| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. நாத²வக்³கோ³
2. Nāthavaggo
1-4. ஸேனாஸனஸுத்தாதி³வண்ணனா
1-4. Senāsanasuttādivaṇṇanā
11-14. து³தியஸ்ஸ பட²மே நாதிதூ³ரந்தி கோ³சரட்டா²னதோ அட்³ட⁴கா³வுததோ ஓரபா⁴க³தாய நாதிதூ³ரங். நாச்சாஸன்னந்தி பச்சி²மேன பமாணேன கோ³சரட்டா²னதோ பஞ்சத⁴னுஸதிகதாய ந அதிஆஸன்னங். தாய ச பன நாதிதூ³ரனாச்சாஸன்னதாய கோ³சரட்டா²னபடிபரிஸ்ஸயாதி³ரஹிதமக்³க³தாய ச க³மனஸ்ஸ ச ஆக³மனஸ்ஸ ச யுத்தரூபத்தா க³மனாக³மனஸம்பன்னங். தி³வஸபா⁴கே³ மஹாஜனஸங்கிண்ணதாபா⁴வேன தி³வா அப்பாகிண்ணங். அபா⁴வத்தோ² ஹி அயங் அப்ப-ஸத்³தோ³ ‘‘அப்பிச்சோ²’’திஆதீ³ஸு விய. ரத்தியங் மனுஸ்ஸஸத்³தா³பா⁴வேன ரத்திங் அப்பஸத்³த³ங். ஸப்³ப³தா³பி ஜனஸன்னிபாதனிக்³கோ⁴ஸாபா⁴வேன அப்பனிக்³கோ⁴ஸங்.
11-14. Dutiyassa paṭhame nātidūranti gocaraṭṭhānato aḍḍhagāvutato orabhāgatāya nātidūraṃ. Nāccāsannanti pacchimena pamāṇena gocaraṭṭhānato pañcadhanusatikatāya na atiāsannaṃ. Tāya ca pana nātidūranāccāsannatāya gocaraṭṭhānapaṭiparissayādirahitamaggatāya ca gamanassa ca āgamanassa ca yuttarūpattā gamanāgamanasampannaṃ. Divasabhāge mahājanasaṃkiṇṇatābhāvena divā appākiṇṇaṃ. Abhāvattho hi ayaṃ appa-saddo ‘‘appiccho’’tiādīsu viya. Rattiyaṃ manussasaddābhāvena rattiṃ appasaddaṃ. Sabbadāpi janasannipātanigghosābhāvena appanigghosaṃ.
அப்பகஸிரேனாதி அகஸிரேன ஸுகே²னேவ. ஸீலாதி³கு³ணானங் தி²ரபா⁴வப்பத்தியா தே²ரா. ஸுத்தகெ³ய்யாதி³ ப³ஹு ஸுதங் ஏதேஸந்தி ப³ஹுஸ்ஸுதா. தமுக்³க³ஹதா⁴ரணேன ஸம்மதே³வ க³ரூனங் ஸந்திகே ஆக³மிதபா⁴வேன ச ஆக³தோ பரியத்தித⁴ம்மஸங்கா²தோ ஆக³மோ ஏதேஸந்தி ஆக³தாக³மா. ஸுத்தாபி⁴த⁴ம்மஸங்கா²தஸ்ஸ த⁴ம்மஸ்ஸ தா⁴ரணேன த⁴ம்மத⁴ரா. வினயஸ்ஸ தா⁴ரணேன வினயத⁴ரா. தேஸங் த⁴ம்மவினயானங் மாதிகாய தா⁴ரணேன மாதிகாத⁴ரா. தத்த² தத்த² த⁴ம்மபரிபுச்சா²ய பரிபுச்ச²தி. அத்த²பரிபுச்சா²ய பரிபஞ்ஹதி வீமங்ஸதி விசாரேதி. இத³ங், ப⁴ந்தே, கத²ங், இமஸ்ஸ கோ அத்தோ²தி பரிபுச்சா²பரிபஞ்ஹாகாரத³ஸ்ஸனங். அவிவடஞ்சேவ பாளியா அத்த²ங் பதே³ஸந்தரபாளித³ஸ்ஸனேன ஆக³மதோ விவரந்தி. அனுத்தானீகதஞ்ச யுத்திவிபா⁴வனேன உத்தானிங் கரொந்தி. கங்கா²டா²னியேஸு த⁴ம்மேஸு ஸங்ஸயுப்பத்தியா ஹேதுதாய க³ண்டி²ட்டா²னபூ⁴தேஸு பாளிப்பதே³ஸேஸு யாதா²வதோ வினிச்ச²யப்பதா³னேன கங்க²ங் படிவினோதெ³ந்தி.
