| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
ஸேனாஸனக்³கா³ஹாபகஸம்முதி
Senāsanaggāhāpakasammuti
317. அத² கோ² பி⁴க்கூ²னங் ஏதத³ஹோஸி – ‘கேன நு கோ² ஸேனாஸனங் கா³ஹேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங் …பே॰… ‘‘அனுஜானாமி, பி⁴க்க²வே, பஞ்சஹங்கே³ஹி ஸமன்னாக³தங் பி⁴க்கு²ங் ஸேனாஸனக்³கா³ஹாபகங் ஸம்மன்னிதுங் – யோ ந ச²ந்தா³க³திங் க³ச்செ²ய்ய, ந தோ³ஸாக³திங் க³ச்செ²ய்ய, ந மோஹாக³திங் க³ச்செ²ய்ய, ந ப⁴யாக³திங் க³ச்செ²ய்ய, க³ஹிதாக³ஹிதஞ்ச ஜானெய்ய. ஏவஞ்ச பன, பி⁴க்க²வே, ஸம்மன்னிதப்³போ³ –
317. Atha kho bhikkhūnaṃ etadahosi – ‘kena nu kho senāsanaṃ gāhetabba’’nti? Bhagavato etamatthaṃ ārocesuṃ …pe… ‘‘anujānāmi, bhikkhave, pañcahaṅgehi samannāgataṃ bhikkhuṃ senāsanaggāhāpakaṃ sammannituṃ – yo na chandāgatiṃ gaccheyya, na dosāgatiṃ gaccheyya, na mohāgatiṃ gaccheyya, na bhayāgatiṃ gaccheyya, gahitāgahitañca jāneyya. Evañca pana, bhikkhave, sammannitabbo –
‘‘பட²மங் பி⁴க்கு² யாசிதப்³போ³, யாசித்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Paṭhamaṃ bhikkhu yācitabbo, yācitvā byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமங் பி⁴க்கு²ங் ஸேனாஸனக்³கா³ஹாபகங் ஸம்மன்னெய்ய. ஏஸா ஞத்தி.
‘‘Suṇātu me, bhante, saṅgho. Yadi saṅghassa pattakallaṃ, saṅgho itthannāmaṃ bhikkhuṃ senāsanaggāhāpakaṃ sammanneyya. Esā ñatti.
‘‘ஸுணாது மே, ப⁴ந்தே, ஸங்கோ⁴. ஸங்கோ⁴ இத்த²ன்னாமங் பி⁴க்கு²ங் ஸேனாஸனக்³கா³ஹாபகங் ஸம்மன்னதி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ ஸேனாஸனக்³கா³ஹாபகஸ்ஸ ஸம்முதி, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Saṅgho itthannāmaṃ bhikkhuṃ senāsanaggāhāpakaṃ sammannati. Yassāyasmato khamati itthannāmassa bhikkhuno senāsanaggāhāpakassa sammuti, so tuṇhassa; yassa nakkhamati, so bhāseyya.
‘‘ஸம்மதோ ஸங்கே⁴ன இத்த²ன்னாமோ பி⁴க்கு² ஸேனாஸனக்³கா³ஹாபகோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி .
‘‘Sammato saṅghena itthannāmo bhikkhu senāsanaggāhāpako. Khamati saṅghassa, tasmā tuṇhī, evametaṃ dhārayāmī’’ti .
318. அத² கோ² ஸேனாஸனக்³கா³ஹாபகானங் பி⁴க்கூ²னங் ஏதத³ஹோஸி – ‘‘கத²ங் நு கோ² ஸேனாஸனங் கா³ஹேதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘அனுஜானாமி, பி⁴க்க²வே, பட²மங் பி⁴க்கூ² க³ணேதுங் , பி⁴க்கூ² க³ணெத்வா ஸெய்யா க³ணேதுங், ஸெய்யா க³ணெத்வா ஸெய்யக்³கே³ன கா³ஹேது’’ந்தி. ஸெய்யக்³கே³ன கா³ஹெந்தா ஸெய்யா உஸ்ஸாரயிங்ஸு…பே॰… ‘‘அனுஜானாமி, பி⁴க்க²வே, விஹாரக்³கே³ன கா³ஹேது’’ந்தி. விஹாரக்³கே³ன கா³ஹெந்தா விஹாரா உஸ்ஸாரயிங்ஸு…பே॰… ‘‘அனுஜானாமி, பி⁴க்க²வே, பரிவேணக்³கே³ன கா³ஹேது’’ந்தி. பரிவேணக்³கே³ன கா³ஹெந்தா பரிவேணா உஸ்ஸாரயிங்ஸு…பே॰… ‘‘அனுஜானாமி, பி⁴க்க²வே, அனுபா⁴க³ம்பி தா³துங். க³ஹிதே அனுபா⁴கே³ அஞ்ஞோ பி⁴க்கு² ஆக³ச்ச²தி, ந அகாமா தா³தப்³போ³’’தி.
