| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
သေနာသနဂ္ဂာဟကထာဝဏ္ဏနာ
Senāsanaggāhakathāvaṇṇanā
၃၁၈. ‘‘ဆမာသစ္စယေန ဆမာသစ္စယေနာ’’တိ ဣဒံ ဒ္ဝိက္ခတ္တုံ ပစ္စယဒာနကာလပရိစ္ဆေဒဒသ္သနံ, ဧဝံ ဥပရိပိ။ ‘‘တံ န ဂာဟေတဗ္ဗ’’န္တိ ဝစနသ္သ ကာရဏမာဟ ‘‘ပစ္စယေနေဝ ဟိ တ’’န္တိအာဒိနာ, ပစ္စယညေဝ နိသ္သာယ တတ္ထ ဝသိတ္ဝာ ပဋိဇဂ္ဂနာ ဘဝိသ္သန္တီတိ အဓိပ္ပာယော။
318.‘‘Chamāsaccayena chamāsaccayenā’’ti idaṃ dvikkhattuṃ paccayadānakālaparicchedadassanaṃ, evaṃ uparipi. ‘‘Taṃ na gāhetabba’’nti vacanassa kāraṇamāha ‘‘paccayeneva hi ta’’ntiādinā, paccayaññeva nissāya tattha vasitvā paṭijagganā bhavissantīti adhippāyo.
ဥဗ္ဘဏ္ဍိကာတိ ဥက္ခိတ္တဘဏ္ဍာ ဘဝိသ္သန္တိ။ ဒီဃသာလာတိ စင္ကမနသာလာ။ မဏ္ဍလမာဠောတိ ဥပဋ္ဌာနသာလာ။ အနုဒဟတီတိ ပီဠေတိ။ ‘‘အဒာတုံ န လဗ္ဘတီ’’တိ ဣမိနာ သဉ္စိစ္စ အဒဒန္တသ္သ ပဋိဗာဟနေ ပဝိသနတော ဒုက္ကဋန္တိ ဒီပေတိ။
Ubbhaṇḍikāti ukkhittabhaṇḍā bhavissanti. Dīghasālāti caṅkamanasālā. Maṇḍalamāḷoti upaṭṭhānasālā. Anudahatīti pīḷeti. ‘‘Adātuṃ na labbhatī’’ti iminā sañcicca adadantassa paṭibāhane pavisanato dukkaṭanti dīpeti.
‘‘န ဂောစရဂာမော ဃဋ္ဋေတဗ္ဗော’’တိ ဝုတ္တမေဝတ္ထံ ဝိဘာဝေတုံ ‘‘န တတ္ထ မနုသ္သာ ဝတ္တဗ္ဗာ’’တိအာဒိ ဝုတ္တံ။ ဝိတက္ကံ ဆိန္ဒိတ္ဝာတိ ‘‘ဣမိနာ နီဟာရေန ဂစ္ဆန္တံ ဒိသ္ဝာ နိဝာရေတ္ဝာ ပစ္စယေ ဒသ္သန္တီ’’တိ ဧဝရူပံ ဝိတက္ကံ အနုပ္ပာဒေတ္ဝာ။ ဘဏ္ဍပ္ပဋိစ္ဆာဒနန္တိ ပဋိစ္ဆာဒနဘဏ္ဍံ။ သရီရပ္ပဋိစ္ဆာဒနစီဝရန္တိ အတ္ထော။ ‘‘သုဒ္ဓစိတ္တတ္တာဝ အနဝဇ္ဇ’’န္တိ ဣဒံ ပုစ္ဆိတက္ခဏေ ကာရဏာစိက္ခနံ သန္ဓာယ ဝုတ္တံ န ဟောတိ အသုဒ္ဓစိတ္တသ္သပိ ပုစ္ဆိတပဉ္ဟဝိသဇ္ဇနေ ဒောသာဘာဝာ။ ဧဝံ ပန ဂတေ မံ ပုစ္ဆိသ္သန္တီတိသညာယ အဂမနံ သန္ဓာယ ဝုတ္တန္တိ ဒဋ္ဌဗ္ဗံ။
‘‘Na gocaragāmo ghaṭṭetabbo’’ti vuttamevatthaṃ vibhāvetuṃ ‘‘na tattha manussā vattabbā’’tiādi vuttaṃ. Vitakkaṃ chinditvāti ‘‘iminā nīhārena gacchantaṃ disvā nivāretvā paccaye dassantī’’ti evarūpaṃ vitakkaṃ anuppādetvā. Bhaṇḍappaṭicchādananti paṭicchādanabhaṇḍaṃ. Sarīrappaṭicchādanacīvaranti attho. ‘‘Suddhacittattāva anavajja’’nti idaṃ pucchitakkhaṇe kāraṇācikkhanaṃ sandhāya vuttaṃ na hoti asuddhacittassapi pucchitapañhavisajjane dosābhāvā. Evaṃ pana gate maṃ pucchissantītisaññāya agamanaṃ sandhāya vuttanti daṭṭhabbaṃ.