Appakasirenāti akasirena sukheneva. Sīlādiguṇānaṃ thirabhāvappattiyā therā. Suttageyyādi bahu sutaṃ etesanti bahussutā. Tamuggahadhāraṇena sammadeva garūnaṃ santike āgamitabhāvena ca āgato pariyattidhammasaṅkhāto āgamo etesanti āgatāgamā. Suttābhidhammasaṅkhātassa dhammassa dhāraṇena dhammadharā. Vinayassa dhāraṇena vinayadharā. Tesaṃ dhammavinayānaṃ mātikāya dhāraṇena mātikādharā. Tattha tattha dhammaparipucchāya paripucchati. Atthaparipucchāya paripañhati vīmaṃsati vicāreti. Idaṃ, bhante, kathaṃ, imassa ko atthoti paripucchāparipañhākāradassanaṃ. Avivaṭañceva pāḷiyā atthaṃ padesantarapāḷidassanena āgamato vivaranti. Anuttānīkatañca yuttivibhāvanena uttāniṃ karonti. Kaṅkhāṭhāniyesu dhammesu saṃsayuppattiyā hetutāya gaṇṭhiṭṭhānabhūtesu pāḷippadesesu yāthāvato vinicchayappadānena kaṅkhaṃ paṭivinodenti.
எத்த² ச நாதிதூ³ரங் நாச்சாஸன்னங் க³மனாக³மனஸம்பன்னந்தி ஏகங் அங்க³ங், தி³வா அப்பாகிண்ணங், ரத்திங் அப்பஸத்³த³ங், அப்பனிக்³கோ⁴ஸந்தி ஏகங், அப்பட³ங்ஸமகஸவாதாதபஸரீஸபஸம்ப²ஸ்ஸந்தி ஏகங், தஸ்மிங் கோ² பன ஸேனாஸனே விஹரந்தஸ்ஸ…பே॰… பரிக்கா²ராதி ஏகங், தஸ்மிங் கோ² பன ஸேனாஸனே தே²ரா…பே॰… கங்க²ங் படிவினோதெ³ந்தீதி ஏகங். ஏவங் பஞ்ச அங்கா³னி வேதி³தப்³பா³னி. து³தியாதீ³னி உத்தானத்தா²னி.
Ettha ca nātidūraṃ nāccāsannaṃ gamanāgamanasampannanti ekaṃ aṅgaṃ, divā appākiṇṇaṃ, rattiṃ appasaddaṃ, appanigghosanti ekaṃ, appaḍaṃsamakasavātātapasarīsapasamphassanti ekaṃ, tasmiṃ kho pana senāsane viharantassa…pe… parikkhārāti ekaṃ, tasmiṃ kho pana senāsane therā…pe… kaṅkhaṃ paṭivinodentīti ekaṃ. Evaṃ pañca aṅgāni veditabbāni. Dutiyādīni uttānatthāni.
ஸேனாஸனஸுத்தாதி³வண்ணனா நிட்டி²தா.
Senāsanasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. ஸேனாஸனஸுத்தங் • 1. Senāsanasuttaṃ
2. பஞ்சங்க³ஸுத்தங் • 2. Pañcaṅgasuttaṃ
3. ஸங்யோஜனஸுத்தங் • 3. Saṃyojanasuttaṃ
4. சேதோகி²லஸுத்தங் • 4. Cetokhilasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. ஸேனாஸனஸுத்தவண்ணனா • 1. Senāsanasuttavaṇṇanā
2. பஞ்சங்க³ஸுத்தவண்ணனா • 2. Pañcaṅgasuttavaṇṇanā
3-4. ஸங்யோஜனஸுத்தாதி³வண்ணனா • 3-4. Saṃyojanasuttādivaṇṇanā
