| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
সেনাসনগ্গাহকথাৰণ্ণনা
Senāsanaggāhakathāvaṇṇanā
৩১৮. ‘‘ছমাসচ্চযেন ছমাসচ্চযেনা’’তি ইদং দ্ৰিক্খত্তুং পচ্চযদানকালপরিচ্ছেদদস্সনং, এৰং উপরিপি। ‘‘তং ন গাহেতব্ব’’ন্তি ৰচনস্স কারণমাহ ‘‘পচ্চযেনেৰ হি ত’’ন্তিআদিনা, পচ্চযঞ্ঞেৰ নিস্সায তত্থ ৰসিত্ৰা পটিজগ্গনা ভৰিস্সন্তীতি অধিপ্পাযো।
318.‘‘Chamāsaccayena chamāsaccayenā’’ti idaṃ dvikkhattuṃ paccayadānakālaparicchedadassanaṃ, evaṃ uparipi. ‘‘Taṃ na gāhetabba’’nti vacanassa kāraṇamāha ‘‘paccayeneva hi ta’’ntiādinā, paccayaññeva nissāya tattha vasitvā paṭijagganā bhavissantīti adhippāyo.
উব্ভণ্ডিকাতি উক্খিত্তভণ্ডা ভৰিস্সন্তি। দীঘসালাতি চঙ্কমনসালা। মণ্ডলমাল়োতি উপট্ঠানসালা। অনুদহতীতি পীল়েতি। ‘‘অদাতুং ন লব্ভতী’’তি ইমিনা সঞ্চিচ্চ অদদন্তস্স পটিবাহনে পৰিসনতো দুক্কটন্তি দীপেতি।
Ubbhaṇḍikāti ukkhittabhaṇḍā bhavissanti. Dīghasālāti caṅkamanasālā. Maṇḍalamāḷoti upaṭṭhānasālā. Anudahatīti pīḷeti. ‘‘Adātuṃ na labbhatī’’ti iminā sañcicca adadantassa paṭibāhane pavisanato dukkaṭanti dīpeti.
‘‘ন গোচরগামো ঘট্টেতব্বো’’তি ৰুত্তমেৰত্থং ৰিভাৰেতুং ‘‘ন তত্থ মনুস্সা ৰত্তব্বা’’তিআদি ৰুত্তং। ৰিতক্কং ছিন্দিত্ৰাতি ‘‘ইমিনা নীহারেন গচ্ছন্তং দিস্ৰা নিৰারেত্ৰা পচ্চযে দস্সন্তী’’তি এৰরূপং ৰিতক্কং অনুপ্পাদেত্ৰা। ভণ্ডপ্পটিচ্ছাদনন্তি পটিচ্ছাদনভণ্ডং। সরীরপ্পটিচ্ছাদনচীৰরন্তি অত্থো। ‘‘সুদ্ধচিত্তত্তাৰ অনৰজ্জ’’ন্তি ইদং পুচ্ছিতক্খণে কারণাচিক্খনং সন্ধায ৰুত্তং ন হোতি অসুদ্ধচিত্তস্সপি পুচ্ছিতপঞ্হৰিসজ্জনে দোসাভাৰা। এৰং পন গতে মং পুচ্ছিস্সন্তীতিসঞ্ঞায অগমনং সন্ধায ৰুত্তন্তি দট্ঠব্বং।
‘‘Na gocaragāmo ghaṭṭetabbo’’ti vuttamevatthaṃ vibhāvetuṃ ‘‘na tattha manussā vattabbā’’tiādi vuttaṃ. Vitakkaṃ chinditvāti ‘‘iminā nīhārena gacchantaṃ disvā nivāretvā paccaye dassantī’’ti evarūpaṃ vitakkaṃ anuppādetvā. Bhaṇḍappaṭicchādananti paṭicchādanabhaṇḍaṃ. Sarīrappaṭicchādanacīvaranti attho. ‘‘Suddhacittattāva anavajja’’nti idaṃ pucchitakkhaṇe kāraṇācikkhanaṃ sandhāya vuttaṃ na hoti asuddhacittassapi pucchitapañhavisajjane dosābhāvā. Evaṃ pana gate maṃ pucchissantītisaññāya agamanaṃ sandhāya vuttanti daṭṭhabbaṃ.