ပဋိဇဂ္ဂိတဗ္ဗာနီတိ ခဏ္ဍဖုလ္လပဋိသင္ခရဏသမ္မဇ္ဇနာဒီဟိ ပဋိဇဂ္ဂိတဗ္ဗာနိ။ မုဒ္ဒဝေဒိကာယာတိ စေတိယသ္သ ဟမ္မိယဝေဒိကာယ ဃဋာကာရသ္သ ဥပရိ စတုရသ္သဝေဒိကာယ။ ကသ္မာ ပုစ္ဆိတဗ္ဗန္တိအာဒိ ယတော ပကတိယာ လဘတိ။ တတ္ထာပိ ပုစ္ဆနသ္သ ကာရဏသန္ဒသ္သနတ္ထံ ဝုတ္တံ။
Paṭijaggitabbānīti khaṇḍaphullapaṭisaṅkharaṇasammajjanādīhi paṭijaggitabbāni. Muddavedikāyāti cetiyassa hammiyavedikāya ghaṭākārassa upari caturassavedikāya. Kasmā pucchitabbantiādi yato pakatiyā labhati. Tatthāpi pucchanassa kāraṇasandassanatthaṃ vuttaṃ.
ပဋိက္ကမ္မာတိ ဝိဟာရတော အပသက္ကိတ္ဝာ။ တမတ္ထံ ဒသ္သေန္တော ‘‘ယောဇနဒ္ဝိယောဇနန္တရေ ဟောတီ’’တိ အာဟ။ ဥပနိက္ခေပံ ဌပေတ္ဝာတိ ဝဍ္ဎိယာ ကဟာပဏာဒိံ ဌပေတ္ဝာ, ခေတ္တာဒီနိ ဝာ နိယမေတ္ဝာ။ ဣတိ သဒ္ဓာဒေယ္ယေတိ ဧဝံ ဟေဋ္ဌာ ဝုတ္တနယေန သဒ္ဓာယ ဒာတဗ္ဗေ ဝသ္သာဝာသိကလာဘဝိသယေတိ အတ္ထော။
Paṭikkammāti vihārato apasakkitvā. Tamatthaṃ dassento ‘‘yojanadviyojanantare hotī’’ti āha. Upanikkhepaṃ ṭhapetvāti vaḍḍhiyā kahāpaṇādiṃ ṭhapetvā, khettādīni vā niyametvā. Iti saddhādeyyeti evaṃ heṭṭhā vuttanayena saddhāya dātabbe vassāvāsikalābhavisayeti attho.
