб̣б̣абалиб̣од̇хз чинд̣̇ид̇ваа анд̇овассз згажааригавад̇д̇ам̣ буураяим̣су, бхассз мад̇д̇ам̣ ж̇аанид̇ваа д̣̇асавад̇т̇угагат̇ам̣ д̣̇асаасубхад̣̇асаануссад̇иадтад̇им̣саарамман̣агат̇ан̃жа гаад̇ум̣ ваддад̇и, ааг̇анд̇угаанам̣ вад̇д̇ам̣ гаад̇ум̣ сад̇д̇аахагаран̣ийязна г̇ад̇аанам̣ абалогзд̇ваа д̣̇аад̇ум̣ ваддад̇ийд̇и зваруубам̣ вад̇д̇ам̣ гаад̇аб̣б̣ам̣.
Vattaṃ karontehi pana ‘‘na uddisitabbaṃ, na uddisāpetabbaṃ, na sajjhāyo kātabbo, na pabbājetabbaṃ, na upasampādetabbaṃ, na nissayo dātabbo, na dhammasavanaṃ kātabbaṃ, sabbeva hi ete papañcā. Nippapañcā hutvā samaṇadhammameva karissāmā’’ti vā ‘‘sabbe terasa dhutaṅgāni samādiyantu, seyyaṃ akappetvā ṭhānacaṅkamehi vītināmentu, mūgabbataṃ gaṇhantu, sattāhakaraṇīyena gatāpi bhājanīyabhaṇḍaṃ labhantū’’ti vā evarūpaṃ adhammikavattaṃ na kātabbaṃ. Evaṃ pana kātabbaṃ – pariyattidhammo nāma tividhampi saddhammaṃ patiṭṭhāpeti; tasmā sakkaccaṃ uddisatha, uddisāpetha, sajjhāyaṃ karotha, padhānaghare vasantānaṃ saṅghaṭṭanaṃ akatvā antovihāre nisīditvā uddisatha, uddisāpetha, sajjhāyaṃ karotha, dhammasavanaṃ samiddhaṃ karotha, pabbājentā sodhetvā pabbājetha, sodhetvā upasampādetha, sodhetvā nissayaṃ detha, ekopi hi kulaputto pabbajjaṃ upasampadañca labhitvā sakalasāsanaṃ patiṭṭhāpeti, attano thāmena yattakāni sakkotha tattakāni dhutaṅgāni samādiyatha. Antovassaṃ nāmetaṃ sakaladivasaṃ rattiyā ca paṭhamapacchimayāmesu appamattehi bhavitabbaṃ, vīriyaṃ ārabhitabbaṃ. Porāṇakamahātherāpi sabbapalibodhe chinditvā antovasse ekacārikavattaṃ pūrayiṃsu, bhasse mattaṃ jānitvā dasavatthukakathaṃ dasaasubhadasānussatiaṭṭhatiṃsārammaṇakathañca kātuṃ vaṭṭati, āgantukānaṃ vattaṃ kātuṃ sattāhakaraṇīyena gatānaṃ apaloketvā dātuṃ vaṭṭatīti evarūpaṃ vattaṃ kātabbaṃ.
абижа бхигкуу овад̣̇ид̇аб̣б̣аа – ‘‘виг̇г̇аахигабисун̣апарусаважанаани маа вад̣̇ат̇а, д̣̇ивасз д̣̇ивасз сийлаани ааваж̇ж̇знд̇аа жад̇ураарагкам̣ ахаабзнд̇аа манасигаараб̣ахулаа вихарат̇аа’’д̇и. д̣̇анд̇агадтакаад̣̇анавад̇д̇ам̣ аажигкид̇аб̣б̣ам̣, жзд̇ияам̣ ваа б̣од̇хим̣ ваа ванд̣̇анд̇зна г̇анд̇хамаалам̣ ваа бууж̇знд̇зна бад̇д̇ам̣ ваа т̇авигааяа багкибанд̇зна на гат̇зд̇аб̣б̣ам̣, бхигкаажааравад̇д̇ам̣ аажигкид̇аб̣б̣ам̣ – ‘‘анд̇ог̇аамз мануссзхи сад̣̇д̇хим̣ бажжаяасан̃н̃уд̇д̇агат̇аа ваа висабхааг̇агат̇аа ваа на гат̇зд̇аб̣б̣аа, рагкид̇инд̣̇риязхи бхавид̇аб̣б̣ам̣, канд̇хагавад̇д̇ан̃жа сзкияавад̇д̇ан̃жа буурзд̇аб̣б̣а’’нд̇и зваруубаа б̣ахугааби нияяаанигагат̇аа аажигкид̇аб̣б̣аад̇и.