পটিজগ্গিতব্বানীতি খণ্ডফুল্লপটিসঙ্খরণসম্মজ্জনাদীহি পটিজগ্গিতব্বানি। মুদ্দৰেদিকাযাতি চেতিযস্স হম্মিযৰেদিকায ঘটাকারস্স উপরি চতুরস্সৰেদিকায। কস্মা পুচ্ছিতব্বন্তিআদি যতো পকতিযা লভতি। তত্থাপি পুচ্ছনস্স কারণসন্দস্সনত্থং ৰুত্তং।
Paṭijaggitabbānīti khaṇḍaphullapaṭisaṅkharaṇasammajjanādīhi paṭijaggitabbāni. Muddavedikāyāti cetiyassa hammiyavedikāya ghaṭākārassa upari caturassavedikāya. Kasmā pucchitabbantiādi yato pakatiyā labhati. Tatthāpi pucchanassa kāraṇasandassanatthaṃ vuttaṃ.
পটিক্কম্মাতি ৰিহারতো অপসক্কিত্ৰা। তমত্থং দস্সেন্তো ‘‘যোজনদ্ৰিযোজনন্তরে হোতী’’তি আহ। উপনিক্খেপং ঠপেত্ৰাতি ৰড্ঢিযা কহাপণাদিং ঠপেত্ৰা, খেত্তাদীনি ৰা নিযমেত্ৰা। ইতি সদ্ধাদেয্যেতি এৰং হেট্ঠা ৰুত্তনযেন সদ্ধায দাতব্বে ৰস্সাৰাসিকলাভৰিসযেতি অত্থো।
Paṭikkammāti vihārato apasakkitvā. Tamatthaṃ dassento ‘‘yojanadviyojanantare hotī’’ti āha. Upanikkhepaṃ ṭhapetvāti vaḍḍhiyā kahāpaṇādiṃ ṭhapetvā, khettādīni vā niyametvā. Iti saddhādeyyeti evaṃ heṭṭhā vuttanayena saddhāya dātabbe vassāvāsikalābhavisayeti attho.
ৰত্থু পনাতি তত্রুপ্পাদে উপ্পন্নরূপিযং, তঞ্চ ‘‘ততো চতুপচ্চযং পরিভুঞ্জথা’’তি দিন্নখেত্তাদিতো উপ্পন্নত্তা কপ্পিযকারকানং হত্থে ‘‘কপ্পিযভণ্ডং পরিভুঞ্জথা’’তি দাযকেহি দিন্নৰত্থুসদিসং হোতীতি আহ ‘‘কপ্পিযকারকানং হী’’তিআদি।
Vatthu panāti tatruppāde uppannarūpiyaṃ, tañca ‘‘tato catupaccayaṃ paribhuñjathā’’ti dinnakhettādito uppannattā kappiyakārakānaṃ hatthe ‘‘kappiyabhaṇḍaṃ paribhuñjathā’’ti dāyakehi dinnavatthusadisaṃ hotīti āha ‘‘kappiyakārakānaṃ hī’’tiādi.
সঙ্ঘসুট্ঠুতাযাতি সঙ্ঘস্স হিতায। পুগ্গলৰসেনাতি ‘‘ভিক্খূ চীৰরেন কিলমন্তী’’তি এৰং পুগ্গলপরামাসৰসেন, ন ‘‘সঙ্ঘো কিলমতী’’তি এৰং সঙ্ঘপরামাসৰসেন।
Saṅghasuṭṭhutāyāti saṅghassa hitāya. Puggalavasenāti ‘‘bhikkhū cīvarena kilamantī’’ti evaṃ puggalaparāmāsavasena, na ‘‘saṅgho kilamatī’’ti evaṃ saṅghaparāmāsavasena.
