| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸேனாஸனக்³கா³ஹகதா²வண்ணனா
Senāsanaggāhakathāvaṇṇanā
318. ‘‘ச²மாஸச்சயேன ச²மாஸச்சயேனா’’தி இத³ங் த்³விக்க²த்துங் பச்சயதா³னகாலபரிச்சே²த³த³ஸ்ஸனங், ஏவங் உபரிபி. ‘‘தங் ந கா³ஹேதப்³ப³’’ந்தி வசனஸ்ஸ காரணமாஹ ‘‘பச்சயேனேவ ஹி த’’ந்திஆதி³னா, பச்சயஞ்ஞேவ நிஸ்ஸாய தத்த² வஸித்வா படிஜக்³க³னா ப⁴விஸ்ஸந்தீதி அதி⁴ப்பாயோ.
318.‘‘Chamāsaccayena chamāsaccayenā’’ti idaṃ dvikkhattuṃ paccayadānakālaparicchedadassanaṃ, evaṃ uparipi. ‘‘Taṃ na gāhetabba’’nti vacanassa kāraṇamāha ‘‘paccayeneva hi ta’’ntiādinā, paccayaññeva nissāya tattha vasitvā paṭijagganā bhavissantīti adhippāyo.
உப்³ப⁴ண்டி³காதி உக்கி²த்தப⁴ண்டா³ ப⁴விஸ்ஸந்தி. தீ³க⁴ஸாலாதி சங்கமனஸாலா. மண்ட³லமாளோதி உபட்டா²னஸாலா. அனுத³ஹதீதி பீளேதி. ‘‘அதா³துங் ந லப்³ப⁴தீ’’தி இமினா ஸஞ்சிச்ச அத³த³ந்தஸ்ஸ படிபா³ஹனே பவிஸனதோ து³க்கடந்தி தீ³பேதி.
Ubbhaṇḍikāti ukkhittabhaṇḍā bhavissanti. Dīghasālāti caṅkamanasālā. Maṇḍalamāḷoti upaṭṭhānasālā. Anudahatīti pīḷeti. ‘‘Adātuṃ na labbhatī’’ti iminā sañcicca adadantassa paṭibāhane pavisanato dukkaṭanti dīpeti.
‘‘ந கோ³சரகா³மோ க⁴ட்டேதப்³போ³’’தி வுத்தமேவத்த²ங் விபா⁴வேதுங் ‘‘ந தத்த² மனுஸ்ஸா வத்தப்³பா³’’திஆதி³ வுத்தங். விதக்கங் சி²ந்தி³த்வாதி ‘‘இமினா நீஹாரேன க³ச்ச²ந்தங் தி³ஸ்வா நிவாரெத்வா பச்சயே த³ஸ்ஸந்தீ’’தி ஏவரூபங் விதக்கங் அனுப்பாதெ³த்வா. ப⁴ண்ட³ப்படிச்சா²த³னந்தி படிச்சா²த³னப⁴ண்ட³ங். ஸரீரப்படிச்சா²த³னசீவரந்தி அத்தோ². ‘‘ஸுத்³த⁴சித்தத்தாவ அனவஜ்ஜ’’ந்தி இத³ங் புச்சி²தக்க²ணே காரணாசிக்க²னங் ஸந்தா⁴ய வுத்தங் ந ஹோதி அஸுத்³த⁴சித்தஸ்ஸபி புச்சி²தபஞ்ஹவிஸஜ்ஜனே தோ³ஸாபா⁴வா. ஏவங் பன க³தே மங் புச்சி²ஸ்ஸந்தீதிஸஞ்ஞாய அக³மனங் ஸந்தா⁴ய வுத்தந்தி த³ட்ட²ப்³ப³ங்.
‘‘Na gocaragāmo ghaṭṭetabbo’’ti vuttamevatthaṃ vibhāvetuṃ ‘‘na tattha manussā vattabbā’’tiādi vuttaṃ. Vitakkaṃ chinditvāti ‘‘iminā nīhārena gacchantaṃ disvā nivāretvā paccaye dassantī’’ti evarūpaṃ vitakkaṃ anuppādetvā. Bhaṇḍappaṭicchādananti paṭicchādanabhaṇḍaṃ. Sarīrappaṭicchādanacīvaranti attho. ‘‘Suddhacittattāva anavajja’’nti idaṃ pucchitakkhaṇe kāraṇācikkhanaṃ sandhāya vuttaṃ na hoti asuddhacittassapi pucchitapañhavisajjane dosābhāvā. Evaṃ pana gate maṃ pucchissantītisaññāya agamanaṃ sandhāya vuttanti daṭṭhabbaṃ.