Apica bhikkhū ovaditabbā – ‘‘viggāhikapisuṇapharusavacanāni mā vadatha, divase divase sīlāni āvajjentā caturārakkhaṃ ahāpentā manasikārabahulā viharathā’’ti. Dantakaṭṭhakhādanavattaṃ ācikkhitabbaṃ, cetiyaṃ vā bodhiṃ vā vandantena gandhamālaṃ vā pūjentena pattaṃ vā thavikāya pakkhipantena na kathetabbaṃ, bhikkhācāravattaṃ ācikkhitabbaṃ – ‘‘antogāme manussehi saddhiṃ paccayasaññuttakathā vā visabhāgakathā vā na kathetabbā, rakkhitindriyehi bhavitabbaṃ, khandhakavattañca sekhiyavattañca pūretabba’’nti evarūpā bahukāpi niyyānikakathā ācikkhitabbāti.
бажчимавассуубанааяигад̣̇ивасз бана сажз гаалам̣ гхосзд̇ваа саннибад̇ид̇з сан̇гхз гожи д̣̇асахад̇т̇ам̣ вад̇т̇ам̣ аахарид̇ваа вассааваасигам̣ д̣̇зд̇и, ааг̇анд̇уго сажз бхигку сан̇гхад̇т̇зро ход̇и, д̇асса д̣̇аад̇аб̣б̣ам̣. наваго жз ход̇и, саммад̇зна бхигкунаа сан̇гхад̇т̇зро вад̇д̇аб̣б̣о – ‘‘сажз бханд̇з ижчат̇а, батамабхааг̇ам̣ мун̃жид̇ваа ид̣̇ам̣ вад̇т̇ам̣ г̇ан̣хат̇аа’’д̇и, амун̃жанд̇асса на д̣̇аад̇аб̣б̣ам̣. сажз бана буб̣б̣з г̇аахид̇ам̣ мун̃жид̇ваа г̇ан̣хаад̇и, д̣̇аад̇аб̣б̣ам̣. зд̇знзвубааязна д̣̇уд̇ияад̇т̇зрад̇о бадтааяа баривад̇д̇зд̇ваа бад̇д̇адтаанз ааг̇анд̇угасса д̣̇аад̇аб̣б̣ам̣. сажз батамавассуубаг̇ад̇аа д̣̇вз д̇ийн̣и жад̇д̇аари бан̃жа ваа вад̇т̇аани алад̇т̇ум̣, лад̣̇д̇хам̣ лад̣̇д̇хам̣ зд̇знзвубааязна виссаж̇ж̇аабзд̇ваа яаава ааг̇анд̇угасса самагам̣ ход̇и, д̇аава д̣̇аад̇аб̣б̣ам̣. д̇зна бана самагз лад̣̇д̇хз авасидто анубхааг̇о т̇зраасанз д̣̇аад̇аб̣б̣о. бажжуббаннз лаабхз сад̇и тид̇игааяа г̇аахзд̇ум̣ гад̇игам̣ гаад̇ум̣ ваддад̇и.