‘‘কপ্পিযভণ্ডৰসেনা’’তি সামঞ্ঞতো ৰুত্তমেৰত্থং ৰিভাৰেতুং ‘‘চীৰরতণ্ডুলাদিৰসেনেৰ চা’’তি ৰুত্তং। চ-কারো চেত্থ পন-সদ্দত্থে ৰত্ততি, ন সমুচ্চযত্থেতি দট্ঠব্বং। পুগ্গলৰসেনেৰ, কপ্পিযভণ্ডৰসেন চ অপলোকনপ্পকারং দস্সেতুং ‘‘তং পন এৰং কত্তব্ব’’ন্তিআদি ৰুত্তং।
‘‘Kappiyabhaṇḍavasenā’’ti sāmaññato vuttamevatthaṃ vibhāvetuṃ ‘‘cīvarataṇḍulādivaseneva cā’’ti vuttaṃ. Ca-kāro cettha pana-saddatthe vattati, na samuccayattheti daṭṭhabbaṃ. Puggalavaseneva, kappiyabhaṇḍavasena ca apalokanappakāraṃ dassetuṃ ‘‘taṃ pana evaṃ kattabba’’ntiādi vuttaṃ.
চীৰরপচ্চযং সল্লক্খেত্ৰাতি সদ্ধাদেয্যতত্রুপ্পাদাদিৰসেন তস্মিং ৰস্সাৰাসে লব্ভমানং চীৰরসঙ্খাতং পচ্চযং ‘‘এত্তক’’ন্তি পরিচ্ছিন্দিত্ৰা। সেনাসনস্সাতি সেনাসনগ্গাহাপনস্স। ‘‘নৰকো ৰুড্ঢতরস্স, ৰুড্ঢো চ নৰকস্সা’’তি ইদং সেনাসনগ্গাহস্স অত্তনাৰ অত্তনো গহণং অসারুপ্পন্তি ৰুত্তং, দ্ৰে অঞ্ঞমঞ্ঞং গাহেস্সন্তীতি অধিপ্পাযো। অট্ঠপি সোল়সপি জনে সম্মন্নিতুং ৰট্টতীতি এককম্মৰাচায সব্বেপি একতো সম্মন্নিতুং ৰট্টতি। নিগ্গহকম্মমেৰ হি সঙ্ঘো সঙ্ঘস্স ন করোতি। তেনেৰ সত্তসতিকক্খন্ধকে ‘‘উব্বাহিককম্মসম্মুতিযং অট্ঠপি জনা একতোৰ সম্মতাতি।
Cīvarapaccayaṃ sallakkhetvāti saddhādeyyatatruppādādivasena tasmiṃ vassāvāse labbhamānaṃ cīvarasaṅkhātaṃ paccayaṃ ‘‘ettaka’’nti paricchinditvā. Senāsanassāti senāsanaggāhāpanassa. ‘‘Navako vuḍḍhatarassa, vuḍḍho canavakassā’’ti idaṃ senāsanaggāhassa attanāva attano gahaṇaṃ asāruppanti vuttaṃ, dve aññamaññaṃ gāhessantīti adhippāyo. Aṭṭhapi soḷasapi jane sammannituṃ vaṭṭatīti ekakammavācāya sabbepi ekato sammannituṃ vaṭṭati. Niggahakammameva hi saṅgho saṅghassa na karoti. Teneva sattasatikakkhandhake ‘‘ubbāhikakammasammutiyaṃ aṭṭhapi janā ekatova sammatāti.