படிஜக்³கி³தப்³பா³னீதி க²ண்ட³பு²ல்லபடிஸங்க²ரணஸம்மஜ்ஜனாதீ³ஹி படிஜக்³கி³தப்³பா³னி. முத்³த³வேதி³காயாதி சேதியஸ்ஸ ஹம்மியவேதி³காய க⁴டாகாரஸ்ஸ உபரி சதுரஸ்ஸவேதி³காய. கஸ்மா புச்சி²தப்³ப³ந்திஆதி³ யதோ பகதியா லப⁴தி. தத்தா²பி புச்ச²னஸ்ஸ காரணஸந்த³ஸ்ஸனத்த²ங் வுத்தங்.
Paṭijaggitabbānīti khaṇḍaphullapaṭisaṅkharaṇasammajjanādīhi paṭijaggitabbāni. Muddavedikāyāti cetiyassa hammiyavedikāya ghaṭākārassa upari caturassavedikāya. Kasmā pucchitabbantiādi yato pakatiyā labhati. Tatthāpi pucchanassa kāraṇasandassanatthaṃ vuttaṃ.
படிக்கம்மாதி விஹாரதோ அபஸக்கித்வா. தமத்த²ங் த³ஸ்ஸெந்தோ ‘‘யோஜனத்³வியோஜனந்தரே ஹோதீ’’தி ஆஹ. உபனிக்கே²பங் ட²பெத்வாதி வட்³டி⁴யா கஹாபணாதி³ங் ட²பெத்வா, கெ²த்தாதீ³னி வா நியமெத்வா. இதி ஸத்³தா⁴தெ³ய்யேதி ஏவங் ஹெட்டா² வுத்தனயேன ஸத்³தா⁴ய தா³தப்³பே³ வஸ்ஸாவாஸிகலாப⁴விஸயேதி அத்தோ².
Paṭikkammāti vihārato apasakkitvā. Tamatthaṃ dassento ‘‘yojanadviyojanantare hotī’’ti āha. Upanikkhepaṃ ṭhapetvāti vaḍḍhiyā kahāpaṇādiṃ ṭhapetvā, khettādīni vā niyametvā. Iti saddhādeyyeti evaṃ heṭṭhā vuttanayena saddhāya dātabbe vassāvāsikalābhavisayeti attho.
வத்து² பனாதி தத்ருப்பாதே³ உப்பன்னரூபியங், தஞ்ச ‘‘ததோ சதுபச்சயங் பரிபு⁴ஞ்ஜதா²’’தி தி³ன்னகெ²த்தாதி³தோ உப்பன்னத்தா கப்பியகாரகானங் ஹத்தே² ‘‘கப்பியப⁴ண்ட³ங் பரிபு⁴ஞ்ஜதா²’’தி தா³யகேஹி தி³ன்னவத்து²ஸதி³ஸங் ஹோதீதி ஆஹ ‘‘கப்பியகாரகானங் ஹீ’’திஆதி³.
Vatthu panāti tatruppāde uppannarūpiyaṃ, tañca ‘‘tato catupaccayaṃ paribhuñjathā’’ti dinnakhettādito uppannattā kappiyakārakānaṃ hatthe ‘‘kappiyabhaṇḍaṃ paribhuñjathā’’ti dāyakehi dinnavatthusadisaṃ hotīti āha ‘‘kappiyakārakānaṃ hī’’tiādi.
ஸங்க⁴ஸுட்டு²தாயாதி ஸங்க⁴ஸ்ஸ ஹிதாய. புக்³க³லவஸேனாதி ‘‘பி⁴க்கூ² சீவரேன கிலமந்தீ’’தி ஏவங் புக்³க³லபராமாஸவஸேன, ந ‘‘ஸங்கோ⁴ கிலமதீ’’தி ஏவங் ஸங்க⁴பராமாஸவஸேன.