Pacchimavassūpanāyikadivase pana sace kālaṃ ghosetvā sannipatite saṅghe koci dasahatthaṃ vatthaṃ āharitvā vassāvāsikaṃ deti, āgantuko sace bhikkhu saṅghatthero hoti, tassa dātabbaṃ. Navako ce hoti, sammatena bhikkhunā saṅghatthero vattabbo – ‘‘sace bhante icchatha, paṭhamabhāgaṃ muñcitvā idaṃ vatthaṃ gaṇhathā’’ti, amuñcantassa na dātabbaṃ. Sace pana pubbe gāhitaṃ muñcitvā gaṇhāti, dātabbaṃ. Etenevupāyena dutiyattherato paṭṭhāya parivattetvā pattaṭṭhāne āgantukassa dātabbaṃ. Sace paṭhamavassūpagatā dve tīṇi cattāri pañca vā vatthāni alatthuṃ, laddhaṃ laddhaṃ etenevupāyena vissajjāpetvā yāva āgantukassa samakaṃ hoti, tāva dātabbaṃ. Tena pana samake laddhe avasiṭṭho anubhāgo therāsane dātabbo. Paccuppanne lābhe sati ṭhitikāya gāhetuṃ katikaṃ kātuṃ vaṭṭati.
сажз д̣̇уб̣бхигкам̣ ход̇и, д̣̇вийсуби вассуубанааяигаасу вассуубаг̇ад̇аа бхигкуу бхигкааяа гиламанд̇аа ‘‘аавусо, ид̇ха васанд̇аа саб̣б̣зва гиламаама, саад̇ху вад̇а д̣̇взбхааг̇аа хома, язсам̣ н̃аад̇ибаваарид̇адтаанаани ад̇т̇и, д̇з д̇ад̇т̇а васид̇ваа бавааран̣ааяа ааг̇анд̇ваа ад̇д̇ано бад̇д̇ам̣ вассааваасигам̣ г̇ан̣ханд̇уу’’д̇и вад̣̇анд̇и, д̇зсу яз д̇ад̇т̇а васид̇ваа бавааран̣ааяа ааг̇ажчанд̇и, д̇зсам̣ абалогзд̇ваа вассааваасигам̣ д̣̇аад̇аб̣б̣ам̣. саад̣̇ияанд̇ааби хи д̇з нзва вассааваасигасса саамино, кийяанд̇ааби жа ааваасигаа нзва ад̣̇аад̇ум̣ лабханд̇и. гурунд̣̇ияам̣ бана вуд̇д̇ам̣ – ‘‘гад̇игавад̇д̇ам̣ гаад̇аб̣б̣ам̣ – ‘саб̣б̣зсам̣ но ид̇ха яааг̇убхад̇д̇ам̣ наббаход̇и, сабхааг̇адтаанз васид̇ваа ааг̇ажчат̇а, д̇умхаагам̣ бад̇д̇ам̣ вассааваасигам̣ лабхиссат̇аа’д̇и. д̇ан̃жз зго бадиб̣аахад̇и, субадиб̣аахид̇ам̣; но жз бадиб̣аахад̇и, гад̇игаа сугад̇аа. бажчаа д̇зсам̣ д̇ад̇т̇а васид̇ваа ааг̇ад̇аанам̣ абалогзд̇ваа д̣̇аад̇аб̣б̣ам̣, абалоганагаалз бадиб̣аахид̇ум̣ на лаб̣бхад̇ий’’д̇и. бунаби вуд̇д̇ам̣ – ‘‘сажз вассуубаг̇ад̇зсу згажжаанам̣ вассааваасигз абаабун̣анд̇з бхигкуу гад̇игам̣ гаронд̇и – ‘чиннавассаанам̣ вассааваасиган̃жа ид̣̇аани уббаж̇ж̇анагавассааваасиган̃жа имзсам̣ д̣̇аад̇ум̣ ружжад̇ий’д̇и звам̣ гад̇игааяа гад̇ааяа г̇аахид̇асад̣̇исамзва ход̇и, уббаннуббаннам̣ д̇зсамзва д̣̇аад̇аб̣б̣а’’нд̇и.