আসনঘরন্তি পটিমাঘরং। মগ্গোতি উপচারসীমব্ভন্তরগতে গামাভিমুখমগ্গে কতসালা ৰুচ্চতি। এৰং পোক্খরণীরুক্খমূলাদীসুপি।
Āsanagharanti paṭimāgharaṃ. Maggoti upacārasīmabbhantaragate gāmābhimukhamagge katasālā vuccati. Evaṃ pokkharaṇīrukkhamūlādīsupi.
লভন্তীতি তত্রৰাসিনো ভিক্খূ লভন্তি। ৰিজটেত্ৰাতি ‘‘একেকস্স পহোনকপ্পমাণেন ৰিযোজেত্ৰা। আৰাসেসু পক্খিপিত্ৰাতি ‘‘ইতো উপ্পন্নং অসুকস্মিং অসুকস্মিঞ্চ আৰাসে ৰসন্তা পাপেত্ৰা গণ্হন্তূ’’তি ৰাচায উপসংহরিত্ৰা। পৰিসিতব্বন্তি মহালাভে পরিৰেণে ৰসিত্ৰাৰ লাভো গহেতব্বোতি অধিপ্পাযো।
Labhantīti tatravāsino bhikkhū labhanti. Vijaṭetvāti ‘‘ekekassa pahonakappamāṇena viyojetvā. Āvāsesu pakkhipitvāti ‘‘ito uppannaṃ asukasmiṃ asukasmiñca āvāse vasantā pāpetvā gaṇhantū’’ti vācāya upasaṃharitvā. Pavisitabbanti mahālābhe pariveṇe vasitvāva lābho gahetabboti adhippāyo.
অযম্পীতি এত্থ যো পংসুকূলিকো পচ্চযং ৰিস্সজ্জেতি। তেনেৰ ৰিস্সট্ঠো অযং চীৰরপচ্চযোপীতি যোজনা। পাদমূলে ঠপেত্ৰা সাটকং দেন্তীতি পচ্চযদাযকা দেন্তি। এতেন গহট্ঠেহি পাদমূলে ঠপেত্ৰা দিন্নম্পি পংসুকূলিকানম্পি ৰট্টতীতি দস্সেতি। অথ ৰস্সাৰাসিকং দেমাতি ৰদন্তীতি এত্থ পংসুকূলিকানং ন ৰট্টতীতি অজ্ঝাহরিত্ৰা যোজেতব্বং। ৰস্সংৰুত্থভিক্খূনন্তি পংসুকূলিকতো অঞ্ঞেসং ভিক্খূনং।
Ayampīti ettha yo paṃsukūliko paccayaṃ vissajjeti. Teneva vissaṭṭho ayaṃ cīvarapaccayopīti yojanā. Pādamūle ṭhapetvā sāṭakaṃ dentīti paccayadāyakā denti. Etena gahaṭṭhehi pādamūle ṭhapetvā dinnampi paṃsukūlikānampi vaṭṭatīti dasseti. Atha vassāvāsikaṃ demāti vadantīti ettha paṃsukūlikānaṃ na vaṭṭatīti ajjhāharitvā yojetabbaṃ. Vassaṃvutthabhikkhūnanti paṃsukūlikato aññesaṃ bhikkhūnaṃ.
উপনিবন্ধিত্ৰা গাহাপেতব্বন্তি ইধ রুক্খাদীসু ৰসিত্ৰা চীৰরং গণ্হথাতি পটিবন্ধং কত্ৰা গাহেতব্বং।
Upanibandhitvā gāhāpetabbanti idha rukkhādīsu vasitvā cīvaraṃ gaṇhathāti paṭibandhaṃ katvā gāhetabbaṃ.