ဝတ္ထု ပနာတိ တတ္ရုပ္ပာဒေ ဥပ္ပန္နရူပိယံ, တဉ္စ ‘‘တတော စတုပစ္စယံ ပရိဘုဉ္ဇထာ’’တိ ဒိန္နခေတ္တာဒိတော ဥပ္ပန္နတ္တာ ကပ္ပိယကာရကာနံ ဟတ္ထေ ‘‘ကပ္ပိယဘဏ္ဍံ ပရိဘုဉ္ဇထာ’’တိ ဒာယကေဟိ ဒိန္နဝတ္ထုသဒိသံ ဟောတီတိ အာဟ ‘‘ကပ္ပိယကာရကာနံ ဟီ’’တိအာဒိ။
Vatthu panāti tatruppāde uppannarūpiyaṃ, tañca ‘‘tato catupaccayaṃ paribhuñjathā’’ti dinnakhettādito uppannattā kappiyakārakānaṃ hatthe ‘‘kappiyabhaṇḍaṃ paribhuñjathā’’ti dāyakehi dinnavatthusadisaṃ hotīti āha ‘‘kappiyakārakānaṃ hī’’tiādi.
သင္ဃသုဋ္ဌုတာယာတိ သင္ဃသ္သ ဟိတာယ။ ပုဂ္ဂလဝသေနာတိ ‘‘ဘိက္ခူ စီဝရေန ကိလမန္တီ’’တိ ဧဝံ ပုဂ္ဂလပရာမာသဝသေန, န ‘‘သင္ဃော ကိလမတီ’’တိ ဧဝံ သင္ဃပရာမာသဝသေန။
Saṅghasuṭṭhutāyāti saṅghassa hitāya. Puggalavasenāti ‘‘bhikkhū cīvarena kilamantī’’ti evaṃ puggalaparāmāsavasena, na ‘‘saṅgho kilamatī’’ti evaṃ saṅghaparāmāsavasena.
‘‘ကပ္ပိယဘဏ္ဍဝသေနာ’’တိ သာမညတော ဝုတ္တမေဝတ္ထံ ဝိဘာဝေတုံ ‘‘စီဝရတဏ္ဍုလာဒိဝသေနေဝ စာ’’တိ ဝုတ္တံ။ စ-ကာရော စေတ္ထ ပန-သဒ္ဒတ္ထေ ဝတ္တတိ, န သမုစ္စယတ္ထေတိ ဒဋ္ဌဗ္ဗံ။ ပုဂ္ဂလဝသေနေဝ, ကပ္ပိယဘဏ္ဍဝသေန စ အပလောကနပ္ပကာရံ ဒသ္သေတုံ ‘‘တံ ပန ဧဝံ ကတ္တဗ္ဗ’’န္တိအာဒိ ဝုတ္တံ။
‘‘Kappiyabhaṇḍavasenā’’ti sāmaññato vuttamevatthaṃ vibhāvetuṃ ‘‘cīvarataṇḍulādivaseneva cā’’ti vuttaṃ. Ca-kāro cettha pana-saddatthe vattati, na samuccayattheti daṭṭhabbaṃ. Puggalavaseneva, kappiyabhaṇḍavasena ca apalokanappakāraṃ dassetuṃ ‘‘taṃ pana evaṃ kattabba’’ntiādi vuttaṃ.