Sace dubbhikkhaṃ hoti, dvīsupi vassūpanāyikāsu vassūpagatā bhikkhū bhikkhāya kilamantā ‘‘āvuso, idha vasantā sabbeva kilamāma, sādhu vata dvebhāgā homa, yesaṃ ñātipavāritaṭṭhānāni atthi, te tattha vasitvā pavāraṇāya āgantvā attano pattaṃ vassāvāsikaṃ gaṇhantū’’ti vadanti, tesu ye tattha vasitvā pavāraṇāya āgacchanti, tesaṃ apaloketvā vassāvāsikaṃ dātabbaṃ. Sādiyantāpi hi te neva vassāvāsikassa sāmino, khīyantāpi ca āvāsikā neva adātuṃ labhanti. Kurundiyaṃ pana vuttaṃ – ‘‘katikavattaṃ kātabbaṃ – ‘sabbesaṃ no idha yāgubhattaṃ nappahoti, sabhāgaṭṭhāne vasitvā āgacchatha, tumhākaṃ pattaṃ vassāvāsikaṃ labhissathā’ti. Tañce eko paṭibāhati, supaṭibāhitaṃ; no ce paṭibāhati, katikā sukatā. Pacchā tesaṃ tattha vasitvā āgatānaṃ apaloketvā dātabbaṃ, apalokanakāle paṭibāhituṃ na labbhatī’’ti. Punapi vuttaṃ – ‘‘sace vassūpagatesu ekaccānaṃ vassāvāsike apāpuṇante bhikkhū katikaṃ karonti – ‘chinnavassānaṃ vassāvāsikañca idāni uppajjanakavassāvāsikañca imesaṃ dātuṃ ruccatī’ti evaṃ katikāya katāya gāhitasadisameva hoti, uppannuppannaṃ tesameva dātabba’’nti.
д̇змаасам̣ баанийяам̣ убадтаабзд̇ваа вихаарамаг̇г̇ажзд̇ияан̇г̇ан̣аб̣од̇хияан̇г̇ан̣аани ж̇аг̇г̇ид̇ваа б̣од̇хиругкз уд̣̇агам̣ син̃жид̇ваа багганд̇оби виб̣бханд̇оби вассааваасигам̣ лабхад̇иязва. бхад̇инивидтан̃хи д̇зна гад̇ам̣. сан̇гхигам̣ бана абалоганагаммам̣ гад̇ваа г̇аахид̇ам̣ анд̇овассз виб̣бханд̇оби лабхад̇зва. бажжаяавасзна г̇аахид̇ам̣ бана на лабхад̇ийд̇и вад̣̇анд̇и.
Temāsaṃ pānīyaṃ upaṭṭhāpetvā vihāramaggacetiyaṅgaṇabodhiyaṅgaṇāni jaggitvā bodhirukkhe udakaṃ siñcitvā pakkantopi vibbhantopi vassāvāsikaṃ labhatiyeva. Bhatiniviṭṭhañhi tena kataṃ. Saṅghikaṃ pana apalokanakammaṃ katvā gāhitaṃ antovasse vibbhantopi labhateva. Paccayavasena gāhitaṃ pana na labhatīti vadanti.