পাটিপদঅরুণতোতিআদি ৰস্সূপনাযিকদিৰসং সন্ধায ৰুত্তং। অন্তরামুত্তকং পন পাটিপদং অতিক্কমিত্ৰাপি গাহেতুং ৰট্টতি। নিবদ্ধৰত্তং ঠপেত্ৰাতি সজ্ঝাযমনসিকারাদীসু নিরন্তরকরণীযেসু কত্তব্বং কতিকৰত্তং কত্ৰা। কসাৰপরিভণ্ডন্তি কসাৰরসেহি ভূমিপরিকম্মং।
Pāṭipadaaruṇatotiādi vassūpanāyikadivasaṃ sandhāya vuttaṃ. Antarāmuttakaṃ pana pāṭipadaṃ atikkamitvāpi gāhetuṃ vaṭṭati. Nibaddhavattaṃ ṭhapetvāti sajjhāyamanasikārādīsu nirantarakaraṇīyesu kattabbaṃ katikavattaṃ katvā. Kasāvaparibhaṇḍanti kasāvarasehi bhūmiparikammaṃ.
তিৰিধম্পীতি পরিযত্তিপটিপত্তিপটিৰেধৰসেন তিৰিধম্পি। সোধেত্ৰাতি আচারাদীসু উপপরিক্খিত্ৰা। একচারিকৰত্তন্তি ভাৰনাকম্মং। তঞ্হি গণসঙ্গণিকং পহায একচারিকেনেৰ ৰত্তিতব্বত্তা এৰং ৰুত্তং। দসৰত্থুককথা নাম অপ্পিচ্ছকথা, সন্তুট্ঠি, পৰিৰেক, অসংসগ্গ, ৰীরিযারম্ভ, সীল, সমাধি, পঞ্ঞা, ৰিমুত্তি, ৰিমুত্তিঞাণদস্সনকথাতি ইমা দস।
Tividhampīti pariyattipaṭipattipaṭivedhavasena tividhampi. Sodhetvāti ācārādīsu upaparikkhitvā. Ekacārikavattanti bhāvanākammaṃ. Tañhi gaṇasaṅgaṇikaṃ pahāya ekacārikeneva vattitabbattā evaṃ vuttaṃ. Dasavatthukakathā nāma appicchakathā, santuṭṭhi, paviveka, asaṃsagga, vīriyārambha, sīla, samādhi, paññā, vimutti, vimuttiñāṇadassanakathāti imā dasa.
দন্তকট্ঠখাদনৰত্তন্তি দন্তকট্ঠমাল়কে নিক্খিত্তেসু দন্তকট্ঠেসু ‘‘দিৰসে দিৰসে একমেৰ দন্তকট্ঠং গহেতব্ব’’ন্তিআদিনা (পারা॰ অট্ঠ॰ ১.১০৯) অদিন্নাদানে দন্তপোনকথাযং ৰুত্তং ৰত্তং। পত্তং ৰা…পে॰… ন কথেতব্বন্তি পত্তগুত্তত্থায ৰুত্তং। ৰিসভাগকথাতি তিরচ্ছানকথা। খন্ধকৰত্তন্তি ৰত্তক্খন্ধকে (চূল়ৰ॰ ৩৬৫) আগতং পিণ্ডচারিকৰত্ততো অৰসিট্ঠৰত্তং তস্স ‘‘ভিক্খাচারৰত্ত’’ন্তি ৰিসুং গহিতত্তা।
Dantakaṭṭhakhādanavattanti dantakaṭṭhamāḷake nikkhittesu dantakaṭṭhesu ‘‘divase divase ekameva dantakaṭṭhaṃ gahetabba’’ntiādinā (pārā. aṭṭha. 1.109) adinnādāne dantaponakathāyaṃ vuttaṃ vattaṃ. Pattaṃ vā…pe… na kathetabbanti pattaguttatthāya vuttaṃ. Visabhāgakathāti tiracchānakathā. Khandhakavattanti vattakkhandhake (cūḷava. 365) āgataṃ piṇḍacārikavattato avasiṭṭhavattaṃ tassa ‘‘bhikkhācāravatta’’nti visuṃ gahitattā.