စီဝရပစ္စယံ သလ္လက္ခေတ္ဝာတိ သဒ္ဓာဒေယ္ယတတ္ရုပ္ပာဒာဒိဝသေန တသ္မိံ ဝသ္သာဝာသေ လဗ္ဘမာနံ စီဝရသင္ခာတံ ပစ္စယံ ‘‘ဧတ္တက’’န္တိ ပရိစ္ဆိန္ဒိတ္ဝာ။ သေနာသနသ္သာတိ သေနာသနဂ္ဂာဟာပနသ္သ။ ‘‘နဝကော ဝုဍ္ဎတရသ္သ, ဝုဍ္ဎော စ နဝကသ္သာ’’တိ ဣဒံ သေနာသနဂ္ဂာဟသ္သ အတ္တနာဝ အတ္တနော ဂဟဏံ အသာရုပ္ပန္တိ ဝုတ္တံ, ဒ္ဝေ အညမညံ ဂာဟေသ္သန္တီတိ အဓိပ္ပာယော။ အဋ္ဌပိ သောဠသပိ ဇနေ သမ္မန္နိတုံ ဝဋ္ဋတီတိ ဧကကမ္မဝာစာယ သဗ္ဗေပိ ဧကတော သမ္မန္နိတုံ ဝဋ္ဋတိ။ နိဂ္ဂဟကမ္မမေဝ ဟိ သင္ဃော သင္ဃသ္သ န ကရောတိ။ တေနေဝ သတ္တသတိကက္ခန္ဓကေ ‘‘ဥဗ္ဗာဟိကကမ္မသမ္မုတိယံ အဋ္ဌပိ ဇနာ ဧကတောဝ သမ္မတာတိ။
Cīvarapaccayaṃ sallakkhetvāti saddhādeyyatatruppādādivasena tasmiṃ vassāvāse labbhamānaṃ cīvarasaṅkhātaṃ paccayaṃ ‘‘ettaka’’nti paricchinditvā. Senāsanassāti senāsanaggāhāpanassa. ‘‘Navako vuḍḍhatarassa, vuḍḍho canavakassā’’ti idaṃ senāsanaggāhassa attanāva attano gahaṇaṃ asāruppanti vuttaṃ, dve aññamaññaṃ gāhessantīti adhippāyo. Aṭṭhapi soḷasapi jane sammannituṃ vaṭṭatīti ekakammavācāya sabbepi ekato sammannituṃ vaṭṭati. Niggahakammameva hi saṅgho saṅghassa na karoti. Teneva sattasatikakkhandhake ‘‘ubbāhikakammasammutiyaṃ aṭṭhapi janā ekatova sammatāti.
အာသနဃရန္တိ ပဋိမာဃရံ။ မဂ္ဂောတိ ဥပစာရသီမဗ္ဘန္တရဂတေ ဂာမာဘိမုခမဂ္ဂေ ကတသာလာ ဝုစ္စတိ။ ဧဝံ ပောက္ခရဏီရုက္ခမူလာဒီသုပိ။
Āsanagharanti paṭimāgharaṃ. Maggoti upacārasīmabbhantaragate gāmābhimukhamagge katasālā vuccati. Evaṃ pokkharaṇīrukkhamūlādīsupi.
လဘန္တီတိ တတ္ရဝာသိနော ဘိက္ခူ လဘန္တိ။ ဝိဇဋေတ္ဝာတိ ‘‘ဧကေကသ္သ ပဟောနကပ္ပမာဏေန ဝိယောဇေတ္ဝာ။ အာဝာသေသု ပက္ခိပိတ္ဝာတိ ‘‘ဣတော ဥပ္ပန္နံ အသုကသ္မိံ အသုကသ္မိဉ္စ အာဝာသေ ဝသန္တာ ပာပေတ္ဝာ ဂဏ္ဟန္တူ’’တိ ဝာစာယ ဥပသံဟရိတ္ဝာ။ ပဝိသိတဗ္ဗန္တိ မဟာလာဘေ ပရိဝေဏေ ဝသိတ္ဝာဝ လာဘော ဂဟေတဗ္ဗောတိ အဓိပ္ပာယော။
Labhantīti tatravāsino bhikkhū labhanti. Vijaṭetvāti ‘‘ekekassa pahonakappamāṇena viyojetvā. Āvāsesu pakkhipitvāti ‘‘ito uppannaṃ asukasmiṃ asukasmiñca āvāse vasantā pāpetvā gaṇhantū’’ti vācāya upasaṃharitvā. Pavisitabbanti mahālābhe pariveṇe vasitvāva lābho gahetabboti adhippāyo.