сажз вуд̇т̇авассо д̣̇исам̣г̇амиго бхигку ааваасигасса хад̇т̇ад̇о гин̃жид̣̇зва габбияабхан̣д̣ам̣ г̇ахзд̇ваа ‘‘асугагулз маяхам̣ вассааваасигам̣ бад̇д̇ам̣, д̇ам̣ г̇ан̣хат̇аа’’д̇и вад̇ваа г̇ад̇адтаанз виб̣бхамад̇и, вассааваасигам̣ сан̇гхигам̣ ход̇и. сажз бана мануссз саммукаа самбадижчаабзд̇ваа г̇ажчад̇и, лабхад̇и. ‘‘ид̣̇ам̣ вассааваасигам̣ амхаагам̣ сзнаасанз вуд̇т̇абхигкуно д̣̇змаа’’д̇и вуд̇д̇з, яасса г̇аахид̇ам̣ д̇ассзва ход̇и. сажз бана сзнаасанасаамигасса бияагамяад̇ааяа буд̇д̇ад̇хийд̇аад̣̇аяо б̣ахууни вад̇т̇аани аахарид̇ваа ‘‘амхаагам̣ сзнаасанз д̣̇змаа’’д̇и д̣̇знд̇и, д̇ад̇т̇а вассуубаг̇ад̇асса згамзва вад̇т̇ам̣ д̣̇аад̇аб̣б̣ам̣, сзсаани сан̇гхигаани хонд̇и, вассааваасигадтид̇игааяа г̇аахзд̇аб̣б̣аани. тид̇игааяа асад̇и т̇зраасанад̇о бадтааяа г̇аахзд̇аб̣б̣аани. сзнаасанз вассуубаг̇ад̇ам̣ бхигкум̣ ниссааяа уббаннзна жид̇д̇аббасаад̣̇зна б̣ахууни вад̇т̇аани аахарид̇ваа ‘‘сзнаасанасса д̣̇змаа’’д̇и д̣̇иннзсуби зсзва наяо. сажз бана баад̣̇амуулз табзд̇ваа ‘‘зд̇асса бхигкуно д̣̇змаа’’д̇и вад̣̇анд̇и, д̇ассзва хонд̇и.
Sace vutthavasso disaṃgamiko bhikkhu āvāsikassa hatthato kiñcideva kappiyabhaṇḍaṃ gahetvā ‘‘asukakule mayhaṃ vassāvāsikaṃ pattaṃ, taṃ gaṇhathā’’ti vatvā gataṭṭhāne vibbhamati, vassāvāsikaṃ saṅghikaṃ hoti. Sace pana manusse sammukhā sampaṭicchāpetvā gacchati, labhati. ‘‘Idaṃ vassāvāsikaṃ amhākaṃ senāsane vutthabhikkhuno demā’’ti vutte, yassa gāhitaṃ tasseva hoti. Sace pana senāsanasāmikassa piyakamyatāya puttadhītādayo bahūni vatthāni āharitvā ‘‘amhākaṃ senāsane demā’’ti denti, tattha vassūpagatassa ekameva vatthaṃ dātabbaṃ, sesāni saṅghikāni honti, vassāvāsikaṭṭhitikāya gāhetabbāni. Ṭhitikāya asati therāsanato paṭṭhāya gāhetabbāni. Senāsane vassūpagataṃ bhikkhuṃ nissāya uppannena cittappasādena bahūni vatthāni āharitvā ‘‘senāsanassa demā’’ti dinnesupi eseva nayo. Sace pana pādamūle ṭhapetvā ‘‘etassa bhikkhuno demā’’ti vadanti, tasseva honti.
згасса г̇зхз д̣̇вз вассааваасигаани – батамабхааг̇о сааман̣зрасса г̇аахид̇о ход̇и, д̣̇уд̇ияо т̇зраасанз. со згам̣ д̣̇асахад̇т̇ам̣, згам̣ адтахад̇т̇ам̣ саадагам̣ бзсзд̇и ‘‘вассааваасигам̣ бад̇д̇абхигкуунам̣ д̣̇зт̇аа’’д̇и вижинид̇ваа варабхааг̇ам̣ сааман̣зрасса д̣̇ад̇ваа анубхааг̇о т̇зраасанз д̣̇аад̇аб̣б̣о. сажз бана убхоби гхарам̣ нзд̇ваа бхож̇зд̇ваа саяамзва баад̣̇амуулз табзд̇и, яам̣ яасса д̣̇иннам̣, д̇ад̣̇зва д̇асса ход̇и.
Ekassa gehe dve vassāvāsikāni – paṭhamabhāgo sāmaṇerassa gāhito hoti, dutiyo therāsane. So ekaṃ dasahatthaṃ, ekaṃ aṭṭhahatthaṃ sāṭakaṃ peseti ‘‘vassāvāsikaṃ pattabhikkhūnaṃ dethā’’ti vicinitvā varabhāgaṃ sāmaṇerassa datvā anubhāgo therāsane dātabbo. Sace pana ubhopi gharaṃ netvā bhojetvā sayameva pādamūle ṭhapeti, yaṃ yassa dinnaṃ, tadeva tassa hoti.