ইদানি যং দাযকা পচ্ছিমৰস্সংৰুত্থানং ৰস্সাৰাসিকং দেন্তি, তত্থ পটিপজ্জনৰিধিং দস্সেতুং ‘‘পচ্ছিমৰস্সূপনাযিকদিৰসে পনা’’তি আরদ্ধং। আগন্তুকো সচে ভিক্খূতি চীৰরে গাহিতে পচ্ছা আগতো আগন্তুকো ভিক্খু। পত্তট্ঠানেতি ৰস্সগ্গেন পত্তট্ঠানে। পঠমৰস্সূপগতাতি আগন্তুকস্স আগমনতো পুরেতরমেৰ পচ্ছিমিকায ৰস্সূপনাযিকায ৰস্সূপগতা। লদ্ধং লদ্ধন্তি পুনপ্পুনং দাযকানং সন্তিকা আগতাগতসাটকং।
Idāni yaṃ dāyakā pacchimavassaṃvutthānaṃ vassāvāsikaṃ denti, tattha paṭipajjanavidhiṃ dassetuṃ ‘‘pacchimavassūpanāyikadivase panā’’ti āraddhaṃ. Āgantuko sace bhikkhūti cīvare gāhite pacchā āgato āgantuko bhikkhu. Pattaṭṭhāneti vassaggena pattaṭṭhāne. Paṭhamavassūpagatāti āgantukassa āgamanato puretarameva pacchimikāya vassūpanāyikāya vassūpagatā. Laddhaṃ laddhanti punappunaṃ dāyakānaṃ santikā āgatāgatasāṭakaṃ.
নেৰ ৰস্সাৰাসিকস্স সামিনোতি ছিন্নৰস্সত্তা ৰুত্তং। পঠমমেৰ কতিকায কতত্তা ‘‘নেৰ অদাতুং লভন্তী’’তি ৰুত্তং, দাতব্বং ৰারেন্তানং গীৰা হোতীতি অধিপ্পাযো। তেসমেৰ দাতব্বন্তি ৰস্সূপগতেসু অলদ্ধৰস্সাৰাসিকানং একচ্চানমেৰ দাতব্বং।
Neva vassāvāsikassa sāminoti chinnavassattā vuttaṃ. Paṭhamameva katikāya katattā ‘‘neva adātuṃ labhantī’’ti vuttaṃ, dātabbaṃ vārentānaṃ gīvā hotīti adhippāyo. Tesameva dātabbanti vassūpagatesu aladdhavassāvāsikānaṃ ekaccānameva dātabbaṃ.
ভতিনিৰিট্ঠন্তি পানীযুপট্ঠানাদিভতিং কত্ৰা লদ্ধং। সঙ্ঘিকং পনাতিআদি কেসঞ্চি ৰাদদস্সনং। তত্থ অপলোকনকম্মং কত্ৰা গাহিতন্তি ‘‘ছিন্নৰস্সানং ৰস্সাৰাসিকঞ্চ ইদানি উপ্পজ্জনকৰস্সাৰাসিকঞ্চ ইমেসং দাতুং রুচ্চতী’’তি অনন্তরে ৰুত্তনযেন অপলোকনং কত্ৰা গাহিতং সঙ্ঘেন দিন্নত্তা ৰিব্ভন্তোপি লভতি। পগেৰ ছিন্নৰস্সো। পচ্চযৰসেন গাহিতং পন তেমাসং ৰসিত্ৰা গহেতুং অত্তনা, দাযকেহি চ অনুমতত্তা ভতিনিৰিট্ঠম্পি ছিন্নৰস্সোপি ৰিব্ভন্তোপি ন লভতীতি কেচি আচরিযা ৰদন্তি। ইদঞ্চ পচ্ছা ৰুত্তত্তা পমাণং। তেনেৰ ৰস্সূপনাযিকদিৰসে এৰ দাযকেহি দিন্নৰস্সাৰাসিকং গহিতভিক্খুনো ৰস্সচ্ছেদং অকত্ৰা ৰাসোৰ হেট্ঠা ৰিহিতো, ন পানীযুপট্ঠানাদিভতিকরণৰত্তং। যদি হি তং নিৰিট্ঠমেৰ সিযা, ভতিকরণমেৰ ৰিধাতব্বং। তস্মা ৰস্সগ্গেন গাহিতং ছিন্নৰস্সাদযো ন লভন্তীতি ৰেদিতব্বং।