အယမ္ပီတိ ဧတ္ထ ယော ပံသုကူလိကော ပစ္စယံ ဝိသ္သဇ္ဇေတိ။ တေနေဝ ဝိသ္သဋ္ဌော အယံ စီဝရပစ္စယောပီတိ ယောဇနာ။ ပာဒမူလေ ဌပေတ္ဝာ သာဋကံ ဒေန္တီတိ ပစ္စယဒာယကာ ဒေန္တိ။ ဧတေန ဂဟဋ္ဌေဟိ ပာဒမူလေ ဌပေတ္ဝာ ဒိန္နမ္ပိ ပံသုကူလိကာနမ္ပိ ဝဋ္ဋတီတိ ဒသ္သေတိ။ အထ ဝသ္သာဝာသိကံ ဒေမာတိ ဝဒန္တီတိ ဧတ္ထ ပံသုကူလိကာနံ န ဝဋ္ဋတီတိ အဇ္ဈာဟရိတ္ဝာ ယောဇေတဗ္ဗံ။ ဝသ္သံဝုတ္ထဘိက္ခူနန္တိ ပံသုကူလိကတော အညေသံ ဘိက္ခူနံ။
Ayampīti ettha yo paṃsukūliko paccayaṃ vissajjeti. Teneva vissaṭṭho ayaṃ cīvarapaccayopīti yojanā. Pādamūle ṭhapetvā sāṭakaṃ dentīti paccayadāyakā denti. Etena gahaṭṭhehi pādamūle ṭhapetvā dinnampi paṃsukūlikānampi vaṭṭatīti dasseti. Atha vassāvāsikaṃ demāti vadantīti ettha paṃsukūlikānaṃ na vaṭṭatīti ajjhāharitvā yojetabbaṃ. Vassaṃvutthabhikkhūnanti paṃsukūlikato aññesaṃ bhikkhūnaṃ.
ဥပနိဗန္ဓိတ္ဝာ ဂာဟာပေတဗ္ဗန္တိ ဣဓ ရုက္ခာဒီသု ဝသိတ္ဝာ စီဝရံ ဂဏ္ဟထာတိ ပဋိဗန္ဓံ ကတ္ဝာ ဂာဟေတဗ္ဗံ။
Upanibandhitvā gāhāpetabbanti idha rukkhādīsu vasitvā cīvaraṃ gaṇhathāti paṭibandhaṃ katvā gāhetabbaṃ.
ပာဋိပဒအရုဏတောတိအာဒိ ဝသ္သူပနာယိကဒိဝသံ သန္ဓာယ ဝုတ္တံ။ အန္တရာမုတ္တကံ ပန ပာဋိပဒံ အတိက္ကမိတ္ဝာပိ ဂာဟေတုံ ဝဋ္ဋတိ။ နိဗဒ္ဓဝတ္တံ ဌပေတ္ဝာတိ သဇ္ဈာယမနသိကာရာဒီသု နိရန္တရကရဏီယေသု ကတ္တဗ္ဗံ ကတိကဝတ္တံ ကတ္ဝာ။ ကသာဝပရိဘဏ္ဍန္တိ ကသာဝရသေဟိ ဘူမိပရိကမ္မံ။
Pāṭipadaaruṇatotiādi vassūpanāyikadivasaṃ sandhāya vuttaṃ. Antarāmuttakaṃ pana pāṭipadaṃ atikkamitvāpi gāhetuṃ vaṭṭati. Nibaddhavattaṃ ṭhapetvāti sajjhāyamanasikārādīsu nirantarakaraṇīyesu kattabbaṃ katikavattaṃ katvā. Kasāvaparibhaṇḍanti kasāvarasehi bhūmiparikammaṃ.