Saṅghasuṭṭhutāyāti saṅghassa hitāya. Puggalavasenāti ‘‘bhikkhū cīvarena kilamantī’’ti evaṃ puggalaparāmāsavasena, na ‘‘saṅgho kilamatī’’ti evaṃ saṅghaparāmāsavasena.
‘‘கப்பியப⁴ண்ட³வஸேனா’’தி ஸாமஞ்ஞதோ வுத்தமேவத்த²ங் விபா⁴வேதுங் ‘‘சீவரதண்டு³லாதி³வஸேனேவ சா’’தி வுத்தங். ச-காரோ செத்த² பன-ஸத்³த³த்தே² வத்ததி, ந ஸமுச்சயத்தே²தி த³ட்ட²ப்³ப³ங். புக்³க³லவஸேனேவ, கப்பியப⁴ண்ட³வஸேன ச அபலோகனப்பகாரங் த³ஸ்ஸேதுங் ‘‘தங் பன ஏவங் கத்தப்³ப³’’ந்திஆதி³ வுத்தங்.
‘‘Kappiyabhaṇḍavasenā’’ti sāmaññato vuttamevatthaṃ vibhāvetuṃ ‘‘cīvarataṇḍulādivaseneva cā’’ti vuttaṃ. Ca-kāro cettha pana-saddatthe vattati, na samuccayattheti daṭṭhabbaṃ. Puggalavaseneva, kappiyabhaṇḍavasena ca apalokanappakāraṃ dassetuṃ ‘‘taṃ pana evaṃ kattabba’’ntiādi vuttaṃ.
சீவரபச்சயங் ஸல்லக்கெ²த்வாதி ஸத்³தா⁴தெ³ய்யதத்ருப்பாதா³தி³வஸேன தஸ்மிங் வஸ்ஸாவாஸே லப்³ப⁴மானங் சீவரஸங்கா²தங் பச்சயங் ‘‘எத்தக’’ந்தி பரிச்சி²ந்தி³த்வா. ஸேனாஸனஸ்ஸாதி ஸேனாஸனக்³கா³ஹாபனஸ்ஸ. ‘‘நவகோ வுட்³ட⁴தரஸ்ஸ, வுட்³டோ⁴ ச நவகஸ்ஸா’’தி இத³ங் ஸேனாஸனக்³கா³ஹஸ்ஸ அத்தனாவ அத்தனோ க³ஹணங் அஸாருப்பந்தி வுத்தங், த்³வே அஞ்ஞமஞ்ஞங் கா³ஹெஸ்ஸந்தீதி அதி⁴ப்பாயோ. அட்ட²பி ஸோளஸபி ஜனே ஸம்மன்னிதுங் வட்டதீதி ஏககம்மவாசாய ஸப்³பே³பி ஏகதோ ஸம்மன்னிதுங் வட்டதி. நிக்³க³ஹகம்மமேவ ஹி ஸங்கோ⁴ ஸங்க⁴ஸ்ஸ ந கரோதி. தேனேவ ஸத்தஸதிகக்க²ந்த⁴கே ‘‘உப்³பா³ஹிககம்மஸம்முதியங் அட்ட²பி ஜனா ஏகதோவ ஸம்மதாதி.
Cīvarapaccayaṃ sallakkhetvāti saddhādeyyatatruppādādivasena tasmiṃ vassāvāse labbhamānaṃ cīvarasaṅkhātaṃ paccayaṃ ‘‘ettaka’’nti paricchinditvā. Senāsanassāti senāsanaggāhāpanassa. ‘‘Navako vuḍḍhatarassa, vuḍḍho canavakassā’’ti idaṃ senāsanaggāhassa attanāva attano gahaṇaṃ asāruppanti vuttaṃ, dve aññamaññaṃ gāhessantīti adhippāyo. Aṭṭhapi soḷasapi jane sammannituṃ vaṭṭatīti ekakammavācāya sabbepi ekato sammannituṃ vaṭṭati. Niggahakammameva hi saṅgho saṅghassa na karoti. Teneva sattasatikakkhandhake ‘‘ubbāhikakammasammutiyaṃ aṭṭhapi janā ekatova sammatāti.
ஆஸனக⁴ரந்தி படிமாக⁴ரங். மக்³கோ³தி உபசாரஸீமப்³ப⁴ந்தரக³தே கா³மாபி⁴முக²மக்³கே³ கதஸாலா வுச்சதி. ஏவங் பொக்க²ரணீருக்க²மூலாதீ³ஸுபி.