Bhatiniviṭṭhanti pānīyupaṭṭhānādibhatiṃ katvā laddhaṃ. Saṅghikaṃ panātiādi kesañci vādadassanaṃ. Tattha apalokanakammaṃ katvā gāhitanti ‘‘chinnavassānaṃ vassāvāsikañca idāni uppajjanakavassāvāsikañca imesaṃ dātuṃ ruccatī’’ti anantare vuttanayena apalokanaṃ katvā gāhitaṃ saṅghena dinnattā vibbhantopi labhati. Pageva chinnavasso. Paccayavasena gāhitaṃ pana temāsaṃ vasitvā gahetuṃ attanā, dāyakehi ca anumatattā bhatiniviṭṭhampi chinnavassopi vibbhantopi na labhatīti keci ācariyā vadanti. Idañca pacchā vuttattā pamāṇaṃ. Teneva vassūpanāyikadivase eva dāyakehi dinnavassāvāsikaṃ gahitabhikkhuno vassacchedaṃ akatvā vāsova heṭṭhā vihito, na pānīyupaṭṭhānādibhatikaraṇavattaṃ. Yadi hi taṃ niviṭṭhameva siyā, bhatikaraṇameva vidhātabbaṃ. Tasmā vassaggena gāhitaṃ chinnavassādayo na labhantīti veditabbaṃ.
‘‘সঙ্ঘিকং হোতী’’তি এতেন ৰুত্থৰস্সানম্পি ৰস্সাৰাসিকভাগো সঙ্ঘিকতো অমোচিতো তেসং ৰিব্ভমেন সঙ্ঘিকো হোতীতি দস্সেতি। লভতীতি ‘‘মম পত্তভাগং এতস্স দেথা’’তি দাযকে সম্পটিচ্ছাপেন্তেনেৰ সঙ্ঘিকতো ৰিযোজিতং হোতীতি ৰুত্তং।
‘‘Saṅghikaṃ hotī’’ti etena vutthavassānampi vassāvāsikabhāgo saṅghikato amocito tesaṃ vibbhamena saṅghiko hotīti dasseti. Labhatīti ‘‘mama pattabhāgaṃ etassa dethā’’ti dāyake sampaṭicchāpenteneva saṅghikato viyojitaṃ hotīti vuttaṃ.
ৰরভাগং সামণেরস্সাতি তস্স পঠমগাহত্তা, থেরেন পুব্বে পঠমভাগস্স গহিতত্তা, ইদানি গয্হমানস্স দুতিযভাগত্তা চ ৰুত্তং।
Varabhāgaṃ sāmaṇerassāti tassa paṭhamagāhattā, therena pubbe paṭhamabhāgassa gahitattā, idāni gayhamānassa dutiyabhāgattā ca vuttaṃ.
সেনাসনগ্গাহকথাৰণ্ণনা নিট্ঠিতা।
Senāsanaggāhakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / সেনাসনগ্গাহাপকসম্মুতি • Senāsanaggāhāpakasammuti
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / সেনাসনগ্গাহকথা • Senāsanaggāhakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সেনাসনগ্গাহাপকসম্মুতিকথাৰণ্ণনা • Senāsanaggāhāpakasammutikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সেনাসনগ্গাহকথাৰণ্ণনা • Senāsanaggāhakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / সেনাসনগ্গাহকথা • Senāsanaggāhakathā