တိဝိဓမ္ပီတိ ပရိယတ္တိပဋိပတ္တိပဋိဝေဓဝသေန တိဝိဓမ္ပိ။ သောဓေတ္ဝာတိ အာစာရာဒီသု ဥပပရိက္ခိတ္ဝာ။ ဧကစာရိကဝတ္တန္တိ ဘာဝနာကမ္မံ။ တဉ္ဟိ ဂဏသင္ဂဏိကံ ပဟာယ ဧကစာရိကေနေဝ ဝတ္တိတဗ္ဗတ္တာ ဧဝံ ဝုတ္တံ။ ဒသဝတ္ထုကကထာ နာမ အပ္ပိစ္ဆကထာ, သန္တုဋ္ဌိ, ပဝိဝေက, အသံသဂ္ဂ, ဝီရိယာရမ္ဘ, သီလ, သမာဓိ, ပညာ, ဝိမုတ္တိ, ဝိမုတ္တိဉာဏဒသ္သနကထာတိ ဣမာ ဒသ။
Tividhampīti pariyattipaṭipattipaṭivedhavasena tividhampi. Sodhetvāti ācārādīsu upaparikkhitvā. Ekacārikavattanti bhāvanākammaṃ. Tañhi gaṇasaṅgaṇikaṃ pahāya ekacārikeneva vattitabbattā evaṃ vuttaṃ. Dasavatthukakathā nāma appicchakathā, santuṭṭhi, paviveka, asaṃsagga, vīriyārambha, sīla, samādhi, paññā, vimutti, vimuttiñāṇadassanakathāti imā dasa.
ဒန္တကဋ္ဌခာဒနဝတ္တန္တိ ဒန္တကဋ္ဌမာဠကေ နိက္ခိတ္တေသု ဒန္တကဋ္ဌေသု ‘‘ဒိဝသေ ဒိဝသေ ဧကမေဝ ဒန္တကဋ္ဌံ ဂဟေတဗ္ဗ’’န္တိအာဒိနာ (ပာရာ. အဋ္ဌ. ၁.၁၀၉) အဒိန္နာဒာနေ ဒန္တပောနကထာယံ ဝုတ္တံ ဝတ္တံ။ ပတ္တံ ဝာ။ပေ.။ န ကထေတဗ္ဗန္တိ ပတ္တဂုတ္တတ္ထာယ ဝုတ္တံ။ ဝိသဘာဂကထာတိ တိရစ္ဆာနကထာ။ ခန္ဓကဝတ္တန္တိ ဝတ္တက္ခန္ဓကေ (စူဠဝ. ၃၆၅) အာဂတံ ပိဏ္ဍစာရိကဝတ္တတော အဝသိဋ္ဌဝတ္တံ တသ္သ ‘‘ဘိက္ခာစာရဝတ္တ’’န္တိ ဝိသုံ ဂဟိတတ္တာ။
Dantakaṭṭhakhādanavattanti dantakaṭṭhamāḷake nikkhittesu dantakaṭṭhesu ‘‘divase divase ekameva dantakaṭṭhaṃ gahetabba’’ntiādinā (pārā. aṭṭha. 1.109) adinnādāne dantaponakathāyaṃ vuttaṃ vattaṃ. Pattaṃ vā…pe… na kathetabbanti pattaguttatthāya vuttaṃ. Visabhāgakathāti tiracchānakathā. Khandhakavattanti vattakkhandhake (cūḷava. 365) āgataṃ piṇḍacārikavattato avasiṭṭhavattaṃ tassa ‘‘bhikkhācāravatta’’nti visuṃ gahitattā.
ဣဒာနိ ယံ ဒာယကာ ပစ္ဆိမဝသ္သံဝုတ္ထာနံ ဝသ္သာဝာသိကံ ဒေန္တိ, တတ္ထ ပဋိပဇ္ဇနဝိဓိံ ဒသ္သေတုံ ‘‘ပစ္ဆိမဝသ္သူပနာယိကဒိဝသေ ပနာ’’တိ အာရဒ္ဓံ။ အာဂန္တုကော သစေ ဘိက္ခူတိ စီဝရေ ဂာဟိတေ ပစ္ဆာ အာဂတော အာဂန္တုကော ဘိက္ခု။ ပတ္တဋ္ဌာနေတိ ဝသ္သဂ္ဂေန ပတ္တဋ္ဌာနေ။ ပဌမဝသ္သူပဂတာတိ အာဂန္တုကသ္သ အာဂမနတော ပုရေတရမေဝ ပစ္ဆိမိကာယ ဝသ္သူပနာယိကာယ ဝသ္သူပဂတာ။ လဒ္ဓံ လဒ္ဓန္တိ ပုနပ္ပုနံ ဒာယကာနံ သန္တိကာ အာဂတာဂတသာဋကံ။
Idāni yaṃ dāyakā pacchimavassaṃvutthānaṃ vassāvāsikaṃ denti, tattha paṭipajjanavidhiṃ dassetuṃ ‘‘pacchimavassūpanāyikadivase panā’’ti āraddhaṃ. Āgantuko sace bhikkhūti cīvare gāhite pacchā āgato āgantuko bhikkhu. Pattaṭṭhāneti vassaggena pattaṭṭhāne. Paṭhamavassūpagatāti āgantukassa āgamanato puretarameva pacchimikāya vassūpanāyikāya vassūpagatā. Laddhaṃ laddhanti punappunaṃ dāyakānaṃ santikā āgatāgatasāṭakaṃ.