Āsanagharanti paṭimāgharaṃ. Maggoti upacārasīmabbhantaragate gāmābhimukhamagge katasālā vuccati. Evaṃ pokkharaṇīrukkhamūlādīsupi.
லப⁴ந்தீதி தத்ரவாஸினோ பி⁴க்கூ² லப⁴ந்தி. விஜடெத்வாதி ‘‘ஏகேகஸ்ஸ பஹோனகப்பமாணேன வியோஜெத்வா. ஆவாஸேஸு பக்கி²பித்வாதி ‘‘இதோ உப்பன்னங் அஸுகஸ்மிங் அஸுகஸ்மிஞ்ச ஆவாஸே வஸந்தா பாபெத்வா க³ண்ஹந்தூ’’தி வாசாய உபஸங்ஹரித்வா. பவிஸிதப்³ப³ந்தி மஹாலாபே⁴ பரிவேணே வஸித்வாவ லாபோ⁴ க³ஹேதப்³போ³தி அதி⁴ப்பாயோ.
Labhantīti tatravāsino bhikkhū labhanti. Vijaṭetvāti ‘‘ekekassa pahonakappamāṇena viyojetvā. Āvāsesu pakkhipitvāti ‘‘ito uppannaṃ asukasmiṃ asukasmiñca āvāse vasantā pāpetvā gaṇhantū’’ti vācāya upasaṃharitvā. Pavisitabbanti mahālābhe pariveṇe vasitvāva lābho gahetabboti adhippāyo.
அயம்பீதி எத்த² யோ பங்ஸுகூலிகோ பச்சயங் விஸ்ஸஜ்ஜேதி. தேனேவ விஸ்ஸட்டோ² அயங் சீவரபச்சயோபீதி யோஜனா. பாத³மூலே ட²பெத்வா ஸாடகங் தெ³ந்தீதி பச்சயதா³யகா தெ³ந்தி. ஏதேன க³ஹட்டே²ஹி பாத³மூலே ட²பெத்வா தி³ன்னம்பி பங்ஸுகூலிகானம்பி வட்டதீதி த³ஸ்ஸேதி. அத² வஸ்ஸாவாஸிகங் தே³மாதி வத³ந்தீதி எத்த² பங்ஸுகூலிகானங் ந வட்டதீதி அஜ்ஜா²ஹரித்வா யோஜேதப்³ப³ங். வஸ்ஸங்வுத்த²பி⁴க்கூ²னந்தி பங்ஸுகூலிகதோ அஞ்ஞேஸங் பி⁴க்கூ²னங்.
Ayampīti ettha yo paṃsukūliko paccayaṃ vissajjeti. Teneva vissaṭṭho ayaṃ cīvarapaccayopīti yojanā. Pādamūle ṭhapetvā sāṭakaṃ dentīti paccayadāyakā denti. Etena gahaṭṭhehi pādamūle ṭhapetvā dinnampi paṃsukūlikānampi vaṭṭatīti dasseti. Atha vassāvāsikaṃ demāti vadantīti ettha paṃsukūlikānaṃ na vaṭṭatīti ajjhāharitvā yojetabbaṃ. Vassaṃvutthabhikkhūnanti paṃsukūlikato aññesaṃ bhikkhūnaṃ.
உபனிப³ந்தி⁴த்வா கா³ஹாபேதப்³ப³ந்தி இத⁴ ருக்கா²தீ³ஸு வஸித்வா சீவரங் க³ண்ஹதா²தி படிப³ந்த⁴ங் கத்வா கா³ஹேதப்³ப³ங்.
Upanibandhitvā gāhāpetabbanti idha rukkhādīsu vasitvā cīvaraṃ gaṇhathāti paṭibandhaṃ katvā gāhetabbaṃ.
பாடிபத³அருணதோதிஆதி³ வஸ்ஸூபனாயிகதி³வஸங் ஸந்தா⁴ய வுத்தங். அந்தராமுத்தகங் பன பாடிபத³ங் அதிக்கமித்வாபி கா³ஹேதுங் வட்டதி. நிப³த்³த⁴வத்தங் ட²பெத்வாதி ஸஜ்ஜா²யமனஸிகாராதீ³ஸு நிரந்தரகரணீயேஸு கத்தப்³ப³ங் கதிகவத்தங் கத்வா. கஸாவபரிப⁴ண்ட³ந்தி கஸாவரஸேஹி பூ⁴மிபரிகம்மங்.