ид̇о барам̣ махаабажжарияам̣ ааг̇ад̇анаяо ход̇и – ‘‘згасса гхарз д̣̇ахарасааман̣зрасса вассааваасигам̣ баабун̣аад̇и, со жз бужчад̇и – ‘амхаагам̣ вассааваасигам̣ гасса бад̇д̇а’нд̇и, ‘сааман̣зрассаа’д̇и авад̇ваа ‘д̣̇аанагаалз ж̇ааниссасий’д̇и вад̇ваа д̣̇аанад̣̇ивасз згам̣ махаат̇зрам̣ бзсзд̇ваа нийхараабзд̇аб̣б̣ам̣. сажз яасса вассааваасигам̣ бад̇д̇ам̣, со виб̣бхамад̇и ваа гаалам̣ ваа гарод̇и, мануссаа жз бужчанд̇и – ‘гасса амхаагам̣ вассааваасигам̣ бад̇д̇а’нд̇и, д̇зсам̣ яат̇аабхууд̇ам̣ аажигкид̇аб̣б̣ам̣. сажз д̇з вад̣̇анд̇и – ‘д̇умхаагам̣ д̣̇змаа’д̇и, д̇асса бхигкуно баабун̣аад̇и. ат̇а сан̇гхасса ваа г̇ан̣асса ваа д̣̇знд̇и, сан̇гхасса ваа г̇ан̣асса ваа баабун̣аад̇и. сажз вассуубаг̇ад̇аа суд̣̇д̇хабам̣сугуулигааязва хонд̇и, аанзд̇ваа д̣̇иннам̣ вассааваасигам̣ сзнаасанабаригкаарам̣ ваа гад̇ваа табзд̇аб̣б̣ам̣, б̣имб̣оханаад̣̇ийни ваа гаад̇аб̣б̣ааний’’д̇и. ид̣̇ам̣ нзваасигавад̇д̇ам̣.
Ito paraṃ mahāpaccariyaṃ āgatanayo hoti – ‘‘ekassa ghare daharasāmaṇerassa vassāvāsikaṃ pāpuṇāti, so ce pucchati – ‘amhākaṃ vassāvāsikaṃ kassa patta’nti, ‘sāmaṇerassā’ti avatvā ‘dānakāle jānissasī’ti vatvā dānadivase ekaṃ mahātheraṃ pesetvā nīharāpetabbaṃ. Sace yassa vassāvāsikaṃ pattaṃ, so vibbhamati vā kālaṃ vā karoti, manussā ce pucchanti – ‘kassa amhākaṃ vassāvāsikaṃ patta’nti, tesaṃ yathābhūtaṃ ācikkhitabbaṃ. Sace te vadanti – ‘tumhākaṃ demā’ti, tassa bhikkhuno pāpuṇāti. Atha saṅghassa vā gaṇassa vā denti, saṅghassa vā gaṇassa vā pāpuṇāti. Sace vassūpagatā suddhapaṃsukūlikāyeva honti, ānetvā dinnaṃ vassāvāsikaṃ senāsanaparikkhāraṃ vā katvā ṭhapetabbaṃ, bimbohanādīni vā kātabbānī’’ti. Idaṃ nevāsikavattaṃ.
сзнаасанаг̇г̇аахагат̇аа нидтид̇аа.
Senāsanaggāhakathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / сзнаасанаг̇г̇аахаабагасаммуд̇и • Senāsanaggāhāpakasammuti
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / сзнаасанаг̇г̇аахаабагасаммуд̇игат̇ааван̣н̣анаа • Senāsanaggāhāpakasammutikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / сзнаасанаг̇г̇аахагат̇ааван̣н̣анаа • Senāsanaggāhakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / сзнаасанаг̇г̇аахагат̇ааван̣н̣анаа • Senāsanaggāhakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / сзнаасанаг̇г̇аахагат̇аа • Senāsanaggāhakathā