နေဝ ဝသ္သာဝာသိကသ္သ သာမိနောတိ ဆိန္နဝသ္သတ္တာ ဝုတ္တံ။ ပဌမမေဝ ကတိကာယ ကတတ္တာ ‘‘နေဝ အဒာတုံ လဘန္တီ’’တိ ဝုတ္တံ, ဒာတဗ္ဗံ ဝာရေန္တာနံ ဂီဝာ ဟောတီတိ အဓိပ္ပာယော။ တေသမေဝ ဒာတဗ္ဗန္တိ ဝသ္သူပဂတေသု အလဒ္ဓဝသ္သာဝာသိကာနံ ဧကစ္စာနမေဝ ဒာတဗ္ဗံ။
Neva vassāvāsikassa sāminoti chinnavassattā vuttaṃ. Paṭhamameva katikāya katattā ‘‘neva adātuṃ labhantī’’ti vuttaṃ, dātabbaṃ vārentānaṃ gīvā hotīti adhippāyo. Tesameva dātabbanti vassūpagatesu aladdhavassāvāsikānaṃ ekaccānameva dātabbaṃ.
ဘတိနိဝိဋ္ဌန္တိ ပာနီယုပဋ္ဌာနာဒိဘတိံ ကတ္ဝာ လဒ္ဓံ။ သင္ဃိကံ ပနာတိအာဒိ ကေသဉ္စိ ဝာဒဒသ္သနံ။ တတ္ထ အပလောကနကမ္မံ ကတ္ဝာ ဂာဟိတန္တိ ‘‘ဆိန္နဝသ္သာနံ ဝသ္သာဝာသိကဉ္စ ဣဒာနိ ဥပ္ပဇ္ဇနကဝသ္သာဝာသိကဉ္စ ဣမေသံ ဒာတုံ ရုစ္စတီ’’တိ အနန္တရေ ဝုတ္တနယေန အပလောကနံ ကတ္ဝာ ဂာဟိတံ သင္ဃေန ဒိန္နတ္တာ ဝိဗ္ဘန္တောပိ လဘတိ။ ပဂေဝ ဆိန္နဝသ္သော။ ပစ္စယဝသေန ဂာဟိတံ ပန တေမာသံ ဝသိတ္ဝာ ဂဟေတုံ အတ္တနာ, ဒာယကေဟိ စ အနုမတတ္တာ ဘတိနိဝိဋ္ဌမ္ပိ ဆိန္နဝသ္သောပိ ဝိဗ္ဘန္တောပိ န လဘတီတိ ကေစိ အာစရိယာ ဝဒန္တိ။ ဣဒဉ္စ ပစ္ဆာ ဝုတ္တတ္တာ ပမာဏံ။ တေနေဝ ဝသ္သူပနာယိကဒိဝသေ ဧဝ ဒာယကေဟိ ဒိန္နဝသ္သာဝာသိကံ ဂဟိတဘိက္ခုနော ဝသ္သစ္ဆေဒံ အကတ္ဝာ ဝာသောဝ ဟေဋ္ဌာ ဝိဟိတော, န ပာနီယုပဋ္ဌာနာဒိဘတိကရဏဝတ္တံ။ ယဒိ ဟိ တံ နိဝိဋ္ဌမေဝ သိယာ, ဘတိကရဏမေဝ ဝိဓာတဗ္ဗံ။ တသ္မာ ဝသ္သဂ္ဂေန ဂာဟိတံ ဆိန္နဝသ္သာဒယော န လဘန္တီတိ ဝေဒိတဗ္ဗံ။
Bhatiniviṭṭhanti pānīyupaṭṭhānādibhatiṃ katvā laddhaṃ. Saṅghikaṃ panātiādi kesañci vādadassanaṃ. Tattha apalokanakammaṃ katvā gāhitanti ‘‘chinnavassānaṃ vassāvāsikañca idāni uppajjanakavassāvāsikañca imesaṃ dātuṃ ruccatī’’ti anantare vuttanayena apalokanaṃ katvā gāhitaṃ saṅghena dinnattā vibbhantopi labhati. Pageva chinnavasso. Paccayavasena gāhitaṃ pana temāsaṃ vasitvā gahetuṃ attanā, dāyakehi ca anumatattā bhatiniviṭṭhampi