Pāṭipadaaruṇatotiādi vassūpanāyikadivasaṃ sandhāya vuttaṃ. Antarāmuttakaṃ pana pāṭipadaṃ atikkamitvāpi gāhetuṃ vaṭṭati. Nibaddhavattaṃ ṭhapetvāti sajjhāyamanasikārādīsu nirantarakaraṇīyesu kattabbaṃ katikavattaṃ katvā. Kasāvaparibhaṇḍanti kasāvarasehi bhūmiparikammaṃ.
திவித⁴ம்பீதி பரியத்திபடிபத்திபடிவேத⁴வஸேன திவித⁴ம்பி. ஸோதெ⁴த்வாதி ஆசாராதீ³ஸு உபபரிக்கி²த்வா. ஏகசாரிகவத்தந்தி பா⁴வனாகம்மங். தஞ்ஹி க³ணஸங்க³ணிகங் பஹாய ஏகசாரிகேனேவ வத்திதப்³ப³த்தா ஏவங் வுத்தங். த³ஸவத்து²ககதா² நாம அப்பிச்ச²கதா², ஸந்துட்டி², பவிவேக, அஸங்ஸக்³க³, வீரியாரம்ப⁴, ஸீல, ஸமாதி⁴, பஞ்ஞா, விமுத்தி, விமுத்திஞாணத³ஸ்ஸனகதா²தி இமா த³ஸ.
Tividhampīti pariyattipaṭipattipaṭivedhavasena tividhampi. Sodhetvāti ācārādīsu upaparikkhitvā. Ekacārikavattanti bhāvanākammaṃ. Tañhi gaṇasaṅgaṇikaṃ pahāya ekacārikeneva vattitabbattā evaṃ vuttaṃ. Dasavatthukakathā nāma appicchakathā, santuṭṭhi, paviveka, asaṃsagga, vīriyārambha, sīla, samādhi, paññā, vimutti, vimuttiñāṇadassanakathāti imā dasa.
த³ந்தகட்ட²கா²த³னவத்தந்தி த³ந்தகட்ட²மாளகே நிக்கி²த்தேஸு த³ந்தகட்டே²ஸு ‘‘தி³வஸே தி³வஸே ஏகமேவ த³ந்தகட்ட²ங் க³ஹேதப்³ப³’’ந்திஆதி³னா (பாரா॰ அட்ட²॰ 1.109) அதி³ன்னாதா³னே த³ந்தபோனகதா²யங் வுத்தங் வத்தங். பத்தங் வா…பே॰… ந கதே²தப்³ப³ந்தி பத்தகு³த்தத்தா²ய வுத்தங். விஸபா⁴க³கதா²தி திரச்சா²னகதா². க²ந்த⁴கவத்தந்தி வத்தக்க²ந்த⁴கே (சூளவ॰ 365) ஆக³தங் பிண்ட³சாரிகவத்ததோ அவஸிட்ட²வத்தங் தஸ்ஸ ‘‘பி⁴க்கா²சாரவத்த’’ந்தி விஸுங் க³ஹிதத்தா.
Dantakaṭṭhakhādanavattanti dantakaṭṭhamāḷake nikkhittesu dantakaṭṭhesu ‘‘divase divase ekameva dantakaṭṭhaṃ gahetabba’’ntiādinā (pārā. aṭṭha. 1.109) adinnādāne dantaponakathāyaṃ vuttaṃ vattaṃ. Pattaṃ vā…pe… na kathetabbanti pattaguttatthāya vuttaṃ. Visabhāgakathāti tiracchānakathā. Khandhakavattanti vattakkhandhake (cūḷava. 365) āgataṃ piṇḍacārikavattato avasiṭṭhavattaṃ tassa ‘‘bhikkhācāravatta’’nti visuṃ gahitattā.