318. Atha kho senāsanaggāhāpakānaṃ bhikkhūnaṃ etadahosi – ‘‘kathaṃ nu kho senāsanaṃ gāhetabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, paṭhamaṃ bhikkhū gaṇetuṃ , bhikkhū gaṇetvā seyyā gaṇetuṃ, seyyā gaṇetvā seyyaggena gāhetu’’nti. Seyyaggena gāhentā seyyā ussārayiṃsu…pe… ‘‘anujānāmi, bhikkhave, vihāraggena gāhetu’’nti. Vihāraggena gāhentā vihārā ussārayiṃsu…pe… ‘‘anujānāmi, bhikkhave, pariveṇaggena gāhetu’’nti. Pariveṇaggena gāhentā pariveṇā ussārayiṃsu…pe… ‘‘anujānāmi, bhikkhave, anubhāgampi dātuṃ. Gahite anubhāge añño bhikkhu āgacchati, na akāmā dātabbo’’ti.
தேன கோ² பன ஸமயேன பி⁴க்கூ² நிஸ்ஸீமே டி²தஸ்ஸ ஸேனாஸனங் கா³ஹெந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, நிஸ்ஸீமே டி²தஸ்ஸ ஸேனாஸனங் கா³ஹேதப்³ப³ங். யோ கா³ஹெய்ய, ஆபத்தி து³க்கடஸ்ஸா’’தி.
Tena kho pana samayena bhikkhū nissīme ṭhitassa senāsanaṃ gāhenti. Bhagavato etamatthaṃ ārocesuṃ. ‘‘Na, bhikkhave, nissīme ṭhitassa senāsanaṃ gāhetabbaṃ. Yo gāheyya, āpatti dukkaṭassā’’ti.
தேன கோ² பன ஸமயேன பி⁴க்கூ² ஸேனாஸனங் க³ஹெத்வா ஸப்³ப³காலங் படிபா³ஹந்தி. ப⁴க³வதோ ஏதமத்த²ங் ஆரோசேஸுங். ‘‘ந, பி⁴க்க²வே, ஸேனாஸனங் க³ஹெத்வா ஸப்³ப³காலங் படிபா³ஹேதப்³ப³ங். யோ படிபா³ஹெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, வஸ்ஸானங் தேமாஸங் படிபா³ஹிதுங், உதுகாலங் பன ந படிபா³ஹிது’’ந்தி.
Tena kho pana samayena bhikkhū senāsanaṃ gahetvā sabbakālaṃ paṭibāhanti. Bhagavato etamatthaṃ ārocesuṃ. ‘‘Na, bhikkhave, senāsanaṃ gahetvā sabbakālaṃ paṭibāhetabbaṃ. Yo paṭibāheyya, āpatti dukkaṭassa. Anujānāmi, bhikkhave, vassānaṃ temāsaṃ paṭibāhituṃ, utukālaṃ pana na paṭibāhitu’’nti.
அத² கோ² பி⁴க்கூ²னங் ஏதத³ஹோஸி – ‘‘கதி நு கோ² ஸேனாஸனக்³கா³ஹா’’தி? ப⁴க³வதோ ஏதமத்த²ங் ஆரோசேஸுங். ‘‘தயோ மே, பி⁴க்க²வே, ஸேனாஸனக்³கா³ஹா – புரிமகோ, பச்சி²மகோ, அந்தராமுத்தகோ. அபரஜ்ஜுக³தாய ஆஸாள்ஹியா புரிமகோ கா³ஹேதப்³போ³. மாஸக³தாய ஆஸாள்ஹியா பச்சி²மகோ கா³ஹேதப்³போ³. அபரஜ்ஜுக³தாய பவாரணாய ஆயதிங் வஸ்ஸாவாஸத்தா²ய அந்தராமுத்தகோ கா³ஹேதப்³போ³. இமே கோ², பி⁴க்க²வே, தயோ ஸேனாஸனக்³கா³ஹா’’தி.
Atha kho bhikkhūnaṃ etadahosi – ‘‘kati nu kho senāsanaggāhā’’ti? Bhagavato etamatthaṃ ārocesuṃ. ‘‘Tayo me, bhikkhave, senāsanaggāhā – purimako, pacchimako, antarāmuttako. Aparajjugatāya āsāḷhiyā purimako gāhetabbo. Māsagatāya āsāḷhiyā pacchimako gāhetabbo. Aparajjugatāya pavāraṇāya āyatiṃ vassāvāsatthāya antarāmuttako gāhetabbo. Ime kho, bhikkhave, tayo senāsanaggāhā’’ti.
து³தியபா⁴ணவாரோ நிட்டி²தோ.
Dutiyabhāṇavāro niṭṭhito.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஸேனாஸனக்³கா³ஹகதா² • Senāsanaggāhakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸேனாஸனக்³கா³ஹாபகஸம்முதிகதா²வண்ணனா • Senāsanaggāhāpakasammutikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸேனாஸனக்³கா³ஹகதா²வண்ணனா • Senāsanaggāhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸேனாஸனக்³கா³ஹகதா²வண்ணனா • Senāsanaggāhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஸேனாஸனக்³கா³ஹகதா² • Senāsanaggāhakathā