chinnavassopi vibbhantopi na labhatīti keci ācariyā vadanti. Idañca pacchā vuttattā pamāṇaṃ. Teneva vassūpanāyikadivase eva dāyakehi dinnavassāvāsikaṃ gahitabhikkhuno vassacchedaṃ akatvā vāsova heṭṭhā vihito, na pānīyupaṭṭhānādibhatikaraṇavattaṃ. Yadi hi taṃ niviṭṭhameva siyā, bhatikaraṇameva vidhātabbaṃ. Tasmā vassaggena gāhitaṃ chinnavassādayo na labhantīti veditabbaṃ.
‘‘သင္ဃိကံ ဟောတီ’’တိ ဧတေန ဝုတ္ထဝသ္သာနမ္ပိ ဝသ္သာဝာသိကဘာဂော သင္ဃိကတော အမောစိတော တေသံ ဝိဗ္ဘမေန သင္ဃိကော ဟောတီတိ ဒသ္သေတိ။ လဘတီတိ ‘‘မမ ပတ္တဘာဂံ ဧတသ္သ ဒေထာ’’တိ ဒာယကေ သမ္ပဋိစ္ဆာပေန္တေနေဝ သင္ဃိကတော ဝိယောဇိတံ ဟောတီတိ ဝုတ္တံ။
‘‘Saṅghikaṃ hotī’’ti etena vutthavassānampi vassāvāsikabhāgo saṅghikato amocito tesaṃ vibbhamena saṅghiko hotīti dasseti. Labhatīti ‘‘mama pattabhāgaṃ etassa dethā’’ti dāyake sampaṭicchāpenteneva saṅghikato viyojitaṃ hotīti vuttaṃ.
ဝရဘာဂံ သာမဏေရသ္သာတိ တသ္သ ပဌမဂာဟတ္တာ, ထေရေန ပုဗ္ဗေ ပဌမဘာဂသ္သ ဂဟိတတ္တာ, ဣဒာနိ ဂယ္ဟမာနသ္သ ဒုတိယဘာဂတ္တာ စ ဝုတ္တံ။
Varabhāgaṃ sāmaṇerassāti tassa paṭhamagāhattā, therena pubbe paṭhamabhāgassa gahitattā, idāni gayhamānassa dutiyabhāgattā ca vuttaṃ.
သေနာသနဂ္ဂာဟကထာဝဏ္ဏနာ နိဋ္ဌိတာ။
Senāsanaggāhakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / သေနာသနဂ္ဂာဟာပကသမ္မုတိ • Senāsanaggāhāpakasammuti
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / သေနာသနဂ္ဂာဟကထာ • Senāsanaggāhakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သေနာသနဂ္ဂာဟာပကသမ္မုတိကထာဝဏ္ဏနာ • Senāsanaggāhāpakasammutikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သေနာသနဂ္ဂာဟကထာဝဏ္ဏနာ • Senāsanaggāhakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / သေနာသနဂ္ဂာဟကထာ • Senāsanaggāhakathā