இதா³னி யங் தா³யகா பச்சி²மவஸ்ஸங்வுத்தா²னங் வஸ்ஸாவாஸிகங் தெ³ந்தி, தத்த² படிபஜ்ஜனவிதி⁴ங் த³ஸ்ஸேதுங் ‘‘பச்சி²மவஸ்ஸூபனாயிகதி³வஸே பனா’’தி ஆரத்³த⁴ங். ஆக³ந்துகோ ஸசே பி⁴க்கூ²தி சீவரே கா³ஹிதே பச்சா² ஆக³தோ ஆக³ந்துகோ பி⁴க்கு². பத்தட்டா²னேதி வஸ்ஸக்³கே³ன பத்தட்டா²னே. பட²மவஸ்ஸூபக³தாதி ஆக³ந்துகஸ்ஸ ஆக³மனதோ புரேதரமேவ பச்சி²மிகாய வஸ்ஸூபனாயிகாய வஸ்ஸூபக³தா. லத்³த⁴ங் லத்³த⁴ந்தி புனப்புனங் தா³யகானங் ஸந்திகா ஆக³தாக³தஸாடகங்.
Idāni yaṃ dāyakā pacchimavassaṃvutthānaṃ vassāvāsikaṃ denti, tattha paṭipajjanavidhiṃ dassetuṃ ‘‘pacchimavassūpanāyikadivase panā’’ti āraddhaṃ. Āgantuko sace bhikkhūti cīvare gāhite pacchā āgato āgantuko bhikkhu. Pattaṭṭhāneti vassaggena pattaṭṭhāne. Paṭhamavassūpagatāti āgantukassa āgamanato puretarameva pacchimikāya vassūpanāyikāya vassūpagatā. Laddhaṃ laddhanti punappunaṃ dāyakānaṃ santikā āgatāgatasāṭakaṃ.
நேவ வஸ்ஸாவாஸிகஸ்ஸ ஸாமினோதி சி²ன்னவஸ்ஸத்தா வுத்தங். பட²மமேவ கதிகாய கதத்தா ‘‘நேவ அதா³துங் லப⁴ந்தீ’’தி வுத்தங், தா³தப்³ப³ங் வாரெந்தானங் கீ³வா ஹோதீதி அதி⁴ப்பாயோ. தேஸமேவ தா³தப்³ப³ந்தி வஸ்ஸூபக³தேஸு அலத்³த⁴வஸ்ஸாவாஸிகானங் ஏகச்சானமேவ தா³தப்³ப³ங்.
Neva vassāvāsikassa sāminoti chinnavassattā vuttaṃ. Paṭhamameva katikāya katattā ‘‘neva adātuṃ labhantī’’ti vuttaṃ, dātabbaṃ vārentānaṃ gīvā hotīti adhippāyo. Tesameva dātabbanti vassūpagatesu aladdhavassāvāsikānaṃ ekaccānameva dātabbaṃ.
ப⁴தினிவிட்ட²ந்தி பானீயுபட்டா²னாதி³ப⁴திங் கத்வா லத்³த⁴ங். ஸங்கி⁴கங் பனாதிஆதி³ கேஸஞ்சி வாத³த³ஸ்ஸனங். தத்த² அபலோகனகம்மங் கத்வா கா³ஹிதந்தி ‘‘சி²ன்னவஸ்ஸானங் வஸ்ஸாவாஸிகஞ்ச இதா³னி உப்பஜ்ஜனகவஸ்ஸாவாஸிகஞ்ச இமேஸங் தா³துங் ருச்சதீ’’தி அனந்தரே வுத்தனயேன அபலோகனங் கத்வா கா³ஹிதங் ஸங்கே⁴ன தி³ன்னத்தா விப்³ப⁴ந்தோபி லப⁴தி. பகே³வ சி²ன்னவஸ்ஸோ. பச்சயவஸேன கா³ஹிதங் பன தேமாஸங் வஸித்வா க³ஹேதுங் அத்தனா, தா³யகேஹி ச அனுமதத்தா ப⁴தினிவிட்ட²ம்பி சி²ன்னவஸ்ஸோபி விப்³ப⁴ந்தோபி ந லப⁴தீதி கேசி ஆசரியா வத³ந்தி. இத³ஞ்ச பச்சா² வுத்தத்தா பமாணங். தேனேவ வஸ்ஸூபனாயிகதி³வஸே ஏவ தா³யகேஹி தி³ன்னவஸ்ஸாவாஸிகங் க³ஹிதபி⁴க்கு²னோ வஸ்ஸச்சே²த³ங் அகத்வா வாஸோவ ஹெட்டா² விஹிதோ, ந பானீயுபட்டா²னாதி³ப⁴திகரணவத்தங். யதி³ ஹி தங் நிவிட்ட²மேவ ஸியா, ப⁴திகரணமேவ விதா⁴தப்³ப³ங். தஸ்மா வஸ்ஸக்³கே³ன கா³ஹிதங் சி²ன்னவஸ்ஸாத³யோ ந லப⁴ந்தீதி வேதி³தப்³ப³ங்.
Bhatiniviṭṭhanti pānīyupaṭṭhānādibhatiṃ katvā laddhaṃ. Saṅghikaṃ panātiādi kesañci vādadassanaṃ. Tattha apalokanakammaṃ katvā gāhitanti ‘‘chinnavassānaṃ vassāvāsikañca idāni uppajjanakavassāvāsikañca imesaṃ dātuṃ ruccatī’’ti anantare vuttanayena apalokanaṃ katvā gāhitaṃ saṅghena dinnattā vibbhantopi labhati. Pageva chinnavasso. Paccayavasena gāhitaṃ pana temāsaṃ vasitvā gahetuṃ attanā, dāyakehi ca anumatattā bhatiniviṭṭhampi chinnavassopi vibbhantopi na labhatīti keci ācariyā vadanti. Idañca pacchā vuttattā pamāṇaṃ. Teneva vassūpanāyikadivase eva dāyakehi dinnavassāvāsikaṃ gahitabhikkhuno vassacchedaṃ akatvā vāsova heṭṭhā vihito, na pānīyupaṭṭhānādibhatikaraṇavattaṃ. Yadi hi taṃ niviṭṭhameva siyā, bhatikaraṇameva vidhātabbaṃ. Tasmā vassaggena gāhitaṃ chinnavassādayo na labhantīti veditabbaṃ.
‘‘ஸங்கி⁴கங் ஹோதீ’’தி ஏதேன வுத்த²வஸ்ஸானம்பி வஸ்ஸாவாஸிகபா⁴கோ³ ஸங்கி⁴கதோ அமோசிதோ தேஸங் விப்³ப⁴மேன ஸங்கி⁴கோ ஹோதீதி த³ஸ்ஸேதி. லப⁴தீதி ‘‘மம பத்தபா⁴க³ங் ஏதஸ்ஸ தே³தா²’’தி தா³யகே ஸம்படிச்சா²பெந்தேனேவ ஸங்கி⁴கதோ வியோஜிதங் ஹோதீதி வுத்தங்.
‘‘Saṅghikaṃ hotī’’ti etena vutthavassānampi vassāvāsikabhāgo saṅghikato amocito tesaṃ vibbhamena saṅghiko hotīti dasseti. Labhatīti ‘‘mama pattabhāgaṃ etassa dethā’’ti dāyake sampaṭicchāpenteneva saṅghikato viyojitaṃ hotīti vuttaṃ.
வரபா⁴க³ங் ஸாமணேரஸ்ஸாதி தஸ்ஸ பட²மகா³ஹத்தா, தே²ரேன புப்³பே³ பட²மபா⁴க³ஸ்ஸ க³ஹிதத்தா, இதா³னி க³ய்ஹமானஸ்ஸ து³தியபா⁴க³த்தா ச வுத்தங்.
Varabhāgaṃ sāmaṇerassāti tassa paṭhamagāhattā, therena pubbe paṭhamabhāgassa gahitattā, idāni gayhamānassa dutiyabhāgattā ca vuttaṃ.
ஸேனாஸனக்³கா³ஹகதா²வண்ணனா நிட்டி²தா.
Senāsanaggāhakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / ஸேனாஸனக்³கா³ஹாபகஸம்முதி • Senāsanaggāhāpakasammuti
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஸேனாஸனக்³கா³ஹகதா² • Senāsanaggāhakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸேனாஸனக்³கா³ஹாபகஸம்முதிகதா²வண்ணனா • Senāsanaggāhāpakasammutikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸேனாஸனக்³கா³ஹகதா²வண்ணனா • Senāsanaggāhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஸேனாஸனக்³கா³ஹகதா² • Senāsanaggāhakathā
